𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑁄

𑀇𑀢𑁄 𑀧𑀭𑀁 𑀧𑀦 𑀇𑀫𑁂 𑀔𑁄 𑀧𑀦𑀸𑀢𑀺𑀆𑀤𑀺 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧. 𑀘𑀻𑀯𑀭𑀯𑀕𑁆𑀕𑁄

𑁧. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀧𑀦 𑀘𑀻𑀯𑀭𑀯𑀕𑁆𑀕𑀲𑁆𑀲 𑀢𑀸𑀯 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀦𑁆𑀢𑀺 𑀲𑀽𑀘𑀺𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑁂𑀦 𑀯𑀸, ‘‘𑀦𑀝𑁆𑀞𑀁 𑀯𑀸 𑀯𑀺𑀦𑀝𑁆𑀞𑀁 𑀯𑀸 𑀤𑀟𑁆𑀠𑀁 𑀯𑀸 𑀘𑀻𑀯𑀭𑀸𑀲𑀸 𑀯𑀸 𑀉𑀧𑀘𑁆𑀙𑀺𑀦𑁆𑀦𑀸’’𑀢𑀺 (𑀧𑀸𑀭𑀸. 𑁪𑁬𑁩) 𑀇𑀫𑁂𑀲𑀼 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀦𑀺𑀝𑁆𑀞𑀺𑀢𑁂 𑀘𑀻𑀯𑀭𑀲𑁆𑀫𑀺𑀁, 𑀘𑀻𑀯𑀭𑀲𑁆𑀲 𑀓𑀭𑀡𑀧𑀮𑀺𑀩𑁄𑀥𑁂 𑀉𑀧𑀘𑁆𑀙𑀺𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀇𑀫𑁂𑀳𑀸𑀓𑀸𑀭𑁂𑀳𑀺 𑀘𑀻𑀯𑀭𑀧𑀮𑀺𑀩𑁄𑀥𑁄 𑀦 𑀙𑀺𑀚𑁆𑀚𑀢𑀺, 𑀢𑀸𑀯 𑀓𑀣𑀺𑀦𑀸𑀦𑀺𑀲𑀁𑀲𑀁 𑀮𑀪𑀢𑀺. 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂𑀢𑀺 𑀬𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁 𑀅𑀢𑁆𑀣𑀢𑀁, 𑀢𑀲𑁆𑀫𑀺𑀜𑁆𑀘 𑀉𑀩𑁆𑀪𑀢𑁂. 𑀢𑀢𑁆𑀭𑁂𑀯𑀁 𑀲𑀗𑁆𑀔𑁂𑀧𑀢𑁄 𑀓𑀣𑀺𑀦𑀢𑁆𑀣𑀸𑀭𑁄 𑀘 𑀉𑀩𑁆𑀪𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀓𑀣𑀺𑀦𑀢𑁆𑀣𑀸𑀭𑁄 𑀦𑀸𑀫 𑀪𑀕𑀯𑀢𑀸 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀅𑀦𑀼𑀜𑁆𑀜𑀸𑀢𑁄, 𑀲𑁄 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀬𑀢𑁆𑀣 𑀘𑀢𑁆𑀢𑀸𑀭𑁄 𑀯𑀸 𑀢𑀬𑁄 𑀯𑀸 𑀤𑁆𑀯𑁂 𑀯𑀸 𑀏𑀓𑁄 𑀯𑀸 𑀧𑀼𑀭𑀺𑀫𑀯𑀲𑁆𑀲𑀁 𑀉𑀧𑀕𑀢𑁄, 𑀢𑀢𑁆𑀣 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀕𑀢𑁂 𑀕𑀡𑀧𑀽𑀭𑀓𑁂 𑀓𑀢𑁆𑀯𑀸 𑀅𑀢𑁆𑀣𑀭𑀺𑀢𑀩𑁆𑀩𑀁, 𑀢𑁂 𑀘 𑀕𑀡𑀧𑀽𑀭𑀓𑀸𑀯 𑀳𑁄𑀦𑁆𑀢𑀺, 𑀆𑀦𑀺𑀲𑀁𑀲𑁂 𑀦 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀲𑀘𑁂 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀲𑀼 𑀬𑁄 𑀓𑁄𑀘𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀘𑀻𑀯𑀭𑀁 𑀤𑁂𑀢𑀺 ‘‘𑀇𑀫𑀺𑀦𑀸 𑀓𑀣𑀺𑀦𑀁 𑀅𑀢𑁆𑀣𑀭𑀣𑀸’’𑀢𑀺 (𑀫𑀳𑀸𑀯. 𑁩𑁦𑁬-𑁩𑁦𑁯), 𑀢𑀁 𑀔𑀦𑁆𑀥𑀓𑁂 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀓𑀣𑀺𑀦𑀢𑁆𑀣𑀸𑀭𑀸𑀭𑀳𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀢𑀩𑁆𑀩𑀁. 𑀢𑁂𑀦 𑀢𑀤𑀳𑁂𑀯 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸𑀦𑀺 𑀯𑀸 𑀔𑀡𑁆𑀟𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀸𑀝𑀺 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁄 𑀯𑀸 𑀅𑀦𑁆𑀢𑀭𑀯𑀸𑀲𑀓𑁄 𑀯𑀸 𑀓𑀸𑀢𑀩𑁆𑀩𑁄, 𑀲𑁂𑀲𑀪𑀺𑀓𑁆𑀔𑀽𑀳𑀺𑀧𑀺 𑀢𑀲𑁆𑀲 𑀲𑀳𑀸𑀬𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀲𑀘𑁂 𑀓𑀢𑀘𑀻𑀯𑀭𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀦𑁆𑀤𑀭𑀫𑁂𑀯. 𑀅𑀘𑁆𑀙𑀺𑀦𑁆𑀦𑀸𑀲𑀺𑀩𑁆𑀩𑀺𑀢𑀁 𑀧𑀦 𑀦 𑀯𑀝𑁆𑀝𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀘𑁂 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑁄𑀭𑀸𑀡𑀺𑀓𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦𑀯𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 ‘‘𑀇𑀫𑀸𑀬 𑀲𑀗𑁆𑀖𑀸𑀝𑀺𑀬𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀫𑀻’’𑀢𑀺 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁄 𑀢𑁂𑀦 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑁂 𑀅𑀦𑁆𑀢𑁄𑀲𑀻𑀫𑀸𑀕𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀢𑁆𑀣𑀢𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀣𑀺𑀦𑀁, 𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀣𑀸’’𑀢𑀺 (𑀧𑀭𑀺. 𑁪𑁧𑁩) 𑀯𑀢𑁆𑀢𑀩𑁆𑀩𑀁, 𑀣𑁂𑀭𑀸𑀦𑀜𑁆𑀘 𑀦𑀯𑀸𑀦𑀜𑁆𑀘 𑀩𑀳𑀽𑀦𑀜𑁆𑀘 𑀏𑀓𑀲𑁆𑀲 𑀘 𑀅𑀦𑀼𑀭𑀽𑀧𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀢𑁂𑀳𑀺𑀧𑀺 ‘‘𑀅𑀢𑁆𑀣𑀢𑀁, 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀣𑀺𑀦’’𑀦𑁆𑀢𑀺 𑀯𑀸 ‘‘𑀅𑀢𑁆𑀣𑀢𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀣𑀺𑀦’’𑀦𑁆𑀢𑀺 𑀯𑀸 𑀯𑀢𑁆𑀯𑀸 ‘‘𑀥𑀫𑁆𑀫𑀺𑀓𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀅𑀦𑀼𑀫𑁄𑀤𑀸𑀫𑀸’’𑀢𑀺 𑀯𑀸 ‘‘𑀅𑀦𑀼𑀫𑁄𑀤𑀸𑀫𑀻’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁. 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑁂𑀲𑀼𑀧𑀺 𑀬𑁂 𑀅𑀦𑀼𑀫𑁄𑀤𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁. 𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸 𑀅𑀦𑀸𑀫𑀦𑁆𑀢𑀘𑀸𑀭𑁄, 𑀅𑀲𑀫𑀸𑀤𑀸𑀦𑀘𑀸𑀭𑁄, 𑀬𑀸𑀯𑀤𑀢𑁆𑀣𑀘𑀻𑀯𑀭𑀁, 𑀕𑀡𑀪𑁄𑀚𑀦𑀁, 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄, 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀘𑀻𑀯𑀭𑀜𑁆𑀘𑀸𑀢𑀺 𑀇𑀫𑁂 𑀧𑀜𑁆𑀘𑀸𑀦𑀺𑀲𑀁𑀲𑁂 𑀮𑀪𑀦𑁆𑀢𑀺, 𑀅𑀬𑀁 𑀢𑀸𑀯 𑀓𑀣𑀺𑀦𑀢𑁆𑀣𑀸𑀭𑁄. 𑀢𑀁 𑀧𑀦𑁂𑀢𑀁 𑀓𑀣𑀺𑀦𑀁 ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸𑀬 𑀧𑀓𑁆𑀓𑀫𑀦𑀦𑁆𑀢𑀺𑀓𑀸 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸 𑀦𑀸𑀲𑀦𑀦𑁆𑀢𑀺𑀓𑀸 𑀲𑀯𑀦𑀦𑁆𑀢𑀺𑀓𑀸 𑀆𑀲𑀸𑀯𑀘𑁆𑀙𑁂𑀤𑀺𑀓𑀸 𑀲𑀻𑀫𑀸𑀢𑀺𑀓𑁆𑀓𑀫𑀦𑀦𑁆𑀢𑀺𑀓𑀸 𑀲𑀳𑀼𑀩𑁆𑀪𑀸𑀭𑀸’’𑀢𑀺 (𑀫𑀳𑀸𑀯. 𑁩𑁧𑁦) 𑀏𑀯𑀁 𑀯𑀼𑀢𑁆𑀢𑀸𑀲𑀼 𑀅𑀝𑁆𑀞𑀲𑀼 𑀫𑀸𑀢𑀺𑀓𑀸𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀉𑀤𑁆𑀥𑀭𑀻𑀬𑀢𑀺, 𑀢𑀢𑁆𑀣 𑀯𑀺𑀢𑁆𑀣𑀸𑀭𑀯𑀺𑀦𑀺𑀘𑁆𑀙𑀬𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁩𑁧𑁦) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺𑀇𑀫𑀺𑀦𑀸 𑀲𑁂𑀲𑀧𑀮𑀺𑀩𑁄𑀥𑀸𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀤𑀲𑀸𑀳𑀧𑀭𑀫𑀦𑁆𑀢𑀺 𑀤𑀲 𑀅𑀳𑀸𑀦𑀺 𑀧𑀭𑀫𑁄 𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀤𑀲𑀸𑀳𑀧𑀭𑀫𑁄, 𑀢𑀁 𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀢𑀺𑀭𑁂𑀓𑀁 𑀘𑀻𑀯𑀭𑀦𑁆𑀢𑀺 𑀅𑀢𑀺𑀭𑁂𑀓𑀘𑀻𑀯𑀭𑀁, 𑀘𑀻𑀯𑀭𑀁 𑀦𑀸𑀫 𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕𑀦𑁆𑀢𑀺 𑀏𑀢𑁂𑀲𑀁 𑀯𑀸 𑀢𑀤𑀦𑀼𑀮𑁄𑀫𑀸𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀅𑀬𑀫𑀲𑁆𑀲 𑀚𑀸𑀢𑀺, 𑀧𑀫𑀸𑀡𑀢𑁄 𑀧𑀦 𑀢𑀁 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀬𑀸𑀫𑀢𑁄 𑀅𑀝𑁆𑀞𑀗𑁆𑀕𑀼𑀮𑀁 𑀲𑀼𑀕𑀢𑀗𑁆𑀕𑀼𑀮𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀁 𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮). 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀥𑀺𑀝𑁆𑀞𑀺𑀢𑀯𑀺𑀓𑀧𑁆𑀧𑀺𑀢𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸’’𑀢𑀺, 𑀏𑀢𑁆𑀣 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁, 𑀦𑀺𑀲𑀻𑀤𑀦𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁 𑀧𑀘𑁆𑀘𑀢𑁆𑀣𑀭𑀡𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁, 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀁 𑀬𑀸𑀯 𑀆𑀩𑀸𑀥𑀸 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁, 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀓𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁, 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀇𑀫𑀺𑀦𑀸 𑀦𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀯𑀺𑀓𑀧𑁆𑀧𑁂𑀢𑀩𑁆𑀩𑀢𑀸 𑀚𑀸𑀦𑀺𑀢𑀩𑁆𑀩𑀸. 𑀢𑀢𑁆𑀣 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀢𑀲𑁆𑀲 𑀧𑀫𑀸𑀡𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀲𑀼𑀕𑀢𑀘𑀻𑀯𑀭𑀢𑁄 𑀊𑀦𑀓𑀁 𑀯𑀝𑁆𑀝𑀢𑀺, 𑀮𑀸𑀫𑀓𑀧𑀭𑀺𑀘𑁆𑀙𑁂𑀤𑁂𑀦 𑀲𑀗𑁆𑀖𑀸𑀝𑀺𑀬𑀸 𑀢𑀸𑀯 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀘 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀁, 𑀢𑀺𑀭𑀺𑀬𑀁 𑀫𑀼𑀝𑁆𑀞𑀺𑀢𑁆𑀢𑀺𑀓𑀁, 𑀅𑀦𑁆𑀢𑀭𑀯𑀸𑀲𑀓𑁄 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑁄, 𑀢𑀺𑀭𑀺𑀬𑀁 𑀤𑁆𑀯𑀺𑀳𑀢𑁆𑀣𑁄𑀧𑀺 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀧𑀦 𑀅𑀢𑀺𑀭𑁂𑀓𑀜𑁆𑀘 𑀊𑀦𑀓𑀜𑁆𑀘 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀢𑀢𑁆𑀣 𑀬𑀲𑁆𑀫𑀸 ‘‘𑀤𑁆𑀯𑁂 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀸𑀦𑀺 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑁂𑀢𑀺, 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀼𑀭𑀸𑀡𑀲𑀗𑁆𑀖𑀸𑀝𑀺𑀁 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦𑀯𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀆𑀪𑁄𑀕𑀁 𑀓𑀢𑁆𑀯𑀸 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑁂𑀦 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀢𑀢𑁆𑀭 𑀤𑀼𑀯𑀺𑀥𑀁 𑀅𑀥𑀺𑀝𑁆𑀞𑀸𑀦𑀁 𑁋 𑀲𑀘𑁂 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺, ‘‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀅𑀣 𑀅𑀦𑁆𑀢𑁄𑀕𑀩𑁆𑀪𑀸𑀤𑀻𑀲𑀼 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸 𑀳𑁄𑀢𑀺, 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀏𑀢𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀏𑀲 𑀦𑀬𑁄 𑀉𑀢𑁆𑀢𑀭𑀸𑀲𑀗𑁆𑀕𑁂 𑀘 𑀅𑀦𑁆𑀢𑀭𑀯𑀸𑀲𑀓𑁂 𑀘. 𑀦𑀸𑀫𑀫𑀢𑁆𑀢𑀫𑁂𑀯 𑀳𑀺 𑀯𑀺𑀲𑁂𑀲𑁄. 𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀲𑀗𑁆𑀖𑀸𑀝𑀺𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀅𑀦𑁆𑀢𑀭𑀯𑀸𑀲𑀓𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀸𑀫𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀲𑀘𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀯𑀢𑁆𑀣𑁂𑀳𑀺 𑀲𑀗𑁆𑀖𑀸𑀝𑀺𑀆𑀤𑀻𑀦𑀺 𑀓𑀭𑁄𑀢𑀺, 𑀦𑀺𑀝𑁆𑀞𑀺𑀢𑁂 𑀭𑀚𑀦𑁂 𑀘 𑀓𑀧𑁆𑀧𑁂 𑀘 ‘‘𑀇𑀫𑀁 𑀧𑀘𑁆𑀘𑀼𑀤𑁆𑀥𑀭𑀸𑀫𑀻’’𑀢𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀇𑀤𑀜𑁆𑀘 𑀧𑀦 𑀢𑀺𑀘𑀻𑀯𑀭𑀁 𑀲𑀼𑀔𑀧𑀭𑀺𑀪𑁄𑀕𑀢𑁆𑀣𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑀢𑀺𑀭𑀺𑀢𑁆𑀢𑀧𑀫𑀸𑀡𑀸 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀯𑀡𑁆𑀡𑀪𑁂𑀤𑀫𑀢𑁆𑀢𑀭𑀢𑁆𑀢𑀸𑀧𑀺 𑀘𑁂𑀲𑀸 𑀯𑀝𑁆𑀝𑀢𑀺, 𑀤𑁆𑀯𑁂 𑀧𑀦 𑀦 𑀯𑀝𑁆𑀝𑀦𑁆𑀢𑀺. 𑀦𑀺𑀲𑀻𑀤𑀦𑀁 𑀯𑀼𑀢𑁆𑀢𑀦𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀢𑀜𑁆𑀘 𑀔𑁄 𑀧𑀫𑀸𑀡𑀬𑀼𑀢𑁆𑀢𑀁 𑀏𑀓𑀫𑁂𑀯, 𑀤𑁆𑀯𑁂 𑀦 𑀯𑀝𑁆𑀝𑀦𑁆𑀢𑀺. 𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀢𑀁 𑀧𑀦 𑀫𑀳𑀦𑁆𑀢𑀫𑁆𑀧𑀺 𑀏𑀓𑀫𑁆𑀧𑀺 𑀩𑀳𑀽𑀦𑀺𑀧𑀺 𑀯𑀝𑁆𑀝𑀦𑁆𑀢𑀺, 𑀦𑀻𑀮𑀫𑁆𑀧𑀺 𑀧𑀻𑀢𑀓𑀫𑁆𑀧𑀺 𑀲𑀤𑀲𑀫𑁆𑀧𑀺 𑀧𑀼𑀧𑁆𑀨𑀤𑀲𑀫𑁆𑀧𑀻𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀫𑁆𑀧𑀺 𑀯𑀝𑁆𑀝𑀢𑀺. 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺 𑀬𑀸𑀯 𑀆𑀩𑀸𑀥𑁄 𑀅𑀢𑁆𑀣𑀺, 𑀢𑀸𑀯 𑀧𑀫𑀸𑀡𑀺𑀓𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀆𑀩𑀸𑀥𑁂 𑀯𑀽𑀧𑀲𑀦𑁆𑀢𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀲𑀸 𑀏𑀓𑀸𑀯 𑀯𑀝𑁆𑀝𑀢𑀺. 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀢𑀁 𑀧𑀦 𑀏𑀓𑀫𑁆𑀧𑀺 𑀩𑀳𑀽𑀦𑀺𑀧𑀺 𑀫𑀳𑀦𑁆𑀢𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀭𑀺𑀓𑁆𑀔𑀸𑀭𑀘𑁄𑀴𑁂 𑀕𑀡𑀦𑀸 𑀦𑀢𑁆𑀣𑀺, 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯. 𑀣𑀯𑀺𑀓𑀸𑀧𑀺 𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀧𑀫𑀸𑀡𑀁 ‘‘𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀩𑀳𑀽𑀦𑀺𑀧𑀺 𑀏𑀓𑀢𑁄 𑀓𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀺 𑀅𑀥𑀺𑀝𑁆𑀞𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀫𑀜𑁆𑀘𑀪𑀺𑀲𑀺 𑀧𑀻𑀞𑀪𑀺𑀲𑀺 𑀩𑀺𑀩𑁆𑀩𑁄𑀳𑀦𑀁 𑀧𑀸𑀯𑀸𑀭𑁄 𑀓𑁄𑀚𑀯𑁄𑀢𑀺 𑀏𑀢𑁂𑀲𑀼 𑀧𑀦 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑁂 𑀘 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺𑀬𑁂𑀯. 𑀲𑀩𑁆𑀩𑀜𑁆𑀘 𑀧𑀦𑁂𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀁 𑀅𑀜𑁆𑀜𑀲𑁆𑀲 𑀤𑀸𑀦𑁂𑀦, 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑁂𑀦, 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂𑀦, 𑀳𑀻𑀦𑀸𑀬𑀸𑀯𑀢𑁆𑀢𑀦𑁂𑀦, 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦, 𑀓𑀸𑀮𑀗𑁆𑀓𑀺𑀭𑀺𑀬𑀸𑀬, 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂𑀦, 𑀧𑀘𑁆𑀘𑀼𑀤𑁆𑀥𑀭𑀡𑁂𑀦𑀸𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺. 𑀢𑀺𑀘𑀻𑀯𑀭𑀁 𑀧𑀦 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁂𑀦 𑀙𑀺𑀤𑁆𑀤𑁂𑀦𑀸𑀧𑀺 𑀯𑀺𑀚𑀳𑀢𑀺, 𑀢𑀜𑁆𑀘 𑀔𑁄 𑀯𑀺𑀦𑀺𑀩𑁆𑀩𑁂𑀥𑁂𑀦𑁂𑀯. 𑀲𑀘𑁂 𑀳𑀺 𑀙𑀺𑀤𑁆𑀤𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀏𑀓𑀢𑀦𑁆𑀢𑀼𑀧𑀺 𑀅𑀘𑁆𑀙𑀺𑀦𑁆𑀦𑁄 𑀳𑁄𑀢𑀺, 𑀭𑀓𑁆𑀔𑀢𑀺𑀬𑁂𑀯. 𑀢𑀢𑁆𑀣 𑀲𑀗𑁆𑀖𑀸𑀝𑀺𑀬𑀸 𑀘 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲 𑀘 𑀤𑀻𑀖𑀦𑁆𑀢𑀢𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀲𑁆𑀲 𑀢𑀺𑀭𑀺𑀬𑀦𑁆𑀢𑀢𑁄 𑀅𑀝𑁆𑀞𑀗𑁆𑀕𑀼𑀮𑀧𑁆𑀧𑀫𑀸𑀡𑀲𑁆𑀲 𑀧𑀤𑁂𑀲𑀲𑁆𑀲 𑀑𑀭𑀢𑁄 𑀙𑀺𑀤𑁆𑀤𑀁 𑀅𑀥𑀺𑀝𑁆𑀞𑀸𑀦𑀁 𑀪𑀺𑀦𑁆𑀤𑀢𑀺, 𑀅𑀦𑁆𑀢𑀭𑀯𑀸𑀲𑀓𑁂𑀧𑀺 𑀤𑀻𑀖𑀦𑁆𑀢𑀢𑁄 𑀏𑀢𑀤𑁂𑀯 𑀧𑀫𑀸𑀡𑀁, 𑀢𑀺𑀭𑀺𑀬𑀦𑁆𑀢𑁂𑀦 𑀧𑀦 𑀘𑀢𑀼𑀭𑀗𑁆𑀕𑀼𑀮𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀯𑀼𑀢𑁆𑀢𑁄𑀓𑀸𑀲𑀲𑁆𑀲 𑀧𑀭𑀢𑁄 𑀦 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀙𑀺𑀤𑁆𑀤𑁂 𑀚𑀸𑀢𑁂 𑀢𑀺𑀘𑀻𑀯𑀭𑀁 𑀅𑀢𑀺𑀭𑁂𑀓𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀺, 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺. 𑀢𑀲𑁆𑀫𑀸 𑀲𑀸 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀩𑁆𑀩𑀸. 𑀯𑀺𑀓𑀧𑁆𑀧𑀦𑀮𑀓𑁆𑀔𑀡𑀁 𑀧𑀦 𑀲𑀩𑁆𑀩𑀘𑀻𑀯𑀭𑀸𑀦𑀁 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀓𑁂𑀯𑀮𑀜𑁆𑀳𑀺 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀬𑀁 𑀏𑀯𑀁 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀜𑁆𑀘, 𑀢𑀁 ‘‘𑀅𑀢𑀺𑀭𑁂𑀓𑀘𑀻𑀯𑀭’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀚𑀸𑀢𑀺𑀧𑁆𑀧𑀫𑀸𑀡𑀁 𑀘𑀻𑀯𑀭𑀁𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀏𑀢𑁆𑀣𑀦𑁆𑀢𑀭𑁂 𑀬𑀣𑀸 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦 𑀳𑁄𑀢𑀺, 𑀢𑀣𑀸 𑀅𑀓𑁆𑀭𑀼𑀩𑁆𑀩𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀜𑁆𑀘 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀢𑁆𑀢𑀺 𑀘𑀲𑁆𑀲 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀺𑀲𑁆𑀲𑀚𑁆𑀚𑀦𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀢𑀩𑁆𑀩𑀲𑁆𑀲 𑀯𑀺𑀦𑀬𑀓𑀫𑁆𑀫𑀲𑁆𑀲𑁂𑀢𑀁 𑀦𑀸𑀫𑀁, 𑀦𑀺𑀲𑁆𑀲𑀕𑁆𑀕𑀺𑀬𑀫𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀫𑀺𑀘𑁆𑀘𑁂𑀯. 𑀓𑀺𑀁 𑀢𑀁? 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀲𑀳 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀺𑀦𑀬𑀓𑀫𑁆𑀫𑀁 𑀧𑀸𑀘𑀺𑀢𑁆𑀢𑀺𑀬𑀁 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀜𑁆𑀘 𑀧𑀦𑁂𑀢𑀁 𑀘𑀻𑀯𑀭𑀁 𑀬𑀁 𑀤𑀺𑀯𑀲𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀬𑁄 𑀅𑀭𑀼𑀡𑁄, 𑀲𑁄 𑀉𑀧𑁆𑀧𑀦𑁆𑀦𑀤𑀺𑀯𑀲𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀘𑀻𑀯𑀭𑀼𑀧𑁆𑀧𑀸𑀤𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑀺𑀢𑀁 𑀳𑁄𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀲𑀗𑁆𑀖𑀲𑁆𑀲 𑀢𑀸𑀯 𑀏𑀯𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀤𑀲𑀳𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀦𑁆𑀦𑁄, 𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀏𑀯𑀁 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀲𑀘𑁂 𑀤𑁆𑀯𑁂 𑀳𑁄𑀦𑁆𑀢𑀺, ‘‘𑀤𑁆𑀯𑁂’’𑀢𑀺 𑀯𑀢𑁆𑀢𑀩𑁆𑀩𑀁, 𑀲𑀘𑁂 𑀢𑀤𑀼𑀢𑁆𑀢𑀭𑀺, ‘‘𑀲𑀫𑁆𑀩𑀳𑀼𑀮𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀲𑁆𑀲𑀚𑁆𑀚𑀦𑁂𑀧𑀺 𑀲𑀘𑁂 𑀤𑁆𑀯𑁂 𑀯𑀸 𑀩𑀳𑀽𑀦𑀺 𑀯𑀸 𑀳𑁄𑀦𑁆𑀢𑀺, ‘‘𑀇𑀫𑀸𑀦𑀺 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀸𑀦𑀺 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺, 𑀇𑀫𑀸𑀦𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀸𑀴𑀺𑀁 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀅𑀜𑁆𑀜𑀣𑀸𑀧𑀺 𑀯𑀢𑁆𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺 𑀯𑀺𑀯𑀭𑀢𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺 𑀤𑁂𑀲𑁂𑀢𑀺, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬’’𑀦𑁆𑀢𑀺 (𑀘𑀽𑀴𑀯. 𑁨𑁩𑁯), 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄 ‘‘𑀧𑀲𑁆𑀲𑀲𑀻’’𑀢𑀺, ‘‘𑀆𑀫 𑀧𑀲𑁆𑀲𑀸𑀫𑀻’’𑀢𑀺, ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺, ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀲𑀁𑀯𑀭𑀺𑀲𑁆𑀲𑀸𑀫𑀻’’𑀢𑀺. 𑀤𑁆𑀯𑀻𑀲𑀼 𑀧𑀦 𑀲𑀫𑁆𑀩𑀳𑀼𑀮𑀸𑀲𑀼 𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀘𑀦𑀪𑁂𑀤𑁄 𑀓𑀸𑀢𑀩𑁆𑀩𑁄. 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀝𑁆𑀞𑀁, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁪𑁬𑁪) 𑀏𑀯𑀁 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀤𑁆𑀯𑀻𑀲𑀼 𑀩𑀳𑀽𑀲𑀼 𑀯𑀸 𑀯𑀘𑀦𑀪𑁂𑀤𑁄 𑀓𑀸𑀢𑀩𑁆𑀩𑁄.

𑀕𑀡𑀲𑁆𑀲 𑀧𑀦 𑀦𑀺𑀲𑁆𑀲𑀚𑁆𑀚𑀦𑁆𑀢𑁂𑀦 ‘‘𑀇𑀫𑀸𑀳’’𑀦𑁆𑀢𑀺 𑀯𑀸 ‘‘𑀇𑀫𑀸𑀦𑀺 𑀅𑀳’’𑀦𑁆𑀢𑀺 𑀯𑀸 𑀯𑀢𑁆𑀯𑀸 ‘‘𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀆𑀧𑀢𑁆𑀢𑀺𑀧𑁆𑀧𑀝𑀺𑀕𑁆𑀕𑀸𑀳𑀓𑁂𑀦𑀸𑀧𑀺 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀲𑀭𑀢𑀺…𑀧𑁂… 𑀤𑁂𑀲𑁂𑀢𑀺, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀘𑀻𑀯𑀭𑀤𑀸𑀦𑁂𑀧𑀺 ‘‘𑀲𑀼𑀡𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑀸, 𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀦𑀺𑀲𑁆𑀲𑀝𑁆𑀞𑀁, 𑀬𑀤𑀸𑀬𑀲𑁆𑀫𑀦𑁆𑀢𑀸𑀦𑀁 𑀧𑀢𑁆𑀢𑀓𑀮𑁆𑀮𑀁, 𑀆𑀬𑀲𑁆𑀫𑀦𑁆𑀢𑀸 𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬𑀼’’𑀦𑁆𑀢𑀺 (𑀧𑀸𑀭𑀸. 𑁪𑁬𑁬) 𑀯𑀢𑁆𑀢𑀩𑁆𑀩𑀁, 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀦𑀺𑀲𑁆𑀲𑀚𑁆𑀚𑀦𑁆𑀢𑁂𑀦 ‘‘𑀇𑀫𑀸𑀳’’𑀦𑁆𑀢𑀺 𑀯𑀸 ‘‘𑀇𑀫𑀸𑀦𑀺 𑀅𑀳’’𑀦𑁆𑀢𑀺 𑀯𑀸 𑀯𑀢𑁆𑀯𑀸 ‘‘𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀦𑁆𑀦𑁄, 𑀢𑀁 𑀧𑀝𑀺𑀤𑁂𑀲𑁂𑀫𑀻’’𑀢𑀺 𑀏𑀯𑀁 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀲𑀘𑁂 𑀧𑀦 𑀦𑀯𑀓𑀢𑀭𑁄 𑀳𑁄𑀢𑀺, ‘‘𑀆𑀯𑀼𑀲𑁄’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑁂𑀦𑀸𑀧𑀺 ‘‘𑀧𑀲𑁆𑀲𑀲𑀻’’𑀢𑀺 𑀯𑀸 ‘‘𑀧𑀲𑁆𑀲𑀣𑀸’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀸 ‘‘𑀆𑀫 𑀆𑀯𑀼𑀲𑁄’’𑀢𑀺 𑀯𑀸 𑀯𑀢𑁆𑀯𑀸 ‘‘𑀧𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀢𑁄 ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀸 ‘‘𑀲𑀁𑀯𑀭𑁂𑀬𑁆𑀬𑀸𑀣𑀸’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀲𑀁𑀯𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 ‘‘𑀇𑀫𑀁 𑀘𑀻𑀯𑀭𑀁 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻’’𑀢𑀺 𑀤𑀸𑀢𑀩𑁆𑀩𑀁, 𑀤𑁆𑀯𑀻𑀲𑀼 𑀢𑀻𑀲𑀼 𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀺𑀦𑁆𑀦𑀁 𑀧𑀦 𑀬𑀣𑀸 𑀕𑀡𑀲𑁆𑀲, 𑀏𑀯𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀢𑀢𑁄 𑀆𑀧𑀢𑁆𑀢𑀺𑀧𑁆𑀧𑀝𑀺𑀕𑁆𑀕𑀳𑀡𑀜𑁆𑀘 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀤𑀸𑀦𑀜𑁆𑀘 𑀢𑁂𑀲𑀁 𑀅𑀜𑁆𑀜𑀢𑀭𑁂𑀦 𑀬𑀣𑀸 𑀏𑀓𑁂𑀦 𑀧𑀼𑀕𑁆𑀕𑀮𑁂𑀦, 𑀢𑀣𑀸 𑀓𑀸𑀢𑀩𑁆𑀩𑀁, 𑀇𑀤𑀁 𑀧𑀦 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀺𑀬𑁂𑀲𑀼 𑀯𑀺𑀥𑀸𑀦𑀁. 𑀘𑀻𑀯𑀭𑀁 𑀧𑀢𑁆𑀢𑁄 𑀦𑀺𑀲𑀻𑀤𑀦𑀦𑁆𑀢𑀺 𑀯𑀢𑁆𑀣𑀼𑀫𑀢𑁆𑀢𑀫𑁂𑀯 𑀳𑀺 𑀦𑀸𑀦𑀁, 𑀧𑀭𑀫𑁆𑀫𑀼𑀔𑀁 𑀧𑀦 𑀯𑀢𑁆𑀣𑀼 ‘‘𑀏𑀢’’𑀦𑁆𑀢𑀺 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀩𑀳𑀽𑀦𑀺 𑀳𑁄𑀦𑁆𑀢𑀺, ‘‘𑀏𑀢𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀦𑀺𑀲𑁆𑀲𑀝𑁆𑀞𑀤𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀲𑁆𑀲𑀝𑁆𑀞𑀯𑀢𑁆𑀣𑀼𑀁 ‘‘𑀤𑀺𑀦𑁆𑀦𑀫𑀺𑀤𑀁 𑀇𑀫𑀺𑀦𑀸 𑀫𑀬𑁆𑀳’’𑀦𑁆𑀢𑀺 𑀲𑀜𑁆𑀜𑀸𑀬 𑀦 𑀧𑀝𑀺𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀜𑀢𑁆𑀯𑀸 𑀮𑁂𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑁆𑀢𑁄 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀯𑁂𑀲𑀸𑀮𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀢𑀺𑀭𑁂𑀓𑀘𑀻𑀯𑀭𑀥𑀸𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀤𑀲𑀸𑀳𑀧𑀭𑀫’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣, 𑀢𑀲𑁆𑀫𑀸 𑀦𑀁 𑀧𑀭𑀢𑁄 𑀦 𑀯𑀓𑁆𑀔𑀸𑀫. 𑀤𑀲𑀸𑀳𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀧𑀺 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁. 𑀅𑀢𑀺𑀓𑁆𑀓𑀦𑁆𑀢𑁂 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀺𑀦𑁄𑀧𑀺 𑀯𑁂𑀫𑀢𑀺𑀓𑀲𑁆𑀲𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯, 𑀢𑀣𑀸 𑀅𑀦𑀥𑀺𑀝𑁆𑀞𑀺𑀢𑀸𑀯𑀺𑀓𑀧𑁆𑀧𑀺𑀢𑀅𑀅𑀲𑁆𑀲𑀚𑁆𑀚𑀺𑀢𑀅𑀦𑀝𑁆𑀞𑀸𑀯𑀺𑀦𑀝𑁆𑀞𑀅𑀤𑀟𑁆𑀠𑀸𑀯𑀺𑀮𑀼𑀢𑁆𑀢𑁂𑀲𑀼 𑀅𑀥𑀺𑀝𑁆𑀞𑀺𑀢𑀸𑀤𑀺𑀲𑀜𑁆𑀜𑀺𑀦𑁄. 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑀺𑀢𑁂 𑀯𑀺𑀓𑀧𑁆𑀧𑀺𑀢𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀦𑀝𑁆𑀞𑁂 𑀯𑀺𑀦𑀝𑁆𑀞𑁂 𑀤𑀟𑁆𑀠𑁂 𑀅𑀘𑁆𑀙𑀺𑀦𑁆𑀦𑁂 𑀯𑀺𑀲𑁆𑀲𑀸𑀲𑁂𑀦 𑀕𑀸𑀳𑀺𑀢𑁂 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀬𑀣𑀸 𑀘 𑀇𑀤𑀁, 𑀏𑀯𑀁 𑀇𑀢𑁄 𑀧𑀭𑀸𑀦𑀺𑀧𑀺, 𑀉𑀪𑀢𑁄𑀧𑀸𑀢𑀺𑀫𑁄𑀓𑁆𑀔𑁂𑀲𑀼𑀧𑀺 𑀳𑀺 𑀧𑀸𑀭𑀸𑀚𑀺𑀓𑀸𑀦𑀺 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸 𑀘 𑀲𑀻𑀮𑀯𑀺𑀧𑀢𑁆𑀢𑀺, 𑀲𑁂𑀲𑀸𑀧𑀢𑁆𑀢𑀺𑀬𑁄 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀺 𑀯𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀯𑀸 𑀓𑀸𑀘𑀺 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀆𑀚𑀻𑀯𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀦 𑀞𑀧𑁂𑀢𑁆𑀯𑀸 𑀤𑀼𑀩𑁆𑀪𑀸𑀲𑀺𑀢𑀁 𑀙 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀸, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀘𑀺𑀢𑁆𑀢𑀺𑀬𑀤𑀼𑀓𑁆𑀓𑀝𑀯𑀲𑁂𑀦 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀧𑀜𑁆𑀜𑀢𑁆𑀢𑀸𑀢𑀺, 𑀇𑀤𑀫𑁂𑀢𑁆𑀣 𑀮𑀓𑁆𑀔𑀡𑀁, 𑀇𑀢𑀺 𑀯𑀺𑀧𑀢𑁆𑀢𑀺𑀓𑀣𑀸 𑀇𑀥𑁂𑀯 𑀦𑀺𑀝𑁆𑀞𑀺𑀢𑀸𑀢𑀺, 𑀦 𑀦𑀁 𑀇𑀢𑁄 𑀧𑀭𑀁 𑀯𑀺𑀘𑀸𑀭𑀬𑀺𑀲𑁆𑀲𑀸𑀫. 𑀚𑀸𑀢𑀺𑀧𑁆𑀧𑀫𑀸𑀡𑀲𑀫𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑀸, 𑀕𑀡𑀦𑀼𑀧𑀕𑀢𑀸, 𑀙𑀺𑀦𑁆𑀦𑀧𑀮𑀺𑀩𑁄𑀥𑀪𑀸𑀯𑁄, 𑀅𑀢𑀺𑀭𑁂𑀓𑀘𑀻𑀯𑀭𑀢𑀸, 𑀤𑀲𑀸𑀳𑀸𑀢𑀺𑀓𑁆𑀓𑀫𑁄𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀓𑀣𑀺𑀦𑀲𑀫𑀼𑀝𑁆𑀞𑀸𑀦𑀁, 𑀅𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸𑀢𑀺𑀏𑀢𑁆𑀣 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀝𑁆𑀞𑀺𑀢𑁂 𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑁄𑀢𑀺 𑀏𑀯𑀁 𑀲𑀸𑀫𑀺𑀯𑀲𑁂𑀦 𑀓𑀭𑀡𑀯𑀘𑀦𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀭𑀡𑀯𑀲𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀢𑀁 𑀦𑀢𑁆𑀣𑀺, 𑀲𑀸𑀫𑀺𑀯𑀲𑁂𑀦 𑀧𑀦 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀲𑁆𑀫𑀺𑀁 𑀦𑀺𑀝𑁆𑀞𑀺𑀢𑁂 𑀓𑀣𑀺𑀦𑁂 𑀘 𑀉𑀩𑁆𑀪𑀢𑁂 𑀏𑀯𑀁 𑀇𑀫𑁂𑀳𑀺 𑀘𑀻𑀯𑀭𑀦𑀺𑀝𑁆𑀞𑀸𑀦𑀓𑀣𑀺𑀦𑀼𑀩𑁆𑀪𑀸𑀭𑁂𑀳𑀺 𑀙𑀺𑀦𑁆𑀦𑀧𑀮𑀺𑀩𑁄𑀥𑁄 𑀏𑀓𑀭𑀢𑁆𑀢𑀫𑁆𑀧𑀺 𑀘𑁂 𑀪𑀺𑀓𑁆𑀔𑀼 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 𑀏𑀯𑀁 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀢𑀺𑀘𑀻𑀯𑀭𑁂𑀦𑀸𑀢𑀺 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀦𑀬𑁂𑀦 𑀅𑀥𑀺𑀝𑁆𑀞𑀺𑀢𑁂𑀲𑀼 𑀲𑀗𑁆𑀖𑀸𑀝𑀺𑀆𑀤𑀻𑀲𑀼 𑀬𑁂𑀦𑀓𑁂𑀦𑀘𑀺. 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 𑀯𑀺𑀬𑀼𑀢𑁆𑀢𑁄 𑀯𑀲𑁂𑀬𑁆𑀬, ‘‘𑀕𑀸𑀫𑁄 𑀏𑀓𑀽𑀧𑀘𑀸𑀭𑁄 𑀦𑀸𑀦𑀽𑀧𑀘𑀸𑀭𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁭𑁭) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀁 𑀕𑀸𑀫𑀦𑀺𑀕𑀫𑀦𑀦𑀺𑀯𑁂𑀲𑀦𑀉𑀤𑁄𑀲𑀺𑀢𑀅𑀝𑁆𑀝𑀫𑀸𑀴𑀧𑀸𑀲𑀸𑀤𑀳𑀫𑁆𑀫𑀺𑀬𑀦𑀸𑀯𑀸𑀲𑀢𑁆𑀣𑀔𑁂𑀢𑁆𑀢𑀥𑀜𑁆𑀜𑀓𑀭𑀡𑀆𑀭𑀸𑀫𑀯𑀺𑀳𑀸𑀭𑀭𑀼𑀓𑁆𑀔𑀫𑀽𑀮𑀅𑀚𑁆𑀛𑁄𑀓𑀸𑀲𑀧𑁆𑀧𑀪𑁂𑀤𑀸𑀦𑀁 𑀧𑀦𑁆𑀦𑀭𑀲𑀸𑀦𑀁 𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀸𑀦𑀁 𑀬𑀢𑁆𑀣𑀓𑀢𑁆𑀣𑀘𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀕𑀸𑀫𑀸𑀤𑀻𑀦𑀁 𑀩𑀳𑀺 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁂𑀦 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁭𑁩-𑁪𑁭𑁭-𑁮) 𑀯𑀼𑀢𑁆𑀢𑁄. 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀬𑀁 𑀲𑀗𑁆𑀖𑁄 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂𑀦 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀤𑁂𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀭𑀢𑁆𑀢𑀫𑁆𑀧𑀺 𑀯𑀺𑀧𑁆𑀧𑀯𑀸𑀲𑀢𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀓𑁂𑀯𑀮𑀁 𑀇𑀥 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣𑀁 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀘𑀦𑀪𑁂𑀤𑁄 𑀳𑁄𑀢𑀺, 𑀅𑀬𑀁 𑀧𑀦 𑀯𑀺𑀲𑁂𑀲𑁄.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁

𑀧𑀜𑁆𑀜𑀢𑁆𑀢𑀁, ‘‘𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀅𑀯𑀺𑀧𑁆𑀧𑀯𑀼𑀢𑁆𑀣𑁂 𑀯𑀺𑀧𑁆𑀧𑀯𑀼𑀢𑁆𑀣𑀲𑀜𑁆𑀜𑀺𑀦𑁄 𑀘𑁂𑀯 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁. 𑀯𑀺𑀧𑁆𑀧𑀯𑀼𑀢𑁆𑀣𑁂 𑀯𑀺𑀧𑁆𑀧𑀯𑀼𑀢𑁆𑀣𑀲𑀜𑁆𑀜𑀺𑀦𑁄𑀧𑀺 𑀅𑀯𑀺𑀧𑁆𑀧𑀯𑀼𑀢𑁆𑀣𑀲𑀜𑁆𑀜𑀺𑀦𑁄𑀧𑀺 𑀯𑁂𑀫𑀢𑀺𑀓𑀲𑁆𑀲𑀸𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀣𑀸 𑀅𑀧𑀘𑁆𑀘𑀼𑀤𑁆𑀥𑀝𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀤𑀻𑀲𑀼 𑀘 𑀧𑀘𑁆𑀘𑀼𑀤𑁆𑀥𑀝𑀯𑀺𑀲𑁆𑀲𑀚𑁆𑀚𑀺𑀢𑀸𑀤𑀺𑀲𑀜𑁆𑀜𑀺𑀦𑁄. 𑀅𑀦𑁆𑀢𑁄𑀅𑀭𑀼𑀡𑁂 𑀧𑀘𑁆𑀘𑀼𑀤𑁆𑀥𑀝𑁂 𑀧𑀦 𑀧𑀞𑀫𑀓𑀣𑀺𑀦𑁂 𑀯𑀼𑀢𑁆𑀢𑀯𑀺𑀲𑁆𑀲𑀚𑁆𑀚𑀺𑀢𑀸𑀤𑀺𑀪𑁂𑀤𑁂 𑀘 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀯𑀺𑀧𑁆𑀧𑀯𑀸𑀲𑁂. 𑀆𑀩𑀸𑀥𑁂 𑀧𑀦 𑀯𑀽𑀧𑀲𑀦𑁆𑀢𑁂 𑀧𑀘𑁆𑀘𑀸𑀕𑀦𑁆𑀢𑀩𑁆𑀩𑀁, 𑀢𑀢𑁆𑀣𑁂𑀯 𑀯𑀸 𑀞𑀺𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁, 𑀅𑀣𑀸𑀧𑀺𑀲𑁆𑀲 𑀧𑀼𑀦 𑀲𑁄 𑀯𑀸 𑀅𑀜𑁆𑀜𑁄 𑀯𑀸 𑀆𑀩𑀸𑀥𑁄 𑀓𑀼𑀧𑁆𑀧𑀢𑀺, 𑀮𑀤𑁆𑀥𑀓𑀧𑁆𑀧𑀺𑀬𑀫𑁂𑀯. 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀢𑀸, 𑀅𑀦𑀢𑁆𑀣𑀢𑀓𑀣𑀺𑀦𑀢𑀸, 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀢𑀸, 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀓𑀣𑀺𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑁂𑀯. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀅𑀦𑀥𑀺𑀝𑁆𑀞𑀸𑀦𑀁 𑀅𑀯𑀺𑀓𑀧𑁆𑀧𑀦𑀜𑁆𑀘 𑀅𑀓𑀺𑀭𑀺𑀬𑀸, 𑀇𑀥 𑀅𑀧𑁆𑀧𑀘𑁆𑀘𑀼𑀤𑁆𑀥𑀭𑀡𑀁, 𑀅𑀬𑀁 𑀯𑀺𑀲𑁂𑀲𑁄𑀢𑀺.

𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸𑀢𑀺 𑀲𑀸𑀫𑀺𑀯𑀲𑁂𑀦𑁂𑀯 𑀓𑀭𑀡𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀬𑁆𑀯𑀸𑀬𑀁 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘𑀫𑀸𑀲𑀸’’𑀢𑀺 (𑀧𑀸𑀭𑀸. 𑁬𑁪𑁯) 𑀘𑀻𑀯𑀭𑀓𑀸𑀮𑁄 𑀯𑀼𑀢𑁆𑀢𑁄, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀤𑀸 𑀉𑀧𑁆𑀧𑀦𑁆𑀦𑀁, 𑀬𑀜𑁆𑀘 𑀓𑀸𑀮𑁂𑀧𑀺 𑀲𑀗𑁆𑀖𑀲𑁆𑀲 𑀯𑀸 ‘‘𑀇𑀤𑀁 𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀸 ‘‘𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀺𑀦𑁆𑀦𑀁, 𑀏𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫. 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀅𑀢𑁆𑀢𑀦𑁄 𑀪𑀸𑀕𑀧𑀝𑀺𑀮𑀸𑀪𑀯𑀲𑁂𑀦 𑀲𑀗𑁆𑀖𑀢𑁄 𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀸𑀤𑀺𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀁𑀲𑀼𑀓𑀽𑀮𑀁 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦 (𑀧𑀸𑀭𑀸. 𑁫𑁦𑁦), 𑀅𑀣 𑀯𑀸 𑀧𑀦 ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀘𑀻𑀯𑀭𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀻𑀫𑀸𑀬 𑀤𑁂𑀢𑀺, 𑀓𑀢𑀺𑀓𑀸𑀬 𑀤𑁂𑀢𑀺, 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀓𑀸𑀬 𑀤𑁂𑀢𑀺, 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀆𑀤𑀺𑀲𑁆𑀲 𑀤𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻’’𑀢𑀺 (𑀫𑀳𑀸𑀯. 𑁩𑁭𑁯) 𑀇𑀫𑀸𑀲𑀁 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀅𑀜𑁆𑀜𑀢𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀏𑀢𑁆𑀣 𑀘 ‘‘𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀏𑀯𑀁 𑀲𑀻𑀫𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑁂𑀦𑁆𑀢𑁄 𑀲𑀻𑀫𑀸𑀬 𑀤𑁂𑀢𑀺 𑀦𑀸𑀫, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀢𑁆𑀣 𑀘 𑀲𑀻𑀫𑀸𑀢𑀺 𑀔𑀡𑁆𑀟𑀲𑀻𑀫𑀸 𑀉𑀧𑀘𑀸𑀭𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀮𑀸𑀪𑀲𑀻𑀫𑀸 𑀕𑀸𑀫𑀲𑀻𑀫𑀸 𑀦𑀺𑀕𑀫𑀲𑀻𑀫𑀸 𑀦𑀕𑀭𑀲𑀻𑀫𑀸 𑀅𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀚𑀦𑀧𑀤𑀲𑀻𑀫𑀸 𑀭𑀝𑁆𑀞𑀲𑀻𑀫𑀸 𑀭𑀚𑁆𑀚𑀲𑀻𑀫𑀸 𑀤𑀻𑀧𑀲𑀻𑀫𑀸 𑀘𑀓𑁆𑀓𑀯𑀸𑀴𑀲𑀻𑀫𑀸𑀢𑀺 𑀧𑀦𑁆𑀦𑀭𑀲𑀯𑀺𑀥𑀸. 𑀢𑀢𑁆𑀣 𑀉𑀧𑀘𑀸𑀭𑀲𑀻𑀫𑀸 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁂𑀦, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀅𑀧𑀺 𑀘 𑀪𑀺𑀓𑁆𑀔𑀽𑀦𑀁 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄 𑀯𑀸 𑀧𑀭𑀺𑀬𑀦𑁆𑀢𑁂 𑀞𑀺𑀢𑀪𑁄𑀚𑀦𑀲𑀸𑀮𑀢𑁄 𑀯𑀸 𑀦𑀺𑀩𑀤𑁆𑀥𑀯𑀲𑀦𑀓𑀆𑀯𑀸𑀲𑀢𑁄 𑀯𑀸 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑁄 ‘‘𑀉𑀧𑀘𑀸𑀭𑀲𑀻𑀫𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦 𑀆𑀯𑀸𑀲𑁂 𑀯𑀟𑁆𑀠𑀦𑁆𑀢𑁂 𑀯𑀟𑁆𑀠𑀢𑀺, 𑀳𑀸𑀬𑀦𑁆𑀢𑁂 𑀳𑀸𑀬𑀢𑀺, 𑀬𑁄𑀚𑀦𑀲𑀢𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀸𑀯 𑀳𑁄𑀢𑀺. 𑀢𑀢𑁆𑀣 𑀤𑀺𑀦𑁆𑀦𑀮𑀸𑀪𑁄 𑀲𑀩𑁆𑀩𑁂𑀲𑀁 𑀅𑀦𑁆𑀢𑁄𑀲𑀻𑀫𑀕𑀢𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑀸𑀫𑀧𑀯𑁂𑀲𑀦𑀲𑁂𑀦𑀸𑀲𑀦𑀸𑀧𑀼𑀘𑁆𑀙𑀦𑀸𑀦𑀺 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀸𑀭𑁄𑀘𑀦𑀁 𑀯𑀲𑁆𑀲𑀘𑁆𑀙𑁂𑀤𑀦𑀺𑀲𑁆𑀲𑀬𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀤𑀺𑀯𑀺𑀥𑀸𑀦𑀦𑁆𑀢𑀺 𑀇𑀤𑀫𑁆𑀧𑀺 𑀲𑀩𑁆𑀩𑀁 𑀇𑀫𑀺𑀲𑁆𑀲𑀸𑀯 𑀲𑀻𑀫𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀮𑀸𑀪𑀲𑀻𑀫𑀸𑀢𑀺 𑀬𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀸𑀯𑀼𑀢𑀁 𑀯𑀸 𑀅𑀤𑁆𑀥𑀬𑁄𑀚𑀦𑀁 𑀯𑀸 𑀬𑁄𑀚𑀦𑀁 𑀯𑀸 𑀲𑀫𑀦𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀮𑀸𑀪𑀲𑀻𑀫𑀸, 𑀬𑀁 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀩𑁆𑀩𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀞𑀧𑁂𑀦𑁆𑀢𑀺, 𑀅𑀬𑀁 𑀮𑀸𑀪𑀲𑀻𑀫𑀸 𑀦𑀸𑀫. 𑀓𑀸𑀲𑀺𑀓𑁄𑀲𑀮𑀸𑀤𑀻𑀦𑀁 𑀧𑀦 𑀭𑀝𑁆𑀞𑀸𑀦𑀁 𑀅𑀦𑁆𑀢𑁄 𑀩𑀳𑀽 𑀚𑀦𑀧𑀤𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀏𑀓𑁄 𑀚𑀦𑀧𑀤𑀧𑀭𑀺𑀘𑁆𑀙𑁂𑀤𑁄 𑀚𑀦𑀧𑀤𑀲𑀻𑀫𑀸, 𑀓𑀸𑀲𑀺𑀓𑁄𑀲𑀮𑀸𑀤𑀺𑀭𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀭𑀝𑁆𑀞𑀲𑀻𑀫𑀸, 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀭𑀚𑁆𑀚𑀲𑀻𑀫𑀸, 𑀲𑀫𑀼𑀤𑁆𑀤𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀫𑀳𑀸𑀤𑀻𑀧𑁄 𑀯𑀸 𑀅𑀦𑁆𑀢𑀭𑀤𑀻𑀧𑁄 𑀯𑀸 𑀤𑀻𑀧𑀲𑀻𑀫𑀸, 𑀏𑀓𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀧𑀭𑀺𑀓𑁆𑀔𑁂𑀧𑀩𑁆𑀪𑀦𑁆𑀢𑀭𑀁 𑀘𑀓𑁆𑀓𑀯𑀸𑀴𑀲𑀻𑀫𑀸, 𑀲𑁂𑀲𑀸 𑀦𑀺𑀤𑀸𑀦𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀸 𑀏𑀯. 𑀢𑀢𑁆𑀣 ‘‘𑀔𑀡𑁆𑀟𑀲𑀻𑀫𑀸𑀬 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁 𑀔𑀡𑁆𑀟𑀲𑀻𑀫𑀝𑁆𑀞𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀩𑀳𑀺𑀲𑀻𑀫𑀸𑀬 𑀲𑀻𑀫𑀦𑁆𑀢𑀭𑀺𑀓𑀝𑁆𑀞𑀸𑀦𑀫𑁆𑀧𑀺 𑀦 𑀧𑀸𑀧𑀼𑀡𑀸𑀢𑀺. ‘‘𑀉𑀧𑀘𑀸𑀭𑀲𑀻𑀫𑀸𑀬 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁 𑀧𑀦 𑀅𑀦𑁆𑀢𑁄𑀧𑀭𑀺𑀘𑁆𑀙𑁂𑀤𑁂 𑀔𑀡𑁆𑀟𑀲𑀻𑀫𑀸𑀲𑀻𑀫𑀦𑁆𑀢𑀭𑀺𑀓𑀸𑀲𑀼 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺, 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀤𑀺𑀦𑁆𑀦𑀁 𑀔𑀡𑁆𑀟𑀲𑀻𑀫𑀸𑀲𑀻𑀫𑀦𑁆𑀢𑀭𑀺𑀓𑀝𑁆𑀞𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀮𑀸𑀪𑀲𑀻𑀫𑀸𑀲𑀼 𑀤𑀺𑀦𑁆𑀦𑀁 𑀢𑀸𑀲𑀁 𑀅𑀦𑁆𑀢𑁄𑀕𑀥𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀕𑀸𑀫𑀲𑀻𑀫𑀸𑀤𑀻𑀲𑀼 𑀤𑀺𑀦𑁆𑀦𑀁 𑀢𑀸𑀲𑀁 𑀲𑀻𑀫𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀩𑀤𑁆𑀥𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺, 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀲𑀼 𑀤𑀺𑀦𑁆𑀦𑀁 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀚𑀦𑀧𑀤𑀲𑀻𑀫𑀸𑀤𑀻𑀲𑀼 𑀤𑀺𑀦𑁆𑀦𑀫𑁆𑀧𑀺 𑀢𑀸𑀲𑀁 𑀅𑀩𑁆𑀪𑀦𑁆𑀢𑀭𑁂 𑀩𑀤𑁆𑀥𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀬𑀁 𑀚𑀫𑁆𑀩𑀼𑀤𑀻𑀧𑁂 𑀞𑀢𑁆𑀯𑀸 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑀻𑀬𑀢𑀺, 𑀢𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀢𑁄 𑀏𑀓𑁄𑀧𑀺 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀲𑀗𑁆𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀲𑀘𑁂𑀧𑀺 𑀢𑀢𑁆𑀣𑁂𑀯 𑀏𑀓𑁄 𑀲𑀪𑀸𑀕𑁄 𑀪𑀺𑀓𑁆𑀔𑀼 𑀲𑀪𑀸𑀕𑀸𑀦𑀁 𑀪𑀸𑀕𑀁 𑀕𑀡𑁆𑀳𑀸𑀢𑀺, 𑀦 𑀯𑀸𑀭𑁂𑀢𑀩𑁆𑀩𑁄. 𑀬𑁄 𑀧𑀦 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀅𑀲𑀼𑀓𑀲𑀻𑀫𑀸𑀬𑀸’’𑀢𑀺 𑀅𑀯𑀢𑁆𑀯𑀸𑀯 𑀓𑁂𑀯𑀮𑀁 ‘‘𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀲𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀲𑀻𑀫𑀸 𑀦𑀸𑀫 𑀩𑀳𑀼𑀯𑀺𑀥𑀸, 𑀓𑀢𑀭𑀁 𑀲𑀦𑁆𑀥𑀸𑀬 𑀯𑀤𑀲𑀻’’𑀢𑀺, 𑀲𑀘𑁂 𑀯𑀤𑀢𑀺 ‘‘𑀅𑀳𑀫𑁂𑀢𑀁 𑀪𑁂𑀤𑀁 𑀦 𑀚𑀸𑀦𑀸𑀫𑀺, 𑀲𑀻𑀫𑀝𑁆𑀞𑀓𑀲𑀗𑁆𑀖𑁄 𑀕𑀡𑁆𑀳𑀢𑀽’’𑀢𑀺, 𑀉𑀧𑀘𑀸𑀭𑀲𑀻𑀫𑀝𑁆𑀞𑁂𑀳𑀺 𑀪𑀸𑀚𑁂𑀢𑀩𑁆𑀩𑀁.

𑀓𑀢𑀺𑀓𑀸𑀬𑀸𑀢𑀺𑀏𑀢𑁆𑀣 𑀓𑀢𑀺𑀓𑀸 𑀦𑀸𑀫 𑀲𑀫𑀸𑀦𑀮𑀸𑀪𑀓𑀢𑀺𑀓𑀸. 𑀲𑀸 𑀧𑀦 𑀏𑀯𑀁 𑀓𑀸𑀢𑀩𑁆𑀩𑀸, 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀁 𑀯𑀺𑀳𑀸𑀭𑀁 𑀲𑀗𑁆𑀕𑀡𑁆𑀳𑀺𑀢𑀼𑀓𑀸𑀫𑀸 𑀲𑀫𑀸𑀦𑀮𑀸𑀪𑀁 𑀓𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀧𑁄𑀭𑀸𑀡𑀓𑁄 𑀅𑀧𑁆𑀧𑀮𑀸𑀪𑁄’’𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀢𑀁 𑀯𑀺𑀳𑀸𑀭𑀁 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀮𑀸𑀪𑀁 𑀓𑀸𑀢𑀼𑀁 𑀲𑀗𑁆𑀖𑀲𑁆𑀲 𑀭𑀼𑀘𑁆𑀘𑀢𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑀩𑁆𑀩𑀁, 𑀏𑀢𑁆𑀢𑀸𑀯𑀢𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄𑀧𑀺 𑀇𑀥 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀧𑀺 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁, 𑀏𑀢𑁆𑀢𑀸𑀯𑀢𑀸 𑀇𑀥 𑀦𑀺𑀲𑀺𑀦𑁆𑀦𑁄𑀧𑀺 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀮𑀸𑀪𑁂 𑀪𑀸𑀚𑀺𑀬𑀫𑀸𑀦𑁂 𑀇𑀢𑀭𑀲𑁆𑀫𑀺𑀁 𑀞𑀺𑀢𑀲𑁆𑀲 𑀪𑀸𑀕𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺 𑀦𑀸𑀫 𑀤𑀸𑀬𑀓𑀲𑁆𑀲 𑀧𑀭𑀺𑀘𑁆𑀘𑀸𑀕𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀁, 𑀢𑀲𑁆𑀫𑀸 ‘‘𑀬𑀢𑁆𑀣 𑀫𑀬𑁆𑀳𑀁 𑀥𑀼𑀯𑀓𑀸𑀭𑀸 𑀓𑀭𑀻𑀬𑀦𑁆𑀢𑀺, 𑀢𑀢𑁆𑀣 𑀤𑀫𑁆𑀫𑀻’’𑀢𑀺 𑀯𑀸 ‘‘𑀢𑀢𑁆𑀣 𑀤𑁂𑀣𑀸’’𑀢𑀺 𑀯𑀸 𑀯𑀼𑀢𑁆𑀢𑁂 𑀬𑀢𑁆𑀣 𑀢𑀲𑁆𑀲 𑀧𑀸𑀓𑀯𑀢𑁆𑀢𑀁 𑀯𑀸 𑀯𑀢𑁆𑀢𑀢𑀺, 𑀬𑀢𑁄 𑀯𑀸 𑀪𑀺𑀓𑁆𑀔𑀽 𑀦𑀺𑀘𑁆𑀘𑀁 𑀪𑁄𑀚𑁂𑀢𑀺, 𑀬𑀢𑁆𑀣 𑀯𑀸 𑀢𑁂𑀦 𑀓𑀺𑀜𑁆𑀘𑀺 𑀲𑁂𑀦𑀸𑀲𑀦𑀁 𑀓𑀢𑀁, 𑀲𑀩𑁆𑀩𑀢𑁆𑀣 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀏𑀓𑀲𑁆𑀫𑀺𑀁 𑀥𑀼𑀯𑀓𑀸𑀭𑀝𑁆𑀞𑀸𑀦𑁂 𑀣𑁄𑀓𑀢𑀭𑀸 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀏𑀓𑀫𑁂𑀯 𑀯𑀸 𑀯𑀢𑁆𑀣𑀁 𑀳𑁄𑀢𑀺, 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸 𑀲𑁄 𑀯𑀤𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁.

𑀲𑀗𑁆𑀖𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀉𑀧𑀘𑀸𑀭𑀲𑀻𑀫𑀸𑀕𑀢𑀸𑀦𑀜𑁆𑀘 𑀢𑀢𑁄 𑀩𑀳𑀺𑀤𑁆𑀥𑀸𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀕𑀸𑀳𑀓𑁂 𑀲𑀢𑀺 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀬𑀁 𑀧𑀦 𑀩𑀳𑀺 𑀉𑀧𑀘𑀸𑀭𑀲𑀻𑀫𑀸𑀬 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀤𑀻𑀬𑀢𑀺, 𑀢𑀁 𑀏𑀓𑀸𑀩𑀤𑁆𑀥𑀧𑀭𑀺𑀲𑀸𑀬 𑀧𑀸𑀧𑀼𑀡𑀸𑀢𑀺. 𑀬𑁂 𑀧𑀦 𑀤𑁆𑀯𑀸𑀤𑀲𑀳𑀺 𑀳𑀢𑁆𑀣𑁂𑀳𑀺 𑀧𑀭𑀺𑀲𑀁 𑀅𑀲𑀫𑁆𑀧𑀢𑁆𑀢𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺.

𑀉𑀪𑀢𑁄𑀲𑀗𑁆𑀖𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀬𑀁 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁, 𑀢𑀢𑁄 𑀉𑀧𑀟𑁆𑀠𑀁 𑀪𑀺𑀓𑁆𑀔𑀽𑀦𑀁, 𑀉𑀧𑀟𑁆𑀠𑀁 𑀪𑀺𑀓𑁆𑀔𑀼𑀦𑀻𑀦𑀁 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀏𑀓𑀸 𑀯𑀸 𑀪𑀺𑀓𑁆𑀔𑀼𑀦𑀻, 𑀅𑀦𑁆𑀢𑀫𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸𑀧𑀺 𑀉𑀧𑀟𑁆𑀠𑀫𑁂𑀯 𑀤𑀸𑀢𑀩𑁆𑀩𑀁. ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀘𑁂 𑀤𑀲 𑀪𑀺𑀓𑁆𑀔𑀽 𑀘 𑀤𑀲 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀳𑁄𑀦𑁆𑀢𑀺, 𑀏𑀓𑀯𑀻𑀲𑀢𑀺 𑀧𑀝𑀺𑀯𑀻𑀲𑁂 𑀓𑀢𑁆𑀯𑀸 𑀏𑀓𑁄 𑀧𑀼𑀕𑁆𑀕𑀮𑀲𑁆𑀲 𑀤𑀸𑀢𑀩𑁆𑀩𑁄, 𑀤𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀤𑀲 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀘, 𑀬𑁂𑀦 𑀧𑀼𑀕𑁆𑀕𑀮𑀺𑀓𑁄 𑀮𑀤𑁆𑀥𑁄, 𑀲𑁄 𑀲𑀗𑁆𑀖𑀢𑁄𑀧𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀕𑀳𑁂𑀢𑀼𑀁 𑀮𑀪𑀢𑀺, 𑀓𑀲𑁆𑀫𑀸? 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸, ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀧𑀦 𑀘𑁂𑀢𑀺𑀬𑀲𑁆𑀲 𑀲𑀗𑁆𑀖𑀢𑁄 𑀧𑀸𑀧𑀼𑀡𑀓𑁄𑀝𑁆𑀞𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀓𑁄𑀝𑁆𑀞𑀸𑀲𑀲𑀫𑁄 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀳𑁄𑀢𑀺. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑁄 𑀯𑀺𑀲𑀼𑀁 𑀦 𑀮𑀪𑀢𑀺, 𑀧𑀸𑀧𑀼𑀡𑀓𑁄𑀝𑁆𑀞𑀸𑀲𑀢𑁄 𑀏𑀓𑀫𑁂𑀯 𑀮𑀪𑀢𑀺. ‘‘𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀏𑀓𑁄 𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀧𑀼𑀕𑁆𑀕𑀮𑀕𑀡𑀦𑀸𑀬 𑀏𑀯 𑀯𑀺𑀪𑀚𑀺𑀢𑀩𑁆𑀩𑀁, 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑀘𑁂𑀢𑀺𑀬𑀧𑀭𑀸𑀫𑀲𑀦𑀁 𑀅𑀦𑀦𑁆𑀢𑀭𑀦𑀬𑀲𑀤𑀺𑀲𑀫𑁂𑀯, 𑀬𑀣𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸 𑀦𑀬𑁄 𑀦𑀻𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸𑀧𑀺 𑀦𑁂𑀢𑀩𑁆𑀩𑁄. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀦 𑀮𑀩𑁆𑀪𑀢𑀺. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀦 𑀮𑀩𑁆𑀪𑀢𑀺𑀬𑁂𑀯.

𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲𑀸𑀢𑀺 𑀏𑀢𑁆𑀣 𑀲𑀘𑁂 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀬𑁂 𑀢𑀢𑁆𑀣 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀲𑀁 𑀩𑀳𑀺 𑀲𑀻𑀫𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺, 𑀦 𑀅𑀜𑁆𑀜𑁂𑀲𑀁. 𑀲𑀘𑁂 𑀧𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁄 ‘‘𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀤𑀢𑀺, 𑀬𑀢𑁆𑀣𑀓𑀢𑁆𑀣𑀘𑀺 𑀯𑀼𑀝𑁆𑀞𑀯𑀲𑁆𑀲𑀸𑀦𑀁 𑀲𑀩𑁆𑀩𑁂𑀲𑀁 𑀲𑀫𑁆𑀧𑀢𑁆𑀢𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀅𑀣 ‘‘𑀅𑀲𑀼𑀓𑀯𑀺𑀳𑀸𑀭𑁂 𑀯𑀲𑁆𑀲𑀁𑀯𑀼𑀝𑁆𑀞𑀲𑁆𑀲𑀸’’𑀢𑀺 𑀯𑀤𑀢𑀺, 𑀢𑀢𑁆𑀣 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁𑀬𑁂𑀯 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸 𑀧𑀸𑀧𑀼𑀡𑀸𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑀤𑀢𑀺, 𑀢𑀢𑁆𑀭 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺, 𑀦 𑀅𑀜𑁆𑀜𑁂𑀲𑀁.

𑀆𑀤𑀺𑀲𑁆𑀲 𑀤𑁂𑀢𑀻𑀢𑀺 𑀆𑀤𑀺𑀲𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀢𑀺, 𑀓𑀣𑀁? 𑀪𑀺𑀓𑁆𑀔𑀽 𑀅𑀚𑁆𑀚𑀢𑀦𑀸𑀬 𑀯𑀸 𑀲𑁆𑀯𑀸𑀢𑀦𑀸𑀬 𑀯𑀸 𑀬𑀸𑀕𑀼𑀬𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂 𑀖𑀭𑁂 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸, 𑀢𑁂𑀲𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑁂𑀳𑀺 𑀬𑀸𑀕𑀼 𑀧𑀻𑀢𑀸, 𑀢𑁂𑀲𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀪𑀢𑁆𑀢𑀔𑀚𑁆𑀚𑀓𑀸𑀤𑀻𑀳𑀺 𑀦𑀺𑀫𑀦𑁆𑀢𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻𑀢𑀺 ‘‘𑀇𑀤𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸, 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 𑀤𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀓𑀣𑀸, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄. 𑀇𑀢𑀺 𑀇𑀫𑀸𑀲𑀁 𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀧𑀤𑀸𑀦𑀁 𑀯𑀲𑁂𑀦 𑀬𑀁 𑀅𑀓𑀸𑀮𑀘𑀻𑀯𑀭𑀮𑀓𑁆𑀔𑀡𑁂𑀦 𑀧𑀝𑀺𑀮𑀤𑁆𑀥𑀁, 𑀢𑀁 𑀲𑀦𑁆𑀥𑀸𑀬 ‘‘𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁.

𑀆𑀓𑀗𑁆𑀔𑀫𑀸𑀦𑁂𑀦𑀸𑀢𑀺 𑀇𑀘𑁆𑀙𑀫𑀸𑀦𑁂𑀦. 𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀲𑀻𑀖𑀁 𑀅𑀦𑁆𑀢𑁄𑀤𑀲𑀸𑀳𑁂𑀬𑁂𑀯 𑀓𑀸𑀭𑁂𑀢𑀩𑁆𑀩𑀁. 𑀦𑁄 𑀘𑀲𑁆𑀲 𑀧𑀸𑀭𑀺𑀧𑀽𑀭𑀻𑀢𑀺 𑀦𑁄 𑀘𑁂 𑀧𑀸𑀭𑀺𑀧𑀽𑀭𑀻 𑀪𑀯𑁂𑀬𑁆𑀬, 𑀬𑀢𑁆𑀢𑀓𑁂𑀦 𑀓𑀭𑀺𑀬𑀫𑀸𑀦𑀁 𑀅𑀥𑀺𑀝𑁆𑀞𑀸𑀦𑀘𑀻𑀯𑀭𑀁 𑀧𑀳𑁄𑀢𑀺, 𑀢𑀁 𑀘𑀻𑀯𑀭𑀁 𑀢𑀢𑁆𑀢𑀓𑀁 𑀦 𑀪𑀯𑁂𑀬𑁆𑀬, 𑀊𑀦𑀓𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬𑀸𑀢𑀺 ‘‘𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀲𑀗𑁆𑀖𑁄 𑀘𑀻𑀯𑀭𑀸𑀦𑀺 𑀮𑀪𑀺𑀲𑁆𑀲𑀢𑀺, 𑀢𑀢𑁄 𑀫𑁂 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀇𑀫𑀺𑀦𑀸 𑀦𑀬𑁂𑀦 𑀲𑀗𑁆𑀖𑀕𑀡𑀜𑀸𑀢𑀺𑀫𑀺𑀢𑁆𑀢𑁂𑀲𑀼 𑀯𑀸 𑀅𑀜𑁆𑀜𑀢𑀭𑀝𑁆𑀞𑀸𑀦𑀢𑁄, ‘‘𑀧𑀁𑀲𑀼𑀓𑀽𑀮𑀁 𑀯𑀸 𑀮𑀘𑁆𑀙𑀸𑀫𑀻’’𑀢𑀺, ‘‘𑀇𑀫𑀺𑀦𑀸 𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 𑀘𑀻𑀯𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀺𑀚𑁆𑀚𑀫𑀸𑀦𑀸𑀬 𑀘𑀻𑀯𑀭𑀸𑀲𑀸𑀬. 𑀢𑀢𑁄 𑀘𑁂 𑀉𑀢𑁆𑀢𑀭𑀻𑀢𑀺 𑀫𑀸𑀲𑀧𑀭𑀫𑀢𑁄 𑀘𑁂 𑀉𑀢𑁆𑀢𑀭𑀺 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀦𑀲𑁆𑀲 𑀫𑀽𑀮𑀘𑀻𑀯𑀭𑀁 𑀲𑀡𑁆𑀳𑀁 𑀳𑁄𑀢𑀺, 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀣𑀽𑀮𑀁 𑀳𑁄𑀢𑀺, 𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼𑀁, 𑀭𑀢𑁆𑀢𑀺𑀬𑁄 𑀘 𑀲𑁂𑀲𑀸 𑀳𑁄𑀦𑁆𑀢𑀺, 𑀦 𑀢𑀸𑀯 𑀫𑀸𑀲𑁄 𑀧𑀽𑀭𑀢𑀺, 𑀦 𑀅𑀓𑀸𑀫𑀸 𑀘𑀻𑀯𑀭𑀁 𑀓𑀸𑀭𑁂𑀢𑀩𑁆𑀩𑀁, 𑀅𑀜𑁆𑀜𑀁 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀏𑀯 𑀓𑀸𑀮𑀩𑁆𑀪𑀦𑁆𑀢𑀭𑁂 𑀓𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀦 𑀮𑀪𑀢𑀺, 𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁆𑀧𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀅𑀣 𑀫𑀽𑀮𑀘𑀻𑀯𑀭𑀁 𑀣𑀽𑀮𑀁 𑀳𑁄𑀢𑀺, 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀲𑀡𑁆𑀳𑀁, 𑀫𑀽𑀮𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁂𑀯 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁, 𑀢𑀁 𑀧𑀼𑀦 𑀫𑀸𑀲𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀦 𑀮𑀘𑁆𑀙𑀢𑀺, 𑀢𑀸𑀯 𑀅𑀜𑁆𑀜𑀁 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀮𑀩𑁆𑀪𑀢𑀺. 𑀇𑀫𑀲𑁆𑀲 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀅𑀓𑀸𑀮𑀘𑀻𑀯𑀭𑀁 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀓𑀸𑀮𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀫𑀸𑀲𑀁 𑀅𑀢𑀺𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁

𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀇𑀢𑁄 𑀧𑀭𑀁 𑀲𑀩𑁆𑀩𑀁 𑀧𑀞𑀫𑀓𑀣𑀺𑀦𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀤𑀲𑀸𑀳𑀸𑀢𑀺𑀓𑁆𑀓𑀫𑁄, 𑀇𑀥 𑀫𑀸𑀲𑀸𑀢𑀺𑀓𑁆𑀓𑀫𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀅𑀓𑀸𑀮𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀅𑀜𑁆𑀜𑀸𑀢𑀺𑀓𑀸𑀬𑀸𑀢𑀺 𑀦 𑀜𑀸𑀢𑀺𑀓𑀸𑀬, 𑀫𑀸𑀢𑀺𑀢𑁄 𑀯𑀸 𑀧𑀺𑀢𑀺𑀢𑁄 𑀯𑀸 𑀬𑀸𑀯 𑀲𑀢𑁆𑀢𑀫𑀁 𑀬𑀼𑀕𑀁, 𑀢𑀸𑀯 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀲𑀫𑁆𑀩𑀤𑁆𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀲𑀸𑀓𑀺𑀬𑀸𑀦𑀺𑀬𑁄 𑀯𑀺𑀬 𑀲𑀼𑀤𑁆𑀥𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀸 𑀉𑀪𑀢𑁄𑀲𑀗𑁆𑀖𑁂 𑀯𑀸 𑀉𑀧𑀲𑀫𑁆𑀧𑀦𑁆𑀦𑀸𑀬. 𑀧𑀼𑀭𑀸𑀡𑀘𑀻𑀯𑀭𑀦𑁆𑀢𑀺 𑀭𑀚𑀺𑀢𑁆𑀯𑀸 𑀓𑀧𑁆𑀧𑀁 𑀓𑀢𑁆𑀯𑀸 𑀏𑀓𑀯𑀸𑀭𑀫𑁆𑀧𑀺 𑀦𑀺𑀯𑀢𑁆𑀣𑀁 𑀯𑀸 𑀧𑀸𑀭𑀼𑀢𑀁 𑀯𑀸, 𑀬𑀁 𑀅𑀦𑁆𑀢𑀫𑀲𑁄 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀫𑀢𑁆𑀣𑀓𑁂 𑀯𑀸 𑀓𑀢𑁆𑀯𑀸 𑀫𑀕𑁆𑀕𑀁 𑀕𑀢𑁄 𑀳𑁄𑀢𑀺, 𑀉𑀲𑁆𑀲𑀻𑀲𑀓𑀁 𑀯𑀸 𑀓𑀢𑁆𑀯𑀸 𑀦𑀺𑀧𑀦𑁆𑀦𑁄, 𑀏𑀢𑀫𑁆𑀧𑀺 𑀧𑀼𑀭𑀸𑀡𑀘𑀻𑀯𑀭𑀫𑁂𑀯. 𑀥𑁄𑀯𑀸𑀧𑁂𑀬𑁆𑀬 𑀯𑀸𑀢𑀺 𑀲𑀘𑁂 ‘‘𑀥𑁄𑀯𑀸’’𑀢𑀺𑀯𑀸𑀘𑀸𑀬 𑀯𑀤𑀢𑀺, 𑀓𑀸𑀬𑀯𑀺𑀓𑀸𑀭𑀁 𑀯𑀸 𑀓𑀭𑁄𑀢𑀺, 𑀳𑀢𑁆𑀣𑁂𑀦 𑀯𑀸 𑀳𑀢𑁆𑀣𑁂 𑀤𑁂𑀢𑀺, 𑀧𑀸𑀤𑀫𑀽𑀮𑁂 𑀯𑀸 𑀞𑀧𑁂𑀢𑀺, 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀑𑀓𑀸𑀲𑁂 𑀞𑀢𑁆𑀯𑀸 𑀉𑀧𑀭𑀺 𑀯𑀸 𑀔𑀺𑀧𑀢𑀺, 𑀅𑀜𑁆𑀜𑀲𑁆𑀲 𑀯𑀸 𑀳𑀢𑁆𑀣𑁂 𑀧𑁂𑀲𑁂𑀢𑀺, 𑀢𑀸𑀬 𑀥𑁄𑀢𑀁, 𑀥𑁄𑀯𑀸𑀧𑀺𑀢𑀫𑁂𑀯 𑀳𑁄𑀢𑀺, 𑀭𑀚𑀸𑀧𑀦𑀸𑀓𑁄𑀝𑀸𑀧𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀺𑀓𑁆𑀔𑀫𑀸𑀦𑀸𑀬 𑀯𑀸 𑀲𑀸𑀫𑀡𑁂𑀭𑀺𑀬𑀸 𑀯𑀸 𑀉𑀧𑀸𑀲𑀺𑀓𑀸𑀬 𑀯𑀸 𑀳𑀢𑁆𑀣𑁂 𑀥𑁄𑀯𑀦𑀢𑁆𑀣𑀸𑀬 𑀤𑁂𑀢𑀺, 𑀲𑀸 𑀲𑀘𑁂 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀥𑁄𑀯𑀢𑀺, 𑀏𑀯𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀉𑀧𑀸𑀲𑀓𑀲𑁆𑀲 𑀯𑀸 𑀲𑀸𑀫𑀡𑁂𑀭𑀲𑁆𑀲 𑀯𑀸 𑀳𑀢𑁆𑀣𑁂 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑁄 𑀘𑁂 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀉𑀧𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀥𑁄𑀯𑀢𑀺, 𑀤𑀳𑀭𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑁄𑀧𑀺 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀥𑁄𑀯𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯, 𑀭𑀚𑀸𑀧𑀦𑀸𑀓𑁄𑀝𑀸𑀧𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀧𑀼𑀭𑀸𑀡𑀘𑀻𑀯𑀭𑀁 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀥𑁄𑀯𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁦𑁫) 𑀇𑀫𑀺𑀦𑀸 𑀧𑀦𑁂𑀢𑁆𑀣 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁 ‘‘𑀥𑁄𑀯𑀸’’𑀢𑀺𑀆𑀤𑀺𑀓𑀸𑀬 𑀆𑀡𑀢𑁆𑀢𑀺𑀬𑀸, 𑀏𑀯𑀁 𑀆𑀡𑀢𑁆𑀢𑀸𑀬 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀉𑀤𑁆𑀥𑀦𑀲𑀚𑁆𑀚𑀦𑀸𑀤𑀻𑀲𑀼 𑀲𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁. 𑀥𑁄𑀯𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀫𑀢𑁆𑀢𑀁 𑀧𑀦 𑀭𑀢𑁆𑀢𑀫𑀢𑁆𑀢𑀁 𑀆𑀓𑁄𑀝𑀺𑀢𑀫𑀢𑁆𑀢𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀥𑁄𑀯𑀦𑀸𑀤𑀻𑀦𑀺 𑀢𑀻𑀡𑀺𑀧𑀺 𑀤𑁆𑀯𑁂 𑀯𑀸 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀏𑀓𑁂𑀦 𑀯𑀢𑁆𑀣𑀼𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀢𑀭𑁂𑀳𑀺 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 ‘‘𑀥𑁄𑀯𑀸’’𑀢𑀺 𑀯𑀼𑀢𑁆𑀢𑀸 𑀲𑀩𑁆𑀩𑀸𑀦𑀺𑀧𑀺 𑀓𑀭𑁄𑀢𑀺, 𑀥𑁄𑀯𑀦𑀧𑀘𑁆𑀘𑀬𑀸𑀯 𑀆𑀧𑀢𑁆𑀢𑀺. ‘‘𑀇𑀫𑀲𑁆𑀫𑀺𑀁 𑀘𑀻𑀯𑀭𑁂 𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀁 𑀓𑀭𑁄𑀳𑀻’’𑀢𑀺 𑀯𑀤𑀢𑁄 𑀧𑀦 𑀏𑀓𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑁆𑀯𑁂 𑀤𑀼𑀓𑁆𑀓𑀝𑀸𑀦𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀯𑀲𑁂𑀦 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀥𑁄𑀯𑀸𑀧𑁂𑀦𑁆𑀢𑀲𑁆𑀲 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀲𑀦𑁆𑀢𑀓𑀁 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀯𑀸 𑀥𑁄𑀯𑀸𑀧𑁂𑀦𑁆𑀢𑀲𑁆𑀲, 𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀺𑀦𑁄 𑀘𑁂𑀯, 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁, 𑀅𑀜𑁆𑀜𑀸𑀢𑀺𑀓𑀸𑀬 𑀜𑀸𑀢𑀺𑀓𑀲𑀜𑁆𑀜𑀺𑀦𑁄𑀧𑀺 𑀯𑁂𑀫𑀢𑀺𑀓𑀲𑁆𑀲𑀸𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀇𑀢𑁄 𑀧𑀭𑀁 𑀧𑀦 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 ‘‘𑀢𑀺𑀓𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀯𑀓𑁆𑀔𑀸𑀫, 𑀲𑀘𑁂 𑀜𑀸𑀢𑀺𑀓𑀸𑀬 𑀲𑀳𑀸𑀬𑀸 𑀅𑀜𑁆𑀜𑀸𑀢𑀺𑀓𑀸 ‘‘𑀥𑁄𑀯𑀸’’𑀢𑀺 𑀅𑀯𑀼𑀢𑁆𑀢𑀸 𑀯𑀸 𑀥𑁄𑀯𑀢𑀺, 𑀅𑀧𑀭𑀺𑀪𑀼𑀢𑁆𑀢𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀭𑀺𑀓𑁆𑀔𑀸𑀭𑀁 𑀥𑁄𑀯𑀢𑀺, 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀺𑀬𑁄 𑀯𑀸 𑀥𑁄𑀯𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀧𑀼𑀭𑀸𑀡𑀘𑀻𑀯𑀭𑀢𑀸, 𑀉𑀧𑀘𑀸𑀭𑁂 𑀞𑀢𑁆𑀯𑀸 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀡𑀸𑀧𑀦𑀁, 𑀢𑀲𑁆𑀲𑀸 𑀥𑁄𑀯𑀦𑀸𑀤𑀻𑀦𑀺 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀅𑀜𑁆𑀜𑀸𑀢𑀺𑀓𑀸𑀬𑀸𑀢𑀺𑀇𑀤𑀁 𑀯𑀼𑀢𑁆𑀢𑀦𑀬𑀫𑁂𑀯, 𑀢𑀲𑁆𑀫𑀸 𑀇𑀢𑁄 𑀧𑀭𑀁 𑀓𑀢𑁆𑀣𑀘𑀺 𑀦 𑀯𑀺𑀘𑀸𑀭𑀬𑀺𑀲𑁆𑀲𑀸𑀫. 𑀘𑀻𑀯𑀭𑀦𑁆𑀢𑀺 𑀙𑀦𑁆𑀦𑀁 𑀅𑀜𑁆𑀜𑀢𑀭𑀁 𑀯𑀺𑀓𑀧𑁆𑀧𑀦𑀼𑀧𑀕𑀁, 𑀏𑀲 𑀦𑀬𑁄 𑀲𑀩𑁆𑀩𑁂𑀲𑀼 𑀘𑀻𑀯𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀲𑀼. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀯𑀓𑁆𑀔𑀸𑀫. 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺𑀏𑀢𑁆𑀣 𑀳𑀢𑁆𑀣𑁂𑀦 𑀯𑀸 𑀳𑀢𑁆𑀣𑁂 𑀤𑁂𑀢𑀼, 𑀧𑀸𑀤𑀫𑀽𑀮𑁂 𑀯𑀸 𑀞𑀧𑁂𑀢𑀼, 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀯𑀢𑁆𑀣𑁂𑀲𑀼 𑀔𑀺𑀧𑀺𑀬𑀫𑀸𑀦𑁂𑀲𑀼 𑀉𑀧𑀘𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀉𑀧𑀭𑀺 𑀯𑀸 𑀔𑀺𑀧𑀢𑀼, 𑀲𑀘𑁂 𑀲𑀸𑀤𑀺𑀬𑀢𑀺, 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀳𑀢𑁆𑀣𑁂 𑀧𑁂𑀲𑀺𑀢𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, ‘‘𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀲𑀼 𑀞𑀧𑀺𑀢𑀫𑁆𑀧𑀺 𑀧𑀁𑀲𑀼𑀓𑀽𑀮𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸𑀢𑀺 𑀬𑀁 ‘‘𑀅𑀦𑁆𑀢𑀫𑀲𑁄 𑀳𑀭𑀻𑀝𑀓𑀓𑁆𑀔𑀡𑁆𑀟𑀫𑁆𑀧𑀺 𑀤𑀢𑁆𑀯𑀸 𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀢𑁆𑀯𑀸 𑀯𑀸 𑀧𑀸𑀭𑀺𑀯𑀢𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀅𑀦𑁆𑀢𑀫𑀲𑁄 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀝𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀢𑀢𑁆𑀭 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀳𑀺𑀢𑀁 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁧𑁨) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀸𑀚𑀕𑀳𑁂 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀕𑀳𑀡𑀢𑁆𑀣𑀸𑀬 𑀳𑀢𑁆𑀣𑀧𑁆𑀧𑀲𑀸𑀭𑀡𑀸𑀤𑀺𑀧𑁆𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀜𑀸𑀢𑀺𑀓𑀸𑀬 𑀘 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀺𑀲𑁆𑀲 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂, 𑀢𑀸𑀯𑀓𑀸𑀮𑀺𑀓𑁂, 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀫𑁆𑀳𑀺 𑀘 𑀅𑀦𑀥𑀺𑀝𑁆𑀞𑀸𑀢𑀩𑁆𑀩𑀧𑀭𑀺𑀓𑁆𑀔𑀸𑀭𑁂, 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦𑀁 𑀳𑀢𑁆𑀣𑀢𑁄 𑀕𑀳𑀡𑁂, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀧𑀸𑀭𑀺𑀯𑀢𑁆𑀢𑀓𑀸𑀪𑀸𑀯𑁄, 𑀅𑀜𑁆𑀜𑀸𑀢𑀺𑀓𑀸𑀬 𑀳𑀢𑁆𑀣𑀢𑁄 𑀕𑀳𑀡𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀜𑁆𑀘𑀭𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑁂𑀲𑀁 𑀘𑀢𑀼𑀢𑁆𑀣𑀲𑀤𑀺𑀲𑀫𑁂𑀯𑀸𑀢𑀺.

𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀕𑀳𑀧𑀢𑀺𑀦𑁆𑀢𑀺 𑀪𑀺𑀓𑁆𑀔𑀽𑀲𑀼 𑀅𑀧𑀩𑁆𑀩𑀚𑀺𑀢𑀫𑀦𑀼𑀲𑁆𑀲𑀁. 𑀕𑀳𑀧𑀢𑀸𑀦𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀲𑀼 𑀅𑀧𑀩𑁆𑀩𑀚𑀺𑀢𑀺𑀢𑁆𑀣𑀺𑀁, 𑀏𑀲 𑀦𑀬𑁄 𑀲𑀩𑁆𑀩𑁂𑀲𑀼 𑀕𑀳𑀧𑀢𑀺𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀯𑀺𑀜𑁆𑀜𑀸𑀧𑁂𑀬𑁆𑀬𑀸𑀢𑀺 𑀬𑀸𑀘𑁂𑀬𑁆𑀬 𑀯𑀸 𑀬𑀸𑀘𑀸𑀧𑁂𑀬𑁆𑀬 𑀯𑀸. 𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀬𑁄 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀯𑀸 𑀳𑁄𑀢𑀺 𑀦𑀝𑁆𑀞𑀘𑀻𑀯𑀭𑁄 𑀯𑀸, 𑀢𑀲𑁆𑀲 𑀢𑀁 𑀲𑀫𑀬𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀜𑁆𑀜𑀸𑀧𑀦𑀧𑁆𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀢𑀢𑁆𑀣 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀓𑀁 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀯𑀺𑀜𑁆𑀜𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁨𑁪) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. ‘‘𑀅𑀜𑁆𑀜𑀢𑁆𑀭 𑀲𑀫𑀬𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀘 𑀤𑀼𑀓𑁆𑀓𑀝𑀁. 𑀲𑀫𑀬𑁂 𑀯𑀸 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀢𑀲𑁆𑀲𑁂𑀯𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀥𑀦𑁂𑀦 𑀕𑀡𑁆𑀳𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑀼𑀢𑁆𑀣𑀲𑀤𑀺𑀲𑀸𑀦𑁂𑀯𑀸𑀢𑀺.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀢𑀜𑁆𑀘𑁂𑀢𑀺 𑀢𑀁 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀁 𑀯𑀸 𑀦𑀝𑁆𑀞𑀘𑀻𑀯𑀭𑀁 𑀯𑀸. 𑀅𑀪𑀺𑀳𑀝𑁆𑀞𑀼𑀦𑁆𑀢𑀺 𑀅𑀪𑀻𑀢𑀺 𑀉𑀧𑀲𑀕𑁆𑀕𑁄, 𑀳𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄, 𑀕𑀡𑁆𑀳𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀸𑀭𑁂𑀬𑁆𑀬𑀸𑀢𑀺 𑀇𑀘𑁆𑀙𑀸𑀧𑁂𑀬𑁆𑀬, 𑀇𑀘𑁆𑀙𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀬𑁆𑀬, ‘‘𑀬𑀸𑀯𑀢𑁆𑀢𑀓𑀁 𑀇𑀘𑁆𑀙𑀲𑀺, 𑀢𑀸𑀯𑀢𑁆𑀢𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀏𑀯𑀁 𑀦𑀺𑀫𑀦𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄, 𑀬𑀣𑀸 𑀯𑀸 ‘‘𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄’’𑀢𑀺 (𑀲𑀼. 𑀦𑀺. 𑁪𑁨𑁬, 𑁧𑁧𑁦𑁪; 𑀘𑀽𑀴𑀦𑀺. 𑀚𑀢𑀼𑀓𑀡𑁆𑀡𑀻𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁬𑁭) 𑀏𑀢𑁆𑀣 𑀤𑀺𑀲𑁆𑀯𑀸𑀢𑀺 𑀅𑀢𑁆𑀣𑁄, 𑀏𑀯𑀫𑀺𑀥𑀸𑀧𑀺 ‘‘𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀉𑀧𑀦𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑁂𑀦𑁆𑀢𑁄 𑀓𑀸𑀬𑁂𑀦 𑀯𑀸, ‘‘𑀅𑀫𑁆𑀳𑀸𑀓𑀁 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀢𑁄 𑀬𑀢𑁆𑀢𑀓𑀁 𑀇𑀘𑁆𑀙𑀣, 𑀢𑀢𑁆𑀢𑀓𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀦𑁆𑀢𑁄 𑀯𑀸𑀘𑀸𑀬 𑀯𑀸 𑀅𑀪𑀺𑀳𑀭𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀦𑁆𑀢𑀺 𑀲𑀅𑀦𑁆𑀢𑀭𑀁 𑀉𑀢𑁆𑀢𑀭𑀁 𑀧𑀭𑀫𑀁 𑀅𑀲𑁆𑀲 𑀘𑀻𑀯𑀭𑀲𑁆𑀲𑀸𑀢𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁, 𑀦𑀺𑀯𑀸𑀲𑀦𑁂𑀦 𑀲𑀤𑁆𑀥𑀺𑀁 𑀧𑀸𑀭𑀼𑀧𑀦𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩𑀦𑁆𑀢𑀺 𑀢𑀢𑁄 𑀅𑀪𑀺𑀳𑀝𑀘𑀻𑀯𑀭𑀢𑁄 𑀏𑀢𑁆𑀢𑀓𑀁 𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁, 𑀦 𑀢𑀢𑁄 𑀧𑀭𑀁.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀬𑀲𑁆𑀲 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲 𑀢𑀻𑀡𑀺 𑀦𑀝𑁆𑀞𑀸𑀦𑀺, 𑀢𑁂𑀦 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀜𑁆𑀜𑀁 𑀲𑀪𑀸𑀕𑀝𑁆𑀞𑀸𑀦𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀬𑀲𑁆𑀲 𑀤𑁆𑀯𑁂 𑀦𑀝𑁆𑀞𑀸𑀦𑀺, 𑀢𑁂𑀦 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀓𑀢𑀺𑀬𑀸𑀯 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀢𑀺, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀏𑀯𑀁 𑀏𑀓𑀁 𑀲𑀸𑀤𑀺𑀬𑀦𑁆𑀢𑁂𑀦𑁂𑀯 𑀲𑀫𑁄 𑀪𑀯𑀺𑀲𑁆𑀲𑀢𑀺. 𑀬𑀲𑁆𑀲 𑀢𑀻𑀲𑀼 𑀏𑀓𑀁 𑀦𑀝𑁆𑀞𑀁, 𑀓𑀺𑀜𑁆𑀘𑀺 𑀦 𑀲𑀸𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀧𑀦 𑀤𑁆𑀯𑀻𑀲𑀼 𑀏𑀓𑀁 𑀦𑀝𑁆𑀞𑀁, 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀏𑀓𑀁𑀬𑁂𑀯 𑀳𑁄𑀢𑀺, 𑀢𑀜𑁆𑀘 𑀦𑀝𑁆𑀞𑀁, 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀧𑀜𑁆𑀘𑀲𑀼 𑀦𑀝𑁆𑀞𑁂𑀲𑀼 𑀤𑁆𑀯𑁂 𑀲𑀸𑀤𑀺𑀢𑀩𑁆𑀩𑀸𑀦𑀺, 𑀘𑀢𑀽𑀲𑀼 𑀦𑀝𑁆𑀞𑁂𑀲𑀼 𑀏𑀓𑀁 𑀲𑀸𑀤𑀺𑀢𑀩𑁆𑀩𑀁, 𑀢𑀻𑀲𑀼 𑀦𑀝𑁆𑀞𑁂𑀲𑀼 𑀦 𑀓𑀺𑀜𑁆𑀘𑀺 𑀲𑀸𑀤𑀺𑀢𑀩𑁆𑀩𑀁, 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀻𑀲𑀼 𑀯𑀸 𑀏𑀓𑀲𑁆𑀫𑀺𑀁 𑀯𑀸. 𑀬𑁂𑀦 𑀓𑁂𑀦𑀘𑀺 𑀳𑀺 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀢𑀸𑀬 𑀞𑀸𑀢𑀩𑁆𑀩𑀁, 𑀢𑀢𑁄 𑀉𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑀦𑀧𑁆𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀢𑀢𑁆𑀣 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀓𑀁 𑀢𑀢𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁨𑁪) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀩𑀳𑀼𑀘𑀻𑀯𑀭𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀤𑁆𑀯𑁂 𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 ‘‘𑀲𑁂𑀲𑀓𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲, ‘‘𑀲𑁂𑀲𑀓𑀁 𑀢𑀼𑀬𑁆𑀳𑀁𑀬𑁂𑀯 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑀲𑁆𑀲, 𑀦 𑀅𑀘𑁆𑀙𑀺𑀦𑁆𑀦𑀦𑀝𑁆𑀞𑀓𑀸𑀭𑀡𑀸 𑀤𑀺𑀦𑁆𑀦𑀁 𑀕𑀡𑁆𑀳𑀦𑁆𑀢𑀲𑁆𑀲, 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀥𑀦𑁂𑀦 𑀕𑀡𑁆𑀳𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀢𑀢𑀼𑀢𑁆𑀢𑀭𑀺𑀢𑀸, 𑀅𑀘𑁆𑀙𑀺𑀦𑁆𑀦𑀸𑀤𑀺𑀓𑀸𑀭𑀡𑀢𑀸, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑀼𑀢𑁆𑀣𑀲𑀤𑀺𑀲𑀸𑀦𑁂𑀯𑀸𑀢𑀺.

𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀪𑀺𑀓𑁆𑀔𑀼𑀁 𑀧𑀦𑁂𑀯 𑀉𑀤𑁆𑀤𑀺𑀲𑁆𑀲𑀸𑀢𑀺 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀧𑀤𑀺𑀲𑀺𑀢𑁆𑀯𑀸. 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀦𑁆𑀢𑀺 𑀳𑀺𑀭𑀜𑁆𑀜𑀸𑀤𑀺𑀓𑀁 𑀘𑀻𑀯𑀭𑀫𑀽𑀮𑀁. 𑀉𑀧𑀓𑁆𑀔𑀝𑀁 𑀳𑁄𑀢𑀻𑀢𑀺 𑀲𑀚𑁆𑀚𑀺𑀢𑀁 𑀳𑁄𑀢𑀺, 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑀁. 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸, 𑀓𑀸𑀭𑁂𑀢𑁆𑀯𑀸 𑀯𑀸 𑀓𑀺𑀡𑀺𑀢𑁆𑀯𑀸 𑀯𑀸𑀢𑀺 𑀅𑀢𑁆𑀣𑁄. 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑁆𑀲𑀸𑀫𑀻𑀢𑀺 𑀯𑁄𑀳𑀸𑀭𑀯𑀘𑀦𑀫𑁂𑀢𑀁, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀸𑀫𑀻𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄. 𑀢𑀢𑁆𑀭 𑀘𑁂 𑀲𑁄𑀢𑀺 𑀬𑀢𑁆𑀭 𑀲𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀸𑀦𑀻 𑀯𑀸, 𑀢𑀢𑁆𑀭 𑀲𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬 𑀘𑁂𑀢𑀺 𑀅𑀬𑀫𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑁄. 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀲𑀺𑀝𑁆𑀞𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁 𑀆𑀧𑀚𑁆𑀚𑁂𑀬𑁆𑀬. 𑀬𑀣𑀸 𑀧𑀦 𑀢𑀫𑀸𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀸𑀥𑀼 𑀯𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀥𑀽𑀢𑀺 𑀆𑀬𑀸𑀘𑀦𑁂 𑀦𑀺𑀧𑀸𑀢𑁄. 𑀯𑀢𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑁂. 𑀫𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀭𑀁 𑀆𑀮𑀧𑀢𑀺. 𑀏𑀯𑀭𑀽𑀧𑀁 𑀯𑀸 𑀏𑀯𑀭𑀽𑀧𑀁 𑀯𑀸𑀢𑀺 𑀆𑀬𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁. 𑀓𑀮𑁆𑀬𑀸𑀡𑀓𑀫𑁆𑀬𑀢𑀁 𑀉𑀧𑀸𑀤𑀸𑀬𑀸𑀢𑀺 𑀲𑀼𑀦𑁆𑀤𑀭𑀓𑀸𑀫𑀢𑀁 𑀯𑀺𑀲𑀺𑀝𑁆𑀞𑀓𑀸𑀫𑀢𑀁 𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸, 𑀢𑀲𑁆𑀲 ‘‘𑀆𑀧𑀚𑁆𑀚𑁂𑀬𑁆𑀬 𑀘𑁂’’𑀢𑀺𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀲𑀘𑁂 𑀧𑀦 𑀏𑀯𑀭𑀽𑀧𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲 𑀯𑀘𑀦𑁂𑀦 𑀬𑁄 𑀧𑀞𑀫𑀁 𑀅𑀥𑀺𑀧𑁆𑀧𑁂𑀢𑀢𑁄 𑀫𑀽𑀮𑀁 𑀯𑀟𑁆𑀠𑁂𑀢𑁆𑀯𑀸 𑀲𑀼𑀦𑁆𑀤𑀭𑀢𑀭𑀁 𑀘𑁂𑀢𑀸𑀧𑁂𑀢𑀺, 𑀢𑀲𑁆𑀲 𑀧𑀬𑁄𑀕𑁂 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀢𑀢𑁆𑀣 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑀁 𑀅𑀜𑁆𑀜𑀸𑀢𑀓𑀁 𑀕𑀳𑀧𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁨𑁯) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀫𑀳𑀕𑁆𑀖𑀁 𑀘𑁂𑀢𑀸𑀧𑁂𑀢𑀼𑀓𑀸𑀫𑀁 𑀅𑀧𑁆𑀧𑀕𑁆𑀖𑀁 𑀯𑀸, 𑀏𑀢𑁂𑀦𑁂𑀯 𑀫𑀽𑀮𑁂𑀦 ‘‘𑀅𑀜𑁆𑀜𑀁 𑀏𑀯𑀭𑀽𑀧𑀁 𑀯𑀸 𑀤𑁂𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲, 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀥𑀦𑁂𑀦 𑀕𑀡𑁆𑀳𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀘𑀻𑀯𑀭𑁂 𑀪𑀺𑀬𑁆𑀬𑁄𑀓𑀫𑁆𑀬𑀢𑀸, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑀼𑀢𑁆𑀣𑀲𑀤𑀺𑀲𑀸𑀦𑁂𑀯𑀸𑀢𑀺.

𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀧𑀼𑀭𑀺𑀫𑀲𑁆𑀲 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀁, 𑀓𑁂𑀯𑀮𑀁 𑀢𑀢𑁆𑀣 𑀏𑀓𑀲𑁆𑀲 𑀧𑀻𑀴𑀸 𑀓𑀢𑀸, 𑀇𑀥 𑀤𑁆𑀯𑀺𑀦𑁆𑀦𑀁, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄, 𑀲𑁂𑀲𑀁 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀬𑀣𑀸 𑀘 𑀤𑁆𑀯𑀺𑀦𑁆𑀦𑀁, 𑀏𑀯𑀁 𑀩𑀳𑀽𑀦𑀁 𑀧𑀻𑀴𑀁 𑀓𑀢𑁆𑀯𑀸 𑀕𑀡𑁆𑀳𑀢𑁄𑀧𑀺 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑁂 𑀘 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁂 𑀅𑀜𑁆𑀜𑀸𑀢𑀓𑁂 𑀕𑀳𑀧𑀢𑀺𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁩𑁪) 𑀇𑀫𑀺𑀦𑀸 𑀦𑀬𑁂𑀦 𑀯𑀘𑀦𑀪𑁂𑀤𑁄 𑀜𑀸𑀢𑀩𑁆𑀩𑁄𑀢𑀺.

𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀭𑀸𑀚𑀪𑁄𑀕𑁆𑀕𑁄𑀢𑀺 𑀭𑀸𑀚𑀢𑁄 𑀪𑁄𑀕𑁆𑀕𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀸𑀚𑀪𑁄𑀕𑁆𑀕𑁄, ‘‘𑀭𑀸𑀚𑀪𑁄𑀕𑁄’’𑀢𑀺𑀧𑀺 𑀧𑀸𑀞𑁄, 𑀭𑀸𑀚𑀢𑁄 𑀪𑁄𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀦𑁆𑀢𑀺 𑀳𑀺𑀭𑀜𑁆𑀜𑀸𑀤𑀺𑀓𑀁 𑀅𑀓𑀧𑁆𑀧𑀺𑀬𑀁. 𑀧𑀳𑀺𑀡𑁂𑀬𑁆𑀬𑀸𑀢𑀺 𑀧𑁂𑀲𑁂𑀬𑁆𑀬. 𑀇𑀫𑀺𑀦𑀸𑀢𑀺𑀆𑀤𑀺 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀘𑁂 𑀳𑀺 ‘‘𑀇𑀤𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺 𑀧𑁂𑀲𑁂𑀬𑁆𑀬, 𑀆𑀕𑀫𑀦𑀲𑁆𑀲 𑀅𑀲𑀼𑀤𑁆𑀥𑀢𑁆𑀢𑀸 𑀅𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀆𑀭𑀩𑁆𑀪 𑀪𑀺𑀓𑁆𑀔𑀼𑀦𑀸 𑀓𑀧𑁆𑀧𑀺𑀬𑀓𑀸𑀭𑀓𑁄𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬. 𑀆𑀪𑀢𑀦𑁆𑀢𑀺 𑀆𑀦𑀻𑀢𑀁. 𑀦 𑀔𑁄 𑀫𑀬𑀦𑁆𑀢𑀺𑀆𑀤𑀺 𑀇𑀤𑀁 𑀓𑀧𑁆𑀧𑀺𑀬𑀯𑀲𑁂𑀦 𑀆𑀪𑀢𑀫𑁆𑀧𑀺 𑀘𑀻𑀯𑀭𑀫𑀽𑀮𑀁 𑀈𑀤𑀺𑀲𑁂𑀦 𑀤𑀽𑀢𑀯𑀘𑀦𑁂𑀦 𑀅𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀼𑀯𑀡𑁆𑀡𑀁 𑀭𑀚𑀢𑀁 𑀓𑀳𑀸𑀧𑀡𑁄 𑀫𑀸𑀲𑀓𑁄𑀢𑀺 𑀇𑀫𑀸𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀦𑀺, 𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀁 𑀲𑀢𑁆𑀢 𑀥𑀜𑁆𑀜𑀸𑀦𑀺 𑀤𑀸𑀲𑀺𑀤𑀸𑀲𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀸𑀤𑀬𑁄𑀢𑀺 𑀇𑀫𑀸𑀦𑀺 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀺 𑀘 𑀅𑀢𑁆𑀢𑀦𑁄 𑀯𑀸 𑀘𑁂𑀢𑀺𑀬𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀯𑀸 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀲𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦 𑀔𑁄 𑀫𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀇𑀤𑀁 𑀧𑀦 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀆𑀪𑀢𑀢𑁆𑀢𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦, 𑀬𑀤𑀸 𑀦𑁄 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀓𑀧𑁆𑀧𑀺𑀬𑀁 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀅𑀢𑁆𑀣𑁄. 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑁄. 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄𑀢𑀺𑀇𑀤𑀁 ‘‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀓𑀧𑁆𑀧𑀺𑀬𑀯𑀘𑀦𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀜𑁆𑀜𑀸𑀢𑀁. 𑀲𑀘𑁂 𑀧𑀦 𑀤𑀽𑀢𑁄 ‘‘𑀓𑁄 𑀇𑀫𑀁 𑀕𑀡𑁆𑀳𑀸𑀢𑀻’’𑀢𑀺 𑀯𑀸 ‘‘𑀓𑀲𑁆𑀲 𑀤𑁂𑀫𑀻’’𑀢𑀺 𑀯𑀸 𑀯𑀤𑀢𑀺, 𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸𑀢𑀺𑀇𑀤𑀁 𑀲𑀸𑀭𑀼𑀧𑁆𑀧𑀢𑀸𑀬 𑀯𑀼𑀢𑁆𑀢𑀁, 𑀞𑀧𑁂𑀢𑁆𑀯𑀸 𑀧𑀦 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀬𑁄 𑀓𑁄𑀘𑀺 𑀓𑀧𑁆𑀧𑀺𑀬𑀓𑀸𑀭𑀓𑁄 𑀯𑀝𑁆𑀝𑀢𑀺. 𑀏𑀲𑁄 𑀔𑁄, 𑀆𑀯𑀼𑀲𑁄𑀢𑀺𑀇𑀤𑀁 𑀪𑀺𑀓𑁆𑀔𑀼𑀲𑁆𑀲 𑀓𑀧𑁆𑀧𑀺𑀬𑀯𑀘𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀏𑀯𑀫𑁂𑀯 𑀳𑀺 𑀯𑀢𑁆𑀢𑀩𑁆𑀩𑀁, ‘‘𑀏𑀢𑀲𑁆𑀲 𑀤𑁂𑀳𑀻’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁. 𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸𑀢𑀺 𑀆𑀡𑀢𑁆𑀢𑁄 𑀲𑁄 𑀫𑀬𑀸, 𑀬𑀣𑀸 𑀢𑀼𑀫𑁆𑀳𑀸𑀓𑀁 𑀘𑀻𑀯𑀭𑁂𑀦 𑀅𑀢𑁆𑀣𑁂 𑀲𑀢𑀺 𑀘𑀻𑀯𑀭𑀁 𑀤𑀲𑁆𑀲𑀢𑀺, 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀽𑀢𑁂𑀦 𑀳𑀺 𑀏𑀯𑀁 𑀆𑀭𑁄𑀘𑀺𑀢𑁂𑀬𑁂𑀯 𑀢𑀁 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺, 𑀦𑁂𑀯 𑀢𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀕𑀢𑀫𑀢𑁆𑀢𑀓𑀸𑀭𑀡𑁂𑀦. 𑀲𑀘𑁂 𑀧𑀦 ‘‘𑀅𑀬𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺 𑀲𑀫𑁆𑀫𑀼𑀔𑀸 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺, 𑀤𑀽𑀢𑁄 𑀘 𑀲𑀫𑁆𑀫𑀼𑀔𑀸 𑀏𑀯 𑀢𑀲𑁆𑀲 𑀳𑀢𑁆𑀣𑁂 𑀘𑁂𑀢𑀸𑀧𑀦𑁆𑀦𑀁 𑀤𑀢𑁆𑀯𑀸 ‘‘𑀣𑁂𑀭𑀲𑁆𑀲 𑀘𑀻𑀯𑀭𑀁 𑀓𑀺𑀡𑀺𑀢𑁆𑀯𑀸 𑀤𑁂𑀳𑀻’’𑀢𑀺 𑀕𑀘𑁆𑀙𑀢𑀺, 𑀏𑀯𑀁 ‘‘𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀤𑀽𑀢𑁄 𑀕𑀘𑁆𑀙𑀦𑁆𑀢𑁄𑀯 ‘‘𑀅𑀳𑀁 𑀢𑀲𑁆𑀲 𑀳𑀢𑁆𑀣𑁂 𑀤𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀘𑀻𑀯𑀭𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’’𑀢𑀺 𑀪𑀺𑀓𑁆𑀔𑀼𑀦𑁄 𑀯𑀢𑁆𑀯𑀸 𑀯𑀸 𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀆𑀭𑁄𑀘𑀸𑀧𑁂𑀢𑀺, 𑀏𑀯𑀁 𑀲𑀢𑀺 𑀇𑀢𑀭𑀫𑁆𑀧𑀺 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀤𑁂𑀲𑀦𑀸𑀫𑀢𑁆𑀢𑀫𑁂𑀯 𑀘𑁂𑀢𑀁 ‘‘𑀤𑀽𑀢𑁂𑀦𑀸’’𑀢𑀺. 𑀬𑁄𑀧𑀺 𑀅𑀢𑁆𑀢𑀦𑀸 𑀆𑀳𑀭𑀺𑀢𑁆𑀯𑀸 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸𑀢𑀺 𑀘𑁄𑀤𑀦𑀸𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀫𑁂𑀢𑀁. 𑀲𑀘𑁂 𑀳𑀺 𑀯𑀸𑀘𑀸𑀬 𑀘𑁄𑀤𑁂𑀢𑀺, 𑀇𑀤𑀁 𑀯𑀸 𑀯𑀘𑀦𑀁 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬 𑀏𑀢𑀲𑁆𑀲 𑀅𑀢𑁆𑀣𑁄 𑀯𑀸 𑀯𑀢𑁆𑀢𑀩𑁆𑀩𑁄, ‘‘𑀤𑁂𑀳𑀺 𑀫𑁂, 𑀆𑀳𑀭 𑀫𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬𑀸𑀢𑀺 𑀏𑀯𑀁 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀬𑀫𑀸𑀦𑁄 𑀧𑀝𑀺𑀮𑀸𑀪𑀯𑀲𑁂𑀦 𑀲𑀸𑀥𑁂𑀬𑁆𑀬. 𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀏𑀢𑀁 𑀲𑀼𑀦𑁆𑀤𑀭𑀁.

𑀙𑀓𑁆𑀔𑀢𑁆𑀢𑀼𑀧𑀭𑀫𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀯𑀘𑀦𑀫𑁂𑀢𑀁. 𑀙𑀓𑁆𑀔𑀢𑁆𑀢𑀼𑀧𑀭𑀫𑀜𑁆𑀳𑀺 𑀢𑁂𑀦 𑀘𑀻𑀯𑀭𑀁 𑀉𑀤𑁆𑀤𑀺𑀲𑁆𑀲 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀁, 𑀦 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄. ‘‘𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀚𑀸𑀦𑀸𑀳𑀺, 𑀆𑀯𑀼𑀲𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀦𑀺𑀲𑀚𑁆𑀚𑀸𑀤𑀻𑀦𑀺 𑀓𑀭𑁄𑀢𑀺, 𑀞𑀸𑀦𑀁 𑀪𑀜𑁆𑀚𑀢𑀺, 𑀆𑀕𑀢𑀓𑀸𑀭𑀡𑀁 𑀯𑀺𑀦𑀸𑀲𑁂𑀢𑀺, 𑀇𑀤𑀁 𑀓𑀸𑀬𑁂𑀦 𑀘𑁄𑀤𑀦𑀸𑀬 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀢𑀺𑀲𑁆𑀲𑀦𑁆𑀦𑀁 𑀘𑁄𑀤𑀦𑀸𑀦𑀁 𑀙𑀦𑁆𑀦𑀜𑁆𑀘 𑀞𑀸𑀦𑀸𑀦𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘𑁄𑀤𑀦𑀸𑀬 𑀤𑀺𑀕𑀼𑀡𑀁 𑀞𑀸𑀦𑀁 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀘𑁂 𑀘𑁄𑀤𑁂𑀢𑀺𑀬𑁂𑀯, 𑀦 𑀢𑀺𑀝𑁆𑀞𑀢𑀺, 𑀙 𑀘𑁄𑀤𑀦𑀸𑀬𑁄 𑀮𑀩𑁆𑀪𑀦𑁆𑀢𑀺. 𑀲𑀘𑁂 𑀢𑀺𑀝𑁆𑀞𑀢𑀺𑀬𑁂𑀯, 𑀦 𑀘𑁄𑀤𑁂𑀢𑀺, 𑀤𑁆𑀯𑀸𑀤𑀲 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀲𑀘𑁂 𑀉𑀪𑀬𑀁 𑀓𑀭𑁄𑀢𑀺, 𑀏𑀓𑀸𑀬 𑀘𑁄𑀤𑀦𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀳𑀸𑀧𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀬𑁄 𑀏𑀓𑀤𑀺𑀯𑀲𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀕𑀦𑁆𑀢𑁆𑀯𑀸 𑀙𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑀺, 𑀲𑀓𑀺𑀁𑀬𑁂𑀯 𑀯𑀸 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’’𑀢𑀺 𑀙𑀓𑁆𑀔𑀢𑁆𑀢𑀼𑀁 𑀯𑀤𑀢𑀺, 𑀢𑀣𑀸 𑀏𑀓𑀤𑀺𑀯𑀲𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀢𑀺𑀝𑁆𑀞𑀢𑀺, 𑀲𑀓𑀺𑀁𑀬𑁂𑀯 𑀯𑀸 𑀕𑀦𑁆𑀢𑁆𑀯𑀸 𑀢𑀢𑁆𑀭 𑀢𑀢𑁆𑀭 𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀲𑁄𑀧𑀺 𑀲𑀩𑁆𑀩𑀘𑁄𑀤𑀦𑀸𑀬𑁄 𑀲𑀩𑁆𑀩𑀝𑁆𑀞𑀸𑀦𑀸𑀦𑀺 𑀘 𑀪𑀜𑁆𑀚𑀢𑀺, 𑀓𑁄 𑀧𑀦 𑀯𑀸𑀤𑁄 𑀦𑀸𑀦𑀸𑀤𑀺𑀯𑀲𑁂𑀲𑀼 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀬𑁂 𑀧𑀦 𑀓𑀧𑁆𑀧𑀺𑀬𑀓𑀸𑀭𑀓𑁂 𑀤𑀸𑀬𑀓𑁄 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺 𑀢𑁂 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀘𑁄𑀤𑁂𑀢𑀼𑀁 𑀯𑀝𑁆𑀝𑀢𑀺. 𑀬𑁄 𑀧𑀦 𑀉𑀪𑁄𑀳𑀺 𑀧𑀺 𑀅𑀦𑀺𑀤𑁆𑀤𑀺𑀝𑁆𑀞𑁄 𑀫𑀼𑀔𑀯𑁂𑀯𑀝𑀺𑀓𑀓𑀧𑁆𑀧𑀺𑀬𑀓𑀸𑀭𑀓𑁄 𑀘 𑀧𑀭𑀫𑁆𑀫𑀼𑀔𑀓𑀧𑁆𑀧𑀺𑀬𑀓𑀸𑀭𑀓𑁄 𑀘, 𑀲𑁄 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑁄, 𑀏𑀯𑀁 𑀇𑀥 𑀤𑀲𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑀢𑀢𑁄 𑀘𑁂 𑀉𑀢𑁆𑀢𑀭𑀻𑀢𑀺 𑀯𑀼𑀢𑁆𑀢𑀘𑁄𑀤𑀦𑀸𑀞𑀸𑀦𑀧𑀭𑀺𑀫𑀸𑀡𑀢𑁄 𑀉𑀢𑁆𑀢𑀭𑀺. 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀉𑀢𑁆𑀢𑀭𑀺 𑀯𑀸𑀬𑀸𑀫𑀫𑀸𑀦𑀲𑁆𑀲 𑀲𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀏𑀢𑁆𑀣 𑀘 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀅𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀅𑀪𑀺𑀦𑀺𑀧𑁆𑀨𑀸𑀤𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁩𑁯) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀢𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀦𑁆𑀢𑀺 𑀬𑀢𑁄 𑀭𑀸𑀚𑀢𑁄 𑀯𑀸 𑀭𑀸𑀚𑀪𑁄𑀕𑁆𑀕𑀢𑁄 𑀯𑀸 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀦𑀻𑀢𑀁, ‘‘𑀬𑀢𑁆𑀯𑀲𑁆𑀲𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀯𑀸 𑀭𑀸𑀚𑀪𑁄𑀕𑁆𑀕𑀲𑁆𑀲 𑀯𑀸 𑀲𑀦𑁆𑀢𑀺𑀓𑀁, 𑀲𑀫𑀻𑀧𑀢𑁆𑀣𑁂 𑀳𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁. 𑀦 𑀢𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀦𑀼𑀪𑁄𑀢𑀻𑀢𑀺 𑀢𑀁 𑀘𑁂𑀢𑀸𑀧𑀦𑁆𑀦𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀫𑁆𑀫𑀁 𑀦 𑀦𑀺𑀧𑁆𑀨𑀸𑀤𑁂𑀢𑀺. 𑀬𑀼𑀜𑁆𑀚𑀦𑁆𑀢𑀸𑀬𑀲𑁆𑀫𑀦𑁆𑀢𑁄 𑀲𑀓𑀦𑁆𑀢𑀺 𑀆𑀬𑀲𑁆𑀫𑀦𑁆𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀥𑀦𑀁 𑀧𑀸𑀧𑀼𑀡𑀦𑁆𑀢𑀼. 𑀫𑀸 𑀯𑁄 𑀲𑀓𑀁 𑀯𑀺𑀦𑀲𑁆𑀲𑀸𑀢𑀺 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀫𑀸 𑀯𑀺𑀦𑀲𑁆𑀲𑀢𑀼. 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻𑀢𑀺 𑀅𑀬𑀁 𑀢𑀢𑁆𑀣 𑀅𑀦𑀼𑀥𑀫𑁆𑀫𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀕𑀢𑀸, 𑀯𑀢𑁆𑀢𑀥𑀫𑁆𑀫𑀢𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀏𑀯𑀁 𑀅𑀓𑀭𑁄𑀦𑁆𑀢𑁄 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 ‘‘𑀅𑀚𑁆𑀚𑀼𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀻’’𑀢𑀺 (𑀧𑀸𑀭𑀸. 𑁫𑁩𑁭) 𑀯𑀼𑀘𑁆𑀘𑀫𑀸𑀦𑁄 𑀦𑀸𑀕𑀫𑁂𑀲𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀊𑀦𑀓𑁂𑀲𑀼 𑀘𑁄𑀤𑀦𑀸𑀞𑀸𑀦𑁂𑀲𑀼 𑀅𑀢𑀺𑀭𑁂𑀓𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀅𑀘𑁄𑀤𑀦𑀸𑀬 𑀮𑀤𑁆𑀥𑁂, 𑀲𑀸𑀫𑀺𑀓𑁂𑀳𑀺 𑀘𑁄𑀤𑁂𑀢𑁆𑀯𑀸 𑀤𑀺𑀦𑁆𑀦𑁂, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀤𑁆𑀤𑀺𑀝𑁆𑀞𑀪𑀸𑀯𑁄, 𑀤𑀽𑀢𑁂𑀦 𑀅𑀧𑁆𑀧𑀺𑀢𑀢𑀸, 𑀢𑀢𑀼𑀢𑁆𑀢𑀭𑀺𑀯𑀸𑀬𑀸𑀫𑁄, 𑀢𑁂𑀦 𑀯𑀸𑀬𑀸𑀫𑁂𑀦 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀘𑀢𑀼𑀢𑁆𑀣𑀲𑀤𑀺𑀲𑀸𑀦𑁂𑀯𑀸𑀢𑀺.

𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀻𑀯𑀭𑀯𑀕𑁆𑀕𑁄 𑀧𑀞𑀫𑁄.

𑁨. 𑀏𑀴𑀓𑀮𑁄𑀫𑀯𑀕𑁆𑀕𑁄

𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀴𑀓𑀮𑁄𑀫𑀯𑀕𑁆𑀕𑀲𑁆𑀲 𑀧𑀞𑀫𑁂 𑀓𑁄𑀲𑀺𑀬𑀫𑀺𑀲𑁆𑀲𑀓𑀦𑁆𑀢𑀺 𑀏𑀓𑁂𑀦𑀸𑀧𑀺 𑀓𑁄𑀲𑀺𑀬𑀁𑀲𑀼𑀦𑀸 𑀅𑀦𑁆𑀢𑀫𑀲𑁄 𑀢𑀲𑁆𑀲 𑀓𑀭𑀡𑀝𑁆𑀞𑀸𑀦𑁂 𑀯𑀸𑀢𑀯𑁂𑀕𑁂𑀦 𑀦𑀺𑀧𑀸𑀢𑀺𑀢𑁂𑀦𑀸𑀧𑀺 𑀫𑀺𑀲𑁆𑀲𑀻𑀓𑀢𑀁. 𑀲𑀦𑁆𑀣𑀢𑀦𑁆𑀢𑀺 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀓𑁄𑀲𑀺𑀬𑀁𑀲𑀽𑀦𑀺 𑀉𑀧𑀭𑀽𑀧𑀭𑀺 𑀲𑀦𑁆𑀣𑀭𑀺𑀢𑁆𑀯𑀸 𑀓𑀜𑁆𑀚𑀺𑀬𑀸𑀤𑀻𑀳𑀺 𑀲𑀺𑀜𑁆𑀘𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀢𑀸𑀮𑀓𑁆𑀔𑀡𑀁. 𑀓𑀸𑀭𑀸𑀧𑁂𑀬𑁆𑀬 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀓𑀭𑀡𑀓𑀸𑀭𑀸𑀧𑀦𑀧𑁆𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀏𑀢𑁆𑀣 𑀘 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀧𑀸𑀭𑀸. 𑁫𑁪𑁪) 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀲𑁆𑀲𑀚𑁆𑀚𑀦𑀯𑀺𑀥𑀸𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀇𑀫𑀲𑁆𑀲𑁂𑀯 𑀯𑀘𑀦𑀲𑁆𑀲 𑀅𑀦𑀼𑀲𑀸𑀭𑁂𑀦 𑀇𑀢𑁄 𑀧𑀭𑀁 𑀲𑀩𑁆𑀩𑀲𑀦𑁆𑀣𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀓𑁆𑀓𑀸 𑀳𑀺 𑀏𑀢𑁆𑀢𑀸𑀯𑀢𑀸 𑀚𑀸𑀦𑀺𑀢𑀼𑀦𑁆𑀢𑀺 𑀦 𑀢𑀁 𑀇𑀢𑁄 𑀧𑀭𑀁 𑀤𑀲𑁆𑀲𑀬𑀺𑀲𑁆𑀲𑀸𑀫.

𑀆𑀴𑀯𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀸𑀭𑀸𑀧𑀦𑀯𑀲𑁂𑀦 𑀲𑀸𑀡𑀢𑁆𑀢𑀺𑀓𑀁, 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀧𑀅𑀬𑁄𑀲𑀸𑀧𑀦𑀦𑀬𑁂𑀦 𑀘𑀢𑀼𑀓𑁆𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑀡𑀓𑀸𑀭𑀸𑀧𑀦𑁂𑀲𑀼 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁂 𑀘 𑀤𑀼𑀓𑁆𑀓𑀝𑀁. 𑀯𑀺𑀢𑀸𑀦𑀸𑀤𑀺𑀓𑀭𑀡𑁂, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀓𑁄𑀲𑀺𑀬𑀫𑀺𑀲𑁆𑀲𑀓𑀪𑀸𑀯𑁄, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀦𑁆𑀣𑀢𑀲𑁆𑀲 𑀓𑀭𑀡𑀓𑀸𑀭𑀸𑀧𑀦𑀁, 𑀧𑀝𑀺𑀮𑀸𑀪𑁄 𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀲𑀼𑀤𑁆𑀥𑀓𑀸𑀴𑀓𑀸𑀦𑀦𑁆𑀢𑀺 𑀲𑀼𑀤𑁆𑀥𑀸𑀦𑀁 𑀓𑀸𑀴𑀓𑀸𑀦𑀁 𑀅𑀜𑁆𑀜𑁂𑀳𑀺 𑀅𑀫𑀺𑀲𑁆𑀲𑀻𑀓𑀢𑀸𑀦𑀁. 𑀯𑁂𑀲𑀸𑀮𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀢𑀸𑀤𑀺𑀲𑀁 𑀲𑀦𑁆𑀣𑀢𑀁 𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯𑀸𑀢𑀺.

𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀤𑁆𑀯𑁂 𑀪𑀸𑀕𑀸𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸. 𑀆𑀤𑀸𑀢𑀩𑁆𑀩𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀕𑁄𑀘𑀭𑀺𑀬𑀸𑀦𑀦𑁆𑀢𑀺 𑀓𑀧𑀺𑀮𑀯𑀡𑁆𑀡𑀸𑀦𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀬𑀢𑁆𑀢𑀓𑁂𑀳𑀺 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀲𑀼 𑀢𑀼𑀮𑀬𑀺𑀢𑁆𑀯𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀓𑀸𑀴𑀓𑀸𑀦𑀁 𑀕𑀳𑁂𑀢𑀩𑁆𑀩𑀸, 𑀏𑀓𑁄 𑀑𑀤𑀸𑀢𑀸𑀦𑀁, 𑀏𑀓𑁄 𑀕𑁄𑀘𑀭𑀺𑀬𑀸𑀦𑀁. 𑀏𑀓𑀲𑁆𑀲𑀸𑀧𑀺 𑀓𑀸𑀴𑀓𑀮𑁄𑀫𑀲𑁆𑀲 𑀅𑀢𑀺𑀭𑁂𑀓𑀪𑀸𑀯𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀊𑀦𑀓𑀁 𑀯𑀝𑁆𑀝𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀢𑀸𑀤𑀺𑀲𑀁 𑀲𑀦𑁆𑀣𑀢𑀁 𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯𑀸𑀢𑀺. 𑀇𑀫𑀸𑀦𑀺 𑀧𑀦 𑀢𑀻𑀡𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀸𑀦𑀺𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺.

𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀑𑀭𑁂𑀦 𑀘𑁂 𑀙𑀦𑁆𑀦𑀁 𑀯𑀲𑁆𑀲𑀸𑀦𑀦𑁆𑀢𑀺 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀑𑀭𑀺𑀫𑀪𑀸𑀕𑁂, 𑀅𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀬𑀁 𑀲𑀗𑁆𑀖𑁄 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀣𑀢𑀲𑀫𑁆𑀫𑀼𑀢𑀺𑀁 𑀤𑁂𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀙𑀩𑁆𑀩𑀲𑁆𑀲𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑀁 𑀲𑀦𑁆𑀣𑀢𑀁 𑀓𑀭𑁄𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀦𑀼𑀯𑀲𑁆𑀲𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀲𑀸 𑀬𑁂𑀦 𑀮𑀤𑁆𑀥𑀸 𑀳𑁄𑀢𑀺, 𑀢𑀲𑁆𑀲 𑀬𑀸𑀯 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀯𑀽𑀧𑀲𑀦𑁆𑀢𑁄 𑀯𑀸 𑀧𑀼𑀦 𑀓𑀼𑀧𑁆𑀧𑀢𑀺, 𑀢𑀸𑀯 𑀕𑀢𑀕𑀢𑀝𑁆𑀞𑀸𑀦𑁂 𑀅𑀦𑀼𑀯𑀲𑁆𑀲𑀫𑁆𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀸𑀭𑁂𑀢𑀼𑀁, 𑀓𑀢𑀜𑁆𑀘 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀲𑁂𑀲𑀁 𑀧𑀞𑀫𑀲𑀤𑀺𑀲𑀫𑁂𑀯𑀸𑀢𑀺.

𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀧𑀼𑀭𑀸𑀡𑀲𑀦𑁆𑀣𑀢𑀁 𑀦𑀸𑀫 𑀬𑀢𑁆𑀣 𑀲𑀓𑀺𑀫𑁆𑀧𑀺 𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀦𑀺𑀧𑀦𑁆𑀦𑁄 𑀯𑀸. 𑀲𑀫𑀦𑁆𑀢𑀸𑀢𑀺 𑀏𑀓𑀧𑀲𑁆𑀲𑀢𑁄 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀝𑁆𑀞𑀸𑀦𑀁 𑀬𑀣𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀕𑀳𑁂𑀢𑀩𑁆𑀩𑀁. 𑀲𑀦𑁆𑀣𑀭𑀦𑁆𑀢𑁂𑀦 𑀧𑀦 𑀏𑀓𑀤𑁂𑀲𑁂 𑀯𑀸 𑀲𑀦𑁆𑀣𑀭𑀺𑀢𑀩𑁆𑀩𑀁, 𑀯𑀺𑀚𑀝𑁂𑀢𑁆𑀯𑀸 𑀯𑀸 𑀫𑀺𑀲𑁆𑀲𑀓𑀁 𑀓𑀢𑁆𑀯𑀸 𑀲𑀦𑁆𑀣𑀭𑀺𑀢𑀩𑁆𑀩𑀁, 𑀏𑀯𑀁 𑀣𑀺𑀭𑀢𑀭𑀁 𑀳𑁄𑀢𑀺. 𑀅𑀦𑀸𑀤𑀸 𑀘𑁂𑀢𑀺 𑀲𑀢𑀺 𑀧𑀼𑀭𑀸𑀡𑀲𑀦𑁆𑀣𑀢𑁂 𑀅𑀕𑁆𑀕𑀳𑁂𑀢𑁆𑀯𑀸. 𑀅𑀲𑀢𑀺 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀸𑀭𑁂𑀢𑀼𑀁, 𑀓𑀢𑀜𑁆𑀘 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀲𑀦𑁆𑀣𑀢𑀯𑀺𑀲𑁆𑀲𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀢𑀢𑀺𑀬𑀲𑀤𑀺𑀲𑀫𑁂𑀯𑀸𑀢𑀺.

𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑀁 𑀤𑀻𑀖𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀲𑀩𑁆𑀩𑀜𑁆𑀘𑁂𑀢𑀁 𑀯𑀢𑁆𑀣𑀼𑀫𑀢𑁆𑀢𑀤𑀻𑀧𑀦𑀫𑁂𑀯, 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀦 𑀥𑀫𑁆𑀫𑁂𑀦 𑀮𑀪𑀺𑀢𑁆𑀯𑀸 𑀕𑀡𑁆𑀳𑀢𑁄 𑀤𑁄𑀲𑁄 𑀦𑀢𑁆𑀣𑀺. 𑀢𑀺𑀬𑁄𑀚𑀦𑀧𑀭𑀫𑀦𑁆𑀢𑀺 𑀕𑀳𑀺𑀢𑀝𑁆𑀞𑀸𑀦𑀢𑁄 𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀁 𑀤𑁂𑀲𑀁. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦, 𑀅𑀢𑁆𑀢𑀦𑀸 𑀳𑀭𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀢𑁂 𑀳𑀸𑀭𑀓𑁂𑀢𑀺 𑀅𑀲𑀦𑁆𑀢𑁂𑀬𑁂𑀯 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀳𑀸𑀭𑀓𑁂. 𑀲𑀘𑁂 𑀧𑀦 𑀅𑀢𑁆𑀣𑀺, 𑀢𑀁 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀢𑁆𑀢𑀦𑀸 𑀧𑀦 𑀅𑀦𑁆𑀢𑀫𑀲𑁄 𑀯𑀸𑀢𑀸𑀩𑀸𑀥𑀧𑁆𑀧𑀝𑀺𑀓𑀸𑀭𑀢𑁆𑀣𑀁 𑀲𑀼𑀢𑁆𑀢𑀓𑁂𑀦 𑀅𑀩𑀦𑁆𑀥𑀺𑀢𑁆𑀯𑀸 𑀓𑀡𑁆𑀡𑀘𑁆𑀙𑀺𑀤𑁆𑀤𑁂 𑀧𑀓𑁆𑀔𑀺𑀢𑁆𑀢𑀸𑀦𑀺𑀧𑀺 𑀆𑀤𑀸𑀬 𑀢𑀺𑀬𑁄𑀚𑀦𑀁 𑀏𑀓𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑀧𑀸𑀤𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀊𑀦𑀓𑀢𑀺𑀬𑁄𑀚𑀦𑁂 𑀅𑀢𑀺𑀭𑁂𑀓𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀢𑀺𑀬𑁄𑀚𑀦𑀁 𑀳𑀭𑀡𑀧𑀘𑁆𑀘𑀸𑀳𑀭𑀡𑁂, 𑀯𑀸𑀲𑀸𑀥𑀺𑀧𑁆𑀧𑀸𑀬𑁂𑀦 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀳𑀭𑀡𑁂, 𑀅𑀘𑁆𑀙𑀺𑀦𑁆𑀦𑀁 𑀯𑀸 𑀦𑀺𑀲𑁆𑀲𑀝𑁆𑀞𑀁 𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀳𑀭𑀡𑁂, 𑀅𑀜𑁆𑀜𑀁 𑀳𑀭𑀸𑀧𑀦𑁂, 𑀅𑀦𑁆𑀢𑀫𑀲𑁄 𑀲𑀼𑀢𑁆𑀢𑀓𑁂𑀦𑀧𑀺 𑀩𑀤𑁆𑀥𑀓𑀢𑀪𑀡𑁆𑀟𑀳𑀭𑀡𑁂, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀏𑀴𑀓𑀮𑁄𑀫𑀸𑀦𑀁 𑀅𑀓𑀢𑀪𑀡𑁆𑀟𑀢𑀸, 𑀧𑀞𑀫𑀧𑁆𑀧𑀝𑀺𑀮𑀸𑀪𑁄, 𑀅𑀢𑁆𑀢𑀦𑀸 𑀆𑀤𑀸𑀬 𑀯𑀸 𑀅𑀜𑁆𑀜𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲 𑀬𑀸𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑀦𑀁, 𑀆𑀳𑀭𑀡𑀧𑀘𑁆𑀘𑀸𑀳𑀭𑀡𑀁, 𑀅𑀯𑀸𑀲𑀸𑀥𑀺𑀧𑁆𑀧𑀸𑀬𑀢𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀲𑀓𑁆𑀓𑁂𑀲𑀼 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀣 𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑁄𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀚𑀸𑀢𑀭𑀽𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺 𑀲𑀼𑀯𑀡𑁆𑀡𑀜𑁆𑀘𑁂𑀯 𑀭𑀽𑀧𑀺𑀬𑀜𑁆𑀘, 𑀅𑀧𑀺𑀘 𑀓𑀳𑀸𑀧𑀡𑁄 𑀮𑁄𑀳𑀫𑀸𑀲𑀓𑀤𑀸𑀭𑀼𑀫𑀸𑀲𑀓𑀚𑀢𑀼𑀫𑀸𑀲𑀓𑀸𑀤𑀬𑁄𑀧𑀺 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀥 𑀭𑀚𑀢𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀉𑀕𑁆𑀕𑀡𑁆𑀳𑁂𑀬𑁆𑀬 𑀯𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀤𑀺𑀬𑁆𑀬𑀫𑀸𑀦𑀁 𑀯𑀸 𑀬𑀢𑁆𑀣𑀓𑀢𑁆𑀣𑀘𑀺 𑀞𑀺𑀢𑀁 𑀯𑀸 𑀦𑀺𑀧𑁆𑀧𑀭𑀺𑀕𑁆𑀕𑀳𑀺𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀕𑀡𑁆𑀳𑁂𑀬𑁆𑀬 𑀯𑀸. 𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬 𑀯𑀸𑀢𑀺 𑀢𑀤𑁂𑀯 𑀅𑀜𑁆𑀜𑁂𑀦 𑀕𑀸𑀳𑀸𑀧𑁂𑀬𑁆𑀬 𑀯𑀸. 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 ‘‘𑀇𑀤𑀁 𑀅𑀬𑁆𑀬𑀲𑁆𑀲 𑀳𑁄𑀢𑀽’’𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸, ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀫𑀫 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁, 𑀢𑀁 𑀢𑀼𑀬𑁆𑀳𑀁 𑀳𑁄𑀢𑀽’’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀞𑀺𑀢𑀁 𑀯𑀸 𑀓𑁂𑀯𑀮𑀁 𑀯𑀸𑀘𑀸𑀬 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 ‘‘𑀢𑀼𑀬𑁆𑀳’’𑀦𑁆𑀢𑀺 𑀯𑀢𑁆𑀯𑀸 𑀧𑀭𑀺𑀘𑁆𑀘𑀢𑁆𑀢𑀁 𑀬𑁄 𑀓𑀸𑀬𑀯𑀸𑀘𑀸𑀳𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑁆𑀢𑁂𑀦 𑀅𑀥𑀺𑀯𑀸𑀲𑁂𑀬𑁆𑀬, 𑀅𑀬𑀁 ‘‘𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀘𑁂 𑀧𑀦 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀢𑀺, 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 ‘‘𑀦𑀬𑀺𑀤𑀁 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀓𑀸𑀬𑀯𑀸𑀘𑀸𑀳𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀦𑀬𑀺𑀤𑀁 𑀅𑀫𑁆𑀳𑀸𑀓𑀁 𑀓𑀧𑁆𑀧𑀢𑀻’’𑀢𑀺 𑀦 𑀲𑀸𑀤𑀺𑀬𑀢𑀺, 𑀯𑀝𑁆𑀝𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀉𑀕𑁆𑀕𑀳𑀡𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀲𑁆𑀲 𑀅𑀖𑀦𑀩𑀤𑁆𑀥𑁂𑀲𑀼 𑀯𑀢𑁆𑀣𑀽𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀁 𑀦𑀺𑀲𑁆𑀲𑀚𑁆𑀚𑀦𑁆𑀢𑁂𑀦 ‘‘𑀅𑀳𑀁, 𑀪𑀦𑁆𑀢𑁂, 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑀺𑀁, 𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 (𑀧𑀸𑀭𑀸. 𑁫𑁮𑁪) 𑀏𑀯𑀁 𑀲𑀗𑁆𑀖𑀫𑀚𑁆𑀛𑁂𑀬𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀢𑀢𑁆𑀣 𑀓𑁄𑀘𑀺 𑀕𑀳𑀝𑁆𑀞𑁄 𑀆𑀕𑀘𑁆𑀙𑀢𑀺, ‘‘𑀇𑀤𑀁 𑀚𑀸𑀦𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀇𑀫𑀺𑀦𑀸 𑀓𑀺𑀁 𑀆𑀳𑀭𑀺𑀬𑁆𑀬𑀢𑀽’’𑀢𑀺 𑀪𑀡𑀦𑁆𑀢𑁂 𑀧𑀦 ‘‘𑀇𑀤𑀁 𑀦𑀸𑀫𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀧𑁆𑀧𑀺𑀆𑀤𑀻𑀦𑀺 𑀪𑀺𑀓𑁆𑀔𑀽𑀦𑀁 𑀓𑀧𑁆𑀧𑀦𑁆𑀢𑀻’’𑀢𑀺 𑀏𑀯𑀁 𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀆𑀳𑀭𑀢𑀺, 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀸𑀳𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀳𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀧𑀦 𑀬𑀁 𑀢𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀁, 𑀢𑀁 𑀅𑀜𑁆𑀜𑁂𑀦 𑀮𑀪𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀅𑀦𑁆𑀢𑀫𑀲𑁄 𑀢𑀢𑁄 𑀦𑀺𑀩𑁆𑀩𑀢𑁆𑀢𑀭𑀼𑀓𑁆𑀔𑀘𑁆𑀙𑀸𑀬𑀸𑀧𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑁄 𑀓𑀺𑀜𑁆𑀘𑀺 𑀆𑀳𑀭𑀺𑀢𑀼𑀁 𑀦 𑀇𑀘𑁆𑀙𑀢𑀺, ‘‘𑀇𑀫𑀁 𑀙𑀝𑁆𑀝𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀓𑁆𑀔𑀺𑀧𑀢𑀺, 𑀕𑀳𑁂𑀢𑁆𑀯𑀸 𑀯𑀸 𑀕𑀘𑁆𑀙𑀢𑀺, 𑀦 𑀯𑀸𑀭𑁂𑀢𑀩𑁆𑀩𑁄. 𑀦𑁄 𑀘𑁂 𑀙𑀝𑁆𑀝𑁂𑀢𑀺, 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀭𑀽𑀧𑀺𑀬𑀙𑀝𑁆𑀝𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀢𑁂𑀦 𑀅𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸𑀯 𑀕𑀽𑀣𑀁 𑀯𑀺𑀬 𑀙𑀝𑁆𑀝𑁂𑀢𑀩𑁆𑀩𑀁. 𑀲𑀘𑁂 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺, 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺.

𑀭𑀸𑀚𑀕𑀳𑁂 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀳𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸, 𑀲𑀗𑁆𑀖𑀘𑁂𑀢𑀺𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀲𑁆𑀲, 𑀫𑀼𑀢𑁆𑀢𑀸𑀫𑀡𑀺𑀆𑀤𑀺𑀧𑁆𑀧𑀝𑀺𑀕𑁆𑀕𑀳𑀡𑁂 𑀘 𑀤𑀼𑀓𑁆𑀓𑀝𑀁. 𑀭𑀢𑀦𑀲𑀺𑀓𑁆𑀔𑀸𑀧𑀤𑀦𑀬𑁂𑀦 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀚𑀸𑀢𑀭𑀽𑀧𑀭𑀚𑀢𑀪𑀸𑀯𑁄, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀕𑀳𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼 𑀲𑀺𑀬𑀸 𑀓𑀺𑀭𑀺𑀬𑀁 𑀕𑀳𑀡𑁂𑀦 𑀆𑀧𑀚𑁆𑀚𑀦𑀢𑁄, 𑀲𑀺𑀬𑀸 𑀅𑀓𑀺𑀭𑀺𑀬𑀁 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀓𑀭𑀡𑀢𑁄, 𑀲𑁂𑀲𑀁 𑀲𑀜𑁆𑀘𑀭𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀚𑀸𑀢𑀭𑀽𑀧𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀦𑀸𑀦𑀧𑁆𑀧𑀓𑀸𑀭𑀓𑀦𑁆𑀢𑀺 𑀓𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀦𑁆𑀢𑀺 𑀚𑀸𑀢𑀭𑀽𑀧𑀭𑀚𑀢𑀧𑀭𑀺𑀯𑀢𑁆𑀢𑀦𑀁. 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀳𑀺 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀁 𑀧𑀝𑀺𑀕𑁆𑀕𑀳𑀡𑀁 𑀯𑀸𑀭𑀺𑀢𑀁, 𑀇𑀫𑀺𑀦𑀸 𑀧𑀭𑀺𑀯𑀢𑁆𑀢𑀦𑀁. 𑀢𑀲𑁆𑀫𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀧𑁆𑀧𑀺𑀬𑀯𑀢𑁆𑀣𑀽𑀦𑀺, 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑀸 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀯𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀯𑀸 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀯𑀸, 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀧𑁆𑀧𑀺𑀬𑀯𑀢𑁆𑀣𑀽𑀳𑀺 𑀘 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀢𑀁 𑀧𑀼𑀭𑀺𑀫𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀦𑀺𑀲𑁆𑀲𑀝𑁆𑀞𑀯𑀢𑁆𑀣𑀼𑀲𑁆𑀫𑀺𑀜𑁆𑀘 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀬𑀁 𑀅𑀢𑁆𑀢𑀦𑁄 𑀥𑀦𑁂𑀦 𑀧𑀭𑀺𑀯𑀢𑁆𑀢𑁂𑀢𑀺, 𑀢𑀲𑁆𑀲 𑀯𑀸 𑀥𑀦𑀲𑁆𑀲 𑀯𑀸 𑀭𑀽𑀧𑀺𑀬𑀪𑀸𑀯𑁄 𑀘𑁂𑀯, 𑀧𑀭𑀺𑀯𑀢𑁆𑀢𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀓𑀺𑀭𑀺𑀬𑀁, 𑀲𑁂𑀲𑀁 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀦𑀸𑀦𑀧𑁆𑀧𑀓𑀸𑀭𑀓𑀦𑁆𑀢𑀺 𑀘𑀻𑀯𑀭𑀸𑀤𑀻𑀦𑀁 𑀓𑀧𑁆𑀧𑀺𑀬𑀪𑀡𑁆𑀟𑀸𑀦𑀁 𑀯𑀲𑁂𑀦 𑀅𑀦𑁂𑀓𑀯𑀺𑀥𑀁. 𑀓𑀬𑀯𑀺𑀓𑁆𑀓𑀬𑀦𑁆𑀢𑀺 𑀓𑀬𑀜𑁆𑀘𑁂𑀯 𑀯𑀺𑀓𑁆𑀓𑀬𑀜𑁆𑀘. ‘‘𑀇𑀫𑀺𑀦𑀸 𑀇𑀫𑀁 𑀤𑁂𑀳𑀺, 𑀇𑀫𑀁 𑀆𑀳𑀭, 𑀧𑀭𑀺𑀯𑀢𑁆𑀢𑁂𑀳𑀺, 𑀘𑁂𑀢𑀸𑀧𑁂𑀳𑀻’’𑀢𑀺 𑀇𑀫𑀺𑀦𑀸 𑀳𑀺 𑀦𑀬𑁂𑀦 𑀧𑀭𑀲𑁆𑀲 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀡𑁆𑀳𑀦𑁆𑀢𑁄 𑀓𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑁂𑀦𑁆𑀢𑁄 𑀯𑀺𑀓𑁆𑀓𑀬𑀁 𑀲𑀫𑀸𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀬𑀁 𑀏𑀯𑀁 𑀅𑀢𑁆𑀢𑀦𑁄 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀢𑁆𑀯𑀸 𑀫𑀸𑀢𑀼 𑀲𑀦𑁆𑀢𑀓𑀫𑁆𑀧𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀡𑁆𑀳𑀸𑀢𑀺, 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀯𑀼𑀢𑁆𑀢𑀮𑀓𑁆𑀔𑀡𑀯𑀲𑁂𑀦 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, ‘‘𑀇𑀫𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸 𑀕𑀳𑁂𑀢𑁆𑀯𑀸 𑀯𑀸 𑀇𑀤𑀁 𑀦𑀸𑀫 𑀆𑀳𑀭 𑀯𑀸 𑀓𑀭𑁄𑀳𑀺 𑀯𑀸’’𑀢𑀺 𑀭𑀚𑀦𑀸𑀤𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀯𑀸 𑀥𑀫𑀓𑀭𑀡𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀪𑀽𑀫𑀺𑀲𑁄𑀥𑀦𑀸𑀤𑀺𑀜𑁆𑀘 𑀦𑀯𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀯𑀸 𑀲𑀦𑁆𑀢𑀁 𑀯𑀢𑁆𑀣𑀼 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀅𑀲𑀦𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀫𑁂𑀯.

𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 𑀓𑀬𑀯𑀺𑀓𑁆𑀓𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀇𑀤𑀁 𑀓𑀺𑀁 𑀅𑀕𑁆𑀖𑀢𑀻’’𑀢𑀺 𑀏𑀯𑀁 𑀅𑀕𑁆𑀖𑀁 𑀧𑀼𑀘𑁆𑀙𑀦𑁆𑀢𑀲𑁆𑀲, 𑀬𑀲𑁆𑀲 𑀳𑀢𑁆𑀣𑀢𑁄 𑀪𑀡𑁆𑀟𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀅𑀦𑁆𑀢𑀫𑀲𑁄 𑀢𑀲𑁆𑀲𑁂𑀯 𑀧𑀼𑀢𑁆𑀢𑀪𑀸𑀢𑀼𑀓𑀫𑁆𑀧𑀺 𑀓𑀧𑁆𑀧𑀺𑀬𑀓𑀸𑀭𑀓𑀁 𑀓𑀢𑁆𑀯𑀸 ‘‘𑀇𑀫𑀺𑀦𑀸 𑀇𑀤𑀁 𑀦𑀸𑀫 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺 𑀆𑀘𑀺𑀓𑁆𑀔𑀦𑁆𑀢𑀲𑁆𑀲, ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀅𑀢𑁆𑀣𑁄’’𑀢𑀺 𑀏𑀯𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀥𑀦𑁂𑀦 𑀮𑀤𑁆𑀥𑀁 𑀕𑀡𑁆𑀳𑀦𑁆𑀢𑀲𑁆𑀲, 𑀲𑀳𑀥𑀫𑁆𑀫𑀺𑀓𑁂𑀳𑀺 𑀲𑀤𑁆𑀥𑀺𑀁 𑀓𑀬𑀯𑀺𑀓𑁆𑀓𑀬𑀁 𑀓𑀭𑁄𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀬𑀁 𑀅𑀢𑁆𑀢𑀦𑁄 𑀥𑀦𑁂𑀦 𑀧𑀭𑀺𑀯𑀢𑁆𑀢𑁂𑀢𑀺, 𑀬𑁂𑀦 𑀘 𑀧𑀭𑀺𑀯𑀢𑁆𑀢𑁂𑀢𑀺, 𑀢𑁂𑀲𑀁 𑀓𑀧𑁆𑀧𑀺𑀬𑀯𑀢𑁆𑀣𑀼𑀢𑀸, 𑀅𑀲𑀳𑀥𑀫𑁆𑀫𑀺𑀓𑀢𑀸, 𑀓𑀬𑀯𑀺𑀓𑁆𑀓𑀬𑀸𑀧𑀚𑁆𑀚𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑁂𑀲𑀁 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀴𑀓𑀮𑁄𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀧𑀢𑁆𑀢𑀯𑀕𑁆𑀕𑁄

𑁧. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀢𑁆𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀢𑀺𑀭𑁂𑀓𑀧𑀢𑁆𑀢𑁄𑀢𑀺 𑀅𑀦𑀥𑀺𑀝𑁆𑀞𑀺𑀢𑁄 𑀘 𑀅𑀯𑀺𑀓𑀧𑁆𑀧𑀺𑀢𑁄 𑀘, 𑀲𑁄 𑀘 𑀔𑁄 𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁄𑀫𑀓𑀸𑀦𑀁 𑀅𑀜𑁆𑀜𑀢𑀭𑁄 𑀧𑀫𑀸𑀡𑀬𑀼𑀢𑁆𑀢𑁄𑀯, 𑀢𑀲𑁆𑀲 𑀧𑀫𑀸𑀡𑀁 ‘‘𑀅𑀟𑁆𑀠𑀸𑀴𑁆𑀳𑀓𑁄𑀤𑀦𑀁 𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸 𑁬𑁦𑁨) 𑀦𑀬𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀅𑀦𑀼𑀧𑀳𑀢𑀧𑀼𑀭𑀸𑀡𑀲𑀸𑀮𑀺𑀢𑀡𑁆𑀟𑀼𑀮𑀸𑀦𑀁 𑀲𑀼𑀓𑁄𑀝𑁆𑀝𑀺𑀢𑀧𑀭𑀺𑀲𑀼𑀤𑁆𑀥𑀸𑀦𑀁 𑀤𑁆𑀯𑁂 𑀫𑀕𑀥𑀦𑀸𑀴𑀺𑀬𑁄 𑀕𑀳𑁂𑀢𑁆𑀯𑀸 𑀢𑁂𑀳𑀺 𑀢𑀡𑁆𑀟𑀼𑀮𑁂𑀳𑀺 𑀅𑀦𑀼𑀢𑁆𑀢𑀡𑁆𑀟𑀼𑀮𑀫𑀓𑀺𑀮𑀺𑀦𑁆𑀦𑀫𑀧𑀺𑀡𑁆𑀟𑀺𑀓𑀁 𑀲𑀼𑀯𑀺𑀲𑀤𑀁 𑀓𑀼𑀦𑁆𑀤𑀫𑀓𑀼𑀴𑀭𑀸𑀲𑀺𑀲𑀤𑀺𑀲𑀁 𑀅𑀯𑀲𑁆𑀲𑀸𑀯𑀺𑀢𑁄𑀤𑀦𑀁 𑀧𑀘𑀺𑀢𑁆𑀯𑀸 𑀦𑀺𑀭𑀯𑀲𑁂𑀲𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀑𑀤𑀦𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑁄 𑀦𑀸𑀢𑀺𑀖𑀦𑁄 𑀦𑀸𑀢𑀺𑀢𑀦𑀼𑀓𑁄 𑀳𑀢𑁆𑀣𑀳𑀸𑀭𑀺𑀬𑁄 𑀲𑀩𑁆𑀩𑀲𑀫𑁆𑀪𑀸𑀭𑀲𑀗𑁆𑀔𑀢𑁄 𑀫𑀼𑀕𑁆𑀕𑀲𑀽𑀧𑁄 𑀧𑀓𑁆𑀔𑀺𑀧𑀺𑀢𑀩𑁆𑀩𑁄, 𑀢𑀢𑁄 𑀆𑀮𑁄𑀧𑀲𑁆𑀲 𑀅𑀦𑀼𑀭𑀽𑀧𑀁 𑀬𑀸𑀯𑀘𑀭𑀺𑀫𑀸𑀮𑁄𑀧𑀧𑁆𑀧𑀳𑁄𑀦𑀓𑀁 𑀫𑀘𑁆𑀙𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀁, 𑀲𑀧𑁆𑀧𑀺𑀢𑁂𑀮𑀢𑀓𑁆𑀓𑀭𑀲𑀓𑀜𑁆𑀚𑀺𑀬𑀸𑀤𑀻𑀦𑀺 𑀧𑀦 𑀕𑀡𑀦𑀽𑀧𑀕𑀸𑀦𑀺 𑀦 𑀳𑁄𑀦𑁆𑀢𑀺. 𑀢𑀸𑀦𑀺 𑀳𑀺 𑀑𑀤𑀦𑀕𑀢𑀺𑀓𑀸𑀦𑁂𑀯, 𑀦𑁂𑀯 𑀳𑀸𑀧𑁂𑀢𑀼𑀁, 𑀦 𑀯𑀟𑁆𑀠𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀫𑁂𑀢𑀁 𑀲𑀩𑁆𑀩𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑀁 𑀲𑀘𑁂 𑀧𑀢𑁆𑀢𑀲𑁆𑀲 𑀫𑀼𑀔𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀭𑀸𑀚𑀺𑀲𑀫𑀁 𑀢𑀺𑀝𑁆𑀞𑀢𑀺, 𑀲𑀼𑀢𑁆𑀢𑁂𑀦 𑀯𑀸 𑀳𑀻𑀭𑁂𑀦 𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀸 𑀳𑀻𑀭𑀲𑁆𑀲 𑀯𑀸 𑀳𑁂𑀝𑁆𑀞𑀺𑀫𑀦𑁆𑀢𑀁 𑀨𑀼𑀲𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀅𑀢𑀺𑀓𑁆𑀓𑀫𑁆𑀫 𑀣𑀽𑀧𑀻𑀓𑀢𑀁 𑀢𑀺𑀝𑁆𑀞𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑁄𑀫𑀓𑁄 𑀦𑀸𑀫 𑀧𑀢𑁆𑀢𑁄. 𑀲𑀘𑁂 𑀢𑀁 𑀭𑀸𑀚𑀺𑀁 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀅𑀦𑁆𑀢𑁄𑀕𑀥𑀫𑁂𑀯 𑀳𑁄𑀢𑀺, 𑀅𑀬𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀦𑀸𑀫 𑀧𑀢𑁆𑀢𑁄. 𑀉𑀓𑁆𑀓𑀝𑁆𑀞𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑁄 𑀫𑀚𑁆𑀛𑀺𑀫𑁄. 𑀫𑀚𑁆𑀛𑀺𑀫𑀧𑀢𑁆𑀢𑀢𑁄 𑀉𑀧𑀟𑁆𑀠𑀧𑁆𑀧𑀫𑀸𑀡𑁄 𑀑𑀫𑀓𑁄. 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀘𑁆𑀘𑁂𑀢𑁂𑀲𑀼 𑀦𑀯𑀲𑀼 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀘 𑀑𑀫𑀓𑁄𑀫𑀓𑁄 𑀘𑀸𑀢𑀺 𑀤𑁆𑀯𑁂 𑀅𑀧𑀢𑁆𑀢𑀸, 𑀲𑁂𑀲𑀸 𑀲𑀢𑁆𑀢 𑀧𑀢𑁆𑀢𑀸 𑀧𑀫𑀸𑀡𑀬𑀼𑀢𑁆𑀢𑀸 𑀦𑀸𑀫, 𑀅𑀬𑀫𑁂𑀢𑁆𑀣𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁯𑁮 𑀆𑀤𑀬𑁄) 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀏𑀯𑀁 𑀧𑀫𑀸𑀡𑀬𑀼𑀢𑁆𑀢𑀁 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀧𑀓𑁆𑀓𑀁 𑀅𑀬𑁄𑀧𑀢𑁆𑀢𑀁 𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀯𑀸 𑀮𑀪𑀺𑀢𑁆𑀯𑀸 𑀧𑀼𑀭𑀸𑀡𑀧𑀢𑁆𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑁄. 𑀲𑀘𑁂 𑀧𑀦𑀲𑁆𑀲 𑀫𑀽𑀮𑀢𑁄 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀤𑀸𑀢𑀩𑁆𑀩𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀅𑀥𑀺𑀝𑁆𑀞𑀸𑀦𑀼𑀧𑀕𑁄 𑀦 𑀳𑁄𑀢𑀺, 𑀅𑀧𑁆𑀧𑀘𑁆𑀘𑀼𑀤𑁆𑀥𑀭𑀦𑁆𑀢𑁂𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑁄. 𑀢𑀢𑁆𑀣 𑀧𑀘𑁆𑀘𑀼𑀤𑁆𑀥𑀭𑀡𑀸𑀥𑀺𑀝𑁆𑀞𑀸𑀦𑀮𑀓𑁆𑀔𑀡𑀁 𑀘𑀻𑀯𑀭𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀯𑀺𑀓𑀧𑁆𑀧𑀦𑀮𑀓𑁆𑀔𑀡𑀁 𑀧𑀭𑀢𑁄 𑀯𑀓𑁆𑀔𑀸𑀫. 𑀲𑀘𑁂 𑀧𑀦 𑀓𑁄𑀘𑀺 𑀅𑀧𑀢𑁆𑀢𑀓𑁄 𑀪𑀺𑀓𑁆𑀔𑀼 𑀤𑀲 𑀧𑀢𑁆𑀢𑁂 𑀮𑀪𑀺𑀢𑁆𑀯𑀸 𑀲𑀩𑁆𑀩𑁂 𑀅𑀢𑁆𑀢𑀦𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀏𑀓𑀁 𑀧𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀧𑀼𑀦 𑀤𑀺𑀯𑀲𑁂 𑀢𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀜𑁆𑀜𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄, 𑀏𑀢𑁂𑀦𑀼𑀧𑀸𑀬𑁂𑀦 𑀯𑀲𑁆𑀲𑀲𑀢𑀫𑁆𑀧𑀺 𑀧𑀭𑀺𑀳𑀭𑀺𑀢𑀼𑀁 𑀲𑀓𑁆𑀓𑀸. 𑀬𑁄 𑀧𑀦𑀲𑁆𑀲 𑀧𑀢𑁆𑀢𑁄 𑀫𑀼𑀔𑀯𑀝𑁆𑀝𑀺𑀢𑁄 𑀳𑁂𑀝𑁆𑀞𑀸 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑁄𑀓𑀸𑀲𑀢𑁄 𑀧𑀝𑁆𑀞𑀸𑀬 𑀬𑀢𑁆𑀣𑀓𑀢𑁆𑀣𑀘𑀺 𑀓𑀗𑁆𑀕𑀼𑀲𑀺𑀢𑁆𑀣𑀦𑀺𑀓𑁆𑀔𑀫𑀦𑀫𑀢𑁆𑀢𑁂𑀦 𑀙𑀺𑀤𑁆𑀤𑁂𑀦 𑀙𑀺𑀤𑁆𑀤𑁄 𑀳𑁄𑀢𑀺, 𑀲𑁄 𑀅𑀥𑀺𑀝𑁆𑀞𑀸𑀦𑀼𑀧𑀕𑁄 𑀦 𑀳𑁄𑀢𑀺. 𑀧𑀼𑀦 𑀙𑀺𑀤𑁆𑀤𑁂 𑀧𑀸𑀓𑀢𑀺𑀓𑁂 𑀓𑀢𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑁄, 𑀲𑁂𑀲𑀁 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀁 𑀢𑀺𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀅𑀢𑀺𑀭𑁂𑀓𑀧𑀢𑁆𑀢𑀥𑀸𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑁂𑀲𑀯𑀡𑁆𑀡𑀦𑀸𑀓𑁆𑀓𑀫𑁄 𑀘𑀻𑀯𑀭𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀊𑀦𑀸𑀦𑀺 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀅𑀲𑁆𑀲𑀸𑀢𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑁄, 𑀦𑀸𑀲𑁆𑀲 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀧𑀽𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀢𑁂𑀦 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦, 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀢𑀢𑁆𑀣 𑀬𑀲𑁆𑀫𑀸 𑀅𑀩𑀦𑁆𑀥𑀦𑀲𑁆𑀲𑀸𑀧𑀺 𑀧𑀜𑁆𑀘 𑀩𑀦𑁆𑀥𑀦𑀸𑀦𑀺 𑀦 𑀧𑀽𑀭𑁂𑀦𑁆𑀢𑀺 𑀲𑀩𑁆𑀩𑀲𑁄 𑀦𑀢𑁆𑀣𑀺𑀢𑀸𑀬, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁄 𑀦𑀸𑀫 𑀧𑀢𑁆𑀢𑁄 𑀅𑀩𑀦𑁆𑀥𑀦𑁄 𑀯𑀸 𑀏𑀓𑀩𑀦𑁆𑀥𑀦𑁄 𑀯𑀸’’𑀢𑀺𑀆𑀤𑀺 (𑀧𑀸𑀭𑀸. 𑁬𑁧𑁩) 𑀯𑀼𑀢𑁆𑀢𑀁. ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀲 𑀧𑀜𑁆𑀘𑀩𑀦𑁆𑀥𑀦𑁄 𑀧𑀢𑁆𑀢𑁄 𑀳𑁄𑀢𑀺 𑀧𑀜𑁆𑀘𑀩𑀦𑁆𑀥𑀦𑁄𑀓𑀸𑀲𑁄 𑀯𑀸, 𑀢𑀲𑁆𑀲 𑀲𑁄 𑀅𑀧𑀢𑁆𑀢𑁄, 𑀢𑀲𑁆𑀫𑀸 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀲𑁆𑀫𑀺𑀁 𑀧𑀦 𑀧𑀢𑁆𑀢𑁂 𑀫𑀼𑀔𑀯𑀝𑁆𑀝𑀺𑀢𑁄 𑀳𑁂𑀝𑁆𑀞𑀸 𑀪𑀝𑁆𑀞𑀸 𑀤𑁆𑀯𑀗𑁆𑀕𑀼𑀮𑀧𑁆𑀧𑀫𑀸𑀡𑀸 𑀏𑀓𑀸𑀧𑀺 𑀭𑀸𑀚𑀺 𑀳𑁄𑀢𑀺, 𑀢𑀁 𑀢𑀲𑁆𑀲𑀸 𑀭𑀸𑀚𑀺𑀬𑀸 𑀳𑁂𑀝𑁆𑀞𑀺𑀫𑀧𑀭𑀺𑀬𑀦𑁆𑀢𑁂 𑀧𑀢𑁆𑀢𑀯𑁂𑀥𑀓𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀲𑀼𑀢𑁆𑀢𑀭𑀚𑁆𑀚𑀼𑀓𑀫𑀓𑀘𑀺𑀭𑀚𑁆𑀚𑀼𑀓𑀸𑀤𑀻𑀳𑀺 𑀯𑀸 𑀢𑀺𑀧𑀼𑀲𑀼𑀢𑁆𑀢𑀓𑁂𑀦 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀩𑀦𑁆𑀥𑀦𑀁 𑀆𑀫𑀺𑀲𑀲𑁆𑀲 𑀅𑀮𑀕𑁆𑀕𑀦𑀢𑁆𑀣𑀁 𑀢𑀺𑀧𑀼𑀧𑀝𑁆𑀝𑀓𑁂𑀦 𑀯𑀸 𑀓𑁂𑀦𑀘𑀺 𑀩𑀤𑁆𑀥𑀲𑀺𑀮𑁂𑀲𑀸𑀤𑀺𑀦𑀸 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁, 𑀲𑁄 𑀘 𑀧𑀢𑁆𑀢𑁄 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄, 𑀲𑀼𑀔𑀼𑀫𑀁 𑀯𑀸 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑁄, 𑀨𑀸𑀡𑀺𑀢𑀁 𑀛𑀸𑀧𑁂𑀢𑁆𑀯𑀸 𑀧𑀸𑀲𑀸𑀡𑀘𑀼𑀡𑁆𑀡𑁂𑀦 𑀩𑀦𑁆𑀥𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀲𑁆𑀲 𑀧𑀦 𑀤𑁆𑀯𑁂 𑀭𑀸𑀚𑀺𑀬𑁄 𑀯𑀸 𑀏𑀓𑀸𑀬𑁂𑀯 𑀯𑀸 𑀘𑀢𑀼𑀭𑀗𑁆𑀕𑀼𑀮𑀸, 𑀢𑀲𑁆𑀲 𑀤𑁆𑀯𑁂 𑀩𑀦𑁆𑀥𑀦𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀬𑀲𑁆𑀲 𑀢𑀺𑀲𑁆𑀲𑁄 𑀯𑀸 𑀏𑀓𑀸𑀬𑁂𑀯 𑀯𑀸 𑀙𑀴𑀗𑁆𑀕𑀼𑀮𑀸, 𑀢𑀲𑁆𑀲 𑀢𑀻𑀡𑀺. 𑀬𑀲𑁆𑀲 𑀘𑀢𑀲𑁆𑀲𑁄 𑀯𑀸 𑀏𑀓𑀸𑀬𑁂𑀯 𑀯𑀸 𑀅𑀝𑁆𑀞𑀗𑁆𑀕𑀼𑀮𑀸, 𑀢𑀲𑁆𑀲 𑀘𑀢𑁆𑀢𑀸𑀭𑀺. 𑀬𑀲𑁆𑀲 𑀧𑀜𑁆𑀘 𑀯𑀸 𑀏𑀓𑀸𑀬𑁂𑀯 𑀯𑀸 𑀤𑀲𑀗𑁆𑀕𑀼𑀮𑀸, 𑀲𑁄 𑀩𑀤𑁆𑀥𑁄𑀧𑀺 𑀅𑀩𑀤𑁆𑀥𑁄𑀧𑀺 𑀅𑀧𑀢𑁆𑀢𑁄𑀬𑁂𑀯, 𑀅𑀜𑁆𑀜𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄, 𑀏𑀲 𑀢𑀸𑀯 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀯𑀺𑀦𑀺𑀘𑁆𑀙𑀬𑁄.

𑀅𑀬𑁄𑀧𑀢𑁆𑀢𑁂 𑀧𑀦 𑀲𑀘𑁂𑀧𑀺 𑀧𑀜𑁆𑀘 𑀯𑀸 𑀅𑀢𑀺𑀭𑁂𑀓𑀸𑀦𑀺 𑀯𑀸 𑀙𑀺𑀤𑁆𑀤𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀘𑁂 𑀅𑀬𑀘𑀼𑀡𑁆𑀡𑁂𑀦 𑀯𑀸 𑀆𑀡𑀺𑀬𑀸 𑀯𑀸 𑀮𑁄𑀳𑀫𑀡𑁆𑀟𑀮𑁂𑀦 𑀯𑀸 𑀩𑀤𑁆𑀥𑀸𑀦𑀺 𑀫𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀲𑁆𑀯𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄, 𑀅𑀜𑁆𑀜𑁄 𑀦 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄. 𑀅𑀣 𑀧𑀦 𑀏𑀓𑀫𑁆𑀧𑀺 𑀙𑀺𑀤𑁆𑀤𑀁 𑀫𑀳𑀦𑁆𑀢𑀁 𑀳𑁄𑀢𑀺, 𑀮𑁄𑀳𑀫𑀡𑁆𑀟𑀮𑁂𑀦 𑀩𑀤𑁆𑀥𑀫𑁆𑀧𑀺 𑀫𑀝𑁆𑀞𑀁 𑀦 𑀳𑁄𑀢𑀺, 𑀧𑀢𑁆𑀢𑁂 𑀆𑀫𑀺𑀲𑀁 𑀮𑀕𑁆𑀕𑀢𑀺, 𑀅𑀓𑀧𑁆𑀧𑀺𑀬𑁄 𑀳𑁄𑀢𑀺 𑀅𑀬𑀁 𑀧𑀢𑁆𑀢𑁄, 𑀅𑀜𑁆𑀜𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄. 𑀬𑁄 𑀧𑀦 𑀏𑀯𑀁 𑀧𑀢𑁆𑀢𑀲𑀗𑁆𑀔𑁂𑀧𑀕𑀢𑁂 𑀯𑀸 𑀅𑀬𑁄𑀧𑀢𑁆𑀢𑁂, 𑀊𑀦𑀧𑀜𑁆𑀘𑀩𑀦𑁆𑀥𑀦𑁂 𑀯𑀸 𑀫𑀢𑁆𑀢𑀺𑀓𑀸𑀧𑀢𑁆𑀢𑁂 𑀲𑀢𑀺 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑁄 𑀳𑁄𑀢𑀺, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄. 𑀦𑀺𑀲𑁆𑀲𑀚𑁆𑀚𑀦𑁆𑀢𑁂𑀦 𑀲𑀗𑁆𑀖𑀫𑀚𑁆𑀛𑁂 𑀏𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁄’’𑀢𑀺. 𑀬𑁄 𑀘 𑀢𑀲𑁆𑀲𑀸 𑀪𑀺𑀓𑁆𑀔𑀼𑀧𑀭𑀺𑀲𑀸𑀬𑀸𑀢𑀺𑀏𑀢𑁆𑀣 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀓𑀢𑀺𑀬𑀸 𑀏𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀥𑀺𑀝𑁆𑀞𑀺𑀢𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁, 𑀢𑀢𑁄 𑀲𑀫𑁆𑀫𑀢𑁂𑀦 𑀧𑀢𑁆𑀢𑀕𑁆𑀕𑀸𑀳𑀸𑀧𑀓𑁂𑀦 𑀧𑀢𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀕𑀼𑀡𑀁 𑀯𑀢𑁆𑀯𑀸 ‘‘𑀪𑀦𑁆𑀢𑁂, 𑀇𑀫𑀁 𑀕𑀡𑁆𑀳𑀣𑀸’’𑀢𑀺 𑀣𑁂𑀭𑁄 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀣𑁂𑀭𑀲𑁆𑀲 𑀲𑁄 𑀧𑀢𑁆𑀢𑁄 𑀦 𑀭𑀼𑀘𑁆𑀘𑀢𑀺, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀸 𑀦 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀺. 𑀢𑀲𑁆𑀫𑀺𑀁 𑀧𑀦 𑀅𑀦𑀼𑀓𑀫𑁆𑀧𑀸𑀬 𑀅𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀕𑀡𑁆𑀳𑀸𑀢𑀺, 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀤𑀼𑀢𑀺𑀬𑀢𑁆𑀣𑁂𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀲𑀗𑁆𑀖𑀦𑀯𑀓𑀸 𑀕𑀸𑀳𑀸𑀧𑁂𑀢𑀩𑁆𑀩𑁄, 𑀢𑁂𑀦 𑀧𑀭𑀺𑀘𑁆𑀘𑀢𑁆𑀢𑀧𑀢𑁆𑀢𑁄 𑀧𑀦 𑀧𑀢𑁆𑀢𑀧𑀭𑀺𑀬𑀦𑁆𑀢𑁄 𑀦𑀸𑀫, 𑀲𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀤𑀸𑀢𑀩𑁆𑀩𑁄. 𑀢𑁂𑀦𑀸𑀧𑀺 𑀲𑁄 𑀬𑀣𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀕𑀳𑀺𑀢𑀧𑀢𑁆𑀢𑁄, 𑀏𑀯𑀫𑁂𑀯 𑀲𑀓𑁆𑀓𑀘𑁆𑀘𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀢𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀅𑀤𑁂𑀲𑁂 𑀯𑀸 𑀦𑀺𑀓𑁆𑀔𑀺𑀧𑀢𑀺, 𑀅𑀧𑀭𑀺𑀪𑁄𑀕𑁂𑀦 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀺 𑀯𑀸, 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺.

𑀲𑀓𑁆𑀓𑁂𑀲𑀼 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀩𑀳𑀽 𑀧𑀢𑁆𑀢𑁂 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀅𑀩𑀦𑁆𑀥𑀦𑁂𑀦 𑀅𑀩𑀦𑁆𑀥𑀦𑀁, 𑀏𑀓𑀩𑀦𑁆𑀥𑀦𑀁, 𑀤𑀼𑀩𑀦𑁆𑀥𑀦𑀁, 𑀢𑀺𑀩𑀦𑁆𑀥𑀦𑀁, 𑀘𑀢𑀼𑀩𑁆𑀩𑀦𑁆𑀥𑀦𑀁, 𑀅𑀩𑀦𑁆𑀥𑀦𑁄𑀓𑀸𑀲𑀁, 𑀏𑀓𑀤𑁆𑀯𑀺𑀢𑀺𑀘𑀢𑀼𑀩𑁆𑀩𑀦𑁆𑀥𑀦𑁄𑀓𑀸𑀲𑀁 𑀘𑁂𑀢𑀸𑀧𑁂𑀢𑀺, 𑀏𑀯𑀁 𑀏𑀓𑁂𑀓𑁂𑀦 𑀧𑀢𑁆𑀢𑁂𑀦 𑀤𑀲𑀥𑀸 𑀤𑀲𑀯𑀺𑀥𑀁 𑀧𑀢𑁆𑀢𑀁. 𑀘𑁂𑀢𑀸𑀧𑀦𑀯𑀲𑁂𑀦 𑀧𑀦 𑀏𑀓𑀁 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀢𑀁 𑀳𑁄𑀢𑀺. 𑀦𑀝𑁆𑀞𑀧𑀢𑁆𑀢𑀲𑁆𑀲, 𑀪𑀺𑀦𑁆𑀦𑀧𑀢𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂, 𑀅𑀜𑁆𑀜𑀲𑁆𑀲 𑀘 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂, 𑀢𑀲𑁆𑀲𑁂𑀯𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀅𑀢𑁆𑀢𑀦𑁄 𑀥𑀦𑁂𑀦 𑀕𑀡𑁆𑀳𑀢𑁄, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀥𑀺𑀝𑁆𑀞𑀸𑀦𑀼𑀧𑀕𑀧𑀢𑁆𑀢𑀲𑁆𑀲 𑀊𑀦𑀧𑀜𑁆𑀘𑀩𑀦𑁆𑀥𑀦𑀢𑀸, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀅𑀓𑀢𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺.

𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀧𑀝𑀺𑀲𑀸𑀬𑀦𑀻𑀬𑀸𑀦𑀻𑀢𑀺 𑀧𑀝𑀺𑀲𑀸𑀬𑀺𑀢𑀩𑁆𑀩𑀸𑀦𑀺, 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀬𑀁 𑀉𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀢𑀸𑀦𑀺 𑀳𑀺 𑀧𑀝𑀺𑀲𑀸𑀬𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀪𑁂𑀲𑀚𑁆𑀚𑀸𑀦𑀻𑀢𑀺 𑀪𑁂𑀲𑀚𑁆𑀚𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀼 𑀯𑀸, 𑀫𑀸 𑀯𑀸, 𑀏𑀯𑀁 𑀮𑀤𑁆𑀥𑀯𑁄𑀳𑀸𑀭𑀸𑀦𑀺. 𑀲𑀧𑁆𑀧𑀺 𑀦𑀸𑀫 𑀕𑀯𑀸𑀤𑀻𑀦𑀁 𑀲𑀧𑁆𑀧𑀺, 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺. 𑀢𑀣𑀸 𑀦𑀯𑀦𑀻𑀢𑀁. 𑀢𑁂𑀮𑀁 𑀦𑀸𑀫 𑀢𑀺𑀮𑀲𑀸𑀲𑀧𑀫𑀥𑀽𑀓𑀏𑀭𑀡𑁆𑀟𑀓𑀯𑀲𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀁. 𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀼𑀫𑁂𑀯. 𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬 𑀧𑀦 𑀅𑀧𑀓𑁆𑀓𑀸 𑀯𑀸 𑀅𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸 𑀲𑀩𑁆𑀩𑀸𑀧𑀺 𑀉𑀘𑁆𑀙𑀼𑀯𑀺𑀓𑀢𑀺 ‘‘𑀨𑀸𑀡𑀺𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀢𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸, 𑀦 𑀢𑁂𑀲𑀁 𑀯𑀢𑁆𑀣𑀽𑀦𑀺. 𑀏𑀢𑁂𑀦 𑀞𑀧𑁂𑀢𑁆𑀯𑀸 𑀯𑀲𑀸𑀢𑁂𑀮𑀁 𑀬𑀸𑀦𑁂𑀢𑁆𑀣 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀓𑀸𑀦𑀺, 𑀢𑁂𑀲𑀁 𑀯𑀢𑁆𑀣𑀽𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀢𑀸𑀦𑀺 𑀲𑀧𑁆𑀧𑀺𑀆𑀤𑀻𑀦𑀺 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀯𑀲𑀸𑀢𑁂𑀮𑀁 𑀧𑀦 𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀦𑀺𑀧𑀓𑁆𑀓𑀁 𑀓𑀸𑀮𑁂 𑀲𑀁𑀲𑀝𑁆𑀞𑀁 𑀢𑁂𑀮𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀯𑀲𑀁 𑀅𑀜𑁆𑀜𑀁 𑀬𑀁𑀓𑀜𑁆𑀘𑀺 𑀯𑀲𑀁 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀸𑀫𑀁 𑀧𑀘𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀢𑁂𑀮𑀫𑁆𑀧𑀺 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀯𑀝𑁆𑀝𑀢𑀺. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀧𑀘𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀦 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺, 𑀅𑀜𑁆𑀜𑁂𑀲𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀽𑀦𑀁 𑀯𑀢𑁆𑀣𑀼𑀁 𑀧𑀘𑀺𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀦𑀺𑀩𑁆𑀩𑀢𑁆𑀢𑀺𑀢𑀲𑀧𑁆𑀧𑀺 𑀯𑀸 𑀦𑀯𑀦𑀻𑀢𑀁 𑀯𑀸 𑀧𑀘𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀁 𑀧𑀦 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀲𑀸𑀫𑀺𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀔𑀻𑀭𑀸𑀤𑀺𑀢𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀧𑀘𑀺𑀢𑁆𑀯𑀸 𑀓𑀢𑀲𑀧𑁆𑀧𑀺𑀆𑀤𑀻𑀦𑀺 𑀧𑀦 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀸𑀦𑀺𑀧𑀺 𑀯𑀝𑁆𑀝𑀦𑁆𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑀚𑁆𑀛𑁄𑀳𑀭𑀡𑀻𑀬𑀸𑀦𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺. 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀢𑀤𑀳𑀼𑀧𑀼𑀭𑁂𑀪𑀢𑁆𑀢𑀁 𑀲𑀸𑀫𑀺𑀲𑀧𑀭𑀺𑀪𑁄𑀕𑁂𑀦𑀸𑀧𑀺 𑀯𑀝𑁆𑀝𑀦𑁆𑀢𑀺, 𑀧𑀘𑁆𑀙𑀸𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀦 𑀢𑀸𑀦𑀺 𑀘, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀘 𑀲𑀢𑁆𑀢𑀸𑀳𑀁 𑀦𑀺𑀭𑀸𑀫𑀺𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀻’’𑀢𑀺 𑀘 𑀯𑀘𑀦𑀢𑁄 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀅𑀩𑁆𑀪𑀜𑁆𑀚𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀅𑀦𑀸𑀧𑀢𑁆𑀢𑀺, 𑀬𑀸𑀯𑀚𑀻𑀯𑀺𑀓𑀸𑀦𑀺 𑀲𑀸𑀲𑀧𑀫𑀥𑀽𑀓𑀏𑀭𑀡𑁆𑀟𑀓𑀅𑀝𑁆𑀞𑀻𑀦𑀺 𑀢𑁂𑀮𑀓𑀭𑀡𑀢𑁆𑀣𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀤𑀳𑁂𑀯 𑀓𑀢𑀢𑁂𑀮𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀤𑀼𑀢𑀺𑀬𑀤𑀺𑀯𑀲𑁂 𑀓𑀢𑀁 𑀙𑀸𑀳𑀁 𑀯𑀝𑁆𑀝𑀢𑀺, 𑀢𑀢𑀺𑀬𑀤𑀺𑀯𑀲𑁂 𑀓𑀢𑀁 𑀧𑀜𑁆𑀘𑀸𑀳𑀁, 𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀤𑀺𑀯𑀲𑁂 𑀓𑀢𑀁 𑀢𑀤𑀳𑁂𑀯 𑀯𑀝𑁆𑀝𑀢𑀺. 𑀲𑀘𑁂 𑀬𑀸𑀯 𑀅𑀭𑀼𑀡𑀲𑁆𑀲 𑀉𑀕𑁆𑀕𑀫𑀦𑀸 𑀢𑀺𑀝𑁆𑀞𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀅𑀝𑁆𑀞𑀫𑀤𑀺𑀯𑀲𑁂 𑀓𑀢𑀁 𑀅𑀦𑀚𑁆𑀛𑁄𑀳𑀭𑀡𑀻𑀬𑀁, 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸 𑀧𑀦 𑀩𑀸𑀳𑀺𑀭𑀧𑀭𑀺𑀪𑁄𑀕𑁂𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀦 𑀓𑀭𑁄𑀢𑀺, 𑀢𑁂𑀮𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀺𑀢𑀲𑀸𑀲𑀧𑀸𑀤𑀻𑀦𑀁 𑀧𑀦 𑀧𑀸𑀴𑀺𑀬𑀁 𑀅𑀦𑀸𑀕𑀢𑀲𑀧𑁆𑀧𑀺𑀆𑀤𑀻𑀦𑀜𑁆𑀘 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀻𑀢𑀼𑀤𑀓𑁂𑀦 𑀓𑀢𑀫𑀥𑀽𑀓𑀧𑀼𑀧𑁆𑀨𑀨𑀸𑀡𑀺𑀢𑀁 𑀧𑀦 𑀨𑀸𑀡𑀺𑀢𑀕𑀢𑀺𑀓𑀫𑁂𑀯, 𑀅𑀫𑁆𑀩𑀨𑀸𑀡𑀺𑀢𑀸𑀤𑀻𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀺. 𑀬𑀁 𑀧𑀦𑁂𑀢𑁆𑀣 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀢𑀁 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸𑀧𑀺 𑀅𑀭𑀼𑀆𑀤𑀻𑀦𑀺 𑀯𑀸 𑀫𑀓𑁆𑀔𑁂𑀢𑀼𑀁, 𑀅𑀚𑁆𑀛𑁄𑀳𑀭𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. 𑀧𑀤𑀻𑀧𑁂 𑀓𑀸𑀴𑀯𑀡𑁆𑀡𑁂 𑀯𑀸 𑀉𑀧𑀦𑁂𑀢𑀩𑁆𑀩𑀁, 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀬𑀺𑀓𑀧𑀭𑀺𑀪𑁄𑀕𑀁 𑀯𑀝𑁆𑀝𑀢𑀺. 𑀬𑀁 𑀧𑀦 𑀦𑀺𑀭𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀼𑀦 𑀮𑀪𑀢𑀺, 𑀢𑀁 𑀅𑀚𑁆𑀛𑁄𑀳𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀯𑀺𑀲𑀼𑀁 𑀞𑀧𑀺𑀢𑀲𑀧𑁆𑀧𑀺𑀆𑀤𑀻𑀲𑀼, 𑀏𑀓𑀪𑀸𑀚𑀦𑁂 𑀯𑀸 𑀅𑀫𑀺𑀲𑁆𑀲𑀺𑀢𑁂𑀲𑀼 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀁 𑀘𑀻𑀯𑀭𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀕𑀺𑀫𑁆𑀳𑀫𑀸𑀲𑀸𑀦𑀁 𑀏𑀓𑁄 𑀧𑀘𑁆𑀙𑀺𑀫𑀫𑀸𑀲𑁄 𑀲𑁂𑀲𑁄. 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀘𑁆𑀙𑀺𑀫𑀤𑀺𑀯𑀲𑁄, 𑀢𑀸𑀯 ‘‘𑀓𑀸𑀮𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬𑀸’’𑀢𑀺𑀆𑀤𑀺𑀦𑀸 𑀲𑀢𑀼𑀧𑁆𑀧𑀸𑀤𑀓𑀭𑀡𑁂𑀦, 𑀲𑀗𑁆𑀖𑀲𑁆𑀲 𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄, 𑀅𑀢𑁆𑀢𑀦𑁄 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀧𑀦 ‘‘𑀤𑁂𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭’’𑀦𑁆𑀢𑀺𑀆𑀤𑀺𑀓𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸𑀧𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀲𑀢𑀼𑀧𑁆𑀧𑀸𑀤𑀁 𑀓𑀭𑁄𑀦𑁆𑀢𑀲𑁆𑀲 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁, 𑀬𑀣𑀸 𑀯𑀸 𑀢𑀣𑀸 𑀯𑀸 ‘‘𑀤𑁂𑀣 𑀫𑁂’’𑀢𑀺𑀆𑀤𑀺𑀯𑀘𑀦𑁂𑀦 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀤𑁆𑀥𑀫𑀸𑀲𑀲𑁆𑀲 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀘𑁆𑀙𑀺𑀫𑀤𑀺𑀯𑀲𑁄, 𑀢𑀸𑀯 𑀲𑀽𑀘𑀺𑀓𑀫𑁆𑀫𑀦𑀺𑀝𑁆𑀞𑀸𑀦𑁂𑀦 𑀲𑀓𑀺𑀫𑁆𑀧𑀺 𑀯𑀡𑁆𑀡𑀪𑁂𑀤𑀫𑀢𑁆𑀢𑀭𑀚𑀦𑁂𑀦 𑀓𑀧𑁆𑀧𑀩𑀺𑀦𑁆𑀤𑀼𑀓𑀭𑀡𑁂𑀦 𑀘 𑀓𑀢𑁆𑀯𑀸 𑀧𑀭𑀺𑀤𑀳𑀺𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁄 𑀫𑀸𑀲𑁄 𑀧𑀭𑀺𑀬𑁂𑀲𑀦𑀓𑁆𑀔𑁂𑀢𑁆𑀢𑀁, 𑀧𑀘𑁆𑀙𑀺𑀫𑁄 𑀅𑀤𑁆𑀥𑀫𑀸𑀲𑁄 𑀓𑀭𑀡𑀦𑀺𑀯𑀸𑀲𑀦𑀓𑁆𑀔𑁂𑀢𑁆𑀢𑀫𑁆𑀧𑀺, 𑀯𑀲𑁆𑀲𑀸𑀦𑀲𑁆𑀲 𑀘𑀢𑀽𑀲𑀼 𑀫𑀸𑀲𑁂𑀲𑀼 𑀲𑀩𑁆𑀩𑀫𑁆𑀧𑀺 𑀢𑀁 𑀯𑀝𑁆𑀝𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀬𑁄 𑀘𑀸𑀬𑀁 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁄 𑀫𑀸𑀲𑁄 𑀅𑀦𑀼𑀜𑁆𑀜𑀸𑀢𑁄, 𑀏𑀢𑁆𑀣 𑀓𑀢𑀧𑀭𑀺𑀬𑁂𑀲𑀺𑀢𑀫𑁆𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀢𑀲𑁆𑀫𑀺𑀁 𑀫𑀸𑀲𑁂 𑀅𑀢𑀺𑀓𑁆𑀓𑀦𑁆𑀢𑁂 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀺𑀬𑀢𑀺, 𑀧𑀼𑀦 𑀫𑀸𑀲𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀥𑁄𑀯𑀺𑀢𑁆𑀯𑀸 𑀧𑀦 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. 𑀲𑀘𑁂 𑀲𑀢𑀺𑀲𑀫𑁆𑀫𑁄𑀲𑁂𑀦 𑀯𑀸 𑀅𑀧𑁆𑀧𑀳𑁄𑀦𑀓𑀪𑀸𑀯𑁂𑀦 𑀯𑀸 𑀅𑀓𑀢𑀸 𑀳𑁄𑀢𑀺. 𑀢𑁂 𑀘 𑀤𑁆𑀯𑁂 𑀫𑀸𑀲𑁂 𑀯𑀲𑁆𑀲𑀸𑀦𑀲𑁆𑀲 𑀘𑀢𑀼𑀫𑀸𑀲𑀦𑁆𑀢𑀺 𑀙 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀺. 𑀲𑀘𑁂 𑀧𑀦 𑀓𑀢𑁆𑀢𑀺𑀓𑀫𑀸𑀲𑁂 𑀓𑀣𑀺𑀦𑀁 𑀅𑀢𑁆𑀣𑀭𑀺𑀬𑀢𑀺, 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀮𑀪𑀢𑀺, 𑀏𑀯𑀁 𑀤𑀲 𑀫𑀸𑀲𑀸 𑀳𑁄𑀦𑁆𑀢𑀺. 𑀢𑀢𑁄 𑀧𑀭𑀫𑁆𑀧𑀺 𑀲𑀢𑀺𑀬𑀸 𑀧𑀘𑁆𑀘𑀸𑀲𑀸𑀬 𑀢𑀁 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀦𑁆𑀢𑀲𑁆𑀲 𑀏𑀓𑀫𑀸𑀲𑀦𑁆𑀢𑀺 𑀏𑀯𑀁 𑀏𑀓𑀸𑀤𑀲 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀇𑀢𑁄 𑀧𑀭𑀁 𑀏𑀓𑀸𑀳𑀫𑁆𑀧𑀺 𑀦 𑀮𑀪𑀢𑀺.

𑀑𑀭𑁂𑀦 𑀘𑁂 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀫𑀸𑀲𑀲𑁆𑀲 𑀑𑀭𑀺𑀫𑀪𑀸𑀕𑁂 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀤𑀺𑀯𑀲𑁄, 𑀢𑀸𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀏𑀢𑁂𑀲𑀼 𑀲𑀢𑁆𑀢𑀲𑀼 𑀧𑀺𑀝𑁆𑀞𑀺𑀲𑀫𑀬𑀫𑀸𑀲𑁂𑀲𑀼 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀲𑀢𑀼𑀧𑁆𑀧𑀸𑀤𑀓𑀭𑀡𑁂𑀦 𑀧𑀭𑀺𑀬𑁂𑀲𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀲𑀢𑀼𑀧𑁆𑀧𑀸𑀤𑀁 𑀓𑀭𑁄𑀦𑁆𑀢𑀲𑁆𑀲 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺. 𑀑𑀭𑁂𑀦𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀕𑀺𑀫𑁆𑀳𑀸𑀦𑀲𑁆𑀲 𑀧𑀘𑁆𑀙𑀺𑀫𑀤𑁆𑀥𑀫𑀸𑀲𑀢𑁄 𑀑𑀭𑀺𑀫𑀪𑀸𑀕𑁂 𑀏𑀓𑀲𑁆𑀫𑀺𑀁 𑀅𑀤𑁆𑀥𑀫𑀸𑀲𑁂. 𑀓𑀢𑁆𑀯𑀸 𑀦𑀺𑀯𑀸𑀲𑁂𑀬𑁆𑀬𑀸𑀢𑀺 𑀏𑀢𑁆𑀣𑀦𑁆𑀢𑀭𑁂 𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀫𑁆𑀧𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀯𑀲𑁆𑀲𑀺𑀓𑀲𑀸𑀝𑀺𑀓𑀧𑀭𑀺𑀬𑁂𑀲𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀊𑀦𑀓𑀫𑀸𑀲𑀤𑁆𑀥𑀫𑀸𑀲𑁂𑀲𑀼 𑀅𑀢𑀺𑀭𑁂𑀓𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁, 𑀢𑀣𑀸 𑀲𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑀲𑁆𑀲 𑀓𑀸𑀬𑀁 𑀑𑀯𑀲𑁆𑀲𑀸𑀧𑀬𑀢𑁄. 𑀧𑁄𑀓𑁆𑀔𑀭𑀡𑀺𑀬𑀸𑀤𑀻𑀲𑀼 𑀧𑀦 𑀦𑁆𑀳𑀸𑀬𑀦𑁆𑀢𑀲𑁆𑀲 𑀯𑀸 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲 𑀯𑀸 𑀦𑀝𑁆𑀞𑀘𑀻𑀯𑀭𑀲𑁆𑀲 𑀯𑀸 ‘‘𑀅𑀦𑀺𑀯𑀢𑁆𑀣𑀁 𑀘𑁄𑀭𑀸 𑀳𑀭𑀦𑁆𑀢𑀻’’𑀢𑀺 𑀏𑀯𑀁 𑀆𑀧𑀤𑀸𑀲𑀼 𑀯𑀸 𑀦𑀺𑀯𑀸𑀲𑀬𑀢𑁄 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀏𑀢𑁆𑀣 𑀘 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀅𑀲𑀫𑀬𑁂 𑀧𑀭𑀺𑀬𑁂𑀲𑀦𑀢𑀸, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑀺 𑀢𑀸𑀯 𑀧𑀭𑀺𑀬𑁂𑀲𑀦𑀸𑀧𑀢𑁆𑀢𑀺𑀬𑀸 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀘𑀻𑀯𑀭𑀢𑀸, 𑀆𑀧𑀤𑀸𑀪𑀸𑀯𑁄, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀲𑀓𑀪𑀸𑀯𑁄, 𑀅𑀲𑀫𑀬𑁂 𑀦𑀺𑀯𑀸𑀲𑀦𑀦𑁆𑀢𑀺 𑀇𑀫𑀸𑀦𑀺 𑀦𑀺𑀯𑀸𑀲𑀦𑀸𑀧𑀢𑁆𑀢𑀺𑀬𑀸 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀻𑀦𑀺 𑀧𑀘𑁆𑀘𑀸𑀲𑀺𑀲𑀫𑀸𑀦𑁄 𑀲𑀬𑀫𑁂𑀯 𑀤𑀢𑁆𑀯𑀸. 𑀅𑀘𑁆𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 𑀲𑀓𑀲𑀜𑁆𑀜𑀸𑀬 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀅𑀘𑁆𑀙𑀺𑀦𑁆𑀤𑀸𑀧𑁂𑀬𑁆𑀬𑀸𑀢𑀺𑀏𑀢𑁆𑀣 𑀧𑀦 ‘‘𑀅𑀘𑁆𑀙𑀺𑀦𑁆𑀤𑀸’’𑀢𑀺 𑀆𑀡𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀅𑀘𑁆𑀙𑀺𑀦𑁆𑀤𑁂𑀲𑀼 𑀬𑀢𑁆𑀢𑀓𑀸𑀦𑀺 𑀆𑀡𑀢𑁆𑀢𑀸𑀦𑀺, 𑀢𑁂𑀲𑀁 𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄.

𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀲𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄, 𑀯𑁂𑀫𑀢𑀺𑀓𑀲𑁆𑀲, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀺𑀦𑁄 𑀯𑀸, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑀸𑀧𑀺 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁, 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀘 𑀬𑀁𑀓𑀺𑀜𑁆𑀘𑀺 𑀅𑀘𑁆𑀙𑀺𑀦𑁆𑀤𑀢𑁄 𑀯𑀸 𑀤𑀼𑀓𑁆𑀓𑀝𑀁. 𑀢𑁂𑀦 𑀢𑀼𑀝𑁆𑀞𑁂𑀦 𑀯𑀸 𑀓𑀼𑀧𑀺𑀢𑁂𑀦 𑀯𑀸 𑀤𑀺𑀦𑁆𑀦𑀁 𑀧𑀦 𑀢𑀲𑁆𑀲 𑀯𑀺𑀲𑁆𑀲𑀸𑀲𑀁 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀘𑀻𑀯𑀭𑀢𑀸, 𑀲𑀸𑀫𑀁 𑀤𑀺𑀦𑁆𑀦𑀢𑀸, 𑀲𑀓𑀲𑀜𑁆𑀜𑀺𑀢𑀸, 𑀉𑀧𑀲𑀫𑁆𑀧𑀦𑁆𑀦𑀢𑀸, 𑀓𑁄𑀥𑀯𑀲𑁂𑀦 𑀅𑀘𑁆𑀙𑀺𑀦𑁆𑀤𑀦𑀁 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬. 𑀯𑁂𑀤𑀦𑀸 𑀧𑀦 𑀇𑀥 𑀤𑀼𑀓𑁆𑀔𑀯𑁂𑀤𑀦𑀸𑀬𑁂𑀯𑀸𑀢𑀺.

𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀲𑀼𑀢𑁆𑀢𑀦𑁆𑀢𑀺 𑀙𑀩𑁆𑀩𑀺𑀥𑀁 𑀔𑁄𑀫𑀲𑀼𑀢𑁆𑀢𑀸𑀤𑀺𑀁 𑀯𑀸 𑀢𑁂𑀲𑀁 𑀅𑀦𑀼𑀮𑁄𑀫𑀁 𑀯𑀸. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀘𑀻𑀯𑀭𑀢𑁆𑀣𑀸𑀬 𑀬𑀸𑀘𑀺𑀢𑁆𑀯𑀸. 𑀯𑀸𑀬𑀸𑀧𑁂𑀬𑁆𑀬𑀸𑀢𑀺 ‘‘𑀘𑀻𑀯𑀭𑀁 𑀫𑁂, 𑀆𑀯𑀼𑀲𑁄, 𑀯𑀸𑀬𑀣𑀸’’𑀢𑀺 𑀅𑀓𑀧𑁆𑀧𑀺𑀬𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸𑀬𑀸𑀧𑁂𑀬𑁆𑀬. 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀏𑀯𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀬𑁄 𑀢𑀦𑁆𑀢𑀯𑀸𑀬𑁄 𑀘𑀻𑀯𑀭𑀯𑀸𑀬𑀦𑀢𑁆𑀣𑀁 𑀢𑀼𑀭𑀺𑀯𑁂𑀫𑀲𑀚𑁆𑀚𑀦𑀸𑀤𑀺𑀓𑁂 𑀧𑀬𑁄𑀕𑁂 𑀓𑀭𑁄𑀢𑀺, 𑀢𑀲𑁆𑀲 𑀲𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀭𑀸𑀚𑀕𑀳𑁂 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀘𑀻𑀯𑀭𑀯𑀸𑀬𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀯𑀺𑀜𑁆𑀜𑀸𑀧𑀺𑀢𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑀺𑀢𑀢𑀦𑁆𑀢𑀯𑀸𑀬𑁂𑀦 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀤𑀻𑀖𑀢𑁄 𑀯𑀺𑀤𑀢𑁆𑀣𑀺𑀫𑀢𑁆𑀢𑁂 𑀢𑀺𑀭𑀺𑀬𑀜𑁆𑀘 𑀳𑀢𑁆𑀣𑀫𑀢𑁆𑀢𑁂 𑀯𑀻𑀢𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀇𑀢𑀺 𑀬𑀸𑀯 𑀘𑀻𑀯𑀭𑀁 𑀯𑀟𑁆𑀠𑀢𑀺, 𑀢𑀸𑀯 𑀇𑀫𑀺𑀦𑀸 𑀧𑀫𑀸𑀡𑁂𑀦 𑀆𑀧𑀢𑁆𑀢𑀺𑀬𑁄 𑀯𑀟𑁆𑀠𑀦𑁆𑀢𑀺. 𑀢𑁂𑀦𑁂𑀯 𑀧𑀦 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀤𑁆𑀥𑀲𑀼𑀢𑁆𑀢𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀬𑀣𑀸 𑀧𑀼𑀩𑁆𑀩𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀏𑀯𑀁 𑀇𑀥 𑀤𑀼𑀓𑁆𑀓𑀝𑀁. 𑀢𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀜𑁆𑀘 𑀅𑀯𑀺𑀜𑁆𑀜𑀢𑁆𑀢𑀜𑁆𑀘 𑀯𑀸𑀬𑀸𑀧𑁂𑀦𑁆𑀢𑀲𑁆𑀲 𑀲𑀘𑁂 𑀯𑀼𑀢𑁆𑀢𑀧𑁆𑀧𑀫𑀸𑀡𑁂𑀦 𑀓𑁂𑀤𑀸𑀭𑀩𑀤𑁆𑀥𑀁 𑀯𑀺𑀬 𑀘𑀻𑀯𑀭𑀁 𑀳𑁄𑀢𑀺, 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑀫𑀬𑁂 𑀧𑀭𑀺𑀘𑁆𑀙𑁂𑀤𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀇𑀢𑀭𑀲𑁆𑀫𑀺𑀁 𑀢𑀣𑁂𑀯 𑀤𑀼𑀓𑁆𑀓𑀝𑀁. 𑀢𑀢𑁄 𑀘𑁂 𑀊𑀦𑀢𑀭𑀸 𑀧𑀭𑀺𑀘𑁆𑀙𑁂𑀤𑀸, 𑀲𑀩𑁆𑀩𑀧𑀭𑀺𑀘𑁆𑀙𑁂𑀤𑁂𑀲𑀼 𑀤𑀼𑀓𑁆𑀓𑀝𑀸𑀦𑁂𑀯. 𑀅𑀣 𑀏𑀓𑀦𑁆𑀢𑀭𑀺𑀓𑁂𑀦 𑀯𑀸 𑀲𑀼𑀢𑁆𑀢𑁂𑀦 𑀤𑀻𑀖𑀢𑁄 𑀯𑀸 𑀓𑀧𑁆𑀧𑀺𑀬𑀁 𑀢𑀺𑀭𑀺𑀬𑀁 𑀅𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀯𑀻𑀢𑀁 𑀳𑁄𑀢𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀫𑀸𑀡𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀅𑀓𑀧𑁆𑀧𑀺𑀬𑀲𑀼𑀢𑁆𑀢𑁂, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂𑀳𑀺 𑀢𑀦𑁆𑀢𑀯𑀸𑀬𑁂𑀳𑀺 𑀲𑀼𑀢𑁆𑀢𑁂𑀧𑀺 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂 𑀘 𑀆𑀧𑀢𑁆𑀢𑀺𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀯𑀸𑀬𑀸𑀧𑀺𑀢𑁂 𑀯𑀸𑀬𑀸𑀧𑀺𑀢𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀘𑀻𑀯𑀭𑀲𑀺𑀩𑁆𑀩𑀦𑀆𑀬𑁄𑀕𑀓𑀸𑀬𑀩𑀦𑁆𑀥𑀦𑀅𑀁𑀲𑀩𑀤𑁆𑀥𑀓𑀧𑀢𑁆𑀢𑀢𑁆𑀣𑀯𑀺𑀓𑀧𑀭𑀺𑀲𑁆𑀲𑀸𑀯𑀦𑀸𑀦𑀁 𑀅𑀢𑁆𑀣𑀸𑀬 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑁂𑀳𑀺 𑀓𑀧𑁆𑀧𑀺𑀬𑀲𑀼𑀢𑁆𑀢𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀥𑀦𑁂𑀦, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺, 𑀘𑀻𑀯𑀭𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀺𑀢𑀲𑀼𑀢𑁆𑀢𑀁, 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀅𑀓𑀧𑁆𑀧𑀺𑀬𑀢𑀦𑁆𑀢𑀯𑀸𑀬𑁂𑀦 𑀅𑀓𑀧𑁆𑀧𑀺𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸𑀬𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺.

𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀢𑀢𑁆𑀭 𑀘𑁂 𑀲𑁄 𑀪𑀺𑀓𑁆𑀔𑀽𑀢𑀺 𑀬𑀢𑁆𑀭 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀢𑀦𑁆𑀢𑀯𑀸𑀬𑀸, 𑀢𑀢𑁆𑀭. 𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄𑀢𑀺 𑀘𑀻𑀯𑀭𑀲𑀸𑀫𑀺𑀓𑁂𑀳𑀺 𑀅𑀧𑁆𑀧𑀯𑀸𑀭𑀺𑀢𑁄 𑀳𑀼𑀢𑁆𑀯𑀸. 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀲𑀺𑀝𑁆𑀞𑀓𑀧𑁆𑀧𑀁 𑀅𑀥𑀺𑀓𑀯𑀺𑀥𑀸𑀦𑀁 𑀆𑀧𑀚𑁆𑀚𑁂𑀬𑁆𑀬. 𑀇𑀤𑀸𑀦𑀺 𑀬𑁂𑀦𑀸𑀓𑀸𑀭𑁂𑀦 𑀯𑀺𑀓𑀧𑁆𑀧𑀁 𑀆𑀧𑀦𑁆𑀦𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀔𑁄, 𑀆𑀯𑀼𑀲𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀬𑀢𑀦𑁆𑀢𑀺 𑀤𑀻𑀖𑀁. 𑀯𑀺𑀢𑁆𑀣𑀢𑀦𑁆𑀢𑀺 𑀧𑀼𑀣𑀼𑀮𑀁. 𑀅𑀧𑁆𑀧𑀺𑀢𑀦𑁆𑀢𑀺 𑀖𑀦𑀁. 𑀲𑀼𑀯𑀻𑀢𑀦𑁆𑀢𑀺 𑀲𑀼𑀝𑁆𑀞𑀼 𑀯𑀻𑀢𑀁, 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀫𑀁 𑀓𑀢𑁆𑀯𑀸 𑀯𑀻𑀢𑀁. 𑀲𑀼𑀧𑁆𑀧𑀯𑀸𑀬𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀯𑀸𑀬𑀺𑀢𑀁, 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀫𑀁 𑀓𑀢𑁆𑀯𑀸 𑀢𑀦𑁆𑀢𑁂 𑀧𑀲𑀸𑀭𑀺𑀢𑀁. 𑀲𑀼𑀯𑀺𑀮𑁂𑀔𑀺𑀢𑀦𑁆𑀢𑀺 𑀮𑁂𑀔𑀦𑀺𑀬𑀸 𑀲𑀼𑀝𑁆𑀞𑀼 𑀯𑀺𑀮𑁂𑀔𑀺𑀢𑀁. 𑀲𑀼𑀯𑀺𑀢𑀘𑁆𑀙𑀺𑀢𑀦𑁆𑀢𑀺 𑀓𑁄𑀘𑁆𑀙𑁂𑀦 𑀲𑀼𑀝𑁆𑀞𑀼 𑀯𑀺𑀢𑀘𑁆𑀙𑀺𑀢𑀁, 𑀲𑀼𑀝𑁆𑀞𑀼 𑀦𑀺𑀤𑁆𑀥𑁄𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀡𑁆𑀟𑀧𑀸𑀢𑀫𑀢𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀘 𑀦 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀧𑀸𑀢𑀤𑀸𑀦𑀫𑀢𑁆𑀢𑁂𑀦 𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀲𑀘𑁂 𑀧𑀦 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀘𑀻𑀯𑀭𑀲𑀸𑀫𑀺𑀓𑀸𑀦𑀁 𑀳𑀢𑁆𑀣𑀢𑁄 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀈𑀲𑀓𑀫𑁆𑀧𑀺 𑀆𑀬𑀢𑀁 𑀯𑀸 𑀯𑀺𑀢𑁆𑀣𑀢𑀁 𑀯𑀸 𑀅𑀧𑁆𑀧𑀺𑀢𑀁 𑀯𑀸 𑀓𑀭𑁄𑀦𑁆𑀢𑀺, 𑀅𑀣 𑀢𑁂𑀲𑀁 𑀧𑀬𑁄𑀕𑁂 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀦𑁆𑀤𑀁 𑀆𑀭𑀩𑁆𑀪 𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀜𑀸𑀢𑀓𑁂 𑀅𑀜𑁆𑀜𑀸𑀢𑀓𑀲𑀜𑁆𑀜𑀺𑀦𑁄 𑀯𑁂𑀫𑀢𑀺𑀓𑀲𑁆𑀲 𑀯𑀸 𑀤𑀼𑀓𑁆𑀓𑀝𑀁. 𑀜𑀸𑀢𑀓𑀧𑁆𑀧𑀯𑀸𑀭𑀺𑀢𑀸𑀦𑀁 𑀢𑀦𑁆𑀢𑀯𑀸𑀬𑁂𑀳𑀺, 𑀅𑀜𑁆𑀜𑀲𑁆𑀲 𑀯𑀸 𑀅𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦, 𑀫𑀳𑀕𑁆𑀖𑀁 𑀯𑀸𑀬𑀸𑀧𑁂𑀢𑀼𑀓𑀸𑀫𑀁 𑀅𑀧𑁆𑀧𑀕𑁆𑀖𑀁 𑀯𑀸𑀬𑀸𑀧𑁂𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑀸𑀦𑀁 𑀢𑀦𑁆𑀢𑀯𑀸𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀓𑀧𑁆𑀧𑀫𑀸𑀧𑀚𑁆𑀚𑀦𑀢𑀸, 𑀘𑀻𑀯𑀭𑀲𑁆𑀲 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸, 𑀢𑀲𑁆𑀲 𑀯𑀘𑀦𑁂𑀦 𑀲𑀼𑀢𑁆𑀢𑀯𑀟𑁆𑀠𑀦𑀁, 𑀘𑀻𑀯𑀭𑀧𑁆𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺.

𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀤𑀲𑀸𑀳𑀸𑀦𑀸𑀕𑀢𑀦𑁆𑀢𑀺 𑀤𑀲 𑀅𑀳𑀸𑀦𑀺 𑀤𑀲𑀸𑀳𑀁, 𑀢𑁂𑀦 𑀤𑀲𑀸𑀳𑁂𑀦 𑀅𑀦𑀸𑀕𑀢𑀸 𑀤𑀲𑀸𑀳𑀸𑀦𑀸𑀕𑀢𑀸, 𑀤𑀲𑀸𑀳𑁂𑀦 𑀅𑀲𑀫𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀢𑀁 𑀤𑀲𑀸𑀳𑀸𑀦𑀸𑀕𑀢𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀓𑀧𑀼𑀡𑁆𑀡𑀫𑀦𑁆𑀢𑀺 𑀧𑀞𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀁, 𑀇𑀥𑀸𑀧𑀺 𑀧𑀞𑀫𑀧𑀤𑀲𑁆𑀲 𑀅𑀦𑀼𑀧𑀬𑁄𑀕𑀢𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀢𑁄 𑀧𑀝𑁆𑀞𑀸𑀬 𑀧𑀞𑀫𑀧𑁆𑀧𑀯𑀸𑀭𑀡𑀸 ‘‘𑀤𑀲𑀸𑀳𑀸𑀦𑀸𑀕𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀲𑀘𑁂𑀧𑀺 𑀢𑀸𑀦𑀺 𑀤𑀺𑀯𑀲𑀸𑀦𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀺𑀓𑁆𑀔𑀼𑀦𑁄 𑀅𑀘𑁆𑀘𑁂𑀓𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, ‘‘𑀅𑀘𑁆𑀘𑁂𑀓𑀁 𑀇𑀤’’𑀦𑁆𑀢𑀺 𑀚𑀸𑀦𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀩𑁆𑀩𑀫𑁆𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺. 𑀢𑁂𑀦 𑀧𑀯𑀸𑀭𑀡𑀸𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀲𑁆𑀲 𑀦𑀺𑀥𑀸𑀦𑀓𑀸𑀮𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀸𑀫𑀜𑁆𑀘𑁂𑀲 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺𑀇𑀫𑀺𑀦𑀸𑀯 𑀲𑀺𑀤𑁆𑀥𑁄, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀅𑀧𑀼𑀩𑁆𑀩𑀁 𑀯𑀺𑀬 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀞𑀧𑀺𑀢𑀁. 𑀅𑀘𑁆𑀘𑁂𑀓𑀘𑀻𑀯𑀭𑀦𑁆𑀢𑀺 𑀕𑀫𑀺𑀓𑀕𑀺𑀮𑀸𑀦𑀕𑀩𑁆𑀪𑀺𑀦𑀺𑀅𑀪𑀺𑀦𑀯𑀼𑀧𑁆𑀧𑀦𑁆𑀦𑀲𑀤𑁆𑀥𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀜𑁆𑀜𑀢𑀭𑁂𑀦 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀆𑀭𑁄𑀘𑁂𑀢𑁆𑀯𑀸 𑀤𑀺𑀦𑁆𑀦𑀁. 𑀲𑀘𑁂 𑀢𑀁 𑀧𑀼𑀭𑁂 𑀧𑀯𑀸𑀭𑀡𑀸𑀬 𑀯𑀺𑀪𑀚𑀺𑀢𑀁, 𑀬𑁂𑀦 𑀕𑀳𑀺𑀢𑀁, 𑀢𑁂𑀦 𑀯𑀲𑁆𑀲𑀘𑁆𑀙𑁂𑀤𑁄 𑀦 𑀓𑀸𑀢𑀩𑁆𑀩𑁄, 𑀓𑀭𑁄𑀢𑀺 𑀘𑁂, 𑀢𑀁 𑀘𑀻𑀯𑀭𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀬𑀸𑀯 𑀘𑀻𑀯𑀭𑀓𑀸𑀮𑀲𑀫𑀬𑀦𑁆𑀢𑀺 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀬𑀸𑀯 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀬𑀸𑀯 𑀧𑀜𑁆𑀘 𑀫𑀸𑀲𑀸, 𑀢𑀸𑀯 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣 𑀘𑀻𑀯𑀭𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀉𑀧𑀯𑀲𑁆𑀲𑀁 𑀔𑁄 𑀧𑀦𑀸𑀢𑀺 𑀏𑀢𑁆𑀣 𑀉𑀧𑀯𑀲𑁆𑀲𑀦𑁆𑀢𑀺 𑀉𑀧𑀯𑀲𑁆𑀲, 𑀉𑀧𑀯𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀉𑀧𑀲𑀫𑁆𑀧𑀚𑁆𑀚𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁭𑁦) 𑀯𑀺𑀬 𑀳𑁂𑀢𑁆𑀣 𑀅𑀦𑀼𑀦𑀸𑀲𑀺𑀓𑁄 𑀤𑀝𑁆𑀞𑀩𑁆𑀩𑁄, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀲𑀺𑀢𑁆𑀯𑀸 𑀘𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲 𑀘 𑀧𑀤𑀲𑁆𑀲 ‘‘𑀢𑀣𑀸𑀭𑀽𑀧𑁂𑀲𑀼 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑁄’’𑀢𑀺𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀯𑀲𑀺𑀢𑁆𑀯𑀸 𑀘 𑀢𑀢𑁄 𑀧𑀭𑀁 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀧𑀭𑀺𑀬𑁄𑀲𑀸𑀦𑀓𑀸𑀮𑀁 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀆𑀭𑀜𑁆𑀜𑀓𑀸𑀦𑀺…𑀧𑁂… 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺. 𑀢𑀢𑁆𑀣 𑀆𑀭𑀜𑁆𑀜𑀓𑀸𑀦𑀻𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀸𑀦𑀺 𑀆𑀭𑁄𑀧𑀺𑀢𑁂𑀦 𑀆𑀘𑀭𑀺𑀬𑀥𑀦𑀼𑀦𑀸 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀥𑀦𑀼𑀲𑀢𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀓𑀢𑀲𑁂𑀦𑀸𑀲𑀦𑀸𑀦𑀺. 𑀲𑀘𑁂 𑀧𑀦 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀕𑀸𑀫𑁄 𑀳𑁄𑀢𑀺, 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀫𑀺𑀦𑁂𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁄 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀬𑀁 𑀕𑀸𑀫𑀢𑁄 𑀲𑀩𑁆𑀩𑀧𑀞𑀫𑀁 𑀲𑁂𑀦𑀸𑀲𑀦𑀁 𑀯𑀸 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺 𑀯𑀸 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀯𑀸 𑀬𑀸𑀯, 𑀢𑀁 𑀢𑀸𑀯 𑀧𑀓𑀢𑀺𑀫𑀕𑁆𑀕𑁂𑀦 𑀫𑀺𑀦𑁂𑀢𑀩𑁆𑀩𑀁, 𑀅𑀜𑁆𑀜𑀁 𑀫𑀕𑁆𑀕𑀁 𑀓𑀸𑀢𑀼𑀁, 𑀅𑀫𑀕𑁆𑀕𑁂𑀦 𑀯𑀸 𑀫𑀺𑀦𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀸𑀲𑀗𑁆𑀓𑀲𑀫𑁆𑀫𑀢𑀸𑀦𑀻𑀢𑀺 𑀘𑁄𑀭𑀸𑀤𑀻𑀦𑀁 𑀦𑀺𑀯𑀺𑀝𑁆𑀞𑁄𑀓𑀸𑀲𑀸𑀤𑀺𑀤𑀲𑁆𑀲𑀦𑁂𑀦 ‘‘𑀲𑀸𑀲𑀗𑁆𑀓𑀸𑀦𑀻’’𑀢𑀺 𑀲𑀫𑁆𑀫𑀢𑀸𑀦𑀺, 𑀏𑀯𑀁 𑀲𑀜𑁆𑀜𑀸𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀳 𑀧𑀝𑀺𑀪𑀬𑁂𑀦 𑀲𑀧𑁆𑀧𑀝𑀺𑀪𑀬𑀸𑀦𑀺, 𑀘𑁄𑀭𑁂𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑀯𑀺𑀮𑀼𑀢𑁆𑀢𑀸𑀓𑁄𑀝𑀺𑀢𑀪𑀸𑀯𑀤𑀲𑁆𑀲𑀦𑀢𑁄 𑀲𑀦𑁆𑀦𑀺𑀳𑀺𑀢𑀩𑀮𑀯𑀪𑀬𑀸𑀦𑀻𑀢𑀺 𑀅𑀢𑁆𑀣𑁄.

𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀆𑀭𑀜𑁆𑀜𑀓𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑀫𑀦𑁆𑀢𑀸 𑀲𑀩𑁆𑀩𑀤𑀺𑀲𑀸𑀪𑀸𑀕𑁂𑀲𑀼 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑁂 𑀕𑁄𑀘𑀭𑀕𑀸𑀫𑁂 𑀦𑀺𑀓𑁆𑀔𑀺𑀧𑁂𑀬𑁆𑀬. 𑀢𑀜𑁆𑀘 𑀔𑁄 𑀲𑀢𑀺𑀬𑀸 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸, 𑀢𑀢𑁆𑀭𑀸𑀬𑀁 𑀅𑀗𑁆𑀕𑀲𑀫𑁆𑀧𑀢𑁆𑀢𑀺 𑁋 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀦𑁆𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀇𑀤𑀫𑁂𑀓𑀁 𑀅𑀗𑁆𑀕𑀁. 𑀓𑀢𑁆𑀢𑀺𑀓𑀫𑀸𑀲𑁄𑀬𑁂𑀯 𑀳𑁄𑀢𑀺, 𑀇𑀤𑀁 𑀤𑀼𑀢𑀺𑀬𑀁 𑀅𑀗𑁆𑀕𑀁. 𑀧𑀜𑁆𑀘𑀥𑀦𑀼𑀲𑀢𑀺𑀓𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑀁 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀇𑀤𑀁 𑀢𑀢𑀺𑀬𑀁 𑀅𑀗𑁆𑀕𑀁. 𑀊𑀦𑀧𑁆𑀧𑀫𑀸𑀡𑁂 𑀯𑀸 𑀕𑀸𑀯𑀼𑀢𑀢𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁂 𑀯𑀸 𑀦 𑀮𑀪𑀢𑀺, 𑀬𑀢𑁆𑀭 𑀳𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀼𑀢𑁆𑀢𑀯𑁂𑀮𑀸𑀬𑀫𑁂𑀯 𑀧𑀼𑀦 𑀯𑀺𑀳𑀸𑀭𑀁 𑀲𑀓𑁆𑀓𑀸 𑀆𑀕𑀦𑁆𑀢𑀼𑀁, 𑀢𑀤𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀫𑁂𑀯 𑀳𑁄𑀢𑀺, 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀳𑁄𑀢𑀻𑀢𑀺. 𑀓𑁄𑀘𑀺𑀤𑁂𑀯 𑀧𑀘𑁆𑀘𑀬𑁄𑀢𑀺 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁. 𑀢𑁂𑀦 𑀘𑀻𑀯𑀭𑁂𑀦𑀸𑀢𑀺 𑀢𑁂𑀦 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑁂𑀦. 𑀯𑀺𑀧𑁆𑀧𑀯𑀸𑀲𑀸𑀬𑀸𑀢𑀺 𑀯𑀺𑀬𑁄𑀕𑀯𑀸𑀲𑀸𑀬. 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 𑀙𑀸𑀭𑀢𑁆𑀢𑀢𑁄 𑀉𑀢𑁆𑀢𑀭𑀺 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀲𑀢𑁆𑀢𑀫𑀁 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀕𑀸𑀫𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀲𑀪𑀸𑀬𑀁 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀯𑀲𑀺𑀢𑁆𑀯𑀸 𑀘𑀻𑀯𑀭𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀧𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸𑀢𑀺 𑀬𑀁 𑀲𑀗𑁆𑀖𑁄 𑀕𑀺𑀮𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀁 𑀤𑁂𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀅𑀢𑀺𑀭𑁂𑀓𑀙𑀸𑀭𑀢𑁆𑀢𑀁 𑀯𑀺𑀧𑁆𑀧𑀯𑀲𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣 𑀘𑀻𑀯𑀭𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀲𑀗𑁆𑀖𑀺𑀓𑀦𑁆𑀢𑀺 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁. 𑀲𑁄 𑀳𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀢𑁆𑀢𑀸 𑀳𑀢𑁆𑀣𑁂 𑀅𑀦𑀸𑀭𑀼𑀴𑁆𑀳𑁄𑀧𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀲𑀦𑁆𑀢𑀓𑁄 𑀳𑁄𑀢𑀺. 𑀮𑀸𑀪𑀦𑁆𑀢𑀺 𑀮𑀪𑀺𑀢𑀩𑁆𑀩𑀁 𑀘𑀻𑀯𑀭𑀸𑀤𑀺𑀯𑀢𑁆𑀣𑀼𑀁. 𑀧𑀭𑀺𑀡𑀢𑀦𑁆𑀢𑀺 ‘‘𑀤𑀲𑁆𑀲𑀸𑀫 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀘𑀻𑀪𑁂𑀤𑁂𑀦 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀯𑀸 𑀲𑀗𑁆𑀖𑀲𑁆𑀲 𑀦𑀺𑀦𑁆𑀦𑀁 𑀳𑀼𑀢𑁆𑀯𑀸 𑀞𑀺𑀢𑀁. 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺 ‘‘𑀇𑀤𑀁 𑀫𑀬𑁆𑀳𑀁 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑀺𑀦𑁆𑀦𑀁 𑀓𑀭𑁂𑀬𑁆𑀬. 𑀲𑀘𑁂 𑀧𑀦 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀳𑁄𑀢𑀺, 𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀤𑀸𑀢𑀩𑁆𑀩𑀁. 𑀧𑀭𑀺𑀡𑀢𑀁 𑀧𑀦 𑀲𑀳𑀥𑀫𑁆𑀫𑀺𑀓𑀸𑀦𑀁 𑀯𑀸 𑀕𑀺𑀳𑀻𑀦𑀁 𑀯𑀸 𑀅𑀦𑁆𑀢𑀫𑀲𑁄 𑀫𑀸𑀢𑀼𑀲𑀦𑁆𑀢𑀓𑀫𑁆𑀧𑀺 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁, 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀧𑀭𑀺𑀡𑀸𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀧𑀭𑀺𑀡𑀢𑁂 𑀯𑁂𑀫𑀢𑀺𑀓𑀲𑁆𑀲, 𑀅𑀧𑀭𑀺𑀡𑀢𑁂 𑀧𑀭𑀺𑀡𑀢𑀲𑀜𑁆𑀜𑀺𑀦𑁄 𑀘𑁂𑀯 𑀯𑁂𑀫𑀢𑀺𑀓𑀲𑁆𑀲 𑀘, 𑀲𑀗𑁆𑀖𑀘𑁂𑀢𑀺𑀬𑀧𑀼𑀕𑁆𑀕𑀮𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀭𑀺𑀡𑀢𑀁 𑀅𑀜𑁆𑀜𑀲𑀗𑁆𑀖𑀸𑀤𑀻𑀦𑀁 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲 𑀘 𑀤𑀼𑀓𑁆𑀓𑀝𑀁. 𑀅𑀧𑀭𑀺𑀡𑀢𑀲𑀜𑁆𑀜𑀺𑀦𑁄, ‘‘𑀓𑀢𑁆𑀣 𑀤𑁂𑀫𑀸’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀬𑀢𑁆𑀣 𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀢𑀢𑁆𑀣 𑀤𑁂𑀣, 𑀢𑀼𑀫𑁆𑀳𑀸𑀓𑀁 𑀤𑁂𑀬𑁆𑀬𑀥𑀫𑁆𑀫𑁄 𑀧𑀭𑀺𑀪𑁄𑀕𑀁 𑀯𑀸 𑀮𑀪𑁂𑀬𑁆𑀬𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀗𑁆𑀖𑁂 𑀧𑀭𑀺𑀡𑀢𑀪𑀸𑀯𑁄, 𑀢𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀻𑀢𑀺.

𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

𑀇𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀯𑀡𑁆𑀡𑀦𑀸𑀬

𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.