𑀓𑀗𑁆𑀔𑀸𑀯𑀺𑀢𑀭𑀡𑀻-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀩𑀼𑀤𑁆𑀥𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀯𑀦𑁆𑀤𑀺𑀢𑁆𑀯𑀸 𑀯𑀦𑁆𑀤𑀦𑀸𑀫𑀸𑀦, 𑀧𑀽𑀚𑀸𑀲𑀓𑁆𑀓𑀸𑀭𑀪𑀸𑀚𑀦𑀁.

𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁, 𑀣𑀺𑀭𑀸𑀦𑀁 𑀯𑀺𑀦𑀬𑀓𑁆𑀓𑀫𑁂;

𑀧𑀼𑀩𑁆𑀩𑀸𑀘𑀭𑀺𑀬𑀲𑀻𑀳𑀸𑀦𑀁, 𑀦𑀫𑁄 𑀓𑀢𑁆𑀯𑀸 𑀓𑀢𑀜𑁆𑀚𑀮𑀻.

𑀧𑀸𑀫𑁄𑀓𑁆𑀔𑀁 𑀅𑀦𑀯𑀚𑁆𑀚𑀸𑀦𑀁, 𑀥𑀫𑁆𑀫𑀸𑀦𑀁 𑀬𑀁 𑀫𑀳𑁂𑀲𑀺𑀦𑀸;

𑀫𑀼𑀔𑀁 𑀫𑁄𑀓𑁆𑀔𑀧𑁆𑀧𑀯𑁂𑀲𑀸𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀧𑀓𑀸𑀲𑀺𑀢𑀁.

𑀲𑀽𑀭𑀢𑁂𑀦 𑀦𑀺𑀯𑀸𑀢𑁂𑀦, 𑀲𑀼𑀘𑀺𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸;

𑀯𑀺𑀦𑀬𑀸𑀘𑀸𑀭𑀬𑀼𑀢𑁆𑀢𑁂𑀦, 𑀲𑁄𑀡𑀢𑁆𑀣𑁂𑀭𑁂𑀦 𑀬𑀸𑀘𑀺𑀢𑁄.

𑀢𑀢𑁆𑀣 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀁, 𑀪𑀺𑀓𑁆𑀔𑀽𑀦𑀁 𑀢𑀲𑁆𑀲 𑀯𑀡𑁆𑀡𑀦𑀁;

𑀓𑀗𑁆𑀔𑀸𑀯𑀺𑀢𑀭𑀡𑀢𑁆𑀣𑀸𑀬, 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀁.

𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢𑀁;

𑀯𑀢𑁆𑀢𑀬𑀺𑀲𑁆𑀲𑀸𑀫𑀺 𑀦𑀸𑀫𑁂𑀦, 𑀓𑀗𑁆𑀔𑀸𑀯𑀺𑀢𑀭𑀡𑀺𑀁 𑀲𑀼𑀪𑀦𑁆𑀢𑀺.