𑁫. 𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑁄

𑁧. 𑀭𑀸𑀚𑀸𑀕𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑀲𑁆𑀲 𑀧𑀞𑀫𑁂 𑀭𑀸𑀚𑀸𑀕𑀸𑀭𑀦𑁆𑀢𑀺 𑀭𑀜𑁆𑀜𑁄 𑀓𑀻𑀴𑀦𑀖𑀭𑀁. 𑀘𑀺𑀢𑁆𑀢𑀸𑀕𑀸𑀭𑀦𑁆𑀢𑀺 𑀓𑀻𑀴𑀦𑀘𑀺𑀢𑁆𑀢𑀲𑀸𑀮𑀁. 𑀆𑀭𑀸𑀫𑀦𑁆𑀢𑀺 𑀓𑀻𑀴𑀦𑀉𑀧𑀯𑀦𑀁. 𑀉𑀬𑁆𑀬𑀸𑀦𑀦𑁆𑀢𑀺 𑀓𑀻𑀴𑀦𑀼𑀬𑁆𑀬𑀸𑀦𑀁. 𑀧𑁄𑀓𑁆𑀔𑀭𑀡𑀺𑀦𑁆𑀢𑀺 𑀓𑀻𑀴𑀦𑀧𑁄𑀓𑁆𑀔𑀭𑀡𑀺𑀁. 𑀤𑀲𑁆𑀲𑀦𑀸𑀬𑀸𑀢𑀺 ‘‘𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀺𑀬𑀸 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁, 𑀬𑀢𑁆𑀣 𑀞𑀢𑁆𑀯𑀸 𑀧𑀲𑁆𑀲𑀢𑀺, 𑀢𑀢𑁆𑀣 𑀧𑀤𑀁 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀧𑀜𑁆𑀘𑀸𑀧𑀺 𑀧𑀲𑁆𑀲𑀦𑁆𑀢𑀺𑀬𑀸 𑀏𑀓𑀸𑀯 𑀆𑀧𑀢𑁆𑀢𑀺. 𑀲𑀘𑁂 𑀧𑀦 𑀢𑀁 𑀢𑀁 𑀯𑀺𑀮𑁄𑀓𑁂𑀢𑁆𑀯𑀸 𑀧𑀲𑁆𑀲𑀢𑀺, 𑀕𑀻𑀯𑀁 𑀧𑀭𑀺𑀯𑀢𑁆𑀢𑀦𑀧𑁆𑀧𑀬𑁄𑀕𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄, 𑀦 𑀉𑀫𑁆𑀫𑀻𑀮𑀦𑀕𑀡𑀦𑀸𑀬.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀘𑀺𑀢𑁆𑀢𑀸𑀕𑀸𑀭𑀁 𑀤𑀲𑁆𑀲𑀦𑀸𑀬 𑀕𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀪𑀺𑀓𑁆𑀔𑀼𑀲𑁆𑀲 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁, 𑀅𑀯𑀲𑁂𑀲𑁄 𑀯𑀺𑀦𑀺𑀘𑁆𑀙𑀬𑁄 𑀦𑀘𑁆𑀘𑀤𑀲𑁆𑀲𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀭𑀸𑀚𑀸𑀕𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀲𑀦𑁆𑀤𑀺𑀧𑀭𑀺𑀪𑀼𑀜𑁆𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀼𑀢𑀺𑀬𑁂 𑀆𑀲𑀦𑁆𑀤𑀻 𑀦𑀸𑀫 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀸 𑀯𑀼𑀘𑁆𑀘𑀢𑀺. 𑀧𑀮𑁆𑀮𑀗𑁆𑀓𑁄 𑀦𑀸𑀫 𑀲𑀁𑀳𑀸𑀭𑀺𑀫𑁂𑀦 𑀯𑀸𑀴𑁂𑀦 𑀓𑀢𑁄𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀦𑀺𑀲𑀻𑀤𑀦𑀦𑀺𑀧𑀚𑁆𑀚𑀦𑀧𑁆𑀧𑀬𑁄𑀕𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀆𑀲𑀦𑁆𑀤𑀺𑀧𑀮𑁆𑀮𑀗𑁆𑀓𑀧𑀭𑀺𑀪𑁄𑀕𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀆𑀲𑀦𑁆𑀤𑀺𑀬𑀸 𑀧𑀸𑀤𑁂 𑀙𑀺𑀦𑁆𑀤𑀺𑀢𑁆𑀯𑀸, 𑀧𑀮𑁆𑀮𑀗𑁆𑀓𑀲𑁆𑀲 𑀯𑀸𑀴𑁂 𑀪𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀆𑀲𑀦𑁆𑀤𑀺𑀧𑀮𑁆𑀮𑀗𑁆𑀓𑀢𑀸, 𑀦𑀺𑀲𑀻𑀤𑀦𑀁 𑀦𑀺𑀧𑀚𑁆𑀚𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺.

𑀆𑀲𑀦𑁆𑀤𑀺𑀧𑀭𑀺𑀪𑀼𑀜𑁆𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀢𑁆𑀢𑀓𑀦𑁆𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀢𑀢𑀺𑀬𑁂 𑀲𑀼𑀢𑁆𑀢𑀦𑁆𑀢𑀺 𑀙𑀦𑁆𑀦𑀁 𑀅𑀜𑁆𑀜𑀢𑀭𑀁. 𑀓𑀦𑁆𑀢𑁂𑀬𑁆𑀬𑀸𑀢𑀺 𑀏𑀢𑁆𑀣 𑀬𑀢𑁆𑀢𑀓𑀁 𑀳𑀢𑁆𑀣𑁂𑀦 𑀅𑀜𑁆𑀙𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀓𑁆𑀓𑀫𑁆𑀳𑀺 𑀯𑁂𑀞𑀺𑀢𑁂 𑀏𑀓𑀸 𑀆𑀧𑀢𑁆𑀢𑀺. 𑀇𑀤𑀜𑁆𑀳𑀺 𑀲𑀦𑁆𑀥𑀸𑀬 𑀧𑀤𑀪𑀸𑀚𑀦𑀻𑀬𑁂 (𑀧𑀸𑀘𑀺. 𑁯𑁮𑁮) ‘‘𑀉𑀚𑁆𑀚𑀯𑀼𑀚𑁆𑀚𑀯𑁂’’𑀢𑀺 𑀯𑀼𑀢𑁆𑀢𑀁.

𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀲𑀼𑀢𑁆𑀢𑀁 𑀓𑀦𑁆𑀢𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀓𑀦𑁆𑀢𑀦𑀢𑁄 𑀧𑀼𑀩𑁆𑀩𑁂 𑀓𑀧𑁆𑀧𑀸𑀲𑀯𑀺𑀘𑀺𑀦𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀳𑀢𑁆𑀣𑀯𑀸𑀭𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀓𑀦𑁆𑀢𑀺𑀢𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀓𑀦𑁆𑀢𑀺𑀢𑀢𑀸, 𑀓𑀦𑁆𑀢𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺.

𑀲𑀼𑀢𑁆𑀢𑀓𑀦𑁆𑀢𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀘𑀢𑀼𑀢𑁆𑀣𑁂 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀕𑀺𑀳𑀻𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁. 𑀲𑀘𑁂𑀧𑀺 𑀳𑀺 𑀫𑀸𑀢𑀸𑀧𑀺𑀢𑀭𑁄 𑀅𑀢𑁆𑀢𑀦𑁄 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀓𑀸𑀭𑀸𑀧𑁂𑀢𑁆𑀯𑀸 𑀢𑁂𑀲𑀁 𑀬𑀸𑀕𑀼𑀧𑀘𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀧𑀼𑀩𑁆𑀩𑀧𑁆𑀧𑀬𑁄𑀕𑁂𑀲𑀼 𑀧𑀬𑁄𑀕𑀕𑀡𑀦𑀸𑀬 𑀤𑀼𑀓𑁆𑀓𑀝𑀸𑀦𑀺 𑀆𑀧𑀚𑁆𑀚𑀺𑀢𑁆𑀯𑀸 𑀬𑀸𑀕𑀼𑀆𑀤𑀻𑀲𑀼 𑀪𑀸𑀚𑀦𑀕𑀡𑀦𑀸𑀬, 𑀔𑀸𑀤𑀦𑀻𑀬𑀸𑀤𑀻𑀲𑀼 𑀧𑀽𑀯𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀺.

𑀲𑀸𑀯𑀢𑁆𑀣𑀺𑀬𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀭𑀩𑁆𑀪 𑀕𑀺𑀳𑀻𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀫𑀦𑀼𑀲𑁆𑀲𑁂𑀳𑀺 𑀲𑀗𑁆𑀖𑀲𑁆𑀲 𑀬𑀸𑀕𑀼𑀧𑀸𑀦𑁂 𑀯𑀸 𑀪𑀢𑁆𑀢𑁂 𑀯𑀸 𑀘𑁂𑀢𑀺𑀬𑀧𑀽𑀚𑀸𑀬 𑀯𑀸 𑀓𑀭𑀻𑀬𑀫𑀸𑀦𑀸𑀬 𑀢𑁂𑀲𑀁 𑀲𑀳𑀸𑀬𑀪𑀸𑀯𑁂𑀦 𑀬𑀸𑀕𑀼𑀧𑀘𑀦𑀸𑀤𑀻𑀦𑀺, 𑀅𑀢𑁆𑀢𑀦𑁄 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀘 𑀢𑀸𑀦𑀺𑀬𑁂𑀯 𑀓𑀭𑁄𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑀁, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑁂𑀯𑀸𑀢𑀺.

𑀕𑀺𑀳𑀺𑀯𑁂𑀬𑁆𑀬𑀸𑀯𑀘𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀥𑀺𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀅𑀥𑀺𑀓𑀭𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑀁. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀇𑀥 𑀘𑀻𑀯𑀭𑀲𑀺𑀩𑁆𑀩𑀦𑁂 𑀯𑀺𑀬 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀏𑀓𑀸𑀳𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀺.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀅𑀥𑀺𑀓𑀭𑀡𑀁 𑀦𑀯𑀽𑀧𑀲𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑁂𑀲𑀫𑁂𑀢𑁆𑀣 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀅𑀥𑀺𑀓𑀭𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀪𑁄𑀚𑀦𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀙𑀝𑁆𑀞𑁂 𑀲𑀳𑀢𑁆𑀣𑀸𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀳𑀥𑀫𑁆𑀫𑀺𑀓𑁂 𑀅𑀯𑀲𑁂𑀲𑀸𑀦𑀁 𑀅𑀜𑁆𑀜𑀢𑁆𑀭 𑀉𑀤𑀓𑀤𑀦𑁆𑀢𑀧𑁄𑀦𑀸 𑀬𑀁𑀓𑀺𑀜𑁆𑀘𑀺 𑀅𑀚𑁆𑀛𑁄𑀳𑀭𑀡𑀻𑀬𑀁 𑀤𑀤𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀅𑀕𑀸𑀭𑀺𑀓𑀲𑁆𑀲 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀤𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀉𑀤𑀓𑀤𑀦𑁆𑀢𑀧𑁄𑀦𑁂 𑀤𑀼𑀓𑁆𑀓𑀝𑀁. 𑀬𑀸 𑀧𑀦 𑀤𑀸𑀧𑁂𑀢𑀺 𑀦 𑀤𑁂𑀢𑀺, 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀢𑀺, 𑀩𑀸𑀳𑀺𑀭𑀮𑁂𑀧𑀁 𑀤𑁂𑀢𑀺, 𑀢𑀲𑁆𑀲𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀅𑀜𑁆𑀜𑀢𑁆𑀭 𑀉𑀤𑀓𑀤𑀦𑁆𑀢𑀧𑁄𑀦𑀸 𑀅𑀚𑁆𑀛𑁄𑀳𑀭𑀡𑀺𑀬𑀁, 𑀞𑀧𑁂𑀢𑁆𑀯𑀸 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀅𑀜𑁆𑀜𑀲𑁆𑀲 𑀲𑀳𑀢𑁆𑀣𑀸 𑀤𑀸𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀏𑀴𑀓𑀮𑁄𑀫𑀲𑀤𑀺𑀲𑀸𑀦𑀻𑀢𑀺.

𑀪𑁄𑀚𑀦𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀆𑀯𑀲𑀣𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀲𑀢𑁆𑀢𑀫𑁂 𑀆𑀯𑀲𑀣𑀘𑀻𑀯𑀭𑀦𑁆𑀢𑀺 ‘‘𑀉𑀢𑀼𑀦𑀺𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀤𑀺𑀦𑁆𑀦𑀘𑀻𑀯𑀭𑀁. 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀥𑁄𑀯𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀅𑀦𑁆𑀢𑀫𑀲𑁄 𑀲𑀸𑀫𑀡𑁂𑀭𑀺𑀬𑀸𑀧𑀺 𑀉𑀢𑀼𑀦𑀺𑀬𑀸 𑀅𑀤𑀢𑁆𑀯𑀸. 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀯𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀆𑀯𑀲𑀣𑀘𑀻𑀯𑀭𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀦𑀺𑀲𑁆𑀲𑀚𑁆𑀚𑀺𑀢𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀧𑀦 𑀦𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀸𑀬, 𑀧𑀼𑀦 𑀧𑀭𑀺𑀬𑀸𑀬𑁂𑀦 𑀯𑀸, 𑀅𑀜𑁆𑀜𑀸𑀲𑀁 𑀉𑀢𑀼𑀦𑀻𑀦𑀁 𑀅𑀪𑀸𑀯𑁂𑀦 𑀯𑀸, 𑀅𑀘𑁆𑀙𑀺𑀦𑁆𑀦𑀦𑀝𑁆𑀞𑀘𑀻𑀯𑀭𑀺𑀓𑀸𑀬 𑀯𑀸, 𑀆𑀧𑀤𑀸𑀲𑀼 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀆𑀯𑀲𑀣𑀘𑀻𑀯𑀭𑀢𑀸, 𑀘𑀢𑀼𑀢𑁆𑀣𑀤𑀺𑀯𑀲𑀢𑀸, 𑀥𑁄𑀯𑀺𑀢𑁆𑀯𑀸 𑀅𑀦𑀺𑀲𑁆𑀲𑀚𑁆𑀚𑀦𑀁, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀣𑀺𑀦𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺.

𑀆𑀯𑀲𑀣𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀆𑀯𑀲𑀣𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀆𑀯𑀲𑀣𑀦𑁆𑀢𑀺 𑀓𑀯𑀸𑀝𑀩𑀤𑁆𑀥𑀯𑀺𑀳𑀸𑀭𑀁. 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀭𑀓𑁆𑀔𑀡𑀢𑁆𑀣𑀸𑀬 𑀅𑀤𑀢𑁆𑀯𑀸, ‘‘𑀇𑀤𑀁 𑀚𑀕𑁆𑀕𑁂𑀬𑁆𑀬𑀸𑀲𑀻’’𑀢𑀺 𑀏𑀯𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 𑀲𑀓𑀕𑀸𑀫𑀢𑁄 𑀅𑀜𑁆𑀜𑀁 𑀕𑀸𑀫𑀁 𑀏𑀓𑀭𑀢𑁆𑀢𑀺𑀯𑀸𑀲𑀢𑁆𑀣𑀸𑀬𑀧𑀺 𑀧𑀓𑁆𑀓𑀫𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀯𑀲𑀣𑀲𑁆𑀲 𑀧𑀭𑀺𑀓𑁆𑀔𑁂𑀧𑀁, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑀁 𑀧𑀞𑀫𑀧𑀸𑀤𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀤𑀼𑀓𑁆𑀓𑀝𑀁, 𑀤𑀼𑀢𑀺𑀬𑁂𑀦 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀸𑀯𑀢𑁆𑀣𑀺𑀬𑀁 𑀣𑀼𑀮𑁆𑀮𑀦𑀦𑁆𑀤𑀁 𑀆𑀭𑀩𑁆𑀪 𑀆𑀯𑀲𑀣𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀅𑀓𑀯𑀸𑀝𑀩𑀤𑁆𑀥𑁂 𑀤𑀼𑀓𑁆𑀓𑀝𑀁, 𑀦𑀺𑀲𑁆𑀲𑀚𑁆𑀚𑀺𑀢𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀧𑀦 𑀦𑀺𑀲𑁆𑀲𑀚𑁆𑀚𑀺𑀢𑀲𑀜𑁆𑀜𑀸𑀬, 𑀲𑀢𑀺 𑀅𑀦𑁆𑀢𑀭𑀸𑀬𑁂, 𑀧𑀝𑀺𑀚𑀕𑁆𑀕𑀺𑀓𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑀺𑀬𑀸, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀲𑀓𑀯𑀸𑀝𑀩𑀤𑁆𑀥𑀢𑀸, 𑀯𑀼𑀢𑁆𑀢𑀦𑀬𑁂𑀦 𑀧𑀓𑁆𑀓𑀫𑀦𑀁, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀣𑀺𑀦𑀲𑀤𑀺𑀲𑀸𑀦𑀻𑀢𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺.

𑀆𑀯𑀲𑀣𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀦𑀯𑀫𑁂 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀩𑀸𑀳𑀺𑀭𑀓𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀳𑀢𑁆𑀣𑀺𑀅𑀲𑁆𑀲𑀭𑀣𑀥𑀦𑀼𑀣𑀭𑀼𑀲𑀺𑀧𑁆𑀧𑀆𑀣𑀩𑁆𑀩𑀡𑀔𑀺𑀮𑀦𑀯𑀲𑀻𑀓𑀭𑀡𑀲𑁄𑀲𑀸𑀧𑀦𑀫𑀦𑁆𑀢𑀸𑀕𑀤𑀧𑁆𑀧𑀬𑁄𑀕𑀸𑀤𑀺𑀪𑁂𑀤𑀁 𑀧𑀭𑀽𑀧𑀖𑀸𑀢𑀓𑀭𑀁 𑀯𑀺𑀚𑁆𑀚𑀁. 𑀧𑀭𑀺𑀬𑀸𑀧𑀼𑀡𑁂𑀬𑁆𑀬𑀸𑀢𑀺 𑀏𑀢𑁆𑀣 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀦𑁆𑀢𑀺𑀓𑁂 𑀢𑀁 𑀧𑀤𑀸𑀤𑀺𑀯𑀲𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀺𑀬𑀸 𑀧𑀤𑀕𑀡𑀦𑀸𑀬 𑀘𑁂𑀯 𑀅𑀓𑁆𑀔𑀭𑀕𑀡𑀦𑀸𑀬 𑀘 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺.

𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀧𑀭𑀺𑀬𑀸𑀧𑀼𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀯𑀸𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀤𑀲𑀫𑁂 𑀯𑀸𑀘𑁂𑀬𑁆𑀬𑀸𑀢𑀺 𑀧𑀤𑀁 𑀯𑀺𑀲𑁂𑀲𑁄. 𑀉𑀪𑀬𑀫𑁆𑀧𑀺 𑀲𑀸𑀯𑀢𑁆𑀣𑀺𑀬𑀁 𑀙𑀩𑁆𑀩𑀕𑁆𑀕𑀺𑀬𑀸 𑀘𑁂𑀯 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀆𑀭𑀩𑁆𑀪 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀁 𑀧𑀭𑀺𑀬𑀸𑀧𑀼𑀡𑀦𑀯𑀸𑀘𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁. 𑀮𑁂𑀔𑁂, 𑀥𑀸𑀭𑀡𑀸𑀬 𑀘, 𑀕𑀼𑀢𑁆𑀢𑀢𑁆𑀣𑀸𑀬 𑀘 𑀬𑀓𑁆𑀔𑀧𑀭𑀺𑀢𑁆𑀢𑀦𑀸𑀕𑀫𑀡𑁆𑀟𑀮𑀸𑀤𑀺𑀓𑁂 𑀲𑀩𑁆𑀩𑀧𑀭𑀺𑀢𑁆𑀢𑁂, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀢𑀸, 𑀧𑀭𑀺𑀬𑀸𑀧𑀼𑀡𑀦𑀯𑀸𑀘𑀦𑀸, 𑀅𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀪𑀸𑀯𑁄𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑀻𑀲𑀼𑀧𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀤𑀲𑁄𑀥𑀫𑁆𑀫𑀲𑀤𑀺𑀲𑀸𑀦𑀻𑀢𑀺.

𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀯𑀸𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀕𑀸𑀭𑀯𑀕𑁆𑀕𑁄 𑀧𑀜𑁆𑀘𑀫𑁄.