𑁪. 𑀪𑁄𑀚𑀦𑀯𑀕𑁆𑀕𑁄

𑁨. 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁂𑀯𑀤𑀢𑁆𑀢𑁄 𑀓𑀸𑀮𑁂 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀢𑀧𑁆𑀧𑀘𑁆𑀘𑀬𑀸 𑀪𑀕𑀯𑀢𑀸 ‘‘𑀕𑀡𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁦𑁯) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀧𑀤𑀪𑀸𑀚𑀦𑁂 𑀧𑀦 ‘‘𑀦𑀺𑀫𑀦𑁆𑀢𑀺𑀢𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 (𑀧𑀸𑀘𑀺. 𑁨𑁧𑁮) 𑀦𑀺𑀫𑀦𑁆𑀢𑀦𑀫𑁂𑀯 𑀕𑀳𑁂𑀢𑁆𑀯𑀸 𑀯𑀺𑀪𑀢𑁆𑀢𑀁. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 𑀯𑀢𑁆𑀣𑀼𑀯𑀲𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀬𑀸𑀘𑀦𑀫𑁆𑀧𑀺 𑀯𑀼𑀢𑁆𑀢𑀦𑁆𑀢𑀺 𑀮𑀺𑀔𑀺𑀢𑀁. 𑀓𑀲𑁆𑀫𑀸? 𑀧𑀭𑀺𑀯𑀸𑀭𑁂 𑀏𑀯 ‘‘𑀕𑀡𑀪𑁄𑀚𑀦𑀁 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀲𑀯𑀢𑀺 𑀯𑀺𑀜𑁆𑀜𑀢𑁆𑀢𑀺𑀢𑁄 𑀯𑀸 𑀦𑀺𑀫𑀦𑁆𑀢𑀦𑀢𑁄 𑀯𑀸’’𑀢𑀺 (𑀧𑀭𑀺. 𑁩𑁨𑁨) 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁𑀬𑁂𑀯 𑀧𑀸𑀓𑀝𑀢𑁆𑀢𑀸 𑀧𑀤𑀪𑀸𑀚𑀦𑁂 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘‘𑀏𑀓𑀢𑁄 𑀕𑀡𑁆𑀳𑀦𑁆𑀢𑀻’𑀢𑀺 𑀘 𑀕𑀳𑀺𑀢𑀪𑀢𑁆𑀢𑀸𑀧𑀺 𑀅𑀜𑁆𑀜𑁂 𑀬𑀸𑀯 𑀕𑀡𑁆𑀳𑀦𑁆𑀢𑀺, 𑀢𑀸𑀯 𑀘𑁂 𑀢𑀺𑀝𑁆𑀞𑀦𑁆𑀢𑀺, 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺 𑀏𑀯 𑀦𑀸𑀫𑀸’’𑀢𑀺 𑀘, ‘‘𑀬𑁄 𑀓𑁄𑀘𑀺 𑀧𑀩𑁆𑀩𑀚𑀺𑀢𑁄𑀢𑀺 𑀲𑀳𑀥𑀫𑁆𑀫𑀺𑀓𑁂𑀲𑀼, 𑀢𑀺𑀢𑁆𑀣𑀺𑀬𑁂𑀲𑀼 𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀘, ‘‘𑀲𑀫𑀬𑀸𑀪𑀸𑀯𑁄𑀢𑀺 𑀲𑀢𑁆𑀢𑀦𑁆𑀦𑀁 𑀅𑀦𑀸𑀧𑀢𑁆𑀢𑀺𑀲𑀫𑀬𑀸𑀦𑀁 𑀅𑀪𑀸𑀯𑁄’’𑀢𑀺 𑀘, ‘‘𑀲𑀫𑀬𑀮𑀤𑁆𑀥𑀓𑁂𑀦 𑀲𑀳 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀻’’𑀢𑀺 𑀘, ‘‘𑀲𑀫𑀬𑀮𑀤𑁆𑀥𑀓𑁄 𑀲𑀬𑀫𑁂𑀯 𑀫𑀼𑀘𑁆𑀘𑀢𑀺, 𑀲𑁂𑀲𑀸𑀦𑀁 𑀕𑀡𑀧𑀽𑀭𑀓𑀢𑁆𑀢𑀸 𑀆𑀧𑀢𑁆𑀢𑀺𑀓𑀭𑁄 𑀳𑁄𑀢𑀻’’𑀢𑀺 𑀘 𑀮𑀺𑀔𑀺𑀢𑀁.

𑀏𑀢𑁆𑀣𑀸𑀳 𑁋 ‘‘𑀧𑀝𑀺𑀕𑁆𑀕𑀳𑀡𑀫𑁂𑀯 𑀳𑁂𑀢𑁆𑀣 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀕𑀡𑀪𑁄𑀚𑀦𑀁 𑀦𑀸𑀫 𑀬𑀢𑁆𑀣 𑀘𑀢𑁆𑀢𑀸𑀭𑁄…𑀧𑁂… 𑀪𑀼𑀜𑁆𑀚𑀦𑁆𑀢𑀻’’𑀢𑀺 (𑀧𑀸𑀘𑀺. 𑁨𑁧𑁮) 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀢𑁆𑀣 ‘‘𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀧𑀝𑀺𑀕𑁆𑀕𑀳𑀡𑀦𑀺𑀬𑀫𑀯𑀘𑀦𑀁. 𑀦 𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀪𑀺𑀓𑁆𑀔𑀽 𑀪𑀼𑀜𑁆𑀚𑀦𑁆𑀢𑀻𑀢𑀺.

𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀧𑀦 𑀦𑀺𑀫𑀦𑁆𑀢𑀦𑀢𑁄 𑀧𑀲𑀯𑀦𑀢𑁄 𑀪𑁄𑀚𑀦𑀸𑀧𑁂𑀓𑁆𑀔𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀓𑁂. 𑀏𑀓𑁄 𑀪𑀺𑀓𑁆𑀔𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀪𑀢𑁆𑀢𑀁 𑀮𑀪𑀢𑀺, 𑀢𑀫𑀜𑁆𑀜𑁄 𑀘𑀽𑀧𑀸𑀲𑀓𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀖𑀭𑁂 𑀦𑀺𑀲𑀻𑀤𑀸𑀧𑁂𑀲𑀺, 𑀦 𑀘 𑀢𑀸𑀯 𑀪𑀢𑁆𑀢𑀁 𑀲𑀫𑁆𑀧𑀚𑁆𑀚𑀢𑀺. 𑀲𑀘𑁂 𑀲𑁄 𑀪𑀺𑀓𑁆𑀔𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? ‘‘𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀏𑀢𑀁 𑀧𑀭𑀫𑁆𑀧𑀭𑀪𑁄𑀚𑀦𑀁 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁨𑁨𑁭) 𑀯𑀼𑀢𑁆𑀢𑀢𑁆𑀢𑀸. 𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬’’𑀦𑁆𑀢𑀺 𑀧𑀸𑀞𑁄.

𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀢𑀣𑀸𑀦𑀻𑀢𑀧𑀽𑀯𑁂𑀳𑀺 𑀅𑀢𑁆𑀣𑀺𑀓𑁂𑀦 𑀉𑀓𑁆𑀓𑀝𑁆𑀞𑀧𑀢𑁆𑀢𑀧𑁆𑀧𑀫𑀸𑀡𑀯𑀲𑁂𑀦 𑀕𑀳𑁂𑀢𑀩𑁆𑀩𑀸. ‘‘𑀫𑀸 𑀔𑁄 𑀢𑁆𑀯𑀁 𑀏𑀢𑁆𑀣 𑀧𑀝𑀺𑀕𑁆𑀕𑀡𑁆𑀳𑀻’’𑀢𑀺 𑀅𑀧𑀸𑀣𑁂𑀬𑁆𑀬𑀸𑀤𑀺𑀅𑀢𑁆𑀣𑀸𑀬 𑀲𑀚𑁆𑀚𑀺𑀢𑀲𑀜𑁆𑀜𑀸𑀬 𑀅𑀢𑀺𑀭𑁂𑀓𑀧𑁆𑀧𑀝𑀺𑀕𑁆𑀕𑀳𑀡𑁂𑀦 𑀆𑀭𑁄𑀘𑀦𑁂, 𑀅𑀲𑀁𑀯𑀺𑀪𑀸𑀕𑁂 𑀘 𑀦 𑀫𑀼𑀘𑁆𑀘𑀢𑀺 𑀅𑀘𑀺𑀢𑁆𑀢𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀅𑀣 𑀉𑀕𑁆𑀕𑀳𑀺𑀢𑀓𑀁 𑀕𑀡𑁆𑀳𑀸𑀢𑀺, 𑀦 𑀫𑀼𑀘𑁆𑀘𑀢𑀺 𑀏𑀯. 𑀅𑀲𑀁𑀯𑀺𑀪𑀸𑀕𑁂 𑀧𑀦 𑀅𑀦𑀸𑀧𑀢𑁆𑀢𑀺 𑀅𑀓𑀧𑁆𑀧𑀺𑀬𑀢𑁆𑀢𑀸. 𑀅𑀘𑀺𑀢𑁆𑀢𑀓𑀢𑀸 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀸𑀪𑀸𑀯𑁂𑀦𑁂𑀯, 𑀦 𑀯𑀢𑁆𑀣𑀼𑀚𑀸𑀦𑀦𑀸𑀪𑀸𑀯𑁂𑀦𑀸𑀢𑀺 𑀏𑀓𑁂. ‘‘𑀦 𑀧𑀸𑀣𑁂𑀬𑁆𑀬𑀸𑀤𑀺𑀅𑀢𑁆𑀣𑀸𑀬 𑀲𑀚𑁆𑀚𑀺𑀢𑀪𑀸𑀯𑀚𑀸𑀦𑀦’’𑀦𑁆𑀢𑀺 𑀅𑀗𑁆𑀕𑁂𑀲𑀼 𑀅𑀯𑀼𑀢𑁆𑀢𑀢𑁆𑀢𑀸 𑀲𑀘𑁂 𑀲𑀜𑁆𑀘𑀺𑀘𑁆𑀘 𑀦 𑀯𑀤𑀢𑀺, 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀧𑁄𑀭𑀸𑀡𑀸 𑀯𑀤𑀦𑁆𑀢𑀺. 𑀅𑀢𑀺𑀭𑁂𑀓𑀧𑁆𑀧𑀝𑀺𑀕𑁆𑀕𑀳𑀡𑀦𑁆𑀢𑀺 𑀢𑀢𑁆𑀣 𑀧𑀜𑁆𑀘𑀫𑀁𑀯 𑀅𑀗𑁆𑀕𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀢𑁆𑀢𑀩𑁆𑀩𑀸𑀓𑀭𑀡𑀢𑁄 𑀧𑀦 𑀤𑀼𑀓𑁆𑀓𑀝𑀁. 𑀅𑀜𑁆𑀜𑀣𑀸 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀇𑀤𑀁 𑀆𑀧𑀚𑁆𑀚𑀢𑀺. 𑀅𑀦𑀺𑀯𑀸𑀭𑀡𑀁, 𑀅𑀦𑀸𑀭𑁄𑀘𑀦𑀁 𑀯𑀸 𑀙𑀝𑁆𑀞𑀫𑀗𑁆𑀕𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸.

𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀡𑀁 𑀦𑀸𑀫 𑀧𑀜𑁆𑀘𑀗𑁆𑀕𑀺𑀓𑀁. 𑀢𑁂𑀲𑀼 ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑁆𑀢𑀻’’𑀢𑀺 𑀏𑀢𑁂𑀦𑁂𑀯 ‘‘𑀪𑀼𑀢𑁆𑀢𑀸𑀯𑀻’’𑀢𑀺 𑀏𑀢𑀲𑁆𑀲 𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑀼𑀁 𑀅𑀢𑁆𑀣𑀲𑀺𑀤𑁆𑀥𑀺 𑀦 𑀤𑀺𑀲𑁆𑀲𑀢𑀺. 𑀤𑀺𑀲𑁆𑀲𑀢𑀺 𑀘𑁂, 𑀅𑀗𑁆𑀕𑀸𑀦𑀁 𑀙𑀓𑁆𑀓𑀢𑁆𑀢𑀤𑀲𑁆𑀲𑀦𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨𑁩𑁮-𑁨𑁩𑁯) 𑀮𑀺𑀔𑀺𑀢𑀁. ‘‘𑀪𑁄𑀚𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀅𑀪𑀺𑀳𑀝𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀘𑀼𑀡𑁆𑀡𑀫𑁆𑀧𑀻𑀢𑀺 𑀧𑀺-𑀓𑀸𑀭𑁂𑀦 𑀓𑀼𑀡𑁆𑀟𑀓𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀲𑀫𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀧𑀦 𑀆𑀢𑀧𑀲𑀼𑀓𑁆𑀔𑀸𑀦𑀁 𑀯𑀸 𑀓𑀼𑀡𑁆𑀟𑀓𑀁 𑀯𑀸 𑀬𑁂 𑀓𑁂𑀘𑀺 𑀢𑀡𑁆𑀟𑀼𑀮𑀸 𑀯𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 𑀲𑀫𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀯𑀻𑀳𑀻𑀦𑀁, 𑀯𑀻𑀳𑀺𑀧𑀮𑀸𑀲𑀸𑀦𑀁 𑀯𑀸 𑀢𑀡𑁆𑀟𑀼𑀮𑀘𑀼𑀡𑁆𑀡𑀁 𑀧𑀯𑀸𑀭𑁂𑀢𑀺. 𑀢𑀣𑀸 𑀔𑀭𑀧𑀸𑀓𑀪𑀚𑁆𑀚𑀺𑀢𑀸𑀦𑀁 𑀓𑀼𑀡𑁆𑀟𑀓𑀫𑁆𑀧𑀺 𑀧𑀯𑀸𑀭𑁂𑀢𑀺. 𑀪𑀚𑁆𑀚𑀺𑀢𑀲𑀢𑁆𑀢𑀼𑀬𑁄 𑀧𑀺𑀡𑁆𑀟𑁂𑀢𑁆𑀯𑀸 𑀓𑀢𑁄 𑀅𑀧𑀓𑁆𑀓𑀲𑀢𑁆𑀢𑀼𑀫𑁄𑀤𑀓𑁄𑀧𑀺 𑀧𑀯𑀸𑀭𑁂𑀢𑀻𑀢𑀺 𑀮𑀺𑀔𑀺𑀢𑀁. 𑀲𑀘𑁂 𑀅𑀯𑀲𑀺𑀝𑁆𑀞𑀁 𑀦𑀢𑁆𑀣𑀺, 𑀦 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀅𑀲𑀦𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑁆𑀧𑀓𑀢𑀪𑁄𑀚𑀦𑀲𑁆𑀲 𑀅𑀪𑀸𑀯𑀢𑁄.

𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀦 𑀓𑀺𑀜𑁆𑀘𑀸𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀁, 𑀔𑀸𑀤𑀺𑀬𑀫𑀸𑀦𑀁 𑀧𑀦 𑀫𑀁𑀲𑀪𑀸𑀯𑀁 𑀦 𑀚𑀳𑀸𑀢𑀺, 𑀢𑀲𑁆𑀫𑀸 𑀧𑀯𑀸𑀭𑁂𑀢𑀺. 𑀪𑁄𑀚𑀦𑀲𑀸𑀮𑀸𑀬 𑀪𑀼𑀜𑁆𑀚𑀦𑁆𑀢𑁄 𑀘𑁂 𑀅𑀢𑁆𑀢𑀦𑁄 𑀅𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑀁 𑀅𑀪𑀺𑀳𑀝𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺. 𑀓𑀸𑀫𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀢𑁆𑀢𑁂 𑀧𑀦 𑀆𑀭𑀸𑀫𑀺𑀓𑀸 𑀆𑀓𑀺𑀭𑀦𑁆𑀢𑀺, 𑀢𑀁 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀤𑀜𑁆𑀳𑀺 𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑀸𑀬 𑀅𑀦𑁂𑀲𑀦𑀸𑀬 𑀉𑀧𑁆𑀧𑀦𑁆𑀦𑁂𑀬𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀣𑀸 𑀳𑀺 𑀲𑀗𑁆𑀖𑀢𑁄 𑀮𑀤𑁆𑀥𑀁 𑀧𑀺𑀡𑁆𑀟𑀁 𑀤𑀼𑀲𑁆𑀲𑀻𑀮𑁄 𑀤𑁂𑀢𑀺, 𑀢𑀜𑁆𑀘𑁂 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀯𑀸𑀭𑁂𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀘, 𑀯𑀺𑀪𑀸𑀕𑁄 𑀮𑀚𑁆𑀚𑀻 𑀘𑁂 𑀤𑁂𑀢𑀺, 𑀢𑀁 𑀲𑁄 𑀦 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀸𑀭𑁂𑀢𑀻𑀢𑀺 𑀘, ‘‘𑀲𑀫𑀁𑀲𑀭𑀲𑀁 𑀲𑀫𑀘𑁆𑀙𑀭𑀲’’𑀦𑁆𑀢𑀺 𑀆𑀧𑀚𑁆𑀚𑀦𑀢𑁄 ‘‘𑀫𑀁𑀲𑀭𑀲’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀝𑀺𑀓𑁆𑀔𑀺𑀧𑀢𑁄 𑀳𑁄𑀢𑀺, ‘‘𑀫𑀁𑀲𑀲𑁆𑀲 𑀭𑀲𑀁 𑀫𑀁𑀲𑀭𑀲’’𑀦𑁆𑀢𑀺 𑀅𑀬𑀁 𑀯𑀺𑀕𑁆𑀕𑀳𑁄 𑀦𑀸𑀥𑀺𑀧𑁆𑀧𑁂𑀢𑁄𑀢𑀺 𑀘 𑀯𑀼𑀢𑁆𑀢𑀁. 𑀪𑀢𑁆𑀢𑀫𑀺𑀲𑁆𑀲𑀓𑀁 𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀦 𑀧𑀯𑀸𑀭𑁂𑀢𑀺. ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀯𑀸𑀭𑁂𑀢𑀺. 𑀓𑀲𑁆𑀫𑀸? 𑀬𑁂𑀦𑀸𑀧𑀼𑀘𑁆𑀙𑀺𑀢𑁄, 𑀢𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀏𑀢𑁆𑀣 𑀧𑀦 ‘‘𑀬𑀸𑀕𑀼𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀢𑀢𑁆𑀭 𑀘𑁂 𑀬𑀸𑀕𑀼 𑀩𑀳𑀼𑀢𑀭𑀸 𑀯𑀸 𑀳𑁄𑀢𑀺, 𑀲𑀫𑀲𑀫𑀸 𑀯𑀸. 𑀪𑀢𑁆𑀢𑀁 𑀫𑀦𑁆𑀤𑀁, 𑀦 𑀧𑀯𑀸𑀭𑁂𑀢𑀺. 𑀬𑀸𑀕𑀼 𑀘𑁂 𑀫𑀦𑁆𑀤𑀸, 𑀪𑀢𑁆𑀢𑀁 𑀩𑀳𑀼𑀢𑀭𑀁, 𑀧𑀯𑀸𑀭𑁂𑀢𑀺. 𑀇𑀤𑀜𑁆𑀘 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁. 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀤𑀼𑀤𑁆𑀤𑀲𑀁. ‘‘𑀪𑀢𑁆𑀢𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺. 𑀢𑀢𑁆𑀭 𑀪𑀢𑁆𑀢𑀁 𑀩𑀳𑀼𑀢𑀭𑀁 𑀯𑀸 𑀲𑀫𑀓𑀁 𑀯𑀸 𑀅𑀧𑁆𑀧𑀢𑀭𑀁 𑀯𑀸 𑀳𑁄𑀢𑀺, 𑀧𑀯𑀸𑀭𑁂𑀢𑀺 𑀏𑀯. 𑀪𑀢𑁆𑀢𑀁 𑀯𑀸 𑀬𑀸𑀕𑀼𑀁 𑀯𑀸 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺. 𑀢𑀢𑁆𑀭 𑀘𑁂 𑀪𑀢𑁆𑀢𑀁 𑀩𑀳𑀼𑀢𑀭𑀁, 𑀲𑀫𑀓𑀁 𑀯𑀸 𑀳𑁄𑀢𑀺, 𑀧𑀯𑀸𑀭𑁂𑀢𑀺. 𑀅𑀧𑁆𑀧𑀢𑀭𑀁 𑀦 𑀧𑀯𑀸𑀭𑁂𑀢𑀺. 𑀢𑀁 𑀲𑀩𑁆𑀩𑀁 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺.

𑀨𑀮𑀁 𑀯𑀸 𑀓𑀦𑁆𑀤𑀫𑀽𑀮𑀸𑀤𑀺 𑀯𑀸 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀓𑀧𑁆𑀧𑀺𑀬𑀁 𑀅𑀓𑀢𑀦𑁆𑀢𑀺 𑀏𑀢𑁆𑀣 𑀓𑀧𑁆𑀧𑀺𑀬𑀁 𑀅𑀓𑀸𑀭𑀸𑀧𑀺𑀢𑁂𑀳𑀺 𑀓𑀤𑀮𑀺𑀨𑀮𑀸𑀤𑀻𑀳𑀺 𑀲𑀤𑁆𑀥𑀺𑀁 𑀅𑀢𑀺𑀭𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀢𑀁 𑀓𑀤𑀮𑀺𑀨𑀮𑀸𑀤𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀫𑀺𑀲𑁆𑀲𑀓𑀭𑀲𑀢𑁆𑀢𑀸 𑀧𑀼𑀦 𑀢𑀸𑀦𑀺 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀓𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀧𑀼𑀩𑁆𑀩𑁂 𑀢𑁂𑀲𑀼 𑀯𑀺𑀦𑀬𑀓𑀫𑁆𑀫𑀲𑁆𑀲 𑀅𑀦𑀸𑀭𑀼𑀴𑁆𑀳𑀢𑁆𑀢𑀸𑀢𑀺 𑀯𑀤𑀦𑁆𑀢𑀺.

𑀧𑀢𑁆𑀢𑁂 𑀭𑀚𑀁 𑀧𑀢𑀺𑀢𑀁 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀯 𑀪𑀺𑀓𑁆𑀔𑀸 𑀕𑀡𑁆𑀳𑀺𑀢𑀩𑁆𑀩𑀸. ‘‘𑀅𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀢𑁄 𑀯𑀺𑀦𑀬𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁬𑁫) 𑀯𑀼𑀢𑁆𑀢𑀢𑁆𑀢𑀸 𑀏𑀢𑀫𑀜𑁆𑀜𑁂𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀢𑀁 𑀧𑀦 𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦 ‘‘𑀅𑀢𑀺𑀭𑀺𑀢𑁆𑀢𑀁 𑀓𑀢𑀁 𑀅𑀦𑀢𑀺𑀭𑀺𑀢𑁆𑀢𑀓𑀢𑀁 𑀳𑁄𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯. 𑀇𑀫𑀲𑁆𑀫𑀺𑀁 𑀧𑀦 ‘‘𑀅𑀢𑀺𑀭𑀺𑀢𑁆𑀢𑀁 𑀓𑀢𑀁, 𑀅𑀦𑀢𑀺𑀭𑀺𑀢𑁆𑀢𑀁 𑀓𑀢𑀁 𑀳𑁄𑀢𑀻’’𑀢𑀺𑀆𑀤𑀻𑀳𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀻𑀧𑀺𑀢𑀁. 𑀅𑀮𑀫𑁂𑀢𑀁 𑀲𑀩𑁆𑀩𑀦𑁆𑀢𑀺 𑀇𑀤𑀫𑁆𑀧𑀺 𑀢𑁂 𑀅𑀥𑀺𑀓𑀁, 𑀇𑀢𑁄 𑀅𑀜𑁆𑀜𑀁 𑀦 𑀮𑀘𑁆𑀙𑀲𑀻𑀢𑀺 𑀅𑀢𑁆𑀣𑁄.

𑀆𑀳𑀸𑀭𑀢𑁆𑀣𑀸𑀬𑀸𑀢𑀺 𑀯𑀺𑀓𑀸𑀮𑁂 𑀏𑀯𑀸𑀢𑀺 𑀏𑀓𑁂. ‘‘𑀧𑀞𑀫𑀓𑀣𑀺𑀦𑀲𑀤𑀺𑀲𑀸𑀦𑀺. 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬’’𑀦𑁆𑀢𑀺 𑀧𑀸𑀞𑁄. 𑀓𑀸𑀬𑀓𑀫𑁆𑀫𑀁 𑀅𑀚𑁆𑀛𑁄𑀳𑀭𑀡𑀢𑁄. 𑀯𑀘𑀻𑀓𑀫𑁆𑀫𑀁 𑀯𑀸𑀘𑀸𑀬 ‘‘𑀅𑀢𑀺𑀭𑀺𑀢𑁆𑀢𑀁 𑀓𑀭𑁄𑀣, 𑀪𑀦𑁆𑀢𑁂’’𑀢𑀺 𑀅𑀓𑀸𑀭𑀸𑀧𑀦𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀪𑀼𑀢𑁆𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁪𑁩) 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 ‘‘𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂.

𑀤𑀼𑀢𑀺𑀬𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀚𑀫𑁆𑀩𑀼𑀤𑀻𑀧𑀲𑁆𑀲 𑀓𑀸𑀮𑁂𑀦 𑀧𑀭𑀺𑀘𑁆𑀙𑁂𑀤𑁄𑀢𑀺 𑀏𑀯𑀁 𑀓𑀺𑀭.

𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀤𑀼𑀤𑁆𑀥𑁄𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀥 𑀯𑀼𑀢𑁆𑀢𑀢𑁆𑀢𑀸, ‘‘𑀤𑀼𑀤𑁆𑀥𑁄𑀢𑀁 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀧𑀼𑀦

𑀢𑀢𑁆𑀣 𑀅𑀘𑁆𑀙𑁄𑀤𑀓𑀁 𑀯𑀸 𑀆𑀲𑀺𑀜𑁆𑀘𑀺𑀢𑁆𑀯𑀸, 𑀅𑀗𑁆𑀕𑀼𑀮𑀺𑀬𑀸 𑀯𑀸 𑀖𑀁𑀲𑀺𑀢𑁆𑀯𑀸 𑀦𑀺𑀲𑁆𑀦𑁂𑀳𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁫𑁩) 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀘 𑀫𑀢𑁆𑀢𑀺𑀓𑀸𑀧𑀢𑁆𑀢𑀲𑁆𑀲 𑀓𑀧𑀸𑀮𑁂𑀦 𑀧𑀻𑀢𑁄 𑀲𑁆𑀦𑁂𑀳𑁄 𑀲𑀦𑁆𑀦𑀺𑀥𑀺𑀁 𑀓𑀭𑁄𑀢𑀻𑀢𑀺 𑀲𑀺𑀤𑁆𑀥𑀦𑁆𑀢𑀺 𑀮𑀺𑀔𑀺𑀢𑀁. 𑀲𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀧𑀭𑀺𑀘𑁆𑀘𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣 𑀅𑀧𑀭𑀺𑀘𑁆𑀘𑀢𑁆𑀢𑀁 𑀦𑀸𑀫 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀦𑀺𑀭𑀧𑁂𑀓𑁆𑀔𑀅𑀧𑀭𑀺𑀘𑁆𑀘𑀢𑁆𑀢𑀁 𑀅𑀯𑀺𑀚𑀳𑀺𑀢𑀁. ‘‘𑀧𑀝𑀺𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣 𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑀫𑀯𑀺𑀚𑀳𑀺𑀢𑀫𑁂𑀯 𑀲𑀦𑁆𑀦𑀺𑀥𑀺𑀁 𑀚𑀦𑁂𑀢𑀻’’𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄, 𑀢𑀁 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁨𑁫𑁫) 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀢𑀲𑁆𑀲 𑀧𑀦 𑀧𑀼𑀦 𑀧𑀝𑀺𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀸𑀪𑀸𑀯𑀢𑁄 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀢𑁂𑀲𑀁 𑀫𑀁𑀲𑀜𑁆𑀘 𑀔𑀻𑀭𑀤𑀥𑀻𑀦𑀺 𑀘 𑀇𑀥 𑀅𑀥𑀺𑀧𑁆𑀧𑁂𑀢𑀸𑀦𑀻’’𑀢𑀺 𑀇𑀤𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀧𑀭𑀺𑀘𑁆𑀙𑁂𑀤𑁄, 𑀦 𑀧𑀦 𑀓𑀧𑁆𑀧𑀺𑀬𑀔𑀻𑀭𑀸𑀤𑀺𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀫𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀔𑀻𑀭𑀸𑀤𑀻𑀦𑀺 𑀯𑀝𑁆𑀝𑀦𑁆𑀢𑀻𑀢𑀺 𑀘, ‘‘𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑁂 𑀪𑁂𑀲𑀚𑁆𑀚𑀢𑁆𑀣𑀸𑀬 𑀲𑀧𑁆𑀧𑀺𑀆𑀤𑀺𑀪𑁂𑀲𑀚𑁆𑀚𑀧𑀜𑁆𑀘𑀓𑀁 𑀯𑀺𑀜𑁆𑀜𑀸𑀧𑁂𑀢𑀺 𑀘𑁂, 𑀢𑀢𑁆𑀣 ‘‘𑀦 𑀪𑁂𑀲𑀚𑁆𑀚𑀓𑀭𑀡𑀻𑀬𑁂𑀦 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺 𑀏𑀢𑁆𑀣 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀢𑁂𑀦 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨𑁬𑁧) 𑀘 𑀮𑀺𑀔𑀺𑀢𑀁.

𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀲𑀭𑀻𑀭𑀸𑀯𑀬𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀼𑀔𑁂𑀦 𑀧𑀝𑀺𑀕𑁆𑀕𑀳𑀡𑀁 𑀅𑀦𑀼𑀜𑁆𑀜𑀸𑀢𑀁. ‘‘𑀘𑀺𑀜𑁆𑀘𑀸𑀤𑀺𑀧𑀢𑁆𑀢𑁂𑀲𑀼 𑀪𑀽𑀫𑀺𑀬𑀁 𑀅𑀢𑁆𑀣𑀢𑁂𑀲𑀼 𑀦 𑀯𑀝𑁆𑀝𑀢𑀺, 𑀓𑀮𑁆𑀮𑀔𑁂𑀢𑁆𑀢𑁂 𑀢𑀢𑁆𑀣 𑀯𑀝𑁆𑀝𑀢𑀻’’𑀢𑀺 𑀘, ‘‘𑀲𑀸𑀫𑀁 𑀕𑀳𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀲𑀧𑁆𑀧𑀤𑀝𑁆𑀞𑀁𑀬𑁂𑀯, 𑀅𑀜𑁆𑀜𑀫𑁆𑀧𑀺 𑀤𑀝𑁆𑀞𑀁 𑀯𑀺𑀲𑁂𑀲𑁂𑀢𑀺. 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘 𑀮𑀺𑀔𑀺𑀢𑀁.

𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑁄𑀚𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.