𑁩. 𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁯. 𑀉𑀡𑁆𑀳𑀪𑀸𑀯𑁂𑀦 𑀢𑀧𑀦𑀢𑁄 𑀢𑀧𑀁 𑀉𑀤𑀓𑀁 𑀏𑀢𑀲𑁆𑀲𑀸𑀢𑀺 𑀢𑀧𑁄𑀤𑀸, 𑀭𑀳𑀤𑁄. 𑀢𑁂𑀦𑀸𑀳 ‘‘𑀢𑀢𑁆𑀢𑁄𑀤𑀓𑀲𑁆𑀲 𑀭𑀳𑀤𑀲𑁆𑀲𑀸’’𑀢𑀺. 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁, ‘‘𑀯𑁂𑀪𑀸𑀭𑀧𑀩𑁆𑀩𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄 𑀉𑀤𑀓𑀭𑀳𑀤𑀢𑁄, 𑀢𑀁 𑀭𑀳𑀤𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀦𑀸𑀕𑀪𑀯𑀦𑀸𑀕𑀢𑁄𑀧𑀺 𑀳𑀺 𑀲𑁄 𑀭𑀳𑀤𑁄 𑀢𑀢𑁄 𑀉𑀧𑀭𑀺 𑀫𑀦𑀼𑀲𑁆𑀲𑀮𑁄𑀓𑁂 𑀚𑀮𑀸𑀲𑀬𑁂𑀦 𑀲𑀫𑁆𑀩𑀤𑁆𑀥𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀧𑁄𑀤𑀸 𑀦𑀸𑀫 𑀦𑀤𑀻 𑀲𑀦𑁆𑀤𑀢𑀻’’𑀢𑀺. 𑀏𑀤𑀺𑀲𑀸𑀢𑀺 𑀓𑀼𑀣𑀺𑀢𑀸 𑀉𑀡𑁆𑀳𑀸, 𑀅𑀦𑁆𑀯𑀢𑁆𑀣𑀦𑀸𑀫𑀯𑀲𑁂𑀦 𑀢𑀧𑁄𑀤𑀸𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀧𑁂𑀢𑀮𑁄𑀓𑁄𑀢𑀺 𑀧𑁂𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀘𑁆𑀘𑁂𑀓𑀦𑀺𑀭𑀬𑀁 𑀲𑀦𑁆𑀥𑀸𑀬𑀸𑀳. 𑀇𑀫𑀲𑁆𑀲 𑀧𑀦 𑀆𑀭𑀸𑀫𑀲𑁆𑀲𑀸𑀢𑀺 𑀢𑀧𑁄𑀤𑀸𑀭𑀸𑀫𑀲𑁆𑀲. 𑀢𑀢𑁄𑀢𑀺 𑀢𑀧𑁄𑀤𑀸𑀲𑀗𑁆𑀔𑀸𑀢𑀦𑀤𑀺𑀢𑁄. 𑀫𑀳𑀸𑀉𑀤𑀓𑀭𑀳𑀤𑁄𑀢𑀺 𑀫𑀳𑀸𑀉𑀤𑀓𑀪𑀭𑀺𑀢𑀁 𑀧𑀮𑁆𑀮𑀮𑀁.

𑁨𑁮𑁦. 𑀲𑀫𑀺𑀤𑁆𑀥𑁄𑀢𑀺 𑀉𑀴𑀸𑀭𑁄, 𑀧𑀭𑀺𑀧𑀼𑀡𑁆𑀡𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀤𑀺𑀫𑁆𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀫𑀲𑁆𑀲𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑁄, 𑀲𑁄 𑀏𑀯 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀢𑁆𑀢𑀺𑀪𑀽𑀢𑁄’’𑀢𑀺. ‘‘𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀅𑀤𑁆𑀥𑀪𑁂𑀤𑀫𑀼𑀔𑁂𑀦 𑀲𑀗𑁆𑀔𑀢𑀥𑀫𑁆𑀫𑀩𑁄𑀥𑀯𑀘𑀦𑀁.

𑁨𑁮𑁨. 𑀓𑀸𑀫𑀁 𑀔𑀦𑁆𑀥𑀸𑀤𑀺𑀯𑀲𑁂𑀦 𑀯𑀺𑀪𑀚𑀦𑀁 𑀲𑀸𑀥𑀸𑀭𑀡𑀁, 𑀧𑀞𑀫𑀤𑀼𑀢𑀺𑀬𑀘𑀢𑀼𑀢𑁆𑀣𑀲𑀼𑀢𑁆𑀢𑁂𑀲𑀼 𑀧𑀦 𑀔𑀦𑁆𑀥𑀯𑀲𑁂𑀦 𑀯𑀺𑀪𑀚𑀦𑀁 𑀓𑀢𑁆𑀯𑀸 𑀇𑀥 𑀢𑀣𑀸 𑀅𑀓𑀢𑁆𑀯𑀸 𑀏𑀯𑀁 𑀤𑁂𑀲𑀦𑀸𑀬 𑀞𑀧𑀦𑀁 𑀢𑀢𑁄 𑀅𑀜𑁆𑀜𑀣𑀸 𑀆𑀬𑀢𑀦𑀯𑀲𑁂𑀦 𑀯𑀺𑀪𑀚𑀦𑀢𑁆𑀣𑀁. 𑀏𑀯𑀁 𑀯𑀺𑀪𑀺𑀦𑁆𑀦𑀸 𑀳𑀺 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀢𑁄 𑀅𑀦𑀯𑀲𑁂𑀲𑀸 𑀲𑀫𑁆𑀫𑀲𑀦𑀼𑀧𑀕𑀸 𑀥𑀫𑁆𑀫𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺; 𑀅𑀬𑀁 𑀓𑀺𑀭𑁂𑀢𑁆𑀣 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁄 𑀣𑁂𑀭𑁂𑀦 𑀦𑀬𑀢𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀇𑀫𑀲𑁆𑀫𑀺𑀁 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦𑁂𑀯 𑀫𑀸𑀢𑀺𑀓𑀁 𑀞𑀧𑁂𑀲𑀻𑀢𑀺 𑀮𑁄𑀓𑀺𑀬𑀸𑀦𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀏𑀯 𑀲𑀦𑁆𑀥𑀸𑀬 𑀫𑀸𑀢𑀺𑀓𑀁 𑀞𑀧𑁂𑀲𑀺, 𑀬𑀣𑀸 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 𑀔𑀦𑁆𑀥𑀯𑀲𑁂𑀦 𑀯𑀺𑀪𑀢𑁆𑀢𑀁, 𑀏𑀯𑀁 𑀬𑀤𑀺 𑀪𑀕𑀯𑀢𑀸 𑀇𑀥𑀸𑀧𑀺 𑀯𑀺𑀪𑀚𑀦𑀁 𑀇𑀘𑁆𑀙𑀺𑀢𑀁 𑀲𑀺𑀬𑀸, 𑀢𑀣𑀸 𑀯𑀺𑀪𑀚𑁂𑀬𑁆𑀬, 𑀬𑀲𑁆𑀫𑀸 𑀧𑀦 𑀢𑀣𑀸 𑀅𑀯𑀺𑀪𑀚𑀺𑀢𑁆𑀯𑀸𑀯 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁄, 𑀢𑀲𑁆𑀫𑀸 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦𑁂𑀯𑁂𑀢𑁆𑀣 𑀯𑀺𑀪𑀚𑀦𑀁 𑀪𑀕𑀯𑀢𑀸 𑀘 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀦𑀬𑀕𑁆𑀕𑀸𑀳𑁂 𑀞𑀢𑁆𑀯𑀸 𑀣𑁂𑀭𑁄 𑀯𑀺𑀪𑀚𑀺. 𑀢𑁂𑀦𑀸𑀳 𑁋 ‘‘𑀦𑀬𑀁 𑀧𑀝𑀺𑀮𑀪𑀺𑀢𑁆𑀯𑀸 𑀏𑀯𑀫𑀸𑀳𑀸’’𑀢𑀺. 𑀪𑀸𑀭𑀺𑀬𑀁 𑀓𑀢𑀦𑁆𑀢𑀺 𑀤𑀼𑀓𑁆𑀓𑀭𑀁 𑀓𑀢𑀁. 𑀅𑀧𑀤𑁂 𑀧𑀤𑀁 𑀤𑀲𑁆𑀲𑀺𑀢𑀁 𑀆𑀓𑀸𑀲𑁂 𑀧𑀤𑀁 𑀓𑀢𑀁 𑀲𑀸𑀥𑀸𑀭𑀡𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑀺𑀝𑁆𑀞𑀯𑀺𑀲𑀬𑀢𑀸𑀬 𑀤𑀲𑁆𑀲𑀺𑀢𑀢𑁆𑀢𑀸. 𑀦𑀺𑀓𑀦𑁆𑀢𑀺𑀯𑀺𑀜𑁆𑀜𑀸𑀡𑀦𑁆𑀢𑀺 𑀦𑀺𑀓𑀦𑁆𑀢𑀺𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀜𑁆𑀜𑀸𑀡𑀁, ‘‘𑀙𑀦𑁆𑀤𑀭𑀸𑀕𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀻’’𑀢𑀺 𑀯𑀘𑀦𑀢𑁄. 𑀫𑀦𑁄𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀤𑁆𑀯𑀸𑀭𑀪𑀽𑀢𑀁.

𑁨𑁮𑁩. 𑀧𑀢𑁆𑀣𑀦𑀸𑀯𑀲𑁂𑀦 𑀞𑀧𑁂𑀲𑀻𑀢𑀺 𑀧𑀢𑁆𑀣𑀦𑀸𑀯𑀲𑁂𑀦 𑀘𑀺𑀢𑁆𑀢𑀁 𑀧𑀯𑀢𑁆𑀢𑁂𑀲𑀺.

𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸

𑀲𑀫𑀢𑁆𑀢𑀸.