𑁬. 𑀤𑀼𑀢𑀺𑀬𑀲𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀙𑀝𑁆𑀞𑁂 𑀦𑁆𑀳𑀸𑀭𑀼𑀯𑀺𑀮𑁂𑀔𑀦𑀦𑁆𑀢𑀺 𑀘𑀫𑁆𑀫𑀁 𑀮𑀺𑀔𑀦𑁆𑀢𑀸𑀦𑀁 𑀘𑀫𑁆𑀫𑀁 𑀮𑀺𑀔𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁. ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀅𑀳𑀁𑀓𑀭𑀡𑀁 𑀅𑀳𑀗𑁆𑀓𑀸𑀭𑁄. ‘‘𑀏𑀢𑀁 𑀫𑀫𑀸’’𑀢𑀺 𑀫𑀫𑀁𑀓𑀭𑀡𑀁 𑀫𑀫𑀗𑁆𑀓𑀸𑀭𑁄. 𑀢𑁂𑀦𑀸𑀳 ‘‘𑀅𑀳𑀗𑁆𑀓𑀸𑀭𑀤𑀺𑀝𑁆𑀞𑀺𑀢𑁄’’𑀢𑀺𑀆𑀤𑀺. 𑀢𑀺𑀲𑁆𑀲𑁄 𑀯𑀺𑀥𑀸𑀢𑀺 𑀲𑁂𑀬𑁆𑀬𑀲𑀤𑀺𑀲𑀳𑀻𑀦𑀯𑀲𑁂𑀦 𑀢𑀬𑁄 𑀫𑀸𑀦𑀸. ‘‘𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁫𑁮𑁪) 𑀓𑁄𑀝𑁆𑀞𑀸𑀲𑁄 ‘‘𑀯𑀺𑀥𑀸’’𑀢𑀺 𑀯𑀼𑀢𑁆𑀢𑁄. ‘‘𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁫) 𑀧𑀓𑀸𑀭𑁄. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀥𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸’’𑀢𑀺 (𑀯𑀺𑀪. 𑁯𑁨𑁦) 𑀏𑀢𑁆𑀣 𑀫𑀸𑀦𑁄 ‘‘𑀯𑀺𑀥𑀸’’𑀢𑀺 𑀯𑀼𑀢𑁆𑀢𑁄. 𑀇𑀥𑀸𑀧𑀺 𑀫𑀸𑀦𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀫𑀸𑀦𑁄 𑀳𑀺 𑀯𑀺𑀤𑀳𑀦𑀢𑁄 𑀳𑀻𑀦𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑀸. 𑀢𑁂𑀦𑀸𑀓𑀸𑀭𑁂𑀦 𑀤𑀳𑀦𑀢𑁄 𑀉𑀧𑀤𑀳𑀦𑀢𑁄 ‘‘𑀯𑀺𑀥𑀸’’𑀢𑀺 𑀯𑀼𑀘𑁆𑀘𑀢𑀺.

𑀤𑀼𑀢𑀺𑀬𑀲𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.