𑁧. 𑀙𑀢𑁆𑀢𑀼𑀧𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀢𑁆𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀙𑀢𑁆𑀢𑀼𑀧𑀸𑀳𑀦𑀦𑁆𑀢𑀺 𑀧𑀤𑀪𑀸𑀚𑀦𑁂 (𑀧𑀸𑀘𑀺. 𑁧𑁧𑁭𑁮-𑁧𑁧𑁮𑁨) 𑀯𑀼𑀢𑁆𑀢𑀮𑀓𑁆𑀔𑀡𑀁 𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀸𑀬𑁄 𑀘. 𑀥𑀸𑀭𑁂𑀬𑁆𑀬𑀸𑀢𑀺 𑀧𑀭𑀺𑀪𑁄𑀕𑀯𑀲𑁂𑀦 𑀫𑀕𑁆𑀕𑀕𑀫𑀦𑁂 𑀏𑀓𑀧𑁆𑀧𑀬𑁄𑀕𑁂𑀦𑁂𑀯 𑀤𑀺𑀯𑀲𑀫𑁆𑀧𑀺 𑀥𑀸𑀭𑁂𑀦𑁆𑀢𑀺𑀬𑀸 𑀏𑀓𑀸 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀢𑀸𑀤𑀺𑀲𑀁 𑀞𑀸𑀦𑀁 𑀧𑀢𑁆𑀯𑀸 𑀙𑀢𑁆𑀢𑀫𑁆𑀧𑀺 𑀅𑀧𑀦𑀸𑀫𑁂𑀢𑁆𑀯𑀸 𑀉𑀧𑀸𑀳𑀦𑀸𑀧𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀥𑀸𑀭𑁂𑀢𑀺, 𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀙𑀢𑁆𑀢𑀼𑀧𑀸𑀳𑀦𑀥𑀸𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, ‘‘𑀅𑀕𑀺𑀮𑀸𑀦𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀙𑀢𑁆𑀢𑀲𑁆𑀲𑁂𑀯 𑀉𑀧𑀸𑀳𑀦𑀸𑀦𑀁𑀬𑁂𑀯 𑀯𑀸 𑀥𑀸𑀭𑀡𑁂 𑀤𑀼𑀓𑁆𑀓𑀝𑀁, 𑀅𑀕𑀺𑀮𑀸𑀦𑀸𑀬 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀕𑀺𑀮𑀸𑀦𑀸𑀬 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀕𑀺𑀮𑀸𑀦𑀲𑀜𑁆𑀜𑀸𑀬 𑀧𑀦, 𑀆𑀭𑀸𑀫𑁂 𑀆𑀭𑀸𑀫𑀽𑀧𑀘𑀸𑀭𑁂 𑀥𑀸𑀭𑁂𑀦𑁆𑀢𑀺𑀬𑀸, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀉𑀪𑀺𑀦𑁆𑀦𑀁 𑀥𑀸𑀭𑀡𑀁, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺.

𑀙𑀢𑁆𑀢𑀼𑀧𑀸𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.