𑁬. 𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁨. 𑀲𑀼𑀭𑀸𑀓𑀸𑀭𑀓𑀸𑀦𑀦𑁆𑀢𑀺 𑀧𑀺𑀝𑁆𑀞𑀲𑀼𑀭𑀸𑀬𑁄𑀚𑀦𑀓𑀸𑀦𑀁. 𑀓𑁄𑀲𑀮𑀸𑀦𑀁 𑀇𑀲𑁆𑀲𑀭𑁄𑀢𑀺 𑀓𑁄𑀲𑀮𑁄, 𑀓𑁄𑀲𑀮𑀭𑀸𑀚𑀲𑁆𑀲 𑀅𑀬𑀦𑁆𑀢𑀺 𑀓𑁄𑀲𑀮𑀺𑀓𑀸. 𑀧𑀭𑀺𑀪𑁄𑀕𑀧𑀸𑀢𑀻𑀢𑀺 𑀪𑀢𑁆𑀢𑀧𑀭𑀺𑀪𑁄𑀚𑀦𑀢𑁆𑀣𑀸𑀬 𑀧𑀸𑀢𑀺 𑀧𑀭𑀺𑀪𑁄𑀕𑀧𑀸𑀢𑀺. 𑀓𑀫𑁆𑀫𑀸𑀭𑀼𑀤𑁆𑀥𑀦𑀧𑀡𑀸𑀴𑀺𑀬𑀸𑀢𑀺 𑀓𑀫𑁆𑀫𑀸𑀭𑀼𑀤𑁆𑀥𑀦𑀧𑀡𑀸𑀴𑀺𑀫𑀼𑀔𑁂. 𑀥𑀫𑀫𑀸𑀦𑀸𑀬𑀸𑀢𑀺 𑀥𑀫𑀺𑀬𑀫𑀸𑀦𑀸𑀬. 𑀢𑀁 𑀧𑀦 𑀬𑀲𑁆𑀫𑀸 𑀪𑀲𑁆𑀢𑀯𑀸𑀢𑁂𑀳𑀺 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀪𑀲𑁆𑀢𑀯𑀸𑀢𑁂𑀦 𑀧𑀽𑀭𑀺𑀬𑀫𑀸𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀬𑀸𑀫𑀪𑀽𑀫𑀺𑀬𑀦𑁆𑀢𑀺 𑀪𑀕𑀯𑀢𑁄 𑀧𑀝𑀺𑀲𑀮𑁆𑀮𑀸𑀦𑀝𑁆𑀞𑀸𑀦𑁂 𑀲𑀜𑁆𑀘𑀭𑀦𑁆𑀢𑀁 𑀫𑀸𑀭𑀁 𑀫𑀁𑀲𑀘𑀓𑁆𑀔𑀼𑀦𑀸𑀯 𑀤𑀺𑀲𑁆𑀯𑀸. 𑀢𑁂𑀦𑀸𑀳 ‘‘𑀯𑀺𑀚𑁆𑀚𑀼𑀮𑀢𑀸𑀮𑁄𑀓𑁂𑀦𑀸’’𑀢𑀺.

𑀲𑁂𑀬𑁆𑀬𑀢𑁆𑀣𑀸𑀬𑀸𑀢𑀺 𑀲𑁂𑀬𑁆𑀬𑀸𑀦𑀺𑀲𑀁𑀲𑀸𑀬. 𑀢𑁂𑀦𑀸𑀳 ‘‘𑀞𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀅𑀢𑁆𑀢𑀲𑀜𑁆𑀜𑀢𑁄𑀢𑀺 𑀅𑀢𑁆𑀢𑀪𑀸𑀯𑁂𑀦 𑀲𑀁𑀬𑀢𑁄. 𑀢𑁂𑀦𑀸𑀳 ‘‘𑀲𑀁𑀬𑀢𑀢𑁆𑀢𑀪𑀸𑀯𑁄’’𑀢𑀺. 𑀢𑀁𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀭𑀳𑀺𑀢𑁂 𑀩𑀼𑀤𑁆𑀥𑀫𑀼𑀦𑀺𑀲𑁆𑀫𑀺𑀁 𑀅𑀯𑀝𑁆𑀞𑀺𑀢𑀲𑁆𑀲. 𑀯𑁄𑀲𑁆𑀲𑀚𑁆𑀚 𑀘𑀭𑁂𑀬𑁆𑀬 𑀢𑀢𑁆𑀣 𑀲𑁄𑀢𑀺 𑀇𑀫𑀺𑀦𑀸 𑀪𑀕𑀯𑀸 𑀢𑀁 𑀩𑁆𑀬𑀸𑀓𑀭𑀫𑀸𑀦𑁄 𑀯𑀺𑀪𑀺𑀁𑀲𑀺𑀢𑀸 𑀩𑀼𑀤𑁆𑀥𑀸𑀦𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺 𑀪𑀬𑀸𑀪𑀸𑀯𑀢𑁄? 𑀓𑁂𑀯𑀮𑀁 𑀧𑀦 𑀅𑀦𑀝𑁆𑀞𑀯𑀮𑀺𑀓𑀁 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬 𑀢𑁆𑀯𑀫𑁂𑀯 𑀆𑀬𑀸𑀲𑀁 𑀆𑀧𑀚𑁆𑀚𑀺𑀲𑁆𑀲𑀲𑀻𑀢𑀺 𑀫𑀸𑀭𑀁 𑀲𑀦𑁆𑀢𑀚𑁆𑀚𑁂𑀢𑀺.

𑀪𑁂𑀭𑀯𑀸𑀢𑀺 𑀅𑀯𑀻𑀢𑀭𑀸𑀕𑀸𑀦𑀁 𑀪𑀬𑀚𑀦𑀓𑀸. 𑀢𑀢𑁆𑀣𑀸𑀢𑀺 𑀢𑀁𑀦𑀺𑀫𑀺𑀢𑁆𑀢𑀁. 𑀨𑀮𑁂𑀬𑁆𑀬𑀸𑀢𑀺 𑀪𑀺𑀚𑁆𑀚𑁂𑀬𑁆𑀬. 𑀲𑀢𑁆𑀢𑀺𑀲𑀮𑁆𑀮𑀦𑁆𑀢𑀺 𑀲𑀢𑁆𑀢𑀺𑀲𑀗𑁆𑀔𑀸𑀢𑀁 𑀧𑀼𑀣𑀼𑀲𑀮𑁆𑀮𑀁. 𑀉𑀭𑀲𑁆𑀫𑀺𑀁 𑀘𑀸𑀭𑀬𑁂𑀬𑁆𑀬𑀼𑀦𑁆𑀢𑀺 𑀨𑀸𑀲𑀼𑀁 𑀯𑀺𑀚𑁆𑀛𑀺𑀢𑀼𑀁 𑀞𑀧𑁂𑀬𑁆𑀬𑀼𑀁 𑀉𑀕𑁆𑀕𑀺𑀭𑁂𑀬𑁆𑀬𑀼𑀁. 𑀔𑀦𑁆𑀥𑀼𑀧𑀥𑀻𑀲𑀽𑀢𑀺 𑀔𑀦𑁆𑀥𑀲𑀗𑁆𑀔𑀸𑀢𑁂𑀲𑀼 𑀉𑀧𑀥𑀻𑀲𑀼. 𑀢𑀸𑀡𑀁 𑀓𑀭𑁄𑀦𑁆𑀢𑀺 𑀦𑀸𑀫𑀸𑀢𑀺 𑀢𑀢𑁄 𑀪𑀬𑀦𑀺𑀫𑀺𑀢𑁆𑀢𑀢𑁄 𑀅𑀢𑁆𑀢𑀦𑁄 𑀢𑀸𑀡𑀁 𑀓𑀭𑁄𑀦𑁆𑀢𑀺 𑀦𑀸𑀫.

𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.