𑁮. 𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄

𑁧-𑁨-𑁩. 𑀧𑀞𑀫𑀓𑀼𑀫𑀸𑀭𑀺𑀪𑀽𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑀲𑁆𑀲 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀢𑀻𑀳𑀺 𑀕𑀺𑀳𑀺𑀕𑀢𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀤𑀺𑀲𑀸𑀦𑁂𑀯. 𑀬𑀸 𑀧𑀦 𑀢𑀸 𑀲𑀩𑁆𑀩𑀧𑀞𑀫𑀸 𑀤𑁆𑀯𑁂 𑀫𑀳𑀸𑀲𑀺𑀓𑁆𑀔𑀫𑀸𑀦𑀸, 𑀢𑀸 𑀅𑀢𑀺𑀓𑁆𑀓𑀦𑁆𑀢𑀯𑀻𑀲𑀢𑀺𑀯𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸 𑀳𑀺 𑀕𑀺𑀳𑀺𑀕𑀢𑀸 𑀯𑀸 𑀳𑁄𑀦𑁆𑀢𑀼, 𑀅𑀕𑀺𑀳𑀺𑀕𑀢𑀸 𑀯𑀸, 𑀲𑀫𑁆𑀫𑀼𑀢𑀺𑀓𑀫𑁆𑀫𑀸𑀤𑀻𑀲𑀼 ‘‘𑀲𑀺𑀓𑁆𑀔𑀫𑀸𑀦𑀸’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸, ‘‘𑀕𑀺𑀳𑀺𑀕𑀢𑀸’’𑀢𑀺 𑀯𑀸 ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀕𑀺𑀳𑀺𑀕𑀢𑀸𑀬 𑀤𑀲𑀯𑀲𑁆𑀲𑀓𑀸𑀮𑁂 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀓𑀸𑀮𑁂 𑀉𑀧𑀲𑀫𑁆𑀧𑀤𑀸 𑀓𑀸𑀢𑀩𑁆𑀩𑀸, 𑀏𑀓𑀸𑀤𑀲𑀯𑀲𑁆𑀲𑀓𑀸𑀮𑁂 𑀤𑀢𑁆𑀯𑀸 𑀢𑁂𑀭𑀲𑀯𑀲𑁆𑀲𑀓𑀸𑀮𑁂 𑀓𑀸𑀢𑀩𑁆𑀩𑀸, 𑀤𑁆𑀯𑀸𑀤𑀲𑀢𑁂𑀭𑀲𑀘𑀼𑀤𑁆𑀤𑀲𑀧𑀦𑁆𑀦𑀭𑀲𑀲𑁄𑀴𑀲𑀲𑀢𑁆𑀢𑀭𑀲𑀅𑀝𑁆𑀞𑀸𑀭𑀲𑀯𑀲𑁆𑀲𑀓𑀸𑀮𑁂 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀉𑀧𑀲𑀫𑁆𑀧𑀤𑀸 𑀓𑀸𑀢𑀩𑁆𑀩𑀸. 𑀅𑀝𑁆𑀞𑀸𑀭𑀲𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘 𑀧𑀦𑀸𑀬𑀁 ‘‘𑀕𑀺𑀳𑀺𑀕𑀢𑀸’’𑀢𑀺𑀧𑀺 ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀸 𑀧𑀦𑀸𑀬𑀁 ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀸 𑀲𑀸𑀫𑀡𑁂𑀭𑀻, 𑀲𑀸 ‘‘𑀕𑀺𑀳𑀺𑀕𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, ‘‘𑀓𑀼𑀫𑀸𑀭𑀺𑀪𑀽𑀢𑀸’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀸. 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀤𑀸𑀦𑀯𑀲𑁂𑀦 𑀧𑀦 𑀲𑀩𑁆𑀩𑀸𑀧𑀺 ‘‘𑀲𑀺𑀓𑁆𑀔𑀫𑀸𑀦𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀧𑀞𑀫𑀓𑀼𑀫𑀸𑀭𑀺𑀪𑀽𑀢𑀸𑀤𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸𑀢𑀺 𑀉𑀧𑀲𑀫𑁆𑀧𑀤𑀸𑀯𑀲𑁂𑀦 𑀅𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀳𑀼𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀼𑀓𑁆𑀓𑀝𑀸𑀦𑀺 𑀅𑀦𑁆𑀢𑀭𑀸, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺.

𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸𑀢𑀺 𑀬𑀲𑁆𑀲𑀸 𑀲𑀗𑁆𑀖𑁂𑀦 𑀧𑀤𑀪𑀸𑀚𑀦𑁂 (𑀧𑀸𑀘𑀺. 𑁧𑁧𑁩𑁨) 𑀯𑀼𑀢𑁆𑀢𑀸 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺 𑀦 𑀤𑀺𑀦𑁆𑀦𑀸. 𑀲𑁂𑀲𑀁 𑀉𑀪𑀬𑀢𑁆𑀣𑀸𑀧𑀺 𑀫𑀳𑀸𑀲𑀺𑀓𑁆𑀔𑀫𑀸𑀦𑀸𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀲𑀤𑀺𑀲𑀫𑁂𑀯𑀸𑀢𑀺.

𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀔𑀻𑀬𑀦𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀅𑀮𑀁 𑀢𑀸𑀯 𑀢𑁂 𑀅𑀬𑁆𑀬𑁂 𑀯𑀼𑀝𑁆𑀞𑀸𑀧𑀺𑀢𑁂𑀦𑀸𑀢𑀺 𑀯𑀼𑀘𑁆𑀘𑀫𑀸𑀦𑀸𑀢𑀺 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀬𑀸 𑀬𑀸𑀘𑀺𑀢𑀸𑀬 𑀲𑀗𑁆𑀖𑁂𑀦 𑀉𑀧𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀬𑀲𑁆𑀫𑀸 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀘 𑀅𑀮𑀚𑁆𑀚𑀺𑀦𑀻 𑀘 𑀳𑁄𑀢𑀺, 𑀢𑀲𑁆𑀫𑀸 𑀅𑀮𑀁 𑀢𑀸𑀯 𑀢𑀼𑀬𑁆𑀳𑀁 𑀉𑀧𑀲𑀫𑁆𑀧𑀸𑀤𑀺𑀢𑁂𑀦𑀸’’𑀢𑀺 𑀏𑀯𑀁 𑀦𑀺𑀯𑀸𑀭𑀻𑀬𑀫𑀸𑀦𑀸. 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀦𑁆𑀢𑀺 𑀧𑀘𑁆𑀙𑀸 𑀅𑀜𑁆𑀜𑀸𑀲𑀁 𑀩𑁆𑀬𑀢𑁆𑀢𑀸𑀦𑀁 𑀮𑀚𑁆𑀚𑀺𑀦𑀻𑀦𑀁 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀤𑀺𑀬𑁆𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀳𑀫𑁂𑀯 𑀦𑀽𑀦 𑀩𑀸𑀮𑀸’’𑀢𑀺𑀆𑀤𑀻𑀦𑀺 𑀪𑀡𑀫𑀸𑀦𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀔𑀻𑀬𑁂𑀬𑁆𑀬. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀁 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀘𑀡𑁆𑀟𑀓𑀸𑀴𑀺𑀁 𑀆𑀭𑀩𑁆𑀪 𑀏𑀯𑀁 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀧𑀓𑀢𑀺𑀬𑀸 𑀙𑀦𑁆𑀤𑀸𑀤𑀻𑀦𑀁 𑀯𑀲𑁂𑀦 𑀓𑀭𑁄𑀦𑁆𑀢𑀻𑀦𑀁 𑀔𑀻𑀬𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀬𑀸 𑀬𑀸𑀘𑀦𑀁, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦 𑀙𑀦𑁆𑀤𑀸𑀤𑀺𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀬 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀯𑁄, 𑀧𑀘𑁆𑀙𑀸𑀔𑀻𑀬𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀤𑀼𑀓𑁆𑀔𑀯𑁂𑀤𑀦𑀦𑁆𑀢𑀺.

𑀔𑀻𑀬𑀦𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀲𑀺𑀓𑁆𑀔𑀫𑀸𑀦𑀦𑀯𑀼𑀝𑁆𑀞𑀸𑀧𑀦𑀧𑀞𑀫𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀲𑀸 𑀧𑀘𑁆𑀙𑀸𑀢𑀺 𑀲𑀺𑀓𑁆𑀔𑀫𑀸𑀦𑀸𑀬 𑀉𑀧𑀲𑀫𑁆𑀧𑀤𑀸𑀬 𑀬𑀸𑀘𑀺𑀬𑀫𑀸𑀦𑀸𑀬 𑀲𑀸 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀢𑁆𑀯𑀸 𑀮𑀤𑁆𑀥𑁂 𑀘𑀻𑀯𑀭𑁂 𑀧𑀘𑁆𑀙𑀸 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 ‘‘𑀦𑁂𑀯 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀺, 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀢𑀲𑁆𑀲𑀸 𑀲𑀳 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺. 𑀅𑀝𑁆𑀞𑀫𑁂𑀧𑀺 𑀏𑀲𑁂𑀯 𑀦𑀬𑁄.

𑀉𑀪𑀬𑀫𑁆𑀧𑀺 𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀏𑀢𑁂𑀲𑀼 𑀯𑀢𑁆𑀣𑀽𑀲𑀼 𑀧𑀜𑁆𑀜𑀢𑁆𑀢𑀁, 𑀤𑁆𑀯𑀻𑀲𑀼𑀧𑀺 𑀲𑀢𑀺 𑀅𑀦𑁆𑀢𑀭𑀸𑀬𑁂, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑀺𑀬𑀸, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀉𑀪𑀬𑀢𑁆𑀣 ‘‘𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸, 𑀆𑀓𑀗𑁆𑀔𑀺𑀢𑀦𑀺𑀧𑁆𑀨𑀢𑁆𑀢𑀺, 𑀧𑀘𑁆𑀙𑀸 𑀥𑀼𑀭𑀦𑀺𑀓𑁆𑀔𑁂𑀧𑁄, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀫𑀦𑀼𑀪𑀸𑀲𑀦𑀲𑀤𑀺𑀲𑀸𑀦𑀻𑀢𑀺.

𑀲𑀺𑀓𑁆𑀔𑀫𑀸𑀦𑀦𑀯𑀼𑀝𑁆𑀞𑀸𑀧𑀦𑀧𑀞𑀫𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑁄𑀓𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀲𑁄𑀓𑀸𑀯𑀸𑀲𑀦𑁆𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀆𑀕𑀘𑁆𑀙𑀫𑀸𑀦𑀸 𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑁄𑀲𑁄𑀓𑀁 𑀧𑀯𑁂𑀲𑁂𑀢𑀻𑀢𑀺 𑀲𑁄𑀓𑀸𑀯𑀸𑀲𑀸, 𑀢𑀁 𑀲𑁄𑀓𑀸𑀯𑀸𑀲𑀁. 𑀅𑀣 𑀯𑀸 𑀖𑀭𑀁 𑀯𑀺𑀬 𑀖𑀭𑀲𑀸𑀫𑀺𑀓𑀸 𑀅𑀬𑀫𑁆𑀧𑀺 𑀧𑀼𑀭𑀺𑀲𑀲𑀫𑀸𑀕𑀫𑀁 𑀅𑀮𑀪𑀫𑀸𑀦𑀸 𑀲𑁄𑀓𑀁 𑀆𑀯𑀺𑀲𑀢𑀺, 𑀇𑀢𑀺 𑀬𑀁 𑀆𑀯𑀺𑀲𑀢𑀺, 𑀲𑁆𑀯𑀸𑀲𑁆𑀲𑀸 𑀆𑀯𑀸𑀲𑁄 𑀳𑁄𑀢𑀻𑀢𑀺 𑀲𑁄𑀓𑀸𑀯𑀸𑀲𑀸. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 (𑀧𑀸𑀘𑀺. 𑁧𑁧𑁬𑁦) ‘‘𑀲𑁄𑀓𑀸𑀯𑀸𑀲𑀸 𑀦𑀸𑀫 𑀧𑀭𑁂𑀲𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄𑀓𑀁 𑀆𑀯𑀺𑀲𑀢𑀻’’𑀢𑀺 𑀤𑁆𑀯𑀺𑀥𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀭𑀽𑀧𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀏𑀯𑀭𑀽𑀧𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. 𑀅𑀚𑀸𑀦𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑁄𑀓𑀸𑀯𑀸𑀲𑀢𑀸, 𑀚𑀸𑀦𑀦𑀁, 𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀕𑀩𑁆𑀪𑀺𑀦𑀺𑀯𑀼𑀝𑁆𑀞𑀸𑀧𑀦𑀲𑀤𑀺𑀲𑀸𑀦𑁂𑀯𑀸𑀢𑀺.

𑀲𑁄𑀓𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀦𑀼𑀜𑁆𑀜𑀸𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀫𑀸𑀢𑀸𑀧𑀺𑀢𑀽𑀳𑀻𑀢𑀺 𑀯𑀺𑀚𑀸𑀢𑀫𑀸𑀢𑀭𑀸 𑀘 𑀚𑀦𑀓𑀧𑀺𑀢𑀭𑀸 𑀘. 𑀲𑀸𑀫𑀺𑀓𑁂𑀦𑀸𑀢𑀺 𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀸, 𑀢𑁂𑀦. 𑀅𑀦𑀦𑀼𑀜𑁆𑀜𑀸𑀢𑀦𑁆𑀢𑀺 𑀉𑀧𑀲𑀫𑁆𑀧𑀤𑀢𑁆𑀣𑀸𑀬 𑀅𑀦𑀦𑀼𑀜𑁆𑀜𑀸𑀢𑀁. 𑀤𑁆𑀯𑀺𑀓𑁆𑀔𑀢𑁆𑀢𑀼𑀜𑁆𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀆𑀧𑀼𑀘𑁆𑀙𑀺𑀢𑀩𑁆𑀩𑀁, 𑀧𑀩𑁆𑀩𑀚𑁆𑀚𑀸𑀓𑀸𑀮𑁂 𑀘 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀘, 𑀪𑀺𑀓𑁆𑀔𑀽𑀦𑀁 𑀧𑀦 𑀲𑀓𑀺𑀁 𑀆𑀧𑀼𑀘𑁆𑀙𑀺𑀢𑁂𑀧𑀺 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀬𑀸 𑀉𑀧𑀲𑀫𑁆𑀧𑀤𑀸𑀓𑀸𑀮𑁂 𑀅𑀦𑀸𑀧𑀼𑀘𑁆𑀙𑀸 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀢𑀲𑁆𑀲𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀅𑀦𑀦𑀼𑀜𑁆𑀜𑀸𑀢𑀯𑀼𑀝𑁆𑀞𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. 𑀅𑀧𑀮𑁄𑀓𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸, 𑀢𑁂𑀲𑀁 𑀅𑀢𑁆𑀣𑀺𑀪𑀸𑀯𑀁 𑀅𑀚𑀸𑀦𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀦𑀧𑀮𑁄𑀓𑀦𑀁, 𑀅𑀢𑁆𑀣𑀺𑀪𑀸𑀯𑀚𑀸𑀦𑀦𑀁, 𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀅𑀦𑀦𑀼𑀜𑁆𑀜𑀸𑀢𑀲𑀫𑀼𑀝𑁆𑀞𑀸𑀦𑀁, 𑀓𑀺𑀭𑀺𑀬𑀸𑀓𑀺𑀭𑀺𑀬𑀁, 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁, 𑀅𑀘𑀺𑀢𑁆𑀢𑀓𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀅𑀦𑀦𑀼𑀜𑁆𑀜𑀸𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀸𑀭𑀺𑀯𑀸𑀲𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀏𑀓𑀸𑀤𑀲𑀫𑁂 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀬𑁂𑀦 𑀙𑀦𑁆𑀤𑀤𑀸𑀦𑁂𑀦. 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀁 𑀧𑀸𑀭𑀺𑀯𑀸𑀲𑀺𑀬𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀁 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀦𑁆𑀢𑀺.

𑀢𑀢𑁆𑀣 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫 𑀪𑀺𑀓𑁆𑀔𑀽 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀅𑀣 𑀫𑁂𑀖𑁄 𑀯𑀸 𑀉𑀝𑁆𑀞𑀳𑀢𑀺, 𑀉𑀲𑁆𑀲𑀸𑀭𑀡𑀸 𑀯𑀸 𑀓𑀭𑀻𑀬𑀢𑀺, 𑀫𑀦𑀼𑀲𑁆𑀲𑀸 𑀯𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀽 ‘‘𑀅𑀦𑁄𑀓𑀸𑀲𑀸 𑀫𑀬𑀁, 𑀅𑀜𑁆𑀜𑀢𑁆𑀭 𑀕𑀘𑁆𑀙𑀸𑀫𑀸’’𑀢𑀺 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀉𑀝𑁆𑀞𑀳𑀦𑁆𑀢𑀺, 𑀇𑀤𑀁 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫, 𑀓𑀺𑀜𑁆𑀘𑀸𑀧𑀺 𑀧𑀭𑀺𑀲𑀧𑀸𑀭𑀺𑀯𑀸𑀲𑀺𑀬𑀁, 𑀙𑀦𑁆𑀤𑀲𑁆𑀲 𑀧𑀦 𑀅𑀯𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀧𑀼𑀦 𑀪𑀺𑀓𑁆𑀔𑀽 ‘‘𑀉𑀧𑁄𑀲𑀣𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀭𑀢𑁆𑀢𑀺𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀬𑀸𑀯 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑀸𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀏𑀓𑀁 𑀅𑀚𑁆𑀛𑁂𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁂𑀬𑁂𑀯 𑀅𑀭𑀼𑀡𑁄 𑀉𑀕𑁆𑀕𑀘𑁆𑀙𑀢𑀺. 𑀲𑀘𑁂 ‘‘𑀘𑀸𑀢𑀼𑀤𑁆𑀤𑀲𑀺𑀓𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀺𑀦𑁆𑀦𑀸, ‘‘𑀧𑀦𑁆𑀦𑀭𑀲𑁄’’𑀢𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦𑁆𑀦𑀭𑀲𑀺𑀓𑀁 𑀓𑀸𑀢𑀼𑀁 𑀦𑀺𑀲𑀺𑀦𑁆𑀦𑀸, 𑀧𑀸𑀝𑀺𑀧𑀤𑁂 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀜𑀁 𑀧𑀦 𑀲𑀗𑁆𑀖𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀭𑀢𑁆𑀢𑀺𑀧𑀸𑀭𑀺𑀯𑀸𑀲𑀺𑀬𑀁 𑀦𑀸𑀫.

𑀧𑀼𑀦 𑀪𑀺𑀓𑁆𑀔𑀽 ‘‘𑀓𑀺𑀜𑁆𑀘𑀺𑀤𑁂𑀯 𑀅𑀩𑁆𑀪𑀸𑀦𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀢𑁆𑀭𑁂𑀓𑁄 𑀦𑀓𑁆𑀔𑀢𑁆𑀢𑀧𑀸𑀞𑀓𑁄 𑀪𑀺𑀓𑁆𑀔𑀼 𑀏𑀯𑀁 𑀯𑀤𑀢𑀺 ‘‘𑀅𑀚𑁆𑀚 𑀦𑀓𑁆𑀔𑀢𑁆𑀢𑀁 𑀤𑀸𑀭𑀼𑀡𑀁, 𑀫𑀸 𑀇𑀤𑀁 𑀓𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀢𑁂 𑀢𑀲𑁆𑀲 𑀯𑀘𑀦𑁂𑀦 𑀙𑀦𑁆𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀅𑀣𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 ‘‘𑀦𑀓𑁆𑀔𑀢𑁆𑀢𑀁 𑀧𑀢𑀺𑀫𑀸𑀦𑁂𑀦𑁆𑀢𑀁, 𑀅𑀢𑁆𑀣𑁄 𑀩𑀸𑀮𑀁 𑀉𑀧𑀚𑁆𑀛𑀕𑀸 (𑀚𑀸. 𑁧.𑁧.𑁪𑁯), 𑀓𑀺𑀁 𑀦𑀓𑁆𑀔𑀢𑁆𑀢𑁂𑀦 𑀓𑀭𑁄𑀣𑀸’’𑀢𑀺 𑀯𑀤𑀢𑀺, 𑀇𑀤𑀁 𑀙𑀦𑁆𑀤𑀧𑀸𑀭𑀺𑀯𑀸𑀲𑀺𑀬𑀜𑁆𑀘𑁂𑀯 𑀅𑀚𑁆𑀛𑀸𑀲𑀬𑀧𑀸𑀭𑀺𑀯𑀸𑀲𑀺𑀬𑀜𑁆𑀘. 𑀏𑀢𑀲𑁆𑀫𑀺𑀁 𑀧𑀸𑀭𑀺𑀯𑀸𑀲𑀺𑀬𑁂 𑀧𑀼𑀦 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀁 𑀅𑀦𑀸𑀳𑀭𑀺𑀢𑁆𑀯𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦𑀸’’𑀢𑀺. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀭𑀸𑀚𑀕𑀳𑁂 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀏𑀯𑀁 𑀯𑀼𑀝𑁆𑀞𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. 𑀙𑀦𑁆𑀤𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑀢𑀸, 𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀕𑀫𑁆𑀪𑀺𑀦𑀺𑀲𑀺𑀓𑁆𑀔𑀸𑀧𑀤𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀸𑀭𑀺𑀯𑀸𑀲𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀅𑀦𑀼𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑁆𑀯𑀸𑀤𑀲𑀫𑁂 𑀅𑀦𑀼𑀯𑀲𑁆𑀲𑀦𑁆𑀢𑀺 𑀅𑀦𑀼𑀲𑀁𑀯𑀘𑁆𑀙𑀭𑀁. 𑀏𑀯𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. 𑀏𑀓𑀦𑁆𑀢𑀭𑀺𑀓𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀦𑀼𑀯𑀲𑁆𑀲𑀢𑀸, 𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀓𑀸𑀤𑀲𑀫𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺.

𑀅𑀦𑀼𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀏𑀓𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑁂𑀭𑀲𑀫𑁂 𑀏𑀓𑀦𑁆𑀢𑀭𑀺𑀓𑀁 𑀏𑀓𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀁 𑀤𑁆𑀯𑀸𑀤𑀲𑀫𑁂𑀦 𑀲𑀤𑀺𑀲𑀫𑁂𑀯𑀸𑀢𑀺.

𑀏𑀓𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀫𑀸𑀭𑀺𑀪𑀽𑀢𑀯𑀕𑁆𑀕𑁄 𑀅𑀝𑁆𑀞𑀫𑁄.