𑁧. 𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀅𑀯𑀸𑀧𑀼𑀭𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀤𑁆𑀯𑀸𑀭𑀁 𑀏𑀢𑁂𑀦𑀸𑀢𑀺 𑀅𑀯𑀸𑀧𑀼𑀭𑀡𑀁. 𑀭𑀚𑀁 𑀳𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀭𑀚𑁄𑀳𑀭𑀡𑀁. 𑀓𑀴𑁄𑀧𑀺𑀳𑀢𑁆𑀣𑁄𑀢𑀺 𑀯𑀺𑀮𑀻𑀯𑀫𑀬𑀪𑀸𑀚𑀦𑀳𑀢𑁆𑀣𑁄, ‘‘𑀘𑀫𑁆𑀫𑀫𑀬𑀪𑀸𑀚𑀦𑀳𑀢𑁆𑀣𑁄’’𑀢𑀺 𑀘 𑀯𑀤𑀦𑁆𑀢𑀺. 𑀙𑀺𑀦𑁆𑀦𑀸𑀦𑀺 𑀯𑀺𑀲𑀸𑀡𑀸𑀦𑀺 𑀏𑀢𑀲𑁆𑀲𑀸𑀢𑀺 𑀙𑀺𑀦𑁆𑀦𑀯𑀺𑀲𑀸𑀡𑁄, 𑀉𑀲𑀪𑁄 𑀘 𑀲𑁄 𑀙𑀺𑀦𑁆𑀦𑀯𑀺𑀲𑀸𑀡𑁄 𑀘𑀸𑀢𑀺 𑀉𑀲𑀪𑀙𑀺𑀦𑁆𑀦𑀯𑀺𑀲𑀸𑀡𑁄. 𑀯𑀺𑀲𑁂𑀲𑀦𑀧𑀭𑁄𑀬𑀁 𑀲𑀫𑀸𑀲𑁄. 𑀅𑀳𑀺𑀓𑀼𑀡𑀧𑁂𑀦 𑀯𑀸𑀢𑀺𑀆𑀤𑀺 𑀅𑀢𑀺𑀚𑁂𑀕𑀼𑀘𑁆𑀙𑀧𑁆𑀧𑀝𑀺𑀓𑀽𑀮𑀓𑀼𑀡𑀧𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦𑀸𑀢𑀺 𑀓𑁂𑀦𑀘𑀺𑀤𑁂𑀯 𑀧𑀘𑁆𑀘𑀢𑁆𑀣𑀺𑀓𑁂𑀦 𑀆𑀦𑁂𑀢𑁆𑀯𑀸 𑀓𑀡𑁆𑀞𑁂 𑀩𑀤𑁆𑀥𑁂𑀦, 𑀑𑀫𑀼𑀓𑁆𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀝𑁄 𑀆𑀢𑀼𑀭𑁄 𑀤𑀼𑀕𑁆𑀕𑀦𑁆𑀥𑀧𑀻𑀴𑀸𑀬 𑀧𑀻𑀴𑀺𑀢𑁄. 𑀅𑀘𑁆𑀘𑀬𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀦𑀁 𑀯𑀸 𑀅𑀥𑀺𑀯𑀸𑀲𑀦𑀁. 𑀏𑀯𑀜𑁆𑀳𑀺 𑀲𑁄 𑀓𑀸𑀭𑀡𑁂 𑀤𑁂𑀲𑀺𑀬𑀫𑀸𑀦𑁂 𑀢𑀢𑁄 𑀯𑀺𑀕𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀕𑁆𑀕𑀡𑁆𑀳𑀢𑀽𑀢𑀺 𑀔𑀫𑀢𑀽’’𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.