𑁧. 𑀧𑀞𑀫𑀸𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀦𑀺𑀬𑀢𑀼𑀤𑁆𑀤𑁂𑀲𑁂 𑀇𑀫𑁂 𑀔𑁄 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀫𑀸𑀢𑀼𑀕𑀸𑀫𑁂𑀦𑀸𑀢𑀺 𑀢𑀤𑀳𑀼𑀚𑀸𑀢𑀸𑀬𑀧𑀺 𑀚𑀻𑀯𑀫𑀸𑀦𑀓𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸. 𑀏𑀓𑁄 𑀏𑀓𑀸𑀬𑀸𑀢𑀺 𑀏𑀓𑁄 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑀲𑀗𑁆𑀔𑀸𑀢𑀸𑀬 𑀏𑀓𑀸𑀬 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁. 𑀭𑀳𑁄𑀢𑀺 𑀘𑀓𑁆𑀔𑀼𑀲𑁆𑀲 𑀭𑀳𑁄. 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 (𑀧𑀸𑀭𑀸. 𑁪𑁪𑁫) 𑀲𑁄𑀢𑀲𑁆𑀲 𑀭𑀳𑁄 𑀆𑀕𑀢𑁄, 𑀘𑀓𑁆𑀔𑀼𑀲𑁆𑀲𑁂𑀯 𑀧𑀦 𑀭𑀳𑁄 ‘‘𑀭𑀳𑁄’’𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀲𑀘𑁂𑀧𑀺 𑀳𑀺 𑀧𑀺𑀳𑀺𑀢𑀓𑀯𑀸𑀝𑀲𑁆𑀲 𑀕𑀩𑁆𑀪𑀲𑁆𑀲 𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀳𑁄𑀢𑀺, 𑀦𑁂𑀯 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀬𑀢𑁆𑀣 𑀧𑀦 𑀲𑀓𑁆𑀓𑀸 𑀤𑀝𑁆𑀞𑀼𑀁, 𑀢𑀸𑀤𑀺𑀲𑁂 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂𑀧𑀺 𑀑𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀲𑀘𑀓𑁆𑀔𑀼𑀓𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀲𑀫𑀻𑀧𑁂 𑀞𑀺𑀢𑁄𑀧𑀺 𑀅𑀦𑁆𑀥𑁄 𑀦 𑀓𑀭𑁄𑀢𑀺, 𑀘𑀓𑁆𑀔𑀼𑀫𑀸𑀧𑀺 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀦 𑀓𑀭𑁄𑀢𑀺, 𑀇𑀢𑁆𑀣𑀻𑀦𑀁 𑀧𑀦 𑀲𑀢𑀫𑁆𑀧𑀺 𑀦 𑀓𑀭𑁄𑀢𑀺𑀬𑁂𑀯, 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀳𑁄𑀢𑀺 𑀘𑀓𑁆𑀔𑀼𑀲𑁆𑀲 𑀭𑀳𑁄’’𑀢𑀺. 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂𑀢𑀺 𑀓𑀼𑀝𑁆𑀝𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑁂. 𑀅𑀮𑀁𑀓𑀫𑁆𑀫𑀦𑀺𑀬𑁂𑀢𑀺 𑀓𑀫𑁆𑀫𑀓𑁆𑀔𑀫𑀁 𑀓𑀫𑁆𑀫𑀬𑁄𑀕𑁆𑀕𑀦𑁆𑀢𑀺 𑀓𑀫𑁆𑀫𑀦𑀺𑀬𑀁, 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀓𑀫𑁆𑀫𑀦𑀺𑀬𑀪𑀸𑀯𑀸𑀬𑀸𑀢𑀺 𑀅𑀮𑀁𑀓𑀫𑁆𑀫𑀦𑀺𑀬𑀁, 𑀢𑀲𑁆𑀫𑀺𑀁 𑀅𑀮𑀁𑀓𑀫𑁆𑀫𑀦𑀺𑀬𑁂. 𑀬𑀢𑁆𑀣 𑀅𑀚𑁆𑀛𑀸𑀘𑀸𑀭𑀁 𑀓𑀭𑁄𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀢𑀸𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀦𑀺𑀲𑀚𑁆𑀚𑀁 𑀓𑀭𑁂𑀬𑁆𑀬, 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀬𑀦𑀫𑁆𑀧𑀺 𑀦𑀺𑀲𑀚𑁆𑀚𑀸𑀬 𑀏𑀯 𑀲𑀗𑁆𑀕𑀳𑀺𑀢𑀁. 𑀲𑀤𑁆𑀥𑁂𑀬𑁆𑀬𑀯𑀘𑀲𑀸𑀢𑀺 𑀲𑀤𑁆𑀥𑀸𑀢𑀩𑁆𑀩𑀯𑀘𑀦𑀸, 𑀅𑀭𑀺𑀬𑀲𑀸𑀯𑀺𑀓𑀸𑀢𑀺 𑀅𑀢𑁆𑀣𑁄. 𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄𑀢𑀺 𑀓𑀺𑀜𑁆𑀘𑀸𑀧𑀺 𑀏𑀯𑀭𑀽𑀧𑀸 𑀉𑀧𑀸𑀲𑀺𑀓𑀸 𑀤𑀺𑀲𑁆𑀯𑀸 𑀯𑀤𑀢𑀺, 𑀅𑀣 𑀔𑁄 𑀪𑀺𑀓𑁆𑀔𑀼 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀫𑀸𑀦𑁄𑀯 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄, 𑀦 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀬𑁂𑀦 𑀯𑀸 𑀲𑀸𑀢𑀺 𑀦𑀺𑀲𑀚𑁆𑀚𑀸𑀤𑀻𑀲𑀼 𑀆𑀓𑀸𑀭𑁂𑀲𑀼 𑀬𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀤𑁆𑀥𑀺𑀁 𑀫𑁂𑀣𑀼𑀦𑀸𑀤𑀻𑀦𑀺 𑀆𑀭𑁄𑀧𑁂𑀢𑁆𑀯𑀸 𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬, 𑀧𑀝𑀺𑀚𑀸𑀦𑀫𑀸𑀦𑁄𑀯 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄, 𑀏𑀯𑀭𑀽𑀧𑀸𑀬𑀧𑀺 𑀳𑀺 𑀉𑀧𑀸𑀲𑀺𑀓𑀸𑀬 𑀯𑀘𑀦𑀫𑀢𑁆𑀢𑁂𑀦 𑀆𑀓𑀸𑀭𑁂𑀦 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀤𑀺𑀝𑁆𑀞𑀁 𑀦𑀸𑀫 𑀢𑀣𑀸𑀧𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀧𑀻𑀢𑀺. 𑀅𑀬𑀁 𑀥𑀫𑁆𑀫𑁄 𑀅𑀦𑀺𑀬𑀢𑁄𑀢𑀺 𑀢𑀺𑀡𑁆𑀡𑀁 𑀆𑀧𑀢𑁆𑀢𑀻𑀦𑀁 𑀬𑀁 𑀆𑀧𑀢𑁆𑀢𑀺𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲 𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑀢𑀸𑀬 𑀅𑀦𑀺𑀬𑀢𑁄.

𑀲𑀸𑀯𑀢𑁆𑀣𑀺𑀬𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀆𑀲𑀦𑁂 𑀦𑀺𑀲𑀚𑁆𑀚𑀓𑀧𑁆𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀅𑀦𑀸𑀡𑀢𑁆𑀢𑀺𑀓𑀁, 𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀭𑀳𑀲𑁆𑀲𑀸𑀤𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑀢𑀸𑀬 𑀅𑀓𑁆𑀔𑀺𑀅𑀜𑁆𑀚𑀦𑀸𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁. 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀯𑀸 𑀦𑀺𑀲𑀺𑀦𑁆𑀦𑁂 𑀇𑀢𑁆𑀣𑀻 𑀦𑀺𑀲𑀻𑀤𑀢𑀼, 𑀢𑀲𑁆𑀲𑀸 𑀯𑀸 𑀦𑀺𑀲𑀺𑀦𑁆𑀦𑀸𑀬 𑀲𑁄 𑀦𑀺𑀲𑀻𑀤𑀢𑀼, 𑀅𑀧𑀘𑁆𑀙𑀸 𑀅𑀧𑀼𑀭𑀺𑀫𑀁𑀬𑁂𑀯 𑀉𑀪𑁄 𑀯𑀸 𑀦𑀺𑀲𑀻𑀤𑀦𑁆𑀢𑀼, 𑀉𑀪𑀺𑀦𑁆𑀦𑀁 𑀦𑀺𑀲𑀚𑁆𑀚𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀧𑀦 𑀓𑀸𑀬𑀲𑀁𑀲𑀕𑁆𑀕𑀁 𑀯𑀸 𑀫𑁂𑀣𑀼𑀦𑀁 𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀢𑁂𑀲𑀁 𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀦𑀺𑀧𑀚𑁆𑀚𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀼𑀭𑀺𑀲𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀦𑀺𑀤𑁆𑀤𑀸𑀬𑀦𑁆𑀢𑁂 𑀅𑀦𑀦𑁆𑀥𑁂 𑀯𑀺𑀜𑁆𑀜𑀼𑀧𑀼𑀭𑀺𑀲𑁂 𑀉𑀧𑀘𑀸𑀭𑀕𑀢𑁂 𑀲𑀢𑀺, 𑀞𑀺𑀢𑀲𑁆𑀲, 𑀅𑀭𑀳𑁄𑀧𑁂𑀓𑁆𑀔𑀲𑁆𑀲, 𑀅𑀜𑁆𑀜𑀯𑀺𑀳𑀺𑀢𑀲𑁆𑀲 𑀘 𑀦𑀺𑀲𑀚𑁆𑀚𑀦𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺. 𑀉𑀫𑁆𑀫𑀢𑁆𑀢𑀓𑀸𑀤𑀻𑀦𑀁 𑀧𑀦 𑀢𑀻𑀳𑀺𑀧𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺. 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺. 𑀬𑀁 𑀧𑀦 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀯𑀲𑁂𑀦 𑀅𑀗𑁆𑀕𑀪𑁂𑀤𑁄 𑀜𑀸𑀢𑀩𑁆𑀩𑁄. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀞𑀫𑀸𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.