𑁮. 𑀫𑀳𑀤𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀦𑀺𑀥𑀻𑀬𑀢𑀻𑀢𑀺 𑀦𑀺𑀥𑀸𑀦𑀁. 𑀦𑀺𑀥𑀸𑀢𑀩𑁆𑀩𑀢𑀁 𑀕𑀢𑀁 𑀦𑀺𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑀲𑀸𑀭𑀸𑀤𑀻𑀢𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀧𑀯𑀸𑀴𑀭𑀚𑀢𑀚𑀸𑀢𑀭𑀽𑀧𑀸𑀤𑀺. 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀳𑀸𑀧𑀡-𑀥𑀜𑁆𑀜𑀓𑁄𑀝𑁆𑀞𑀪𑀡𑁆𑀟𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀫𑁆𑀧𑀺 𑀳𑀺 𑀦𑀺𑀘𑁆𑀘𑀧𑀭𑀺𑀩𑁆𑀩𑀬𑀯𑀲𑁂𑀦 𑀪𑀼𑀜𑁆𑀚𑀻𑀬𑀢𑀻𑀢𑀺 ‘‘𑀪𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀕𑀺𑀚𑁆𑀛𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀅𑀪𑀺𑀕𑀺𑀚𑁆𑀛𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀢𑁆𑀣𑁂𑀦𑁆𑀢𑀻’’𑀢𑀺. 𑀅𑀦𑀮𑀗𑁆𑀓𑀢𑀸𑀢𑀺 𑀦 𑀅𑀮𑀁 𑀧𑀭𑀺𑀬𑀢𑁆𑀢𑀦𑁆𑀢𑀺 𑀏𑀯𑀁 𑀓𑀢𑀘𑀺𑀢𑁆𑀢𑀸, 𑀅𑀢𑁆𑀭𑀺𑀘𑁆𑀙𑀢𑀸𑀫𑀳𑀺𑀘𑁆𑀙𑀢𑀸𑀳𑀺 𑀅𑀪𑀺𑀪𑀽𑀢𑀸. 𑀢𑁂𑀦𑀸𑀳 ‘‘𑀅𑀢𑀺𑀢𑁆𑀢𑀸 𑀅𑀧𑀭𑀺𑀬𑀢𑁆𑀢𑀚𑀸𑀢𑀸’’𑀢𑀺. 𑀉𑀲𑁆𑀲𑀼𑀓𑁆𑀓𑀚𑀸𑀢𑁂𑀲𑀽𑀢𑀺 𑀢𑀁𑀢𑀁𑀓𑀺𑀘𑁆𑀘𑁂 𑀲𑀜𑁆𑀚𑀸𑀢𑀉𑀲𑁆𑀲𑀼𑀓𑁆𑀓𑁂𑀲𑀼. 𑀦𑀸𑀦𑀸𑀓𑀺𑀘𑁆𑀘𑀚𑀸𑀢𑁂𑀲𑀽𑀢𑀺 𑀦𑀸𑀦𑀸𑀯𑀺𑀥𑀓𑀺𑀘𑁆𑀘𑁂𑀲𑀼, 𑀲𑀜𑁆𑀚𑀸𑀢𑀦𑀸𑀦𑀸𑀓𑀺𑀘𑁆𑀘𑁂𑀲𑀼 𑀯𑀸. 𑀯𑀝𑁆𑀝𑀕𑀸𑀫𑀺𑀓𑀧𑀲𑀼𑀢𑁂𑀦 𑀯𑀝𑁆𑀝𑀲𑁄𑀢𑀁 𑀅𑀦𑀼𑀲𑀭𑀦𑁆𑀢𑁂𑀲𑀼. 𑀢𑀡𑁆𑀳𑀸𑀦𑀺𑀯𑀸𑀲𑀢𑀸𑀬 𑀕𑁂𑀳𑀦𑁆𑀢𑀺𑀧𑀺 𑀅𑀕𑀸𑀭𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀕𑁂𑀳’’𑀦𑁆𑀢𑀺. 𑀯𑀺𑀭𑀸𑀚𑀺𑀬𑀸𑀢𑀺 𑀳𑁂𑀢𑀼𑀅𑀢𑁆𑀣𑀤𑀻𑀧𑀓𑀁 𑀧𑀤𑀦𑁆𑀢𑀺 𑀆𑀳 ‘‘𑀯𑀺𑀭𑀸𑀚𑁂𑀢𑁆𑀯𑀸’’𑀢𑀺, 𑀢𑁆𑀯𑀸-𑀲𑀤𑁆𑀤𑁄𑀧𑀺 𑀘𑀸𑀬𑀁 𑀳𑁂𑀢𑀼𑀅𑀢𑁆𑀣𑁄𑀢𑀺.

𑀫𑀳𑀤𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.