𑁭. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀦𑀺𑀲𑀻𑀤𑀦𑀦𑁆𑀢𑀺 𑀲𑀦𑁆𑀣𑀢𑀲𑀤𑀺𑀲𑀁 𑀲𑀦𑁆𑀣𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀲𑀼𑀕𑀢𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀨𑀸𑀮𑁂𑀢𑁆𑀯𑀸 𑀓𑀢𑀸𑀳𑀺 𑀢𑀻𑀳𑀺 𑀤𑀲𑀸𑀳𑀺 𑀬𑀼𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲𑁂𑀢𑀁 𑀦𑀸𑀫𑀁.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀅𑀧𑁆𑀧𑀫𑀸𑀡𑀺𑀓𑀸𑀦𑀺 𑀦𑀺𑀲𑀻𑀤𑀦𑀸𑀦𑀺 𑀥𑀸𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀤𑀲𑀸 𑀯𑀺𑀤𑀢𑁆𑀣𑀻’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀧𑀫𑀸𑀡𑀺𑀓𑀁 𑀯𑀸 𑀊𑀦𑀓𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲, 𑀅𑀜𑁆𑀜𑁂𑀦 𑀓𑀢𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲, 𑀯𑀺𑀢𑀸𑀦𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀦𑀺𑀲𑀻𑀤𑀦𑀲𑁆𑀲 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀢𑀸, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀭𑀡𑀁 𑀯𑀸 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.