𑁫. 𑀉𑀤𑀓𑀲𑀼𑀤𑁆𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑀧𑀜𑁆𑀘𑀫𑁂 𑀉𑀤𑀓𑀲𑀼𑀤𑁆𑀥𑀺𑀓𑀦𑁆𑀢𑀺 𑀫𑀼𑀢𑁆𑀢𑀓𑀭𑀡𑀲𑁆𑀲 𑀥𑁄𑀯𑀦𑀁. 𑀆𑀤𑀺𑀬𑀫𑀸𑀦𑀸𑀬𑀸𑀢𑀺 𑀓𑀭𑁄𑀦𑁆𑀢𑀺𑀬𑀸. 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀸𑀢𑀩𑁆𑀩𑀦𑁆𑀢𑀺 𑀤𑁆𑀯𑀻𑀲𑀼 𑀅𑀗𑁆𑀕𑀼𑀮𑀻𑀲𑀼 𑀏𑀓𑁂𑀓𑀁 𑀓𑀢𑁆𑀯𑀸 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀸𑀢𑀩𑁆𑀩𑀁. 𑀢𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸𑀢𑀺 𑀲𑀘𑁂 𑀥𑁄𑀯𑀦𑀓𑀸𑀮𑁂 𑀭𑀸𑀕𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀢𑀢𑀺𑀬𑀸𑀬 𑀅𑀗𑁆𑀕𑀼𑀮𑀺𑀬𑀸 𑀅𑀕𑁆𑀕𑀧𑀩𑁆𑀩𑀁, 𑀕𑀫𑁆𑀪𑀻𑀭𑀢𑁄 𑀏𑀓𑀺𑀲𑁆𑀲𑀸𑀯 𑀅𑀗𑁆𑀕𑀼𑀮𑀺𑀬𑀸 𑀢𑀢𑀺𑀬𑀧𑀩𑁆𑀩𑀁 𑀧𑀯𑁂𑀲𑁂𑀢𑀺 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀓𑁆𑀓𑁂𑀲𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀦𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑀁, 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀊𑀦𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀤𑁆𑀯𑀺𑀓𑀤𑀼𑀓𑁆𑀓𑀝𑀁. 𑀢𑀲𑁆𑀫𑀺𑀁 𑀧𑀦 𑀊𑀦𑀓𑀲𑀜𑁆𑀜𑀸𑀬, 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀺𑀬𑀦𑁆𑀢𑀺𑀬𑀸, 𑀆𑀩𑀸𑀥𑀧𑀘𑁆𑀘𑀬𑀸 𑀅𑀢𑀺𑀭𑁂𑀓𑀫𑁆𑀧𑀺, 𑀉𑀫𑁆𑀫𑀢𑁆𑀢𑀺𑀓𑀸𑀤𑀻𑀦𑀜𑁆𑀘 𑀅𑀦𑀸𑀧𑀢𑁆𑀢𑀺, 𑀲𑁂𑀲𑀁 𑀢𑀢𑀺𑀬𑀲𑀤𑀺𑀲𑀫𑁂𑀯𑀸𑀢𑀺.

𑀉𑀤𑀓𑀲𑀼𑀤𑁆𑀥𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.