𑁮. 𑀧𑀞𑀫𑀉𑀘𑁆𑀘𑀸𑀭𑀙𑀟𑁆𑀟𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀅𑀝𑁆𑀞𑀫𑁂 𑀲𑀗𑁆𑀓𑀸𑀭𑀦𑁆𑀢𑀺 𑀓𑀘𑀯𑀭𑀁. 𑀯𑀺𑀖𑀸𑀲𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀁 𑀉𑀘𑁆𑀙𑀺𑀝𑁆𑀞𑁄𑀤𑀓𑀫𑁆𑀧𑀺 𑀤𑀦𑁆𑀢𑀓𑀝𑁆𑀞𑀫𑁆𑀧𑀺, 𑀅𑀝𑁆𑀞𑀺𑀓𑀘𑀮𑀓𑁂𑀲𑀼 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀺𑀭𑁄𑀓𑀼𑀝𑁆𑀝𑁂 𑀯𑀸 𑀢𑀺𑀭𑁄𑀧𑀸𑀓𑀸𑀭𑁂 𑀯𑀸𑀢𑀺 𑀬𑀲𑁆𑀲𑀓𑀲𑁆𑀲𑀘𑀺 𑀓𑀼𑀝𑁆𑀝𑀲𑁆𑀲 𑀯𑀸 𑀧𑀸𑀓𑀸𑀭𑀲𑁆𑀲 𑀯𑀸 𑀧𑀭𑀢𑁄. 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸𑀢𑀺 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀏𑀓𑀢𑁄 𑀙𑀟𑁆𑀟𑁂𑀦𑁆𑀢𑀺𑀬𑀸 𑀏𑀓𑀧𑁆𑀧𑀬𑁄𑀕𑁂 𑀏𑀓𑀸𑀧𑀢𑁆𑀢𑀺, 𑀲𑀓𑀺𑀁 𑀆𑀡𑀢𑁆𑀢𑀺𑀬𑀸 𑀩𑀳𑀼𑀓𑁂𑀧𑀺 𑀙𑀟𑁆𑀟𑀺𑀢𑁂 𑀏𑀓𑀸𑀯.

𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀉𑀘𑁆𑀘𑀸𑀭𑀁 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀲𑀸𑀡𑀢𑁆𑀢𑀺𑀓𑀁, 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁, 𑀑𑀮𑁄𑀓𑁂𑀢𑁆𑀯𑀸 𑀯𑀸 𑀅𑀯𑀮𑀜𑁆𑀚𑁂 𑀯𑀸 𑀙𑀟𑁆𑀟𑁂𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺. 𑀉𑀘𑁆𑀘𑀸𑀭𑀸𑀤𑀺𑀪𑀸𑀯𑁄, 𑀅𑀦𑁄𑀮𑁄𑀓𑀦𑀁, 𑀯𑀮𑀜𑁆𑀚𑀦𑀝𑁆𑀞𑀸𑀦𑀁, 𑀢𑀺𑀭𑁄𑀓𑀼𑀝𑁆𑀝𑀢𑀺𑀭𑁄𑀧𑀸𑀓𑀸𑀭𑀢𑀸, 𑀙𑀟𑁆𑀟𑀦𑀁 𑀯𑀸 𑀙𑀟𑁆𑀟𑀸𑀧𑀦𑀁 𑀯𑀸𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺. 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀲𑀜𑁆𑀘𑀭𑀺𑀢𑁆𑀢𑀲𑀤𑀺𑀲𑀸𑀦𑀺, 𑀇𑀤𑀁 𑀧𑀦 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺.

𑀧𑀞𑀫𑀉𑀘𑁆𑀘𑀸𑀭𑀙𑀟𑁆𑀟𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.