𑁧. 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁨. 𑀏𑀓𑀸 𑀭𑀢𑁆𑀢𑀺 𑀏𑀓𑀭𑀢𑁆𑀢𑁄, 𑀪𑀤𑁆𑀤𑁄 𑀏𑀓𑀭𑀢𑁆𑀢𑁄 𑀏𑀢𑀲𑁆𑀲𑀸𑀢𑀺 𑀪𑀤𑁆𑀤𑁂𑀓𑀭𑀢𑁆𑀢𑀁, 𑀯𑀺𑀧𑀲𑁆𑀲𑀦𑀁 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑁄 𑀧𑀼𑀕𑁆𑀕𑀮𑁄. 𑀢𑁂𑀦𑀸𑀳 𑁋 ‘‘𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀲𑀫𑀦𑁆𑀦𑀸𑀕𑀢𑀢𑁆𑀢𑀸’’𑀢𑀺. 𑀢𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀺𑀬𑀸 𑀧𑀦 𑀪𑀤𑁆𑀤𑁂𑀓𑀭𑀢𑁆𑀢𑀲𑀳𑀘𑀭𑀡𑀢𑁄 𑀪𑀤𑁆𑀤𑁂𑀓𑀭𑀢𑁆𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀯𑁄, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀉𑀤𑁆𑀤𑀺𑀲𑀢𑀺 𑀏𑀢𑁂𑀦𑀸𑀢𑀺 𑀉𑀤𑁆𑀤𑁂𑀲𑁄, 𑀲𑀗𑁆𑀔𑁂𑀧𑀤𑁂𑀲𑀦𑀸 𑀏𑀯. 𑀬𑀲𑁆𑀫𑀸 𑀧𑀦 𑀦𑀺𑀤𑁆𑀤𑁂𑀲𑀧𑀤𑀸𑀦𑀁 𑀚𑀦𑀦𑀺𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀫𑀸𑀢𑀸 𑀯𑀺𑀬𑀸𑀢𑀺 𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸𑀳 ‘‘𑀉𑀤𑁆𑀤𑁂𑀲𑀦𑁆𑀢𑀺 𑀫𑀸𑀢𑀺𑀓’’𑀦𑁆𑀢𑀺. 𑀉𑀤𑁆𑀤𑀺𑀝𑁆𑀞𑀫𑀢𑁆𑀣𑀁 𑀯𑀺𑀪𑀚𑀢𑀺 𑀏𑀢𑁂𑀦𑀸𑀢𑀺 𑀯𑀺𑀪𑀗𑁆𑀕𑁄 𑀯𑀺𑀢𑁆𑀣𑀸𑀭𑀤𑁂𑀲𑀦𑀸, 𑀢𑁂𑀦𑀸𑀳 𑁋 ‘‘𑀯𑀺𑀢𑁆𑀣𑀸𑀭𑀪𑀸𑀚𑀦𑀺𑀬’’𑀦𑁆𑀢𑀺 ‘‘𑀬𑀣𑀸𑀉𑀤𑁆𑀤𑀺𑀝𑁆𑀞𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀪𑀸𑀚𑁂𑀢𑀺 𑀯𑀺𑀪𑀚𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸.

𑀉𑀧𑁆𑀧𑀸𑀤𑀸𑀤𑀺𑀔𑀡𑀢𑁆𑀢𑀬𑀁 𑀧𑀢𑁆𑀯𑀸 𑀅𑀢𑀺𑀓𑁆𑀓𑀫𑀁 𑀅𑀢𑀺𑀓𑁆𑀓𑀦𑁆𑀢𑀁 𑀅𑀢𑀻𑀢𑀁. 𑀢𑀁 𑀧𑀦 𑀅𑀢𑁆𑀣𑀢𑁄 𑀯𑀺𑀕𑀢𑀁 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀆𑀳 ‘‘𑀅𑀢𑀻𑀢𑁂 𑀔𑀦𑁆𑀥𑀧𑀜𑁆𑀘𑀓𑁂’’𑀢𑀺. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦𑀸𑀦𑀼𑀕𑀘𑁆𑀙𑁂𑀬𑁆𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀳𑀺 𑀦𑀸𑀦𑀼𑀪𑀯𑁂𑀬𑁆𑀬, 𑀦𑀸𑀪𑀺𑀦𑀦𑁆𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀣𑀸 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀭𑀻𑀢𑀕𑁆𑀕𑀸𑀳𑀯𑀲𑁂𑀦 𑀅𑀢𑀻𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀫𑀺𑀘𑁆𑀙𑀸𑀅𑀪𑀺𑀦𑀺𑀯𑀺𑀲𑀦𑀁 𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸; 𑀏𑀯𑀁 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀭𑀻𑀢𑀕𑁆𑀕𑀸𑀳𑀯𑀲𑁂𑀦 𑀅𑀦𑀸𑀕𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀫𑀺𑀘𑁆𑀙𑀸𑀅𑀪𑀺𑀦𑀺𑀯𑀺𑀲𑀦𑀁 𑀧𑀭𑀸𑀫𑀸𑀲𑁄 𑀤𑀺𑀝𑁆𑀞𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀤𑀺𑀝𑁆𑀞𑀺𑀧𑀢𑁆𑀣𑀦𑀸𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦 𑀧𑀢𑁆𑀣𑁂𑀬𑁆𑀬𑀸’’𑀢𑀺. 𑀬𑀤𑀢𑀻𑀢𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀅𑀧𑀢𑁆𑀢’’𑀦𑁆𑀢𑀺 𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀫𑁆𑀧𑀺 𑀳𑀺 𑀓𑀸𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀘𑀸’’𑀢𑀺. 𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄, ‘‘𑀅𑀢𑀻𑀢𑀁 𑀢𑀡𑁆𑀳𑀸𑀤𑀺𑀯𑀲𑁂𑀦 𑀦𑀸𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀲𑀩𑁆𑀩𑀲𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀲𑀲𑀯𑀺𑀲𑀸𑀡𑀁 𑀯𑀺𑀬, 𑀢𑀣𑀸 𑀅𑀦𑀸𑀕𑀢𑀫𑁆𑀧𑀺 𑀦 𑀧𑀢𑁆𑀣𑁂𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣 𑀲𑀺𑀬𑀸 𑁋 𑀅𑀢𑀻𑀢𑀁 𑀦𑀸𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀅𑀪𑀺𑀦𑀦𑁆𑀤𑀦𑀸𑀬 𑀦𑀺𑀧𑁆𑀧𑀬𑁄𑀚𑀦𑀢𑁆𑀢𑀸, 𑀅𑀦𑀸𑀕𑀢𑀧𑀢𑁆𑀣𑀦𑀸 𑀧𑀦 𑀲𑀨𑀮𑀸𑀧𑀺 𑀲𑀺𑀬𑀸𑀢𑀺 𑀦 𑀲𑀩𑁆𑀩𑀲𑁄 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀢𑀺? 𑀦, 𑀢𑀲𑁆𑀲𑀸𑀧𑀺 𑀲𑀯𑀺𑀖𑀸𑀢𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀳𑀻𑀦𑀦𑁆𑀢𑀺 𑀦𑀺𑀲𑁆𑀲𑀝𑁆𑀞𑀲𑀪𑀸𑀯𑀁. 𑀦𑀺𑀭𑀼𑀤𑁆𑀥𑀦𑁆𑀢𑀺 𑀪𑀕𑁆𑀕𑀁. 𑀅𑀢𑁆𑀣𑀗𑁆𑀕𑀢𑀦𑁆𑀢𑀺 𑀯𑀺𑀦𑀸𑀲𑀁. 𑀅𑀧𑁆𑀧𑀢𑁆𑀢𑀦𑁆𑀢𑀺 𑀲𑀪𑀸𑀯𑀁 𑀉𑀧𑁆𑀧𑀸𑀤𑀸𑀤𑀺𑀓𑀁 𑀅𑀲𑀫𑁆𑀧𑀢𑁆𑀢𑀁. 𑀅𑀚𑀸𑀢𑀦𑁆𑀢𑀺 𑀦 𑀚𑀸𑀢𑀁. 𑀅𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀬𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀔𑀡𑁂, 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀯𑀸 𑀥𑀫𑁆𑀫𑀧𑀼𑀜𑁆𑀚𑁂 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸. 𑀅𑀭𑀜𑁆𑀜𑀸𑀤𑀻𑀲𑀼 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀢𑁂𑀦 𑀅𑀭𑀜𑁆𑀜𑁂 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀧𑀩𑁆𑀩𑀢𑀓𑀦𑁆𑀤𑀭𑀸𑀤𑀻𑀲𑀼 𑀯𑀸𑀢𑀺 𑀞𑀸𑀦𑀦𑀺𑀬𑀫𑀸𑀪𑀸𑀯𑀸 𑀅𑀦𑀼𑀧𑀲𑁆𑀲𑀦𑀸𑀬 𑀲𑀸𑀢𑀘𑁆𑀘𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀺. 𑀬𑀫𑀓𑀸𑀤𑀺𑀯𑀲𑁂𑀦 𑀧𑀭𑀺𑀩𑁆𑀭𑀽𑀳𑀺𑀬𑀫𑀸𑀦𑀸 𑀯𑀺𑀧𑀲𑁆𑀲𑀦𑀸 𑀯𑀺𑀬 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑁄𑀧𑀦𑀺𑀬𑀸𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀦𑁆𑀢𑀺 𑀇𑀤𑀁 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺. 𑀕𑀸𑀣𑀸𑀬𑀫𑀬𑀫𑀢𑁆𑀣𑁄 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀬𑀼𑀚𑁆𑀚𑀢𑀻𑀢𑀺 𑀆𑀳 𑁋 ‘‘𑀯𑀺𑀧𑀲𑁆𑀲𑀦𑀸 𑀳𑀻’’𑀢𑀺𑀆𑀤𑀺. 𑀓𑀺𑀁 𑀏𑀢𑀸𑀬 𑀧𑀭𑀺𑀬𑀸𑀬𑀓𑀣𑀸𑀬𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁 𑀤𑀲𑁆𑀲𑁂𑀢𑀼𑀁, ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀣𑀁 𑀧𑀦 𑀦𑀺𑀘𑁆𑀘𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀩𑁆𑀭𑀽𑀳𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺𑀆𑀤𑀺. 𑀏𑀢𑁂𑀦 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑀸 𑀩𑁆𑀭𑀽𑀳𑀦𑀸𑀬, 𑀢𑁂𑀲𑀁 𑀆𑀭𑀫𑁆𑀫𑀡𑀫𑁆𑀧𑀺 𑀅𑀢𑁆𑀣𑀢𑁄 𑀅𑀦𑀼𑀩𑁆𑀭𑀽𑀳𑀺𑀢𑀁 𑀦𑀸𑀫 𑀳𑁄𑀢𑀺 𑀩𑀳𑀼𑀮𑀁 𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀆𑀤𑀺𑀢𑁄 𑀢𑀸𑀧𑀦𑀁 𑀆𑀢𑀸𑀧𑀦𑀁, 𑀢𑁂𑀦 𑀆𑀭𑀫𑁆𑀪𑀥𑀸𑀢𑀼𑀫𑀸𑀳. 𑀧𑀭𑀺𑀢𑁄 𑀢𑀸𑀧𑀦𑀁 𑀧𑀭𑀺𑀢𑀸𑀧𑀦𑀁, 𑀢𑁂𑀦 𑀦𑀺𑀓𑁆𑀓𑀫𑀥𑀸𑀢𑀼𑀧𑀭𑀓𑁆𑀓𑀫𑀥𑀸𑀢𑀼𑀬𑁄 𑀘𑀸𑀢𑀺. 𑀢𑀲𑁆𑀲 𑀲𑁂𑀦𑀸𑀢𑀺 𑀢𑀲𑁆𑀲 𑀫𑀘𑁆𑀘𑀼𑀦𑁄 𑀲𑀳𑀓𑀭𑀡𑀝𑁆𑀞𑁂𑀦 𑀲𑁂𑀦𑀸 𑀯𑀺𑀬𑀸𑀢𑀺 𑀲𑁂𑀦𑀸. 𑀲𑀗𑁆𑀕𑀭𑁄𑀢𑀺𑀆𑀤𑀻𑀲𑀼 𑀫𑀺𑀢𑁆𑀢𑀸𑀓𑀸𑀭𑀕𑁆𑀕𑀳𑀡𑁂𑀦 𑀲𑀸𑀫𑀧𑀬𑁄𑀕𑀫𑀸𑀳. 𑀮𑀜𑁆𑀚𑀕𑁆𑀕𑀳𑀡𑁂𑀦 𑀮𑀜𑁆𑀚𑀤𑀸𑀦𑀁, 𑀢𑁂𑀦 𑀤𑀸𑀦𑀧𑁆𑀧𑀬𑁄𑀕𑀁. 𑀩𑀮𑀭𑀸𑀲𑀻𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀩𑀮𑀓𑀸𑀬𑁄. 𑀢𑁂𑀦 𑀤𑀡𑁆𑀟𑀪𑁂𑀤𑀸𑀦𑀺 𑀯𑀤𑀢𑀺. 𑀪𑁂𑀤𑁄𑀧𑀺 𑀳𑀺 𑀩𑀮𑀯𑀢𑁄 𑀏𑀯 𑀇𑀚𑁆𑀛𑀢𑀺, 𑀲𑁆𑀯𑀸𑀬𑀁 𑀘𑀢𑀼𑀩𑁆𑀩𑀺𑀥𑁄𑀧𑀺 𑀉𑀧𑀸𑀬𑀬𑁄𑀕𑁂𑀦 𑀲𑀫𑁆𑀧𑀯𑀢𑁆𑀢𑀻𑀬𑀢𑀺. 𑀢𑀢𑁆𑀣 𑀢𑀢𑁆𑀣 𑀘 𑀲𑀗𑁆𑀕𑀁 𑀆𑀲𑀢𑁆𑀢𑀺𑀁 𑀅𑀭𑀢𑀺 𑀤𑁂𑀢𑀻𑀢𑀺 𑀲𑀗𑁆𑀕𑀭𑁄 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀲𑀗𑁆𑀕𑀭𑀡𑀯𑀲𑁂𑀦 𑀢𑀲𑁆𑀲 𑀧𑀝𑀺𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄.

𑀉𑀝𑁆𑀞𑀸𑀳𑀓𑀁 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀁. 𑀲𑀧𑀭𑀳𑀺𑀢𑀲𑀻𑀯𑀦𑀮𑀓𑁆𑀔𑀡𑁂𑀦 𑀅𑀲𑀸𑀥𑀼𑀪𑀸𑀯𑀧𑀭𑀫𑁆𑀫𑀼𑀔𑀪𑀸𑀯𑀕𑀫𑀦𑁂𑀦 𑀯𑀸 𑀲𑀦𑁆𑀢𑁄.

𑁨𑁭𑁩. 𑀫𑀦𑀼𑀜𑁆𑀜𑀭𑀽𑀧𑀯𑀲𑁂𑀦𑁂𑀯 𑀏𑀯𑀁𑀭𑀽𑀧𑁄 𑀅𑀳𑁄𑀲𑀻𑀦𑁆𑀢𑀺 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀺 𑀢𑀢𑁆𑀣 𑀦𑀦𑁆𑀤𑀺𑀬𑀸𑀲𑀫𑀦𑁆𑀯𑀸𑀦𑀬𑀦𑀢𑁄. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀼𑀲𑀮𑀲𑀼𑀔𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀯𑀲𑁂𑀦𑀸𑀢𑀺 𑀓𑀼𑀲𑀮𑀯𑁂𑀤𑀦𑀸𑀯𑀲𑁂𑀦 𑀲𑀼𑀔𑀯𑁂𑀤𑀦𑀸𑀯𑀲𑁂𑀦 𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀯𑁂𑀤𑀦𑀸𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀬 𑀲𑀢𑀺 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸 𑀲𑀺𑀤𑁆𑀥𑀸 𑀏𑀯𑀸𑀢𑀺 𑁋 ‘‘𑀢𑀡𑁆𑀳𑀁 𑀲𑀫𑀦𑁆𑀯𑀸𑀦𑁂𑀢𑀺’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀳𑀻𑀦𑀭𑀽𑀧𑀸𑀤𑀺…𑀧𑁂… 𑀦 𑀫𑀜𑁆𑀜𑀢𑀺 𑀅𑀫𑀦𑀼𑀜𑁆𑀜𑁄𑀧𑀺 𑀲𑀫𑀸𑀦𑁄 𑀲𑀫𑀦𑀼𑀜𑁆𑀜𑀪𑀸𑀯𑀲𑁆𑀲𑁂𑀯 𑀯𑀲𑁂𑀦 𑀫𑀜𑁆𑀜𑀦𑀸𑀬 𑀧𑀯𑀢𑁆𑀢𑀦𑀢𑁄. 𑀦𑀸𑀦𑀼𑀧𑀯𑀢𑁆𑀢𑀬𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀦𑀦𑁆𑀤𑀺𑀬𑀸 𑀤𑀽𑀭𑀻𑀓𑀢𑀢𑁆𑀢𑀸.

𑁨𑁭𑁪. 𑀉𑀴𑀸𑀭𑀲𑀼𑀦𑁆𑀤𑀭𑀪𑀸𑀯𑀫𑀼𑀔𑁂𑀦𑁂𑀯 𑀅𑀦𑀸𑀕𑀢𑁂𑀲𑀼𑀧𑀺 𑀭𑀽𑀧𑀸𑀤𑀻𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑀦𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳 𑁋 ‘‘𑀏𑀯𑀁𑀭𑀽𑀧𑁄…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑁨𑁭𑁫. 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀬𑀣𑀸 𑀦𑀦𑁆𑀤𑀺𑀬𑀸 𑀅𑀲𑀫𑀦𑁆𑀯𑀸𑀦𑀬𑀦𑀚𑁄𑀢𑀦𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀧𑀢𑀺𑀝𑁆𑀞𑀧𑁂𑀢𑀼𑀁, ‘‘𑀅𑀢𑀻𑀢𑀁 𑀦 𑀦𑁆𑀯𑀸𑀕𑀫𑁂𑀬𑁆𑀬𑀸’’𑀢𑀺 𑀉𑀤𑁆𑀤𑁂𑀲𑀲𑁆𑀲, ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀁 𑀅𑀦𑁆𑀯𑀸𑀕𑀫𑁂𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁭𑁩) 𑀯𑀺𑀪𑀗𑁆𑀕𑁄 𑀯𑀼𑀢𑁆𑀢𑁄, 𑀏𑀯𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀉𑀤𑁆𑀤𑁂𑀲𑀲𑁆𑀲 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀗𑁆𑀕𑁂 𑀯𑀼𑀘𑁆𑀘𑀫𑀸𑀦𑁂 𑀯𑀺𑀧𑀲𑁆𑀲𑀦𑀸𑀧𑀝𑀺𑀓𑁆𑀔𑁂𑀧𑀯𑀲𑁂𑀦, ‘‘𑀓𑀣𑀜𑁆𑀘…𑀧𑁂… 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀢𑁆𑀣𑀼𑀤𑁂𑀲𑀦𑀸𑀦𑀬𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀘𑁄𑀤𑀺𑀢𑀁, 𑀬𑀲𑁆𑀫𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀓𑀲𑁆𑀲 𑀉𑀤𑁆𑀤𑁂𑀲𑀲𑁆𑀲 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀧𑀝𑀺𑀓𑁆𑀔𑁂𑀧𑀯𑀲𑁂𑀦, ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀽’’𑀢𑀺 𑀯𑀺𑀪𑀗𑁆𑀕𑀤𑁂𑀲𑀦𑀸 𑀲𑀫𑁆𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀲𑁆𑀲𑀸 𑀏𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀏𑀯. 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀲𑀁𑀳𑀻𑀭𑀢𑀻𑀢𑀺 𑀫𑀸𑀢𑀺𑀓𑀁 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀫𑀸𑀢𑀺𑀓𑀸𑀯𑀲𑁂𑀦 𑀧𑀤𑀼𑀤𑁆𑀥𑀸𑀭𑀁 𑀓𑀢𑁆𑀯𑀸, ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑀼𑀢𑀯𑀸 𑀲𑀼𑀢𑀯𑀸’’𑀢𑀺 𑀘 𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑁄 𑀯𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀸𑀬 𑀅𑀪𑀸𑀯𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀬 𑀅𑀪𑀸𑀯𑀺𑀢𑀢𑀸𑀬 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑀸𑀬 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀲𑀧𑀢𑁆𑀢𑁂𑀳𑀺 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀞𑀧𑀦𑀸𑀬 𑀆𑀓𑀟𑁆𑀠𑀻𑀬𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀲𑀬𑁂 𑀢𑀢𑁄 𑀏𑀯 𑀅𑀧𑀸𑀬𑀲𑀫𑀼𑀤𑁆𑀤𑀁 𑀲𑀁𑀲𑀸𑀭𑀲𑀫𑀼𑀤𑁆𑀤𑀁 𑀆𑀦𑀻𑀬𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.