𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀧𑀞𑀫𑀦𑀬𑀯𑀡𑁆𑀡𑀦𑀸

𑁪𑁬𑁬. 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧) 𑁋

‘‘𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸. 𑀢𑀣𑀸 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀧𑀢𑀺𑀝𑁆𑀞𑀸𑀦𑀁, 𑀅𑀯𑀲𑁂𑀲𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀆𑀬𑀽𑀳𑀦𑀸. 𑀢𑀡𑁆𑀳𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀸𑀦𑀁, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀆𑀬𑀽𑀳𑀦𑀸. 𑀮𑀻𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑀸. 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸’’𑀢𑀺 𑁋

𑀯𑀼𑀢𑁆𑀢𑁂𑀲𑀼 𑀧𑀓𑀸𑀭𑁂𑀲𑀼 𑀇𑀥 𑀅𑀯𑀼𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀲𑀫𑁆𑀫𑀧𑁆𑀧𑀯𑀢𑁆𑀢𑁂 𑀥𑀫𑁆𑀫𑁂 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺, 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀺, 𑀢𑀤𑀸𑀓𑀸𑀭𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀕𑀳𑀡𑁂 𑀫𑀚𑁆𑀛𑀢𑁆𑀢𑀢𑀸’’𑀢𑀺 𑀉𑀧𑁂𑀓𑁆𑀔𑀸𑀓𑀺𑀘𑁆𑀘𑀸𑀥𑀺𑀫𑀢𑁆𑀢𑀢𑀸𑀬 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀅𑀦𑀼𑀓𑁆𑀓𑀫𑀦𑀺𑀓𑁆𑀔𑁂𑀧𑁂 𑀧𑀬𑁄𑀚𑀦𑀁 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀓𑀸𑀭𑀡𑀪𑀸𑀯𑁄.

𑁪𑁬𑁭. 𑀩𑀮𑀯𑀢𑀻 𑀏𑀯 𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀓𑀢𑁆𑀯𑀸 𑀩𑀮𑀯𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀜𑁆𑀜𑀸 𑀕𑀳𑀺𑀢𑀸, 𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀧𑀥𑀸𑀭𑀡𑀲𑀢𑀺, 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀲𑁆𑀲 𑀧𑀦 𑀲𑀭𑀡𑀁 𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀢𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸𑀢𑀺 ‘‘𑀅𑀳𑁄 𑀯𑀢 𑀫𑁂 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀼𑀁, 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀧𑀲𑀻𑀤𑁂𑀬𑁆𑀬𑀼𑀁, 𑀧𑀲𑀦𑁆𑀦𑀸 𑀘 𑀫𑁂 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁𑀘𑀺𑀢𑁆𑀢𑁄 𑀅𑀳𑀼𑀢𑁆𑀯𑀸 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄…𑀧𑁂… 𑀯𑀺𑀜𑁆𑀜𑀽𑀳𑀺, 𑀅𑀳𑁄 𑀯𑀢 𑀫𑁂 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀼𑀁, 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀆𑀚𑀸𑀦𑁂𑀬𑁆𑀬𑀼𑀁, 𑀆𑀚𑀸𑀦𑀺𑀢𑁆𑀯𑀸 𑀘 𑀧𑀦 𑀢𑀣𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀧𑀝𑀺𑀘𑁆𑀘 𑀓𑀸𑀭𑀼𑀜𑁆𑀜𑀁 𑀅𑀦𑀼𑀤𑁆𑀤𑀬𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀯𑀺𑀬 𑀪𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀢𑀺 ‘‘𑀦 𑀳𑁂𑀯 𑀔𑁄 𑀲𑀢𑁆𑀣𑀸, 𑀅𑀧𑀺𑀘 𑀔𑁄 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀯𑀺𑀫𑀼𑀢𑁆𑀢𑀺𑀓𑀸𑀭𑀡𑀧𑀥𑀸𑀦𑀪𑀸𑀯𑁂 𑀞𑀢𑁆𑀯𑀸. 𑀘𑀺𑀭𑀓𑀢𑀯𑀢𑁆𑀢𑀸𑀤𑀺𑀯𑀲𑁂𑀦 𑀢𑀁𑀲𑀫𑀼𑀝𑁆𑀞𑀸𑀧𑀓𑁄 𑀅𑀭𑀽𑀧𑀓𑁄𑀝𑁆𑀞𑀸𑀲𑁄 𑀯𑀼𑀢𑁆𑀢𑁄, 𑀪𑀸𑀯𑀢𑁆𑀣𑀢𑁆𑀢𑀸 𑀏𑀯 𑀯𑀸 𑀓𑀢𑀪𑀸𑀲𑀺𑀢-𑀲𑀤𑁆𑀤𑀸 𑀓𑀺𑀭𑀺𑀬𑀸𑀪𑀽𑀢𑀲𑁆𑀲 𑀅𑀭𑀽𑀧𑀓𑁄𑀝𑁆𑀞𑀸𑀲𑀲𑁆𑀲 𑀯𑀸𑀘𑀓𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁…𑀧𑁂… 𑀓𑁄𑀝𑁆𑀞𑀸𑀲’’𑀦𑁆𑀢𑀺.

𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀓𑀢𑀸 𑀧𑀼𑀭𑀺𑀫𑀸𑀦𑀁 𑀙𑀦𑁆𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀺𑀓𑀲𑁆𑀲, 𑀧𑀭𑁂𑀲𑀁 𑀲𑀩𑁆𑀩𑁂𑀲𑀁 𑀯𑀸 𑀢𑀁𑀢𑀁𑀧𑀭𑀺𑀬𑀸𑀬𑁂𑀦 𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀓𑀸𑀫𑀮𑁄𑀓𑀯𑀝𑁆𑀝𑀸𑀫𑀺𑀲𑀸𑀢𑀺 𑀢𑀡𑁆𑀳𑀸 𑀢𑀤𑀸𑀭𑀫𑁆𑀫𑀡𑀸 𑀔𑀦𑁆𑀥𑀸𑀢𑀺 𑀯𑀤𑀦𑁆𑀢𑀺, 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀘 𑀭𑀸𑀕𑁄 𑀢𑀤𑀸𑀭𑀫𑁆𑀫𑀡𑀜𑁆𑀘 𑀓𑀸𑀫𑀸𑀫𑀺𑀲𑀁, ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺𑀆𑀤𑀺𑀦𑀸 𑀮𑁄𑀓𑀕𑁆𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀳𑀕𑀢𑁄 𑀭𑀸𑀕𑁄 𑀢𑀤𑀸𑀭𑀫𑁆𑀫𑀡𑀜𑁆𑀘 𑀮𑁄𑀓𑀸𑀫𑀺𑀲𑀁, 𑀮𑁄𑀓𑀥𑀫𑁆𑀫𑀸 𑀯𑀸, 𑀯𑀝𑁆𑀝𑀲𑁆𑀲𑀸𑀤𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀲𑀁𑀲𑀸𑀭𑀚𑀦𑀓𑁄 𑀭𑀸𑀕𑁄 𑀢𑀤𑀸𑀭𑀫𑁆𑀫𑀡𑀜𑁆𑀘 𑀯𑀝𑁆𑀝𑀸𑀫𑀺𑀲𑀁. 𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀸.

𑀧𑀞𑀫𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀦𑀬𑀯𑀡𑁆𑀡𑀦𑀸

𑁪𑁬𑁮-𑁪𑁬𑁯. 𑀅𑀪𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸 𑀦𑀸𑀫 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸, 𑀤𑁆𑀯𑁂 𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀺, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀲𑀢𑁆𑀢 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀺, 𑀅𑀝𑁆𑀞𑀸𑀪𑀺𑀪𑀸𑀬𑀢𑀦𑀸𑀦𑀺, 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸, 𑀤𑀲 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀻’’𑀢𑀺 𑀏𑀯𑀁𑀧𑀪𑁂𑀤𑀸 𑀥𑀫𑁆𑀫𑀸, ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁬) 𑀤𑀲𑁆𑀲𑀺𑀢𑀸 𑀔𑀦𑁆𑀥𑀸𑀤𑀬𑁄 𑀘. 𑀯𑀸𑀦𑀦𑁆𑀢𑀺 𑀯𑀺𑀦𑀦𑁆𑀥𑀦𑀁 𑀪𑀯𑀸𑀤𑀻𑀦𑀁, 𑀕𑀫𑀦𑀁 𑀯𑀸 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼.

𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀓𑁂𑀦𑀸𑀢𑀺 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸’’𑀢𑀺 𑀏𑀢𑁆𑀢𑀸𑀯𑀢𑀸. 𑀮𑁄𑀓𑀺𑀬𑀦𑁆𑀢𑀺 𑀯𑀤𑀦𑁆𑀢𑁄 𑀦 𑀓𑀺𑀮𑀫𑀢𑀻𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀮𑁄𑀓𑀺𑀬𑀢𑁆𑀢𑀸 𑀅𑀘𑁄𑀤𑀦𑀻𑀬𑁄𑀢𑀺 𑀅𑀢𑁆𑀣𑁄. 𑀅𑀮𑀩𑁆𑀪…𑀧𑁂… 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀭𑀽𑀧𑀸𑀯𑀘𑀭𑁂 𑀅𑀮𑀩𑁆𑀪𑀫𑀸𑀦𑀓𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀉𑀧𑀸𑀤𑀸𑀬 𑀮𑀩𑁆𑀪𑀫𑀸𑀦𑀸𑀧𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀻𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀸, ‘‘𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀸𑀫𑀸𑀯𑀘𑀭𑁂 𑀯𑀸 𑀅𑀮𑀩𑁆𑀪𑀫𑀸𑀦𑀓𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀧𑀻𑀢𑀺𑀁 𑀉𑀧𑀸𑀤𑀸𑀬 𑀮𑀩𑁆𑀪𑀫𑀸𑀦𑀓𑀸𑀯 𑀧𑀻𑀢𑀺𑀩𑁄𑀚𑁆𑀛𑀗𑁆𑀕𑀪𑀽𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀅𑀚𑁆𑀛𑀢𑁆𑀢𑀯𑀺𑀫𑁄𑀓𑁆𑀔𑀦𑁆𑀢𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀺𑀢𑀫𑀕𑁆𑀕𑁄 ‘‘𑀅𑀚𑁆𑀛𑀢𑁆𑀢𑀯𑀺𑀫𑁄𑀓𑁆𑀔𑁄’’𑀢𑀺 𑀇𑀥 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀯𑀸𑀭𑁂𑀢𑀩𑁆𑀩𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑁂𑀲𑀼 𑀓𑀲𑀺𑀡𑀸𑀤𑀺𑀛𑀸𑀦𑁂𑀲𑀼 𑀲𑀢𑀺𑀆𑀤𑀻𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀤𑁆𑀥𑀭𑀦𑁆𑀢𑀸 𑀧𑀦 𑀯𑀺𑀧𑀲𑁆𑀲𑀦𑀸 𑀯𑀺𑀬 𑀩𑁄𑀥𑀺𑀬𑀸 𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀁 𑀛𑀸𑀦𑀁 𑀦 𑀳𑁄𑀢𑀺, 𑀦 𑀘 𑀢𑀣𑀸 𑀏𑀓𑀦𑁆𑀢𑀺𑀓𑀁 𑀓𑀸𑀭𑀡𑀁, 𑀦 𑀘 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀲𑁆𑀲 𑀯𑀺𑀬 𑀛𑀸𑀦𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀸𑀦𑀁 𑀫𑀕𑁆𑀕𑁄𑀢𑀺 𑀓𑀢𑁆𑀯𑀸 𑀦 𑀉𑀤𑁆𑀥𑀭𑀦𑁆𑀢𑀺. 𑀢𑀢𑁆𑀣 𑀓𑀲𑀺𑀡𑀚𑁆𑀛𑀸𑀦𑀕𑁆𑀕𑀳𑀡𑁂𑀦 𑀢𑀤𑀸𑀬𑀢𑁆𑀢𑀸𑀦𑀺 𑀆𑀭𑀼𑀧𑁆𑀧𑀸𑀦𑀺𑀧𑀺 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀅𑀲𑀼𑀪𑀚𑁆𑀛𑀸𑀦𑀸𑀦𑀁 𑀅𑀯𑀘𑀦𑀁 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀤𑀼𑀢𑀺𑀬𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀦𑀬𑀯𑀡𑁆𑀡𑀦𑀸

𑁪𑁭𑁦-𑁪𑁭𑁧. 𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀁 𑀯𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑁆𑀢𑀲𑁆𑀲 𑀅𑀯𑀘𑀦𑀁 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁮𑁨; 𑀯𑀺𑀪. 𑁪𑁭𑁧) 𑀇𑀥 𑀪𑀸𑀯𑁂𑀢𑀩𑁆𑀩𑀸𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀯𑀼𑀢𑁆𑀢𑀢𑁆𑀢𑀸. 𑀪𑀸𑀯𑀺𑀢𑀩𑁄𑀚𑁆𑀛𑀗𑁆𑀕𑀲𑁆𑀲 𑀳𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀨𑀮𑀩𑁄𑀚𑁆𑀛𑀗𑁆𑀕𑀸 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀸𑀢𑀺. 𑀯𑁄𑀲𑁆𑀲𑀕𑁆𑀕-𑀲𑀤𑁆𑀤𑁄 𑀧𑀭𑀺𑀘𑁆𑀘𑀸𑀕𑀢𑁆𑀣𑁄 𑀧𑀓𑁆𑀔𑀦𑁆𑀤𑀦𑀢𑁆𑀣𑁄 𑀘𑀸𑀢𑀺 𑀯𑁄𑀲𑁆𑀲𑀕𑁆𑀕𑀲𑁆𑀲 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑁆𑀧𑀓𑀸𑀭𑁂𑀦 𑀢𑀦𑁆𑀦𑀺𑀦𑁆𑀦𑀪𑀸𑀯𑀸𑀭𑀫𑁆𑀫𑀡𑀓𑀭𑀡𑀧𑁆𑀧𑀓𑀸𑀭𑁂𑀦 𑀘. 𑀧𑀭𑀺𑀡𑀸𑀫𑁂𑀦𑁆𑀢𑀁 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂, 𑀧𑀭𑀺𑀡𑀢𑀁 𑀫𑀕𑁆𑀕𑀓𑁆𑀔𑀡𑁂.

𑀢𑀢𑀺𑀬𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.