𑁯. 𑀧𑀞𑀫𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁫. 𑀧𑀡𑁆𑀡𑀸𑀲𑀁 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺 𑀯𑀲𑁆𑀲𑀲𑀢𑀢𑁄 𑀉𑀧𑀭𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑁄. 𑀲𑀝𑁆𑀞𑀺 𑀯𑀸 𑀯𑀲𑁆𑀲𑀸𑀦𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀩𑀸𑀓𑀼𑀮𑁄. 𑀧𑀝𑀺𑀳𑀭𑀺𑀢𑁆𑀯𑀸 𑀧𑀘𑁆𑀘𑀦𑀻𑀓𑀪𑀸𑀯𑁂 𑀲𑀸𑀢𑀁 𑀲𑀼𑀔𑀁 𑀏𑀢𑀲𑁆𑀲𑀸𑀢𑀺 𑀧𑀘𑁆𑀘𑀦𑀻𑀓𑀲𑀸𑀢𑁄, 𑀢𑀩𑁆𑀪𑀸𑀯𑁄 𑀧𑀘𑁆𑀘𑀦𑀻𑀓𑀲𑀸𑀢𑀢𑀸, 𑀢𑀸𑀬. 𑀅𑀪𑀺𑀪𑀯𑀺𑀢𑁆𑀯𑀸 𑀅𑀪𑀸𑀲𑀺 𑀧𑀝𑀺𑀯𑀘𑀦𑀁 𑀚𑀸𑀦𑀫𑀸𑀦𑁄𑀯.

𑀦 𑀳𑀻𑀴𑁂𑀬𑁆𑀬 𑀦 𑀚𑀺𑀕𑀼𑀘𑁆𑀙𑁂𑀬𑁆𑀬. 𑀏𑀯𑀦𑁆𑀢𑀺 𑀲𑁄 𑀤𑀸𑀭𑀓𑁄 𑀯𑀺𑀬 𑀓𑀺𑀜𑁆𑀘𑀺 𑀅𑀘𑀺𑀦𑁆𑀢𑁂𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑁄 𑀘𑀭𑁂𑀬𑁆𑀬, 𑀏𑀯𑀁 𑀳𑀺𑀲𑁆𑀲 𑀘𑀺𑀢𑁆𑀢𑀤𑀼𑀓𑁆𑀔𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀚𑁆𑀚𑀮𑀺𑀢𑀲𑀻𑀲𑁄 𑀯𑀺𑀬 𑀘𑀭𑁂𑀬𑁆𑀬𑀸𑀢𑀺 𑀬𑀣𑀸 𑀧𑀚𑁆𑀚𑀮𑀺𑀢𑀲𑀻𑀲𑁄 𑀧𑀼𑀭𑀺𑀲𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀢𑀲𑁆𑀲𑁂𑀯 𑀯𑀽𑀧𑀲𑀫𑀸𑀬 𑀯𑀸𑀬𑀫𑁂𑀬𑁆𑀬, 𑀏𑀯𑀁 𑀲𑀧𑁆𑀧𑀼𑀭𑀺𑀲𑁄 𑀆𑀬𑀼𑀁 𑀧𑀭𑀺𑀢𑁆𑀢𑀦𑁆𑀢𑀺 𑀜𑀢𑁆𑀯𑀸 𑀢𑁂𑀦𑁂𑀯 𑀦𑀬𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀁, 𑀅𑀦𑀺𑀘𑁆𑀘𑀢𑁆𑀢𑀸 𑀏𑀯 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀦𑀫𑁆𑀧𑀺 𑀑𑀢𑀭𑀺𑀢𑁆𑀯𑀸 𑀢𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄𑀧𑀺 𑀲𑀗𑁆𑀔𑀸𑀭𑀯𑀺𑀕𑀫𑀸𑀬 𑀘𑀭𑁂𑀬𑁆𑀬 𑀧𑀝𑀺𑀧𑀚𑁆𑀚𑁂𑀬𑁆𑀬.

𑀧𑀞𑀫𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.