𑁧. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀚𑀝𑀸𑀘𑀼𑀫𑁆𑀩𑀝𑀓𑁂𑀦𑀸𑀢𑀺 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑁂𑀦 𑀚𑀝𑀸𑀓𑀮𑀸𑀧𑁂𑀦. 𑀅𑀧𑀭𑀺𑀕𑁆𑀕𑀳𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 𑀳𑀺 𑀚𑀝𑀸𑀬 𑀉𑀜𑁆𑀙𑀸𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀉𑀤𑀼𑀫𑁆𑀩𑀭𑀤𑀡𑁆𑀟𑀜𑁆𑀳𑀺 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀸𑀬 𑀕𑀳𑀺𑀢𑀁 𑀢𑁂𑀲𑀁 𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀓𑀸𑀲𑀦𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺. 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀢𑀺𑀯𑀺𑀬 𑀲𑀻𑀲𑀲𑁆𑀲 𑀑𑀓𑀫𑁆𑀧𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀦𑀼𑀓𑁂𑀦 𑀉𑀭𑀁 𑀧𑀳𑀭𑀦𑁆𑀢𑁄 𑀅𑀥𑁄𑀦𑀢𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀚𑀺𑀯𑁆𑀳𑀁 𑀦𑀻𑀳𑀭𑀺𑀢𑁆𑀯𑀸𑀢𑀺 𑀮𑀫𑁆𑀩𑀦𑀘𑀸𑀮𑀦𑀯𑀲𑁂𑀦 𑀫𑀼𑀔𑀢𑁄 𑀦𑀺𑀓𑁆𑀔𑀸𑀫𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀉𑀤𑁆𑀥’’𑀦𑁆𑀢𑀺𑀆𑀤𑀺. 𑀢𑀺𑀲𑀸𑀔𑀦𑁆𑀢𑀺 𑀢𑀺𑀪𑀗𑁆𑀕𑀪𑀓𑀼𑀝𑀺 𑀯𑀺𑀬 𑀦𑀮𑀸𑀝𑁂 𑀚𑀸𑀢𑀢𑁆𑀢𑀸 𑀦𑀮𑀸𑀝𑀺𑀓𑀁. 𑀢𑁂𑀦𑀸𑀳 ‘‘𑀦𑀮𑀸𑀝𑁂 𑀉𑀝𑁆𑀞𑀺𑀢𑀁 𑀯𑀮𑀺𑀢𑁆𑀢𑀬’’𑀦𑁆𑀢𑀺, 𑀢𑀺𑀪𑀗𑁆𑀕𑀯𑀮𑀺𑀓𑀁 𑀦𑀮𑀸𑀝𑁂 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄𑀯 𑀢𑁂𑀮𑁂𑀢𑀺 𑀅𑀢𑁆𑀢𑀦𑁄𑀯 𑀧𑀸𑀧𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁂 𑀢𑁂𑀮𑁂, 𑀧𑀘𑀺𑀢𑀩𑁆𑀩𑀝𑁆𑀞𑀸𑀦𑀕𑁂𑀳𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.