𑁮. 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁦. 𑀉𑀕𑁆𑀕𑀳𑀺𑀢𑀼𑀦𑁆𑀢𑀺 𑀲𑀺𑀓𑁆𑀔𑀺𑀢𑀼𑀁. 𑀉𑀕𑁆𑀕𑀸𑀳𑁂𑀢𑀼𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀢𑀼𑀁, 𑀧𑀸𑀞𑀢𑁄 𑀅𑀢𑁆𑀢𑀦𑀸 𑀬𑀣𑀸𑀉𑀕𑁆𑀕𑀳𑀺𑀢𑀫𑀢𑁆𑀣𑀁 𑀢𑀩𑁆𑀩𑀺𑀪𑀸𑀯𑀦𑀢𑁆𑀣𑀸𑀬 𑀉𑀘𑁆𑀘𑀸𑀭𑀡𑀯𑀲𑁂𑀦 𑀧𑀭𑁂𑀲𑀁 𑀕𑀸𑀳𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀬𑀦𑁆𑀢𑀺 𑀤𑀺𑀝𑁆𑀞𑀺𑀁. 𑀲𑀸 𑀳𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁂𑀢𑀺 𑀲𑀫𑁆𑀩𑀦𑁆𑀥𑀸 𑀏𑀢𑀺 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀢𑁄 𑀅𑀢𑁆𑀣𑀗𑁆𑀕𑀫𑀸 𑀅𑀬𑀁 𑀏𑀢𑁆𑀢𑀓𑁄 𑀓𑀸𑀮𑁄 𑀭𑀢𑁆𑀢𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄 𑀤𑀺𑀯𑀸 𑀦𑀸𑀫, 𑀢𑀲𑁆𑀲 𑀧𑀦 𑀫𑀚𑁆𑀛𑀺𑀫𑀧𑀳𑀸𑀭𑀲𑀜𑁆𑀜𑀺𑀢𑁄 𑀓𑀸𑀮𑁄 𑀲𑀫𑀼𑀚𑁆𑀚𑀮𑀺𑀢𑀧𑀪𑀸𑀢𑁂𑀚𑀤𑀳𑀦𑀪𑀸𑀯𑁂𑀦 𑀤𑀺𑀯𑀸 𑀦𑀸𑀫. 𑀢𑁂𑀦𑀸𑀳 ‘‘𑀤𑀺𑀯𑀲𑀲𑁆𑀲𑀧𑀺 𑀤𑀺𑀯𑀸𑀪𑀽𑀢𑁂’’𑀢𑀺. 𑀧𑀝𑀺𑀲𑀁𑀳𑀭𑀺𑀢𑁆𑀯𑀸𑀢𑀺 𑀦𑀺𑀯𑀢𑁆𑀢𑁂𑀢𑁆𑀯𑀸. 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀧𑀝𑀺𑀲𑀁𑀳𑀭𑀡𑀁 𑀦𑀸𑀫 𑀕𑁄𑀘𑀭𑀓𑁆𑀔𑁂𑀢𑁆𑀢𑁂 𑀞𑀧𑀦𑀦𑁆𑀢𑀺 𑀆𑀳 ‘‘𑀛𑀸𑀦𑀭𑀢𑀺𑀲𑁂𑀯𑀦𑀯𑀲𑁂𑀦 𑀏𑀓𑀻𑀪𑀸𑀯𑀁 𑀕𑀢𑁄’’𑀢𑀺. 𑀏𑀢𑁂𑀦 𑀓𑀸𑀬𑀯𑀺𑀯𑁂𑀓𑀧𑀼𑀩𑁆𑀩𑀓𑀁 𑀘𑀺𑀢𑁆𑀢𑀯𑀺𑀯𑁂𑀓𑀫𑀸𑀳. 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄 𑀫𑀦𑀲𑀸 𑀲𑀫𑁆𑀪𑀸𑀯𑀦𑀻𑀬𑀸, 𑀢𑁂 𑀧𑀦 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀺𑀜𑁆𑀜𑀽𑀦𑀁 𑀫𑀦𑀸𑀧𑀸 𑀳𑁄𑀦𑁆𑀢𑀺 (𑀓𑀺𑀮𑁂𑀲𑀅𑀦𑀺𑀕𑁆𑀕𑀳𑀲𑁆𑀲 𑀧𑀜𑁆𑀘𑀧𑀲𑀸𑀤𑀸𑀬𑀢𑁆𑀢𑀢𑁆𑀢𑀸,) 𑀢𑀲𑁆𑀫𑀸 𑀆𑀳 ‘‘𑀫𑀦𑀯𑀟𑁆𑀠𑀦𑀓𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀉𑀦𑁆𑀦𑀫𑀢𑀻𑀢𑀺 𑀉𑀤𑀕𑁆𑀕𑀁 𑀳𑁄𑀢𑀺. 𑀯𑀟𑁆𑀠𑀢𑀻𑀢𑀺 𑀲𑀤𑁆𑀥𑀸𑀯𑀲𑁂𑀦 𑀯𑀟𑁆𑀠𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀦𑀼𑀲𑁆𑀲𑀭𑀡𑀫𑁆𑀧𑀳𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀩𑀳𑀽𑀧𑀓𑀸𑀭𑀁 𑀯𑀤𑀸𑀫𑀻’’𑀢𑀺 (𑀇𑀢𑀺𑀯𑀼. 𑁧𑁦𑁪; 𑀲𑀁. 𑀦𑀺. 𑁫.𑁧𑁮𑁪).

𑁨𑁬𑁧. 𑀧𑀜𑁆𑀜𑀧𑁂𑀫𑀻𑀢𑀺 𑀧𑀚𑀸𑀦𑀦𑀪𑀸𑀯𑁂𑀦 𑀜𑀸𑀧𑁂𑀫𑀺 𑀢𑀣𑀸 𑀯𑀯𑀢𑁆𑀣𑀧𑁂𑀫𑀺. 𑀢𑁂𑀦𑀸𑀳 ‘‘𑀤𑀲𑁆𑀲𑁂𑀫𑀺 𑀞𑀧𑁂𑀫𑀻’’𑀢𑀺. 𑀧𑀭𑀺𑀧𑀼𑀡𑁆𑀡𑀓𑀼𑀲𑀮𑀦𑁆𑀢𑀺 𑀲𑀩𑁆𑀩𑀲𑁄 𑀧𑀼𑀡𑁆𑀡𑀓𑀼𑀲𑀮𑀥𑀫𑁆𑀫𑀁, 𑀉𑀢𑁆𑀢𑀫𑀓𑀼𑀲𑀮𑀦𑁆𑀢𑀺 𑀉𑀢𑁆𑀢𑀫𑀪𑀸𑀯𑀁 𑀲𑁂𑀝𑁆𑀞𑀪𑀸𑀯𑀁 𑀧𑀢𑁆𑀢𑀓𑀼𑀲𑀮𑀥𑀫𑁆𑀫𑀁. 𑀅𑀬𑁄𑀚𑁆𑀛𑀦𑁆𑀢𑀺 𑀯𑀸𑀤𑀬𑀼𑀤𑁆𑀥𑁂𑀦 𑀅𑀬𑁄𑀥𑀦𑀻𑀬𑀁, 𑀯𑀸𑀤𑀬𑀼𑀤𑁆𑀥𑀁 𑀳𑁄𑀢𑀼, 𑀢𑁂𑀦 𑀧𑀭𑀸𑀚𑀬𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀯𑀸𑀤𑀬𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺. 𑀲𑀁𑀯𑀭𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀲𑀼 𑀲𑀁𑀯𑀭𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀲𑀁𑀯𑀭𑁂𑀦 𑀲𑀁𑀯𑀭𑀮𑀓𑁆𑀔𑀡𑀁 𑀧𑀳𑀸𑀦𑀁. 𑀧𑀝𑀺𑀲𑁂𑀯𑀦𑀧𑁆𑀧𑀳𑀸𑀦𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀧𑀭𑀺𑀯𑀚𑁆𑀚𑀦𑀧𑁆𑀧𑀳𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀦 𑀪𑀸𑀲𑀢𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀅𑀪𑀸𑀲𑀦𑀫𑀢𑁆𑀢𑀫𑁂𑀯 𑀯𑀤𑀢𑀻’’𑀢𑀺 𑀏𑀯𑀫𑀸𑀤𑀺𑀁 𑀅𑀢𑀺𑀤𑀺𑀲𑀢𑀺.

𑀦𑀸𑀪𑀺𑀦𑀦𑁆𑀤𑀻𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀸𑀲𑀦𑁂 𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀯𑀺𑀯𑀚𑁆𑀚𑀦𑀁 𑀯𑀡𑁆𑀡𑀻𑀬𑀢𑀺, 𑀅𑀬𑀜𑁆𑀘 𑀏𑀯𑀁 𑀓𑀣𑁂𑀢𑀺, 𑀢𑀲𑁆𑀫𑀸 𑀲𑀸𑀲𑀦𑀲𑁆𑀲 𑀅𑀦𑀼𑀮𑁄𑀫𑀁 𑀯𑀺𑀬 𑀯𑀤𑀢𑀺, 𑀯𑀤𑀦𑁆𑀢𑁄 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀥𑀫𑁆𑀫𑁂 𑀘𑀲𑁆𑀲 𑀅𑀧𑁆𑀧𑀲𑀸𑀤𑀁 𑀦 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀧𑀲𑀦𑁆𑀦𑀓𑀸𑀭𑀫𑁆𑀧𑀺 𑀯𑀤𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀢𑀲𑁆𑀲 𑀯𑀸𑀤𑀁 𑀦 𑀧𑀝𑀺𑀲𑁂𑀥𑁂𑀢𑀺.

𑁨𑁬𑁨. 𑀬𑀣𑀸 𑀢𑀲𑁆𑀲 𑀯𑀘𑀦𑀁, 𑀏𑀯𑀁 𑀲𑀦𑁆𑀢𑁂𑀢𑀺 𑀬𑀣𑀸 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀘𑀦𑀁, 𑀏𑀯𑀁 𑀲𑀫𑀡𑀪𑀸𑀯𑁂 𑀲𑀦𑁆𑀢𑁂 𑀮𑀩𑁆𑀪𑀫𑀸𑀦𑁂. 𑀫𑀬𑀁 𑀧𑀦 𑀏𑀯𑀁 𑀦 𑀯𑀤𑀸𑀫𑀸𑀢𑀺 𑀏𑀢𑁂𑀦 𑀲𑀫𑀡𑀪𑀸𑀯𑁄 𑀦𑀸𑀫 𑀏𑀯𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑁄 𑀳𑀺 𑀥𑀫𑁆𑀫𑁄 𑀬𑀸𑀤𑀺𑀲𑁄, 𑀢𑀣𑁂𑀯 𑀢𑀁 𑀩𑀼𑀤𑁆𑀥𑀸 𑀤𑀻𑀧𑁂𑀦𑁆𑀢𑀺. 𑀯𑀺𑀲𑁂𑀲𑀜𑀸𑀡𑀁 𑀦 𑀳𑁄𑀢𑀻𑀢𑀺 𑀓𑀸𑀬𑀯𑀺𑀲𑁂𑀲𑀯𑀺𑀲𑀬𑀜𑀸𑀡𑀁 𑀢𑀲𑁆𑀲 𑀢𑀤𑀸 𑀦𑀢𑁆𑀣𑀺, 𑀬𑀢𑁄 𑀧𑀭𑀓𑀸𑀬𑁂 𑀉𑀧𑀓𑁆𑀓𑀫𑀁 𑀓𑀭𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺, 𑀢𑀲𑁆𑀲 𑀧𑀦 𑀢𑀢𑁆𑀣 𑀯𑀺𑀲𑁂𑀲𑀜𑀸𑀡𑀫𑁆𑀧𑀺 𑀦𑀢𑁆𑀣𑁂𑀯𑀸𑀢𑀺. 𑀬𑀲𑁆𑀫𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀓𑀸𑀬𑀓𑀫𑁆𑀫𑀁, 𑀢𑀲𑁆𑀫𑀸 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀢𑁆𑀭 𑀨𑀦𑁆𑀤𑀺𑀢𑀫𑀢𑁆𑀢𑀸’’𑀢𑀺. 𑀓𑀺𑀮𑁂𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯𑀸𑀢𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀲𑁆𑀲 𑀅𑀲𑀳𑀦𑀦𑀺𑀫𑀺𑀢𑁆𑀢𑁂𑀦 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯. 𑀤𑀼𑀢𑀺𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀤𑀼𑀓𑁆𑀔𑀲𑁆𑀲 𑀅𑀲𑀳𑀦𑀦𑀺𑀫𑀺𑀢𑁆𑀢𑁂𑀦 𑀤𑁄𑀫𑀦𑀲𑁆𑀲𑁂𑀦𑁂𑀯. 𑀯𑀺𑀓𑀽𑀚𑀺𑀢𑀫𑀢𑁆𑀢𑀸𑀢𑀺 𑀏𑀢𑁆𑀣 𑀯𑀺𑀭𑀽𑀧𑀁 𑀓𑀽𑀚𑀺𑀢𑀁 𑀯𑀺𑀓𑀽𑀚𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑀦𑁆𑀦𑀺𑀲𑁆𑀲𑀬𑀁 𑀉𑀧𑀬𑀁, 𑀢𑀁 𑀧𑀦𑁂𑀢𑁆𑀣 𑀭𑁄𑀤𑀦𑀳𑀲𑀦𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑀳𑀕𑀢𑀦𑁆𑀢𑀺 𑀤𑁄𑀲𑀲𑀳𑀕𑀢𑀁 𑀮𑁄𑀪𑀲𑀳𑀕𑀢𑀜𑁆𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀁. 𑀅𑀓𑀼𑀲𑀮𑀘𑀺𑀢𑁆𑀢𑀁 𑀧𑀦 𑀅𑀢𑀻𑀢𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑀭𑀺𑀢𑁆𑀯𑀸𑀢𑀺 𑀬𑀸𑀯 𑀦 𑀲𑀢𑀺𑀲𑀡𑁆𑀞𑀸𑀧𑀦𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯 𑀲𑀼𑀧𑀺𑀦𑀦𑁆𑀢𑁂 𑀅𑀦𑀼𑀪𑀽𑀢𑀁 𑀯𑀺𑀬 𑀤𑀼𑀓𑁆𑀔𑀁 𑀲𑀭𑀺𑀢𑁆𑀯𑀸 𑀭𑁄𑀤𑀦𑁆𑀢𑀺. 𑀳𑀲𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀜𑁆𑀘 𑀦𑀬𑁄 𑀬𑁂 𑀮𑀤𑁆𑀥𑀲𑀼𑀔𑀸𑀭𑀫𑁆𑀫𑀡𑀸 𑀳𑀼𑀢𑁆𑀯𑀸 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄𑀧𑀺 𑀲𑀼𑀔𑁂𑀦𑁂𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀸𑀬𑀦𑁆𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀚𑀦𑀧𑀤𑀤𑁂𑀲𑀭𑀽𑀧𑁂𑀦 𑀧𑀸𑀬𑀦𑁆𑀢𑀺𑀬𑀸. 𑀅𑀬𑀫𑁆𑀧𑀻𑀢𑀺 𑀆𑀚𑀻𑀯𑁄𑀧𑀺 𑀫𑀸𑀢𑀼 𑀅𑀜𑁆𑀜𑀯𑀺𑀳𑀺𑀢𑀓𑀸𑀮𑁂 𑀘 𑀮𑁄𑀓𑀲𑁆𑀲𑀸𑀤𑀯𑀲𑁂𑀦 𑀓𑀺𑀮𑁂𑀲𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯 𑀳𑁄𑀢𑀺.

𑁨𑁬𑁩. 𑀲𑀫𑀥𑀺𑀕𑀬𑁆𑀳𑀸𑀢𑀺 𑀲𑀫𑁆𑀫𑀸 𑀅𑀥𑀺𑀕𑀢𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀲𑁂𑀲𑁂𑀢𑁆𑀯𑀸 𑀯𑀺𑀲𑀺𑀝𑁆𑀞𑁄 𑀳𑀼𑀢𑁆𑀯𑀸. 𑀔𑀻𑀡𑀸𑀲𑀯𑀁 𑀲𑀦𑁆𑀥𑀸𑀬𑀸𑀢𑀺 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀔𑀻𑀡𑀸𑀲𑀯𑀁 𑀲𑀦𑁆𑀥𑀸𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀔𑀻𑀡𑀸𑀲𑀯𑀫𑁆𑀧𑀺 𑀲𑁄𑀢𑀸𑀧𑀦𑁆𑀦𑀓𑀼𑀲𑀮𑀁 𑀧𑀜𑁆𑀜𑀧𑁂𑀢𑀺 𑀲𑁂𑀓𑁆𑀔𑀪𑀽𑀫𑀺𑀬𑀁 𑀞𑀺𑀢𑀢𑁆𑀢𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀻𑀡𑀺 𑀧𑀤𑀸𑀦𑀺 𑀦𑀺𑀲𑁆𑀲𑀸𑀬𑀸𑀢𑀺 𑀦 𑀓𑀸𑀬𑁂𑀦 𑀧𑀸𑀧𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀧𑀸𑀧𑀓𑀁 𑀯𑀸𑀘𑀁 𑀪𑀸𑀲𑀢𑀺, 𑀦 𑀧𑀸𑀧𑀓𑀁 𑀆𑀚𑀻𑀯𑀁 𑀆𑀚𑀻𑀯𑀢𑀻𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀦𑀺𑀲𑁆𑀲𑀸𑀬 𑀓𑀼𑀲𑀮𑀲𑀻𑀮𑀫𑀽𑀮𑀓𑀸 𑀘 𑀅𑀓𑀼𑀲𑀮𑀲𑀻𑀮𑀫𑀽𑀮𑀓𑀸 𑀘𑀸𑀢𑀺 𑀤𑁆𑀯𑁂 𑀧𑀞𑀫𑀘𑀢𑀼𑀓𑁆𑀓𑀸 𑀞𑀧𑀺𑀢𑀸. 𑀏𑀓𑀁 𑀧𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀦 𑀧𑀸𑀧𑀓𑀁 𑀲𑀗𑁆𑀓𑀧𑁆𑀧𑀁 𑀲𑀗𑁆𑀓𑀧𑁆𑀧𑁂𑀢𑀻𑀢𑀺 𑀇𑀫𑀁 𑀏𑀓𑀧𑀤𑀁 𑀦𑀺𑀲𑁆𑀲𑀸𑀬 𑀓𑀼𑀲𑀮𑀲𑀗𑁆𑀓𑀧𑁆𑀧𑀫𑀽𑀮𑀓𑀸 𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀫𑀽𑀮𑀓𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀧𑀘𑁆𑀙𑀺𑀫𑀘𑀢𑀼𑀓𑁆𑀓𑀸 𑀞𑀧𑀺𑀢𑀸.

𑁨𑁬𑁪. 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀤𑁆𑀯𑀬𑀫𑁆𑀧𑀺 𑀯𑀝𑁆𑀝𑀢𑀺 𑀩𑀮𑀯𑀢𑀸 𑀫𑁄𑀳𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸. 𑀢𑀣𑀸 𑀳𑀺 𑀢𑀸𑀦𑀺 ‘‘𑀫𑁄𑀫𑀽𑀳𑀘𑀺𑀢𑁆𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀓𑀼𑀳𑀺𑀦𑁆𑀢𑀺 𑀓𑀺𑀁𑀦𑀺𑀫𑀺𑀢𑁆𑀢𑀁. 𑀓𑀢𑀭𑀁𑀞𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀓𑀺𑀁 𑀓𑀸𑀭𑀡𑀁 𑀆𑀕𑀫𑁆𑀫. 𑀏𑀢𑁆𑀣𑁂𑀢𑁂𑀢𑀺 𑀏𑀢𑁆𑀣𑀸𑀢𑀺 𑀓𑀸𑀬𑀯𑀘𑀻𑀫𑀦𑁄𑀲𑀼𑀘𑀭𑀺𑀢𑀪𑀸𑀯𑀦𑀸𑀲𑀸𑀚𑀻𑀯𑀦𑀺𑀧𑁆𑀨𑀢𑁆𑀢𑀺𑀬𑀁. 𑀲𑀸 𑀧𑀦 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀦 𑀤𑀻𑀧𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀪𑀼𑀫𑁆𑀫’’𑀦𑁆𑀢𑀺. 𑀬𑀲𑁆𑀫𑀸 𑀆𑀚𑀻𑀯𑀝𑁆𑀞𑀫𑀓𑀁 𑀅𑀯𑀲𑀺𑀝𑁆𑀞𑀜𑁆𑀘 𑀲𑀻𑀮𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀲𑁆𑀲 𑀘 𑀧𑀸𑀭𑀺𑀲𑀼𑀤𑁆𑀥𑀺𑀧𑀸𑀢𑀺𑀫𑁄𑀓𑁆𑀔𑀸𑀥𑀺𑀕𑀫𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑁆𑀧𑀢𑁆𑀢𑀺𑀬𑀸 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀧𑀸𑀢𑀺𑀫𑁄𑀓𑁆𑀔…𑀧𑁂… 𑀦𑀺𑀭𑀼𑀚𑁆𑀛𑀢𑀻’’𑀢𑀺. ‘‘𑀲𑀼𑀔𑀲𑀻𑀮𑁄 𑀤𑀼𑀓𑁆𑀔𑀲𑀻𑀮𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀓𑀢𑀺𑀅𑀢𑁆𑀣𑀲𑀻𑀮𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀓𑀼𑀲𑀮𑀲𑀻𑀮’’𑀦𑁆𑀢𑀺𑀆𑀤𑀺.

𑁨𑁬𑁫. 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀫𑁂𑀯 𑀯𑀼𑀢𑁆𑀢𑀁 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀯𑀺𑀭𑀢𑀺𑀧𑀼𑀩𑁆𑀩𑀓𑀲𑁆𑀲 𑀲𑀻𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀏𑀢𑁂𑀦 𑀳𑀺 𑀓𑀼𑀲𑀮𑀲𑀻𑀮𑀁 𑀲𑀫𑀼𑀝𑁆𑀞𑀸𑀢𑀻’’𑀢𑀺.

𑀲𑀻𑀮𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀧𑀸𑀲𑀁𑀲𑀢𑁆𑀣𑁄𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺. 𑀬𑁄 𑀲𑀻𑀮𑀫𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄, 𑀦 𑀲𑀫𑀸𑀥𑀺𑀧𑀜𑁆𑀜𑀸𑀲𑀼, 𑀲𑁄 𑀲𑀻𑀮𑀫𑀬𑀥𑀫𑁆𑀫𑀧𑀽𑀭𑀺𑀢𑀢𑀸𑀬 𑀲𑀻𑀮𑀫𑀬𑁄. 𑀢𑁂𑀦𑀸𑀳 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀜𑁆𑀘. 𑀢𑀤𑀼𑀪𑀬𑀜𑁆𑀘 𑀬𑀲𑁆𑀫𑀸 𑀅𑀭𑀳𑀢𑁆𑀢𑀨𑀮𑁂 𑀲𑀗𑁆𑀕𑀳𑀺𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀭𑀳𑀢𑁆𑀢𑀨𑀮𑁂 𑀪𑀼𑀫𑁆𑀫’’𑀦𑁆𑀢𑀺. 𑀅𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺 𑀲𑀼𑀔𑀯𑀺𑀧𑀸𑀓𑀪𑀸𑀯𑀲𑁆𑀲 𑀲𑀩𑁆𑀩𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁄.

𑁨𑁬𑁬. 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀜𑁆𑀜𑀸 𑀓𑀸𑀫𑀲𑀜𑁆𑀜𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀭𑀸 𑀤𑁆𑀯𑁂𑀢𑀺 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀜𑁆𑀜𑀸.

𑀅𑀦𑀸𑀕𑀸𑀫𑀺𑀨𑀮𑀧𑀞𑀫𑀚𑁆𑀛𑀸𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀨𑀮𑀲𑀳𑀕𑀢𑀁 𑀧𑀞𑀫𑀚𑁆𑀛𑀸𑀦𑀁. 𑀏𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂 𑀧𑀞𑀫𑀚𑁆𑀛𑀸𑀦𑁂. 𑀏𑀢𑁆𑀣 𑀘 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑁂𑀦 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑀁 𑀲𑀸𑀢𑀺𑀲𑀬𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀕𑁆𑀕𑀳𑀡𑀁. 𑀢𑁂𑀦𑀸𑀳 ‘‘𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺. 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸𑀦𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑀳𑀕𑀢𑀢𑀸 𑀢𑀲𑁆𑀲 𑀲𑀻𑀮𑀲𑁆𑀲 𑀲𑀫𑀼𑀝𑁆𑀞𑀸𑀦𑀢𑀸 𑀘 𑀲𑀫𑁆𑀧𑀬𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁨𑁬𑁭. 𑀓𑀼𑀲𑀮𑀲𑀗𑁆𑀓𑀧𑁆𑀧𑀦𑀺𑀭𑁄𑀥𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀅𑀭𑀳𑀢𑁆𑀢𑀨𑀮𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀦𑀺𑀭𑁄𑀥- 𑀧𑀞𑀫𑀚𑁆𑀛𑀸𑀦𑀺𑀓𑀅𑀦𑀸𑀕𑀸𑀫𑀺𑀨𑀮𑀕𑁆𑀕𑀳𑀡𑁂𑀦 𑀲𑀫𑀡𑁄 𑀤𑀲𑁆𑀲𑀺𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.