𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑁄

𑁧. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀲𑀼𑀭𑀸’’𑀢𑀺 𑀯𑀸 ‘‘𑀦 𑀯𑀝𑁆𑀝𑀢𑀻’’𑀢𑀺 𑀯𑀸 𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁂 𑀅𑀓𑀼𑀲𑀮𑀫𑁂𑀯𑀸𑀢𑀺 𑀮𑀺𑀔𑀺𑀢𑀁. 𑀅𑀓𑀼𑀲𑀮𑀘𑀺𑀢𑁆𑀢𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀢𑀁 𑀲𑀦𑁆𑀥𑀸𑀬 𑀓𑀺𑀭 𑀯𑀼𑀢𑁆𑀢𑀁. 𑀅𑀣 𑀓𑀲𑁆𑀫𑀸 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ‘‘𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑀸𑀬𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁨𑁯) 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑀸𑀬𑀸𑀢𑀺.

𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀸𑀬𑀲𑀁𑀲𑀕𑁆𑀕𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀪𑀸𑀯𑁂 𑀲𑀫𑀸𑀦𑁂𑀧𑀺 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀧𑀺 𑀤𑀼𑀓𑁆𑀓𑀝𑀁, 𑀉𑀧𑀲𑀫𑁆𑀧𑀦𑁆𑀦𑁂 𑀏𑀯 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀁 𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑀺 𑀓𑀭𑀡𑀻𑀬𑁂𑀢𑀺 𑀏𑀢𑁆𑀣 𑀧𑀼𑀭𑀺𑀲𑀁 𑀲𑀢𑀺 𑀓𑀭𑀡𑀻𑀬𑁂 𑀆𑀫𑀲𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀦 𑀇𑀢𑁆𑀣𑀺𑀁.

𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀘𑀺𑀓𑁆𑀔𑀮𑁆𑀮𑀁 𑀯𑀸’’𑀢𑀺 𑀯𑀘𑀦𑀢𑁄 𑀲𑀓𑁆𑀔𑀭𑀫𑁆𑀧𑀺 𑀔𑀺𑀧𑀦𑀓𑀻𑀴𑀸𑀬 𑀓𑀻𑀴𑀢𑁄 𑀤𑀼𑀓𑁆𑀓𑀝𑀫𑁂𑀯. 𑀉𑀧𑀭𑀺𑀕𑁄𑀧𑁆𑀨𑀓𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀜𑁆𑀜𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀅𑀢𑁆𑀣𑀯𑀲𑁂𑀦 ‘‘𑀉𑀤𑀓𑁂 𑀳𑀲𑀥𑀫𑁆𑀫𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀇𑀤𑀁 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀘𑁂, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀓𑀣𑀁;

𑀓𑀻𑀴𑀺𑀢𑀁𑀯 𑀅𑀓𑀻𑀴𑀸𑀢𑀺, 𑀫𑀺𑀘𑁆𑀙𑀸𑀕𑀸𑀳𑁂𑀦 𑀢𑀁 𑀲𑀺𑀬𑀸.

𑀏𑀢𑁆𑀢𑀸𑀯𑀢𑀸 𑀓𑀣𑀁 𑀓𑀻𑀴𑀸, 𑀇𑀢𑀺 𑀓𑀻𑀴𑀸𑀬𑀁 𑀏𑀯𑀸𑀬𑀁;

𑀅𑀓𑀻𑀴𑀸𑀲𑀜𑁆𑀜𑀻 𑀳𑁄𑀢𑁂𑀢𑁆𑀣, 𑀯𑀺𑀦𑀬𑀢𑁆𑀣𑀁 𑀲𑀫𑀸𑀤𑀬𑁂.

𑀏𑀓𑀦𑁆𑀢𑀸𑀓𑀼𑀲𑀮𑁄 𑀬𑀲𑁆𑀫𑀸, 𑀓𑀻𑀴𑀸𑀬𑀸𑀪𑀺𑀭𑀢𑀫𑀦𑁄;

𑀢𑀲𑁆𑀫𑀸 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁, 𑀏𑀓𑀫𑁂𑀯𑁂𑀢𑁆𑀣 𑀮𑀩𑁆𑀪𑀢𑀻𑀢𑀺. (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩𑁩𑁬);

𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀲𑁆𑀲 𑀯𑀘𑀦𑀦𑁆𑀢𑀺 ‘‘𑀅𑀬𑀁 𑀉𑀓𑁆𑀔𑀺𑀢𑁆𑀢𑀓𑁄 𑀯𑀸 𑀯𑀫𑁆𑀪𑀺𑀢𑁄 𑀯𑀸 𑀕𑀭𑀳𑀺𑀢𑁄 𑀯𑀸 𑀇𑀫𑀲𑁆𑀲 𑀯𑀘𑀦𑀁 𑀅𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺. 𑀥𑀫𑁆𑀫𑀦𑁆𑀢𑀺 𑀓𑀣𑀸𑀬𑀁 𑀥𑀫𑁆𑀫𑁄 𑀦𑀲𑁆𑀲𑁂𑀬𑁆𑀬 𑀯𑀸 𑀯𑀺𑀦𑀲𑁆𑀲𑁂𑀬𑁆𑀬 𑀯𑀸 𑀅𑀦𑁆𑀢𑀭𑀥𑀸𑀬𑁂𑀬𑁆𑀬 𑀯𑀸, 𑀢𑀁 𑀯𑀸 𑀅𑀲𑀺𑀓𑁆𑀔𑀺𑀢𑀼𑀓𑀸𑀫𑁄 𑀅𑀦𑀸𑀤𑀭𑀺𑀬𑀁 𑀓𑀭𑁄𑀢𑀺. ‘‘𑀮𑁄𑀓𑀯𑀚𑁆𑀚𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘𑀇𑀤𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀕𑁆𑀕𑀳𑁄’𑀢𑀺 𑀯𑀤𑀦𑁆𑀢𑀲𑁆𑀲 𑀦 𑀯𑀝𑁆𑀝𑀢𑀻’’𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩𑁪𑁪) 𑀮𑀺𑀔𑀺𑀢𑀁.

𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀯𑀺𑀲𑀺𑀩𑁆𑀩𑀦𑀸𑀧𑁂𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀲𑁆𑀲 𑀯𑀝𑁆𑀝𑀢𑀺, 𑀅𑀜𑁆𑀜𑁂𑀲𑀜𑁆𑀘.

𑀚𑁄𑀢𑀺𑀦𑁂𑀓𑀫𑀦𑁂𑀓𑁂 𑀯𑀸, 𑀚𑀸𑀮𑁂𑀦𑁆𑀢𑀺 𑀫𑀼𑀦𑀬𑁄 𑀲𑀳;

𑀏𑀓𑁄 𑀲𑁄𑀧𑁂𑀢𑀺 𑀦𑀸𑀦𑁂𑀓𑁄, 𑀅𑀥𑀺𑀧𑁆𑀧𑀸𑀬𑀯𑀺𑀲𑁂𑀲𑀢𑁄.

𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀫𑁄𑀭𑀓𑁆𑀔𑀺𑀫𑀡𑁆𑀟𑀮𑀫𑀗𑁆𑀕𑀼𑀮𑀧𑀺𑀝𑁆𑀞𑀻𑀦𑀦𑁆𑀢𑀺 𑀦 𑀏𑀓𑀦𑁆𑀢𑀢𑁄, 𑀅𑀥𑀺𑀓𑀁, 𑀑𑀭𑀜𑁆𑀘𑀸𑀢𑀺 𑀯𑀤𑀦𑁆𑀢𑀺. 𑀏𑀓𑀓𑁄𑀡𑁂𑀧𑀺 𑀯𑀝𑁆𑀝𑀢𑀺, 𑀏𑀯𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑀩𑀺𑀦𑁆𑀤𑀼𑀧𑀺 𑀯𑀝𑁆𑀝𑀢𑀻𑀢𑀺.

𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬’’𑀦𑁆𑀢𑀺 𑀧𑀸𑀞𑁄. 𑀏𑀢𑁆𑀣 𑀧𑀭𑀺𑀪𑁄𑀕𑁂𑀦 𑀓𑀸𑀬𑀓𑀫𑁆𑀫𑀁. 𑀅𑀧𑀘𑁆𑀘𑀼𑀤𑁆𑀥𑀭𑀡𑁂𑀦 𑀯𑀘𑀻𑀓𑀫𑁆𑀫𑀁.

𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀲𑀽𑀘𑀺𑀓𑁂 𑀲𑀽𑀘𑀺𑀖𑀭𑁂 𑀲𑀽𑀘𑀺𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄𑀢𑀺 𑀧𑁄𑀭𑀸𑀡𑀸.

𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀭𑀸𑀧𑀸𑀦𑀯𑀕𑁆𑀕𑁄 𑀙𑀝𑁆𑀞𑁄.