𑁯. 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁩𑁧. 𑀇𑀤𑁆𑀥𑀺-𑀲𑀤𑁆𑀤𑀲𑁆𑀲 𑀧𑀞𑀫𑁄 𑀓𑀢𑁆𑀢𑀼𑀅𑀢𑁆𑀣𑁄, 𑀤𑀼𑀢𑀺𑀬𑁄 𑀓𑀭𑀡𑀢𑁆𑀣𑁄 𑀯𑀼𑀢𑁆𑀢𑁄, 𑀧𑀸𑀤-𑀲𑀤𑁆𑀤𑀲𑁆𑀲 𑀏𑀓𑁄 𑀓𑀭𑀡𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀚𑁆𑀚𑀺𑀢𑀩𑁆𑀩𑀸𑀯 𑀇𑀤𑁆𑀥𑀺 𑀯𑀼𑀢𑁆𑀢𑀸, 𑀦 𑀘 𑀇𑀚𑁆𑀛𑀦𑁆𑀢𑀻 𑀧𑀚𑁆𑀚𑀺𑀢𑀩𑁆𑀩𑀸 𑀘 𑀇𑀤𑁆𑀥𑀺 𑀧𑀚𑁆𑀚𑀦𑀓𑀭𑀡𑁂𑀦 𑀧𑀸𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀸 𑀳𑁄𑀢𑀻𑀢𑀺 ‘‘𑀧𑀞𑀫𑁂𑀦𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀣𑀸 𑀇𑀤𑁆𑀥𑀺𑀓𑀺𑀭𑀺𑀬𑀸𑀓𑀭𑀡𑁂𑀦 𑀲𑀸𑀥𑁂𑀢𑀩𑁆𑀩𑀸 𑀘 𑀯𑀼𑀤𑁆𑀥𑀺𑀲𑀗𑁆𑀔𑀸𑀢𑀸 𑀇𑀤𑁆𑀥𑀺 𑀧𑀚𑁆𑀚𑀦𑀓𑀺𑀭𑀺𑀬𑀸𑀓𑀭𑀡𑁂𑀦 𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀤𑁆𑀯𑀺𑀦𑁆𑀦𑀁 𑀓𑀭𑀡𑀸𑀦𑀁 𑀦 𑀅𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀲𑀫𑁆𑀪𑀯𑀢𑀻𑀢𑀺 ‘‘𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 𑀧𑀞𑀫𑁂𑀦𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄, 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄𑀢𑀺 𑀏𑀯𑀁 𑀬𑁄𑀚𑀦𑀸 𑀬𑀼𑀚𑁆𑀚𑀢𑀺.

‘‘𑀙𑀦𑁆𑀤𑀁 𑀘𑁂…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀙𑀦𑁆𑀤𑀸𑀥𑀺𑀧𑀢𑀺 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀅𑀥𑀺𑀧𑀢𑀺-𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀲𑀫𑀸𑀲𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀅𑀥𑀺𑀧𑀢𑀺-𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀧𑀦 ‘‘𑀙𑀦𑁆𑀤𑀳𑁂𑀢𑀼𑀓𑁄 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀥𑀸𑀦𑀪𑀽𑀢𑀸𑀢𑀺 𑀯𑀻𑀭𑀺𑀬𑀪𑀽𑀢𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀜𑁆𑀳𑀺 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺. 𑀅𑀣 𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀲𑀩𑁆𑀩𑀁 𑀯𑀻𑀭𑀺𑀬𑀁. 𑀢𑀢𑁆𑀣 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁄 𑀅𑀜𑁆𑀜𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺 𑀧𑀥𑀸𑀦𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀩𑁆𑀩𑀺𑀥𑀲𑁆𑀲 𑀧𑀦 𑀯𑀻𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀤𑀼𑀯𑀺𑀥𑀢𑁆𑀣𑀸𑀬𑀧𑀺 𑀇𑀤𑁆𑀥𑀺𑀬𑀸 𑀅𑀥𑀺𑀝𑁆𑀞𑀸𑀦𑀢𑁆𑀣𑁂𑀦. 𑀧𑀸𑀤𑀪𑀽𑀢𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑀼𑀁 𑀲𑀫𑀸𑀲𑀬𑁄𑀚𑀦𑀸𑀯𑀲𑁂𑀦 𑀧𑀦 𑀬𑁄 𑀧𑀼𑀩𑁆𑀩𑁂 𑀇𑀤𑁆𑀥𑀺𑀧𑀸𑀤𑀢𑁆𑀣𑁄 𑀧𑀸𑀤-𑀲𑀤𑁆𑀤𑀲𑁆𑀲 𑀉𑀧𑀸𑀬𑀢𑁆𑀣𑀢𑀁 𑀕𑀳𑁂𑀢𑁆𑀯𑀸 𑀬𑀣𑀸𑀬𑀼𑀢𑁆𑀢𑁄 𑀯𑀼𑀢𑁆𑀢𑁄, 𑀲𑁄 𑀯𑀓𑁆𑀔𑀫𑀸𑀦𑀸𑀦𑀁 𑀧𑀝𑀺𑀮𑀸𑀪𑀧𑀼𑀩𑁆𑀩𑀪𑀸𑀕𑀸𑀦𑀁 𑀓𑀢𑁆𑀢𑀼𑀓𑀭𑀡𑀺𑀤𑁆𑀥𑀺𑀪𑀸𑀯𑀁, 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 𑀯𑀸 𑀯𑀼𑀢𑁆𑀢𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀇𑀤𑁆𑀥𑀺𑀧𑀸𑀤𑁂𑀳𑀺 𑀲𑀸𑀥𑁂𑀢𑀩𑁆𑀩𑀸𑀬 𑀇𑀤𑁆𑀥𑀺𑀬𑀸 𑀓𑀢𑁆𑀢𑀺𑀤𑁆𑀥𑀺𑀪𑀸𑀯𑀁, 𑀙𑀦𑁆𑀤𑀸𑀤𑀻𑀦𑀜𑁆𑀘 𑀓𑀭𑀡𑀺𑀤𑁆𑀥𑀺𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀦𑀺𑀤𑁆𑀤𑁂𑀲𑁂 ‘‘𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀻𑀭𑀺𑀬𑀁 𑀆𑀕𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀁 𑀲𑀫𑀸𑀥𑀺𑀯𑀺𑀲𑁂𑀲𑀦𑀁 ‘‘𑀯𑀻𑀭𑀺𑀬𑀸𑀥𑀺𑀧𑀢𑀺 𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀻’’𑀢𑀺, 𑀤𑀼𑀢𑀺𑀬𑀁 𑀲𑀫𑀦𑁆𑀦𑀸𑀕𑀫𑀗𑁆𑀕𑀤𑀲𑁆𑀲𑀦𑀁. 𑀤𑁆𑀯𑁂𑀬𑁂𑀯 𑀳𑀺 𑀲𑀩𑁆𑀩𑀢𑁆𑀣 𑀲𑀫𑀦𑁆𑀦𑀸𑀕𑀫𑀗𑁆𑀕𑀸𑀦𑀺 𑀲𑀫𑀸𑀥𑀺 𑀧𑀥𑀸𑀦𑀲𑀗𑁆𑀔𑀸𑀭𑁄 𑀘, 𑀙𑀦𑁆𑀤𑀸𑀤𑀬𑁄 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀺, 𑀧𑀥𑀸𑀦𑀲𑀗𑁆𑀔𑀸𑀭𑁄 𑀧𑀦 𑀧𑀥𑀸𑀦𑀯𑀘𑀦𑁂𑀦𑁂𑀯 𑀯𑀺𑀲𑁂𑀲𑀺𑀢𑁄, 𑀦 𑀙𑀦𑁆𑀤𑀸𑀤𑀻𑀳𑀻𑀢𑀺 𑀦 𑀇𑀥 𑀯𑀻𑀭𑀺𑀬𑀸𑀥𑀺𑀧𑀢𑀺𑀢𑀸 𑀧𑀥𑀸𑀦𑀲𑀗𑁆𑀔𑀸𑀭𑀲𑁆𑀲 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀻𑀭𑀺𑀬𑀜𑁆𑀘 𑀲𑀫𑀸𑀥𑀺𑀁 𑀯𑀺𑀲𑁂𑀲𑁂𑀢𑁆𑀯𑀸 𑀞𑀺𑀢𑀫𑁂𑀯 𑀲𑀫𑀦𑁆𑀦𑀸𑀕𑀫𑀗𑁆𑀕𑀯𑀲𑁂𑀦 𑀧𑀥𑀸𑀦𑀲𑀗𑁆𑀔𑀸𑀭𑀯𑀘𑀦𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦𑀸𑀧𑀺 𑀤𑁆𑀯𑀻𑀳𑀺 𑀯𑀻𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀫𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁄 𑀲𑀫𑀸𑀥𑀺, 𑀢𑀣𑀸 𑀯𑀺𑀲𑀺𑀝𑁆𑀞𑁂𑀦𑁂𑀯 𑀘 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀧𑀥𑀸𑀦𑀲𑀗𑁆𑀔𑀸𑀭𑁄 𑀲𑁂𑀲𑀥𑀫𑁆𑀫𑀸 𑀘, 𑀢𑀲𑁆𑀫𑀸 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀦𑀪𑀸𑀯𑁄 𑀘 𑀙𑀦𑁆𑀤𑀸𑀤𑀻𑀦𑀁 𑀢𑀁𑀢𑀁𑀅𑀯𑀲𑁆𑀲𑀬𑀦𑀯𑀲𑁂𑀦 𑀳𑁄𑀢𑀻𑀢𑀺 ‘‘𑀙𑀦𑁆𑀤𑀲𑀫𑀸𑀥𑀺…𑀧𑁂… 𑀇𑀤𑁆𑀥𑀺𑀧𑀸𑀤’’𑀦𑁆𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀢𑁆𑀣𑁂𑀧𑀺 𑀧𑀸𑀤-𑀲𑀤𑁆𑀤𑁂 𑀉𑀧𑀸𑀬𑀢𑁆𑀣𑁂𑀦 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑁂𑀦𑁂𑀯 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑁂 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄’’𑀢𑀺𑀆𑀤𑀺𑀦𑀸 𑀙𑀦𑁆𑀤𑀸𑀤𑀻𑀦𑀫𑁂𑀯 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸. 𑀧𑀜𑁆𑀳𑀧𑀼𑀘𑁆𑀙𑀓𑁂 𑀘 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸𑀯 (𑀯𑀺𑀪. 𑁪𑁬𑁨) 𑀉𑀤𑁆𑀤𑁂𑀲𑀁 𑀓𑀢𑁆𑀯𑀸𑀧𑀺 𑀧𑀼𑀦 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑁄𑀢𑀺. 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀢𑁆𑀣𑀫𑁂𑀯 𑀳𑀺 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁 𑀓𑀢𑀁, 𑀅𑀜𑁆𑀜𑀣𑀸 𑀘𑀢𑀼𑀩𑁆𑀩𑀺𑀥𑀢𑀸 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁩𑁩. 𑀭𑀣𑀥𑀼𑀭𑁂𑀢𑀺 𑀭𑀣𑀲𑁆𑀲 𑀧𑀼𑀭𑀢𑁄. 𑀳𑀻𑀦𑀚𑀸𑀢𑀺𑀓𑁄 𑀘𑀡𑁆𑀟𑀸𑀮𑁄 𑀉𑀧𑀝𑁆𑀞𑀸𑀦𑀸𑀤𑀺𑀕𑀼𑀡𑀬𑁄𑀕𑁂𑀧𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀻𑀦𑀺 𑀦 𑀮𑀪𑀢𑀻𑀢𑀺 𑀆𑀳 ‘‘𑀚𑀸𑀢𑀺𑀁 𑀲𑁄𑀥𑁂𑀢𑁆𑀯𑀸…𑀧𑁂… 𑀚𑀸𑀢𑀺𑀁 𑀅𑀯𑀲𑁆𑀲𑀬𑀢𑀻’’𑀢𑀺. 𑀅𑀫𑀦𑁆𑀢𑀦𑀻𑀬𑁄𑀢𑀺 𑀳𑀺𑀢𑀸𑀳𑀺𑀢𑀫𑀦𑁆𑀢𑀦𑁂 𑀦 𑀅𑀭𑀳𑁄.

𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀙𑀦𑁆𑀤𑁂 𑀲𑀢𑀺 𑀓𑀣𑀁 𑀦𑀸𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀲𑀢𑁆𑀢𑀧𑀺 𑀪𑀢𑁆𑀢𑀸𑀦𑀺 𑀅𑀪𑀼𑀜𑁆𑀚𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀙𑀦𑁆𑀤𑀫𑁂𑀯 𑀅𑀯𑀲𑁆𑀲𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀻𑀢𑀺 𑀆𑀳 ‘‘𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀯𑀺𑀬𑀸’’𑀢𑀺.

𑀫𑁄𑀖𑀭𑀸𑀚𑀢𑁆𑀣𑁂𑀭𑁄 𑀯𑀻𑀫𑀁𑀲𑀁 𑀅𑀯𑀲𑁆𑀲𑀬𑀻𑀢𑀺 𑀢𑀲𑁆𑀲 𑀪𑀕𑀯𑀸 ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺 (𑀲𑀼. 𑀦𑀺. 𑁧𑁧𑁨𑁫) 𑀲𑀼𑀜𑁆𑀜𑀢𑀸𑀓𑀣𑀁 𑀓𑀣𑁂𑀲𑀺, 𑀧𑀜𑁆𑀜𑀸𑀦𑀺𑀲𑁆𑀲𑀺𑀢𑀫𑀸𑀦𑀦𑀺𑀕𑁆𑀕𑀳𑀢𑁆𑀣𑀜𑁆𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁 𑀦 𑀓𑀣𑁂𑀲𑀺. 𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀙𑀦𑁆𑀤𑀼𑀧𑁆𑀧𑀸𑀤𑀦𑀁 𑀢𑁄𑀲𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀙𑀦𑁆𑀤𑀲𑁆𑀲 𑀉𑀧𑀝𑁆𑀞𑀸𑀦𑀲𑀤𑀺𑀲𑀢𑀸 𑀯𑀼𑀢𑁆𑀢𑀸, 𑀣𑀸𑀫𑀪𑀸𑀯𑀢𑁄 𑀯𑀻𑀭𑀺𑀬𑀲𑁆𑀲 𑀲𑀽𑀭𑀢𑁆𑀢𑀲𑀤𑀺𑀲𑀢𑀸, ‘‘𑀙𑀤𑁆𑀯𑀸𑀭𑀸𑀥𑀺𑀧𑀢𑀺 𑀭𑀸𑀚𑀸’’𑀢𑀺 (𑀥. 𑀧. 𑀅𑀝𑁆𑀞. 𑁨.𑁧𑁮𑁧 𑀏𑀭𑀓𑀧𑀢𑁆𑀢𑀦𑀸𑀕𑀭𑀸𑀚𑀯𑀢𑁆𑀣𑀼) 𑀯𑀘𑀦𑀢𑁄 𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀯𑀺𑀲𑀺𑀝𑁆𑀞𑀚𑀸𑀢𑀺𑀲𑀤𑀺𑀲𑀢𑀸.

𑀅𑀪𑁂𑀤𑀢𑁄𑀢𑀺 𑀙𑀦𑁆𑀤𑀸𑀤𑀺𑀓𑁂 𑀢𑀬𑁄 𑀢𑀬𑁄 𑀥𑀫𑁆𑀫𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸, 𑀇𑀤𑁆𑀥𑀺𑀇𑀤𑁆𑀥𑀺𑀧𑀸𑀤𑁂 𑀅𑀫𑀺𑀲𑁆𑀲𑁂𑀢𑁆𑀯𑀸 𑀯𑀸 𑀓𑀣𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀙𑀦𑁆𑀤𑀯𑀻𑀭𑀺𑀬𑀸𑀤𑀬𑁄 𑀯𑀺𑀲𑁂𑀲𑁂𑀦 𑀇𑀚𑁆𑀛𑀦𑁆𑀢𑀺 𑀏𑀢𑀸𑀬𑀸𑀢𑀺 𑀇𑀤𑁆𑀥𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀻𑀢𑀺 𑀅𑀯𑀺𑀲𑁂𑀲𑁂𑀦 𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀧𑀻𑀢𑀺.

𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀲𑀫𑀸𑀥𑀺𑀤𑁆𑀥𑀺𑀧𑀸𑀤𑀸𑀤𑀬𑁄 𑀯𑀺𑀲𑀺𑀝𑁆𑀞𑀸, 𑀧𑀸𑀤𑁄 𑀲𑀩𑁆𑀩𑀺𑀤𑁆𑀥𑀻𑀦𑀁 𑀲𑀸𑀥𑀸𑀭𑀡𑀢𑁆𑀢𑀸 𑀅𑀯𑀺𑀲𑀺𑀝𑁆𑀞𑁄, 𑀢𑀲𑁆𑀫𑀸 𑀯𑀺𑀲𑀺𑀝𑁆𑀞𑁂𑀲𑁆𑀯𑁂𑀯 𑀧𑀯𑁂𑀲𑀁 𑀅𑀯𑀢𑁆𑀯𑀸 𑀅𑀯𑀺𑀲𑀺𑀝𑁆𑀞𑁂 𑀘 𑀧𑀯𑁂𑀲𑀁 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑀢𑁆𑀣 ‘‘𑀧𑀸𑀤𑁂 𑀧𑀢𑀺𑀝𑁆𑀞𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀢𑀢𑁆𑀣𑁂𑀯𑀸𑀢𑀺 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀇𑀤𑁆𑀥𑀺𑀧𑀸𑀤𑁂𑀲𑀼, 𑀘𑀢𑀽𑀲𑀼 𑀙𑀦𑁆𑀤𑀸𑀤𑀺𑀓𑁂𑀲𑁆𑀯𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀙𑀦𑁆𑀤𑀯𑀢𑁄 𑀓𑁄 𑀲𑀫𑀸𑀥𑀺 𑀦 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀲𑀫𑀸𑀥𑀺𑀪𑀸𑀯𑀦𑀸𑀫𑀼𑀔𑁂𑀦 𑀪𑀸𑀯𑀺𑀢𑀸 𑀲𑀫𑀸𑀥𑀺𑀪𑀸𑀯𑀺𑀢𑀸.

𑀏𑀢𑁆𑀣 𑀧𑀦𑀸𑀢𑀺 𑀪𑁂𑀤𑀓𑀣𑀸𑀬𑀁 𑀅𑀪𑁂𑀤𑀓𑀣𑀦𑀢𑁄 𑀅𑀪𑀺𑀦𑀯𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑁂 𑀳𑀺 𑀢𑀬𑁄 𑀥𑀫𑁆𑀫𑀸 𑀅𑀪𑁂𑀤𑀓𑀣𑀸𑀬𑀁 𑀇𑀤𑁆𑀥𑀺𑀇𑀤𑁆𑀥𑀺𑀧𑀸𑀤𑁄𑀢𑁆𑀯𑁂𑀯 𑀯𑀼𑀢𑁆𑀢𑀸, 𑀢𑁂 𑀏𑀯 𑀪𑁂𑀤𑀓𑀣𑀸𑀬𑀁 𑀇𑀤𑁆𑀥𑀻𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺, 𑀲𑁂𑀲𑀸 𑀇𑀤𑁆𑀥𑀺𑀧𑀸𑀤𑀸 𑀏𑀯𑀸𑀢𑀺 𑀏𑀯𑀁 𑀅𑀪𑀺𑀦𑀯𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀙𑀦𑁆𑀤𑁄 𑀲𑀫𑀸𑀥𑀻’’𑀢𑀺𑀆𑀤𑀺𑀫𑀸𑀳. 𑀇𑀫𑁂 𑀳𑀺 𑀢𑀬𑁄…𑀧𑁂… 𑀦 𑀯𑀺𑀦𑀸, 𑀢𑀲𑁆𑀫𑀸 𑀲𑁂𑀲𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀢𑁂𑀲𑀁 𑀢𑀺𑀡𑁆𑀡𑀁 𑀇𑀚𑁆𑀛𑀦𑁂𑀦 𑀇𑀤𑁆𑀥𑀺 𑀦𑀸𑀫 𑀪𑀯𑁂𑀬𑁆𑀬𑀼𑀁, 𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑀸𑀢𑀺 𑀢𑁂 𑀇𑀤𑁆𑀥𑀺𑀧𑀸𑀤𑀸 𑀏𑀯 𑀳𑁄𑀦𑁆𑀢𑀺, 𑀦 𑀇𑀤𑁆𑀥𑀻𑀢𑀺 𑀏𑀯𑀫𑀺𑀤𑀁 𑀧𑀼𑀭𑀺𑀫𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀢𑀺𑀡𑁆𑀡𑀁 𑀇𑀤𑁆𑀥𑀺𑀢𑀸 𑀇𑀤𑁆𑀥𑀺𑀧𑀸𑀤𑀢𑀸 𑀘 𑀯𑀼𑀢𑁆𑀢𑀸, 𑀲𑁂𑀲𑀸𑀦𑀜𑁆𑀘 𑀇𑀤𑁆𑀥𑀺𑀧𑀸𑀤𑀢𑀸𑀯, 𑀢𑀁 𑀲𑀩𑁆𑀩𑀁 𑀲𑀸𑀥𑁂𑀢𑀼𑀁 ‘‘𑀇𑀫𑁂 𑀳𑀺 𑀢𑀬𑁄…𑀧𑁂… 𑀦 𑀯𑀺𑀦𑀸’’𑀢𑀺 𑀆𑀳. 𑀢𑁂𑀦 𑀬𑀲𑁆𑀫𑀸 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀇𑀤𑁆𑀥𑀺. 𑀇𑀚𑁆𑀛𑀫𑀸𑀦𑀸 𑀘 𑀬𑀲𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀓𑁂𑀳𑀺 𑀲𑀳𑁂𑀯 𑀇𑀚𑁆𑀛𑀦𑁆𑀢𑀺, 𑀦 𑀯𑀺𑀦𑀸, 𑀢𑀲𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀓𑀸 𑀇𑀤𑁆𑀥𑀺𑀧𑀸𑀤𑀸, 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀧𑀦 𑀢𑁂 𑀢𑀬𑁄 𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀤𑀸𑀧𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀫𑁆𑀧𑀺 𑀧𑀦 𑀔𑀦𑁆𑀥𑀸𑀦𑀁 𑀇𑀤𑁆𑀥𑀺𑀪𑀸𑀯𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀧𑀬𑀼𑀢𑁆𑀢𑀓𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀏𑀓𑀤𑁂𑀲𑀲𑁆𑀲 𑀇𑀤𑁆𑀥𑀺𑀢𑀸, 𑀘𑀢𑀼𑀦𑁆𑀦𑀫𑁆𑀧𑀺 ‘‘𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀇𑀤𑁆𑀥𑀺𑀧𑀸𑀤𑀢𑀸, 𑀧𑀼𑀦𑀧𑀺 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 ‘‘𑀇𑀤𑁆𑀥𑀺 𑀏𑀯 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀇𑀤𑁆𑀥𑀺𑀧𑀸𑀤𑀢𑀸 𑀘 𑀤𑀲𑁆𑀲𑀺𑀢𑀸, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀥𑀺𑀯𑀘𑀦’’𑀦𑁆𑀢𑀺. 𑀇𑀫𑀺𑀦𑀸 ‘‘𑀇𑀤𑁆𑀥𑀺 𑀦𑀸𑀫 𑀅𑀦𑀺𑀧𑁆𑀨𑀦𑁆𑀦𑀸’’𑀢𑀺 𑀇𑀤𑀁 𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺.

𑀧𑀝𑀺𑀮𑀸𑀪𑀧𑀼𑀩𑁆𑀩𑀪𑀸𑀕𑀸𑀦𑀁 𑀧𑀝𑀺𑀮𑀸𑀪𑀲𑁆𑀲𑁂𑀯 𑀘 𑀇𑀤𑁆𑀥𑀺𑀇𑀤𑁆𑀥𑀺𑀧𑀸𑀤𑀢𑀸𑀯𑀘𑀦𑀁 𑀅𑀧𑀼𑀩𑁆𑀩𑀦𑁆𑀢𑀺 𑀓𑀢𑁆𑀯𑀸 𑀧𑀼𑀘𑁆𑀙𑀢𑀺 ‘‘𑀓𑁂𑀦𑀝𑁆𑀞𑁂𑀦 𑀇𑀤𑁆𑀥𑀺, 𑀓𑁂𑀦𑀝𑁆𑀞𑁂𑀦 𑀧𑀸𑀤𑁄’’𑀢𑀺. 𑀧𑀝𑀺𑀮𑀸𑀪𑁄 𑀧𑀼𑀩𑁆𑀩𑀪𑀸𑀕𑁄 𑀘𑀸𑀢𑀺 𑀯𑀘𑀦𑀲𑁂𑀲𑁄. 𑀉𑀧𑀸𑀬𑁄 𑀘 𑀉𑀧𑀸𑀬𑀪𑀸𑀯𑁂𑀦𑁂𑀯 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀢𑀺𑀝𑁆𑀞𑀸 𑀳𑁄𑀢𑀻𑀢𑀺 𑀆𑀳 ‘‘𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑁂𑀯 𑀧𑀸𑀤𑁄’’𑀢𑀺. 𑀙𑀦𑁆𑀤𑁄𑀬𑁂𑀯…𑀧𑁂… 𑀯𑀻𑀫𑀁𑀲𑀸𑀯 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄𑀢𑀺 𑀓𑀣𑀺𑀢𑀁, 𑀢𑀲𑁆𑀫𑀸 𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀬𑀸 𑀲𑀫𑀸𑀦𑀓𑀸𑀮𑀺𑀓𑀸 𑀦𑀸𑀦𑀸𑀓𑁆𑀔𑀡𑀺𑀓𑀸 𑀯𑀸 𑀇𑀤𑁆𑀥𑀺𑀧𑀸𑀤𑀸, 𑀚𑁂𑀝𑁆𑀞𑀓𑀪𑀽𑀢𑀸 𑀧𑀦 𑀙𑀦𑁆𑀤𑀸𑀤𑀬𑁄 𑀏𑀯 𑀲𑀩𑁆𑀩𑀢𑁆𑀣 𑀇𑀤𑁆𑀥𑀺𑀧𑀸𑀤𑀸𑀢𑀺 𑀅𑀬𑀫𑁂𑀯 𑀢𑁂𑀲𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀳𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀘 𑀲𑀫𑀸𑀥𑀺𑀯𑀺𑀲𑁂𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑀸𑀦𑀁 𑀉𑀧𑀸𑀬𑀪𑀽𑀢𑀸𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀸𑀓𑀝𑀓𑀭𑀡𑀢𑁆𑀣𑀁 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀻𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀣𑁂𑀭𑀸 𑀓𑀺𑀭.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁪𑁪𑁪. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 ‘‘𑀇𑀤𑁆𑀥𑀺𑀧𑀸𑀤𑁄𑀢𑀺 𑀢𑀣𑀸𑀪𑀽𑀢𑀲𑁆𑀲 𑀨𑀲𑁆𑀲𑁄…𑀧𑁂… 𑀧𑀕𑁆𑀕𑀸𑀳𑁄 𑀅𑀯𑀺𑀓𑁆𑀔𑁂𑀧𑁄’’𑀢𑀺 (𑀯𑀺𑀪. 𑁪𑁪𑁭) 𑀇𑀤𑁆𑀥𑀺𑀇𑀤𑁆𑀥𑀺𑀧𑀸𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀧𑀕𑁆𑀕𑀸𑀳𑀸𑀯𑀺𑀓𑁆𑀔𑁂𑀧𑀸 𑀯𑀼𑀢𑁆𑀢𑀸, 𑀘𑀺𑀢𑁆𑀢𑀧𑀜𑁆𑀜𑀸 𑀘 𑀲𑀗𑁆𑀔𑀺𑀧𑀺𑀢𑁆𑀯𑀸𑀢𑀺. 𑀘𑀢𑁆𑀢𑀸𑀭𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀻𑀢𑀺 𑀇𑀤𑀁 𑀲𑀸𑀥𑀺𑀧𑀢𑀺𑀯𑀸𑀭𑀸𑀦𑀁 𑀧𑀭𑀺𑀧𑀼𑀡𑁆𑀡𑀸𑀦𑀁 𑀅𑀪𑀸𑀯𑀸 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀦 𑀳𑀺 𑀅𑀥𑀺𑀧𑀢𑀻𑀦𑀁 𑀅𑀥𑀺𑀧𑀢𑀬𑁄 𑀯𑀺𑀚𑁆𑀚𑀦𑁆𑀢𑀺, 𑀏𑀓𑁂𑀓𑀲𑁆𑀫𑀺𑀁 𑀧𑀦 𑀇𑀤𑁆𑀥𑀺𑀧𑀸𑀤𑀦𑀺𑀤𑁆𑀤𑁂𑀲𑁂 𑀏𑀓𑁂𑀓𑁄 𑀅𑀥𑀺𑀧𑀢𑀺𑀯𑀸𑀭𑁄 𑀮𑀩𑁆𑀪𑀢𑀻𑀢𑀺 𑀲𑁄𑀴𑀲 𑀲𑁄𑀴𑀲 𑀦𑀬𑀲𑀢𑀸𑀦𑀺 𑀮𑀩𑁆𑀪𑀦𑁆𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑀦𑀦𑀼 𑀘 𑀘𑀢𑁆𑀢𑀸𑀭𑁄𑀧𑀺 𑀅𑀥𑀺𑀧𑀢𑀬𑁄 𑀏𑀓𑀓𑁆𑀔𑀡𑁂 𑀮𑀩𑁆𑀪𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀦 𑀅𑀥𑀺𑀧𑀢𑀬𑁄 𑀦 𑀪𑀯𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀦 𑀫𑀕𑁆𑀕𑀸𑀥𑀺𑀧𑀢𑀺𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀭𑀸𑀚𑀧𑀼𑀢𑁆𑀢𑁄𑀧𑀫𑀸𑀧𑀺 𑀳𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀻𑀢𑀺? 𑀦, 𑀏𑀓𑀓𑁆𑀔𑀡𑁂 𑀤𑀼𑀢𑀺𑀬𑀲𑁆𑀲 𑀅𑀥𑀺𑀧𑀢𑀺𑀦𑁄 𑀅𑀪𑀸𑀯𑀢𑁄 𑀏𑀯, ‘‘𑀦 𑀫𑀕𑁆𑀕𑀸𑀥𑀺𑀧𑀢𑀺𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀭𑀸𑀚𑀧𑀼𑀢𑁆𑀢𑁄𑀧𑀫𑀸 𑀅𑀥𑀺𑀧𑀢𑀺𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀇𑀫𑀫𑁂𑀯𑀢𑁆𑀣𑀁 𑀤𑀻𑀧𑁂𑀢𑀺, 𑀦 𑀅𑀥𑀺𑀧𑀢𑀻𑀦𑀁 𑀲𑀳𑀪𑀸𑀯𑀁. 𑀢𑀁 𑀓𑀣𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺? 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀅𑀥𑀺𑀧𑀢𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁩) 𑀯𑀼𑀢𑁆𑀢𑀸 ‘‘𑀓𑀲𑁆𑀫𑀸 𑀧𑀦 𑀬𑀣𑀸 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁂 ‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥 ‘𑀅𑀥𑀺𑀧𑀢𑀻 𑀅𑀥𑀺𑀧𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀸𑀦’𑀦𑁆𑀢𑀺 𑀅𑀯𑀢𑁆𑀯𑀸 ‘𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀸 𑀓𑀢𑀸𑀢𑀺? 𑀏𑀓𑀓𑁆𑀔𑀡𑁂 𑀅𑀪𑀸𑀯𑀢𑁄’’𑀢𑀺. 𑀲𑀢𑀺 𑀘 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀻𑀦𑀁 𑀲𑀳𑀪𑀸𑀯𑁂 ‘‘𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀁 𑀦 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸 𑀅𑀯𑀻𑀫𑀁𑀲𑀸𑀥𑀺𑀧𑀢𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀪𑀸𑀯𑀸. 𑀙𑀦𑁆𑀤𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀸𑀥𑀺𑀧𑀢𑀺𑀓𑀭𑀡𑀪𑀸𑀯𑁂 𑀘 ‘‘𑀯𑀻𑀫𑀁𑀲𑀁 𑀞𑀧𑁂𑀢𑁆𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀙𑀦𑁆𑀤𑀸𑀤𑀻𑀦𑀁 𑀯𑀻𑀫𑀁𑀲𑀸𑀥𑀺𑀧𑀢𑀺𑀓𑀢𑁆𑀢𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 ‘‘𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀲𑀺𑀬𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄’’𑀢𑀺 (𑀥. 𑀲. 𑁧𑁪𑁨𑁯) 𑀏𑀯𑀫𑀸𑀤𑀻𑀳𑀺𑀧𑀺 𑀅𑀥𑀺𑀧𑀢𑀻𑀦𑀁 𑀲𑀳𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀏𑀯𑀸𑀢𑀺.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.