𑀲𑁂𑀔𑀺𑀬𑀓𑀡𑁆𑀟𑀁

𑀲𑁂𑀔𑀺𑀬𑁂𑀲𑀼 𑀲𑀢𑀺𑀧𑀺 𑀯𑀻𑀢𑀺𑀓𑁆𑀓𑀫𑁂 𑀅𑀦𑀸𑀤𑀭𑀺𑀬𑀸𑀧𑁂𑀓𑁆𑀔𑀲𑁆𑀲𑁂𑀯 𑀆𑀧𑀢𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀸𑀭𑀓𑁄 𑀦 𑀯𑀼𑀢𑁆𑀢𑁄. 𑀅𑀬𑀜𑁆𑀳𑀺 𑀯𑀺𑀦𑀬𑀥𑀫𑁆𑀫𑀢𑀸, 𑀬𑀤𑀺𑀤𑀁 𑀲𑀸𑀧𑁂𑀓𑁆𑀔𑁂 𑀓𑀸𑀭𑀓𑀦𑀺𑀤𑁆𑀤𑁂𑀲𑁄, 𑀲𑁄 𑀯𑀼𑀢𑁆𑀢𑀦𑀺𑀬𑀫𑁂 𑀯𑀺𑀥𑀺, 𑀪𑀼𑀫𑁆𑀫𑀓𑀭𑀡𑀜𑁆𑀘. 𑀅𑀝𑁆𑀞𑀗𑁆𑀕𑀼𑀮𑀸𑀥𑀺𑀓𑀫𑁆𑀧𑀺 𑀑𑀢𑀸𑀭𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁄 𑀧𑀭𑀁 𑀑𑀢𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀆𑀭𑀸𑀫𑁂 𑀯𑀸𑀢𑀺 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑁂. 𑀧𑀸𑀭𑀼𑀧𑀺𑀢𑀩𑁆𑀩𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀁.

𑀞𑀢𑁆𑀯𑀸𑀢𑀺 𑀏𑀢𑁆𑀣 𑀕𑀘𑁆𑀙𑀦𑁆𑀢𑁄𑀧𑀺 𑀧𑀭𑀺𑀲𑁆𑀲𑀬𑀸𑀪𑀸𑀯𑀁 𑀑𑀮𑁄𑀓𑁂𑀢𑀼𑀁 𑀮𑀪𑀢𑀺𑀬𑁂𑀯𑀸𑀢𑀺 (𑀯𑀚𑀺𑀭. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁫𑁮𑁨) 𑀮𑀺𑀔𑀺𑀢𑀁. 𑀬𑀣𑀸 𑀯𑀸𑀲𑀽𑀧𑀕𑀢𑀲𑁆𑀲 𑀅𑀦𑁆𑀢𑀭𑀖𑀭𑁂 𑀓𑀸𑀬𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀣𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀦𑁆𑀢𑀼𑀓𑀸𑀫𑀲𑁆𑀲𑀧𑀺 𑀓𑀸𑀬𑀩𑀦𑁆𑀥𑀦𑀁 𑀅𑀩𑀦𑁆𑀥𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀕𑀸𑀫𑀧𑁆𑀧𑀯𑁂𑀲𑀦𑀫𑀦𑀸𑀭𑁄𑀘𑁂𑀢𑁆𑀯𑀸 𑀬𑀣𑀸𑀓𑀸𑀫𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀅𑀤𑁆𑀥𑀸𑀦𑀫𑀕𑁆𑀕𑀕𑀫𑀦𑀓𑀸𑀮𑁂 𑀏𑀓𑁄 𑀪𑀺𑀓𑁆𑀔𑀼 𑀕𑀸𑀫𑀧𑁆𑀧𑀯𑁂𑀲𑀦𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀁 𑀆𑀯𑀲𑀣𑀁 𑀧𑀼𑀭𑀢𑁄𑀯 𑀞𑀺𑀢𑀁 𑀧𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀢𑁆𑀯𑀸 𑀯𑀸𑀲𑀽𑀧𑀕𑀢𑁄 𑀘𑁂 𑀳𑁄𑀢𑀺, 𑀇𑀢𑀭𑁂𑀳𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀓𑁄 𑀧𑀦 𑀯𑀸𑀤𑁄 𑀘𑀢𑀽𑀳𑀧𑀜𑁆𑀘𑀸𑀳𑀁 𑀯𑀸𑀲𑀫𑀥𑀺𑀝𑁆𑀞𑀸𑀬 𑀯𑀲𑀺𑀢𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀜𑁆𑀘 𑀯𑀸𑀲𑀽𑀧𑀕𑀢𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀜𑁆𑀘 𑀯𑀝𑁆𑀝𑀢𑀻𑀢𑀺. 𑀩𑀼𑀤𑁆𑀥𑀧𑀽𑀚𑀫𑁆𑀧𑀺 𑀬𑀣𑀸𑀲𑀼𑀔𑀁 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀸𑀧𑀢𑁆𑀢𑀺 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀢𑀳𑀁 𑀢𑀳𑀁 𑀑𑀮𑁄𑀓𑁂𑀢𑀻’’𑀢𑀺. 𑀢𑀢𑁆𑀣 𑀓𑀸𑀭𑀡𑀁 𑀦𑀸𑀫 𑀆𑀫𑀺𑀲𑀧𑀽𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀮𑀺𑀔𑀺𑀢𑀁.

𑀙𑀩𑁆𑀩𑀻𑀲𑀢𑀺𑀲𑀸𑀭𑀼𑀧𑁆𑀧𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀲𑁆𑀫𑀸 ‘‘𑀲𑀫𑀢𑀺𑀢𑁆𑀢𑀺𑀓𑁄 𑀧𑀺𑀡𑁆𑀟𑀧𑀸𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 (𑀧𑀸𑀘𑀺. 𑁬𑁦𑁨-𑁬𑁦𑁩) 𑀯𑀘𑀦𑀁 𑀧𑀺𑀡𑁆𑀟𑀧𑀸𑀢𑁄 𑀲𑀫𑀧𑀼𑀡𑁆𑀡𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑁂 𑀧𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑁄 𑀤𑀺𑀬𑁆𑀬𑀫𑀸𑀦𑁄 𑀣𑀽𑀧𑀻𑀓𑀢𑁄𑀧𑀺 𑀘𑁂 𑀳𑁄𑀢𑀺, 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑁄 𑀳𑁄𑀢𑀺. 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑁂 𑀉𑀧𑁆𑀧𑀦𑁆𑀦𑁂 𑀧𑀼𑀦 𑀉𑀕𑁆𑀕𑀺𑀭𑀺𑀢𑀼𑀓𑀸𑀫𑀲𑁆𑀲𑀸𑀧𑀺 𑀲𑀳𑀲𑀸 𑀘𑁂 𑀧𑀯𑀺𑀲𑀢𑀺, 𑀏𑀢𑁆𑀣 𑀅𑀲𑀜𑁆𑀘𑀺𑀘𑁆𑀘 𑀪𑀼𑀜𑁆𑀚𑀢𑀺 𑀦𑀸𑀫. 𑀯𑀺𑀜𑁆𑀜𑀢𑁆𑀢𑀺𑀓𑀢𑀜𑁆𑀘 𑀅𑀓𑀢𑀜𑁆𑀘 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁 𑀲𑀳𑀲𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀅𑀲𑁆𑀲𑀢𑀺𑀬𑀸 𑀪𑀼𑀜𑁆𑀚𑀢𑀺 𑀦𑀸𑀫.

𑀲𑀬𑀁 𑀬𑀸𑀦𑀕𑀢𑁄 𑀳𑀼𑀢𑁆𑀯𑀸, 𑀬𑀣𑀸 𑀬𑀸𑀦𑀕𑀢𑀲𑁆𑀲 𑀘𑁂;

𑀅𑀮𑀁 𑀯𑀢𑁆𑀣𑀼𑀁 𑀢𑀣𑀸 𑀦𑀸𑀮𑀁, 𑀲𑀙𑀢𑁆𑀢𑁄 𑀙𑀢𑁆𑀢𑀧𑀸𑀡𑀺𑀦𑁄.

‘‘𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀮𑁄𑀓𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀅𑀓𑀼𑀲𑀮𑀘𑀺𑀢𑁆𑀢𑀁, 𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀧𑀸𑀞𑁄.

𑀲𑁂𑀔𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲