𑁧𑁦. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀓𑀺𑀲𑁆𑀫𑀺𑀦𑁆𑀢𑀺 𑀓𑀺𑀲𑁆𑀫𑀺𑀁 𑀲𑀢𑀺? 𑀢𑀲𑁆𑀲 𑀧𑀦 𑀲𑀦𑁆𑀢𑀪𑀸𑀯𑁄 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀓𑀺𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂’’𑀢𑀺? 𑀮𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺 𑀅𑀦𑀼𑀧𑀸𑀤𑀸𑀦𑀢𑁆𑀢𑀸 𑀮𑁄𑀓𑀲𑀫𑀜𑁆𑀜𑀸𑀬. 𑀙𑀲𑀽𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄 𑀲𑀦𑁆𑀣𑀯𑀦𑁆𑀢𑀺 𑀅𑀥𑀺𑀓𑀲𑀺𑀦𑁂𑀳𑀁 𑀓𑀭𑁄𑀢𑀺 𑀅𑀥𑀺𑀓𑀲𑀺𑀦𑁂𑀳𑀯𑀢𑁆𑀣𑀼𑀪𑀸𑀯𑀢𑁄 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀁. 𑀉𑀧𑀸𑀤𑀸𑀬𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸 𑀅𑀧𑀭𑀓𑀸𑀮𑀓𑀺𑀭𑀺𑀬𑀁 𑀅𑀧𑁂𑀓𑁆𑀔𑀢𑀻𑀢𑀺 𑀯𑀘𑀦𑀲𑁂𑀲𑀯𑀲𑁂𑀦 𑀓𑀺𑀭𑀺𑀬𑀸𑀧𑀤𑀁 𑀕𑀳𑀺𑀢𑀁 ‘‘𑀧𑀯𑀢𑁆𑀢𑀢𑀻’’𑀢𑀺. 𑀓𑀺𑀁 𑀧𑀦 𑀧𑀯𑀢𑁆𑀢𑀢𑀺? 𑀮𑁄𑀓𑁄, 𑀮𑁄𑀓𑀲𑀫𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀙𑀲𑀽𑀢𑀺 𑀇𑀤𑀁 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀙𑀴𑀸𑀬𑀢𑀦𑀦𑀺𑀫𑀺𑀢𑁆𑀢𑀜𑁆𑀳𑀺 𑀲𑀩𑁆𑀩𑀤𑀼𑀓𑁆𑀔𑀁. 𑀅𑀬𑀦𑁆𑀢𑀺 𑀲𑀢𑁆𑀢𑀮𑁄𑀓𑁄. 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺 𑀙𑀴𑀸𑀬𑀢𑀦𑀁 𑀦𑀸𑀫 𑀫𑀽𑀮𑀁 𑀲𑀩𑁆𑀩𑀤𑀼𑀓𑁆𑀔𑀸𑀦𑀦𑁆𑀢𑀺 𑀓𑀢𑁆𑀯𑀸. 𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀲𑀦𑁆𑀣𑀯𑀁 𑀓𑀭𑁄𑀢𑀺 𑀯𑀺𑀲𑁂𑀲𑀢𑁄 𑀭𑀽𑀧𑀸𑀤𑀻𑀦𑀁 𑀢𑀡𑁆𑀳𑀸𑀯𑀢𑁆𑀣𑀼𑀓𑀢𑁆𑀢𑀸. 𑀬𑀲𑁆𑀫𑀸 𑀘𑀓𑁆𑀔𑀸𑀤𑀻𑀦𑀁 𑀲𑀦𑁆𑀢𑀧𑁆𑀧𑀦𑀯𑀲𑁂𑀦 𑀭𑀽𑀧𑀸𑀤𑀻𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀮𑁄𑀓𑀲𑁆𑀲 𑀦𑀺𑀲𑁂𑀯𑀺𑀢𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀙𑀦𑁆𑀦𑀁…𑀧𑁂… 𑀯𑀺𑀳𑀜𑁆𑀜𑀢𑀻’’𑀢𑀺.

𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀤𑁆𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.