𑁧. 𑀧𑀞𑀫𑀸𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑀺𑀬𑀢𑁂 𑀆𑀤𑀺𑀢𑁄𑀯 𑀇𑀤𑀁 𑀧𑀓𑀺𑀡𑁆𑀡𑀓𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀤𑀁 𑀅𑀦𑀺𑀬𑀢𑀓𑀡𑁆𑀟𑀁 𑀦𑀺𑀧𑁆𑀧𑀬𑁄𑀚𑀦𑀁 𑀢𑀢𑁆𑀣 𑀅𑀧𑀼𑀩𑁆𑀩𑀸𑀪𑀸𑀯𑀢𑁄𑀢𑀺 𑀘𑁂? 𑀦, 𑀕𑀭𑀼𑀓𑀮𑀳𑀼𑀓𑀪𑁂𑀤𑀪𑀺𑀦𑁆𑀦𑀸𑀧𑀢𑁆𑀢𑀺𑀭𑁄𑀧𑀦𑀸𑀭𑁄𑀧𑀦𑀓𑁆𑀓𑀫𑀮𑀓𑁆𑀔𑀡𑀤𑀻𑀧𑀦𑀧𑁆𑀧𑀬𑁄𑀚𑀦𑀢𑁄. 𑀏𑀢𑁆𑀣 𑀳𑀺 ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑁄 𑀫𑀬𑀸…𑀧𑁂… 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄’’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁪𑁬) 𑀆𑀧𑀢𑁆𑀢𑀺𑀬𑀸 𑀕𑀭𑀼𑀓𑀸𑀬, 𑀮𑀳𑀼𑀓𑀸𑀬 𑀘 𑀆𑀭𑁄𑀧𑀦𑀓𑁆𑀓𑀫𑀮𑀓𑁆𑀔𑀡𑀁, ‘‘𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀅𑀦𑀸𑀭𑁄𑀧𑀦𑀓𑁆𑀓𑀫𑀮𑀓𑁆𑀔𑀡𑀜𑁆𑀘 𑀤𑀲𑁆𑀲𑀺𑀢𑀁. 𑀮𑀓𑁆𑀔𑀡𑀤𑀻𑀧𑀦𑀢𑁄 𑀆𑀤𑀺𑀫𑁆𑀳𑀺, 𑀅𑀦𑁆𑀢𑁂 𑀯𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀅𑀲𑀫𑁆𑀪𑀯𑀢𑁄. 𑀓𑀣𑀁 𑀦 𑀢𑀸𑀯 𑀆𑀤𑀺𑀫𑁆𑀳𑀺 𑀲𑀫𑁆𑀪𑀯𑀢𑀺, 𑀬𑁂𑀲𑀫𑀺𑀤𑀁 𑀮𑀓𑁆𑀔𑀡𑀁, 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀤𑀲𑁆𑀲𑀺𑀢𑀢𑁆𑀢𑀸. 𑀦 𑀅𑀦𑁆𑀢𑁂 𑀕𑀭𑀼𑀓𑀫𑀺𑀲𑁆𑀲𑀓𑀢𑁆𑀢𑀸. 𑀢𑀲𑁆𑀫𑀸 𑀕𑀭𑀼𑀓𑀮𑀳𑀼𑀓𑀸𑀦𑀁 𑀫𑀚𑁆𑀛𑁂 𑀏𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑀁 𑀅𑀭𑀳𑀢𑀺 𑀉𑀪𑀬𑀫𑀺𑀲𑁆𑀲𑀓𑀢𑁆𑀢𑀸. 𑀬𑀸 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀲𑀗𑁆𑀔𑀸𑀢𑀸 𑀮𑀳𑀼𑀓𑀸𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀲𑀸𑀧𑀺 𑀕𑀭𑀼𑀓𑀸𑀢𑀺 𑀓𑀣𑀺𑀢𑀸. 𑀢𑁂𑀦𑁂𑀯𑀸𑀳 ‘‘𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀭𑀳𑀲𑁆𑀲𑀸𑀤𑁂𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀸 𑀕𑀭𑀼𑀓𑀸𑀦𑀁 𑀏𑀯 𑀅𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀦𑁆𑀢𑀺𑀧𑀺 𑀏𑀓𑁂. 𑀏𑀯𑀁 𑀲𑀢𑀺 𑀧𑀞𑀫𑀸𑀦𑀺𑀬𑀢𑀫𑁂𑀯𑀸𑀮𑀁 𑀢𑀸𑀯𑀢𑀸 𑀮𑀓𑁆𑀔𑀡𑀤𑀻𑀧𑀦𑀲𑀺𑀤𑁆𑀥𑀺𑀢𑁄, 𑀓𑀺𑀁 𑀤𑀼𑀢𑀺𑀬𑁂𑀦𑀸𑀢𑀺 𑀘𑁂? 𑀦, 𑀑𑀓𑀸𑀲𑀦𑀺𑀬𑀫𑀧𑀘𑁆𑀘𑀬𑀫𑀺𑀘𑁆𑀙𑀸𑀕𑀸𑀳𑀦𑀺𑀯𑀸𑀭𑀡𑀧𑁆𑀧𑀬𑁄𑀚𑀦𑀢𑁄. ‘‘𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂’’𑀢𑀺 𑀑𑀓𑀸𑀲𑀦𑀺𑀬𑀫𑀢𑁄 𑀳𑀺 𑀢𑀩𑁆𑀩𑀺𑀧𑀭𑀻𑀢𑁂 𑀑𑀓𑀸𑀲𑁂 𑀇𑀤𑀁 𑀮𑀓𑁆𑀔𑀡𑀁 𑀦 𑀯𑀺𑀓𑀧𑁆𑀧𑀺𑀢𑀦𑁆𑀢𑀺 𑀫𑀺𑀘𑁆𑀙𑀸𑀕𑀸𑀳𑁄 𑀳𑁄𑀢𑀺. 𑀢𑀁𑀦𑀺𑀯𑀸𑀭𑀡𑀢𑁄 𑀤𑀼𑀢𑀺𑀬𑀸𑀦𑀺𑀬𑀢𑀫𑁆𑀧𑀺 𑀲𑀸𑀢𑁆𑀣𑀓𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸? 𑀑𑀓𑀸𑀲𑀪𑁂𑀤𑀢𑁄, 𑀭𑀳𑁄𑀪𑁂𑀤𑀤𑀻𑀧𑀦𑀢𑁄, 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑀪𑁂𑀤𑀤𑀻𑀧𑀦𑀢𑁄. 𑀑𑀓𑀸𑀲𑀦𑀺𑀬𑀫𑀪𑀸𑀯𑁂 𑀘 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑀪𑁂𑀤𑁄 𑀚𑀸𑀢𑁄. 𑀤𑁆𑀯𑀺𑀦𑁆𑀦𑀁 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀸𑀦𑀸𑀢𑁆𑀢𑀚𑀸𑀦𑀦𑀜𑁆𑀘 𑀲𑀺𑀬𑀸 𑀢𑀣𑀸 𑀓𑀸𑀬𑀲𑀁𑀲𑀕𑁆𑀕𑀪𑁂𑀤𑀤𑀻𑀧𑀦𑀢𑁄. 𑀦𑀸𑀮𑀁 𑀓𑀫𑁆𑀫𑀦𑀺𑀬𑁂𑀧𑀺 𑀳𑀺 𑀑𑀓𑀸𑀲𑁂 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂, 𑀧𑀝𑀺𑀘𑁆𑀙𑀦𑁆𑀦𑁂𑀧𑀺 𑀯𑀸 𑀦𑀺𑀲𑀺𑀦𑁆𑀦𑀸𑀬 𑀯𑀸𑀢𑀧𑀸𑀦𑀓𑀯𑀸𑀝𑀘𑁆𑀙𑀺𑀤𑁆𑀤𑀸𑀤𑀻𑀳𑀺 𑀦𑀺𑀓𑁆𑀔𑀦𑁆𑀢𑀓𑁂𑀲𑀸𑀤𑀺𑀕𑁆𑀕𑀳𑀡𑁂𑀦 𑀓𑀸𑀬𑀲𑀁𑀲𑀕𑁆𑀕𑁄 𑀮𑀩𑁆𑀪𑀢𑀻𑀢𑀺 𑀏𑀯𑀫𑀸𑀤𑀬𑁄𑀧𑀺 𑀦𑀬𑀸 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁 𑁋 𑀑𑀓𑀸𑀲𑀪𑁂𑀤𑀢𑁄𑀢𑀺 𑀅𑀮𑀁𑀓𑀫𑁆𑀫𑀦𑀺𑀬𑀦𑀸𑀮𑀁𑀓𑀫𑁆𑀫𑀦𑀺𑀬𑀪𑁂𑀤𑀢𑁄. 𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀳𑀺 𑀏𑀓𑀘𑁆𑀘𑀁 𑀦𑀸𑀮𑀁𑀓𑀫𑁆𑀫𑀦𑀺𑀬𑀁 𑀯𑀸𑀢𑀧𑀸𑀦𑀸𑀤𑀺𑀦𑀸 𑀅𑀦𑁆𑀢𑀭𑀺𑀢𑀢𑁆𑀢𑀸, 𑀉𑀪𑀬𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 𑀏𑀓𑀘𑁆𑀘𑀁 𑀦𑀸𑀮𑀁𑀓𑀫𑁆𑀫𑀦𑀺𑀬𑀁 𑀯𑀺𑀚𑀸𑀦𑀢𑀁 𑀅𑀚𑁆𑀛𑁄𑀓𑀸𑀲𑀢𑁆𑀢𑀸. 𑀭𑀳𑁄𑀪𑁂𑀤𑀤𑀻𑀧𑀦𑀢𑁄𑀢𑀺 𑀏𑀢𑁆𑀣 𑀭𑀳𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀭𑀳𑁄 𑀤𑁆𑀯𑀺𑀥𑀸 𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀪𑁂𑀤𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑀪𑁂𑀤𑀤𑀻𑀧𑀦𑀢𑁄𑀢𑀺 𑀫𑁂𑀣𑀼𑀦𑀲𑁆𑀲𑀸𑀤𑀯𑀲𑁂𑀦 𑀦𑀺𑀲𑀚𑁆𑀚𑀸, 𑀤𑀼𑀝𑁆𑀞𑀼𑀮𑁆𑀮𑀲𑁆𑀲𑀸𑀤𑀯𑀲𑁂𑀦 𑀦𑀺𑀲𑀚𑁆𑀚𑀸𑀢𑀺 𑀢𑀸𑀤𑀺𑀲𑀲𑁆𑀲 𑀪𑁂𑀤𑀲𑁆𑀲 𑀤𑀻𑀧𑀦𑀢𑁄𑀢𑀺 𑀅𑀢𑁆𑀣𑁄. ‘‘𑀇𑀥 𑀆𑀕𑀢𑀦𑀬𑀢𑁆𑀢𑀸 𑀪𑀺𑀓𑁆𑀔𑀼𑀦𑀺𑀧𑀸𑀢𑀺𑀫𑁄𑀓𑁆𑀔𑁂 𑀇𑀤𑀁 𑀓𑀡𑁆𑀟𑀁 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺 𑀏𑀓𑁂, 𑀢𑀁 𑀅𑀦𑁂𑀓𑀦𑁆𑀢𑀪𑀸𑀯𑀤𑀻𑀧𑀦𑀢𑁄 𑀅𑀬𑀼𑀢𑁆𑀢𑀁. 𑀲𑀩𑁆𑀩𑀩𑀼𑀤𑁆𑀥𑀓𑀸𑀮𑁂 𑀳𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘, 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑁆𑀢𑀸𑀭𑁄 𑀘 𑀉𑀤𑁆𑀤𑁂𑀲𑀸 𑀲𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺𑀬𑀸 𑀅𑀲𑀸𑀥𑀸𑀭𑀡𑀢𑁆𑀢𑀸 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀧𑀸𑀘𑀺𑀢𑁆𑀢𑀺𑀬𑀸𑀦𑀦𑁆𑀢𑀺 𑀏𑀓𑁂. 𑀢𑀸𑀲𑀜𑁆𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓 (𑀧𑀸𑀘𑀺. 𑁬𑁫𑁮) -𑀅𑀝𑁆𑀞𑀯𑀢𑁆𑀣𑀼𑀓 (𑀧𑀸𑀘𑀺. 𑁬𑁭𑁫) -𑀯𑀲𑁂𑀦 𑀓𑀸𑀬𑀲𑀁𑀲𑀕𑁆𑀕𑀯𑀺𑀲𑁂𑀲𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼, ‘‘𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬, 𑀓𑀸𑀬𑀁 𑀯𑀸 𑀢𑀤𑀢𑁆𑀣𑀸𑀬 𑀉𑀧𑀲𑀁𑀳𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀘𑀦𑀢𑁄 𑀲𑀸𑀤𑀺𑀬𑀦𑀫𑁆𑀧𑀺, ‘‘𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀘𑀦𑀢𑁄 𑀞𑀸𑀦𑀫𑁆𑀧𑀺, ‘‘𑀲𑀗𑁆𑀓𑁂𑀢𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀘𑀦𑀢𑁄 𑀕𑀫𑀦𑀫𑁆𑀧𑀺, ‘‘𑀙𑀦𑁆𑀦𑀁 𑀯𑀸 𑀅𑀦𑀼𑀧𑀯𑀺𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀘𑀦𑀢𑁄 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀧𑁆𑀧𑀯𑁂𑀲𑁄𑀧𑀺 𑀳𑁄𑀢𑀺, 𑀢𑀣𑀸 ‘‘𑀭𑀢𑁆𑀢𑀦𑁆𑀥𑀓𑀸𑀭𑁂 𑀅𑀧𑁆𑀧𑀤𑀻𑀧𑁂, 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀅𑀚𑁆𑀛𑁄𑀓𑀸𑀲𑁂 𑀏𑀓𑁂𑀦𑁂𑀓𑀸 𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸 𑀲𑀮𑁆𑀮𑀧𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁮𑁩𑁯) 𑀯𑀘𑀦𑀢𑁄 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀓𑀦𑁆𑀢𑀺 𑀓𑀢𑁆𑀯𑀸 𑀢𑀸𑀲𑀁 𑀅𑀜𑁆𑀜𑀣𑀸 𑀅𑀦𑀺𑀬𑀢𑀓𑀡𑁆𑀟𑀲𑁆𑀲 𑀅𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀺𑀢𑁄 𑀦 𑀯𑀼𑀢𑁆𑀢𑀦𑁆𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀧𑀓𑀺𑀡𑁆𑀡𑀓𑀁.

‘‘𑀤𑁂𑀲𑀦𑀸𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀦𑀁 𑀆𑀧𑀢𑁆𑀢𑀻𑀦𑀁 𑀯𑀲𑁂𑀦 𑀅𑀮𑀚𑁆𑀚𑀺𑀆𑀤𑀬𑁄 𑀮𑀚𑁆𑀚𑀻𑀦𑀁 𑀘𑁄𑀤𑁂𑀲𑁆𑀲𑀦𑁆𑀢𑀻’’𑀢𑀺 𑀆𑀕𑀢𑀢𑁆𑀢𑀸 𑀮𑀚𑁆𑀚𑀺𑀧𑀕𑁆𑀕𑀳𑀢𑁆𑀣𑀸𑀬 𑀧𑀢𑀺𑀭𑀽𑀧𑀸𑀬𑀧𑀺 𑀉𑀧𑀸𑀲𑀺𑀓𑀸𑀬 𑀯𑀘𑀦𑁂𑀦 𑀅𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑀦𑁆𑀢𑀺 𑀆𑀧𑀢𑁆𑀢𑀺𑀬𑁄 𑀧𑀦 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀧𑀜𑁆𑀜𑀢𑁆𑀢𑀁 𑀯𑀺𑀢𑁆𑀣𑀸𑀭𑀦𑀬𑀫𑁂𑀯 𑀕𑀳𑁂𑀢𑁆𑀯𑀸 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁 ‘‘𑀇𑀫𑁂 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁄 𑀤𑁆𑀯𑁂 𑀅𑀦𑀺𑀬𑀢𑀸 𑀥𑀫𑁆𑀫𑀸’’𑀢𑀺 (𑀧𑀸𑀭𑀸. 𑁪𑁪𑁩) 𑀉𑀤𑁆𑀤𑁂𑀲𑀤𑀲𑁆𑀲𑀦𑀢𑁆𑀢𑀸𑀢𑀺 𑀮𑀺𑀔𑀺𑀢𑀁. 𑀲𑁄𑀢𑀲𑁆𑀲 𑀭𑀳𑁄𑀢𑀺 𑀏𑀢𑁆𑀣 𑀭𑀳𑁄𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀤𑀼𑀝𑁆𑀞𑀼𑀮𑁆𑀮𑀲𑀸𑀫𑀜𑁆𑀜𑀢𑁄 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀸𑀭𑀸𑀚𑀺𑀓𑀯𑀘𑀦𑀁 𑀯𑀺𑀬. 𑀢𑀲𑁆𑀫𑀸 ‘‘𑀘𑀓𑁆𑀔𑀼𑀲𑁆𑀲𑁂𑀯 𑀧𑀦 𑀭𑀳𑁄 ‘𑀭𑀳𑁄’𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫…𑀧𑁂… 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸’’𑀢𑀺 (𑀧𑀸𑀭𑀸. 𑁪𑁪𑁫) 𑀯𑀼𑀢𑁆𑀢𑀢𑁆𑀢𑀸 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀻𑀧𑀺𑀢𑀫𑁂𑀯𑀸𑀢𑀺. 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀧𑀺𑀳𑀺𑀢𑀓𑀯𑀸𑀝𑀲𑁆𑀲 𑀕𑀩𑁆𑀪𑀲𑁆𑀲 𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄𑀧𑀻𑀢𑀺 𑀅𑀢𑁆𑀣𑁄. 𑀅𑀘𑁂𑀮𑀓𑀯𑀕𑁆𑀕𑁂 𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁨𑁮𑁮) ‘‘𑀬𑁄 𑀓𑁄𑀘𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄 𑀳𑁄𑀢𑀻’’𑀢𑀺 𑀇𑀫𑀲𑁆𑀲 𑀅𑀦𑀼𑀭𑀽𑀧𑀢𑁄 ‘‘𑀇𑀢𑁆𑀣𑀻𑀦𑀁 𑀧𑀦 𑀲𑀢𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀮𑀁𑀓𑀫𑁆𑀫𑀦𑀺𑀬𑁂𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁪𑁫) 𑀯𑀺𑀪𑀗𑁆𑀕𑁂 𑀯𑀘𑀦𑀢𑁄 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁄 𑀘𑁂𑀢𑁆𑀣 𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑁄, 𑀦 𑀤𑀼𑀢𑀺𑀬𑁂 𑀯𑀺𑀬 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀓𑀺𑀮𑁂𑀲𑁄. 𑀢𑀲𑁆𑀫𑀸 𑀘 𑀧𑀜𑁆𑀜𑀸𑀬𑀢𑀺 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀥𑀺𑀧𑁆𑀧𑁂𑀢𑁄𑀢𑀺.

𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀤𑁂𑀬𑁆𑀬𑀸𑀢𑀺 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀢𑀲𑁆𑀲𑀸𑀦𑀼𑀲𑀸𑀭𑁂𑀦 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀅𑀯𑀢𑁆𑀯𑀸 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀬𑀧𑀺 𑀆𑀧𑀢𑁆𑀢𑀺𑀬𑀸 𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀼𑀦 𑀆𑀧𑀢𑁆𑀢𑀺𑀧𑁆𑀧𑀝𑀺𑀚𑀸𑀦𑀦𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 ‘‘𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄’’𑀢𑀺 𑀯𑀢𑁆𑀣𑀼𑀧𑁆𑀧𑀝𑀺𑀚𑀸𑀦𑀦𑀁 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀆𑀧𑀢𑁆𑀢𑀺𑀬𑀸 𑀘𑁄𑀤𑀺𑀢𑁂 𑀯𑀺𑀦𑀬𑀥𑀭𑁂𑀦 ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁂 𑀘𑀼𑀤𑀺𑀢𑀓𑁂𑀦 ‘‘𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑀯𑀺𑀦𑀬𑀥𑀭𑁂𑀦 ‘‘𑀈𑀤𑀺𑀲𑀁 𑀦𑀸𑀫 𑀅𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁂 𑀲𑁄 𑀯𑀢𑁆𑀣𑀼𑀁 𑀧𑀝𑀺𑀚𑀸𑀦𑀫𑀸𑀦𑁄𑀯 𑀓𑀸𑀭𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀫𑀸𑀦𑁄𑀧𑀺 𑀆𑀧𑀢𑁆𑀢𑀺𑀬𑀸𑀯 𑀓𑀸𑀭𑁂𑀢𑀩𑁆𑀩𑁄𑀢𑀺? 𑀅𑀦𑀼𑀭𑀽𑀧𑀫𑁂𑀯. 𑀏𑀯𑀁 𑀧𑀦 𑀕𑀳𑁂𑀢𑀩𑁆𑀩𑀁 𑁋 𑀢𑀺𑀡𑁆𑀡𑀫𑁆𑀧𑀺 𑀆𑀧𑀢𑁆𑀢𑀻𑀦𑀁 𑀯𑀢𑁆𑀣𑀽𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 𑀇𑀥 𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀦𑀺𑀲𑀚𑁆𑀚𑀫𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀕𑀳𑀺𑀢𑁂𑀧𑀺 𑀳𑀺 𑀆𑀧𑀢𑁆𑀢𑀺 𑀕𑀳𑀺𑀢𑀸𑀯 𑀳𑁄𑀢𑀻𑀢𑀺. 𑀬𑁂𑀦 𑀯𑀸 𑀲𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 ‘‘𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄 𑀯𑀸’’𑀢𑀺 𑀬𑁄𑀚𑁂𑀢𑀩𑁆𑀩𑁄. 𑀲𑁄 𑀘 𑀯𑀺𑀓𑀧𑁆𑀧𑀢𑁆𑀣𑁄. 𑀢𑀲𑁆𑀫𑀸 ‘‘𑀓𑀸𑀭𑁂𑀢𑀩𑁆𑀩𑁄 𑀯𑀸 𑀧𑀝𑀺𑀚𑀸𑀦𑀫𑀸𑀦𑁄, 𑀦 𑀯𑀸 𑀓𑀸𑀭𑁂𑀢𑀩𑁆𑀩𑁄 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄’’𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀝𑀺𑀚𑀸𑀦𑀫𑀸𑀦𑁄 𑀯𑀸’’𑀢𑀺𑀆𑀤𑀺. 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀦𑀺𑀲𑀚𑁆𑀚𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀲𑁂𑀲𑁂𑀲𑀼𑀧𑀺 𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀆𑀧𑀢𑁆𑀢𑀺 𑀕𑀳𑁂𑀢𑀩𑁆𑀩𑀸. ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀸𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀤𑀼𑀝𑁆𑀞𑀼𑀮𑁆𑀮𑁄𑀪𑀸𑀲𑀦𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀞𑀫𑀸𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.