𑁧. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸

𑀬𑀦𑁆𑀢𑀺 𑀅𑀦𑀺𑀬𑀫𑀢𑁆𑀣𑁄 𑀲𑀩𑁆𑀩𑀦𑀸𑀫𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀅𑀢𑁆𑀣𑀸𑀯𑀩𑁄𑀥𑀦𑀢𑁆𑀣𑁄 𑀲𑀤𑁆𑀤𑀧𑁆𑀧𑀬𑁄𑀕𑁄 𑀅𑀢𑁆𑀣𑀧𑀭𑀸𑀥𑀻𑀦𑁄 𑀓𑁂𑀯𑀮𑁄 𑀅𑀢𑁆𑀣𑀧𑀤𑀢𑁆𑀣𑀓𑁄, 𑀲𑁄 𑀧𑀤𑀢𑁆𑀣𑀯𑀺𑀧𑀭𑀺𑀬𑁂𑀲𑀓𑀸𑀭𑀺𑀦𑀸 𑀇𑀢𑀺-𑀲𑀤𑁆𑀤𑁂𑀦 𑀧𑀭𑀪𑀽𑀢𑁂𑀦 𑀲𑀤𑁆𑀤𑀧𑀤𑀢𑁆𑀣𑀓𑁄 𑀚𑀸𑀬𑀢𑀻𑀢𑀺 𑀆𑀳 ‘‘𑀬𑀦𑁆𑀢𑀺 𑀅𑀦𑀺𑀬𑀫𑀢𑁄 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄’’𑀢𑀺. 𑀮𑁄𑀓𑁄𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 ‘‘𑀬’’𑀦𑁆𑀢𑀺𑀆𑀤𑀻𑀦𑀁 𑀕𑀸𑀣𑀸𑀧𑀤𑀸𑀦𑀁 𑀓𑀫𑁆𑀫𑀓𑀢𑁆𑀢𑀼𑀓𑀺𑀭𑀺𑀬𑀸𑀓𑀢𑁆𑀢𑀼𑀯𑀺𑀲𑁂𑀲𑀦𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀯𑀬𑀯𑀚𑁄𑀢𑀦𑀯𑀲𑁂𑀦 𑀧𑀤𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀮𑁄𑀓𑀲𑀤𑁆𑀤𑁄 𑀇𑀥 𑀲𑀸𑀫𑀢𑁆𑀣𑀺𑀬𑀢𑁄 𑀲𑀢𑁆𑀢𑀮𑁄𑀓𑀯𑀘𑀦𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀧𑀽𑀚𑀦𑀓𑀺𑀭𑀺𑀬𑀸𑀬𑁄𑀕𑁆𑀬𑀪𑀽𑀢𑀢𑀸𑀯𑀲𑁂𑀦𑀸’’𑀢𑀺. 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀭𑀁 𑀧𑀽𑀚𑀦𑀸 𑀅𑀜𑁆𑀜𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀬𑀣𑁂𑀢𑀭𑀳𑀺 𑀯𑀺𑀧𑀲𑁆𑀲𑀻𑀆𑀤𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁. ‘‘𑀤𑀻𑀧𑀗𑁆𑀓𑀭𑁄’’𑀢𑀺𑀆𑀤𑀺𑀦𑀸 𑀬𑀤𑀺𑀧𑀺 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸𑀬𑀁 (𑀩𑀼. 𑀯𑀁. 𑁨.𑁭𑁫) 𑀪𑀕𑀯𑀢𑀸𑀯 𑀯𑀼𑀢𑁆𑀢𑀁, 𑀲𑀼𑀫𑁂𑀥𑀧𑀡𑁆𑀟𑀺𑀢𑀢𑁆𑀢𑀪𑀸𑀯𑁂𑀦 𑀧𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀣𑀸𑀳 𑀪𑀕𑀯𑀸 𑀲𑀼𑀫𑁂𑀥𑀪𑀽𑀢𑁄’’𑀢𑀺.

𑀧𑀭𑀺𑀜𑁆𑀜𑀸𑀓𑁆𑀓𑀫𑁂𑀦𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀤𑀺𑀧𑀝𑀺𑀧𑀸𑀝𑀺𑀬𑀸. 𑀮𑀓𑁆𑀔𑀡𑀸𑀯𑀩𑁄𑀥𑀧𑁆𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀜𑁆𑀜𑀢𑀫𑀼𑀔𑀸𑀤𑀻𑀳𑀻’’𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀽𑀳𑀺 𑀯𑁂𑀤𑀦𑀻𑀬𑀢𑀸𑀬 𑀏𑀯 𑀲𑀸𑀲𑀦𑀯𑀭𑀲𑁆𑀲 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋

‘‘𑀏𑀢𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄, 𑀅𑀳𑀫𑀦𑀼𑀲𑀸𑀲𑀸𑀫𑀺, 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑁄 𑀦 𑀘𑀺𑀭𑀲𑁆𑀲𑁂𑀯 𑀲𑀸𑀫𑀜𑁆𑀜𑁂𑀯 𑀉𑀲𑁆𑀲𑀢𑀺, 𑀲𑀸𑀫𑀁 𑀤𑀓𑁆𑀔𑀺𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁨.𑁨𑁮𑁧).

𑀬𑀁-𑀲𑀤𑁆𑀤𑁄 𑀲𑀸𑀲𑀦𑀯𑀺𑀲𑀬𑁄, 𑀮𑁄𑀓𑀧𑀸𑀮𑀲𑀤𑁆𑀤𑁄 𑀲𑀢𑁆𑀣𑀼𑀯𑀺𑀲𑀬𑁄𑀧𑀺 𑀮𑁄𑀓𑀁 𑀧𑀢𑀺 𑀕𑀼𑀡𑀻𑀪𑀽𑀢𑁄𑀢𑀺 ‘‘𑀢𑀲𑁆𑀲𑀸’’𑀢𑀺 𑀧𑀝𑀺𑀦𑀺𑀤𑁆𑀤𑁂𑀲𑀲𑁆𑀲 𑀓𑀣𑀁 𑀲𑀢𑁆𑀣𑀼𑀯𑀺𑀲𑀬𑀢𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺𑀓𑀢𑁆𑀯𑀸 𑀆𑀳 ‘‘𑀲𑀮𑁄𑀓𑀧𑀸𑀮𑁄𑀢𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺, 𑀕𑀼𑀡𑀻𑀪𑀽𑀢𑁄𑀧𑀺 𑀮𑁄𑀓𑀧𑀸𑀮𑀲𑀤𑁆𑀤𑁄 𑀧𑀥𑀸𑀦𑀪𑀽𑀢𑁄 𑀯𑀺𑀬 𑀧𑀝𑀺𑀦𑀺𑀤𑁆𑀤𑁂𑀲𑀁 𑀅𑀭𑀳𑀢𑀺. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄𑀢𑀺.

𑀥𑀫𑁆𑀫𑀕𑀸𑀭𑀯𑁂𑀦 𑀪𑀕𑀯𑀸 𑀥𑀫𑁆𑀫𑀁 𑀧𑀽𑀚𑁂𑀦𑁆𑀢𑁄 𑀯𑁂𑀦𑁂𑀬𑁆𑀬𑀩𑀦𑁆𑀥𑀯𑁂 𑀅𑀘𑀺𑀦𑁆𑀢𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀻𑀢𑀺 𑀆𑀳 ‘‘𑀪𑀕𑀯𑀢𑁄…𑀧𑁂… 𑀤𑀻𑀧𑁂𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀲𑀸𑀯𑀓𑁂𑀳𑀺 𑀥𑀫𑁆𑀫𑀲𑁆𑀲𑀯𑀦𑀲𑁆𑀲, 𑀢𑁂𑀲𑀁 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀘𑁆𑀘𑀲𑁆𑀲𑀸𑀢𑀺 𑀇𑀢𑀺 𑀅𑀲𑁆𑀲, 𑀏𑀯𑀁 𑀪𑀕𑀯𑀢𑁄 𑀅𑀯𑀺𑀧𑀭𑀻𑀢𑀅𑀦𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀪𑀸𑀯𑀤𑀻𑀧𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀬𑁄𑀕𑁂𑀦. 𑀢𑀤𑀯𑀺𑀦𑀸𑀪𑀸𑀯𑀺𑀦𑀸 𑀤𑀲𑀩𑀮…𑀧𑁂… 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀆𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀸𑀦𑀺, 𑀘𑀢𑀼𑀲𑀘𑁆𑀘𑀜𑀸𑀡𑀸𑀦𑀺, 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺, 𑀙 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀝𑁆𑀞 𑀯𑀺𑀚𑁆𑀚𑀸, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀸𑀦𑀺, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀦𑀯 𑀲𑀫𑀸𑀥𑀺𑀘𑀭𑀺𑀬𑀸, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸, 𑀤𑀲 𑀦𑀸𑀣𑀓𑀭𑀡𑀸 𑀥𑀫𑁆𑀫𑀸, 𑀤𑀲 𑀅𑀭𑀺𑀬𑀯𑀸𑀲𑀸, 𑀤𑁆𑀯𑀸𑀤𑀲 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑀸, 𑀢𑁂𑀭𑀲 𑀥𑀼𑀢𑀥𑀫𑁆𑀫𑀸, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀧𑀦𑁆𑀦𑀭𑀲 𑀘𑀭𑀡𑀥𑀫𑁆𑀫𑀸, 𑀲𑁄𑀴𑀲 𑀜𑀸𑀡𑀘𑀭𑀺𑀬𑀸, 𑀲𑁄𑀴𑀲 𑀆𑀦𑀸𑀧𑀸𑀦𑀲𑁆𑀲𑀢𑀻, 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀯𑀺𑀪𑀸𑀯𑀦𑀜𑀸𑀡𑀸𑀦𑀺, 𑀘𑀢𑀼𑀘𑀢𑁆𑀢𑀸𑀭𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡𑀁, 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀧𑀯𑀺𑀘𑀬𑀤𑁂𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀜𑀸𑀡𑀸𑀦𑀺 𑀘𑀸𑀢𑀺 𑀏𑀯𑀫𑀸𑀤𑀻𑀦𑀁 𑀪𑀕𑀯𑀢𑁄 𑀕𑀼𑀡𑀯𑀺𑀲𑁂𑀲𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀕𑀼𑀡𑀯𑀺𑀲𑀺𑀝𑁆𑀞𑀢𑀁 𑀤𑀻𑀧𑁂𑀢𑀺, 𑀲𑀸 𑀘 𑀕𑀼𑀡𑀯𑀺𑀲𑀺𑀝𑁆𑀞𑀢𑀸 𑀫𑀳𑀸𑀓𑀭𑀼𑀡𑀸𑀫𑀳𑀸𑀧𑀜𑁆𑀜𑀸𑀳𑀺 𑀯𑁂𑀤𑀺𑀢𑀩𑁆𑀩𑀸 𑀢𑀸𑀳𑀺 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄. 𑀢𑀢𑁆𑀣 𑀫𑀳𑀸𑀓𑀭𑀼𑀡𑀸𑀬 𑀧𑀯𑀢𑁆𑀢𑀺𑀪𑁂𑀤𑁄 ‘‘𑀩𑀳𑀼𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁧𑁧𑁭) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀧𑀜𑁆𑀜𑀸𑀬 𑀧𑀦 𑀧𑀯𑀢𑁆𑀢𑀺𑀪𑁂𑀤𑁄 𑀯𑀼𑀢𑁆𑀢𑁄 𑀏𑀯. 𑀢𑀢𑁆𑀣 𑀓𑀭𑀼𑀡𑀸𑀬 𑀪𑀕𑀯𑀢𑁄 𑀘𑀭𑀡𑀲𑀫𑁆𑀧𑀢𑁆𑀢𑀺, 𑀧𑀜𑁆𑀜𑀸𑀬 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺. 𑀓𑀭𑀼𑀡𑀸𑀬 𑀲𑀢𑁆𑀢𑀸𑀥𑀺𑀧𑀢𑀺𑀢𑀸, 𑀧𑀜𑁆𑀜𑀸𑀬 𑀥𑀫𑁆𑀫𑀸𑀥𑀺𑀧𑀢𑀺𑀢𑀸. 𑀓𑀭𑀼𑀡𑀸𑀬 𑀮𑁄𑀓𑀦𑀸𑀣𑀢𑀸, 𑀧𑀜𑁆𑀜𑀸𑀬 𑀅𑀢𑁆𑀢𑀦𑀸𑀣𑀢𑀸. 𑀓𑀭𑀼𑀡𑀸𑀬 𑀧𑀼𑀩𑁆𑀩𑀓𑀸𑀭𑀺𑀢𑀸, 𑀧𑀜𑁆𑀜𑀸𑀬 𑀓𑀢𑀜𑁆𑀜𑀼𑀢𑀸. 𑀓𑀭𑀼𑀡𑀸𑀬 𑀅𑀧𑀭𑀦𑁆𑀢𑀧𑀢𑀸, 𑀧𑀜𑁆𑀜𑀸𑀬 𑀅𑀦𑀢𑁆𑀢𑀦𑁆𑀢𑀧𑀢𑀸. 𑀓𑀭𑀼𑀡𑀸𑀬 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀬 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀓𑀭𑀼𑀡𑀸𑀬 𑀧𑀭𑁂𑀲𑀁 𑀢𑀸𑀭𑀡𑀁, 𑀧𑀜𑁆𑀜𑀸𑀬 𑀲𑀬𑀁 𑀢𑀸𑀭𑀡𑀁. 𑀓𑀭𑀼𑀡𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀧𑀜𑁆𑀜𑀸𑀬 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺 𑀅𑀦𑀯𑀲𑁂𑀲𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸, 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀸𑀭𑀺𑀧𑀽𑀭𑀻 𑀯𑁂𑀤𑀺𑀢𑀩𑁆𑀩𑀸. 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀽𑀢𑀺 𑀳𑁂𑀢𑀼𑀨𑀮𑀲𑀢𑁆𑀢𑀽𑀧𑀓𑀸𑀭𑀸𑀯𑀢𑁆𑀣𑀸𑀲𑀼.

𑀅𑀪𑀺𑀲𑀫𑀬𑁄 𑀧𑀝𑀺𑀯𑁂𑀥𑀲𑀸𑀲𑀦𑀲𑁆𑀲, 𑀫𑀦𑀲𑀺𑀓𑀭𑀡𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀲𑁆𑀲, 𑀲𑀯𑀦𑀸𑀤𑀻𑀳𑀺 𑀧𑀭𑀺𑀘𑀬𑀓𑀭𑀡𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀲𑁆𑀲𑀸𑀢𑀺 𑀢𑀺𑀡𑁆𑀡𑀫𑁆𑀧𑀺 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀬𑀣𑀸𑀭𑀳’’𑀦𑁆𑀢𑀺. ‘‘𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀤𑁂𑀲𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀇𑀥 ‘‘𑀲𑀸𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀢𑀺𑀯𑀺𑀥𑀲𑁆𑀲𑀸𑀧𑀺 𑀲𑀤𑁆𑀥𑀫𑁆𑀫𑀲𑁆𑀲 𑀅𑀯𑀺𑀲𑁂𑀲𑁂𑀦 𑀤𑁂𑀲𑀦𑀸𑀧𑀽𑀚𑀁 𑀯𑀢𑁆𑀯𑀸 𑀣𑁄𑀫𑀦𑀸𑀧𑀽𑀚𑀦𑀲𑁆𑀲 𑀯𑀲𑁂𑀦 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀁, 𑀯𑁄 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀣𑁄𑀫𑀦𑁂𑀦𑀸’’𑀢𑀺 𑀧𑀤𑁂𑀦𑀸𑀧𑀺 ‘‘𑀲𑀓𑁆𑀓𑀘𑁆𑀘’’𑀦𑁆𑀢𑀺 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀽𑀚𑀦𑀸𑀤𑁆𑀯𑀬𑀲𑁆𑀲𑀸𑀧𑀺 𑀯𑀸 𑀯𑀲𑁂𑀦 𑀇𑀥𑀸𑀧𑀺 𑀧𑀤𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀺𑀬𑀪𑀸𑀯𑀸𑀤𑀬𑁄𑀢𑀺 𑀅𑀭𑀺𑀬𑀲𑁂𑀝𑁆𑀞𑀅𑀕𑁆𑀕𑀪𑀸𑀯𑀸𑀤𑀬𑁄. 𑀦𑀺𑀬𑁆𑀬𑀸𑀦𑀸𑀤𑀬𑁄𑀢𑀺 𑀦𑀺𑀬𑁆𑀬𑀸𑀦𑀳𑁂𑀢𑀼𑀤𑀲𑁆𑀲𑀦𑀸𑀤𑀬𑁄. 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀬𑁄𑀢𑀺 𑀲𑁆𑀯𑀸𑀓𑁆𑀔𑀸𑀢𑀲𑀦𑁆𑀤𑀺𑀝𑁆𑀞𑀺𑀓𑀢𑀸𑀤𑀬𑁄.

𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀕𑀼𑀡𑀸𑀦𑀫𑁆𑀧𑀺 𑀇𑀫𑀸𑀬 𑀕𑀸𑀣𑀸𑀬 𑀧𑀓𑀸𑀲𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀸𑀮𑁆𑀬𑀸𑀤𑀺𑀲𑀫𑀢𑀺𑀓𑁆𑀓𑀫𑀦𑀢𑁄𑀢𑀺 𑀩𑀸𑀮𑀅𑀩𑁆𑀬𑀢𑁆𑀢𑀪𑀸𑀯𑀸𑀤𑀺𑀲𑀫𑀢𑀺𑀓𑁆𑀓𑀫𑀦𑀢𑁄.

𑀜𑀸𑀡𑀯𑀺𑀲𑁂𑀲𑁄 𑀲𑀼𑀢𑀘𑀺𑀦𑁆𑀢𑀸𑀪𑀸𑀯𑀦𑀸𑀫𑀬𑀜𑀸𑀡𑀸𑀦𑀺. 𑀲𑁄𑀢𑀩𑁆𑀩𑀫𑀦𑀲𑀺𑀓𑀸𑀢𑀩𑁆𑀩𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀯𑀢𑁆𑀣𑀸 𑀅𑀯𑀢𑁆𑀣𑀸𑀪𑁂𑀤𑁄. 𑀉𑀪𑀬𑀦𑁆𑀢𑀺 𑀩𑁆𑀬𑀜𑁆𑀚𑀦𑀧𑀤𑀁, 𑀅𑀢𑁆𑀣𑀧𑀤𑀜𑁆𑀘. 𑀉𑀪𑀬𑀣𑀸𑀢𑀺 𑀓𑀭𑀡𑀓𑀫𑁆𑀫𑀲𑀸𑀥𑀦𑀯𑀲𑁂𑀦 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸𑀢𑀺 𑀜𑀸𑀢𑀩𑁆𑀩𑀢𑁆𑀢𑀸.

‘‘𑀅𑀬𑀜𑁆𑀘 𑀕𑀸𑀣𑀸’’𑀢𑀺𑀆𑀤𑀺 𑀓𑁂𑀲𑀜𑁆𑀘𑀺 𑀯𑀸𑀤𑁄. 𑀢𑀣𑀸 𑀳𑀺 𑀅𑀧𑀭𑁂 ‘‘𑀣𑁂𑀭𑁂𑀦𑁂𑀯𑀸𑀬𑀁 𑀕𑀸𑀣𑀸 𑀪𑀸𑀲𑀺𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀽𑀧𑀦𑀸𑀬𑀺𑀓𑀸𑀧𑀺 𑀳𑀺 𑀓𑀤𑀸𑀘𑀺 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀺 𑀏𑀯 𑀬𑀣𑀸 ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑁄’’𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁨𑁧-𑁨𑁨). 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀫𑀼𑀔𑁂𑀦𑁂𑀯𑀸𑀢𑀺 𑀫𑀽𑀮𑀧𑀤𑀲𑀗𑁆𑀔𑀸𑀢𑀅𑀢𑁆𑀣𑀼𑀤𑁆𑀥𑀸𑀭𑁂𑀦𑁂𑀯. 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺 𑀦𑀺𑀤𑁆𑀤𑁂𑀲𑀯𑀸𑀭𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀆𑀕𑀫𑀺𑀲𑁆𑀲𑀢𑀺 ‘‘𑀢𑀻𑀡𑀺 𑀘 𑀦𑀬𑀸 𑀅𑀦𑀽𑀦𑀸’’𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁪 𑀤𑁆𑀯𑀸𑀤𑀲𑀧𑀤).

𑀯𑀼𑀘𑁆𑀘𑀢𑀻𑀢𑀺 𑀓𑀢𑁆𑀢𑀭𑀺 𑀓𑀫𑁆𑀫𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀯𑀤𑀢𑀻’’𑀢𑀺. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀓𑀫𑁆𑀫𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄𑀬𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀳𑀸𑀭𑀸, 𑀦𑀬𑀸 𑀘𑀸𑀢𑀺 𑀉𑀪𑀬𑀁 𑀧𑀭𑀺𑀕𑁆𑀕𑀳𑀺𑀢𑀁 𑀲𑀁𑀯𑀡𑁆𑀡𑀓𑁂𑀦 𑀲𑀩𑁆𑀩𑀣𑀸 𑀕𑀳𑀺𑀢𑀜𑁆𑀘𑁂, 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀁, 𑀲𑀬𑀫𑁂𑀯 𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀢𑀻𑀢𑀺, 𑀏𑀢𑁂𑀦 𑀳𑀸𑀭𑀦𑀬𑁂𑀲𑀼 𑀯𑀲𑀻𑀪𑀸𑀯𑁂𑀦 𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬 𑀲𑀼𑀓𑀭𑀢𑀁 𑀤𑀲𑁆𑀲𑁂𑀢𑀺.

𑀧𑀓𑀸𑀭𑀦𑁆𑀢𑀭𑁂𑀦𑀸𑀢𑀺 𑀧𑀼𑀩𑁆𑀩𑁂 ‘‘𑀲𑀸𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 ‘‘𑀤𑁂𑀲𑀦𑀸, 𑀤𑁂𑀲𑀺𑀢’’𑀦𑁆𑀢𑀺 𑀢𑀢𑁄 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦. 𑀦𑀺𑀬𑀫𑁂𑀢𑁆𑀯𑀸𑀢𑀺 𑀢𑀲𑁆𑀲 𑀏𑀓𑀦𑁆𑀢𑀢𑁄 𑀯𑀺𑀜𑁆𑀜𑁂𑀬𑁆𑀬𑀢𑀁 𑀅𑀯𑀥𑀸𑀭𑁂𑀢𑁆𑀯𑀸. 𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑀺𑀲𑀺𑀝𑁆𑀞𑁂𑀲𑀼 𑀤𑁂𑀲𑀦𑀸𑀤𑁂𑀲𑀺𑀢𑁂𑀲𑀼 𑀯𑀺𑀜𑁆𑀜𑁂𑀬𑁆𑀬𑀧𑀤𑁂 𑀮𑀩𑁆𑀪𑀫𑀸𑀦𑀸 𑀯𑀺𑀚𑀸𑀦𑀦𑀓𑀺𑀭𑀺𑀬𑀸.

𑀤𑁂𑀲𑀦𑀸𑀤𑁂𑀲𑀺𑀢𑀸𑀦𑀺 𑀘 𑀬𑀸𑀯𑀤𑁂𑀯 𑀯𑀺𑀚𑀸𑀦𑀦𑀢𑁆𑀣𑀸𑀦𑀻𑀢𑀺 𑀯𑀺𑀚𑀸𑀦𑀦𑀁 𑀧𑀥𑀸𑀦𑀦𑁆𑀢𑀺 𑀢𑀫𑁂𑀯 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀯𑀺𑀚𑀸𑀦𑀦𑁂’’𑀢𑀺 𑀆𑀳.

𑀏𑀢𑁆𑀣𑀸𑀳𑀸𑀢𑀺 𑀦𑀯𑀗𑁆𑀕𑀲𑀸𑀲𑀦𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑀯𑀘𑀦𑁂 𑀆𑀳 𑀘𑁄𑀤𑀓𑁄. 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀦𑀯𑀳𑀺 𑀅𑀗𑁆𑀕𑁂𑀳𑀺 𑀯𑀯𑀢𑁆𑀣𑀺𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀭𑀳𑀺𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀘 𑀲𑀢𑀺 𑀅𑀲𑀼𑀢𑁆𑀢𑀲𑀪𑀸𑀯𑀸𑀦𑁂𑀯 𑀕𑁂𑀬𑁆𑀬𑀗𑁆𑀕𑀸𑀤𑀻𑀦𑀻𑀢𑀺 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀅𑀣 𑀲𑀼𑀢𑁆𑀢𑀲𑀪𑀸𑀯𑀸𑀦𑀺 𑀕𑁂𑀬𑁆𑀬𑀗𑁆𑀕𑀸𑀤𑀻𑀦𑀺, 𑀏𑀯𑀁 𑀲𑀢𑀺 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀁 𑀦 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂 𑀅𑀝𑁆𑀞𑀗𑁆𑀕𑀲𑀸𑀲𑀦𑀁 𑀆𑀧𑀚𑁆𑀚𑀢𑀻𑀢𑀺. 𑀢𑁂𑀦𑀸𑀳 ‘‘𑀓𑀣𑀁 𑀧𑀦𑀸’’𑀢𑀺𑀆𑀤𑀺. 𑀕𑁂𑀬𑁆𑀬𑀗𑁆𑀕𑀸𑀤𑀻𑀲𑀼 𑀓𑀢𑀺𑀧𑀬𑀸𑀦𑀫𑁆𑀧𑀺 𑀲𑀼𑀢𑁆𑀢𑀪𑀸𑀯𑁂 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀺, 𑀧𑀕𑁂𑀯 𑀲𑀩𑁆𑀩𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀬𑀜𑁆𑀘𑀸’’𑀢𑀺𑀆𑀤𑀺𑀦𑀸. 𑀲𑀗𑁆𑀕𑀳𑁂𑀲𑀽𑀢𑀺 𑀅𑀝𑁆𑀞𑀓𑀣𑀸𑀲𑀼. 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀜𑁆𑀳𑀺 𑀲𑀗𑁆𑀔𑁂𑀧𑀪𑀽𑀢𑀸 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸 ‘‘𑀲𑀗𑁆𑀕𑀳𑀸’’𑀢𑀺 𑀯𑀼𑀢𑁆𑀢𑀸. 𑀲𑀼𑀢𑁆𑀢𑀁 𑀦𑀸𑀫 𑀲𑀕𑀸𑀣𑀓𑀁 𑀯𑀸 𑀲𑀺𑀬𑀸, 𑀦𑀺𑀕𑁆𑀕𑀸𑀣𑀓𑀁 𑀯𑀸𑀢𑀺 𑀅𑀗𑁆𑀕𑀤𑁆𑀯𑀬𑁂𑀦𑁂𑀯 𑀢𑀤𑀼𑀪𑀬𑀗𑁆𑀕𑀁 𑀓𑀢𑀦𑁆𑀢𑀺 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀲𑁆𑀲 𑀅𑀲𑀫𑁆𑀪𑀯𑁄 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀢𑁆𑀢𑀗𑁆𑀕𑀫𑁂𑀯 𑀦 𑀲𑀺𑀬𑀸’’𑀢𑀺. 𑀅𑀣𑀸𑀧𑀺 𑀓𑀣𑀜𑁆𑀘𑀺. 𑀲𑀺𑀬𑀸𑀢𑀺 𑀯𑀓𑁆𑀔𑀫𑀸𑀦𑀁 𑀲𑀸𑀫𑀜𑁆𑀜𑀯𑀺𑀥𑀺𑀁 𑀲𑀦𑁆𑀥𑀸𑀬𑀸𑀳. 𑀏𑀯𑀫𑁆𑀧𑀺 𑀅𑀬𑀁 𑀤𑁄𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀕𑁂𑀬𑁆𑀬𑀗𑁆𑀕𑀪𑀸𑀯𑀦𑀺𑀫𑀺𑀢𑁆𑀢𑀁. 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑁄𑀤𑀓𑁄 ‘‘𑀕𑀸𑀣𑀸𑀯𑀺𑀭𑀳𑁂’’𑀢𑀺 𑀯𑀘𑀦𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 ‘‘𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀏𑀯𑀁 𑀲𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 𑀧𑀦 𑀑𑀓𑀸𑀲𑀯𑀺𑀥𑀺𑀢𑁄 𑀅𑀦𑁄𑀓𑀸𑀲𑁄 𑀯𑀺𑀥𑀺 𑀩𑀮𑀯𑀸𑀢𑀺 𑀜𑀸𑀬𑀁 𑀕𑀸𑀣𑀸𑀯𑀺𑀭𑀳𑀺𑀢𑀁𑀬𑁂𑀯 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺, 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺. 𑀢𑀣𑀸 𑀳𑀻𑀢𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦, 𑀲𑀢𑀺𑀧𑀺 𑀲𑀜𑁆𑀜𑀦𑁆𑀢𑀭𑀦𑀺𑀫𑀺𑀢𑁆𑀢𑀬𑁄𑀕𑁂 𑀅𑀦𑁄𑀓𑀸𑀲𑀲𑀜𑁆𑀜𑀸𑀦𑀁 𑀩𑀮𑀯𑀪𑀸𑀯𑁂𑀦𑁂𑀯𑀸𑀢𑀺 𑀅𑀢𑁆𑀣𑁄.

𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.