𑁯. 𑀓𑀼𑀝𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀅𑀦𑁆𑀢𑁄𑀢𑀺 𑀓𑀼𑀘𑁆𑀙𑀺𑀅𑀩𑁆𑀪𑀦𑁆𑀢𑀭𑁂. 𑀯𑀲𑀦𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀯𑀲𑀦𑀪𑀸𑀯𑁂𑀦. 𑀓𑀼𑀮𑀧𑀯𑁂𑀡𑀺𑀦𑁆𑀢𑀺 𑀓𑀼𑀮𑀸𑀘𑀸𑀭𑀁 𑀓𑀼𑀮𑀢𑀦𑁆𑀢𑀺𑀁. 𑀲𑀦𑁆𑀢𑀸𑀦𑀓𑀝𑁆𑀞𑁂𑀦𑀸𑀢𑀺 𑀓𑀼𑀮𑀲𑀦𑁆𑀢𑀢𑀺𑀬𑀸 𑀩𑀦𑁆𑀥𑀦𑀪𑀸𑀯𑁂𑀦. 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀧𑀼𑀘𑁆𑀙𑀺𑀢𑀢𑁆𑀣𑀲𑁆𑀲 𑀅𑀦𑀼𑀚𑀸𑀦𑀦𑀯𑀲𑁂𑀦 ‘‘𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀆𑀧𑀸𑀤𑀺𑀓𑀸 𑀧𑁄𑀲𑀺𑀓𑀸 𑀫𑀸𑀢𑀼𑀘𑁆𑀙𑀸 𑀫𑀳𑀸𑀧𑀚𑀸𑀧𑀢𑀺 𑀫𑀸𑀢𑀸 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀧𑀳𑀸𑀬 𑀧𑀩𑁆𑀩𑀚𑀺𑀢𑀢𑁆𑀢𑀸’’𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀁. 𑀧𑀳𑀸𑀬 𑀧𑀩𑁆𑀩𑀚𑀺𑀢𑀢𑁆𑀢𑀸 𑀦𑀢𑁆𑀣𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀼𑀦 𑀫𑀸𑀢𑀼𑀓𑀼𑀘𑁆𑀙𑀺𑀯𑀸𑀲𑀸𑀤𑀻𑀦𑀁 𑀅𑀪𑀸𑀯𑀯𑀘𑀦𑁂𑀦𑁂𑀯 𑀯𑀝𑁆𑀝𑀫𑁆𑀳𑀺 𑀩𑀦𑁆𑀥𑀦𑀲𑁆𑀲 𑀅𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀦 𑀕𑀳𑀺𑀢𑁄. 𑀅𑀬𑀁 𑀓𑀺𑀭 𑀤𑁂𑀯𑀢𑀸 𑀬𑀣𑀸 𑀧𑀼𑀣𑀼𑀚𑁆𑀚𑀦𑀸 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀫𑀬𑀸 𑀲𑀦𑁆𑀦𑀸𑀳𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀓𑀼𑀝𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.