𑁭. 𑀫𑀳𑀸𑀯𑀕𑁆𑀕𑁄

𑁧-𑁨. 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁫-𑁬𑁬. 𑀲𑀢𑁆𑀢𑀫𑀲𑁆𑀲 𑀧𑀞𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀤𑀼𑀢𑀺𑀬𑁂 𑀢𑀬𑁄 𑀲𑀁𑀯𑀝𑁆𑀝𑀸𑀢𑀺 𑀆𑀧𑁄𑀲𑀁𑀯𑀝𑁆𑀝𑁄, 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄𑀢𑀺 𑀢𑀬𑁄 𑀲𑀁𑀯𑀝𑁆𑀝𑀸. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸𑀢𑀺 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸. 𑀬𑀤𑀸 𑀳𑀺 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺 𑀯𑀺𑀦𑀲𑁆𑀲𑀢𑀺, 𑀢𑀤𑀸 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀟𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺, 𑀢𑀤𑀸 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀬𑀼𑀦𑀸 𑀲𑀁𑀯𑀝𑁆𑀝𑀢𑀺, 𑀢𑀤𑀸 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀬𑀼𑀦𑀸 𑀯𑀺𑀤𑁆𑀥𑀁𑀲𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀤𑀸𑀧𑀺 𑀏𑀓𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀁 𑀦𑀸𑀫 𑀢𑀺𑀯𑀺𑀥𑀁 𑀳𑁄𑀢𑀺 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀆𑀡𑀸𑀓𑁆𑀔𑁂𑀢𑁆𑀢𑀁 𑀯𑀺𑀲𑀬𑀓𑁆𑀔𑁂𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀦𑀸𑀫 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺, 𑀬𑀁 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑀳𑀡𑀸𑀤𑀻𑀲𑀼 𑀓𑀫𑁆𑀧𑀢𑀺. 𑀆𑀡𑀸𑀓𑁆𑀔𑁂𑀢𑁆𑀢𑀁 𑀓𑁄𑀝𑀺𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁, 𑀬𑀢𑁆𑀣 𑀭𑀢𑀦𑀲𑀼𑀢𑁆𑀢𑀁 (𑀔𑀼. 𑀧𑀸. 𑁬.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁨𑁪 𑀆𑀤𑀬𑁄) 𑀔𑀦𑁆𑀥𑀧𑀭𑀺𑀢𑁆𑀢𑀁 (𑀅. 𑀦𑀺. 𑁪.𑁬𑁭; 𑀘𑀽𑀴𑀯. 𑁨𑁫𑁧) 𑀥𑀚𑀕𑁆𑀕𑀧𑀭𑀺𑀢𑁆𑀢𑀁 (𑀲𑀁. 𑀦𑀺. 𑁧.𑁨𑁪𑁯). 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 (𑀤𑀻. 𑀦𑀺. 𑁩.𑁨𑁭𑁫 𑀆𑀤𑀬𑁄), 𑀫𑁄𑀭𑀧𑀭𑀺𑀢𑁆𑀢𑀦𑁆𑀢𑀺 (𑀚𑀸. 𑁧.𑁨.𑁧𑁭-𑁧𑁮) 𑀇𑀫𑁂𑀲𑀁 𑀧𑀭𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄 𑀯𑀢𑁆𑀢𑀢𑀺. 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁, 𑀬𑀁 ‘‘𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂𑀲𑀼 𑀏𑀓𑀁 𑀆𑀡𑀸𑀓𑁆𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀧𑀦 𑀯𑀺𑀦𑀲𑁆𑀲𑀦𑁆𑀢𑁂 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀯𑀺𑀦𑀝𑁆𑀞𑀫𑁂𑀯 𑀳𑁄𑀢𑀺. 𑀯𑀺𑀦𑀲𑁆𑀲𑀦𑁆𑀢𑀜𑁆𑀘 𑀏𑀓𑀢𑁄𑀯 𑀯𑀺𑀦𑀲𑁆𑀲𑀢𑀺, 𑀲𑀡𑁆𑀞𑀳𑀦𑁆𑀢𑀫𑁆𑀧𑀺 𑀏𑀓𑀢𑁄𑀯 𑀲𑀡𑁆𑀞𑀳𑀢𑀺.

𑀢𑀻𑀡𑀺 𑀲𑀁𑀯𑀝𑁆𑀝𑀫𑀽𑀮𑀸𑀦𑀻𑀢𑀺 𑀭𑀸𑀕𑀤𑁄𑀲𑀫𑁄𑀳𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀲𑀁𑀯𑀝𑁆𑀝𑀓𑀸𑀭𑀡𑀸𑀦𑀺. 𑀭𑀸𑀕𑀸𑀤𑀻𑀲𑀼 𑀳𑀺 𑀅𑀓𑀼𑀲𑀮𑀫𑀽𑀮𑁂𑀲𑀼 𑀉𑀲𑁆𑀲𑀦𑁆𑀦𑁂𑀲𑀼 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺. 𑀢𑀣𑀸 𑀳𑀺 𑀭𑀸𑀕𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺, 𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀉𑀤𑀓𑁂𑀦, 𑀫𑁄𑀳𑁂 𑀉𑀲𑁆𑀲𑀦𑁆𑀦𑀢𑀭𑁂 𑀯𑀸𑀢𑁂𑀦. 𑀓𑁂𑀘𑀺 𑀧𑀦 ‘‘𑀤𑁄𑀲𑁂 𑀉𑀲𑁆𑀲𑀦𑁆𑀦𑀢𑀭𑁂 𑀅𑀕𑁆𑀕𑀺𑀦𑀸, 𑀭𑀸𑀕𑁂 𑀉𑀤𑀓𑁂𑀦𑀸’’𑀢𑀺 𑀯𑀤𑀦𑁆𑀢𑀺.

𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀻𑀢𑀺 𑀓𑀧𑁆𑀧𑀓𑁄𑀮𑀸𑀳𑀮𑀁, 𑀩𑀼𑀤𑁆𑀥𑀓𑁄𑀮𑀸𑀳𑀮𑀁, 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀦𑁆𑀢𑀺 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀺. 𑀢𑀢𑁆𑀣 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀓𑀧𑁆𑀧𑀼𑀝𑁆𑀞𑀸𑀦𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀤𑁂𑀯𑀢𑀸𑀳𑀺 𑀉𑀕𑁆𑀖𑁄𑀲𑀺𑀢𑀲𑀤𑁆𑀤𑁄 𑀓𑀧𑁆𑀧𑀓𑁄𑀮𑀸𑀳𑀮𑀁 𑀦𑀸𑀫 𑀳𑁄𑀢𑀺. ‘‘𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑁂𑀢𑁆𑀢𑀁, 𑀫𑀸𑀭𑀺𑀲𑀸, 𑀪𑀸𑀯𑁂𑀣 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔’’𑀦𑁆𑀢𑀺 𑀫𑀦𑀼𑀲𑁆𑀲𑀧𑀣𑁂 𑀤𑁂𑀯𑀢𑀸 𑀖𑁄𑀲𑀦𑁆𑀢𑀺𑀬𑁄 𑀘𑀭𑀦𑁆𑀢𑀺. ‘‘𑀯𑀲𑁆𑀲𑀲𑀳𑀲𑁆𑀲𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫 𑀳𑁄𑀢𑀺. ‘‘𑀇𑀢𑁄 𑀯𑀲𑁆𑀲𑀲𑀳𑀲𑁆𑀲𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑀭𑀢𑀦𑁂𑀦 𑀧𑀭𑀺𑀯𑀸𑀭𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀢𑀸 𑀉𑀕𑁆𑀖𑁄𑀲𑀦𑁆𑀢𑀺. ‘‘𑀯𑀲𑁆𑀲𑀲𑀢𑀫𑀢𑁆𑀣𑀓𑁂 𑀧𑀦 𑀘𑀓𑁆𑀓𑀯𑀢𑁆𑀢𑀻 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁 𑀦𑀸𑀫 𑀳𑁄𑀢𑀺. ‘‘𑀇𑀢𑁄 𑀯𑀲𑁆𑀲𑀲𑀢𑀫𑀢𑁆𑀣𑀓𑁂 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄 𑀘𑀸𑀢𑀼𑀤𑁆𑀤𑀻𑀧𑀺𑀲𑁆𑀲𑀭𑁄 𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀯𑁂𑀳𑀸𑀲𑀗𑁆𑀕𑀫𑁄 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀢𑀸 𑀉𑀕𑁆𑀖𑁄𑀲𑀦𑁆𑀢𑀺.

𑀅𑀘𑀺𑀭𑀝𑁆𑀞𑁂𑀦 𑀦 𑀥𑀼𑀯𑀸𑀢𑀺 𑀉𑀤𑀓𑀩𑀼𑀩𑁆𑀩𑀼𑀴𑀸𑀤𑀬𑁄 𑀯𑀺𑀬 𑀦 𑀘𑀺𑀭𑀝𑁆𑀞𑀸𑀬𑀺𑀢𑀸𑀬 𑀥𑀼𑀯𑀪𑀸𑀯𑀭𑀳𑀺𑀢𑀸. 𑀅𑀲𑁆𑀲𑀸𑀲𑀭𑀳𑀺𑀢𑀸𑀢𑀺 𑀲𑀼𑀧𑀺𑀦𑀓𑁂 𑀧𑀻𑀢𑀧𑀸𑀦𑀻𑀬𑀁 𑀯𑀺𑀬 𑀅𑀦𑀼𑀮𑀺𑀢𑁆𑀢𑀘𑀦𑁆𑀤𑀦𑀁 𑀯𑀺𑀬 𑀘 𑀅𑀲𑁆𑀲𑀸𑀲𑀯𑀺𑀭𑀳𑀺𑀢𑀸.

𑀉𑀧𑀓𑀧𑁆𑀧𑀦𑀫𑁂𑀖𑁄𑀢𑀺 𑀓𑀧𑁆𑀧𑀯𑀺𑀦𑀸𑀲𑀓𑀫𑁂𑀖𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀓𑀧𑁆𑀧𑁄 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺, 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀏𑀓𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀢𑀺. 𑀫𑀦𑀼𑀲𑁆𑀲𑀸 𑀢𑀼𑀝𑁆𑀞𑀳𑀝𑁆𑀞𑀸 𑀲𑀩𑁆𑀩𑀩𑀻𑀚𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀧𑀦𑁆𑀢𑀺. 𑀲𑀲𑁆𑀲𑁂𑀲𑀼 𑀧𑀦 𑀕𑁄𑀔𑀸𑀬𑀺𑀢𑀓𑀫𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀕𑀤𑁆𑀭𑀪𑀭𑀯𑀁 𑀭𑀯𑀦𑁆𑀢𑁄 𑀏𑀓𑀩𑀺𑀦𑁆𑀤𑀼𑀫𑁆𑀧𑀺 𑀦 𑀯𑀲𑁆𑀲𑀢𑀺, 𑀢𑀤𑀸 𑀧𑀘𑁆𑀙𑀺𑀦𑁆𑀦𑀁 𑀧𑀘𑁆𑀙𑀺𑀦𑁆𑀦𑀫𑁂𑀯 𑀯𑀲𑁆𑀲𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀤𑀸 𑀦𑀺𑀓𑁆𑀔𑀦𑁆𑀢𑀩𑀻𑀚𑀁..𑀧𑁂… 𑀏𑀓𑀩𑀺𑀦𑁆𑀤𑀼𑀫𑁆𑀧𑀺 𑀤𑁂𑀯𑁄 𑀦 𑀯𑀲𑁆𑀲𑀢𑀻’’𑀢𑀺. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲 𑀅𑀘𑁆𑀘𑀬𑁂𑀦 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀤𑁂𑀯𑀢𑀸𑀳𑀺 𑀯𑀼𑀢𑁆𑀢𑀯𑀘𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀘 𑀪𑀼𑀫𑁆𑀫𑀤𑁂𑀯𑀢𑀸 𑀘 𑀲𑀁𑀯𑁂𑀕𑀚𑀸𑀢𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀤𑀼𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀫𑁂𑀢𑁆𑀢𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀻 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀯𑀻𑀘𑀺𑀢𑁄 𑀧𑀝𑁆𑀞𑀸𑀬 𑀢𑀼𑀘𑁆𑀙𑁄 𑀳𑁄𑀢𑀻𑀢𑀺.

𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀻𑀢𑀺 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀦𑁆𑀢𑀺 𑀧𑀜𑁆𑀘 𑀩𑀻𑀚𑀸𑀦𑀺 𑀚𑀸𑀢𑀸𑀦𑀺. 𑀢𑀢𑁆𑀣 𑀫𑀽𑀮𑀩𑀻𑀚𑀦𑁆𑀢𑀺 𑀯𑀘𑀸, 𑀯𑀘𑀢𑁆𑀢𑀁, 𑀳𑀮𑀺𑀤𑁆𑀤𑀁, 𑀲𑀺𑀗𑁆𑀕𑀺𑀯𑁂𑀭𑀦𑁆𑀢𑀺 𑀏𑀯𑀫𑀸𑀤𑀺. 𑀔𑀦𑁆𑀥𑀩𑀻𑀚𑀦𑁆𑀢𑀺 𑀅𑀲𑁆𑀲𑀢𑁆𑀣𑁄, 𑀦𑀺𑀕𑁆𑀭𑁄𑀥𑁄𑀢𑀺 𑀏𑀯𑀫𑀸𑀤𑀺. 𑀨𑀴𑀼𑀩𑀻𑀚𑀦𑁆𑀢𑀺 𑀉𑀘𑁆𑀙𑀼, 𑀯𑁂𑀴𑀼, 𑀦𑀴𑁄𑀢𑀺 𑀏𑀯𑀫𑀸𑀤𑀺. 𑀅𑀕𑁆𑀕𑀩𑀻𑀚𑀦𑁆𑀢𑀺 𑀅𑀚𑁆𑀚𑀼𑀓𑀁, 𑀨𑀡𑀺𑀚𑁆𑀚𑀓𑀦𑁆𑀢𑀺 𑀏𑀯𑀫𑀸𑀤𑀺. 𑀩𑀻𑀚𑀩𑀻𑀚𑀦𑁆𑀢𑀺 𑀯𑀻𑀳𑀺𑀆𑀤𑀺 𑀧𑀼𑀩𑁆𑀩𑀡𑁆𑀡𑀜𑁆𑀘𑁂𑀯 𑀫𑀼𑀕𑁆𑀕𑀫𑀸𑀲𑀸𑀤𑀺𑀅𑀧𑀭𑀡𑁆𑀡𑀜𑁆𑀘. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀭𑀼𑀳𑀦𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚-𑀲𑀤𑁆𑀤𑁄 𑀢𑀤𑀢𑁆𑀣𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀫𑀽𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑀻𑀚𑀩𑀻𑀚’’𑀦𑁆𑀢𑀺 ‘‘𑀭𑀽𑀧𑀭𑀽𑀧𑀁 (𑀯𑀺𑀲𑀼𑀤𑁆𑀥𑀺. 𑁨.𑁪𑁪𑁯) 𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁨𑁭) 𑀬𑀣𑀸. 𑀬𑀣𑀸 𑀨𑀮𑀧𑀸𑀓𑀧𑀭𑀺𑀬𑀦𑁆𑀢𑀸 𑀑𑀲𑀥𑀺𑀭𑀼𑀓𑁆𑀔𑀸 𑀯𑁂𑀴𑀼𑀓𑀤𑀮𑀺𑀆𑀤𑀬𑁄.

𑀬𑀁 𑀓𑀤𑀸𑀘𑀻𑀢𑀺𑀆𑀤𑀻𑀲𑀼 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀤𑀸𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀸𑀮𑁂. 𑀓𑀭𑀳𑀘𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄𑀢𑀺 𑀤𑀻𑀖𑀲𑁆𑀲 𑀓𑀸𑀮𑀲𑁆𑀲. 𑀅𑀘𑁆𑀘𑀬𑁂𑀦𑀸𑀢𑀺 𑀅𑀢𑀺𑀓𑁆𑀓𑀫𑁂𑀦. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀕𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀢𑀢𑀺𑀬𑁂 𑀧𑀘𑁆𑀘𑀦𑁆𑀢𑁂 𑀪𑀯𑀁 𑀧𑀘𑁆𑀘𑀦𑁆𑀢𑀺𑀫𑀁. ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪) 𑀯𑀺𑀬 𑀅𑀮𑀗𑁆𑀓𑀸𑀭𑀯𑀘𑀦𑁄 𑀧𑀭𑀺𑀓𑁆𑀔𑀸𑀭𑀲𑀤𑁆𑀤𑁄𑀢𑀺 𑀆𑀳 ‘‘𑀦𑀕𑀭𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢’’𑀦𑁆𑀢𑀺. 𑀧𑀭𑀺𑀯𑀸𑀭𑀯𑀘𑀦𑁄𑀧𑀺 𑀯𑀝𑁆𑀝𑀢𑀺𑀬𑁂𑀯 ‘‘𑀲𑀢𑁆𑀢 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁩𑁦) 𑀯𑀺𑀬. 𑀦𑁂𑀫𑀁 𑀯𑀼𑀘𑁆𑀘𑀢𑀺 𑀣𑀫𑁆𑀪𑀸𑀤𑀻𑀳𑀺 𑀅𑀦𑀼𑀧𑀢𑀪𑀽𑀫𑀺𑀧𑁆𑀧𑀤𑁂𑀲𑁄𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀆𑀯𑀸𑀝𑀸’’𑀢𑀺, 𑀕𑀫𑁆𑀪𑀻𑀭𑀁 𑀪𑀽𑀫𑀺𑀁 𑀅𑀦𑀼𑀧𑁆𑀧𑀯𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀲𑀼𑀝𑁆𑀞𑀼 𑀲𑀦𑁆𑀦𑀺𑀲𑀻𑀤𑀸𑀧𑀺𑀢𑀸𑀢𑀺 𑀪𑀽𑀫𑀺𑀁 𑀦𑀺𑀔𑀦𑀺𑀢𑁆𑀯𑀸 𑀲𑀫𑁆𑀫𑀤𑁂𑀯 𑀞𑀧𑀺𑀢𑀸.

𑀅𑀦𑀼𑀧𑀭𑀺𑀬𑀸𑀬𑁂𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀧𑀭𑀺𑀬𑀸𑀬𑁄, 𑀲𑁄𑀬𑁂𑀯 𑀧𑀣𑁄𑀢𑀺 𑀅𑀦𑀼𑀧𑀭𑀺𑀬𑀸𑀬𑀧𑀣𑁄, 𑀧𑀭𑀺𑀢𑁄 𑀧𑀸𑀓𑀸𑀭𑀲𑁆𑀲 𑀅𑀦𑀼𑀬𑀸𑀬𑀫𑀕𑁆𑀕𑁄.

𑀳𑀢𑁆𑀣𑀺𑀁 𑀆𑀭𑁄𑀳𑀦𑁆𑀢𑀺 𑀆𑀭𑁄𑀳𑀸𑀧𑀬𑀦𑁆𑀢𑀺 𑀘𑀸𑀢𑀺 𑀳𑀢𑁆𑀣𑀸𑀭𑁄𑀳𑀸 (𑀤𑀻. 𑀦𑀺. 𑀝𑀻. 𑁧.𑁧𑁬𑁩). 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀼𑀭𑀺𑀲𑁄 𑀳𑀢𑁆𑀣𑀺𑀦𑁄 𑀆𑀭𑁄𑀳𑀦𑀬𑁄𑀕𑁆𑀕𑁄 𑀳𑁄𑀢𑀺, 𑀳𑀢𑁆𑀣𑀺𑀲𑁆𑀲 𑀢𑀁 𑀧𑀬𑁄𑀕𑀁 𑀯𑀺𑀥𑀸𑀬𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑁂𑀢𑁂𑀲𑀁 𑀕𑀳𑀡𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀢𑁆𑀣𑀸𑀘𑀭𑀺𑀬𑀸 𑀦𑀸𑀫 𑀬𑁂 𑀳𑀢𑁆𑀣𑀺𑀦𑁄 𑀳𑀢𑁆𑀣𑀸𑀭𑁄𑀳𑀓𑀸𑀦𑀜𑁆𑀘 𑀲𑀺𑀓𑁆𑀔𑀸𑀧𑀓𑀸. 𑀳𑀢𑁆𑀣𑀺𑀯𑁂𑀚𑁆𑀚𑀸 𑀦𑀸𑀫 𑀳𑀢𑁆𑀣𑀺𑀪𑀺𑀲𑀓𑁆𑀓𑀸. 𑀳𑀢𑁆𑀣𑀺𑀩𑀦𑁆𑀥𑀸 𑀦𑀸𑀫 𑀳𑀢𑁆𑀣𑀻𑀦𑀁 𑀧𑀸𑀤𑀭𑀓𑁆𑀔𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀳𑀢𑁆𑀣𑀻𑀦𑀁 𑀬𑀯𑀧𑀤𑀸𑀬𑀓𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀭𑀣𑁂 𑀦𑀺𑀬𑀼𑀢𑁆𑀢𑀸 𑀭𑀣𑀺𑀓𑀸. 𑀭𑀣𑀭𑀓𑁆𑀔𑀸 𑀦𑀸𑀫 𑀭𑀣𑀲𑁆𑀲 𑀆𑀡𑀺𑀭𑀓𑁆𑀔𑀓𑀸. 𑀥𑀦𑀼𑀁 𑀕𑀡𑁆𑀳𑀦𑁆𑀢𑀺 𑀕𑀡𑁆𑀳𑀸𑀧𑁂𑀦𑁆𑀢𑀺 𑀘𑀸𑀢𑀺 𑀥𑀦𑀼𑀕𑁆𑀕𑀳𑀸, 𑀇𑀲𑁆𑀲𑀸𑀲𑀸 𑀥𑀦𑀼𑀲𑀺𑀧𑁆𑀧𑀲𑁆𑀲 𑀲𑀺𑀓𑁆𑀔𑀸𑀧𑀓𑀸 𑀘. 𑀢𑁂𑀦𑀸𑀳 ‘‘𑀥𑀦𑀼𑀆𑀘𑀭𑀺𑀬𑀸 𑀇𑀲𑁆𑀲𑀸𑀲𑀸’’𑀢𑀺. 𑀘𑁂𑀮𑁂𑀦 𑀘𑁂𑀮𑀧𑀝𑀸𑀓𑀸𑀬 𑀬𑀼𑀤𑁆𑀥𑁂 𑀅𑀓𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂𑀮𑀓𑀸𑀢𑀺 𑀆𑀳 𑁋 ‘‘𑀬𑁂 𑀬𑀼𑀤𑁆𑀥𑁂 𑀚𑀬𑀤𑁆𑀥𑀚𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀻’’𑀢𑀺. 𑀬𑀣𑀸 𑀢𑀣𑀸 𑀞𑀺𑀢𑁂 𑀲𑁂𑀦𑀺𑀓𑁂 𑀩𑁆𑀭𑀽𑀳𑀓𑀭𑀡𑀯𑀲𑁂𑀦 𑀢𑀢𑁄 𑀢𑀢𑁄 𑀘𑀮𑀬𑀦𑁆𑀢𑀺 𑀉𑀘𑁆𑀘𑀸𑀮𑁂𑀦𑁆𑀢𑀻𑀢𑀺 𑀘𑀮𑀓𑀸. 𑀲𑀓𑀼𑀡𑀕𑁆𑀖𑀺𑀆𑀤𑀬𑁄 𑀯𑀺𑀬 𑀫𑀁𑀲𑀧𑀺𑀡𑁆𑀟𑀁 𑀧𑀭𑀲𑁂𑀦𑀸𑀲𑀫𑀽𑀳𑀁 𑀲𑀸𑀳𑀲𑀺𑀓𑀫𑀳𑀸𑀬𑁄𑀥𑀢𑀸𑀬 𑀙𑁂𑀢𑁆𑀯𑀸 𑀙𑁂𑀢𑁆𑀯𑀸 𑀤𑀬𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀺𑀡𑁆𑀟𑁂 𑀤𑀬𑀦𑁆𑀢𑀺 𑀚𑀦𑀲𑀫𑁆𑀫𑀤𑁆𑀤𑁂 𑀉𑀧𑁆𑀧𑀢𑀦𑁆𑀢𑀸 𑀯𑀺𑀬 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀕𑁆𑀕𑀢𑀼𑀕𑁆𑀕𑀢𑀸𑀢𑀺 𑀣𑀸𑀫𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀲𑁂𑀦 𑀅𑀢𑀺𑀯𑀺𑀬 𑀉𑀕𑁆𑀕𑀢𑀸, 𑀉𑀤𑀕𑁆𑀕𑀸𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀻𑀭𑀲𑀽𑀭𑀪𑀸𑀯𑁂𑀦 𑀅𑀲𑀚𑁆𑀚𑀫𑀸𑀦𑀸 𑀧𑀭𑀲𑁂𑀦𑀁 𑀅𑀦𑀼𑀧𑀯𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀣𑀸𑀫𑀚𑀯𑀩𑀮𑀧𑀭𑀓𑁆𑀓𑀫𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀸𑀕𑀸 𑀯𑀺𑀬 𑀫𑀳𑀸𑀦𑀸𑀕𑀸. 𑀏𑀓𑀲𑀽𑀭𑀸𑀢𑀺 𑀏𑀓𑀸𑀓𑀺𑀲𑀽𑀭𑀸 𑀅𑀢𑁆𑀢𑀦𑁄 𑀲𑀽𑀭𑀪𑀸𑀯𑁂𑀦𑁂𑀯 𑀏𑀓𑀸𑀓𑀺𑀦𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑀓𑀸. 𑀲𑀚𑀸𑀮𑀺𑀓𑀸𑀢𑀺 𑀲𑀯𑀫𑁆𑀫𑀺𑀓𑀸. 𑀲𑀭𑀧𑀭𑀺𑀢𑁆𑀢𑀸𑀡𑀦𑁆𑀢𑀺 𑀘𑀫𑁆𑀫𑀧𑀭𑀺𑀲𑀺𑀩𑁆𑀩𑀺𑀢𑀁 𑀔𑁂𑀝𑀓𑀁, 𑀘𑀫𑁆𑀫𑀫𑀬𑀁 𑀯𑀸 𑀨𑀮𑀓𑀁. 𑀖𑀭𑀤𑀸𑀲𑀬𑁄𑀥𑀸𑀢𑀺 𑀅𑀢𑁆𑀢𑀦𑁄 𑀤𑀸𑀲𑀬𑁄𑀥𑀸.

𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀏𑀯𑀫𑁂𑀢𑀦𑁆𑀢𑀺 𑀲𑀫𑁆𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸. 𑀲𑀫𑁆𑀧𑀲𑀸𑀤𑀦𑀮𑀓𑁆𑀔𑀡𑀸𑀢𑀺 𑀧𑀲𑀻𑀤𑀺𑀢𑀩𑁆𑀩𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀦𑀮𑀓𑁆𑀔𑀡𑀸. 𑀑𑀓𑀧𑁆𑀧𑀦𑀲𑀤𑁆𑀥𑀸𑀢𑀺 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀦𑀁. 𑀧𑀲𑀸𑀤𑀦𑀻𑀬𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀦𑀁 𑀧𑀲𑀸𑀤𑀲𑀤𑁆𑀥𑀸. 𑀅𑀬𑀁 𑀅𑀦𑀼𑀥𑀫𑁆𑀫𑁄𑀢𑀺 𑀅𑀬𑀁 𑀦𑀯𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑀥𑀫𑁆𑀫𑁄. 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄𑀢𑀺 𑀉𑀓𑁆𑀓𑀡𑁆𑀞𑀦𑀸𑀩𑀳𑀼𑀮𑁄. 𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀦𑁆𑀢𑀺 𑀲𑀤𑁆𑀥𑀸 𑀦𑀸𑀫𑀸𑀬𑀁 𑀲𑀢𑁆𑀢𑀲𑁆𑀲 𑀫𑀭𑀡𑀯𑀲𑁂𑀦 𑀫𑀳𑀸𑀧𑀣𑀁 𑀲𑀁𑀯𑀚𑀢𑁄 𑀫𑀳𑀸𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀢𑁄 𑀫𑀳𑀸𑀯𑀺𑀤𑀼𑀕𑁆𑀕𑀁 𑀧𑀓𑁆𑀔𑀦𑁆𑀤𑀢𑁄 𑀧𑀸𑀣𑁂𑀬𑁆𑀬𑀧𑀼𑀝𑀁 𑀩𑀦𑁆𑀥𑀢𑀺, 𑀲𑀫𑁆𑀩𑀮𑀁 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀜𑁆𑀳𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬’’𑀦𑁆𑀢𑀺. 𑀲𑀺𑀭𑀻𑀢𑀺 𑀇𑀲𑁆𑀲𑀭𑀺𑀬𑀁. 𑀇𑀲𑁆𑀲𑀭𑀺𑀬𑁂 𑀳𑀺 𑀅𑀪𑀺𑀫𑀼𑀔𑀻𑀪𑀽𑀢𑁂 𑀣𑀮𑀢𑁄𑀧𑀺 𑀚𑀮𑀢𑁄𑀧𑀺 𑀪𑁄𑀕𑀸 𑀆𑀕𑀘𑁆𑀙𑀦𑁆𑀢𑀺𑀬𑁂𑀯. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀲𑀺𑀭𑀻 𑀪𑁄𑀕𑀸𑀦𑀫𑀸𑀲𑀬𑁄’’𑀢𑀺. 𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀻𑀢𑀺 𑀧𑀼𑀭𑀺𑀲𑀲𑁆𑀲 𑀤𑁂𑀯𑀮𑁄𑀓𑁂, 𑀫𑀦𑀼𑀲𑁆𑀲𑀮𑁄𑀓𑁂 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀲𑁆𑀲 𑀲𑀤𑁆𑀥𑀸 𑀤𑀼𑀢𑀺𑀬𑀸 𑀳𑁄𑀢𑀺, 𑀲𑀳𑀸𑀬𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀪𑀢𑁆𑀢𑀧𑀼𑀝𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑀼𑀢𑀺𑀬𑀺𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀦𑁂𑀓𑀲𑀭𑀲𑀢𑀸𑀢𑀺 𑀅𑀦𑁂𑀓𑀲𑀪𑀸𑀯𑀢𑀸, 𑀅𑀦𑁂𑀓𑀓𑀺𑀘𑁆𑀘𑀢𑀸 𑀯𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀕𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀥𑀫𑁆𑀫𑀜𑁆𑀜𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀘𑀢𑀼𑀢𑁆𑀣𑁂 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀥𑀫𑁆𑀫𑀁 𑀚𑀸𑀦𑀸𑀢𑀻𑀢𑀺 𑀥𑀫𑁆𑀫𑀜𑁆𑀜𑀽. 𑀢𑀲𑁆𑀲 𑀢𑀲𑁆𑀲𑁂𑀯 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀦𑀸 𑀪𑀸𑀲𑀺𑀢𑀲𑁆𑀲 𑀢𑀤𑀜𑁆𑀜𑀲𑁆𑀲 𑀲𑀼𑀢𑁆𑀢𑀧𑀤𑀢𑁆𑀣𑀲𑁆𑀲 𑀩𑁄𑀥𑀓𑀲𑁆𑀲 𑀲𑀤𑁆𑀤𑀲𑁆𑀲 𑀅𑀢𑁆𑀣𑀓𑀼𑀲𑀮𑀢𑀸𑀯𑀲𑁂𑀦 𑀅𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑀜𑁆𑀜𑀽. ‘‘𑀏𑀢𑁆𑀢𑀓𑁄𑀫𑁆𑀳𑀺 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬𑀸’’𑀢𑀺 𑀏𑀯𑀁 𑀬𑀣𑀸 𑀅𑀢𑁆𑀢𑀦𑁄 𑀧𑀫𑀸𑀡𑀚𑀸𑀦𑀦𑀯𑀲𑁂𑀦 𑀅𑀢𑁆𑀢𑀸𑀦𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀢𑀜𑁆𑀜𑀽. 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀧𑀭𑀺𑀬𑁂𑀲𑀦𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀫𑀢𑁆𑀢𑀁 𑀚𑀸𑀦𑀸𑀢𑀻𑀢𑀺 𑀫𑀢𑁆𑀢𑀜𑁆𑀜𑀽. 𑀦𑀺𑀤𑁆𑀤𑁂𑀲𑁂 𑀧𑀦 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀜𑁆𑀜𑀼𑀢𑀸𑀬 𑀏𑀯 𑀧𑀭𑀺𑀪𑁄𑀕𑀸𑀤𑀺𑀫𑀢𑁆𑀢𑀜𑁆𑀜𑀼𑀢𑀸 𑀧𑀩𑁄𑀥𑀺𑀢𑀸 𑀳𑁄𑀢𑀻𑀢𑀺 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀜𑁆𑀜𑀼𑀢𑀸𑀯 𑀤𑀲𑁆𑀲𑀺𑀢𑀸. ‘‘𑀅𑀬𑀁 𑀓𑀸𑀮𑁄 𑀉𑀤𑁆𑀤𑁂𑀲𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀭𑀺𑀧𑀼𑀘𑁆𑀙𑀸𑀬, 𑀅𑀬𑀁 𑀓𑀸𑀮𑁄 𑀬𑁄𑀕𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺 𑀏𑀯𑀁 𑀓𑀸𑀮𑀁 𑀚𑀸𑀦𑀸𑀢𑀻𑀢𑀺 𑀓𑀸𑀮𑀜𑁆𑀜𑀽. 𑀢𑀢𑁆𑀣 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀉𑀤𑁆𑀤𑁂𑀲𑀲𑁆𑀲 𑀓𑀸𑀮𑁄, 𑀤𑀲 𑀧𑀭𑀺𑀧𑀼𑀘𑁆𑀙𑀸𑀬, 𑀇𑀤𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀅𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀢𑀸𑀯𑀢𑀸 𑀓𑀸𑀮𑁂𑀦 𑀢𑀻𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀲 𑀯𑀲𑁆𑀲𑀸𑀦𑀺 𑀉𑀤𑁆𑀤𑁂𑀲𑀲𑁆𑀲 𑀓𑀸𑀮𑁄, 𑀯𑀻𑀲𑀢𑀺 𑀧𑀭𑀺𑀧𑀼𑀘𑁆𑀙𑀸𑀬, 𑀢𑀢𑁄 𑀧𑀭𑀁 𑀬𑁄𑀕𑁂 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀔𑀢𑁆𑀢𑀺𑀬𑀧𑀭𑀺𑀲𑀸𑀤𑀺𑀓𑀁 𑀅𑀝𑁆𑀞𑀯𑀺𑀥𑀁 𑀧𑀭𑀺𑀲𑀁 𑀚𑀸𑀦𑀸𑀢𑀻𑀢𑀺 𑀧𑀭𑀺𑀲𑀜𑁆𑀜𑀽. 𑀪𑀺𑀓𑁆𑀔𑀼𑀧𑀭𑀺𑀲𑀸𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀁, 𑀔𑀢𑁆𑀢𑀺𑀬𑀧𑀭𑀺𑀲𑀸𑀤𑀺𑀓𑀁 𑀫𑀦𑀼𑀲𑁆𑀲𑀧𑀭𑀺𑀲𑀁𑀬𑁂𑀯 𑀧𑀼𑀦 𑀘𑀢𑀼𑀩𑁆𑀩𑀺𑀥𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀯𑀺𑀥𑀁 𑀯𑀤𑀦𑁆𑀢𑀺 𑀅𑀧𑀭𑁂. 𑀦𑀺𑀤𑁆𑀤𑁂𑀲𑁂 𑀧𑀦𑀲𑁆𑀲 𑀔𑀢𑁆𑀢𑀺𑀬𑀧𑀭𑀺𑀲𑀸𑀤𑀺𑀘𑀢𑀼𑀩𑁆𑀩𑀺𑀥𑀧𑀭𑀺𑀲𑀕𑁆𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. ‘‘𑀇𑀫𑀁 𑀫𑁂 𑀲𑁂𑀯𑀦𑁆𑀢𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀅𑀬𑀁 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄, 𑀯𑀺𑀧𑀭𑀺𑀬𑀸𑀬𑀢𑁄 𑀅𑀜𑁆𑀜𑁄 𑀅𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀧𑀼𑀕𑁆𑀕𑀮𑀁 𑀚𑀸𑀦𑀸𑀢𑀻𑀢𑀺 𑀧𑀼𑀕𑁆𑀕𑀮𑀧𑀭𑁄𑀧𑀭𑀜𑁆𑀜𑀽. 𑀏𑀯𑀜𑁆𑀳𑀺 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀭𑁄𑀧𑀭𑀁 𑀉𑀓𑁆𑀓𑀝𑁆𑀞𑀦𑀺𑀳𑀻𑀦𑀢𑀁 𑀚𑀸𑀦𑀸𑀢𑀺 𑀦𑀸𑀫. 𑀦𑀺𑀤𑁆𑀤𑁂𑀲𑁂𑀧𑀺𑀲𑁆𑀲 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀧𑀼𑀕𑁆𑀕𑀮𑁂 𑀯𑀺𑀪𑀸𑀯𑀦𑀫𑁂𑀯 𑀲𑀫𑀡𑀓𑀣𑀸𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀥𑀫𑁆𑀫𑀜𑁆𑀜𑀽𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁯-𑁭𑁦. 𑀧𑀜𑁆𑀘𑀫𑁂 𑀧𑀢𑀺𑀢𑀧𑀮𑀸𑀲𑁄𑀢𑀺 𑀧𑀢𑀺𑀢𑀧𑀢𑁆𑀢𑁄. 𑀏𑀢𑁆𑀣 𑀧𑀞𑀫𑀁 𑀧𑀡𑁆𑀟𑀼𑀧𑀮𑀸𑀲𑀢𑀁, 𑀤𑀼𑀢𑀺𑀬𑀁 𑀧𑀦𑁆𑀦𑀧𑀮𑀸𑀲𑀢𑀜𑁆𑀘 𑀯𑀢𑁆𑀯𑀸 𑀢𑀢𑀺𑀬𑀁 𑀚𑀸𑀮𑀓𑀚𑀸𑀢𑀢𑀸, 𑀘𑀢𑀼𑀢𑁆𑀣𑀁 𑀔𑀸𑀭𑀓𑀚𑀸𑀢𑀢𑀸 𑀘 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁯𑁪) 𑀇𑀫𑀫𑁂𑀯 𑀧𑀸𑀴𑀺𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁂𑀦 𑀧𑀞𑀫𑀁 𑀧𑀡𑁆𑀟𑀼𑀧𑀮𑀸𑀲𑀢𑀁, 𑀤𑀼𑀢𑀺𑀬𑀁 𑀧𑀦𑁆𑀦𑀧𑀮𑀸𑀲𑀢𑀜𑁆𑀘 𑀯𑀢𑁆𑀯𑀸 𑀢𑀢𑀺𑀬𑀁 𑀔𑀸𑀭𑀓𑀚𑀸𑀢𑀢𑀸, 𑀘𑀢𑀼𑀢𑁆𑀣𑀁 𑀚𑀸𑀮𑀓𑀚𑀸𑀢𑀢𑀸 𑀘 𑀤𑀲𑁆𑀲𑀺𑀢𑀸. 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑁋 ‘‘𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀧𑀼𑀧𑁆𑀨𑀫𑀸𑀦𑁂 𑀏𑀓𑀁 𑀯𑀲𑁆𑀲𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑁂 𑀢𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀪𑀸𑀯𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄, 𑀧𑀡𑁆𑀟𑀼𑀧𑀮𑀸𑀲𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 ‘𑀧𑀡𑁆𑀟𑀼𑀧𑀮𑀸𑀲𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀓𑁄𑀯𑀺𑀴𑀸𑀭𑁄, 𑀦 𑀘𑀺𑀭𑀲𑁆𑀲𑁂𑀯 𑀧𑀦𑁆𑀦𑀧𑀮𑀸𑀲𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀓𑁄𑀯𑀺𑀴𑀸𑀭𑁄, 𑀧𑀦𑁆𑀦𑀧𑀮𑀸𑀲𑁄 𑀳𑁄𑀢𑀺, 𑀚𑀸𑀮𑀓𑀚𑀸𑀢𑁄 𑀳𑁄𑀢𑀺, 𑀔𑀸𑀭𑀓𑀚𑀸𑀢𑁄 𑀳𑁄𑀢𑀺, 𑀓𑀼𑀝𑀼𑀫𑀮𑀓𑀚𑀸𑀢𑁄 𑀳𑁄𑀢𑀺, 𑀓𑁄𑀭𑀓𑀚𑀸𑀢𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 ‘𑀓𑁄𑀭𑀓𑀚𑀸𑀢𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄, 𑀦 𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀪𑀯𑀺𑀲𑁆𑀲𑀢𑀻’𑀢𑀺.

𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀫𑁆𑀧𑀺 (𑀤𑀻. 𑀦𑀺. 𑀝𑀻. 𑁨.𑁨𑁯𑁪) 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑁋 𑀧𑀦𑁆𑀦𑀧𑀮𑀸𑀲𑁄𑀢𑀺 𑀧𑀢𑀺𑀢𑀧𑀢𑁆𑀢𑁄. 𑀔𑀸𑀭𑀓𑀚𑀸𑀢𑁄𑀢𑀺 𑀚𑀸𑀢𑀔𑀼𑀤𑁆𑀤𑀓𑀫𑀓𑀼𑀴𑁄. 𑀬𑁂 𑀳𑀺 𑀦𑀻𑀮𑀧𑀢𑁆𑀢𑀓𑀸 𑀅𑀢𑀺𑀯𑀺𑀬 𑀔𑀼𑀤𑁆𑀤𑀓𑀸 𑀫𑀓𑀼𑀴𑀸, 𑀢𑁂 ‘‘𑀔𑀸𑀭𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀚𑀸𑀮𑀓𑀚𑀸𑀢𑁄𑀢𑀺 𑀢𑁂𑀳𑀺𑀬𑁂𑀯 𑀔𑀼𑀤𑁆𑀤𑀓𑀫𑀓𑀼𑀴𑁂𑀳𑀺 𑀚𑀸𑀢𑀚𑀸𑀮𑀓𑁄 𑀲𑀩𑁆𑀩𑀲𑁄 𑀚𑀸𑀮𑁄 𑀯𑀺𑀬 𑀚𑀸𑀢𑁄. 𑀓𑁂𑀘𑀺 𑀧𑀦 ‘‘𑀚𑀸𑀮𑀓𑀚𑀸𑀢𑁄𑀢𑀺 𑀏𑀓𑀚𑀸𑀮𑁄 𑀯𑀺𑀬 𑀚𑀸𑀢𑁄’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑀺𑀭 𑀔𑀸𑀭𑀓𑀕𑁆𑀕𑀳𑀡𑀓𑀸𑀮𑁂 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀮𑁆𑀮𑀯𑀺𑀓𑁄 𑀳𑁄𑀢𑀺, 𑀢𑁂 𑀘𑀲𑁆𑀲 𑀧𑀮𑁆𑀮𑀯𑀸 𑀧𑀪𑀲𑁆𑀲𑀭𑀧𑀯𑀸𑀴𑀯𑀡𑁆𑀡𑀲𑀫𑀼𑀚𑁆𑀚𑀮𑀸 𑀳𑁄𑀦𑁆𑀢𑀺. 𑀢𑁂𑀦 𑀲𑁄 𑀲𑀩𑁆𑀩𑀲𑁄 𑀲𑀫𑀼𑀚𑁆𑀚𑀮𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀓𑀼𑀝𑀼𑀫𑀮𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀫𑀳𑀸𑀫𑀓𑀼𑀴𑁄. 𑀓𑁄𑀭𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀲𑀽𑀘𑀺𑀪𑁂𑀤𑁄 𑀲𑀫𑁆𑀧𑀢𑀺𑀯𑀺𑀓𑀲𑀫𑀸𑀦𑀸𑀯𑀢𑁆𑀣𑁄. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄𑀢𑀺 𑀲𑀩𑁆𑀩𑀲𑁄 𑀨𑀼𑀮𑁆𑀮𑀺𑀢𑀯𑀺𑀓𑀲𑀺𑀢𑁄𑀢𑀺. 𑀅𑀬𑀜𑁆𑀘 𑀅𑀦𑀼𑀓𑁆𑀓𑀫𑁄 𑀤𑀻𑀖𑀪𑀸𑀡𑀓𑀸𑀦𑀁 𑀯𑀴𑀜𑁆𑀚𑀦𑀸𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑀺𑀢𑁄, 𑀦 𑀏𑀢𑁆𑀣 𑀆𑀘𑀭𑀺𑀬𑀲𑁆𑀲 𑀯𑀺𑀭𑁄𑀥𑁄 𑀆𑀲𑀗𑁆𑀓𑀺𑀢𑀩𑁆𑀩𑁄.

𑀓𑀦𑁆𑀢𑀦𑀓𑀯𑀸𑀢𑁄𑀢𑀺 𑀤𑁂𑀯𑀸𑀦𑀁 𑀧𑀼𑀜𑁆𑀜𑀓𑀫𑁆𑀫𑀧𑀘𑁆𑀘𑀬𑀸 𑀧𑀼𑀧𑁆𑀨𑀸𑀦𑀁 𑀙𑀺𑀦𑁆𑀤𑀦𑀓𑀯𑀸𑀢𑁄. 𑀓𑀦𑁆𑀢𑀢𑀻𑀢𑀺 𑀙𑀺𑀦𑁆𑀤𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀓𑀯𑀸𑀢𑁄𑀢𑀺 𑀙𑀺𑀦𑁆𑀦𑀸𑀦𑀁 𑀙𑀺𑀦𑁆𑀦𑀸𑀦𑀁 𑀧𑀼𑀧𑁆𑀨𑀸𑀦𑀁 𑀲𑀫𑁆𑀧𑀝𑀺𑀕𑁆𑀕𑀡𑁆𑀳𑀓𑀯𑀸𑀢𑁄. 𑀘𑀺𑀦𑀦𑁆𑀢𑁄𑀢𑀺 𑀦𑀸𑀦𑀸𑀯𑀺𑀥𑀪𑀢𑁆𑀢𑀺𑀲𑀦𑁆𑀦𑀺𑀯𑁂𑀲𑀯𑀲𑁂𑀦 𑀦𑀺𑀘𑀺𑀦𑀁 𑀓𑀭𑁄𑀦𑁆𑀢𑁄. 𑀅𑀜𑁆𑀜𑀢𑀭𑀤𑁂𑀯𑀢𑀸𑀦𑀦𑁆𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑀜𑁆𑀜𑀸𑀢𑀤𑁂𑀯𑀢𑀸𑀦𑀁. 𑀭𑁂𑀡𑀼𑀯𑀝𑁆𑀝𑀻𑀢𑀺 𑀭𑁂𑀡𑀼𑀲𑀗𑁆𑀖𑀸𑀢𑁄. 𑀓𑀡𑁆𑀡𑀺𑀓𑀁 𑀆𑀳𑀘𑁆𑀘𑀸𑀢𑀺 𑀲𑀼𑀥𑀫𑁆𑀫𑀸𑀬 𑀓𑀽𑀝𑀁 𑀆𑀳𑀦𑁆𑀢𑁆𑀯𑀸.

𑀅𑀦𑀼𑀨𑀭𑀡𑀸𑀦𑀼𑀪𑀸𑀯𑁄𑀢𑀺 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀅𑀦𑀼𑀨𑀭𑀡𑀲𑀗𑁆𑀔𑀸𑀢𑁄 𑀆𑀦𑀼𑀪𑀸𑀯𑁄. 𑀧𑀩𑁆𑀩𑀚𑁆𑀚𑀸𑀦𑀺𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀧𑀩𑁆𑀩𑀚𑁆𑀚𑀸𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑁆𑀧𑀺 𑀤𑀲𑁆𑀲𑀺𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀞𑀫𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀉𑀪𑀬𑀢𑁄 𑀧𑀭𑀺𑀘𑁆𑀙𑁂𑀤𑁄 𑀳𑁂𑀝𑁆𑀞𑀸 𑀲𑀻𑀮𑀢𑁄 𑀉𑀧𑀭𑀺 𑀅𑀭𑀳𑀢𑁆𑀢𑀢𑁄 𑀘 𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀏𑀢𑀁 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀩𑁆𑀩𑀚𑁆𑀚𑀸𑀦𑀺𑀲𑁆𑀲𑀺𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀲𑀢𑁆𑀢𑀫𑁂 𑀅𑀢𑁆𑀣𑀲𑁆𑀲 𑀅𑀲𑀸𑀥𑀺𑀓𑀸 ‘‘𑀪𑀸𑀯𑀦𑀁 𑀅𑀦𑀦𑀼𑀬𑀼𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑀫𑁆𑀪𑀸𑀯𑀦𑀢𑁆𑀣𑁂𑀢𑀺 ‘‘𑀅𑀧𑀺 𑀦𑀸𑀫 𑀏𑀯𑀁 𑀲𑀺𑀬𑀸’’𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁄 𑀲𑀫𑁆𑀪𑀸𑀯𑀦𑀢𑁆𑀣𑁄. 𑀏𑀯𑀜𑁆𑀳𑀺 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀻𑀢𑀺 𑀏𑀓𑀫𑁂𑀯 𑀲𑀗𑁆𑀔𑀁 𑀅𑀯𑀢𑁆𑀯𑀸 𑀅𑀧𑀭𑀸𑀬 𑀲𑀗𑁆𑀔𑀸𑀬 𑀲𑀤𑁆𑀥𑀺𑀁 𑀯𑀘𑀦𑀁 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀺 𑀬𑀣𑀸 ‘‘𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀉𑀤𑀓𑀨𑀼𑀲𑀺𑀢𑀸𑀦𑀻’’𑀢𑀺. 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀧𑀸𑀤𑀸𑀤𑀻𑀳𑀺 𑀅𑀢𑁆𑀢𑀦𑀸 𑀦𑁂𑀲𑀁 𑀓𑀺𑀜𑁆𑀘𑀺 𑀉𑀧𑀖𑀸𑀢𑀁 𑀅𑀓𑀭𑁄𑀦𑁆𑀢𑀺𑀬𑀸 𑀩𑀳𑀺𑀯𑀸𑀢𑀸𑀤𑀺𑀧𑀭𑀺𑀲𑁆𑀲𑀬𑀧𑀭𑀺𑀳𑀭𑀡𑀢𑁆𑀣𑀁 𑀲𑀫𑁆𑀫𑀤𑁂𑀯 𑀉𑀧𑀭𑀺 𑀲𑀬𑀺𑀢𑀸𑀦𑀺. 𑀉𑀧𑀭𑀺𑀅𑀢𑁆𑀣𑁄 𑀳𑁂𑀢𑁆𑀣 𑀅𑀥𑀺-𑀲𑀤𑁆𑀤𑁄. 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸𑀢𑀺 𑀢𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀢𑁆𑀣𑀁 𑀅𑀢𑁆𑀢𑀦𑁄 𑀓𑀸𑀬𑀼𑀲𑁆𑀫𑀸𑀯𑀲𑁂𑀦 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸. 𑀢𑁂𑀦𑀸𑀳 ‘‘𑀉𑀲𑁆𑀫𑀻𑀓𑀢𑀸𑀦𑀻’’𑀢𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀲𑀫𑁆𑀫𑀤𑁂𑀯 𑀲𑀩𑁆𑀩𑀲𑁄 𑀓𑀼𑀓𑁆𑀓𑀼𑀝𑀯𑀸𑀲𑀦𑀸𑀬 𑀯𑀸𑀲𑀺𑀢𑀸𑀦𑀺. 𑀢𑁂𑀦𑀸𑀳 ‘‘𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻’’𑀢𑀺. 𑀏𑀢𑁆𑀣 𑀘 𑀲𑀫𑁆𑀫𑀸𑀧𑀭𑀺𑀲𑁂𑀤𑀦𑀁 𑀓𑀼𑀓𑁆𑀓𑀼𑀝𑀕𑀦𑁆𑀥𑀧𑀭𑀺𑀪𑀸𑀯𑀦𑀜𑁆𑀘 𑀲𑀫𑁆𑀫𑀸𑀅𑀥𑀺𑀲𑀬𑀦𑀲𑀫𑁆𑀫𑀸𑀧𑀭𑀺𑀲𑁂𑀤𑀦𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀦𑀼𑀪𑀸𑀯𑀦𑀺𑀧𑁆𑀨𑀸𑀤𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀫𑀸𑀅𑀥𑀺𑀲𑀬𑀦𑁂𑀦𑁂𑀯 𑀳𑀺 𑀇𑀢𑀭𑀤𑁆𑀯𑀬𑀁 𑀇𑀚𑁆𑀛𑀢𑀺. 𑀦 𑀳𑀺 𑀲𑀫𑁆𑀫𑀸𑀅𑀥𑀺𑀲𑀬𑀦𑀢𑁄 𑀯𑀺𑀲𑀼𑀁 𑀲𑀫𑁆𑀫𑀸𑀧𑀭𑀺𑀲𑁂𑀤𑀦𑀲𑁆𑀲 𑀲𑀫𑁆𑀫𑀸𑀧𑀭𑀺𑀪𑀸𑀯𑀦𑀲𑁆𑀲 𑀘 𑀓𑀸𑀭𑀡𑀁 𑀅𑀢𑁆𑀣𑀺. 𑀢𑁂𑀦 𑀧𑀦 𑀲𑀤𑁆𑀥𑀺𑀁𑀬𑁂𑀯 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀇𑀚𑁆𑀛𑀦𑀢𑁄 𑀯𑀼𑀢𑁆𑀢𑀁.

𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦𑀸𑀢𑀺 𑀲𑀫𑁆𑀫𑀸𑀅𑀥𑀺𑀲𑀬𑀦𑀸𑀤𑀺𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 ‘‘𑀏𑀯𑀁 𑀅𑀳𑁄 𑀯𑀢 𑀫𑁂’’𑀢𑀺𑀆𑀤𑀺𑀦𑀸 𑀦 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀓𑀸𑀭𑀡𑀲𑁆𑀲 𑀧𑀦 𑀲𑀫𑁆𑀧𑀸𑀤𑀺𑀢𑀢𑁆𑀢𑀸, 𑀅𑀣 𑀔𑁄 𑀪𑀩𑁆𑀩𑀸𑀯 𑀢𑁂 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀪𑀩𑁆𑀩𑀸𑀢𑀺 𑀆𑀳 ‘‘𑀢𑁂 𑀳𑀺 𑀬𑀲𑁆𑀫𑀸 𑀢𑀸𑀬𑀸’’𑀢𑀺𑀆𑀤𑀺. 𑀲𑀬𑀫𑁆𑀧𑀻𑀢𑀺 𑀅𑀡𑁆𑀟𑀸𑀦𑀺. 𑀧𑀭𑀺𑀡𑀸𑀫𑀦𑁆𑀢𑀺 𑀧𑀭𑀺𑀧𑀸𑀓𑀁 𑀩𑀳𑀺𑀦𑀺𑀓𑁆𑀔𑀫𑀦𑀬𑁄𑀕𑁆𑀬𑀢𑀁. 𑀬𑀣𑀸 𑀓𑀧𑀸𑀮𑀲𑁆𑀲 𑀢𑀦𑀼𑀢𑀸 𑀆𑀮𑁄𑀓𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀫𑀸𑀦𑀲𑁆𑀲 𑀓𑀸𑀭𑀡𑀁, 𑀢𑀣𑀸 𑀓𑀧𑀸𑀮𑀲𑁆𑀲 𑀢𑀦𑀼𑀢𑀸𑀬 𑀦𑀔𑀲𑀺𑀔𑀸𑀫𑀼𑀔𑀢𑀼𑀡𑁆𑀟𑀓𑀸𑀦𑀁 𑀔𑀭𑀢𑀸𑀬 𑀘 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀫𑀸𑀢𑀺 𑀆𑀮𑁄𑀓𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀫𑀸𑀦𑀢𑁄 𑀲𑀬𑀜𑁆𑀘 𑀧𑀭𑀺𑀧𑀸𑀓𑀕𑀢𑀢𑁆𑀢𑀸.

𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀦𑁆𑀢𑀺 𑀑𑀧𑀫𑁆𑀫𑀢𑁆𑀣𑀲𑁆𑀲 𑀉𑀧𑀫𑁂𑀬𑁆𑀬𑁂𑀦 𑀲𑀫𑁆𑀫𑀤𑁂𑀯 𑀧𑀝𑀺𑀧𑀸𑀤𑀦𑀁. 𑀢𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀅𑀢𑁆𑀣𑁂𑀦𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀲𑀳 𑀬𑁄𑀚𑁂𑀢𑁆𑀯𑀸. 𑀲𑀫𑁆𑀧𑀸𑀤𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀜𑀸𑀡𑀲𑁆𑀲 𑀢𑀺𑀓𑁆𑀔𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀜𑀸𑀡𑀲𑁆𑀲 𑀳𑀺 𑀲𑀪𑀸𑀯𑀢𑁄 𑀲𑀢𑀺𑀦𑁂𑀧𑀓𑁆𑀓𑀢𑁄 𑀘 𑀢𑀺𑀓𑁆𑀔𑀪𑀸𑀯𑁄, 𑀲𑀫𑀸𑀥𑀺𑀯𑀲𑁂𑀦 𑀔𑀭𑀪𑀸𑀯𑁄, 𑀲𑀤𑁆𑀥𑀸𑀯𑀲𑁂𑀦 𑀯𑀺𑀧𑁆𑀧𑀲𑀦𑁆𑀦𑀪𑀸𑀯𑁄. 𑀧𑀭𑀺𑀡𑀸𑀫𑀓𑀸𑀮𑁄𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀓𑀸𑀮𑁄. 𑀯𑀟𑁆𑀠𑀺𑀓𑀸𑀮𑁄𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀓𑀸𑀮𑁄. 𑀅𑀦𑀼𑀮𑁄𑀫𑀝𑁆𑀞𑀸𑀦𑀺𑀬𑀸 𑀳𑀺 𑀯𑀺𑀧𑀲𑁆𑀲𑀦𑀸 𑀕𑀳𑀺𑀢𑀕𑀩𑁆𑀪𑀸 𑀦𑀸𑀫 𑀢𑀤𑀸 𑀫𑀕𑁆𑀕𑀕𑀩𑁆𑀪𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀢𑀚𑁆𑀚𑀸𑀢𑀺𑀓𑀦𑁆𑀢𑀺 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀭𑀽𑀧𑀁. 𑀲𑀢𑁆𑀣𑀸𑀧𑀺 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀳𑀭𑀢𑀺, 𑀤𑁂𑀲𑀦𑀸𑀧𑀺 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑀕𑀢𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀳𑀭𑀢𑀺, 𑀬𑀣𑀸𑀞𑀸𑀦𑁂 𑀞𑀸𑀢𑀼𑀁 𑀦 𑀤𑁂𑀢𑀺.

𑀑𑀮𑀫𑁆𑀩𑀓𑀲𑀗𑁆𑀔𑀸𑀢𑀦𑁆𑀢𑀺 𑀑𑀮𑀫𑁆𑀩𑀓𑀲𑀼𑀢𑁆𑀢𑀲𑀗𑁆𑀔𑀸𑀢𑀁. ‘‘𑀧𑀮’’𑀦𑁆𑀢𑀺 𑀳𑀺 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀸𑀫𑀁. 𑀘𑀸𑀭𑁂𑀢𑁆𑀯𑀸 𑀤𑀸𑀭𑀼𑀦𑁄 𑀳𑁂𑀝𑁆𑀞𑀸 𑀤𑁄𑀲𑀚𑀸𑀦𑀦𑀢𑁆𑀣𑀁 𑀉𑀲𑁆𑀲𑀸𑀧𑁂𑀢𑁆𑀯𑀸. 𑀕𑀡𑁆𑀟𑀁 𑀳𑀭𑀢𑀻𑀢𑀺 𑀧𑀮𑀕𑀡𑁆𑀟𑁄𑀢𑀺 𑀏𑀢𑁂𑀦 ‘‘𑀧𑀮𑁂𑀦 𑀕𑀡𑁆𑀟𑀳𑀸𑀭𑁄 𑀧𑀮𑀕𑀡𑁆𑀟𑁄𑀢𑀺 𑀧𑀘𑁆𑀙𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄’’𑀢𑀺 𑀤𑀲𑁆𑀲𑁂𑀢𑀺. 𑀕𑀳𑀡𑀝𑁆𑀞𑀸𑀦𑁂𑀢𑀺 𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑁂. 𑀲𑀫𑁆𑀫𑀤𑁂𑀯 𑀔𑀺𑀧𑀻𑀬𑀦𑁆𑀢𑀺 𑀏𑀢𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀻𑀢𑀺 𑀲𑀗𑁆𑀔𑁂𑀧𑁄, 𑀧𑀩𑁆𑀩𑀚𑁆𑀚𑀸𑀯 𑀲𑀗𑁆𑀔𑁂𑀧𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁄. 𑀢𑁂𑀦 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀬𑁄 𑀇𑀥 𑀯𑀺𑀧𑀲𑁆𑀲𑀦𑀸𑀦𑀺𑀲𑀁𑀲𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀳𑁂𑀫𑀦𑁆𑀢𑀺𑀓𑁂𑀦 𑀓𑀸𑀭𑀡𑀪𑀽𑀢𑁂𑀦, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀓𑀭𑀡𑀯𑀘𑀦𑀁, 𑀳𑁂𑀫𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀨𑀮𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀽𑀢𑀺𑀓𑀸𑀦𑀺 𑀪𑀯𑀦𑁆𑀢𑀻’’𑀢𑀺. 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀲𑀸𑀲𑀦𑀁 𑀅𑀕𑀸𑀥𑀕𑀫𑁆𑀪𑀻𑀭𑀪𑀸𑀯𑀢𑁄. 𑀦𑀸𑀯𑀸 𑀯𑀺𑀬 𑀬𑁄𑀕𑀸𑀯𑀘𑀭𑁄 𑀫𑀳𑁄𑀖𑀼𑀢𑁆𑀢𑀭𑀢𑁄. 𑀧𑀭𑀺𑀬𑀸𑀬𑀦𑀁 𑀯𑀺𑀬𑀸𑀢𑀺 𑀧𑀭𑀺𑀢𑁄 𑀅𑀧𑀭𑀸𑀧𑀭𑀁 𑀬𑀸𑀬𑀦𑀁 𑀯𑀺𑀬. 𑀔𑀚𑁆𑀚𑀫𑀸𑀦𑀸𑀦𑀦𑁆𑀢𑀺 𑀔𑀸𑀤𑀦𑁆𑀢𑁂𑀦 𑀯𑀺𑀬 𑀉𑀤𑀓𑁂𑀦 𑀔𑁂𑀧𑀺𑀬𑀫𑀸𑀦𑀩𑀦𑁆𑀥𑀦𑀸𑀦𑀁. 𑀢𑀦𑀼𑀪𑀸𑀯𑁄𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀧𑀯𑀢𑁆𑀢𑀺𑀬𑀸 𑀅𑀲𑀫𑀢𑁆𑀣𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑁄. 𑀯𑀺𑀧𑀲𑁆𑀲𑀦𑀸𑀜𑀸𑀡𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀳𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑀼𑀝𑁆𑀞𑀺𑀢𑁂𑀳𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀳𑀺. 𑀑𑀓𑁆𑀔𑀸𑀬𑀫𑀸𑀦𑁂𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂 𑀯𑀻𑀣𑀺𑀧𑁆𑀧𑀝𑀺𑀧𑀸𑀝𑀺𑀬𑀸 𑀑𑀓𑁆𑀔𑀸𑀬𑀫𑀸𑀦𑁂, 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀯𑀸 𑀑𑀓𑁆𑀔𑀸𑀬𑀫𑀸𑀦𑁂. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀬 𑀧𑀓𑁆𑀔𑀸𑀬𑀫𑀸𑀦𑁂. 𑀤𑀼𑀩𑁆𑀩𑀮𑀢𑀸 𑀤𑀻𑀧𑀺𑀢𑀸 ‘‘𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀲𑀁𑀬𑁄𑀚𑀦𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀧𑀽𑀢𑀺𑀓𑀸𑀦𑀺 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁯. 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁨-𑁭𑁩. 𑀅𑀝𑁆𑀞𑀫𑁂 𑀧𑀲𑁆𑀲𑀣 𑀦𑀽𑀢𑀺 𑀅𑀧𑀺 𑀧𑀲𑁆𑀲𑀣. 𑀫𑀳𑀦𑁆𑀢𑀦𑁆𑀢𑀺 𑀯𑀺𑀧𑀼𑀮𑀁. 𑀅𑀕𑁆𑀕𑀺𑀓𑁆𑀔𑀦𑁆𑀥𑀦𑁆𑀢𑀺 𑀅𑀕𑁆𑀕𑀺𑀲𑀫𑀽𑀳𑀁. 𑀆𑀤𑀺𑀢𑁆𑀢𑀦𑁆𑀢𑀺 𑀧𑀤𑀺𑀢𑁆𑀢𑀁. 𑀲𑀫𑁆𑀧𑀚𑁆𑀚𑀮𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀺𑀢𑀁 𑀅𑀘𑁆𑀘𑀺𑀯𑀺𑀧𑁆𑀨𑀼𑀮𑀺𑀗𑁆𑀕𑀸𑀦𑀺 𑀫𑀼𑀜𑁆𑀘𑀦𑁆𑀢𑀁. 𑀲𑀚𑁄𑀢𑀺𑀪𑀽𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀉𑀝𑁆𑀞𑀺𑀢𑀸𑀳𑀺 𑀚𑀸𑀮𑀸𑀳𑀺 𑀏𑀓𑀧𑁆𑀧𑀪𑀸𑀲𑀫𑀼𑀤𑀬𑀪𑀽𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣𑀸𑀢𑀺 𑀢𑀁 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑀢𑁆𑀣𑀁 𑀓𑀺𑀁 𑀫𑀜𑁆𑀜𑀣𑀸𑀢𑀺 𑀅𑀦𑀼𑀫𑀢𑀺𑀕𑁆𑀕𑀳𑀡𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀬𑀤𑁂𑀢𑁆𑀣 𑀲𑀢𑁆𑀣𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀮𑀺𑀗𑁆𑀕𑀦𑀁 𑀓𑀜𑁆𑀜𑀸𑀮𑀺𑀗𑁆𑀕𑀦𑀜𑁆𑀘 𑀆𑀦𑁂𑀲𑀺, 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀆𑀭𑁄𑀘𑀬𑀸𑀫𑀻’’𑀢𑀺𑀆𑀤𑀺𑀫𑀸𑀳.

𑀤𑀼𑀲𑁆𑀲𑀻𑀮𑀲𑁆𑀲𑀸𑀢𑀺 𑀦𑀺𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀭𑀳𑀺𑀢𑀲𑁆𑀲. 𑀧𑀸𑀧𑀥𑀫𑁆𑀫𑀲𑁆𑀲𑀸𑀢𑀺 𑀤𑀼𑀲𑁆𑀲𑀻𑀮𑀢𑁆𑀢𑀸 𑀏𑀯 𑀳𑀻𑀦𑀚𑁆𑀛𑀸𑀲𑀬𑀢𑀸𑀬 𑀮𑀸𑀫𑀓𑀲𑀪𑀸𑀯𑀲𑁆𑀲. 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑀲𑁆𑀲𑀸𑀢𑀺 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀅𑀲𑀼𑀘𑀺 𑀳𑀼𑀢𑁆𑀯𑀸 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑀲𑁆𑀲. 𑀤𑀼𑀲𑁆𑀲𑀻𑀮𑁄 𑀳𑀺 𑀓𑀺𑀜𑁆𑀘𑀺𑀤𑁂𑀯 𑀅𑀲𑀸𑀭𑀼𑀧𑁆𑀧𑀁 𑀤𑀺𑀲𑁆𑀯𑀸 ‘‘𑀇𑀤𑀁 𑀅𑀲𑀼𑀓𑁂𑀦 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑁂𑀲𑀁 𑀆𑀲𑀗𑁆𑀓𑀸 𑀳𑁄𑀢𑀺. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀫𑀦𑁆𑀢𑀬𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀘𑁆𑀘𑀺 𑀦𑀼 𑀔𑁄 𑀇𑀫𑁂 𑀫𑀬𑀸 𑀓𑀢𑀓𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄𑀬𑁂𑀯 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀲𑁆𑀲𑀸𑀢𑀺 𑀮𑀚𑁆𑀚𑀺𑀢𑀩𑁆𑀩𑀢𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀓𑀫𑁆𑀫𑀦𑁆𑀢𑀲𑁆𑀲. 𑀅𑀲𑁆𑀲𑀫𑀡𑀲𑁆𑀲𑀸𑀢𑀺 𑀦 𑀲𑀫𑀡𑀲𑁆𑀲. 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀲𑀫𑀡𑁄’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀲𑀫𑀡𑀧𑀝𑀺𑀜𑁆𑀜𑀲𑁆𑀲. 𑀅𑀲𑁂𑀝𑁆𑀞𑀘𑀸𑀭𑀺𑀢𑀸𑀬 𑀅𑀩𑁆𑀭𑀳𑁆𑀫𑀘𑀸𑀭𑀺𑀲𑁆𑀲. 𑀉𑀧𑁄𑀲𑀣𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀫𑀺𑀘𑁆𑀙𑀸𑀧𑀝𑀺𑀜𑁆𑀜𑀸𑀬 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀲𑁆𑀲. 𑀧𑀽𑀢𑀺𑀦𑀸 𑀓𑀫𑁆𑀫𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑁆𑀢𑁄𑀧𑀽𑀢𑀺𑀓𑀲𑁆𑀲. 𑀙𑀤𑁆𑀯𑀸𑀭𑁂𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀼𑀲𑁆𑀲𑀯𑀦𑁂𑀦 𑀢𑀺𑀦𑁆𑀢𑀢𑁆𑀢𑀸 𑀅𑀯𑀲𑁆𑀲𑀼𑀢𑀲𑁆𑀲. 𑀲𑀜𑁆𑀚𑀸𑀢𑀭𑀸𑀕𑀸𑀤𑀺𑀓𑀘𑀯𑀭𑀢𑁆𑀢𑀸 𑀲𑀻𑀮𑀯𑀦𑁆𑀢𑁂𑀳𑀺 𑀙𑀟𑁆𑀟𑁂𑀢𑀩𑁆𑀩𑀢𑁆𑀢𑀸 𑀘 𑀓𑀲𑀫𑁆𑀩𑀼𑀚𑀸𑀢𑀲𑁆𑀲.

𑀯𑀸𑀮𑀭𑀚𑁆𑀚𑀼𑀬𑀸𑀢𑀺 𑀯𑀸𑀮𑁂𑀳𑀺 𑀓𑀢𑀭𑀚𑁆𑀚𑀼𑀬𑀸. 𑀲𑀸 𑀳𑀺 𑀔𑀭𑀢𑀭𑀸 𑀳𑁄𑀢𑀺. 𑀖𑀁𑀲𑁂𑀬𑁆𑀬𑀸𑀢𑀺 𑀫𑀣𑀦𑀯𑀲𑁂𑀦 𑀖𑀁𑀲𑁂𑀬𑁆𑀬. 𑀢𑁂𑀮𑀥𑁄𑀢𑀸𑀬𑀸𑀢𑀺 𑀢𑁂𑀮𑁂𑀦 𑀦𑀺𑀲𑀺𑀢𑀸𑀬. 𑀧𑀘𑁆𑀘𑁄𑀭𑀲𑁆𑀫𑀺𑀦𑁆𑀢𑀺 𑀧𑀢𑀺𑀉𑀭𑀲𑁆𑀫𑀺𑀁, 𑀅𑀪𑀺𑀫𑀼𑀔𑁂 𑀉𑀭𑀫𑀚𑁆𑀛𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑁄𑀲𑀗𑁆𑀓𑀼𑀦𑀸𑀢𑀺 𑀲𑀡𑁆𑀟𑀸𑀲𑁂𑀦. 𑀨𑁂𑀡𑀼𑀤𑁆𑀤𑁂𑀳𑀓𑀦𑁆𑀢𑀺 𑀨𑁂𑀡𑀁 𑀉𑀤𑁆𑀤𑁂𑀳𑁂𑀢𑁆𑀯𑀸 𑀉𑀤𑁆𑀤𑁂𑀳𑁂𑀢𑁆𑀯𑀸, 𑀅𑀦𑁂𑀓𑀯𑀸𑀭𑀁 𑀨𑁂𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀧𑀸𑀴𑀺𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀯𑀫𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀤𑀲𑀫𑁂 𑀧𑀭𑀺𑀢𑁆𑀢𑀦𑁆𑀢𑀺 𑀇𑀢𑁆𑀢𑀭𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀁 𑀣𑁄𑀓’’𑀦𑁆𑀢𑀺. 𑀧𑀩𑀦𑁆𑀥𑀸𑀦𑀼𑀧𑀘𑁆𑀙𑁂𑀤𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀇𑀥 𑀚𑀻𑀯𑀺𑀢𑀲𑁆𑀲 𑀭𑀲𑁄 𑀓𑀺𑀘𑁆𑀘𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀲𑀭𑀲𑀧𑀭𑀺𑀢𑁆𑀢𑀢𑀸𑀬𑀧𑀻’’𑀢𑀺. 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬𑀧𑀺 𑀳𑀺 ‘‘𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 𑀯𑀘𑀦𑀢𑁄 𑀧𑀭𑀺𑀢𑁆𑀢𑀁 𑀔𑀡𑀧𑀭𑀺𑀢𑁆𑀢𑀢𑀸𑀬𑀧𑀺. 𑀧𑀭𑀫𑀢𑁆𑀣𑀢𑁄 𑀳𑀺 𑀅𑀢𑀺𑀧𑀭𑀺𑀢𑁆𑀢𑁄 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀡𑁄 𑀏𑀓𑀘𑀺𑀢𑁆𑀢𑀓𑁆𑀔𑀡𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁄𑀬𑁂𑀯. 𑀬𑀣𑀸 𑀦𑀸𑀫 𑀭𑀣𑀘𑀓𑁆𑀓𑀁 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀏𑀓𑁂𑀦𑁂𑀯 𑀦𑁂𑀫𑀺𑀧𑁆𑀧𑀤𑁂𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀺𑀝𑁆𑀞𑀫𑀸𑀦𑀫𑁆𑀧𑀺 𑀏𑀓𑁂𑀦𑁂𑀯 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑀫𑀢𑁆𑀢𑁂 𑀲𑀢𑁆𑀢𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀢𑀺 𑀚𑀻𑀯𑀺𑀲𑁆𑀲𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀦 𑀚𑀻𑀯𑀺𑀢𑁆𑀣 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀺.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄.

‘‘𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸.

‘‘𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺;

𑀘𑀺𑀢𑁆𑀢𑀪𑀗𑁆𑀕𑀸 𑀫𑀢𑁄 𑀮𑁄𑀓𑁄, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸’’𑀢𑀺. (𑀫𑀳𑀸𑀦𑀺. 𑁧𑁦);

𑀮𑀳𑀼𑀲𑀦𑁆𑀢𑀺 𑀮𑀳𑀼𑀓𑀁. 𑀢𑁂𑀦𑀸𑀳 ‘‘𑀮𑀳𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑀢𑁄 𑀮𑀳𑀼𑀲’’𑀦𑁆𑀢𑀺. 𑀧𑀭𑀺𑀢𑁆𑀢𑀁 𑀮𑀳𑀼𑀲𑀦𑁆𑀢𑀺 𑀉𑀪𑀬𑀁 𑀧𑀦𑁂𑀢𑀁 𑀅𑀧𑁆𑀧𑀓𑀲𑁆𑀲 𑀯𑁂𑀯𑀘𑀦𑀁. 𑀬𑀜𑁆𑀳𑀺 𑀅𑀧𑁆𑀧𑀓𑀁, 𑀢𑀁 𑀧𑀭𑀺𑀢𑁆𑀢𑀜𑁆𑀘𑁂𑀯 𑀮𑀳𑀼𑀓𑀜𑁆𑀘 𑀳𑁄𑀢𑀺. 𑀇𑀥 𑀧𑀦 𑀆𑀬𑀼𑀦𑁄 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀭𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀦𑁆𑀢𑀸𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀏𑀢𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀫𑀦𑁆𑀢𑀸𑀬 𑀩𑁄𑀤𑁆𑀥𑀩𑁆𑀩𑀁, 𑀧𑀜𑁆𑀜𑀸𑀬 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀫𑀦𑁆𑀢𑀸𑀬𑀦𑁆𑀢𑀺 𑀯𑀸 𑀫𑀦𑁆𑀢𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀫𑀦𑁆𑀢𑁂𑀢𑀩𑁆𑀩𑀁 𑀫𑀦𑁆𑀢𑀸𑀬 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀬 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀚𑀸𑀦𑀺𑀢𑀩𑁆𑀩𑀁 𑀚𑀻𑀯𑀺𑀢𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁄 𑀩𑀳𑀼𑀤𑀼𑀓𑁆𑀔𑀸𑀤𑀺𑀪𑀸𑀯𑁄. 𑀚𑀸𑀦𑀺𑀢𑁆𑀯𑀸 𑀘 𑀧𑀦 𑀲𑀩𑁆𑀩𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀬𑀲𑁆𑀫𑀸 𑀇𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁, 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄 𑀯𑀲𑁆𑀲𑀲𑀢𑀢𑁄 𑀉𑀧𑀭𑀺 𑀅𑀧𑁆𑀧𑀁 𑀅𑀜𑁆𑀜𑀁 𑀯𑀲𑁆𑀲𑀲𑀢𑀁 𑀅𑀧𑁆𑀧𑀢𑁆𑀯𑀸 𑀯𑀻𑀲𑀁 𑀯𑀸 𑀢𑀺𑀁𑀲𑀁 𑀯𑀸 𑀘𑀢𑁆𑀢𑀸𑀮𑀻𑀲𑀁 𑀯𑀸 𑀧𑀡𑁆𑀡𑀸𑀲𑀁 𑀯𑀸 𑀲𑀝𑁆𑀞𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀏𑀯𑀁𑀤𑀻𑀖𑀸𑀬𑀼𑀓𑁄 𑀧𑀦 𑀅𑀢𑀺𑀤𑀼𑀮𑁆𑀮𑀪𑁄. ‘‘𑀅𑀲𑀼𑀓𑁄 𑀳𑀺 𑀏𑀯𑀁 𑀘𑀺𑀭𑀁 𑀚𑀻𑀯𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑀝𑁆𑀞𑀩𑁆𑀩𑁄 𑀳𑁄𑀢𑀺. 𑀢𑀢𑁆𑀣 𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸 𑀯𑀻𑀲𑀲𑀢𑀁 𑀚𑀻𑀯𑀢𑀺, 𑀢𑀣𑀸 𑀧𑁄𑀓𑁆𑀔𑀭𑀲𑀸𑀢𑀺𑀩𑁆𑀭𑀸𑀳𑁆𑀫𑀡𑁄, 𑀩𑁆𑀭𑀳𑁆𑀫𑀸𑀬𑀼𑀩𑁆𑀭𑀸𑀳𑁆𑀫𑀡𑁄, 𑀩𑀸𑀯𑀭𑀺𑀬𑀩𑁆𑀭𑀸𑀳𑁆𑀫𑀡𑁄, 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀢𑀺. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀧𑀦 𑀯𑀲𑁆𑀲𑀲𑀢𑀜𑁆𑀘𑁂𑀯 𑀧𑀡𑁆𑀡𑀸𑀲𑀜𑁆𑀘 𑀯𑀲𑁆𑀲𑀸𑀦𑀺. 𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀲𑁆𑀲𑀲𑀢𑀜𑁆𑀘𑁂𑀯 𑀲𑀝𑁆𑀞𑀺 𑀘 𑀯𑀲𑁆𑀲𑀸𑀦𑀺, 𑀅𑀬𑀁 𑀲𑀩𑁆𑀩𑀤𑀻𑀖𑀸𑀬𑀼𑀓𑁄, 𑀲𑁄𑀧𑀺 𑀤𑁆𑀯𑁂 𑀯𑀲𑁆𑀲𑀲𑀢𑀸𑀦𑀺 𑀦 𑀚𑀻𑀯𑀺.

𑀅𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.