𑁧. 𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀢𑀢𑁆𑀣𑀸𑀢𑀺 𑀏𑀓𑀧𑀼𑀡𑁆𑀟𑀭𑀻𑀓𑀲𑀜𑁆𑀜𑀺𑀢𑁂 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂. 𑀅𑀦𑀸𑀕𑀢𑀧𑀼𑀩𑁆𑀩𑁄 𑀮𑁄𑀓𑀺𑀬𑀲𑀫𑀼𑀤𑀸𑀳𑀸𑀭𑀯𑀲𑁂𑀦 ‘‘𑀘𑀺𑀭𑀲𑁆𑀲𑀁 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀢𑀺, 𑀅𑀬𑀁 𑀧𑀦𑁂𑀢𑁆𑀣 𑀆𑀕𑀢𑀧𑀼𑀩𑁆𑀩𑀢𑀁 𑀉𑀧𑀸𑀤𑀸𑀬 𑀢𑀣𑀸 𑀯𑀼𑀢𑁆𑀢𑁄. 𑀪𑀕𑀯𑀸 𑀳𑀺 𑀓𑁂𑀲𑀜𑁆𑀘𑀺 𑀯𑀺𑀫𑀼𑀢𑁆𑀢𑀺𑀚𑀦𑀦𑀢𑁆𑀣𑀁, 𑀓𑁂𑀲𑀜𑁆𑀘𑀺 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑁆𑀣𑀁, 𑀓𑁂𑀲𑀜𑁆𑀘𑀺 𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀁 𑀓𑀤𑀸𑀘𑀺 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀉𑀧𑀕𑀘𑁆𑀙𑀢𑀺. 𑀅𑀦𑀦𑀼𑀜𑁆𑀜𑀸𑀬 𑀞𑀢𑁆𑀯𑀸𑀢𑀺 𑀅𑀦𑀦𑀼𑀚𑀸𑀦𑀺𑀢𑀩𑁆𑀩𑁂 𑀞𑀢𑁆𑀯𑀸. 𑀅𑀦𑀼𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸 𑀅𑀦𑀜𑁆𑀜𑀸𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄. 𑀬𑀸𑀯𑀢𑀓𑀜𑁆𑀳𑀺 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀪𑀕𑀯𑀢𑁄 𑀜𑀸𑀡𑀁, 𑀬𑀸𑀯𑀢𑀓𑀜𑁆𑀘 𑀪𑀕𑀯𑀢𑁄 𑀜𑀸𑀡𑀁 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁. 𑀢𑁂𑀦𑁂𑀯𑀸𑀳 𑁋 ‘‘𑀦 𑀢𑀲𑁆𑀲 𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁩𑁨; 𑀧𑀝𑀺. 𑀫. 𑁧.𑁧𑁨𑁧). 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀳𑀺 𑀪𑀕𑀯𑀸 𑀆𑀯𑀚𑁆𑀚𑁂𑀢𑁆𑀯𑀸 𑀧𑀚𑀸𑀦𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡’’𑀦𑁆𑀢𑀺 (𑀫𑀺. 𑀧. 𑁪.𑁧.𑁨). 𑀬𑀤𑀺 𑀏𑀯𑀁 ‘‘𑀘𑀭𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀢𑀺𑀝𑁆𑀞𑀁 𑀦𑀸𑀕𑁄 𑀲𑀫𑀸𑀳𑀺𑀢𑁄’’𑀢𑀺 (𑀅. 𑀦𑀺. 𑁬.𑁪𑁩) 𑀇𑀤𑀁 𑀲𑀼𑀢𑁆𑀢𑀧𑀤𑀁 𑀓𑀣𑀦𑁆𑀢𑀺? 𑀯𑀺𑀓𑁆𑀔𑁂𑀧𑀸𑀪𑀸𑀯𑀤𑀻𑀧𑀦𑀧𑀤𑀫𑁂𑀢𑀁, 𑀦 𑀅𑀦𑀸𑀯𑀚𑁆𑀚𑀦𑁂𑀦𑀧𑀺 𑀜𑀸𑀡𑀸𑀦𑀁 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑀦𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯.

𑁧𑁮𑁬. 𑀬𑀸𑀯𑀤𑁂𑀯𑀸𑀢𑀺 𑀇𑀤𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺 𑀯𑀺𑀬 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀓𑀺𑀁 𑀔𑀻𑀡𑀸𑀦𑀁 𑀆𑀲𑀯𑀸𑀦𑀁 𑀧𑀼𑀦 𑀔𑁂𑀧𑁂𑀢𑀩𑁆𑀩𑀸𑀪𑀸𑀯𑀸’’𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀦𑀦𑀕𑀼𑀡𑀦𑁆𑀢𑀺 𑀇𑀤𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀧𑀭𑀺𑀪𑀡𑁆𑀟𑀜𑀸𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀦 𑀯𑀲𑁂𑀦 𑀅𑀦𑀸𑀕𑀢𑀁𑀲𑀜𑀸𑀡𑀕𑀼𑀡𑀁 𑀤𑀲𑁆𑀲𑁂𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸.

𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁂𑀲𑀽𑀢𑀺 𑀯𑀢𑁆𑀣𑀸𑀪𑀭𑀡𑀸𑀤𑀺𑀥𑀦𑀥𑀜𑁆𑀜𑀸𑀤𑀺𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁂𑀲𑀼. 𑀕𑀺𑀳𑀺𑀮𑀺𑀗𑁆𑀕𑀁 𑀧𑀦 𑀅𑀧𑁆𑀧𑀫𑀸𑀡𑀁, 𑀢𑀲𑁆𑀫𑀸 𑀕𑀺𑀳𑀺𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑀸 𑀳𑁄𑀦𑁆𑀢𑀺𑀬𑁂𑀯. 𑀲𑀢𑀺 𑀧𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬 𑀕𑀺𑀳𑀺𑀮𑀺𑀗𑁆𑀕𑁂 𑀢𑁂 𑀦 𑀢𑀺𑀝𑁆𑀞𑀦𑁆𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀧𑀩𑁆𑀩𑀚𑀦𑀁 𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀯𑀸𑀢𑀺 𑀅𑀬𑀁 𑀦𑀬𑁄 𑀦 𑀲𑀩𑁆𑀩𑀲𑀸𑀥𑀸𑀭𑀡𑁄𑀢𑀺 𑀆𑀳 ‘‘𑀪𑀽𑀫𑀤𑁂𑀯𑀢𑀸 𑀧𑀦 𑀢𑀺𑀝𑁆𑀞𑀦𑁆𑀢𑀻’’𑀢𑀺. 𑀢𑀢𑁆𑀣 𑀓𑀸𑀭𑀡𑀯𑀘𑀦𑀁 ‘‘𑀦𑀺𑀮𑀻𑀬𑀦𑁄𑀓𑀸𑀲𑀲𑁆𑀲 𑀅𑀢𑁆𑀣𑀺𑀢𑀸𑀬𑀸’’𑀢𑀺. 𑀅𑀭𑀜𑁆𑀜𑀧𑀩𑁆𑀩𑀢𑀸𑀤𑀺𑀧𑀯𑀺𑀯𑁂𑀓𑀝𑁆𑀞𑀸𑀦𑀁 𑀦𑀺𑀮𑀻𑀬𑀦𑁄𑀓𑀸𑀲𑁄. 𑀲𑁂𑀲𑀓𑀸𑀫𑀪𑀯𑁂𑀢𑀺 𑀓𑀸𑀫𑀮𑁄𑀓𑁂. 𑀮𑀴𑀺𑀢𑀚𑀦𑀲𑁆𑀲𑀸𑀢𑀺 𑀆𑀪𑀭𑀡𑀸𑀮𑀗𑁆𑀓𑀸𑀭𑀦𑀘𑁆𑀘𑀕𑀻𑀢𑀸𑀤𑀺𑀯𑀲𑁂𑀦 𑀯𑀺𑀮𑀸𑀲𑀬𑀼𑀢𑁆𑀢𑀚𑀦𑀲𑁆𑀲.

𑀲𑁄𑀧𑀻𑀢𑀺 ‘‘𑀲𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁄 𑀲𑁄𑀧𑀺. 𑀓𑀭𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀦𑁆𑀢𑀺 𑀏𑀯𑀁 𑀦 𑀓𑀺𑀭𑀺𑀬𑀁 𑀧𑀝𑀺𑀩𑀸𑀳𑀢𑀺. 𑀬𑀤𑀺 𑀅𑀢𑁆𑀢𑀸𑀦𑀁𑀬𑁂𑀯 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀅𑀣 𑀓𑀲𑁆𑀫𑀸 𑀫𑀳𑀸𑀲𑀢𑁆𑀢𑁄 𑀢𑀤𑀸 𑀆𑀚𑀻𑀯𑀓𑀧𑀩𑁆𑀩𑀚𑁆𑀚𑀁 𑀉𑀧𑀕𑀘𑁆𑀙𑀻𑀢𑀺 𑀆𑀳 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺. 𑀢𑀲𑁆𑀲𑀧𑀻𑀢𑀺 𑀦 𑀓𑁂𑀯𑀮𑀁 𑀅𑀜𑁆𑀜𑁂𑀲𑀁 𑀏𑀯 𑀧𑀸𑀲𑀡𑁆𑀟𑀸𑀦𑀁, 𑀢𑀲𑁆𑀲𑀧𑀺. 𑀯𑀻𑀭𑀺𑀬𑀁 𑀦 𑀳𑀸𑀧𑁂𑀲𑀻𑀢𑀺 𑀢𑀧𑁄𑀚𑀺𑀕𑀼𑀘𑁆𑀙𑀯𑀸𑀤𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄 𑀯𑀺𑀭𑀸𑀕𑀢𑁆𑀣𑀸𑀬 𑀢𑀁 𑀲𑀫𑀸𑀤𑀺𑀡𑁆𑀡𑀯𑀢𑁆𑀢𑀁 𑀦 𑀧𑀭𑀺𑀘𑁆𑀘𑀚𑀺, 𑀲𑀢𑁆𑀣𑀼𑀲𑀸𑀲𑀦𑀁 𑀦 𑀙𑀟𑁆𑀟𑁂𑀲𑀺. 𑀢𑁂𑀦𑀸𑀳 𑁋 ‘‘𑀓𑀺𑀭𑀺𑀬𑀯𑀸𑀤𑀻 𑀳𑀼𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺.

𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.