𑁪. 𑀲𑀢𑁆𑀢𑀯𑀲𑁆𑀲𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀬𑀲𑁆𑀫𑀸 𑀓𑀧𑀺𑀮𑀯𑀢𑁆𑀣𑀼𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀭𑁄 𑀑𑀢𑀸𑀭𑀸𑀧𑁂𑀓𑁆𑀔𑁄 𑀮𑁄𑀓𑀦𑀸𑀣𑀁 𑀅𑀦𑀼𑀩𑀦𑁆𑀥𑀺𑀢𑀼𑀁 𑀆𑀭𑀤𑁆𑀥𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀼𑀭𑁂 𑀩𑁄𑀥𑀺𑀬𑀸 𑀙𑀩𑁆𑀩𑀲𑁆𑀲𑀸𑀦𑀻’’𑀢𑀺. 𑀅𑀢𑀺𑀕𑀳𑁂𑀢𑁆𑀯𑀸𑀢𑀺 𑀅𑀦𑀼𑀕𑀦𑁆𑀢𑁆𑀯𑀸 𑀢𑀲𑁆𑀲 𑀬𑀣𑀸𑀭𑀼𑀘𑀺 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀯𑀢𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸.

𑀅𑀯𑀚𑁆𑀛𑀸𑀬𑀦𑁆𑀢𑁄𑀢𑀺 𑀧𑀚𑁆𑀛𑀸𑀬𑀦𑁆𑀢𑁄. 𑀚𑀺𑀢𑁄 𑀯𑀺𑀢𑁆𑀢𑀧𑀭𑀸𑀚𑀺𑀢𑁄 𑀅𑀲𑀺 𑀦𑀼. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀕𑀭𑀼𑀢𑀭𑀁.

𑀔𑀦𑀺𑀢𑁆𑀯𑀸 𑀉𑀫𑁆𑀫𑀽𑀮𑁂𑀢𑁆𑀯𑀸. 𑀓𑀸𑀫𑀸𑀲𑀯𑀸𑀤𑀻𑀦𑀺 𑀧𑀚𑀳𑀦𑁆𑀢𑁄 𑀅𑀦𑀸𑀲𑀯𑁄.

𑀧𑁂𑀳𑀻𑀢𑀺 𑀅𑀧𑁂𑀳𑀺. 𑀧𑀸𑀭𑀕𑀸𑀫𑀺𑀦𑁄𑀢𑀺 𑀧𑀸𑀭𑀗𑁆𑀕𑀫𑀦𑀲𑀻𑀮𑀸. 𑀢𑁂𑀓𑀸𑀮𑀺𑀓𑁄 𑀅𑀬𑀁 𑀕𑀸𑀫𑀺-𑀲𑀤𑁆𑀤𑁄𑀢𑀺 𑀆𑀳 ‘‘𑀬𑁂𑀧𑀻’’𑀢𑀺𑀆𑀤𑀺.

𑀫𑀸𑀭𑀯𑀺𑀲𑀽𑀓𑀸𑀦𑀻𑀢𑀺 𑀫𑀸𑀭𑀓𑀡𑁆𑀝𑀓𑀸𑀦𑀺 𑀓𑀡𑁆𑀝𑀓𑀲𑀤𑀺𑀲𑀸𑀦𑀺 𑀫𑀸𑀭𑀲𑁆𑀲 𑀤𑀼𑀭𑀸𑀘𑀸𑀭𑀸𑀦𑀺. 𑀯𑀺𑀭𑀼𑀤𑁆𑀥𑀲𑁂𑀯𑀺𑀢𑀸𑀦𑀺 𑀯𑀺𑀭𑁄𑀥𑀯𑀲𑁂𑀦 𑀢𑀸𑀲𑀁𑀬𑁂𑀯 𑀯𑁂𑀯𑀘𑀦𑀸𑀦𑀺. 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀫𑀸𑀬𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑁂𑀚𑀦𑀻𑀬𑀸𑀢𑀺 𑀦𑀺𑀩𑁆𑀩𑁂𑀤𑀤𑀸𑀬𑀺𑀓𑀸. 𑀉𑀓𑁆𑀓𑀡𑁆𑀞𑀦𑀻𑀬𑀸𑀢𑀺 𑀉𑀓𑁆𑀓𑀡𑁆𑀞𑀯𑀳𑀸.

𑀯𑀺𑀓𑀧𑁆𑀧𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀑𑀧𑀫𑁆𑀫𑀧𑀭𑀺𑀓𑀧𑁆𑀧𑀯𑀺𑀲𑀬𑀢𑁆𑀢𑀸 𑀢𑀲𑁆𑀲 𑀓𑀺𑀭𑀺𑀬𑀸𑀧𑀤𑀲𑁆𑀲. 𑀢𑁂𑀦𑀸𑀳 ‘‘𑀅𑀦𑀼𑀧𑀭𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀫𑁂𑀤𑀯𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁. 𑀫𑀼𑀤𑀼𑀦𑁆𑀢𑀺 𑀫𑀼𑀤𑀼𑀫𑀥𑀼𑀭𑀲𑀁 𑀯𑀺𑀦𑁆𑀤𑁂𑀬𑁆𑀬𑀸𑀫 𑀧𑀝𑀺𑀮𑀪𑁂𑀬𑁆𑀬𑀸𑀫. 𑀅𑀲𑁆𑀲𑀸𑀤𑁄𑀢𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑁄.

𑀲𑀢𑁆𑀢𑀯𑀲𑁆𑀲𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.