𑁭. 𑀲𑀧𑁆𑀧𑀸𑀡𑀓𑀯𑀕𑁆𑀕𑁄

𑁧. 𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀧𑁆𑀧𑀸𑀡𑀓𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀸𑀡𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀧𑀸𑀡𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀁 𑀔𑀼𑀤𑁆𑀤𑀓𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀫𑀸𑀭𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀫𑁂𑀯, 𑀫𑀳𑀦𑁆𑀢𑁂 𑀧𑀦 𑀉𑀧𑀓𑁆𑀓𑀫𑀫𑀳𑀦𑁆𑀢𑀢𑀸𑀬 𑀅𑀓𑀼𑀲𑀮𑀁 𑀫𑀳𑀦𑁆𑀢𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁, 𑀧𑀸𑀡𑁂 𑀯𑁂𑀫𑀢𑀺𑀓𑀲𑁆𑀲, 𑀅𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄, 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀅𑀧𑀸𑀡𑀲𑀜𑁆𑀜𑀺𑀲𑁆𑀲, 𑀅𑀲𑀜𑁆𑀘𑀺𑀘𑁆𑀘, 𑀅𑀚𑀸𑀦𑀦𑁆𑀢𑀲𑁆𑀲, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀲𑀧𑁆𑀧𑀸𑀡𑀓𑀦𑁆𑀢𑀺 𑀬𑁂 𑀧𑀸𑀡𑀓𑀸 𑀧𑀭𑀺𑀪𑁄𑀕𑁂𑀦 𑀫𑀭𑀦𑁆𑀢𑀺, 𑀢𑁂𑀳𑀺 𑀲𑀧𑁆𑀧𑀸𑀡𑀓𑀁, 𑀢𑀸𑀤𑀺𑀲𑀜𑁆𑀳𑀺 𑀚𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀚𑀸𑀦𑀁 𑀲𑀧𑁆𑀧𑀸𑀡𑀓𑀁 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣 𑀲𑀺𑀜𑁆𑀘𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀬𑀣𑀸𑀥𑀫𑁆𑀫𑀦𑁆𑀢𑀺 𑀬𑁄 𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑀸𑀬 𑀥𑀫𑁆𑀫𑁄 𑀯𑀼𑀢𑁆𑀢𑁄, 𑀢𑁂𑀦𑁂𑀯 𑀥𑀫𑁆𑀫𑁂𑀦. 𑀦𑀺𑀳𑀢𑀸𑀥𑀺𑀓𑀭𑀡𑀦𑁆𑀢𑀺 𑀦𑀺𑀳𑀢𑀁 𑀅𑀥𑀺𑀓𑀭𑀡𑀁, 𑀲𑀫𑀣𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁧𑁮𑁫 𑀆𑀤𑀬𑁄) 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀥𑀫𑁆𑀫𑁂𑀦𑁂𑀯 𑀯𑀽𑀧𑀲𑀫𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀯𑀽𑀧𑀲𑀫𑀦𑀦𑀬𑀁 𑀧𑀦𑀲𑁆𑀲 𑀅𑀥𑀺𑀓𑀭𑀡𑀲𑀫𑀣𑁂𑀲𑀼 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀧𑀼𑀦𑀓𑀫𑁆𑀫𑀸𑀬 𑀉𑀓𑁆𑀓𑁄𑀝𑁂𑀬𑁆𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀓𑀢𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 (𑀧𑀸𑀘𑀺. 𑁩𑁯𑁪) 𑀯𑀤𑀦𑁆𑀢𑁄 𑀧𑀼𑀦𑀓𑀭𑀡𑀢𑁆𑀣𑀸𑀬 𑀉𑀘𑁆𑀘𑀸𑀮𑁂𑀬𑁆𑀬. 𑀬𑀣𑀸𑀞𑀺𑀢𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀤𑀤𑁂𑀬𑁆𑀬, 𑀢𑀲𑁆𑀲𑁂𑀯𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀁 𑀧𑀦 𑀥𑀫𑁆𑀫𑁂𑀦 𑀅𑀥𑀺𑀓𑀭𑀡𑀁 𑀦𑀺𑀳𑀢𑀁, 𑀢𑀁 𑀲𑀼𑀦𑀺𑀳𑀢𑀫𑁂𑀯. 𑀲𑀘𑁂 𑀯𑀺𑀧𑁆𑀧𑀓𑀢𑁂 𑀓𑀫𑁆𑀫𑁂 𑀧𑀝𑀺𑀓𑁆𑀓𑁄𑀲𑀢𑀺, 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀇𑀢𑀭𑀣𑀸 𑀓𑀫𑁆𑀫𑀜𑁆𑀘 𑀓𑀼𑀧𑁆𑀧𑀢𑀺, 𑀓𑀸𑀭𑀓𑀸𑀦𑀜𑁆𑀘 𑀆𑀧𑀢𑁆𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀉𑀓𑁆𑀓𑁄𑀝𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀲𑁆𑀲, 𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀦𑁄, 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀉𑀪𑀬𑁂𑀲𑀼 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀺𑀲𑁆𑀲, ‘‘𑀅𑀥𑀫𑁆𑀫𑁂𑀦 𑀯𑀸 𑀯𑀕𑁆𑀕𑁂𑀦 𑀯𑀸 𑀅𑀓𑀫𑁆𑀫𑀸𑀭𑀳𑀲𑁆𑀲 𑀯𑀸 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀚𑀸𑀦𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀬𑀣𑀸𑀥𑀫𑁆𑀫𑀁 𑀦𑀺𑀳𑀢𑀪𑀸𑀯𑁄, 𑀚𑀸𑀦𑀦𑀸, 𑀉𑀓𑁆𑀓𑁄𑀝𑀦𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀜𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂𑀧𑀺 ‘‘𑀦 𑀤𑀸𑀦𑀺 𑀦𑀁 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀆𑀭𑁄𑀘𑁂𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁, 𑀆𑀧𑀚𑁆𑀚𑀺𑀢𑁆𑀯𑀸𑀯 𑀆𑀭𑁄𑀘𑁂𑀲𑁆𑀲𑀢𑀺. 𑀲𑀘𑁂 𑀧𑀦 𑀏𑀯𑀁 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀫𑁂𑀯 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀢𑁂𑀦𑀼𑀧𑀸𑀬𑁂𑀦 𑀲𑀫𑀡𑀲𑀢𑀫𑁆𑀧𑀺 𑀆𑀧𑀚𑁆𑀚𑀢𑀺𑀬𑁂𑀯 𑀢𑀸𑀯, 𑀬𑀸𑀯 𑀓𑁄𑀝𑀺 𑀦 𑀙𑀺𑀚𑁆𑀚𑀢𑀺. 𑀓𑀣𑀁 𑀧𑀦 𑀓𑁄𑀝𑀺 𑀙𑀺𑀚𑁆𑀚𑀢𑀺? 𑀲𑀘𑁂 𑀳𑀺 𑀆𑀧𑀦𑁆𑀦𑁄 𑀏𑀓𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀺, 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀬𑁂𑀦𑀲𑁆𑀲 𑀆𑀭𑁄𑀘𑀺𑀢𑀁, 𑀢𑀲𑁆𑀲𑁂𑀯 𑀆𑀭𑁄𑀘𑁂𑀢𑀺, 𑀏𑀯𑀁 𑀢𑀢𑀺𑀬𑁂𑀦 𑀧𑀼𑀕𑁆𑀕𑀮𑁂𑀦 𑀤𑀼𑀢𑀺𑀬𑀲𑁆𑀲 𑀆𑀭𑁄𑀘𑀺𑀢𑁂 𑀓𑁄𑀝𑀺 𑀙𑀺𑀦𑁆𑀦𑀸 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀧𑀝𑀺𑀘𑁆𑀙𑀸𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀤𑀼𑀝𑁆𑀞𑀼𑀮𑁆𑀮𑀸𑀬 𑀆𑀧𑀢𑁆𑀢𑀺𑀬𑀸 𑀆𑀤𑀺𑀧𑀤𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀤𑀼𑀓𑁆𑀓𑀝𑀁, 𑀅𑀤𑀼𑀝𑁆𑀞𑀼𑀮𑁆𑀮𑀸𑀬 𑀢𑀺𑀓𑀤𑀼𑀓𑁆𑀓𑀝𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑁂 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑁂 𑀯𑀸 𑀅𑀚𑁆𑀛𑀸𑀘𑀸𑀭𑁂 𑀤𑀼𑀓𑁆𑀓𑀝𑀫𑁂𑀯. ‘‘𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀸𑀤𑀻𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 (𑀧𑀸𑀘𑀺. 𑁪𑁦𑁧) 𑀯𑀸 ‘‘𑀅𑀬𑀁 𑀓𑀓𑁆𑀔𑀴𑁄 𑀨𑀭𑀼𑀲𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀁 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀸 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲, 𑀧𑀢𑀺𑀭𑀽𑀧𑀁 𑀪𑀺𑀓𑁆𑀔𑀼𑀁 𑀅𑀧𑀲𑁆𑀲𑀢𑁄, 𑀦 𑀙𑀸𑀤𑁂𑀢𑀼𑀓𑀸𑀫𑀲𑁆𑀲, ‘‘𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀚𑀸𑀦𑀦𑀁, ‘‘𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸𑀬 𑀦𑀸𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀫𑀦𑀼𑀪𑀸𑀲𑀦𑀲𑀅𑀲𑀸𑀦𑁂𑀯𑀸𑀢𑀺.

𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀊𑀦𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁. 𑀉𑀧𑀲𑀫𑁆𑀧𑀸𑀤𑁂𑀬𑁆𑀬𑀸𑀢𑀺 𑀉𑀧𑀚𑁆𑀛𑀸𑀬𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀬𑁆𑀬. 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀚𑀸𑀦𑀦𑁆𑀢𑁂𑀦𑀸𑀧𑀺 𑀅𑀚𑀸𑀦𑀦𑁆𑀢𑁂𑀦𑀸𑀧𑀺 𑀉𑀧𑀲𑀫𑁆𑀧𑀸𑀤𑀺𑀢𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀯. 𑀲𑀘𑁂 𑀧𑀦 𑀲𑁄 𑀤𑀲𑀯𑀲𑁆𑀲𑀘𑁆𑀘𑀬𑁂𑀦 𑀅𑀜𑁆𑀜𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀢𑀜𑁆𑀘𑁂 𑀫𑀼𑀜𑁆𑀘𑀺𑀢𑁆𑀯𑀸 𑀕𑀡𑁄 𑀧𑀽𑀭𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄. 𑀲𑁄𑀧𑀺 𑀬𑀸𑀯 𑀦 𑀚𑀸𑀦𑀸𑀢𑀺, 𑀢𑀸𑀯 𑀢𑀲𑁆𑀲 𑀦𑁂𑀯 𑀲𑀕𑁆𑀕𑀦𑁆𑀢𑀭𑀸𑀬𑁄 𑀦 𑀫𑁄𑀓𑁆𑀔𑀦𑁆𑀢𑀭𑀸𑀬𑁄, 𑀜𑀢𑁆𑀯𑀸 𑀧𑀦 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑀺𑀢𑀩𑁆𑀩𑀁. 𑀢𑁂 𑀘 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸𑀢𑀺 𑀞𑀧𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀅𑀯𑀲𑁂𑀲𑀸 𑀕𑀸𑀭𑀬𑁆𑀳𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑀺. 𑀇𑀤𑀁 𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀬𑁄 𑀧𑀦 𑀉𑀧𑀚𑁆𑀛𑀸𑀬𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀼𑀕𑁆𑀕𑀮𑁂 𑀇𑀤𑀁 𑀧𑀸𑀘𑀺𑀢𑁆𑀢𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀬𑁄 ‘‘𑀏𑀯𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀬𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺 (𑀧𑀸𑀘𑀺. 𑁪𑁦𑁪), 𑀉𑀤𑀓𑀼𑀓𑁆𑀔𑁂𑀧𑀁 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀲𑁄 𑀏𑀢𑁂𑀲𑀼 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀜𑀢𑁆𑀢𑀺𑀬𑀸, 𑀤𑁆𑀯𑀻𑀲𑀼 𑀘 𑀓𑀫𑁆𑀫𑀯𑀸𑀘𑀸𑀲𑀼 𑀤𑀼𑀓𑁆𑀓𑀝𑀸𑀦𑀺 𑀆𑀧𑀚𑁆𑀚𑀺𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺.

𑀭𑀸𑀚𑀕𑀳𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀉𑀧𑀲𑀫𑁆𑀧𑀸𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀊𑀦𑀯𑀻𑀲𑀢𑀺𑀯𑀲𑁆𑀲𑁂 𑀯𑁂𑀫𑀢𑀺𑀓𑀲𑁆𑀲, 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁂 𑀊𑀦𑀓𑀲𑀜𑁆𑀜𑀺𑀦𑁄, 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁. 𑀉𑀪𑀬𑀢𑁆𑀣 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀺𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀊𑀦𑀯𑀻𑀲𑀢𑀺𑀯𑀲𑁆𑀲𑀢𑀸, 𑀊𑀦𑀓𑀲𑀜𑁆𑀜𑀺𑀢𑀸, 𑀉𑀧𑀲𑀫𑁆𑀧𑀸𑀤𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀬𑁂 𑀭𑀸𑀚𑀸𑀦𑀁 𑀯𑀸 𑀯𑀜𑁆𑀘𑁂𑀢𑁆𑀯𑀸 𑀲𑀼𑀗𑁆𑀓𑀁 𑀯𑀸 𑀧𑀭𑀺𑀳𑀭𑀺𑀢𑀼𑀓𑀸𑀫𑀸 𑀘𑁄𑀭𑀸 𑀓𑀢𑀓𑀫𑁆𑀫𑀸 𑀘𑁂𑀯 𑀅𑀓𑀢𑀓𑀫𑁆𑀫𑀸 𑀘 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂𑀲𑀼 𑀇𑀥 𑀣𑁂𑀬𑁆𑀬𑀲𑀢𑁆𑀣𑀲𑀜𑁆𑀜𑀺𑀦𑁄 𑀢𑀲𑁆𑀲 𑀣𑁂𑀬𑁆𑀬𑀲𑀢𑁆𑀣𑀪𑀸𑀯𑀁 𑀜𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀕𑀘𑁆𑀙𑀦𑁆𑀢𑀲𑁆𑀲 𑀲𑀁𑀯𑀺𑀥𑀸𑀦𑁂 𑀘 𑀕𑀫𑀦𑁂 𑀘 𑀑𑀯𑀸𑀤𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀆𑀧𑀢𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀣𑁂𑀬𑁆𑀬𑀲𑀢𑁆𑀣𑁂𑀦 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀫𑀦𑀼𑀲𑁆𑀲𑁂𑀲𑀼 𑀅𑀲𑀁𑀯𑀺𑀤𑀳𑀦𑁆𑀢𑁂𑀲𑀼 𑀲𑀬𑀫𑁂𑀯 𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲, 𑀣𑁂𑀬𑁆𑀬𑀲𑀢𑁆𑀣𑁂 𑀯𑁂𑀫𑀢𑀺𑀓𑀲𑁆𑀲, 𑀅𑀣𑁂𑀬𑁆𑀬𑀲𑀢𑁆𑀣𑁂 𑀣𑁂𑀬𑁆𑀬𑀲𑀢𑁆𑀣𑀲𑀜𑁆𑀜𑀺𑀦𑁄, 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁. 𑀅𑀣𑁂𑀬𑁆𑀬𑀲𑀢𑁆𑀣𑀲𑀜𑁆𑀜𑀺𑀲𑁆𑀲, 𑀅𑀲𑀁𑀯𑀺𑀤𑀳𑀺𑀢𑁆𑀯𑀸 𑀯𑀸 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦 𑀯𑀸, 𑀆𑀧𑀤𑀸𑀲𑀼 𑀯𑀸, 𑀕𑀘𑁆𑀙𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀣𑁂𑀬𑁆𑀬𑀲𑀢𑁆𑀣𑀪𑀸𑀯𑁄, 𑀚𑀸𑀦𑀦𑀁, 𑀲𑀁𑀯𑀺𑀥𑀸𑀦𑀁, 𑀅𑀯𑀺𑀲𑀗𑁆𑀓𑁂𑀢𑁂𑀦 𑀕𑀫𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀣𑁂𑀬𑁆𑀬𑀲𑀢𑁆𑀣𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀲𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸, 𑀢𑁂 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀧𑀜𑁆𑀜𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀢𑁂𑀲𑀼 𑀫𑀼𑀤𑀼𑀓𑀸𑀦𑀁 𑀅𑀢𑁆𑀣𑀭𑀡𑀸𑀤𑀻𑀦𑀁 𑀨𑀲𑁆𑀲𑁄 𑀯𑀺𑀬 𑀇𑀢𑁆𑀣𑀺𑀲𑀫𑁆𑀨𑀲𑁆𑀲𑁄𑀧𑀺 𑀯𑀝𑁆𑀝𑀢𑀻𑀢𑀺 𑀫𑁂𑀣𑀼𑀦𑀯𑀻𑀢𑀺𑀓𑁆𑀓𑀫𑀦𑁂 𑀤𑁄𑀲𑀁 𑀅𑀤𑀺𑀲𑁆𑀯𑀸 𑀧𑀜𑁆𑀜𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑁂 𑀲𑀦𑁆𑀥𑀸𑀬 ‘‘𑀬𑁂𑀫𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸’’𑀢𑀺𑀆𑀤𑀻𑀳𑀺 (𑀫. 𑀦𑀺. 𑁨.𑁪𑁨; 𑀧𑀸𑀘𑀺. 𑁪𑁧𑁭; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁪𑁭) 𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺. 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀻𑀢𑀺 𑀬𑁂 𑀧𑀲𑁆𑀲𑀦𑁆𑀢𑀺 𑀯𑀸 𑀲𑀼𑀡𑀦𑁆𑀢𑀺 𑀯𑀸, 𑀢𑁂𑀳𑀺 𑀢𑀺𑀓𑁆𑀔𑀢𑁆𑀢𑀼𑀁 𑀏𑀯𑀁 𑀯𑀢𑁆𑀢𑀩𑁆𑀩𑁄 ‘‘𑀫𑀸 𑀆𑀬𑀲𑁆𑀫𑀸 𑀏𑀯𑀁 𑀅𑀯𑀘…𑀧𑁂… 𑀅𑀮𑀜𑁆𑀘 𑀧𑀦 𑀢𑁂 𑀧𑀝𑀺𑀲𑁂𑀯𑀢𑁄 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀲𑀼𑀢𑁆𑀯𑀸 𑀅𑀯𑀤𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀧𑀼𑀦 𑀲𑀗𑁆𑀖𑀫𑀚𑁆𑀛𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀢𑀣𑁂𑀯 𑀯𑀢𑁆𑀢𑀩𑁆𑀩𑁄, 𑀢𑀢𑁆𑀭𑀸𑀧𑀺 𑀢𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂, 𑀇𑀢𑀭𑁂𑀲𑀜𑁆𑀘 𑀅𑀯𑀘𑀦𑁂 𑀤𑀼𑀓𑁆𑀓𑀝𑀫𑁂𑀯. 𑀏𑀯𑀫𑁆𑀧𑀺 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀧𑀼𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑁄, 𑀅𑀣𑀲𑁆𑀲 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀧𑀼𑀦 𑀜𑀢𑁆𑀢𑀺𑀬𑀸 𑀘 𑀤𑁆𑀯𑀻𑀳𑀺 𑀘 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀅𑀭𑀺𑀝𑁆𑀞𑀁 𑀆𑀭𑀩𑁆𑀪 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀥𑀫𑁆𑀫𑀓𑀫𑁆𑀫𑁂 𑀢𑀺𑀓𑀤𑀼𑀓𑁆𑀓𑀝𑀁. 𑀅𑀲𑀫𑀦𑀼𑀪𑀸𑀲𑀺𑀬𑀫𑀸𑀦𑀲𑁆𑀲, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀥𑀫𑁆𑀫𑀓𑀫𑁆𑀫𑀢𑀸, 𑀲𑀫𑀦𑀼𑀪𑀸𑀲𑀦𑀸, 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀫𑀦𑀼𑀪𑀸𑀲𑀦𑀲𑀤𑀺𑀲𑀸𑀦𑁂𑀯𑀸𑀢𑀺.

𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀢𑀣𑀸𑀯𑀸𑀤𑀺𑀦𑀸𑀢𑀺 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫’’𑀦𑁆𑀢𑀺𑀆𑀤𑀺𑀯𑀸𑀤𑀺𑀦𑀸. 𑀅𑀓𑀢𑀸𑀦𑀼𑀥𑀫𑁆𑀫𑁂𑀦𑀸𑀢𑀺 𑀅𑀦𑀼𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀅𑀦𑀼𑀮𑁄𑀫𑀯𑀢𑁆𑀢𑀁 𑀤𑀺𑀲𑁆𑀯𑀸 𑀓𑀢𑀑𑀲𑀸𑀭𑀡𑀸, 𑀲𑁄 𑀑𑀲𑀸𑀭𑀡𑀲𑀗𑁆𑀔𑀸𑀢𑁄 𑀅𑀦𑀼𑀥𑀫𑁆𑀫𑁄 𑀬𑀲𑁆𑀲 𑀦 𑀓𑀢𑁄, 𑀅𑀬𑀁 𑀅𑀓𑀢𑀸𑀦𑀼𑀥𑀫𑁆𑀫𑁄 𑀦𑀸𑀫, 𑀢𑀸𑀤𑀺𑀲𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀪𑀼𑀜𑁆𑀚𑁂𑀬𑁆𑀬 𑀯𑀸𑀢𑀺 𑀆𑀫𑀺𑀲𑀲𑀫𑁆𑀪𑁄𑀕𑀁 𑀯𑀸 𑀥𑀫𑁆𑀫𑀲𑀫𑁆𑀪𑁄𑀕𑀁 𑀯𑀸 𑀓𑀭𑁂𑀬𑁆𑀬. 𑀲𑀁𑀯𑀲𑁂𑀬𑁆𑀬 𑀯𑀸𑀢𑀺 𑀉𑀧𑁄𑀲𑀣𑀸𑀤𑀺𑀓𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀲𑀳 𑀯𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀦𑀸𑀦𑀽𑀧𑀘𑀸𑀭𑁂𑀧𑀺 𑀏𑀓𑀘𑁆𑀙𑀦𑁆𑀦𑁂 𑀦𑀺𑀧𑀚𑁆𑀚𑁂𑀬𑁆𑀬. 𑀢𑀢𑁆𑀣 𑀆𑀫𑀺𑀲𑀧𑀭𑀺𑀪𑁄𑀕𑁂 𑀏𑀓𑀧𑁆𑀧𑀬𑁄𑀕𑁂𑀦 𑀩𑀳𑀽𑀧𑀺 𑀤𑀤𑀢𑁄 𑀯𑀸 𑀕𑀡𑁆𑀳𑀢𑁄 𑀯𑀸 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀯𑀺𑀘𑁆𑀙𑀺𑀦𑁆𑀤𑀦𑁂 𑀲𑀢𑀺 𑀧𑀬𑁄𑀕𑁂 𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀥𑀫𑁆𑀫𑀲𑀫𑁆𑀪𑁄𑀕𑁂 𑀧𑀤𑀸𑀤𑀻𑀳𑀺 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 𑀯𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀲𑁆𑀲 𑀯𑀸 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦, 𑀲𑀁𑀯𑀸𑀲𑁂 𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀯𑀲𑁂𑀦, 𑀲𑀳𑀲𑁂𑀬𑁆𑀬𑀸𑀬 𑀏𑀓𑀲𑁆𑀫𑀺𑀁 𑀦𑀺𑀧𑀦𑁆𑀦𑁂 𑀇𑀢𑀭𑀲𑁆𑀲 𑀦𑀺𑀧𑀚𑁆𑀚𑀦𑀧𑁆𑀧𑀬𑁄𑀕𑀯𑀲𑁂𑀦 𑀆𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀅𑀭𑀺𑀝𑁆𑀞𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀲𑀫𑁆𑀪𑀼𑀜𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀉𑀓𑁆𑀔𑀺𑀢𑁆𑀢𑀓𑁂 𑀯𑁂𑀫𑀢𑀺𑀓𑀲𑁆𑀲, 𑀅𑀦𑀼𑀓𑁆𑀔𑀺𑀢𑁆𑀢𑀓𑁂 𑀉𑀓𑁆𑀔𑀺𑀢𑁆𑀢𑀓𑀲𑀜𑁆𑀜𑀺𑀦𑁄 𑀘𑁂𑀯 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁. 𑀉𑀪𑁄𑀲𑀼 𑀅𑀦𑀼𑀓𑁆𑀔𑀺𑀢𑁆𑀢𑀓𑀲𑀜𑁆𑀜𑀺𑀲𑁆𑀲, ‘‘𑀑𑀲𑀸𑀭𑀺𑀢𑁄’’𑀢𑀺 𑀯𑀸 ‘‘𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑁄’’𑀢𑀺 𑀯𑀸 𑀚𑀸𑀦𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀓𑀢𑀸𑀦𑀼𑀥𑀫𑁆𑀫𑀢𑀸, 𑀚𑀸𑀦𑀦𑀸, 𑀲𑀫𑁆𑀪𑁄𑀕𑀸𑀤𑀺𑀓𑀭𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀲𑀫𑀡𑀼𑀤𑁆𑀤𑁂𑀲𑁄𑀢𑀺 𑀲𑀸𑀫𑀡𑁂𑀭𑁄. 𑀘𑀭𑀸𑀢𑀺 𑀕𑀘𑁆𑀙. 𑀧𑀺𑀭𑁂𑀢𑀺 𑀧𑀭 𑀅𑀫𑀸𑀫𑀓. 𑀯𑀺𑀦𑀲𑁆𑀲𑀸𑀢𑀺 𑀦𑀲𑁆𑀲, 𑀬𑀢𑁆𑀣 𑀢𑀁 𑀦 𑀧𑀲𑁆𑀲𑀸𑀫, 𑀢𑀢𑁆𑀣 𑀕𑀘𑁆𑀙𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀦𑀸𑀲𑀺𑀢𑀦𑁆𑀢𑀺𑀏𑀢𑁆𑀣 𑀲𑀁𑀯𑀸𑀲𑀦𑀸𑀲𑀦𑀸 𑀮𑀺𑀗𑁆𑀕𑀦𑀸𑀲𑀦𑀸 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸𑀢𑀺 𑀢𑀺𑀲𑁆𑀲𑁄 𑀦𑀸𑀲𑀦𑀸. 𑀢𑀢𑁆𑀣 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀸𑀤𑀻𑀲𑀼 𑀉𑀓𑁆𑀔𑁂𑀧𑀦𑀸 𑀲𑀁𑀯𑀸𑀲𑀦𑀸𑀲𑀦𑀸 𑀦𑀸𑀫. 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄 (𑀧𑀸𑀭𑀸. 𑁬𑁬), 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸𑀢𑀺 (𑀘𑀽𑀴𑀯. 𑁧𑁯𑁩; 𑀧𑀸𑀭𑀸. 𑁩𑁮𑁪) 𑀅𑀬𑀁 𑀮𑀺𑀗𑁆𑀕𑀦𑀸𑀲𑀦𑀸 𑀦𑀸𑀫. ‘‘𑀅𑀚𑁆𑀚𑀢𑀕𑁆𑀕𑁂 𑀢𑁂, 𑀆𑀯𑀼𑀲𑁄 𑀲𑀫𑀡𑀼𑀤𑁆𑀤𑁂𑀲, 𑀦 𑀘𑁂𑀯 𑀲𑁄 𑀪𑀕𑀯𑀸 𑀲𑀢𑁆𑀣𑀸 𑀅𑀧𑀤𑀺𑀲𑀺𑀢𑀩𑁆𑀩𑁄’’𑀢𑀺 (𑀧𑀸𑀘𑀺. 𑁪𑁨𑁯) 𑀅𑀬𑀁 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸 𑀦𑀸𑀫, 𑀅𑀬𑀁 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀣𑀸𑀦𑀸𑀲𑀺𑀢’’𑀦𑁆𑀢𑀺. 𑀉𑀧𑀮𑀸𑀧𑁂𑀬𑁆𑀬𑀸𑀢𑀺 ‘‘𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀧𑀭𑀺𑀧𑀼𑀘𑁆𑀙𑀁 𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀕𑀡𑁆𑀳𑁂𑀬𑁆𑀬. 𑀉𑀧𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀤𑀻𑀦𑀺 𑀲𑀸𑀤𑀺𑀬𑀦𑁆𑀢𑁄 𑀢𑁂𑀦 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀓𑀸𑀭𑀸𑀧𑁂𑀬𑁆𑀬. 𑀲𑀫𑁆𑀪𑁄𑀕𑀲𑀳𑀲𑁂𑀬𑁆𑀬𑀸 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀸 𑀏𑀯, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄𑀧𑁂𑀢𑁆𑀣 𑀢𑀲𑁆𑀫𑀺𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀡𑁆𑀝𑀓𑀲𑀫𑀡𑀼𑀤𑁆𑀤𑁂𑀲𑀉𑀧𑀮𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺.

𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀧𑁆𑀧𑀸𑀡𑀓𑀯𑀕𑁆𑀕𑁄 𑀲𑀢𑁆𑀢𑀫𑁄.