𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀁

𑁧. 𑀘𑀻𑀯𑀭𑀯𑀕𑁆𑀕𑁄

𑁧. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑁂 𑀢𑀺𑀡𑁆𑀡𑀁 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀸𑀦𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀅𑀘𑁆𑀘𑁂𑀓𑀘𑀻𑀯𑀭𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀘 𑀏𑀓𑀤𑁂𑀲𑀦𑀸𑀬 𑀢𑀣𑀸𑀓𑀺𑀡𑁆𑀡𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀯 𑀯𑁂𑀤𑀺𑀢𑀩𑁆𑀩𑀸 𑁋

𑀓𑀣𑀺𑀦𑀁 𑀬𑀲𑁆𑀲 𑀘𑀢𑁆𑀢𑀸𑀭𑁄, 𑀲𑀳𑀚𑀸 𑀲𑀫𑀬𑀤𑁆𑀯𑀬𑀁;

𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀘, 𑀏𑀓𑀤𑁂𑀲𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀣𑀺𑀦𑀦𑁆𑀢𑀺 ‘‘𑀲𑀗𑁆𑀖𑀲𑁆𑀲 𑀅𑀦𑀼𑀫𑁄𑀤𑀦𑀸𑀬, 𑀕𑀡𑀲𑁆𑀲 𑀅𑀦𑀼𑀫𑁄𑀤𑀦𑀸𑀬, 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀲𑀗𑁆𑀖𑀲𑁆𑀲 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦’’𑀦𑁆𑀢𑀺 (𑀧𑀭𑀺. 𑁪𑁧𑁪) 𑀯𑀘𑀦𑀢𑁄 𑀢𑁂𑀲𑀁𑀬𑁂𑀯 𑀅𑀦𑀼𑀫𑁄𑀤𑀦𑀸𑀤𑀺𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀓𑀣𑀺𑀦𑀁 𑀦𑀸𑀫. 𑀬𑀣𑀸𑀳 ‘‘𑀓𑀣𑀺𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀜𑁆𑀜𑁂𑀯 𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀲𑀫𑀯𑀸𑀬𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫’’𑀦𑁆𑀢𑀺𑀆𑀤𑀺 (𑀧𑀭𑀺. 𑁪𑁧𑁨). 𑀢𑀲𑁆𑀫𑀸 𑀓𑀣𑀺𑀦𑀦𑁆𑀢𑀺 𑀇𑀤𑀁 𑀩𑀳𑀽𑀲𑀼 𑀥𑀫𑁆𑀫𑁂𑀲𑀼 𑀦𑀸𑀫𑀫𑀢𑁆𑀢𑀁, 𑀦 𑀧𑀭𑀫𑀢𑁆𑀣𑀢𑁄 𑀏𑀓𑁄 𑀥𑀫𑁆𑀫𑁄. 𑀓𑁄 𑀧𑀦𑀲𑁆𑀲 𑀅𑀢𑁆𑀣𑀸𑀭𑁄𑀢𑀺? 𑀢𑀤𑁂𑀓𑀤𑁂𑀲𑁄𑀯 𑀔𑀻𑀭𑀲𑁆𑀲 𑀥𑀸𑀭𑀸 𑀯𑀺𑀬. 𑀬𑀣𑀸 𑀘𑀸𑀳 ‘‘𑀅𑀢𑁆𑀣𑀸𑀭𑁄 𑀏𑀓𑁂𑀦 𑀥𑀫𑁆𑀫𑁂𑀦 𑀲𑀗𑁆𑀕𑀳𑀺𑀢𑁄 𑀯𑀘𑀻𑀪𑁂𑀤𑁂𑀦𑀸’’𑀢𑀺. 𑀲𑀳𑀚𑀸 𑀦𑀸𑀫 𑀅𑀝𑁆𑀞 𑀫𑀸𑀢𑀺𑀓𑀸, 𑀤𑁆𑀯𑁂 𑀧𑀮𑀺𑀩𑁄𑀥𑀸, 𑀧𑀜𑁆𑀘𑀸𑀦𑀺𑀲𑀁𑀲𑀸𑀢𑀺 𑀇𑀫𑁂 𑀧𑀦𑁆𑀦𑀭𑀲 𑀥𑀫𑁆𑀫𑀸. 𑀲𑀫𑀬𑀤𑁆𑀯𑀬𑀁 𑀦𑀸𑀫 𑀓𑀣𑀺𑀦𑀢𑁆𑀣𑀸𑀭𑀲𑀫𑀬𑁄, 𑀘𑀻𑀯𑀭𑀲𑀫𑀬𑁄 𑀘𑀸𑀢𑀺. 𑀢𑀢𑁆𑀣 𑀓𑀣𑀺𑀦𑀢𑁆𑀣𑀸𑀭𑀲𑀫𑀬𑁄 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄. 𑀘𑀻𑀯𑀭𑀲𑀫𑀬𑁄 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀅𑀬𑀁 𑀓𑀢𑁆𑀢𑀺𑀓𑀫𑀸𑀲𑁄, 𑀅𑀢𑁆𑀣𑀢𑁂 𑀘𑀢𑁆𑀢𑀸𑀭𑁄 𑀳𑁂𑀫𑀦𑁆𑀢𑀺𑀓𑀸 𑀘𑀸𑀢𑀺 𑀧𑀜𑁆𑀘 𑀫𑀸𑀲𑀸.

𑀢𑀢𑁆𑀣 𑀅𑀝𑁆𑀞 𑀫𑀸𑀢𑀺𑀓𑀸 𑀦𑀸𑀫 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀬𑁄. 𑀢𑀸 𑀲𑀩𑁆𑀩𑀸𑀧𑀺 𑀅𑀢𑁆𑀣𑀸𑀭𑁂𑀦 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫. 𑀢𑀩𑁆𑀪𑀸𑀯𑀪𑀸𑀯𑀺𑀢𑀸𑀬 𑀅𑀢𑁆𑀣𑀸𑀭𑁂 𑀲𑀢𑀺 𑀉𑀤𑁆𑀥𑀸𑀭𑁄 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀓𑀣𑀺𑀦𑀢𑁆𑀣𑀸𑀭𑁂𑀦 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑁄 𑀲𑀳𑀼𑀩𑁆𑀪𑀸𑀭𑁄, 𑀅𑀯𑀲𑁂𑀲𑀸 𑀓𑀣𑀺𑀦𑀼𑀩𑁆𑀪𑀸𑀭𑀸 𑀏𑀓𑀼𑀧𑁆𑀧𑀸𑀤𑀸, 𑀦𑀸𑀦𑀸𑀦𑀺𑀭𑁄𑀥𑀸 𑀘. 𑀢𑀢𑁆𑀣 𑀏𑀓𑀦𑀺𑀭𑁄𑀥𑀸𑀢𑀺 𑀅𑀢𑁆𑀣𑀸𑀭𑁂𑀦 𑀲𑀳 𑀦𑀺𑀭𑁄𑀥𑀸, 𑀅𑀦𑁆𑀢𑀭𑀼𑀩𑁆𑀪𑀸𑀭𑀲𑀳𑀼𑀩𑁆𑀪𑀸𑀭𑀸𑀦𑀁 𑀉𑀤𑁆𑀥𑀸𑀭𑀸𑀪𑀸𑀯𑁄 𑀏𑀓𑀓𑁆𑀔𑀡𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀸 𑀦𑀸𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑀦𑀸𑀫. 𑀢𑁂𑀲𑀼 𑀳𑀺 𑀉𑀤𑁆𑀥𑀸𑀭𑀪𑀸𑀯𑀁 𑀧𑀢𑁆𑀢𑁂𑀲𑀼𑀧𑀺 𑀅𑀢𑁆𑀣𑀸𑀭𑁄 𑀢𑀺𑀝𑁆𑀞𑀢𑀺 𑀏𑀯𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀯𑀺𑀪𑀸𑀯𑀦𑀸. 𑀲𑀘𑁂 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀪𑀺𑀓𑁆𑀔𑀼𑀲𑁆𑀫𑀺𑀁 𑀲𑀸𑀧𑁂𑀓𑁆𑀔𑁂 𑀢𑀫𑁆𑀳𑀸 𑀆𑀯𑀸𑀲𑀸 𑀧𑀓𑁆𑀓𑀫𑀦𑁆𑀢𑁂 𑀲𑀗𑁆𑀖𑁄 𑀅𑀦𑁆𑀢𑀭𑀼𑀩𑁆𑀪𑀸𑀭𑀁 𑀓𑀭𑁄𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀞𑀫𑀫𑁂𑀯 𑀫𑀽𑀮𑀸𑀯𑀸𑀲𑁂 𑀦𑀺𑀝𑁆𑀞𑀺𑀢𑀘𑀻𑀯𑀭𑀧𑀮𑀺𑀩𑁄𑀥𑀸𑀪𑀸𑀯𑁂𑀧𑀺 𑀲𑀢𑀺 𑀅𑀦𑁆𑀢𑀭𑀼𑀩𑁆𑀪𑀸𑀭𑁂 𑀧𑀮𑀺𑀩𑁄𑀥𑁄 𑀙𑀺𑀚𑁆𑀚𑀢𑀺 𑀲𑀢𑀺𑀧𑀺 𑀲𑀸𑀧𑁂𑀓𑁆𑀔𑀢𑀸𑀬 𑀲𑀉𑀲𑁆𑀲𑀸𑀳𑀢𑁆𑀢𑀸. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀧𑀓𑁆𑀓𑀫𑀦𑀦𑁆𑀢𑀺𑀓𑁄 𑀓𑀣𑀺𑀦𑀼𑀤𑁆𑀥𑀸𑀭𑁄 𑀅𑀢𑁆𑀣𑀸𑀭𑁂𑀦 𑀏𑀓𑀼𑀧𑁆𑀧𑀸𑀤𑁄 𑀦𑀸𑀦𑀸𑀦𑀺𑀭𑁄𑀥𑁄 𑀳𑁄𑀢𑀺. 𑀢𑀣𑀸 𑀅𑀦𑁆𑀢𑀭𑀼𑀩𑁆𑀪𑀸𑀭𑁂 𑀲𑀢𑀺 𑀲𑀼𑀡𑀦𑁆𑀢𑀲𑁆𑀲𑀸𑀧𑀺 𑀬𑀸𑀯 𑀘𑀻𑀯𑀭𑀦𑀺𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺, 𑀢𑀸𑀯 𑀧𑀭𑀺𑀳𑀸𑀭𑀲𑀫𑁆𑀪𑀯𑀢𑁄 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄. 𑀬𑀸𑀯 𑀲𑀦𑁆𑀦𑀺𑀝𑁆𑀞𑀸𑀦𑀁 𑀦 𑀕𑀘𑁆𑀙𑀢𑀺, 𑀢𑀸𑀯 𑀧𑀭𑀺𑀳𑀸𑀭𑀲𑀫𑁆𑀪𑀯𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄. 𑀬𑀸𑀯 𑀦 𑀦𑀲𑁆𑀲𑀢𑀺, 𑀢𑀸𑀯 𑀧𑀭𑀺𑀳𑀸𑀭𑀲𑀫𑁆𑀪𑀯𑀢𑁄 𑀦𑀸𑀲𑀦𑀦𑁆𑀢𑀺𑀓𑁄. 𑀬𑀸𑀯 𑀦 𑀲𑀼𑀡𑀸𑀢𑀺, 𑀢𑀸𑀯 𑀧𑀭𑀺𑀳𑀸𑀭𑀲𑀫𑁆𑀪𑀯𑀢𑁄 𑀲𑀯𑀦𑀦𑁆𑀢𑀺𑀓𑁄. 𑀬𑀸𑀯 𑀘𑀻𑀯𑀭𑀸𑀲𑀸 𑀦 𑀙𑀺𑀚𑁆𑀚𑀢𑀺, 𑀢𑀸𑀯 𑀧𑀭𑀺𑀳𑀸𑀭𑀲𑀫𑁆𑀪𑀯𑀢𑁄 𑀆𑀲𑀸𑀯𑀘𑁆𑀙𑁂𑀤𑀺𑀓𑁄. 𑀬𑀸𑀯 𑀲𑀻𑀫𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀧𑀭𑀺𑀳𑀸𑀭𑀲𑀫𑁆𑀪𑀯𑀢𑁄 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑁄. 𑀅𑀢𑁆𑀣𑀸𑀭𑁂𑀦 𑀏𑀓𑀼𑀧𑁆𑀧𑀸𑀤𑁄 𑀦𑀸𑀦𑀸𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀅𑀦𑁆𑀢𑀭𑀼𑀩𑁆𑀪𑀸𑀭𑀲𑀳𑀼𑀩𑁆𑀪𑀸𑀭𑀸 𑀤𑁆𑀯𑁂 𑀅𑀦𑁆𑀢𑁄𑀲𑀻𑀫𑀸𑀬𑀁 𑀏𑀯 𑀲𑀫𑁆𑀪𑀯𑀦𑁆𑀢𑀺, 𑀦 𑀩𑀳𑀺𑀲𑀻𑀫𑀸𑀬𑀁. 𑀧𑀓𑁆𑀓𑀫𑀦𑀲𑀯𑀦𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀸 𑀩𑀳𑀺𑀲𑀻𑀫𑀸𑀬𑀫𑁂𑀯 𑀲𑀫𑁆𑀪𑀯𑀦𑁆𑀢𑀺, 𑀦 𑀅𑀦𑁆𑀢𑁄𑀲𑀻𑀫𑀸𑀬𑀁. 𑀦𑀺𑀝𑁆𑀞𑀸𑀦𑀲𑀅𑀆𑀝𑁆𑀞𑀸𑀦𑀸𑀲𑀸𑀯𑀘𑁆𑀙𑁂𑀤𑀺𑀓𑀸 𑀅𑀦𑁆𑀢𑁄𑀲𑀻𑀫𑀸𑀬𑀜𑁆𑀘𑁂𑀯 𑀩𑀳𑀺𑀲𑀻𑀫𑀸𑀬𑀜𑁆𑀘. 𑀅𑀦𑁆𑀢𑀭𑀼𑀩𑁆𑀪𑀸𑀭𑁄 𑀲𑀗𑁆𑀖𑀸𑀬𑀢𑁆𑀢𑁄, 𑀧𑀓𑁆𑀓𑀫𑀦𑀦𑀺𑀝𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀸 𑀧𑀼𑀕𑁆𑀕𑀮𑀸𑀥𑀻𑀦𑀸, 𑀲𑁂𑀲𑀸 𑀢𑀤𑀼𑀪𑀬𑀯𑀺𑀧𑀭𑀻𑀢𑀸.

𑀢𑀢𑁆𑀣 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀘𑀻𑀯𑀭𑀧𑀮𑀺𑀩𑁄𑀥𑀸𑀪𑀸𑀯𑀫𑁂𑀯 𑀤𑀻𑀧𑁂𑀢𑀺. 𑀦 𑀆𑀯𑀸𑀲𑀧𑀮𑀺𑀩𑁄𑀥𑀸𑀪𑀸𑀯𑀁. ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀇𑀫𑀺𑀦𑀸 𑀉𑀪𑀬𑀧𑀮𑀺𑀩𑁄𑀥𑀸𑀪𑀸𑀯𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀉𑀪𑀬𑀧𑀮𑀺𑀩𑁄𑀥𑀸𑀪𑀸𑀯𑀤𑀻𑀧𑀦𑀢𑁆𑀣𑀁 𑀢𑀤𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀯𑀺𑀲𑁂𑀲𑀢𑁆𑀢𑀸. 𑀓𑀣𑀁? 𑀓𑀸𑀫𑀜𑁆𑀘𑁂𑀢𑀁 𑀢𑀲𑁆𑀫𑀸 ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀓𑁂𑀲𑀜𑁆𑀘𑀺 𑀓𑀣𑀺𑀦𑀼𑀤𑁆𑀥𑀸𑀭𑀸𑀦𑀁 𑀦𑀸𑀦𑀸𑀦𑀺𑀭𑁄𑀥𑀢𑁆𑀢𑀸, 𑀲𑀗𑁆𑀖𑀧𑀼𑀕𑁆𑀕𑀮𑀸𑀥𑀻𑀦𑀸𑀦𑀥𑀻𑀦𑀢𑁆𑀢𑀸 𑀘 𑀅𑀦𑁆𑀢𑁄𑀩𑀳𑀺𑀉𑀪𑀬𑀲𑀻𑀫𑀸𑀲𑀼 𑀦𑀺𑀬𑀫𑀸𑀦𑀺𑀬𑀫𑀢𑁄 𑀘 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀲𑀗𑁆𑀖𑀲𑁆𑀲, 𑀦 𑀧𑀼𑀕𑁆𑀕𑀮𑀲𑁆𑀲 𑀉𑀩𑁆𑀪𑀢𑀁 𑀳𑁄𑀢𑀺, 𑀢𑀣𑀸𑀧𑀺 ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀇𑀤𑀁 𑀲𑀸𑀫𑀜𑁆𑀜𑀯𑀘𑀦𑀁. 𑀢𑀲𑁆𑀫𑀸 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀬𑀫𑁂𑀢𑀺.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀗𑁆𑀖𑀲𑁆𑀲 𑀅𑀦𑁆𑀢𑀭𑀼𑀩𑁆𑀪𑀸𑀭𑁂𑀦 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀧𑀮𑀺𑀩𑁄𑀥𑁄 𑀩𑀳𑀺𑀲𑀻𑀫𑀸𑀕𑀢𑁄 𑀧𑀘𑁆𑀙𑀸 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀫𑀸𑀕𑀢𑁄 𑀅𑀦𑀺𑀝𑁆𑀞𑀺𑀢𑀘𑀻𑀯𑀭𑁄 𑀆𑀦𑀺𑀲𑀁𑀲𑀁 𑀮𑀪𑀢𑀺 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀆𑀯𑀸𑀲𑀧𑀮𑀺𑀩𑁄𑀥𑁄 𑀦𑀸𑀫 𑀯𑀲𑀢𑀺 𑀯𑀸 𑀢𑀲𑁆𑀫𑀺𑀁 𑀆𑀯𑀸𑀲𑁂, 𑀲𑀸𑀧𑁂𑀓𑁆𑀔𑁄 𑀯𑀸 𑀧𑀓𑁆𑀓𑀫𑀢𑀺. 𑀘𑀻𑀯𑀭𑀧𑀮𑀺𑀩𑁄𑀥𑁄 𑀦𑀸𑀫 𑀘𑀻𑀯𑀭𑀁 𑀅𑀓𑀢𑀁 𑀯𑀺𑀧𑁆𑀧𑀓𑀢𑀁, 𑀘𑀻𑀯𑀭𑀸𑀲𑀸𑀦𑀼𑀧𑀘𑁆𑀙𑀺𑀦𑁆𑀦𑀸, 𑀢𑀩𑁆𑀩𑀺𑀧𑀭𑀻𑀢𑁂𑀦 𑀅𑀧𑀮𑀺𑀩𑁄𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀘𑀻𑀯𑀭𑀓𑀸𑀮𑀲𑀫𑀬𑁂 𑀦𑀺𑀬𑀫𑀢𑁄 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑀸 𑀮𑀩𑁆𑀪𑀦𑁆𑀢𑀺, 𑀅𑀲𑀫𑀸𑀤𑀸𑀦𑀘𑀸𑀭𑁄 𑀅𑀦𑀺𑀬𑀫𑀢𑁄. 𑀢𑁂𑀦 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀁 𑀯𑀼𑀢𑁆𑀢𑀁. 𑀓𑀣𑀁 𑀘𑀢𑁆𑀢𑀸𑀭𑁄 𑀦𑀺𑀬𑀢𑀸𑀢𑀺 𑀘𑁂? ‘‘𑀘𑀻𑀯𑀭𑀓𑀸𑀮𑀲𑀫𑀬𑁄 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄’’𑀢𑀺 (𑀧𑀸𑀭𑀸. 𑁬𑁪𑁯) 𑀯𑀘𑀦𑀢𑁄 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀢𑀲𑁆𑀫𑀺𑀁 𑀫𑀸𑀲𑁂 𑀬𑀸𑀯𑀤𑀢𑁆𑀣𑀘𑀻𑀯𑀭𑀁 𑀲𑀺𑀤𑁆𑀥𑀁, 𑀢𑀣𑀸 𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁪𑁯𑁭 𑀆𑀤𑀬𑁄) 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀧𑀺𑀝𑁆𑀞𑀺𑀲𑀫𑀬𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀗𑁆𑀖𑀢𑁄 𑀮𑀪𑀺𑀢𑀩𑁆𑀩𑀁 𑀘𑁂, 𑀬𑀸𑀯 𑀘𑀻𑀯𑀭𑀓𑀸𑀮𑀲𑀫𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀧𑀼𑀕𑁆𑀕𑀮𑀺𑀓𑀁 𑀘𑁂, 𑀯𑀲𑁆𑀲𑀸𑀦𑀲𑁆𑀲 𑀙𑀝𑁆𑀞𑀧𑀓𑁆𑀔𑀲𑁆𑀲 𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀁 𑀯𑀝𑁆𑀝𑀢𑀺 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀼𑀜𑁆𑀜𑀸𑀢𑀢𑁆𑀢𑀸, 𑀦 𑀢𑀢𑁄 𑀧𑀭𑀁. 𑀢𑀤𑀸 𑀉𑀧𑁆𑀧𑀦𑁆𑀦𑀘𑀻𑀯𑀭𑀲𑁆𑀲 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀧𑀞𑀫𑀓𑀣𑀺𑀦𑁂𑀦. 𑀢𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁄 𑀲𑀗𑁆𑀖𑀺𑀓𑀁 𑀲𑀦𑁆𑀥𑀸𑀬, 𑀢𑀣𑀸 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀓𑀣𑀺𑀦𑁂 (𑀧𑀸𑀭𑀸. 𑁪𑁫𑁯 𑀆𑀤𑀬𑁄) 𑀧𑀞𑀫𑀧𑀜𑁆𑀜𑀢𑁆𑀢𑀺𑀬𑀸, 𑀅𑀯𑀺𑀲𑁂𑀲𑁂𑀦 𑀯𑀸 𑀏𑀓𑀸𑀤𑀲𑀫𑁂 𑀤𑀺𑀯𑀲𑁂 𑀆𑀧𑀢𑁆𑀢𑀺. 𑀯𑀲𑁆𑀲𑀸𑀦𑀲𑁆𑀲 𑀳𑀺 𑀅𑀦𑁆𑀢𑁄𑀦𑀺𑀯𑀸𑀭𑀡𑀢𑁆𑀣𑀁 𑀅𑀝𑁆𑀞𑀓𑀣𑀸𑀬 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 (𑀧𑀸𑀭𑀸. 𑁪𑁬𑁨 𑀆𑀤𑀬𑁄) 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀤𑀼𑀢𑀺𑀬𑁂, 𑀢𑀢𑀺𑀬𑁂 𑀘. 𑀢𑁂𑀦 𑀘𑀻𑀯𑀭𑀓𑀸𑀮𑀢𑁄 𑀧𑀼𑀭𑁂 𑀯𑀸 𑀅𑀦𑁆𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀘𑀻𑀯𑀭𑀓𑀸𑀮𑀢𑁄 𑀉𑀤𑁆𑀥𑀁 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑀁 𑀦 𑀮𑀪𑀢𑀺. 𑀬𑀤𑀺 𑀮𑀪𑁂𑀬𑁆𑀬, 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀺𑀭𑁄𑀥𑁄. ‘‘𑀬𑀸𑀯 𑀘𑀻𑀯𑀭𑀓𑀸𑀮𑀲𑀫𑀬𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁬𑁪𑁮) 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀯𑁂𑀦 𑀲𑀗𑁆𑀖𑀢𑁄 𑀮𑀤𑁆𑀥𑀁 𑀯𑀼𑀝𑁆𑀞𑀯𑀲𑁆𑀲𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀽𑀢𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀏𑀯 𑀆𑀧𑀢𑁆𑀢𑀺, 𑀦 𑀅𑀘𑁆𑀘𑁂𑀓𑀘𑀻𑀯𑀭𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀆𑀧𑀢𑁆𑀢𑀻𑀢𑀺. ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄, 𑀲𑁄 𑀘 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀲𑀺𑀤𑁆𑀥𑀁, 𑀅𑀦𑀸𑀫𑀦𑁆𑀢𑀘𑀸𑀭𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 ‘‘𑀅𑀜𑁆𑀜𑀢𑁆𑀭 𑀲𑀫𑀬𑀸’’𑀢𑀺 (𑀧𑀸𑀘𑀺. 𑁨𑁨𑁨 𑀆𑀤𑀬𑁄) 𑀯𑀼𑀢𑁆𑀢𑀢𑁆𑀢𑀸 𑀲𑁂𑀲𑀤𑁆𑀯𑀬𑀁 𑀲𑀺𑀤𑁆𑀥𑀫𑁂𑀯. 𑀢𑀲𑁆𑀫𑀸 ‘‘𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀏𑀢𑀁 𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀆𑀤𑀺𑀲𑁆𑀲 𑀤𑀺𑀦𑁆𑀦𑀘𑀻𑀯𑀭𑀁 𑀧𑀭𑀺𑀳𑀸𑀭𑀁 𑀦 𑀮𑀪𑀢𑀺.

𑀅𑀧𑀭𑀓𑀢𑁆𑀢𑀺𑀓𑀸𑀬𑀫𑁂𑀯 𑀯𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀮𑀪𑀢𑀺, 𑀏𑀯𑀁 ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁. 𑀙 𑀞𑀸𑀦𑀸𑀦𑀺 𑀳𑀺 𑀲𑀸𑀧𑁂𑀓𑁆𑀔𑀢𑀸𑀬 𑀯𑀼𑀢𑁆𑀢𑀸𑀦𑀺. 𑀤𑀼𑀝𑁆𑀞𑀤𑁄𑀲𑀤𑁆𑀯𑀬𑁂 𑀅𑀥𑀺𑀓𑀭𑀡𑀘𑀢𑀼𑀢𑁆𑀣𑀁, 𑀧𑀞𑀫𑀸𑀦𑀺𑀬𑀢𑁂 𑀲𑁄𑀢𑀲𑁆𑀲 𑀭𑀳𑁄, 𑀢𑀢𑀺𑀬𑀓𑀣𑀺𑀦𑁂 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀘𑀻𑀯𑀭𑀁, 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑁂 ‘‘𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 𑀧𑀤𑀁, 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀤𑁆𑀯𑀬𑁂 𑀅𑀥𑀺𑀓𑀭𑀡𑀁, 𑀧𑀸𑀭𑀸𑀚𑀺𑀓𑀯𑀘𑀦𑀜𑁆𑀘, 𑀢𑀻𑀲𑀼 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑁂𑀲𑀼 ‘‘𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀅𑀜𑁆𑀜𑀢𑀭𑀸𑀬𑀸’’𑀢𑀺 𑀯𑀘𑀦𑀦𑁆𑀢𑀺. 𑀢𑀢𑁆𑀣 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀘𑀻𑀯𑀭𑀁 𑀲𑀗𑁆𑀖𑀺𑀓𑀁 𑀪𑀸𑀚𑀺𑀢𑀩𑁆𑀩𑀘𑀻𑀯𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀼𑀕𑁆𑀕𑀮𑀺𑀓𑀁. 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀘𑀻𑀯𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀯𑀼𑀝𑁆𑀞𑀯𑀲𑁆𑀲𑁂𑀦 𑀧𑀘𑁆𑀙𑀸 𑀤𑀸𑀢𑀩𑁆𑀩𑀢𑁆𑀢𑀸 𑀲𑀜𑁆𑀜𑀸𑀡𑀁 𑀓𑀸𑀢𑀩𑁆𑀩𑀁, 𑀦 𑀜𑀸𑀢𑀺𑀧𑁆𑀧𑀯𑀸𑀭𑀺𑀢𑀢𑁄 𑀮𑀤𑁆𑀥𑀁 𑀧𑀼𑀕𑁆𑀕𑀮𑀺𑀓𑀁 𑀲𑀦𑁆𑀥𑀸𑀬. 𑀢𑀲𑁆𑀫𑀸 𑀤𑀼𑀯𑀺𑀥𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀲𑀗𑁆𑀖𑁂 𑀦𑀺𑀦𑁆𑀦𑀁, 𑀧𑀼𑀕𑁆𑀕𑀮𑁂 𑀦𑀺𑀦𑁆𑀦𑀜𑁆𑀘𑀸𑀢𑀺 𑀲𑀺𑀤𑁆𑀥𑀁. 𑀢𑀢𑁆𑀣 𑀲𑀗𑁆𑀖𑁂 𑀧𑀭𑀺𑀡𑀢𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀢𑁄 𑀧𑀝𑁆𑀞𑀸𑀬, 𑀧𑀺𑀝𑁆𑀞𑀺𑀲𑀫𑀬𑀢𑁄 𑀧𑀝𑁆𑀞𑀸𑀬 𑀯𑀸 𑀬𑀸𑀯 𑀧𑀯𑀸𑀭𑀡𑀸 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯 𑀲𑀗𑁆𑀖𑀺𑀓𑀢𑁆𑀢𑀸, 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 ‘‘𑀯𑀲𑁆𑀲𑀁𑀯𑀼𑀝𑁆𑀞𑀓𑀸𑀮𑁂 𑀕𑀡𑁆𑀳𑀣𑀸’’𑀢𑀺 𑀤𑀺𑀦𑁆𑀦𑀢𑁆𑀢𑀸. 𑀢𑀸𑀤𑀺𑀲𑀜𑁆𑀳𑀺 𑀬𑀸𑀯 𑀯𑀲𑁆𑀲𑀁𑀯𑀼𑀝𑁆𑀞𑁄 𑀦 𑀳𑁄𑀢𑀺, 𑀢𑀸𑀯 𑀢𑀲𑁆𑀲𑁂𑀯 𑀤𑀸𑀬𑀓𑀲𑁆𑀲 𑀲𑀦𑁆𑀢𑀓𑀁 𑀳𑁄𑀢𑀺. 𑀏𑀢𑁆𑀢𑀓𑁄 𑀯𑀺𑀲𑁂𑀲𑀳𑁂𑀢𑀼.

‘‘𑀅𑀦𑀘𑁆𑀘𑁂𑀓𑀘𑀻𑀯𑀭𑁂 𑀅𑀦𑀘𑁆𑀘𑁂𑀓𑀘𑀻𑀯𑀭𑀲𑀜𑁆𑀜𑀻 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄 𑀅𑀘𑁆𑀘𑁂𑀓𑀘𑀻𑀯𑀭𑀓𑀲𑁆𑀲𑁂𑀯 𑀲𑁄 𑀅𑀧𑀭𑀸𑀥𑁄. 𑀬𑁂𑀦 ‘‘𑀯𑀺𑀭𑁄𑀥𑁄’’𑀢𑀺 𑀯𑀘𑀦𑀁 𑀤𑀲𑁆𑀲𑁂𑀬𑁆𑀬𑀸𑀢𑀺 𑀦 𑀯𑀺𑀦𑀬𑁂 𑀯𑀺𑀲𑁂𑀲𑀳𑁂𑀢𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀩𑀼𑀤𑁆𑀥𑀯𑀺𑀲𑀬𑀢𑁆𑀢𑀸 𑀧𑀫𑀸𑀡𑀦𑁆𑀢𑀺 𑀘𑁂? 𑀦, 𑀬𑀤𑀺 𑀏𑀯𑀁 𑀏𑀢𑁆𑀣 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀽𑀢𑀫𑁆𑀧𑀺 𑀅𑀘𑁆𑀘𑁂𑀓𑀘𑀻𑀯𑀭𑀁 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯, 𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀢𑀢𑁄 ‘‘𑀅𑀦𑀸𑀧𑀢𑁆𑀢𑀺, 𑀅𑀦𑁆𑀢𑁄𑀲𑀫𑀬𑁂 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺𑀆𑀤𑀺𑀯𑀘𑀦𑀯𑀺𑀭𑁄𑀥𑁄 (𑀧𑀸𑀭𑀸. 𑁬𑁫𑁧) 𑀅𑀥𑀺𑀯𑀸𑀲𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀣𑀸 ‘‘𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀓𑀣𑀺𑀦𑀼𑀤𑁆𑀥𑀸𑀭𑁂 𑀓𑀢𑁂 𑀢𑀲𑁆𑀫𑀺𑀁 𑀫𑀸𑀲𑁂 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀓𑀣𑀺𑀦𑀼𑀤𑁆𑀥𑀸𑀭𑀤𑀺𑀯𑀲𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻’’𑀢𑀺 𑀯𑀘𑀦𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑀯𑀺𑀭𑁄𑀥𑁄 𑀅𑀥𑀺𑀯𑀸𑀲𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀲𑁆𑀫𑀺𑀜𑁆𑀘 ‘‘𑀅𑀦𑀘𑁆𑀘𑁂𑀓𑀘𑀻𑀯𑀭𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀫𑁂𑀯𑀸𑀢𑀺 𑀏𑀢𑁆𑀢𑀓𑁄 𑀯𑀺𑀲𑁂𑀲𑀳𑁂𑀢𑀼. 𑀅𑀢𑀺𑀭𑁂𑀓𑀘𑀻𑀯𑀭𑀜𑁆𑀘𑁂𑀢𑀁 𑀧𑀞𑀫𑀲𑀺𑀓𑁆𑀔𑀸𑀧𑀤𑁂𑀦𑀸𑀧𑀢𑁆𑀢𑀺, 𑀇𑀢𑀭𑀁 𑀘𑁂 𑀅𑀦𑀸𑀧𑀢𑁆𑀢𑀺𑀬𑁂𑀯𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀬𑀁 𑀪𑀕𑀯𑀢𑁄 𑀯𑀺𑀲𑁂𑀲𑀳𑁂𑀢𑀼. 𑀢𑀣𑀸 𑀅𑀢𑀺𑀭𑁂𑀓𑀤𑀲𑀸𑀳𑀸𑀦𑀸𑀕𑀢𑀸𑀬𑁂𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀲𑀗𑁆𑀖𑀲𑁆𑀲 𑀯𑀲𑁆𑀲𑀸𑀯𑀸𑀲𑀺𑀓𑀢𑁆𑀣𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀯𑀺𑀬 𑀤𑀤𑀫𑀸𑀦𑀁 𑀦 𑀕𑀳𑁂𑀢𑀩𑁆𑀩𑀁, 𑀤𑀲𑀸𑀳𑀸𑀦𑀸𑀕𑀢𑀸𑀬 𑀏𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀢𑀓𑁄 𑀯𑀺𑀲𑁂𑀲𑀳𑁂𑀢𑀼. 𑀢𑀢𑁄 𑀅𑀝𑁆𑀞𑀓𑀣𑀸𑀦𑀬𑀯𑀺𑀭𑁄𑀥𑁄 𑀘 𑀅𑀥𑀺𑀯𑀸𑀲𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀢𑁆𑀣 ‘‘𑀅𑀥𑀺𑀝𑁆𑀞𑀺𑀢𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀣𑀸 𑀦𑀬𑁄 𑀤𑀲𑁆𑀲𑀺𑀢𑁄. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀲𑁄 𑀘 𑀦𑀬𑁄 𑀲𑀗𑁆𑀖𑀺𑀓𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀢𑁆𑀢𑀸 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀦𑁂𑀯 𑀲𑁄 𑀘 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀬𑀣𑀸 𑀅𑀦𑀘𑁆𑀘𑁂𑀓𑀘𑀻𑀯𑀭𑀁 𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀁 𑀅𑀢𑀺𑀭𑁂𑀓𑀤𑀲𑀸𑀳𑀸𑀦𑀸𑀕𑀢𑀸𑀬𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑀬𑀢𑁄𑀧𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀅𑀥𑀺𑀯𑀸𑀲𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀢𑁄 𑀧𑀞𑀫𑀓𑀣𑀺𑀦𑀯𑀺𑀭𑁄𑀥𑁄. 𑀤𑀲𑀸𑀳𑀸𑀦𑀸𑀕𑀢𑀸𑀬 𑀏𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂, 𑀢𑀁 𑀤𑁆𑀯𑁂 𑀤𑀲𑀸𑀳𑁂 𑀮𑀪𑀢𑀻𑀢𑀺 𑀏𑀢𑁆𑀢𑀓𑁄 𑀯𑀺𑀲𑁂𑀲𑀳𑁂𑀢𑀼.

𑀅𑀦𑁆𑀢𑀭𑀸 𑀅𑀦𑀸𑀧𑀢𑁆𑀢𑀺𑀓𑁆𑀔𑁂𑀢𑁆𑀢𑀘𑀻𑀯𑀭𑀓𑀸𑀮𑀧𑁆𑀧𑀯𑀺𑀝𑁆𑀞𑀢𑁆𑀢𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀼𑀤𑁆𑀥𑀝𑀁 𑀯𑀺𑀬 𑀢𑀁 𑀧𑀼𑀦𑀧𑀺 𑀤𑀲𑀸𑀳𑁂 𑀮𑀪𑀢𑀻𑀢𑀺 𑀘𑁂? 𑀦, 𑀓𑀸𑀮𑀧𑁆𑀧𑀯𑁂𑀲𑁄 𑀅𑀥𑀺𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀘𑁂? 𑀦, ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀯𑀘𑀦𑀯𑀺𑀭𑁄𑀥𑀁 𑀓𑀢𑁆𑀯𑀸, 𑀢𑀢𑁄 𑀧𑀭𑀁 𑀤𑀲𑀸𑀳𑀁 𑀅𑀯𑀺𑀓𑀧𑁆𑀧𑁂𑀦𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸. 𑀅𑀧𑀺𑀘 𑀬𑀁 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑁆𑀢𑁄𑀯𑀲𑁆𑀲𑁂 𑀮𑀤𑁆𑀥𑀸 𑀘𑁂𑀯 𑀦𑀺𑀝𑁆𑀞𑀺𑀢𑀸 𑀘, 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀝𑁆𑀞𑀺𑀢𑀸, 𑀢𑀤𑀳𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁩𑁦). 𑀢𑁂𑀦 𑀆𑀧𑀢𑁆𑀢𑀺𑀢𑁄 𑀦 𑀫𑀼𑀘𑁆𑀘𑁂𑀬𑁆𑀬. 𑀓𑀸𑀮𑀧𑁆𑀧𑀯𑁂𑀲𑁄 𑀳𑀺 𑀅𑀥𑀺𑀝𑁆𑀞𑀸𑀦𑀧𑀭𑀺𑀬𑀸𑀬𑁄 𑀦 𑀚𑀸𑀢𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 𑀧𑀸𑀴𑀺𑀦𑀬𑁂𑀦𑁂𑀯 𑀧𑀢𑀺𑀝𑁆𑀞𑀸𑀧𑀺𑀢𑁄 𑀳𑁄𑀢𑀺.

𑀅𑀧𑀺𑀘𑁂𑀢𑁆𑀣 𑀬𑀁 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀸’’𑀢𑀺, 𑀢𑀢𑁆𑀣𑀧𑀺 𑀘𑀻𑀯𑀭𑀓𑀸𑀮𑁂 𑀉𑀧𑁆𑀧𑀦𑁆𑀦𑀁, 𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀲𑁆𑀲 𑀓𑀭𑀡𑀁 𑀦𑀢𑁆𑀣𑀺, 𑀢𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀅𑀓𑀸𑀮𑀘𑀻𑀯𑀭𑀫𑀺𑀯 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀫𑁂𑀢𑀁. 𑀧𑀸𑀴𑀺𑀢𑁄 𑀘 𑀢𑀜𑁆𑀘𑁂 𑀅𑀦𑁆𑀢𑁄𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀧𑁆𑀧𑀦𑁆𑀦𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀅𑀘𑁆𑀘𑁂𑀓𑀘𑀻𑀯𑀭𑀫𑁂𑀯 𑀦 𑀳𑁄𑀢𑀺. 𑀦 𑀳𑀺 𑀢𑀁 𑀓𑀸𑀮𑀯𑀺𑀲𑁂𑀲𑀯𑀲𑁂𑀦 𑀅𑀘𑁆𑀘𑁂𑀓𑀘𑀻𑀯𑀭𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀘𑁆𑀘𑁂𑀓𑀘𑀻𑀯𑀭𑀁 𑀦𑀸𑀫 𑀲𑁂𑀦𑀸𑀬 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀯𑀸𑀲𑀁 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀕𑀩𑁆𑀪𑀺𑀦𑀻 𑀯𑀸 𑀳𑁄𑀢𑀺, 𑀅𑀲𑁆𑀲𑀤𑁆𑀥𑀲𑁆𑀲 𑀯𑀸 𑀲𑀤𑁆𑀥𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺…𑀧𑁂… ‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫𑀻’𑀢𑀺 𑀏𑀯𑀁 𑀆𑀭𑁄𑀘𑀺𑀢𑀁, 𑀏𑀢𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀦𑀸𑀫𑀸’’𑀢𑀺 (𑀧𑀸𑀭𑀸. 𑁬𑁪𑁯). 𑀢𑀲𑁆𑀫𑀸 𑀬𑀣𑀸 𑀢𑀁 𑀘𑀻𑀯𑀭𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀁, 𑀢𑀣𑀸 𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀸’’𑀢𑀺. 𑀅𑀧𑀺𑀘 𑀬𑀤𑀺 𑀏𑀯𑀁 𑀢𑀁 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀫𑁂𑀯 𑀅𑀘𑁆𑀘𑁂𑀓𑀘𑀻𑀯𑀭𑀁 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀦𑁆𑀢𑀺 𑀇𑀫𑀲𑁆𑀲 𑀧𑀦 𑀅𑀢𑁆𑀣𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁.

𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀁 𑀏𑀯𑀁 𑀯𑀼𑀢𑁆𑀢𑀁 𑁋 𑀓𑀸𑀫𑀜𑁆𑀘𑁂𑀤𑀁 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀺𑀤𑁆𑀥𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀅𑀧𑀼𑀩𑁆𑀩𑀁 𑀯𑀺𑀬 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀞𑀧𑀺𑀢𑀦𑁆𑀢𑀺 𑀅𑀢𑁆𑀣𑀯𑀺𑀲𑁂𑀲𑀤𑀻𑀧𑀦𑀧𑀬𑁄𑀚𑀦𑀢𑁄. 𑀢𑀲𑁆𑀫𑀸 𑀢𑀁 𑀢𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀲𑀺𑀤𑁆𑀥𑀫𑁂𑀯. 𑀢𑀲𑁆𑀫𑀸𑀧𑀺 𑀯𑁂𑀤𑀺𑀢𑀩𑁆𑀩𑀫𑁂𑀯 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁 𑀘𑀻𑀯𑀭𑀓𑀸𑀮𑀲𑀫𑀬𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀦𑁆𑀢𑀺. 𑀅𑀧𑀺𑀘 𑀬𑀁 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀧𑁆𑀧𑀦𑁆𑀦𑀁 𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀸𑀭𑁂𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀫𑁆𑀧𑀺 𑀏𑀢𑀁 𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁪𑁬-𑁬𑁪𑁯). 𑀢𑁂𑀦 ‘‘𑀅𑀦𑀘𑁆𑀘𑁂𑀓𑀘𑀻𑀯𑀭𑁂 𑀅𑀦𑀘𑁆𑀘𑁂𑀓𑀘𑀻𑀯𑀭𑀲𑀜𑁆𑀜𑀻 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁬𑁫𑁦) 𑀇𑀫𑀺𑀦𑀸𑀧𑀺 𑀅𑀦𑀘𑁆𑀘𑁂𑀓𑀘𑀻𑀯𑀭𑀲𑁆𑀲𑀸𑀧𑀺 𑀅𑀘𑁆𑀘𑁂𑀓𑀘𑀻𑀯𑀭𑀧𑀭𑀺𑀳𑀸𑀭𑀮𑀸𑀪𑀁 𑀤𑀻𑀧𑁂𑀢𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀬𑀣𑀸𑀯𑀼𑀢𑁆𑀢𑁄 𑀤𑀼𑀢𑀺𑀬𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 𑀧𑀸𑀴𑀺𑀦𑀬𑁂𑀦, 𑀅𑀝𑁆𑀞𑀓𑀣𑀸𑀦𑀬𑁂𑀦 𑀘 𑀧𑀢𑀺𑀝𑁆𑀞𑀸𑀧𑀺𑀢𑁄 𑀳𑁄𑀢𑀺. 𑀏𑀯𑀁 𑀢𑀸𑀯 𑀧𑀓𑀺𑀡𑁆𑀡𑀓𑀸𑀬 𑀅𑀥𑀺𑀓𑀣𑀸 𑀧𑀭𑀢𑁄 𑀧𑀸𑀞𑀢𑁄 𑀯𑀺𑀢𑁆𑀣𑀸𑀭𑀺𑀢𑀸 𑀳𑁄𑀢𑀻𑀢𑀺 𑀅𑀧𑀓𑀺𑀡𑁆𑀡𑀓𑀁.

𑀘𑀻𑀯𑀭𑀧𑀮𑀺𑀩𑁄𑀥𑁄, 𑀆𑀯𑀸𑀲𑀧𑀮𑀺𑀩𑁄𑀥𑁄 𑀘𑀸𑀢𑀺 𑀤𑁆𑀯𑁂 𑀧𑀮𑀺𑀩𑁄𑀥𑀸. 𑀢𑁂𑀲𑀼 𑀏𑀓𑀧𑀮𑀺𑀩𑁄𑀥𑁂𑀧𑀺 𑀲𑀢𑀺 𑀅𑀦𑀸𑀫𑀦𑁆𑀢𑀘𑀸𑀭𑀸𑀤𑀺𑀆𑀦𑀺𑀲𑀁𑀲𑀁 𑀮𑀪𑀢𑀺, 𑀢𑀁 𑀇𑀥 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀯 ‘‘𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀩𑁆𑀩𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁 𑁋 𑀧𑀼𑀩𑁆𑀩𑀓𑀭𑀡𑀁 𑀚𑀸𑀦𑀸𑀢𑀺, 𑀧𑀘𑁆𑀘𑀼𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀅𑀥𑀺𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀅𑀢𑁆𑀣𑀸𑀭𑀁 𑀚𑀸𑀦𑀸𑀢𑀺, 𑀫𑀸𑀢𑀺𑀓𑀁 𑀚𑀸𑀦𑀸𑀢𑀺, 𑀧𑀮𑀺𑀩𑁄𑀥𑀁 𑀚𑀸𑀦𑀸𑀢𑀺, 𑀉𑀤𑁆𑀥𑀸𑀭𑀁 𑀚𑀸𑀦𑀸𑀢𑀺, 𑀆𑀦𑀺𑀲𑀁𑀲𑀁 𑀚𑀸𑀦𑀸𑀢𑀻’’𑀢𑀺 (𑀧𑀭𑀺. 𑁪𑁦𑁯) 𑀯𑀘𑀦𑀢𑁄 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑁄 𑀦𑀸𑀫. 𑀧𑀼𑀩𑁆𑀩𑀓𑀭𑀡𑀁 𑀦𑀸𑀫 𑀥𑁄𑀯𑀦𑀯𑀺𑀘𑀸𑀭𑀡𑀘𑁆𑀙𑁂𑀤𑀦𑀲𑀺𑀩𑁆𑀩𑀦𑀭𑀚𑀦𑀓𑀧𑁆𑀧𑀓𑀭𑀡𑀁.

‘‘𑀘𑀻𑀯𑀭𑀁 𑀦𑀸𑀫 𑀔𑁄𑀫’’𑀦𑁆𑀢𑀺𑀆𑀤𑀺𑀦𑀸 𑀧𑀸𑀴𑀺𑀯𑀲𑁂𑀦 𑀚𑀸𑀢𑀺𑀜𑁆𑀘 𑀧𑀫𑀸𑀡𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑀺𑀭𑁂𑀓𑀘𑀻𑀯𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀧𑀦 𑀯𑀼𑀢𑁆𑀢𑀁 𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀬𑀁 𑀞𑀧𑀺𑀢𑀁, 𑀢𑀲𑁆𑀫𑀺𑀁 𑀢𑀁 𑀧𑀘𑁆𑀙𑀸 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀅𑀥𑀺𑀝𑁆𑀞𑀸𑀦𑀁 𑀭𑀼𑀳𑀢𑁂𑀯. 𑀧𑀼𑀭𑁂 𑀧𑀘𑁆𑀙𑀸 𑀞𑀧𑀦𑀝𑁆𑀞𑀸𑀦𑀁 𑀦 𑀧𑀫𑀸𑀡𑀁.

𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀲𑁂𑀢𑀯𑀢𑁆𑀣𑀦𑀺𑀯𑀸𑀲𑀦𑀁 𑀯𑀸 𑀓𑀸𑀲𑀸𑀯𑀘𑀚𑀦𑀁 𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀦𑀁.

𑀏𑀓𑀸𑀤𑀲𑀫𑁂 𑀅𑀭𑀼𑀡𑀼𑀕𑁆𑀕𑀫𑀦𑁂𑀢𑀺 𑀅𑀦𑁆𑀢𑀺𑀫𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀧𑀼𑀭𑀺𑀫𑀢𑀭𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀦𑁆𑀢𑀺𑀫𑀁 𑀦𑀸𑀫 𑀅𑀧𑀭𑀓𑀢𑁆𑀢𑀺𑀓𑀸𑀬 𑀧𑀞𑀫𑀸𑀭𑀼𑀡𑀼𑀕𑁆𑀕𑀫𑀦𑀁. 𑀢𑀜𑁆𑀳𑀺 𑀓𑀸𑀮𑀢𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀓𑀭𑁄𑀢𑀺. 𑀇𑀥 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸’’𑀢𑀺 𑀓𑀭𑀡𑀯𑀘𑀦𑀁 𑀦𑀺𑀤𑀸𑀦𑀸𑀦𑀧𑁂𑀓𑁆𑀔𑀁 𑀦𑀺𑀤𑀸𑀦𑁂 𑀓𑀭𑀡𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀏𑀯 ‘‘𑀤𑀲𑀸𑀳𑀧𑀭𑀫’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺𑀆𑀤𑀺 (𑀫𑀳𑀸𑀯. 𑁩𑁫𑁮) 𑀯𑀘𑀦𑀢𑁄 𑀘 𑀇𑀥 ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀦 𑀘 𑀯𑀺𑀭𑀼𑀤𑁆𑀥𑀁 𑀢𑀣𑀸𑀕𑀢𑀸 𑀪𑀸𑀲𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀲𑀗𑁆𑀔𑁂𑀧𑁂𑀦 𑀧𑀭𑀺𑀳𑀸𑀭𑀢𑁄 𑀅𑀥𑀺𑀝𑁆𑀞𑀸𑀢𑀼𑀫𑁂𑀯 𑀅𑀦𑀼𑀚𑀸𑀦𑀸𑀫𑀺, 𑀦 𑀯𑀺𑀓𑀧𑁆𑀧𑁂𑀢𑀼𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀦 𑀘𑀢𑀼𑀫𑀸𑀲𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀫𑁂𑀯, 𑀦 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺. 𑀏𑀯𑀜𑁆𑀘 𑀧𑀦 𑀲𑀢𑀺 𑀬𑁄 𑀢𑀺𑀘𑀻𑀯𑀭𑁂 𑀏𑀓𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀺, 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀘 𑀅𑀦𑀸𑀧𑀢𑁆𑀢𑀻𑀢𑀺. 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀦𑀸𑀬 𑀅𑀧𑀝𑀺𑀲𑀺𑀤𑁆𑀥𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀮𑀺𑀔𑀺𑀢𑀁.

𑀇𑀫𑀲𑁆𑀲 𑀧𑀦 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀬𑀁 𑀲𑀗𑁆𑀔𑁂𑀧𑀯𑀺𑀦𑀺𑀘𑁆𑀙𑀬𑁄 𑁋 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀳𑁂𑀫𑀦𑁆𑀢𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀲𑀦𑁆𑀥𑀸𑀬 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀳 𑁋 ‘‘𑀭𑀚𑀓𑁂𑀳𑀺 𑀥𑁄𑀯𑀸𑀧𑁂𑀢𑁆𑀯𑀸 𑀲𑁂𑀢𑀓𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀫𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁫) 𑀯𑀘𑀦𑀢𑁄 𑀅𑀭𑀚𑀺𑀢𑁂𑀧𑀺 𑀅𑀥𑀺𑀝𑁆𑀞𑀸𑀦𑀁 𑀭𑀼𑀳𑀢𑀻𑀢𑀺. 𑀢𑁂𑀦 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀦𑀺𑀬𑀫𑁄 𑀓𑀸𑀢𑀩𑁆𑀩𑁄, 𑀦 𑀓𑀸𑀢𑀩𑁆𑀩𑁄𑀢𑀺? 𑀓𑀢𑁆𑀢𑀩𑁆𑀩𑁄𑀯. 𑀧𑀢𑁆𑀢𑁄 𑀯𑀺𑀬 𑀅𑀥𑀺𑀝𑁆𑀞𑀺𑀢𑁄 𑀬𑀣𑀸 𑀧𑀼𑀦 𑀲𑁂𑀢𑀪𑀸𑀯𑀁 𑀯𑀸 𑀢𑀫𑁆𑀩𑀪𑀸𑀯𑀁 𑀯𑀸 𑀧𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺, 𑀦 𑀘 𑀧𑀦 𑀢𑀸𑀤𑀺𑀲𑁄 𑀬𑀁 𑀅𑀥𑀺𑀝𑁆𑀞𑀸𑀦𑀁 𑀉𑀧𑀕𑀘𑁆𑀙𑀢𑀺, 𑀏𑀯𑀫𑁂𑀢𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. ‘‘𑀲𑁆𑀯𑁂 𑀓𑀣𑀺𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀻’’𑀢𑀺 𑀮𑀤𑁆𑀥𑀘𑀻𑀯𑀭𑀁 𑀲𑀘𑁂 𑀅𑀚𑁆𑀚𑁂𑀯 𑀦 𑀅𑀥𑀺𑀝𑁆𑀞𑀸𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑁂 𑀏𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀓𑀲𑁆𑀫𑀸? ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁬𑁨-𑁪𑁬𑁩;) 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀓𑀣𑀺𑀦𑀩𑁆𑀪𑀦𑁆𑀢𑀭𑁂 𑀤𑀲𑀸𑀳𑀢𑁄 𑀉𑀢𑁆𑀢𑀭𑀺𑀧𑀺 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀓𑀣𑀺𑀦𑀢𑁄 𑀧𑀦 𑀧𑀘𑁆𑀙𑀸 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀮𑀪𑀢𑀺. 𑀬𑀣𑀸 𑀓𑀺𑀁 𑁋 𑀬𑀣𑀸 𑀅𑀢𑁆𑀣𑀢𑀓𑀣𑀺𑀦𑁄 𑀲𑀗𑁆𑀖𑁄 𑀢𑀺𑀘𑀻𑀯𑀭𑀁 𑀅𑀢𑁆𑀣𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀩𑁆𑀪𑀸𑀭𑀸 𑀆𑀦𑀺𑀲𑀁𑀲𑀁 𑀮𑀪𑀢𑀺, 𑀦 𑀢𑀢𑁄 𑀧𑀭𑀁, 𑀏𑀯𑀁 𑀅𑀢𑁆𑀣𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀩𑁆𑀪𑀸𑀭𑀸 𑀮𑀪𑀢𑀺, 𑀉𑀤𑁆𑀥𑀢𑁂 𑀧𑀦 𑀓𑀣𑀺𑀦𑁂 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀮𑀪𑀢𑀺. 𑀏𑀢𑁆𑀣𑀸𑀳 𑁋 𑀉𑀩𑁆𑀪𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀤𑀲𑀸𑀳𑀁 𑀮𑀪𑀢𑀻𑀢𑀺? 𑀦, 𑀓𑀲𑁆𑀫𑀸? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀼’’𑀦𑁆𑀢𑀺 𑀯𑀘𑀦𑀢𑁄. 𑀓𑀣𑀺𑀦𑀩𑁆𑀪𑀦𑁆𑀢𑀭𑁂𑀧𑀺 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀆𑀧𑀦𑁆𑀦𑀁. 𑀢𑀁 𑀧𑀦 𑀅𑀢𑀺𑀧𑁆𑀧𑀲𑀗𑁆𑀕𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀦 𑀓𑀣𑀺𑀦𑀤𑀺𑀯𑀲𑀸𑀦𑀺 𑀅𑀤𑀺𑀯𑀲𑀸𑀦𑀻𑀢𑀺 𑀤𑀻𑀧𑀦𑀢𑁆𑀣𑀁. 𑀅𑀬𑀫𑀢𑁆𑀣𑁄 𑀢𑀢𑁆𑀣 𑀢𑀢𑁆𑀣 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀅𑀣 𑀯𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 ‘‘𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸’’𑀢𑀺 𑀯𑀘𑀦𑁂 𑀉𑀧𑁄𑀲𑀣𑀤𑀺𑀯𑀲𑁂 𑀏𑀯 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀳𑁄𑀢𑀺, 𑀢𑀢𑁄 𑀧𑀭𑀁 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑀼𑀤𑁆𑀥𑀭𑀡𑀸𑀪𑀸𑀯𑀸. 𑀏𑀯𑀁 𑀓𑀣𑀺𑀦𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀮𑀺𑀔𑀺𑀢𑀁.

𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀧𑀜𑁆𑀘 𑀫𑀸𑀲𑁂 𑀩𑀤𑁆𑀥𑀲𑀻𑀫𑀸𑀬𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀅𑀩𑀤𑁆𑀥𑀲𑀻𑀫𑀸𑀬𑀧𑀺 𑀯𑀝𑁆𑀝𑀢𑀻’’𑀢𑀺 𑀇𑀤𑀁 𑀅𑀩𑀤𑁆𑀥𑀲𑀻𑀫𑀸𑀬𑀁 𑀓𑀣𑀺𑀦𑀢𑁆𑀣𑀸𑀭𑀜𑁆𑀘 𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑀜𑁆𑀘 𑀲𑀸𑀥𑁂𑀢𑀻𑀢𑀺 𑀮𑀺𑀔𑀺𑀢𑀁. 𑀇𑀤𑀸𑀦𑀺 𑁋

‘‘𑀙𑀺𑀦𑁆𑀦𑀁 𑀥𑀼𑀢𑀗𑁆𑀕𑀁 𑀲𑀸𑀲𑀗𑁆𑀓-𑀲𑀫𑁆𑀫𑀢𑁄 𑀲𑀦𑁆𑀢𑀭𑀼𑀢𑁆𑀢𑀭𑀁;

𑀅𑀘𑀻𑀯𑀭𑀲𑁆𑀲𑀸𑀦𑀸𑀧𑀢𑁆𑀢𑀺, 𑀧𑀘𑁆𑀘𑀼𑀤𑁆𑀥𑀸𑀭𑀸𑀤𑀺𑀲𑀺𑀤𑁆𑀥𑀺𑀢𑁄’’𑀢𑀺. (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁭𑁯) 𑁋

𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀘𑁄𑀤𑀦𑀸𑀧𑀼𑀩𑁆𑀩𑀗𑁆𑀕𑀫𑀯𑀺𑀦𑀺𑀘𑁆𑀙𑀬𑁄 𑁋 𑀓𑁂𑀘𑀺 ‘‘𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀯𑀘𑀦𑀢𑁄 ‘‘𑀏𑀓𑀘𑁆𑀘𑀺𑀓𑀸 𑀲𑀗𑁆𑀖𑀸𑀝𑀺 𑀦𑀸𑀥𑀺𑀝𑁆𑀞𑀸𑀢𑀩𑁆𑀩𑀸. 𑀲𑀘𑁂 𑀅𑀥𑀺𑀝𑁆𑀞𑀸𑀢𑀺, 𑀦 𑀭𑀼𑀳𑀢𑀻’’𑀢𑀺 𑀯𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀦𑀫𑁆𑀧𑀺 𑀤𑀺𑀕𑀼𑀡𑀁𑀬𑁂𑀯 𑀲𑀗𑁆𑀖𑀸𑀝𑀺𑀁 𑀤𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑁂 𑀇𑀫𑀺𑀦𑀸 𑀲𑀼𑀢𑁆𑀢𑀮𑁂𑀲𑁂𑀦 𑀲𑀜𑁆𑀜𑀸𑀧𑁂𑀢𑀩𑁆𑀩𑀸. 𑀪𑀕𑀯𑀢𑀸 𑀳𑀺 ‘‘𑀙𑀺𑀦𑁆𑀦𑀓𑀁 𑀲𑀗𑁆𑀖𑀸𑀝𑀺𑀁, 𑀙𑀺𑀦𑁆𑀦𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀙𑀺𑀦𑁆𑀦𑀓𑀁 𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺 𑀧𑀞𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁄 ‘‘𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂 𑀓𑀭𑀺𑀬𑀫𑀸𑀦𑁂 𑀲𑀩𑁆𑀩𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺, 𑀤𑁆𑀯𑁂 𑀅𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀯𑀸𑀥𑀺𑀓𑀫𑁆𑀧𑀺 𑀆𑀭𑁄𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁬𑁦) 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀏𑀓𑀘𑁆𑀘𑀺𑀓𑀸𑀧𑀺 𑀲𑀗𑁆𑀖𑀸𑀝𑀺 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀬𑀸 𑀙𑀺𑀚𑁆𑀚𑀫𑀸𑀦𑀸𑀧𑀺 𑀦𑀧𑁆𑀧𑀳𑁄𑀢𑀺, 𑀢𑀲𑁆𑀲𑀸 𑀓𑀼𑀢𑁄 𑀤𑀺𑀕𑀼𑀡𑀢𑀸𑀢𑀺? 𑀅𑀝𑁆𑀞𑀓𑀣𑀸𑀬𑀫𑁆𑀧𑀺𑀲𑁆𑀲 𑀯𑀼𑀢𑁆𑀢𑀁 ‘‘𑀅𑀦𑁆𑀯𑀸𑀥𑀺𑀓𑀫𑁆𑀧𑀺 𑀆𑀭𑁄𑀧𑁂𑀢𑀼𑀦𑁆𑀢𑀺 𑀆𑀕𑀦𑁆𑀢𑀼𑀓𑀧𑀢𑁆𑀢𑀫𑁆𑀧𑀺 𑀤𑀸𑀢𑀼𑀁, 𑀇𑀤𑀁 𑀧𑀦 𑀅𑀧𑁆𑀧𑀳𑁄𑀦𑀓𑁂 𑀆𑀭𑁄𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀳𑁄𑀢𑀺, 𑀆𑀕𑀦𑁆𑀢𑀼𑀓𑀧𑀢𑁆𑀢𑀁 𑀦 𑀯𑀝𑁆𑀝𑀢𑀺, 𑀙𑀺𑀦𑁆𑀤𑀺𑀢𑀩𑁆𑀩𑀫𑁂𑀯𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁬𑁦). 𑀓𑀣𑀺𑀦𑀁 𑀧𑀦 𑀙𑀺𑀦𑁆𑀦𑀓𑀫𑁂𑀯 𑀯𑀝𑁆𑀝𑀢𑀺, 𑀆𑀯𑁂𑀡𑀺𑀓𑀮𑀓𑁆𑀔𑀡𑀢𑁆𑀢𑀸, ‘‘𑀙𑀺𑀦𑁆𑀦𑀓𑀁 𑀤𑀺𑀕𑀼𑀡𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀯𑀘𑀦𑀸𑀪𑀸𑀯𑀢𑁄 𑀘𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀥𑀼𑀢𑀗𑁆𑀕𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀢𑁂𑀘𑀻𑀯𑀭𑀺𑀓𑀥𑀼𑀢𑀗𑁆𑀕𑀸𑀪𑀸𑀯𑀢𑁄 𑀢𑀺𑀘𑀻𑀯𑀭𑁂𑀦𑁂𑀯 𑀢𑁂𑀘𑀻𑀯𑀭𑀺𑀓𑁄𑀢𑀺, 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀸𑀪𑀸𑀯𑀢𑁄 ‘‘𑀅𑀥𑀺𑀝𑁆𑀞𑀺𑀢𑁂𑀦𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀽𑀢𑀺 𑀘𑁂? 𑀦, 𑀥𑀼𑀢𑀗𑁆𑀕𑀪𑁂𑀤𑁂𑀦 𑀯𑀺𑀭𑁄𑀥𑀧𑁆𑀧𑀲𑀗𑁆𑀕𑀢𑁄. 𑀘𑀢𑀼𑀢𑁆𑀣𑀘𑀻𑀯𑀭𑀲𑀸𑀤𑀺𑀬𑀦𑁂𑀦 𑀳𑀺 𑀥𑀼𑀢𑀗𑁆𑀕𑀪𑁂𑀤𑁄, 𑀦 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁂𑀦, 𑀦𑀸𑀧𑀺 𑀅𑀢𑀺𑀭𑁂𑀓𑀘𑀻𑀯𑀭𑀲𑀸𑀤𑀺𑀬𑀦𑁂𑀦, 𑀦𑀸𑀧𑀺 𑀅𑀢𑀺𑀭𑁂𑀓𑀘𑀻𑀯𑀭𑀥𑀸𑀭𑀡𑁂𑀦. 𑀬𑀲𑁆𑀫𑀸 𑀧𑀦 𑀪𑀺𑀓𑁆𑀔𑀽𑀦𑀁 𑀏𑀯 𑀪𑀕𑀯𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀯 𑀘𑀻𑀯𑀭𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀚𑀸𑀢𑀺𑀯𑀲𑁂𑀦 𑀘 𑀯𑀼𑀢𑁆𑀢𑀸𑀦𑀺, 𑀦 𑀏𑀯𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁, 𑀢𑀲𑁆𑀫𑀸 𑀦𑁂𑀲𑀁 𑀘𑀻𑀯𑀭𑀦𑀺𑀬𑀫𑀸𑀪𑀸𑀯𑀸 𑀦 𑀢𑀁 𑀥𑀼𑀢𑀗𑁆𑀕𑀁 𑀅𑀦𑀼𑀜𑁆𑀜𑀸𑀢𑀁 𑀕𑀳𑀝𑁆𑀞𑀸𑀦𑀁 𑀯𑀺𑀬. 𑀢𑀲𑁆𑀫𑀸 𑀢𑀲𑁆𑀲 𑀲𑀫𑀸𑀤𑀸𑀦𑀯𑀺𑀥𑀸𑀦𑁂 𑀅𑀯𑀘𑀦𑀢𑁄 𑀘 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀲𑀸𑀲𑀗𑁆𑀓𑀲𑀫𑁆𑀫𑀢𑁄𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑁂 𑀯𑀺𑀲𑀼𑀁 𑀅𑀗𑁆𑀕𑀸𑀦𑀺 𑀦 𑀯𑀼𑀢𑁆𑀢𑀸𑀦𑀺, ‘‘𑀲𑁂𑀲𑀫𑁂𑀢𑁆𑀣 𑀘𑀻𑀯𑀭𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀘 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑁄 𑀘𑀢𑀼𑀢𑁆𑀣𑀫𑀗𑁆𑀕𑀁, 𑀇𑀥 𑀙𑀸𑀭𑀢𑁆𑀢𑀯𑀺𑀧𑁆𑀧𑀯𑀸𑀲𑁄, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄𑀢𑀺. 𑀢𑀲𑁆𑀫𑀸 𑀅𑀗𑁆𑀕𑀲𑀸𑀫𑀜𑁆𑀜𑀢𑁄 𑀘 𑀲𑀫𑁆𑀫𑀼𑀢𑀺𑀲𑀸𑀫𑀜𑁆𑀜𑀢𑁄 𑀘 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀫𑁂𑀯𑀺𑀤𑀦𑁆𑀢𑀺 𑀇𑀤𑀁 𑀦𑀺𑀧𑁆𑀧𑀤𑁂𑀲𑀁, 𑀢𑀁 𑀲𑀧𑁆𑀧𑀤𑁂𑀲𑀁 𑀫𑀸𑀲𑀧𑀭𑀫𑀢𑁆𑀢𑀸. 𑀢𑀢𑁆𑀣 𑀩𑀳𑀺𑀕𑀸𑀫𑁂𑀧𑀺 𑀕𑀸𑀫𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀇𑀥 𑀦 𑀢𑀣𑀸. 𑀇𑀥 𑀅𑀦𑀦𑁆𑀢𑀭𑁂 𑀅𑀦𑀦𑁆𑀢𑀭𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀢𑁆𑀣 𑀲𑀢𑁆𑀢𑀫𑁂𑀢𑀺 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄. 𑀅𑀗𑁆𑀕𑀸𑀦𑀺 𑀧𑀦 𑀘𑀻𑀯𑀭𑀦𑀺𑀓𑁆𑀔𑁂𑀧𑀦𑀗𑁆𑀕𑀲𑀫𑁆𑀧𑀢𑁆𑀢𑀺𑀢𑁄 𑀯𑀺𑀧𑀭𑀺𑀬𑀸𑀬𑁂𑀦, 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀘 𑀲𑀺𑀤𑁆𑀥𑀢𑁆𑀢𑀸 𑀦 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀓𑀸𑀫𑀁 𑀦 𑀯𑀼𑀢𑁆𑀢𑀸𑀦𑀺, 𑀢𑀣𑀸𑀧𑀺 𑀘𑀢𑀼𑀢𑁆𑀣𑀫𑀗𑁆𑀕𑀁 𑀯𑀺𑀲𑁂𑀲𑀺𑀢𑀩𑁆𑀩𑀁, 𑀦 𑀧𑀦 𑀯𑀺𑀲𑁂𑀲𑀺𑀢𑀁. 𑀓𑀺𑀁 𑀓𑀸𑀭𑀡𑀁? 𑀇𑀥 𑀯𑀼𑀢𑁆𑀢𑀦𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑁂𑀦 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺𑀤𑁂𑀲𑀦𑀢𑁄, 𑀢𑀢𑁆𑀣𑀸𑀧𑀦𑁆𑀦𑀸𑀧𑀢𑁆𑀢𑀺𑀯𑀺𑀫𑁄𑀓𑁆𑀔𑀤𑀻𑀧𑀦𑀢𑁆𑀣𑀁. 𑀲𑀁𑀯𑀘𑁆𑀙𑀭𑀯𑀺𑀧𑁆𑀧𑀯𑀼𑀢𑁆𑀣𑀫𑁆𑀧𑀺 𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣𑀫𑁂𑀯, 𑀧𑀕𑁂𑀯 𑀙𑀸𑀭𑀢𑁆𑀢𑀯𑀺𑀧𑁆𑀧𑀯𑀼𑀢𑁆𑀣𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀳𑁂𑀫𑀦𑁆𑀢𑁂, 𑀕𑀺𑀫𑁆𑀳𑁂 𑀯𑀸 𑀦𑀺𑀲𑁆𑀲𑀚𑁆𑀚𑀢𑀺 𑀘𑁂? 𑀇𑀥 𑀯𑀼𑀢𑁆𑀢𑀦𑀬𑁂𑀦𑀸𑀧𑀺 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀘𑀢𑀼𑀢𑁆𑀣𑀫𑀗𑁆𑀕𑀁 𑀦 𑀯𑀺𑀲𑁂𑀲𑀺𑀢𑀦𑁆𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀁, 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀘𑀻𑀯𑀭𑀁 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀦𑀺𑀲𑁆𑀲𑀝𑁆𑀞𑀫𑁂𑀯, 𑀦 𑀊𑀦𑀫𑀸𑀲𑀁 𑀳𑀼𑀢𑁆𑀯𑀸 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸, 𑀫𑀸𑀲𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸𑀢𑀺 𑀏𑀓𑁂. 𑀢𑀣𑀸𑀧𑀺 𑀲𑀘𑁂 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀳𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁. ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀫𑀽𑀮𑀘𑀻𑀯𑀭𑀁 𑀧𑀦 ‘‘𑀫𑀸𑀲𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁.

‘‘𑀲𑀦𑁆𑀢𑀭𑀼𑀢𑁆𑀢𑀭’’𑀦𑁆𑀢𑀺 𑀯𑀸 ‘‘𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀯𑀸 ‘‘𑀘𑀻𑀯𑀭’’𑀦𑁆𑀢𑀺 𑀯𑀸 𑀓𑀺𑀁 𑀢𑀺𑀘𑀻𑀯𑀭𑀁, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀻𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀺𑀘𑀻𑀯𑀭𑀫𑁂𑀯 𑀧𑀝𑀺𑀲𑀺𑀤𑁆𑀥𑀁, 𑀧𑀭𑀺𑀬𑀸𑀧𑀦𑁆𑀦𑀯𑀲𑁂𑀦 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀅𑀅𑀙𑀦𑁆𑀤𑀦𑀥𑁄𑀯𑀸𑀧𑀦𑀯𑀺𑀜𑁆𑀜𑀢𑁆𑀢𑀺𑀆𑀤𑀺𑀯𑀺𑀭𑁄𑀥𑁄. 𑀅𑀣 𑀅𑀜𑁆𑀜𑀫𑁆𑀧𑀺 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀯𑀺𑀭𑁄𑀥𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀦𑀺𑀬𑀫𑀢𑁄 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸𑀲𑀫𑁆𑀪𑀯𑀁 𑀕𑀳𑁂𑀢𑀩𑁆𑀩𑀢𑁄. 𑀢𑀣𑀸 𑀳𑀺 ‘‘𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀻’’𑀢𑀺 (𑀧𑀸𑀭𑀸. 𑁪𑁭𑁧) 𑀏𑀯𑀫𑀸𑀤𑀻𑀲𑀼 𑀢𑀺𑀘𑀻𑀯𑀭𑀫𑁂𑀯, ‘‘𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄 (𑀫𑀳𑀸𑀯. 𑁩𑁬𑁨), 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀧𑀸𑀭𑀸. 𑁫𑁨𑁩-𑁫𑁨𑁪) 𑀏𑀯𑀫𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺, 𑀢𑀣𑀸 ‘‘𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀳𑀦𑁆𑀤 𑀢𑁂, 𑀆𑀯𑀼𑀲𑁄, 𑀲𑀗𑁆𑀖𑀸𑀝𑀺, 𑀤𑁂𑀳𑀺 𑀫𑁂 𑀧𑀝’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀩𑁆𑀩𑀜𑁆𑀳𑀺 𑀘𑀻𑀯𑀭𑀁 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 ‘𑀲𑀗𑁆𑀖𑀸𑀝𑀻’𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁯𑁮). 𑀢𑀣𑀸 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀏𑀢𑁆𑀣𑀸𑀧𑀻𑀢𑀺 𑀏𑀓𑁂. 𑀅𑀦𑁆𑀢𑁄𑀲𑀫𑀬𑁂 𑀬𑀸𑀯𑀤𑀢𑁆𑀣𑀁 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀲𑀩𑁆𑀩𑀁 𑀓𑀭𑀺𑀬𑀫𑀸𑀦𑀁 𑀓𑀤𑀸 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀺𑀘𑀻𑀯𑀭𑀫𑁂𑀯𑀸𑀢𑀺 𑀏𑀓𑁂.

𑀅𑀘𑀻𑀯𑀭𑀲𑁆𑀲𑀸𑀦𑀸𑀧𑀢𑁆𑀢𑀺 𑀧𑀘𑁆𑀘𑀼𑀤𑁆𑀥𑀸𑀭𑀸𑀤𑀺𑀲𑀺𑀤𑁆𑀥𑀺𑀢𑁄𑀢𑀺 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀦𑀺𑀧𑁆𑀧𑀬𑁄𑀚𑀦𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁂 𑀢𑁂𑀘𑀻𑀯𑀭𑀲𑁆𑀲 𑀆𑀧𑀢𑁆𑀢𑀻𑀢𑀺 𑀏𑀓𑁂. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀘𑁆𑀘𑀼𑀤𑁆𑀥𑀸𑀭𑀸𑀤𑀺𑀲𑀺𑀤𑁆𑀥𑀺𑀢𑁄. ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀅𑀭𑀼𑀡𑁂 𑀧𑀘𑁆𑀘𑀼𑀤𑁆𑀥𑀭𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺 (𑀧𑀸𑀭𑀸. 𑁪𑁯𑁬) 𑀳𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀧𑀘𑁆𑀘𑀼𑀤𑁆𑀥𑀭𑀦𑁆𑀢𑀲𑁆𑀲, 𑀅𑀦𑁆𑀢𑁄𑀅𑀭𑀼𑀡𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀘 𑀬𑀸𑀯 𑀅𑀜𑁆𑀜𑁄 𑀦𑀸𑀥𑀺𑀝𑁆𑀞𑀸𑀢𑀺, 𑀢𑀸𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯. 𑀅𑀜𑁆𑀜𑀣𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑁂𑀦 𑀯𑀺𑀧𑁆𑀧𑀯𑀸𑀲𑀲𑁆𑀲𑀸𑀢𑀺 𑀯𑀺𑀧𑁆𑀧𑀯𑀸𑀲𑀢𑁄 𑀬𑀣𑀸𑀭𑀼𑀢𑀁𑀬𑁂𑀯 𑀲𑀢𑀺 𑀯𑀺𑀧𑁆𑀧𑀯𑀸𑀲𑁂 𑀯𑀺𑀧𑁆𑀧𑀯𑀸𑀲𑀢𑁄, 𑀅𑀯𑀺𑀧𑁆𑀧𑀯𑀸𑀲𑁂 𑀲𑀢𑀺 𑀅𑀯𑀺𑀧𑁆𑀧𑀯𑀸𑀲𑀢𑁄𑀢𑀺.

𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀢𑁆𑀢𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘 𑀪𑀺𑀓𑁆𑀔𑀽𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁂 𑀦𑀺𑀯𑀺𑀝𑁆𑀞𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄 𑀯𑀸 𑀧𑀭𑀺𑀬𑀦𑁆𑀢𑁂 𑀞𑀺𑀢𑀪𑁄𑀚𑀦𑀲𑀸𑀮𑀢𑁄 𑀯𑀸 𑀦𑀺𑀩𑀤𑁆𑀥𑀯𑀲𑀦𑀓𑀆𑀯𑀸𑀲𑀢𑁄 𑀯𑀸𑀢𑀺 𑀏𑀯𑀁 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀬𑁄𑀚𑀦𑀲𑀢𑀫𑁆𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀬𑁄𑀚𑀦𑀲𑀢𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀔𑀡𑁆𑀟𑀲𑀻𑀫𑀸𑀤𑀻𑀲𑀼 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀲𑀁 𑀯𑀺𑀲𑀼𑀁 𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀢𑁆𑀢𑀸𑀢𑀺 𑀘 𑀲𑀫𑀸𑀦𑀲𑀁𑀯𑀸𑀲𑀓𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀦𑀁 𑀇𑀤𑀁 𑀦𑀸𑀦𑀢𑁆𑀢𑀁. ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀕𑀸𑀫𑁂 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’’𑀢𑀺 (𑀫𑀳𑀸𑀯. 𑁧𑁪𑁪) 𑀯𑀘𑀦𑀢𑁄. ‘‘𑀲𑀫𑀸𑀦𑀲𑀁𑀯𑀸𑀲𑀓𑀲𑀻𑀫𑀸𑀬𑀸’’𑀢𑀺 𑀤𑀺𑀦𑁆𑀦𑀁 𑀧𑀦 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀅𑀢𑁆𑀣𑀺, 𑀢𑀢𑁆𑀣 𑀞𑀺𑀢𑀸𑀦𑀫𑁆𑀧𑀺. ‘‘𑀢𑀢𑁆𑀭 𑀞𑀺𑀢𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀻’’𑀢𑀺 𑀘, ‘‘𑀔𑀡𑁆𑀟𑀲𑀻𑀫𑀸𑀬𑀁 𑀞𑀢𑁆𑀯𑀸 ‘𑀲𑀻𑀫𑀝𑁆𑀞𑀓𑀲𑀗𑁆𑀖𑁄 𑀕𑀡𑁆𑀳𑀸𑀢𑀽’𑀢𑀺 𑀯𑀼𑀢𑁆𑀢𑁂 𑀉𑀧𑀘𑀸𑀭𑀲𑀻𑀫𑀸𑀬 𑀏𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀘, ‘‘𑀢𑁂𑀲𑀁 𑀩𑀳𑀺𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸𑀢𑀺 𑀅𑀢𑁆𑀣𑁄’’𑀢𑀺 𑀘, ‘‘𑀅𑀦𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀅𑀦𑁆𑀢𑁄𑀳𑁂𑀫𑀦𑁆𑀢𑁂 𑀲𑀘𑁂 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀤𑀢𑀺, 𑀬𑁂 𑀢𑀢𑁆𑀣 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀲𑀁 𑀩𑀳𑀺𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀺𑀦𑀬𑀥𑀭𑀸 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀦𑀸𑀕𑀢𑀁. 𑀢𑀲𑁆𑀫𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀮𑀓𑁆𑀔𑀡𑀜𑁆𑀜𑀽 𑀯𑀤𑀦𑁆𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯) 𑀯𑀼𑀢𑁆𑀢𑀦𑁆𑀢𑀺 𑀘, ‘‘‘𑀘𑀻𑀯𑀭𑀫𑀸𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁄 𑀤𑀺𑀯𑀲𑁄, 𑀢𑀸𑀯 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’𑀢𑀺 𑀯𑀼𑀢𑁆𑀢𑁂 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀯𑀸 𑀳𑁄𑀢𑀼, 𑀅𑀦𑀢𑁆𑀣𑀢𑀁 𑀯𑀸𑀢𑀺 𑀬𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀯𑀘𑀦𑀁 (𑀫𑀳𑀸𑀯. 𑀅𑀝𑁆𑀞. 𑁩𑁭𑁯), 𑀏𑀢𑁆𑀣𑀸𑀧𑀺 𑀬𑀤𑀺 𑀅𑀢𑁆𑀣𑀢𑀁, 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸 𑀧𑀜𑁆𑀘 𑀫𑀸𑀲𑁂. 𑀬𑀤𑀺 𑀅𑀦𑀢𑁆𑀣𑀢𑀁, 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀮𑀪𑀦𑁆𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀘 𑀮𑀺𑀔𑀺𑀢𑀁.

‘‘𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸𑀢𑀺 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑁂𑀳𑀺 𑀬𑀸𑀕𑀼 𑀧𑀻𑀢𑀸, 𑀢𑁂𑀲𑀁𑀬𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 ‘𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸’𑀢𑀺 𑀯𑀼𑀢𑁆𑀢𑁂 𑀦𑀺𑀫𑀦𑁆𑀢𑀺𑀢𑀸 𑀯𑀸 𑀳𑁄𑀦𑁆𑀢𑀼, 𑀅𑀦𑀺𑀫𑀦𑁆𑀢𑀺𑀢𑀸 𑀯𑀸, 𑀬𑁂𑀳𑀺 𑀧𑀻𑀢𑀸, 𑀢𑁂𑀲𑀁 𑀧𑀸𑀧𑀼𑀡𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀤𑀦𑁆𑀢𑁄 𑀜𑀸𑀧𑁂𑀢𑀺 𑀏𑀢𑁆𑀣𑀦𑁆𑀢𑀭𑁂 𑀢𑀺𑀡𑁆𑀡𑀫𑁆𑀧𑀺 𑀅𑀓𑀸𑀮𑀘𑀻𑀯𑀭𑀸𑀦𑀁 𑀉𑀧𑁆𑀧𑀢𑁆𑀢𑀺𑀅𑀪𑀸𑀯𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀧𑀤𑀪𑀸𑀚𑀦𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀇𑀤𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀅𑀥𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀦 𑀯𑀼𑀢𑁆𑀢𑀁 𑀓𑀺𑀦𑁆𑀢𑀼 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀤𑀲𑀸𑀳𑀧𑀭𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀧𑁆𑀧𑀳𑁄𑀦𑁆𑀢𑁂 𑀲𑀘𑁂 𑀧𑀘𑁆𑀘𑀸𑀲𑀸 𑀅𑀢𑁆𑀣𑀺, 𑀢𑀫𑁂𑀯 𑀯𑀟𑁆𑀠𑁂𑀢𑁆𑀯𑀸 𑀫𑀸𑀲𑀫𑀦𑀼𑀚𑀸𑀦𑀦𑁆𑀢𑁄 𑀇𑀫𑀫𑁆𑀧𑀺 𑀅𑀢𑁆𑀣𑀯𑀺𑀲𑁂𑀲𑀁 𑀤𑀻𑀧𑁂𑀢𑀺. 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀢𑀁 𑀧𑀦 ‘‘𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑀻𑀡𑀺𑀧𑀺 𑀧𑀤𑀪𑀸𑀚𑀦𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺.

‘‘𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀲𑀻𑀖𑀁 𑀅𑀦𑁆𑀢𑁄𑀤𑀲𑀸𑀳𑁂𑀬𑁂𑀯 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀧𑀳𑁄𑀦𑀓𑀪𑀸𑀯𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑀮𑀓𑁆𑀔𑀡𑁂𑀦𑀸𑀢𑀺 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀯𑀁 ‘‘𑀲𑀻𑀖’’𑀦𑁆𑀢𑀺 𑀯𑀸 ‘‘𑀮𑀳𑀼’’𑀦𑁆𑀢𑀺 𑀯𑀸 𑀆𑀤𑀺𑀦𑀸 𑀅𑀯𑀢𑁆𑀯𑀸𑀧𑀺 ‘‘𑀤𑀲𑀸𑀳𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀏𑀯𑀁 𑀳𑁄𑀢𑀼, 𑀅𑀦𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀓𑀣𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑀢𑁆𑀣𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑁄 𑀅𑀧𑀲𑁆𑀲𑀦𑁆𑀢𑁄 𑀯𑀺𑀖𑀸𑀢𑀁 𑀆𑀧𑀚𑁆𑀚𑀢𑀻𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁪𑁯𑁯-𑁫𑁦𑁦) 𑀮𑀺𑀔𑀺𑀢𑀁.

𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀲𑀸𑀓𑀺𑀬𑀸𑀦𑀺𑀬𑁄 𑀯𑀺𑀬 𑀲𑀼𑀤𑁆𑀥𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀸’’𑀢𑀺 𑀇𑀤𑀁 ‘‘𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸’’𑀢𑀺 (𑀧𑀸𑀭𑀸. 𑁫𑁦𑁫) 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦, 𑀅𑀥𑀺𑀧𑁆𑀧𑀸𑀬𑀸𑀚𑀸𑀦𑀦𑀢𑁄. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀤𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀢𑀤𑀦𑀼𑀧𑁆𑀧𑀲𑀗𑁆𑀕𑀪𑀬𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀓𑁂𑀦 𑀯𑀢𑁆𑀣𑀼𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀞𑀫𑁂𑀦. 𑀅𑀯𑀼𑀢𑁆𑀢𑀸 𑀯𑀸 𑀥𑁄𑀯𑀢𑀻𑀢𑀺 𑀅𑀯𑀼𑀢𑁆𑀢𑀸 𑀥𑁄𑀯𑀢𑀺, 𑀭𑀚𑀢𑀺 𑀆𑀓𑁄𑀝𑁂𑀢𑀻𑀢𑀺 𑀅𑀢𑁆𑀣𑁄. ‘‘‘𑀅𑀯𑀼𑀢𑁆𑀢𑀸’𑀢𑀺 𑀯𑀘𑀦𑀢𑁄 𑀅𑀯𑀸𑀤𑀸𑀧𑁂𑀢𑁆𑀯𑀸 𑀥𑁄𑀯𑀦𑀸𑀤𑀻𑀲𑀼 𑀅𑀦𑀸𑀧𑀢𑁆𑀢𑀻’’𑀢𑀺 𑀮𑀺𑀔𑀺𑀢𑀁. 𑀇𑀥 𑀘𑀻𑀯𑀭𑀁 𑀦𑀸𑀫 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀽𑀧𑀕𑀫𑁂𑀯. 𑀬𑀤𑀺 𑀏𑀯𑀁 ‘‘𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀽𑀧𑀕𑀫𑁂𑀯 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀘𑁂? 𑀢𑀁 𑀦 𑀯𑀢𑁆𑀢𑀩𑁆𑀩𑀁 ‘‘𑀧𑀼𑀭𑀸𑀡𑀘𑀻𑀯𑀭’’𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀼𑀭𑀸𑀡𑀘𑀻𑀯𑀭𑀁 𑀦𑀸𑀫 𑀲𑀓𑀺𑀁 𑀦𑀺𑀯𑀢𑁆𑀣𑀫𑁆𑀧𑀺 𑀲𑀓𑀺𑀁 𑀧𑀸𑀭𑀼𑀢𑀫𑁆𑀧𑀻’’𑀢𑀺 (𑀧𑀸𑀭𑀸. 𑁫𑁦𑁫).

𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀉𑀧𑀘𑀸𑀭𑁄 𑀤𑁆𑀯𑀸𑀤𑀲𑀳𑀢𑁆𑀣𑁄. 𑀅𑀘𑀺𑀢𑁆𑀢𑀓𑀢𑁆𑀢𑀸 𑀓𑀣𑀁 𑀧𑀁𑀲𑀼𑀓𑀽𑀮𑀁 𑀯𑀝𑁆𑀝𑀢𑀻𑀢𑀺 𑀘𑁂? 𑀢𑀸𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀤𑀺𑀦𑁆𑀦𑀢𑁆𑀢𑀸, 𑀪𑀺𑀓𑁆𑀔𑀼𑀦𑀸 𑀘 𑀢𑀢𑁄 𑀪𑀺𑀓𑁆𑀔𑀼𑀦𑀺𑀢𑁄 𑀅𑀕𑁆𑀕𑀳𑀺𑀢𑀢𑁆𑀢𑀸 𑀘.

𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀘 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑁂𑀲𑀼 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀺. 𑀧𑀼𑀕𑁆𑀕𑀮𑀺𑀓𑀧𑁆𑀧𑀯𑀸𑀭𑀡𑀸𑀬 𑀬𑀁 𑀬𑀁 𑀧𑀯𑀸𑀭𑁂𑀢𑀺, 𑀢𑀁 𑀢𑀁𑀬𑁂𑀯 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀦𑁆𑀢𑀺 𑀮𑀺𑀔𑀺𑀢𑀁.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀓𑀢𑀺𑀬𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀢𑀺 𑀓𑀣𑀺𑀦𑀧𑀮𑀺𑀩𑁄𑀥𑀯𑀲𑁂𑀦 𑀯𑀸 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑀸. 𑀏𑀢𑁆𑀣 𑀲𑀺𑀬𑀸 𑁋 ‘‘𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀺, 𑀤𑀼𑀲𑁆𑀲𑀯𑀸𑀡𑀺𑀚𑁆𑀚𑀁 𑀯𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁨𑁨) 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀲𑀼𑀢𑁆𑀯𑀸 𑀪𑀕𑀯𑀸𑀧𑀺 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 ‘‘𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂 𑀫𑁄𑀖𑀧𑀼𑀭𑀺𑀲𑀸 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀲𑁆𑀲𑀣𑀸’’𑀢𑀺 (𑀧𑀸𑀭𑀸. 𑁫𑁨𑁨) 𑀯𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀇𑀫𑀺𑀲𑁆𑀲𑀁 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 ‘‘𑀩𑀳𑀼𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 ‘‘𑀦 𑀳𑀺 𑀅𑀦𑀘𑁆𑀙𑀺𑀦𑁆𑀦𑀘𑀻𑀯𑀭𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑀼𑀁 𑀮𑀪𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀦𑀁 𑀧𑀦 𑀅𑀢𑁆𑀣𑀸𑀬 𑀮𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀧𑀫𑀸𑀡𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘𑁂? 𑀦, 𑀓𑀲𑁆𑀫𑀸? 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀏𑀯 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺 𑀯𑀸𑀭𑀺𑀢𑀸. 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀧𑀸𑀴𑀺𑀬𑀁 (𑀧𑀸𑀭𑀸. 𑁫𑁨𑁧) ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀲𑁆𑀲𑀸 𑀅𑀦𑀸𑀧𑀢𑁆𑀢𑀺𑀧𑀸𑀴𑀺𑀬𑀸 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀢𑀲𑁆𑀲 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀏𑀯 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀅𑀜𑁆𑀜𑁂𑀢𑀺 𑀯𑀘𑀦𑀢𑁄 𑀘 𑀯𑀸𑀭𑀺𑀢𑀸. 𑀢𑀲𑁆𑀫𑀸 𑀪𑀕𑀯𑀸𑀧𑀺 ‘‘𑀩𑀳𑀼𑀁 𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀲𑁆𑀲𑀣𑀸’’𑀢𑀺 (𑀧𑀸𑀭𑀸. 𑁫𑁨𑁨) 𑀯𑀺𑀕𑀭𑀳𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀦𑁆𑀢𑁄 ‘‘𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀫𑀸𑀡𑀢𑁄 𑀕𑀳𑀡𑀁 𑀅𑀦𑀼𑀚𑀸𑀦𑀺, 𑀦 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀧𑀫𑀸𑀡𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀬𑀲𑁆𑀫𑀸 𑀧𑀦𑀺𑀫𑀁 𑀲𑀺𑀓𑁆𑀔𑀸𑀧𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀇𑀥 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦 𑀯𑀼𑀢𑁆𑀢𑀁, 𑀦 𑀦 𑀮𑀩𑁆𑀪𑀢𑀻𑀢𑀺 𑀓𑀢𑁆𑀯𑀸.

𑀅𑀝𑁆𑀞𑀓𑀣𑀸𑀲𑀼 ‘‘𑀅𑀜𑁆𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀓𑀢𑀺𑀬𑀸 𑀩𑀳𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 ‘‘𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 (𑀧𑀸𑀭𑀸. 𑁫𑁨𑁬) 𑀯𑀼𑀢𑁆𑀢𑀅𑀦𑀸𑀧𑀢𑁆𑀢𑀺𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁬) 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀥𑀦𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀮𑀺𑀔𑀺𑀢𑀁. ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦𑀺𑀤𑀸𑀦𑀯𑀺𑀭𑁄𑀥𑀢𑁄 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀮𑀩𑁆𑀪𑀢𑀺 𑀏𑀯𑀸𑀢𑀺 𑀯𑀤𑀦𑁆𑀢𑀺.

𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀞𑀫𑀉𑀧𑀓𑁆𑀔𑀝𑁂 ‘‘𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄’’𑀢𑀺 (𑀧𑀸𑀭𑀸. 𑁫𑁨𑁮) 𑀯𑀘𑀦𑀢𑁄 𑀢𑀲𑁆𑀫𑀺𑀁 𑀔𑀡𑁂 𑀧𑀯𑀸𑀭𑀺𑀢𑁄𑀧𑀺 𑀅𑀧𑁆𑀧𑀯𑀸𑀭𑀺𑀢𑁄𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑀉𑀧𑀓𑁆𑀔𑀝𑁂𑀦 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀘𑁂? 𑀦𑀢𑁆𑀣𑀺 𑀧𑀬𑁄𑀚𑀦𑀁, 𑀓𑁂𑀯𑀮𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀧𑀜𑁆𑀜𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀬𑀸 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀯𑀺𑀬. 𑀏𑀯𑀁 𑀲𑀦𑁆𑀢𑁂 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀲𑀗𑁆𑀕𑀻𑀢𑀺𑀁 𑀅𑀦𑀸𑀭𑁄𑀧𑁂𑀢𑀩𑁆𑀩𑀁 𑀪𑀯𑁂𑀬𑁆𑀬 𑀯𑀺𑀦𑀸𑀧𑀺 𑀢𑁂𑀦 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄, 𑀅𑀦𑀺𑀲𑁆𑀲𑀭𑀢𑁆𑀢𑀸, 𑀅𑀦𑀸𑀭𑁄𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄…𑀧𑁂… 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬; 𑀘𑀽𑀴𑀯. 𑁪𑁪𑁧). 𑀇𑀤𑀁 𑀲𑀩𑁆𑀩𑀫𑀓𑀸𑀭𑀡𑀁. 𑀦 𑀳𑀺 𑀩𑀼𑀤𑁆𑀥𑀸 𑀅𑀧𑁆𑀧𑀬𑁄𑀚𑀦𑀁 𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀺, 𑀧𑀕𑁂𑀯 𑀲𑀺𑀓𑁆𑀔𑀸𑀧𑀤𑀁. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀧𑀼𑀭𑀺𑀫𑀲𑁆𑀲 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀤𑀺𑀲’’𑀦𑁆𑀢𑀺𑀆𑀤𑀺. 𑀅𑀦𑀼𑀧𑀜𑁆𑀜𑀢𑁆𑀢𑀺 𑀘 𑀦𑀺𑀧𑁆𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀢𑀁𑀲𑀤𑀺𑀲𑀜𑁆𑀘𑁂𑀢𑀁, 𑀦 𑀦𑀺𑀧𑁆𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑁄 𑀧𑀦𑁂𑀢𑁆𑀣 𑀅𑀢𑁆𑀣𑀯𑀺𑀲𑁂𑀲𑁄𑀢𑀺? 𑀢𑀢𑁄 𑀆𑀳 ‘‘𑀓𑁂𑀯𑀮𑀁 𑀢𑀢𑁆𑀣 𑀏𑀓𑀲𑁆𑀲 𑀧𑀻𑀴𑀸 𑀓𑀢𑀸, 𑀇𑀥 𑀤𑁆𑀯𑀺𑀦𑁆𑀦𑀁, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄’’𑀢𑀺. 𑀇𑀫𑀺𑀦𑀸 𑀅𑀢𑁆𑀣𑀯𑀺𑀲𑁂𑀲𑁂𑀦 𑀓𑁄 𑀧𑀦𑀜𑁆𑀜𑁄 𑀅𑀢𑀺𑀭𑁂𑀓𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺? 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀢𑀸𑀯 𑀯𑀼𑀢𑁆𑀢𑀁 ‘‘𑀏𑀓𑀲𑁆𑀫𑀺𑀫𑁆𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀉𑀪𑀺𑀦𑁆𑀦𑀫𑁆𑀧𑀺 𑀧𑀻𑀴𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀬𑀫𑀢𑀺𑀭𑁂𑀓𑀢𑁆𑀣𑁄 𑀤𑀲𑁆𑀲𑀺𑀢𑁄’’𑀢𑀺. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀦 𑀓𑁂𑀯𑀮𑀁 𑀧𑀝𑀺𑀮𑀤𑁆𑀥𑀘𑀻𑀯𑀭𑀕𑀡𑀦𑀸𑀬 𑀏𑀯 𑀆𑀧𑀢𑁆𑀢𑀺𑀕𑀡𑀦𑀸, 𑀧𑀻𑀴𑀺𑀢𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑀯𑀢𑁆𑀣𑀼𑀕𑀡𑀦𑀸𑀬𑀧𑀻’’𑀢𑀺.

𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀯𑀢𑁆𑀣𑀼𑀢𑁄 𑀕𑀡𑀦𑀸𑀬𑀧𑀺, 𑀲𑀺𑀬𑀸 𑀆𑀧𑀢𑁆𑀢𑀺 𑀦𑁂𑀓𑀢𑀸;

𑀇𑀢𑀺 𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘, 𑀤𑀼𑀢𑀺𑀬𑀽𑀧𑀓𑁆𑀔𑀝𑀁 𑀇𑀥.

‘‘𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀬, 𑀯𑀺𑀪𑀗𑁆𑀕𑁂 𑀯𑀺𑀬 𑀓𑀺𑀦𑁆𑀢𑁂𑀢𑀁;

𑀏𑀓𑀺𑀢𑁆𑀣𑀺𑀬𑀸𑀧𑀺 𑀦𑁂𑀓𑀢𑀸, 𑀆𑀧𑀢𑁆𑀢𑀻𑀦𑀁 𑀧𑀬𑁄𑀕𑀢𑁄’’𑀢𑀺. (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁫𑁩𑁨);

𑀅𑀧𑀺𑀘𑁂𑀢𑀁 𑀲𑀺𑀓𑁆𑀔𑀸𑀧𑀤𑀁 𑀢𑀁𑀚𑀸𑀢𑀺𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀕𑀳𑁂𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀲𑁆𑀲 𑀤𑀲𑁆𑀲𑀦𑀧𑁆𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀳 𑀘 𑁋

‘‘𑀅𑀜𑁆𑀜𑀸𑀢𑀺𑀓𑀸𑀬 𑀩𑀳𑀼𑀢𑀸𑀬 𑀯𑀺𑀫𑀺𑀲𑁆𑀲𑀢𑀸𑀬;

𑀆𑀧𑀢𑁆𑀢𑀺𑀬𑀸𑀧𑀺 𑀩𑀳𑀼𑀢𑀸 𑀘 𑀯𑀺𑀫𑀺𑀲𑁆𑀲𑀢𑀸 𑀘;

𑀇𑀘𑁆𑀘𑁂𑀯𑀫𑀸𑀤𑀺𑀯𑀺𑀥𑀺𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁;

𑀲𑀢𑁆𑀣𑀸 𑀉𑀧𑀓𑁆𑀔𑀝𑀫𑀺𑀤𑀁 𑀤𑀼𑀢𑀺𑀬𑀁 𑀅𑀯𑁄𑀘𑀸’’𑀢𑀺. (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁫𑁩𑁨);

𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀥𑀺𑀧𑁆𑀧𑀸𑀬𑀧𑀼𑀩𑁆𑀩𑀗𑁆𑀕𑀫𑀸 𑀯𑀺𑀘𑀸𑀭𑀡𑀸 𑁋 𑀧𑀼𑀭𑀸𑀡𑀘𑀻𑀯𑀭𑀁 𑀏𑀓𑀫𑁂𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀳𑀺 𑀤𑁆𑀯𑀻𑀳𑀺, 𑀩𑀳𑀽𑀳𑀺 𑀯𑀸 𑀥𑁄𑀯𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑀺𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀕𑀡𑀦𑀸. 𑀢𑀣𑀸 𑀤𑁆𑀯𑀺𑀦𑁆𑀦𑀁, 𑀩𑀳𑀽𑀦𑀁 𑀯𑀸 𑀲𑀸𑀥𑀸𑀭𑀡𑀁 𑀏𑀓𑀫𑁂𑀯 𑀘𑀻𑀯𑀭𑀁 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀇𑀥𑀸𑀧𑀺 𑀢𑀣𑀸 𑀤𑁆𑀯𑀺𑀦𑁆𑀦𑀁, 𑀩𑀳𑀽𑀦𑀁 𑀯𑀸 𑀲𑀸𑀥𑀸𑀭𑀡𑀫𑁂𑀓𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀺𑀜𑁆𑀜𑀢𑁆𑀢𑀧𑀼𑀕𑁆𑀕𑀮𑀕𑀡𑀦𑀸𑀬 𑀆𑀧𑀢𑁆𑀢𑀺𑀕𑀡𑀦𑀸. 𑀢𑀣𑀸 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄. 𑀅𑀬𑀁 𑀢𑀸𑀯 𑀩𑀳𑀼𑀢𑀸𑀬 𑀦𑀬𑁄.

𑀯𑀺𑀫𑀺𑀲𑁆𑀲𑀢𑀸𑀬 𑀧𑀦 𑀜𑀸𑀢𑀺𑀓𑀸𑀬, 𑀅𑀜𑁆𑀜𑀸𑀢𑀺𑀓𑀸𑀬 𑀘 𑀏𑀓𑀁 𑀥𑁄𑀯𑀸𑀧𑁂𑀢𑀺, 𑀏𑀓𑀢𑁄 𑀦𑀺𑀝𑁆𑀞𑀸𑀧𑀦𑁂 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀣 𑀜𑀸𑀢𑀺𑀓𑀸 𑀧𑀞𑀫𑀁 𑀣𑁄𑀓𑀁 𑀥𑁄𑀯𑀺𑀢𑁆𑀯𑀸 𑀞𑀺𑀢𑀸, 𑀧𑀼𑀦 𑀅𑀜𑁆𑀜𑀸𑀢𑀺𑀓𑀸 𑀲𑀼𑀥𑁄𑀢𑀁 𑀓𑀭𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀣 𑀅𑀜𑁆𑀜𑀸𑀢𑀺𑀓𑀸 𑀧𑀞𑀫𑀁 𑀥𑁄𑀯𑀢𑀺, 𑀧𑀘𑁆𑀙𑀸 𑀜𑀸𑀢𑀺𑀓𑀸 𑀲𑀼𑀥𑁄𑀢𑀁 𑀓𑀭𑁄𑀢𑀺, 𑀅𑀜𑁆𑀜𑀸𑀢𑀺𑀓𑀸𑀬 𑀧𑀬𑁄𑀕𑀯𑀲𑁂𑀦 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀫𑁂𑀯. 𑀅𑀜𑁆𑀜𑀸𑀢𑀺𑀓𑀸𑀬, 𑀜𑀸𑀢𑀺𑀓𑀸𑀬 𑀘 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄, 𑀜𑀸𑀢𑀺𑀓𑀲𑀜𑁆𑀜𑀻 𑀯𑀸 𑀥𑁄𑀯𑀸𑀧𑁂𑀢𑀺, 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀤𑀼𑀓𑁆𑀓𑀝𑀸𑀤𑀺𑀆𑀧𑀢𑁆𑀢𑀺𑀪𑁂𑀤𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀜𑁆𑀜𑀸𑀢𑀺𑀓𑀸𑀬, 𑀜𑀸𑀢𑀺𑀓𑀸𑀬 𑀘 𑀲𑀦𑁆𑀢𑀓𑀁 𑀘𑀻𑀯𑀭𑀁 𑀉𑀪𑁄𑀳𑀺 𑀏𑀓𑀢𑁄 𑀤𑀺𑀬𑁆𑀬𑀫𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯. 𑀅𑀣 𑀅𑀜𑁆𑀜𑀸𑀢𑀺𑀓𑀸𑀬 𑀏𑀯 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯. 𑀅𑀣 𑀜𑀸𑀢𑀺𑀓𑀸𑀬 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀣 𑀉𑀪𑁄𑀲𑀼 𑀅𑀜𑁆𑀜𑀸𑀢𑀺𑀓𑀸𑀤𑀺𑀲𑀜𑁆𑀜𑀻, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀤𑀼𑀓𑁆𑀓𑀝𑀸𑀤𑀺𑀆𑀧𑀢𑁆𑀢𑀺𑀪𑁂𑀤𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀜𑁆𑀜𑀸𑀢𑀺𑀓𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀦𑀬𑁄 𑀦𑁂𑀢𑀩𑁆𑀩𑁄. 𑀅𑀬𑀁 𑀯𑀺𑀫𑀺𑀲𑁆𑀲𑀢𑀸𑀬 𑀦𑀬𑁄.

𑀆𑀤𑀺𑀲𑀤𑁆𑀤𑁂𑀦 𑀧𑀦 𑀅𑀦𑁂𑀓𑁂 𑀅𑀜𑁆𑀜𑀸𑀢𑀺𑀓𑀸 𑀯𑀺𑀜𑁆𑀜𑀢𑁆𑀢𑀸, 𑀯𑀺𑀜𑁆𑀜𑀢𑁆𑀢𑀧𑀼𑀕𑁆𑀕𑀮𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀏𑀓𑁄 𑀤𑁂𑀢𑀺, 𑀏𑀓𑁄 𑀦 𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀣 𑀅𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀦 𑀦𑀺𑀲𑀕𑁆𑀕𑀺𑀬𑀁. 𑀅𑀣 𑀯𑀺𑀜𑁆𑀜𑀢𑁆𑀢𑀸𑀯𑀺𑀜𑁆𑀜𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀁 𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀉𑀪𑁄 𑀤𑁂𑀦𑁆𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯. 𑀅𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀦𑀸𑀧𑀢𑁆𑀢𑀺. 𑀯𑀺𑀜𑁆𑀜𑀢𑁆𑀢𑀲𑁆𑀲 𑀯𑀘𑀦𑁂𑀦 𑀅𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀅𑀦𑀸𑀧𑀢𑁆𑀢𑀺 𑀏𑀯. 𑀢𑀣𑀸 𑀉𑀧𑀓𑁆𑀔𑀝𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀦𑀬𑁄 𑀦𑁂𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 𑀲𑀗𑁆𑀔𑁂𑀧𑀢𑁄 𑀅𑀜𑁆𑀜𑀸𑀢𑀺𑀓𑀸𑀬𑀸𑀤𑀺𑀕𑀸𑀣𑀸 𑀯𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑀸 𑀳𑁄𑀢𑀺. 𑀬𑀁 𑀧𑀦𑁂𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀸 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀦𑀺𑀧𑁆𑀧𑀬𑁄𑀚𑀦𑀢𑀸𑀬 𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀬𑁄𑀚𑀦𑀯𑀺𑀲𑁂𑀲𑁄 𑀢𑀲𑁆𑀫𑀺𑀁𑀬𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺. 𑀏𑀯𑀫𑁂𑀯 𑀅𑀜𑁆𑀜𑀢𑁆𑀣𑀧𑀺 𑀯𑀘𑀦𑁂𑀦, 𑀯𑀺𑀲𑁂𑀲𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀘 𑀲𑀺𑀓𑁆𑀔𑀸𑀧𑀤𑁂𑀲𑀼 𑀜𑀸𑀢𑀩𑁆𑀩𑀁 𑀯𑀺𑀲𑁂𑀲𑀧𑁆𑀧𑀬𑁄𑀚𑀦𑀦𑁆𑀢𑀺.

𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀞𑀸𑀦𑀁 𑀪𑀜𑁆𑀚𑀢𑀺, 𑀆𑀕𑀢𑀓𑀸𑀭𑀡𑀁 𑀯𑀺𑀦𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀦 𑀘𑁄𑀤𑀦𑀁 𑀦 𑀮𑀪𑀢𑀻𑀢𑀺 𑀏𑀓𑁂. 𑀆𑀕𑀫𑀦𑀲𑁆𑀲 𑀲𑀸𑀢𑁆𑀣𑀓𑀁 𑀦 𑀳𑁄𑀢𑀺, 𑀘𑀻𑀯𑀭𑀁 𑀦 𑀮𑀪𑀺𑀲𑁆𑀲𑀢𑀺 𑀧𑀝𑀺𑀲𑀦𑁆𑀣𑀸𑀭𑀲𑁆𑀲 𑀓𑀢𑀢𑁆𑀢𑀸𑀢𑀺 𑀏𑀓𑁂. 𑀘𑁄𑀤𑀦𑀸𑀮𑀓𑁆𑀔𑀡𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. ‘‘𑀥𑀫𑁆𑀫𑀤𑁂𑀲𑀦𑀸𑀥𑀺𑀧𑁆𑀧𑀸𑀬𑀸𑀤𑀺𑀦𑀸 𑀦 𑀧𑀝𑀺𑀲𑀦𑁆𑀣𑀸𑀭𑁄 𑀓𑀸𑀢𑀩𑁆𑀩𑁄’’𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘‘𑀆𑀕𑀢𑀓𑀸𑀭𑀡𑀁 𑀯𑀺𑀦𑀸𑀲𑁂𑀢𑀻’𑀢𑀺 𑀘𑁄𑀤𑀦𑀸𑀞𑀸𑀦𑀸𑀦𑀺 𑀪𑀜𑁆𑀚𑀢𑀺, 𑀘𑁄𑀤𑁂𑀢𑀼𑀓𑀸𑀫𑁄 𑀅𑀓𑀢𑁆𑀢𑀩𑁆𑀩𑀫𑀓𑀸𑀲𑀺, 𑀢𑀧𑁆𑀧𑀘𑁆𑀘𑀬𑀸 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝’’𑀦𑁆𑀢𑀺 𑀘 𑀯𑀤𑀢𑀺. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀧𑀦 ‘‘𑀆𑀲𑀦𑁂 𑀘𑁂 𑀦𑀺𑀲𑀻𑀤𑀢𑀺, 𑀏𑀓𑀸𑀬 𑀦𑀺𑀲𑀚𑁆𑀚𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀜𑁆𑀚𑀢𑀺. 𑀆𑀫𑀺𑀲𑀁 𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀏𑀓𑁂𑀦 𑀧𑀝𑀺𑀕𑁆𑀕𑀳𑀡𑁂𑀦 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀜𑁆𑀚𑀢𑀺. 𑀥𑀫𑁆𑀫𑀁 𑀘𑁂 𑀪𑀸𑀲𑀢𑀺, 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸𑀬 𑀏𑀓𑀸𑀬 𑀯𑀸𑀘𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀜𑁆𑀚𑀢𑀺. 𑀢𑀁 𑀲𑀦𑁆𑀥𑀸𑀬 ‘𑀆𑀕𑀢𑀓𑀸𑀭𑀡𑀁 𑀯𑀺𑀦𑀸𑀲𑁂𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀢𑀺. ‘‘𑀏𑀲𑁄 𑀔𑁄’’𑀢𑀺 𑀯𑀼𑀢𑁆𑀢𑁂𑀦 𑀲𑀜𑁆𑀜𑀢𑁆𑀢𑁄 𑀏𑀓𑁄, ‘‘𑀅𑀬𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄𑀢𑀺…𑀧𑁂… 𑀅𑀯𑀼𑀢𑁆𑀢𑁂𑀧𑀺 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁄 𑀤𑀼𑀢𑀺𑀬𑁄, 𑀲𑀘𑁂 𑀧𑀦 𑀤𑀽𑀢𑁄 𑀕𑀘𑁆𑀙𑀦𑁆𑀢𑁄𑀯 ‘‘𑀅𑀳𑀁 𑀢𑀲𑁆𑀲 𑀳𑀢𑁆𑀣𑁂 𑀤𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀢𑀢𑀺𑀬𑁄, ‘‘𑀅𑀜𑁆𑀜𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀆𑀭𑁄𑀘𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑁄 𑀘𑀢𑀼𑀢𑁆𑀣𑁄𑀢𑀺 𑀬𑀣𑀸 𑀪𑀺𑀓𑁆𑀔𑀼𑀦𑀸 𑀦𑀺𑀤𑁆𑀤𑀺𑀝𑁆𑀞𑀸 𑀘𑀢𑁆𑀢𑀸𑀭𑁄, 𑀢𑀣𑁂𑀯 𑀤𑀽𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀘𑀢𑁆𑀢𑀸𑀭𑁄. 𑀫𑀼𑀔𑀯𑁂𑀯𑀝𑀺𑀓𑀓𑀧𑁆𑀧𑀺𑀬𑀓𑀸𑀭𑀓𑁄, 𑀧𑀭𑀫𑁆𑀫𑀼𑀔𑀓𑀧𑁆𑀧𑀺𑀬𑀓𑀸𑀭𑀓𑁄 𑀘𑁂𑀢𑀺 𑀏𑀢𑁂𑀲𑀼 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀲𑀼 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀮𑀺𑀔𑀺𑀢𑀁.

𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀻𑀯𑀭𑀯𑀕𑁆𑀕𑁄 𑀧𑀞𑀫𑁄.

𑁨. 𑀏𑀴𑀓𑀮𑁄𑀫𑀯𑀕𑁆𑀕𑁄

𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀉𑀪𑀺𑀦𑁆𑀦𑀜𑁆𑀘 𑀓𑁄𑀲𑀺𑀬𑀁 𑀏𑀓𑀢𑁄 𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀉𑀪𑁄 𑀯𑀸 𑀏𑀓𑀢𑁄 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀅𑀢𑁆𑀢𑀦𑀸 𑀓𑀢𑀁 𑀘𑁂, ‘‘𑀦𑀺𑀲𑁆𑀲𑀚𑁆𑀚𑀦𑀓𑀸𑀮𑁂 𑀲𑀬𑀁 𑀓𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀉𑀪𑁄𑀳𑀺 𑀘𑁂 𑀓𑀢𑀁, 𑀬𑀣𑀸𑀧𑀸𑀴𑀺𑀫𑁂𑀯.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀬𑀣𑀸 𑀧𑀞𑀫𑁂 ‘‘𑀏𑀓𑁂𑀦𑀧𑀺 𑀓𑁄𑀲𑀺𑀬𑀁𑀲𑀼𑀦𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀣𑀸 𑀇𑀥 ‘‘𑀏𑀓𑁂𑀦𑀧𑀺 𑀅𑀜𑁆𑀜𑁂𑀦 𑀅𑀫𑀺𑀲𑁆𑀲𑀺𑀢𑀸𑀦’’𑀦𑁆𑀢𑀺 𑀯𑀘𑀦𑀸𑀪𑀸𑀯𑀢𑁄 𑀅𑀜𑁆𑀜𑁂𑀦 𑀫𑀺𑀲𑁆𑀲𑀪𑀸𑀯𑁂 𑀲𑀢𑀺𑀧𑀺 𑀅𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑀓𑀁 𑀘𑁂, ‘‘𑀲𑀼𑀤𑁆𑀥𑀓𑀸𑀴𑀓’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀢𑀼𑀮𑀬𑀺𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀬𑀣𑀸 𑀢𑀼𑀮𑀸𑀥𑀸𑀭𑀡𑀸𑀬 𑀓𑀸𑀴𑀓𑀸𑀥𑀺𑀓𑀸 𑀦 𑀳𑁄𑀦𑁆𑀢𑀺, 𑀢𑀣𑀸 𑀓𑀸𑀴𑀓𑀸𑀦𑀁 𑀤𑁆𑀯𑁂 𑀪𑀸𑀕𑀸 𑀕𑀳𑁂𑀢𑀩𑁆𑀩𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦. ‘‘𑀏𑀓𑀲𑁆𑀲𑀸𑀧𑀺 𑀓𑀸𑀴𑀓𑀮𑁄𑀫𑀲𑁆𑀲 𑀅𑀢𑀺𑀭𑁂𑀓𑀪𑀸𑀯𑁂 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀯𑀘𑀦𑀁 𑀢𑀼𑀮𑀸𑀥𑀸𑀭𑀡𑀸𑀬 𑀓𑀺𑀜𑁆𑀘𑀸𑀧𑀺 𑀦 𑀲𑀫𑁂𑀢𑀺, 𑀅𑀘𑀺𑀢𑁆𑀢𑀓𑀢𑁆𑀢𑀸 𑀧𑀦 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀼𑀩𑁆𑀩𑁂 𑀢𑀼𑀮𑀸𑀬 𑀥𑀸𑀭𑀬𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀏𑀓𑀫𑁆𑀧𑀺 𑀮𑁄𑀫𑀁 𑀢𑀢𑁆𑀣 𑀧𑀢𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄𑀢𑀺 𑀦𑁄 𑀢𑀓𑁆𑀓𑁄’’𑀢𑀺 𑀆𑀘𑀭𑀺𑀬𑁄. 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦 𑀅𑀕𑁆𑀕𑀳𑀡𑀁 𑀅𑀓𑀺𑀭𑀺𑀬𑀸, 𑀲𑀦𑁆𑀣𑀢𑀓𑀭𑀡𑀁 𑀓𑀺𑀭𑀺𑀬𑀸.

𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀑𑀭𑁂𑀦 𑀘𑁂 𑀙𑀦𑁆𑀦𑀁 𑀯𑀲𑁆𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀙𑀩𑁆𑀩𑀲𑁆𑀲𑁂 𑀧𑀭𑀺𑀧𑀼𑀡𑁆𑀡𑁂 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦𑀺𑀝𑁆𑀞𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀸𑀦𑀺 𑀧𑀦𑁂𑀢𑁆𑀣 𑀅𑀢𑀺𑀭𑁂𑀓𑀙𑀩𑁆𑀩𑀲𑁆𑀲𑀯𑀲𑁂𑀦 𑀯𑀸 𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑀸 𑀓𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀏𑀓𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺. 𑀕𑀺𑀮𑀸𑀦𑀲𑁆𑀲 𑀘 𑀏𑀓𑀁 𑀦𑀧𑁆𑀧𑀳𑁄𑀢𑀻𑀢𑀺 𑀅𑀦𑁂𑀓𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀢𑁄 𑀧𑀝𑁆𑀞𑀸𑀬 𑀭𑁄𑀕𑀲𑁆𑀲 𑀫𑀦𑁆𑀤𑀢𑀸𑀬 𑀲𑀦𑁆𑀣𑀢𑀁 𑀆𑀤𑀸𑀬 𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀲𑀫𑁆𑀫𑀼𑀢𑀺 𑀯𑀸 𑀭𑁄𑀕𑁄 𑀯𑀸 𑀦 𑀭𑀓𑁆𑀔𑀢𑀻𑀢𑀺 𑀏𑀓𑁂. 𑀅𑀧𑀺𑀘 𑀙𑀯𑀲𑁆𑀲𑀩𑀼𑀤𑁆𑀥𑀦𑀺𑀫𑁆𑀫𑀮𑀁 𑀲𑀺𑀓𑁆𑀔𑀸𑀧𑀤𑀁 𑀯𑀺𑀘𑀸𑀭𑁂𑀢𑀼𑀁 𑀕𑀫𑁆𑀪𑀻𑀭𑀢𑁆𑀢𑀸. 𑀢𑀲𑁆𑀫𑀸 𑀙𑀯𑀲𑁆𑀲𑁂 𑀓𑀫𑁆𑀫𑀁 𑀓𑀢𑀦𑁆𑀢𑀺.

𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀲𑀦𑁆𑀣𑀢𑀁 𑀧𑀦 𑀪𑀺𑀓𑁆𑀔𑀼𑀦𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀧𑁂𑀢𑁆𑀯𑀸 ‘‘𑀦𑀺𑀲𑀻𑀤𑀦𑀲𑀦𑁆𑀣𑀢’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀁, 𑀦𑀦𑀼 𑀏𑀢𑁆𑀣 𑀓𑀸𑀭𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀅𑀢𑁆𑀣𑀺 𑀓𑀸𑀭𑀡𑀁, 𑀘𑀻𑀯𑀭𑀲𑀜𑁆𑀜𑀺𑀢𑀸𑀬 𑀲𑀦𑁆𑀣𑀢𑀸𑀦𑀁 𑀉𑀚𑁆𑀛𑀺𑀢𑀢𑁆𑀢𑀸 𑀢𑁂𑀲𑀁 𑀅𑀘𑀻𑀯𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀣𑀸 𑀧𑀜𑁆𑀜𑀢𑁆𑀢𑀁 𑀪𑀕𑀯𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀢𑁂𑀘𑀻𑀯𑀭𑀺𑀓𑀥𑀼𑀢𑀗𑁆𑀕𑀪𑁂𑀤𑀪𑀬𑀸 𑀲𑀦𑁆𑀣𑀢𑁂 𑀘𑀢𑀼𑀢𑁆𑀣𑀘𑀻𑀯𑀭𑀲𑀜𑁆𑀜𑀺𑀢𑀸𑀬 𑀲𑀦𑁆𑀣𑀢𑀸𑀦𑀺 𑀉𑀚𑁆𑀛𑀺𑀢𑁆𑀯𑀸 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀬𑀺𑀁𑀲𑀼, 𑀪𑀕𑀯𑀸 𑀘 𑀢𑁂𑀲𑀁 𑀲𑀦𑁆𑀣𑀢𑀁 𑀅𑀦𑀼𑀚𑀸𑀦𑀺. 𑀢𑀢𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 ‘‘𑀦𑀺𑀲𑀻𑀤𑀦𑀘𑀻𑀯𑀭𑀲𑀡𑁆𑀞𑀸𑀦𑀫𑁆𑀧𑁂𑀢𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀦𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀘𑀢𑀼𑀢𑁆𑀣𑀘𑀻𑀯𑀭𑀪𑀸𑀯𑁂𑀦, 𑀧𑀕𑁂𑀯 𑀓𑀢𑀲𑀦𑁆𑀣𑀢𑀁 𑀯𑀸’’𑀢𑀺. 𑀢𑀢𑁄 ‘‘𑀲𑀦𑁆𑀣𑀢𑁂 𑀢𑁂𑀲𑀁 𑀘𑀻𑀯𑀭𑀲𑀜𑁆𑀜𑀺𑀢𑀸 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀤𑀢𑁆𑀣𑀁 𑀪𑀕𑀯𑀢𑀸 ‘‘𑀲𑀦𑁆𑀣𑀢’’𑀦𑁆𑀢𑀺 𑀅𑀧𑀜𑁆𑀜𑀧𑁂𑀢𑁆𑀯𑀸 ‘‘𑀦𑀺𑀲𑀻𑀤𑀦𑀲𑀦𑁆𑀣𑀢’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀲𑀦𑁆𑀣𑀢𑁂𑀲𑀼 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺 𑀅𑀓𑀧𑁆𑀧𑀺𑀬𑀢𑁆𑀢𑀸, 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀯𑀝𑁆𑀝𑀦𑁆𑀢𑀻𑀢𑀺 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁫𑁬𑁬-𑁫𑁬𑁭) 𑀮𑀺𑀔𑀺𑀢𑀁. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀅𑀦𑀸𑀧𑀢𑁆𑀢𑀺 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀭𑀸. 𑁫𑁭𑁦) 𑀯𑀘𑀦𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀓𑀢𑀺𑀬𑀸 𑀤𑀻𑀖𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀢𑀺𑀬𑁄𑀚𑀦𑀧𑀭𑀫𑀫𑁂𑀯 𑀳𑀭𑀺𑀢𑀩𑁆𑀩𑀸𑀦𑀺, 𑀧𑀕𑁂𑀯 𑀅𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀧𑀦𑁆𑀦𑀲𑁆𑀲 𑀘𑁂, 𑀅𑀤𑁆𑀥𑀸𑀦𑀁 𑀦𑀸𑀫 𑀧𑀝𑀺𑀧𑀦𑁆𑀦𑀲𑁆𑀲 𑀅𑀓𑀸𑀫𑀸 𑀯𑀲𑁆𑀲𑀁𑀯𑀼𑀝𑁆𑀞𑀪𑀺𑀓𑁆𑀔𑀼𑀦𑀺𑀬𑀸 𑀫𑀕𑁆𑀕𑀧𑁆𑀧𑀝𑀺𑀧𑀢𑁆𑀢𑀺 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀢𑁂𑀦𑁂𑀯 𑀯𑀸𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀕𑀫𑀦𑀼𑀲𑁆𑀲𑀸𑀳𑀢𑁆𑀢𑀸 ‘‘𑀅𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺 𑀲𑀗𑁆𑀔𑀁 𑀕𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁…𑀧𑁂… 𑀅𑀲𑀦𑁆𑀢𑁂𑀧𑀺 𑀳𑀸𑀭𑀓𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀯𑀸 𑀏𑀴𑀓𑀮𑁄𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀢𑀺𑀬𑁄𑀚𑀦𑀧𑀭𑀫𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀫𑀕𑁆𑀕𑀁 𑀅𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀘 𑀢𑀺𑀬𑁄𑀚𑀦𑀧𑀭𑀫𑀢𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀅𑀘𑁆𑀙𑀺𑀦𑁆𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀳𑀭𑀢𑁄 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀧𑀝𑀺𑀮𑀸𑀪𑁄 𑀳𑀺 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺 𑀦𑀸𑀫𑀸𑀢𑀺.

‘‘𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑀸 𑀧𑀝𑀺𑀕𑁆𑀕𑀳𑀺𑀢𑀸𑀦𑀁𑀬𑁂𑀯 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀅𑀦𑀸𑀓𑀗𑁆𑀔𑀫𑀸𑀦𑁂𑀦 𑀧𑀭𑀲𑀦𑁆𑀢𑀓𑀸𑀦𑀺 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀺𑀤𑁆𑀥𑀁.

𑀅𑀗𑁆𑀕𑁂𑀲𑀼 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸’’𑀢𑀺 𑀦𑀢𑁆𑀣𑀺, 𑀅𑀬𑀫𑀢𑁆𑀣𑁄 ‘‘𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀦𑀸, ‘‘𑀅𑀘𑁆𑀙𑀺𑀦𑁆𑀦𑀁 𑀧𑀝𑀺𑀮𑀪𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀘 ‘‘𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀳𑀭𑀸𑀧𑁂𑀦𑁆𑀢𑁄 𑀕𑀘𑁆𑀙𑀢𑀺 𑀘𑁂, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀢𑀺𑀬𑁄𑀚𑀦𑀧𑀭𑀫𑀁 𑀧𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀪𑀡𑁆𑀟𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑁂 𑀳𑀭𑀦𑁆𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀲𑀺𑀤𑁆𑀥𑀁.

𑀢𑀺𑀬𑁄𑀚𑀦𑀧𑀭𑀫𑀁 𑀲𑀳𑀢𑁆𑀣𑀸 𑀳𑀭𑀺𑀢𑀩𑁆𑀩𑀸𑀦𑀻𑀢𑀺 𑀢𑀺𑀬𑁄𑀚𑀦𑀧𑀭𑀫𑀫𑁂𑀯 𑀅𑀢𑁆𑀢𑀦𑀸 𑀳𑀭𑀺𑀢𑀩𑁆𑀩𑀸𑀦𑀺, 𑀢𑀁 𑀓𑀺𑀫𑀢𑁆𑀣𑀦𑁆𑀢𑀺? 𑀲𑀻𑀫𑀸𑀬 𑀏𑀢𑀧𑀭𑀫𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀬𑁄𑀚𑀦𑀧𑀭𑀫𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁪𑁦). 𑀯𑀸𑀲𑀸𑀥𑀺𑀧𑁆𑀧𑀸𑀬𑁂𑀦, 𑀧𑀘𑁆𑀘𑀸𑀕𑀫𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀸 𑀕𑀘𑁆𑀙𑀢𑁄 𑀏𑀢𑀧𑀭𑀫𑀢𑀸 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀫𑀳𑀢𑀺𑀬𑁄 𑀲𑀻𑀫𑀸𑀬𑁄 𑀲𑀫𑁆𑀫𑀦𑁆𑀦𑀦𑁆𑀢𑀺…𑀧𑁂… 𑀪𑀺𑀓𑁆𑀔𑀽 𑀉𑀧𑁄𑀲𑀣𑀁 𑀆𑀕𑀘𑁆𑀙𑀦𑁆𑀢𑀸 𑀉𑀤𑁆𑀤𑀺𑀲𑁆𑀲𑀫𑀸𑀦𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀘𑁆𑀙𑀦𑁆𑀢𑀺, 𑀉𑀤𑁆𑀤𑀺𑀝𑁆𑀞𑀫𑀢𑁆𑀢𑁂𑀧𑀺 𑀆𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀸𑀧𑀺 𑀧𑀭𑀺𑀯𑀲𑀦𑁆𑀢𑀻’’𑀢𑀺 (𑀫𑀳𑀸𑀯. 𑁧𑁪𑁦).

𑀅𑀲𑀦𑁆𑀢𑁂 𑀳𑀸𑀭𑀓𑁂𑀢𑀺 𑀆𑀡𑀢𑁆𑀢𑀺𑀬𑀸 𑀳𑀸𑀭𑀓𑁂 𑀅𑀲𑀢𑀺. 𑀓𑀫𑁆𑀩𑀮𑀲𑁆𑀲 𑀉𑀧𑀭𑀺 𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀲𑀘𑁂 𑀏𑀓𑀫𑁆𑀧𑀺 𑀮𑁄𑀫𑀁 𑀘𑀻𑀯𑀭𑁂 𑀮𑀕𑁆𑀕𑀁 𑀳𑁄𑀢𑀺, 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺 𑀏𑀯 𑀓𑀫𑁆𑀩𑀮𑀢𑁄 𑀯𑀺𑀚𑀝𑀺𑀢𑀢𑁆𑀢𑀸𑀢𑀺 𑀮𑀺𑀔𑀺𑀢𑀁. 𑀢𑀁 𑀓𑀫𑁆𑀩𑀮𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀬𑀼𑀢𑁆𑀢𑀁.

𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀚𑀸𑀢𑀭𑀽𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀦𑀺𑀩𑁆𑀩𑀢𑁆𑀢𑀭𑀼𑀓𑁆𑀔𑀘𑁆𑀙𑀸𑀬𑀸𑀧𑀺 𑀭𑀼𑀓𑁆𑀔𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀮𑀺𑀔𑀺𑀢𑀁.

𑀚𑀸𑀢𑀭𑀽𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀚𑀸𑀢𑀭𑀽𑀧𑀭𑀚𑀢𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀢𑁆𑀢𑀁.

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀲𑀦𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀫𑁂𑀯𑀸𑀢𑀺 𑀏𑀢𑁆𑀣 𑀓𑀺𑀁 𑀲𑀼𑀤𑁆𑀥𑀺𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀉𑀤𑀸𑀳𑀼 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺? 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯.

𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑁆𑀭𑀺𑀤𑀁 𑀧𑀓𑀺𑀡𑁆𑀡𑀓𑀁

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁 𑀧𑀭𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀤𑀺𑀬𑁆𑀬𑀫𑀸𑀦𑀲𑁆𑀲 𑀯𑀸 𑀧𑀸𑀭𑀺𑀯𑀢𑁆𑀢𑀓𑀪𑀸𑀯𑁂𑀦 𑀤𑀺𑀬𑁆𑀬𑀫𑀸𑀦𑀲𑁆𑀲 𑀯𑀸 𑀧𑀁𑀲𑀼𑀓𑀽𑀮𑀲𑁆𑀲 𑀯𑀸 𑀭𑀽𑀧𑀺𑀬𑀲𑁆𑀲 𑀉𑀕𑁆𑀕𑀡𑁆𑀳𑀦𑀉𑀕𑁆𑀕𑀡𑁆𑀳𑀸𑀧𑀦𑀲𑀸𑀤𑀺𑀬𑀦𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀦𑀯𑀫𑀁 𑀧𑀭𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀭𑀽𑀧𑀺𑀬𑀧𑀭𑀺𑀯𑀢𑁆𑀢𑀦𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀤𑀲𑀫𑀁 𑀅𑀭𑀽𑀧𑀺𑀬𑀧𑀭𑀺𑀯𑀢𑁆𑀢𑀦𑀁. ‘‘𑀅𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻 𑀧𑀜𑁆𑀘𑀦𑁆𑀦𑀁 𑀲𑀳 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁫𑁯𑁧; 𑀯𑀺. 𑀯𑀺. 𑀝𑀻. 𑁧.𑁫𑁯𑁧; 𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁫𑁮𑁭) 𑀘 𑀯𑀘𑀦𑀁 𑀇𑀢𑀭𑁂𑀳𑀺 𑀲𑀳 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀅𑀭𑀽𑀧𑀺𑀬𑀜𑁆𑀘 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀺𑀯𑀢𑁆𑀢𑀦𑁂 𑀲𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀏𑀓𑀦𑁆𑀢𑁂𑀦 𑀯𑀼𑀢𑁆𑀢𑀁. 𑀧𑀜𑁆𑀘𑀦𑁆𑀦𑀁 𑀲𑀳 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀁 𑀧𑀭𑀺𑀯𑀢𑁆𑀢𑀦𑁂 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄 𑀅𑀦𑀸𑀧𑀢𑁆𑀢𑀺 𑀏𑀯𑀸𑀢𑀺 𑀧𑁄𑀭𑀸𑀡𑀸𑀢𑀺 𑀘𑁂? 𑀦, 𑀓𑀧𑁆𑀧𑀺𑀬𑀯𑀢𑁆𑀣𑀽𑀦𑀁𑀬𑁂𑀯 𑀢𑀢𑁆𑀣 𑀆𑀕𑀢𑀢𑁆𑀢𑀸. 𑀬𑀤𑀺 𑀓𑀧𑁆𑀧𑀺𑀬𑀯𑀢𑁆𑀣𑀼 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀧𑀕𑁂𑀯 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀘𑁂? 𑀦, 𑀆𑀧𑀢𑁆𑀢𑀺𑀕𑀭𑀼𑀓𑀮𑀳𑀼𑀓𑀪𑀸𑀯𑁂𑀦 𑀯𑀢𑁆𑀣𑀼𑀕𑀭𑀼𑀓𑀮𑀳𑀼𑀓𑀦𑀺𑀬𑀫𑀸𑀪𑀸𑀯𑀢𑁄.

𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀢𑁄 𑀳𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀸𑀤𑀺 𑀫𑀳𑀕𑁆𑀖𑀧𑁆𑀧𑀳𑁄𑀦𑀓𑀫𑁆𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀓𑀢𑁆𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀢𑁄 𑀫𑀼𑀢𑁆𑀢𑀸𑀤𑀺 𑀮𑀳𑀼𑀓𑀁 𑀳𑁄𑀢𑀺. 𑀮𑀳𑀼𑀓𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀬𑀣𑁂𑀯 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁄 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀁, 𑀢𑀣𑁂𑀯 𑀢𑀲𑁆𑀲 𑀯𑀸 𑀢𑁂𑀦 𑀯𑀸 𑀘𑁂𑀢𑀸𑀧𑀦𑁂𑀧𑀺 𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁯) 𑀅𑀝𑁆𑀞𑀓𑀣𑀸𑀘𑀭𑀺𑀬𑀸.

𑀅𑀣 𑀯𑀸 𑀬𑀁 𑀯𑀼𑀢𑁆𑀢𑀁 ‘‘𑀓𑀧𑁆𑀧𑀺𑀬𑀯𑀢𑁆𑀣𑀽𑀦𑀁𑀬𑁂𑀯 𑀢𑀢𑁆𑀣 𑀆𑀕𑀢𑀢𑁆𑀢𑀸’’𑀢𑀺, 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀺𑀧𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀦 𑀧𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑀧𑁆𑀧𑀲𑀗𑁆𑀕𑀪𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀼𑀢𑁆𑀢𑀸𑀤𑀻𑀲𑀼𑀧𑀺 𑀯𑀼𑀢𑁆𑀢𑁂𑀲𑀼 𑀅𑀦𑀸𑀧𑀢𑁆𑀢𑀺𑀬𑀁 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀆𑀘𑀺𑀓𑁆𑀔𑀢𑀺, ‘‘𑀇𑀤𑀁 𑀫𑀼𑀢𑁆𑀢𑀸𑀤𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀯𑁂𑀴𑀼𑀭𑀺𑀬𑀸𑀤𑀺𑀦𑀸 𑀅𑀢𑁆𑀣𑁄’’𑀢𑀺 𑀪𑀡𑀢𑀺, 𑀤𑀲𑀫𑁂𑀦 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸. 𑀬𑀲𑁆𑀫𑀸 𑀘 𑀇𑀤𑀁 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀆𑀘𑀺𑀓𑁆𑀔𑀦𑀸𑀤𑀺𑀲𑀁𑀯𑁄𑀳𑀸𑀭𑁄 𑀘, 𑀢𑀲𑁆𑀫𑀸 𑀢𑀁 𑀦𑀯𑀫𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀓𑀬𑀯𑀺𑀓𑁆𑀓𑀬𑁂𑀯 𑀳𑁄𑀢𑀺 𑀓𑀧𑁆𑀧𑀺𑀬𑀯𑀢𑁆𑀣𑀽𑀳𑀺 𑀅𑀦𑀼𑀜𑁆𑀜𑀸𑀢𑀁, 𑀇𑀫𑀺𑀦𑀸𑀯 𑀦𑀬𑁂𑀦 𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀧𑀺 𑀤𑀲𑀫𑁂 𑀅𑀥𑀺𑀧𑁆𑀧𑁂𑀢𑀁 𑀆𑀧𑀚𑁆𑀚𑀢𑀺, 𑀅𑀝𑁆𑀞𑀓𑀣𑀸𑀯𑀺𑀭𑁄𑀥𑀢𑁄 𑀧𑀦 𑀦𑀸𑀥𑀺𑀧𑁆𑀧𑁂𑀢𑀫𑀺𑀘𑁆𑀘𑁂𑀯 𑀕𑀳𑁂𑀢𑀩𑁆𑀩𑁄.

𑀓𑀸 𑀧𑀦𑁂𑀢𑁆𑀣 𑀓𑀸𑀭𑀡𑀘𑁆𑀙𑀸𑀬𑀸𑀢𑀺, 𑀧𑀜𑁆𑀘𑀦𑁆𑀦𑀁 𑀲𑀳 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄 𑀅𑀦𑀸𑀧𑀢𑁆𑀢𑀺 𑀏𑀯𑀸𑀢𑀺 𑀘𑁂? 𑀦, 𑀢𑀢𑁆𑀣 𑀅𑀦𑀸𑀕𑀢𑀢𑁆𑀢𑀸. 𑀅𑀦𑀸𑀕𑀢𑀓𑀸𑀭𑀡𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀧𑀜𑁆𑀘𑀦𑁆𑀦𑀁 𑀲𑀳 𑀆𑀧𑀢𑁆𑀢𑀺𑀯𑀢𑁆𑀣𑀼𑀓𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑀮𑀸𑀪𑁂 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑀸, 𑀅𑀓𑀧𑁆𑀧𑀺𑀬𑀢𑁆𑀢𑀸 𑀧𑀜𑁆𑀘𑀦𑁆𑀦𑀁 𑀲𑀳𑀸𑀧𑀺 𑀆𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑁄 𑀅𑀝𑁆𑀞𑀓𑀣𑀸𑀯𑀸𑀤𑁄.

𑀅𑀧𑀭𑁄 𑀦𑀬𑁄 𑁋 𑀬𑀤𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀓𑀬𑀯𑀺𑀓𑁆𑀓𑀬𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀓𑀧𑁆𑀧𑀺𑀬𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀧𑀭𑀺𑀬𑀸𑀬𑁄 𑀢𑀢𑁆𑀣 𑀮𑀩𑁆𑀪𑁂𑀬𑁆𑀬, 𑀦 𑀧𑀦 𑀮𑀩𑁆𑀪𑀢𑀻𑀢𑀺 𑀦𑀯𑀫𑁂 𑀏𑀯 𑀢𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀢𑀲𑁆𑀫𑀸 𑀲𑀁𑀯𑁄𑀳𑀸𑀭𑁄 𑀦𑀸𑀫 𑀓𑀬𑀯𑀺𑀓𑁆𑀓𑀬𑁄𑀧𑀺 𑀅𑀜𑁆𑀜𑀣𑀸 𑀧𑀭𑀺𑀯𑀢𑁆𑀢𑀦𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀧𑀯𑀢𑁆𑀢𑁄, 𑀓𑀬𑀯𑀺𑀓𑁆𑀓𑀬𑀜𑁆𑀘 𑀫𑁄𑀘𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀻’𑀢𑀺 𑀘𑁂𑀢𑀸𑀧𑁂𑀢𑀺, 𑀯𑀝𑁆𑀝𑀢𑀻’’𑀢𑀺 𑀅𑀯𑀢𑁆𑀯𑀸 𑀤𑀲𑀫𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂𑀲𑀁 𑀧𑀭𑀺𑀯𑀢𑁆𑀢𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀼𑀫𑀢𑀺𑀯𑀺𑀭𑁄𑀥𑀢𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀘𑁂𑀢𑀸𑀧𑀦𑁂 𑀤𑀼𑀓𑁆𑀓𑀝𑀫𑁂𑀯. 𑀦𑁂𑀲𑀁 𑀓𑀬𑀯𑀺𑀓𑁆𑀓𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀘𑁂? 𑀦, 𑀲𑀩𑁆𑀩𑀲𑁆𑀲𑀧𑀺 𑀓𑀬𑀯𑀺𑀓𑁆𑀓𑀬𑀢𑁆𑀢𑀸. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘𑀲𑀘𑁂 𑀓𑀬𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’𑀦𑁆𑀢𑀺 𑀪𑀸𑀲𑀺𑀢𑀁, 𑀢𑀁 𑀤𑀼𑀩𑁆𑀪𑀸𑀲𑀺𑀢𑀁. 𑀓𑀲𑁆𑀫𑀸? 𑀦 𑀳𑀺 𑀤𑀸𑀦𑀕𑁆𑀕𑀳𑀡𑀢𑁄 𑀅𑀜𑁆𑀜𑁄 𑀓𑀬𑀯𑀺𑀓𑁆𑀓𑀬𑁄 𑀦𑀸𑀫 𑀅𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁮𑁯), 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀓𑀬𑀯𑀺𑀓𑁆𑀓𑀬𑀮𑀓𑁆𑀔𑀡𑀲𑀫𑁆𑀫𑀢𑁂 𑀤𑀲𑀫𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂𑀲𑀁 𑀧𑀭𑀺𑀯𑀢𑁆𑀢𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀼𑀫𑀢𑀺𑀯𑀺𑀭𑁄𑀥𑀢𑁄 𑀘. 𑀪𑀯𑀢𑀼 𑀯𑀸 𑀅𑀢𑁆𑀢𑀦𑁄 𑀧𑀝𑀺𑀲𑀺𑀤𑁆𑀥𑀫𑀺𑀤𑀁 𑀓𑀸𑀭𑀡𑀁, 𑀤𑀲𑀫𑁂 𑀅𑀯𑀲𑁆𑀲𑀫𑁂𑀯 𑀚𑀸𑀦𑀺𑀢𑀩𑁆𑀩𑀸𑀦𑀻𑀢𑀺 𑀢𑀸𑀦𑀺 𑀓𑀬𑀯𑀺𑀓𑁆𑀓𑀬𑀸𑀦𑁂𑀯𑀸𑀢𑀺 𑀢𑁂𑀲𑀁 𑀦𑀺𑀲𑁆𑀲𑀕𑁆𑀕𑀺𑀬𑀪𑀸𑀯𑀜𑁆𑀘 𑀕𑀢𑀸𑀦𑀻𑀢𑀺 𑀏𑀯𑀫𑁆𑀧𑀺 𑀲𑀺𑀤𑁆𑀥𑁄 𑀅𑀝𑁆𑀞𑀓𑀣𑀸𑀯𑀸𑀤𑁄.

𑀏𑀢𑁆𑀣𑀸𑀳𑀼 𑀧𑁄𑀭𑀸𑀡𑀸 𑁋 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀭𑀽𑀧𑀺𑀬𑀁 𑀧𑀭𑀳𑀢𑁆𑀣𑀕𑀢𑀁 𑀓𑀭𑁄𑀢𑀺 𑀅𑀚𑁆𑀛𑀸𑀘𑀭𑀢𑀺, 𑀤𑀼𑀓𑁆𑀓𑀝𑀁. 𑀧𑀭𑀲𑁆𑀲 𑀭𑀽𑀧𑀺𑀬𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀭𑁄𑀢𑀺, 𑀅𑀝𑁆𑀞𑀫𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀉𑀕𑁆𑀕𑀳𑀺𑀢𑀯𑀢𑁆𑀣𑀼𑀧𑀭𑀺𑀯𑀢𑁆𑀢𑀦𑁂 𑀓𑀣𑀁 𑀚𑀸𑀢𑀁? 𑀅𑀩𑁆𑀩𑁄𑀳𑀸𑀭𑀺𑀓𑀁 𑀚𑀸𑀢𑀁. 𑀅𑀣 𑀧𑀭𑀲𑁆𑀲 𑀭𑀽𑀧𑀺𑀬𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀧𑀞𑀫𑀁 𑀓𑀭𑁄𑀢𑀺, 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀲𑁆𑀲 𑀓𑀢𑀢𑁆𑀢𑀸 𑀅𑀝𑁆𑀞𑀫𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀭𑀽𑀧𑀺𑀬𑀁 𑀧𑀭𑀲𑁆𑀲 𑀳𑀢𑁆𑀣𑀕𑀢𑀁 𑀧𑀘𑁆𑀙𑀸 𑀓𑀭𑁄𑀢𑀺, 𑀲𑀁𑀯𑁄𑀳𑀸𑀭𑁂𑀦 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺. ‘‘𑀭𑀽𑀧𑀺𑀬𑀲𑁆𑀲 𑀕𑀳𑀡𑀫𑀢𑁆𑀢𑁂𑀦 𑀅𑀝𑁆𑀞𑀫𑁂𑀦 𑀆𑀧𑀢𑁆𑀢𑀺, 𑀧𑀘𑁆𑀙𑀸 𑀧𑀭𑀺𑀯𑀢𑁆𑀢𑀦𑁂 𑀦𑀯𑀫𑁂𑀦𑀸’’𑀢𑀺 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁, 𑀢𑀁 𑀧𑀦 𑀬𑀼𑀢𑁆𑀢𑀁. ‘‘𑀅𑀚𑁆𑀛𑀸𑀘𑀭𑀢𑀺, 𑀤𑀼𑀓𑁆𑀓𑀝’’𑀦𑁆𑀢𑀺 𑀤𑀼𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀲𑁆𑀲 𑀅𑀦𑀺𑀬𑀫𑀧𑁆𑀧𑀲𑀗𑁆𑀕𑀢𑁄 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑁂𑀲𑀼 𑀤𑀲𑁆𑀲𑀺𑀢𑁄𑀯. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀺 𑀤𑁆𑀯𑀻𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑁂 ‘‘𑀅𑀳𑀁, 𑀪𑀦𑁆𑀢𑁂, 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑀺𑀁, 𑀦𑀸𑀦𑀸𑀧𑁆𑀧𑀓𑀸𑀭𑀓𑀜𑁆𑀘 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬 ‘‘𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀻’’𑀢𑀺 𑀲𑀩𑁆𑀩𑀢𑁆𑀣 𑀧𑀸𑀴𑀺𑀬𑀁 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸.

𑀏𑀢𑁆𑀢𑀸𑀯𑀢𑀸 𑀬𑀁 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀓𑀬𑀯𑀺𑀓𑁆𑀓𑀬𑀁 𑀧𑀭𑀺𑀳𑀭𑀦𑁆𑀢𑁂𑀦 𑀘𑀢𑀽𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀲𑀼 𑀏𑀓𑁂𑀓𑀲𑁆𑀫𑀺𑀁 𑀕𑀳𑀺𑀢𑁂 𑀅𑀝𑁆𑀞𑀫𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑁆𑀢𑀺 ‘‘𑀇𑀫𑀺𑀦𑀸 𑀇𑀤𑀁 𑀤𑁂𑀳𑀻’’𑀢𑀺 𑀕𑀳𑀺𑀢𑁂 𑀢𑁂𑀦𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. ‘‘𑀓𑀬𑀯𑀺𑀓𑁆𑀓𑀬𑀫𑁆𑀧𑀺 𑀦𑀻𑀳𑀭𑀺𑀢𑁆𑀯𑀸 𑀕𑀳𑀺𑀢𑁂 𑀤𑀼𑀓𑁆𑀓𑀝𑀁, 𑀘𑁂𑀢𑀸𑀧𑀺𑀢𑀭𑀽𑀧𑀺𑀬𑀕𑁆𑀕𑀳𑀡𑁂 𑀅𑀝𑁆𑀞𑀫𑁂𑀦, 𑀧𑀭𑀺𑀯𑀢𑁆𑀢𑀦𑁂 𑀦𑀯𑀫𑁂𑀦𑀸𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀓𑀧𑁆𑀧𑀺𑀬𑀯𑀲𑁂𑀦 𑀦𑀻𑀳𑀭𑀺𑀢𑁆𑀯𑀸 𑀧𑀜𑁆𑀘𑀳𑀺 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺, 𑀢𑀁 𑀯𑀺𑀲𑁄𑀥𑀺𑀢𑀁 𑀳𑁄𑀢𑀺. 𑀅𑀧𑀭𑀫𑁆𑀧𑀺 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁂 𑀅𑀲𑀢𑀺 𑀓𑀣𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀼𑀦𑁆𑀦𑀺𑀲𑁆𑀲𑀝𑁆𑀞𑀭𑀽𑀧𑀺𑀬𑀫𑁆𑀧𑀺 ‘𑀦 𑀙𑀟𑁆𑀟𑁂𑀢𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑁄 𑀉𑀧𑀸𑀲𑀓𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀘𑁂 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺, 𑀓𑀧𑁆𑀧𑀢𑀻’’𑀢𑀺, 𑀢𑀜𑁆𑀘 𑀤𑀼𑀯𑀼𑀢𑁆𑀢𑀁. 𑀦 𑀳𑀺 𑀕𑀳𑀺𑀢𑀢𑁆𑀢𑀸 𑀢𑀢𑁄 𑀅𑀜𑁆𑀜𑀁 𑀯𑀢𑁆𑀣𑀼 𑀳𑁄𑀢𑀺. 𑀧𑀼𑀦 𑀅𑀧𑀭𑀜𑁆𑀘 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀇𑀫𑀁 ‘𑀕𑀡𑁆𑀳𑀸𑀳𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀤𑀼𑀓𑁆𑀓𑀝𑀁, ‘𑀏𑀢𑀁 𑀤𑁂𑀳𑀻’𑀢𑀺 𑀯𑀤𑀦𑁆𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝’’𑀦𑁆𑀢𑀺, 𑀢𑀜𑁆𑀘 𑀤𑀼𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀧𑀬𑁄𑀕𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺.

𑀧𑀓𑀺𑀡𑁆𑀡𑀓𑀁 𑀦𑀺𑀝𑁆𑀞𑀺𑀢𑀁.

𑀏𑀴𑀓𑀮𑁄𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀧𑀢𑁆𑀢𑀯𑀕𑁆𑀕𑁄

𑁧. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑁂 𑀅𑀧𑀢𑁆𑀢𑀸, 𑀢𑀲𑁆𑀫𑀸 𑀏𑀢𑁂 𑀪𑀸𑀚𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸, 𑀦𑀅𑀥𑀺𑀝𑁆𑀞𑀸𑀦𑀽𑀧𑀕𑀸𑀦𑀯𑀺𑀓𑀧𑁆𑀧𑀦𑀽𑀧𑀕𑀢𑀸𑀢𑀺 𑀅𑀢𑁆𑀣𑁄𑀢𑀺 𑀘. 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀧𑀓𑁆𑀓𑀦𑁆𑀢𑀺 𑀅𑀬𑁄𑀧𑀢𑁆𑀢𑁄 𑀧𑀜𑁆𑀘𑀳𑀺 𑀧𑀸𑀓𑁂𑀳𑀺 𑀧𑀓𑁆𑀓𑁄 𑀳𑁄𑀢𑀺, 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀤𑁆𑀯𑀻𑀳𑀺. ‘‘𑀪𑀺𑀓𑁆𑀔𑀼𑀦𑀺𑀬𑀸 𑀧𑀢𑁆𑀢𑀲𑀦𑁆𑀦𑀺𑀘𑁆𑀘𑀬𑀲𑁆𑀲 𑀯𑀸𑀭𑀺𑀢𑀢𑁆𑀢𑀸 (𑀯𑀚𑀺𑀭. 𑀝𑀻. 𑀧𑀸𑀭𑀸𑀚𑀺𑀓 𑁬𑁦𑁨) 𑀪𑀺𑀓𑁆𑀔𑀼𑀲𑁆𑀲𑀧𑀺 𑀢𑀁 ‘𑀅𑀦𑀦𑀼𑀭𑀽𑀧’𑀦𑁆𑀢𑀺 𑀓𑀢𑁆𑀯𑀸 ‘𑀧𑀼𑀭𑀸𑀡𑀧𑀢𑁆𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘 𑀮𑀺𑀔𑀺𑀢𑀁, 𑀢𑀁 𑀦 𑀬𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀲𑀦𑁆𑀦𑀺𑀘𑁆𑀘𑀬𑀁 𑀓𑀭𑁂𑀬𑁆𑀬𑀸𑀢𑀺 𑀅𑀦𑀥𑀺𑀝𑁆𑀞𑀺𑀢𑁄 𑀅𑀯𑀺𑀓𑀧𑁆𑀧𑀺𑀢𑁄’’𑀢𑀺 (𑀧𑀸𑀘𑀺. 𑁭𑁩𑁫) 𑀯𑀼𑀢𑁆𑀢𑀢𑁆𑀢𑀸. 𑀲𑁄 𑀳𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁬 𑀆𑀤𑀬𑁄) 𑀦𑀺𑀘𑁆𑀘𑀬𑀲𑀦𑁆𑀦𑀺𑀥𑀺 𑀯𑀺𑀬 𑀏𑀓𑁄𑀧𑀺 𑀧𑀼𑀦𑀤𑀺𑀯𑀲𑁂 ‘‘𑀲𑀦𑁆𑀦𑀺𑀘𑁆𑀘𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀧𑀦 ‘‘𑀤𑀼𑀢𑀺𑀬𑁄 𑀯𑀸𑀭𑀺𑀢𑁄’’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦𑀺𑀬𑀢𑀁. 𑀢𑀲𑁆𑀫𑀸 𑀤𑁆𑀯𑁂 𑀧𑀢𑁆𑀢𑁂 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀺. 𑀲𑀘𑁂 𑀏𑀓𑀢𑁄 𑀅𑀥𑀺𑀝𑁆𑀞𑀸𑀢𑀺, 𑀤𑁆𑀯𑁂𑀧𑀺 𑀅𑀦𑀥𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀺. 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀥𑀺𑀝𑁆𑀞𑀸𑀢𑀺, 𑀤𑀼𑀢𑀺𑀬𑁄 𑀅𑀦𑀥𑀺𑀝𑁆𑀞𑀺𑀢𑁄. 𑀯𑀺𑀓𑀧𑁆𑀧𑁂𑀢𑀼𑀁 𑀧𑀦 𑀩𑀳𑀽𑀧𑀺 𑀮𑀪𑀢𑀺. 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺-𑀓𑀸𑀭𑁄 ‘‘𑀏𑀓𑀧𑀸𑀓𑀫𑁆𑀧𑀺 𑀚𑀦𑁂𑀢𑀻’’𑀢𑀺 𑀧𑀸𑀓𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀣 𑀯𑀸 𑀲𑀘𑁂 𑀏𑀓𑀧𑀸𑀓𑁂𑀦𑁂𑀯 𑀲𑀸𑀭𑀼𑀧𑁆𑀧𑁄, 𑀯𑀝𑁆𑀝𑀢𑀻𑀢𑀺 𑀧𑀸𑀓𑀧𑀭𑀺𑀫𑀸𑀡𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀧𑀢𑁆𑀢𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀽𑀧𑀕𑁄 𑀦 𑀳𑁄𑀢𑀺. 𑀅𑀧𑀘𑁆𑀘𑀼𑀤𑁆𑀥𑀭𑀦𑁆𑀢𑁂𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑁄𑀢𑀺 𑀧𑀼𑀭𑀸𑀡𑀧𑀢𑁆𑀢𑀁 𑀅𑀧𑀘𑁆𑀘𑀼𑀤𑁆𑀥𑀭𑀦𑁆𑀢𑁂𑀦 𑀲𑁄 𑀧𑀢𑁆𑀢𑁄 𑀯𑀺𑀓𑀧𑁆𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄𑀢𑀺 𑀮𑀺𑀔𑀺𑀢𑀁.

𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀯𑀸𑀭𑀺𑀢𑁂𑀢𑀺 𑀏𑀢𑁆𑀣 𑀲𑀗𑁆𑀖𑀯𑀲𑁂𑀦 𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀧𑀜𑁆𑀘𑀩𑀦𑁆𑀥𑀦𑁂𑀦𑁂𑀯 𑀯𑀝𑁆𑀝𑀢𑀺, 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦𑀸𑀧𑀺 𑀯𑀝𑁆𑀝𑀢𑀻𑀢𑀺 𑀮𑀺𑀔𑀺𑀢𑀁.

𑀬𑁄 𑀊𑀦𑀧𑀜𑁆𑀘𑀩𑀦𑁆𑀥𑀦𑀢𑁆𑀣𑀁, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀓𑀭𑁄 𑀲𑁄;

𑀊𑀦𑀧𑀜𑁆𑀘𑀩𑀦𑁆𑀥𑀦𑀢𑁆𑀣𑀁, 𑀧𑀢𑁆𑀯𑀸𑀦 𑀲𑀦𑁆𑀢𑀺𑀓𑁂.

𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀧𑀝𑀺𑀲𑀸𑀬𑀦𑀻𑀬𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀯𑀤𑀦𑁆𑀢𑁂𑀦 𑀧𑀸𑀤𑀫𑀓𑁆𑀔𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀻’’𑀢𑀺 𑀯𑀘𑀦𑁂𑀦 𑀬𑁂𑀲𑀁 𑀫𑀁𑀲𑀁 𑀦 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺𑀆𑀤𑀺 𑀦 𑀓𑀧𑁆𑀧𑀢𑀻𑀢𑀺 𑀯𑀤𑀦𑁆𑀢𑀸 𑀅𑀚𑀸𑀦𑀺𑀢𑁆𑀯𑀸 𑀯𑀤𑀦𑁆𑀢𑀺. 𑀬𑁂𑀲𑀜𑁆𑀳𑀺 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀻𑀢𑀺𑀆𑀤𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀣𑀸 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁𑀬𑁂𑀯 𑀔𑀻𑀭𑀸𑀤𑀺 𑀧𑀡𑀻𑀢𑀪𑁄𑀚𑀦𑀁, 𑀦𑁂𑀢𑀭𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀦𑁆𑀢𑀺. 𑀫𑀥𑀼 𑀦𑀸𑀫 𑀫𑀥𑀼𑀓𑀭𑀺𑀪𑀫𑀭𑀫𑀓𑁆𑀔𑀺𑀓𑀸𑀦𑀁 𑀆𑀲𑀬𑁂𑀲𑀼 𑀦𑀺𑀬𑁆𑀬𑀸𑀲𑀲𑀤𑀺𑀲𑀁 𑀫𑀳𑀸𑀫𑀥𑀼 𑀳𑁄𑀢𑀺, 𑀢𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀘 𑀮𑀺𑀔𑀺𑀢𑀁.

𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.