𑁧. 𑀕𑀩𑁆𑀪𑀺𑀦𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀕𑀩𑁆𑀪𑀺𑀦𑀺𑀯𑀕𑁆𑀕𑀲𑁆𑀲 𑀧𑀞𑀫𑁂 ‘‘𑀕𑀩𑁆𑀪𑀺𑀦𑀻’’𑀢𑀺 𑀚𑀸𑀦𑀺𑀢𑁆𑀯𑀸 𑀉𑀧𑀚𑁆𑀛𑀸𑀬𑀸𑀬 𑀯𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑀸 𑀕𑀡𑀧𑀭𑀺𑀬𑁂𑀲𑀦𑀸𑀤𑀻𑀲𑀼 𑀘 𑀜𑀢𑁆𑀢𑀺𑀓𑀫𑁆𑀫𑀯𑀸𑀘𑀸𑀤𑁆𑀯𑀬𑁂 𑀘 𑀤𑀼𑀓𑁆𑀓𑀝𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀕𑀩𑁆𑀪𑀺𑀦𑀺𑀬𑀸 𑀯𑁂𑀫𑀢𑀺𑀓𑀸𑀬 𑀅𑀕𑀩𑁆𑀪𑀺𑀦𑀺𑀬𑀸 𑀕𑀩𑁆𑀪𑀺𑀦𑀺𑀲𑀜𑁆𑀜𑀸𑀬 𑀘𑁂𑀯 𑀯𑁂𑀫𑀢𑀺𑀓𑀸𑀬 𑀘 𑀤𑀼𑀓𑁆𑀓𑀝𑀁. 𑀉𑀪𑁄𑀲𑀼 𑀅𑀕𑀩𑁆𑀪𑀺𑀦𑀺𑀲𑀜𑁆𑀜𑀸𑀬, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀕𑀩𑁆𑀪𑀺𑀦𑀺𑀢𑀸, ‘𑀕𑀩𑁆𑀪𑀺𑀦𑀻’𑀢𑀺 𑀚𑀸𑀦𑀦𑀁, 𑀯𑀼𑀝𑁆𑀞𑀸𑀧𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀺𑀘𑀺𑀢𑁆𑀢𑀁, 𑀢𑀺𑀯𑁂𑀤𑀦𑀦𑁆𑀢𑀺.

𑀕𑀩𑁆𑀪𑀺𑀦𑀻𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.