𑁫. 𑀯𑀺𑀚𑁆𑀚𑀸𑀪𑀸𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀚𑁆𑀚𑀁 𑀪𑀚𑀦𑁆𑀢𑀺, 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀢𑀸𑀬 𑀲𑀳 𑀏𑀓𑀻𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀅𑀣 𑀯𑀸 𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀺 𑀯𑀺𑀚𑁆𑀚𑀸𑀲𑀪𑀸𑀕𑀢𑀸𑀬 𑀢𑀤𑁂𑀓𑀤𑁂𑀲𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀫𑀦𑁄𑀫𑀬𑀺𑀤𑁆𑀥𑀺, 𑀙 𑀅𑀪𑀺𑀜𑁆𑀜𑀸𑀢𑀺 𑀅𑀝𑁆𑀞 𑀯𑀺𑀚𑁆𑀚𑀸. 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀧𑀘𑁆𑀙𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀲𑀼 𑀬𑀸 𑀓𑀸𑀘𑀺 𑀏𑀓𑀸𑀯 𑀯𑀺𑀚𑁆𑀚𑀸 𑀯𑀺𑀚𑁆𑀚𑀸, 𑀲𑁂𑀲𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀏𑀯𑀁 𑀯𑀺𑀚𑁆𑀚𑀸𑀧𑀺 𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 ‘‘𑀯𑀺𑀚𑁆𑀚𑀸𑀪𑀸𑀕𑀺𑀬𑀸’’𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀇𑀥 𑀧𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸𑀯 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀆𑀕𑀢𑀸, 𑀲𑀜𑁆𑀜𑀸𑀲𑀻𑀲𑁂𑀦 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑁂 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸, 𑀢𑁂𑀦 𑀲𑀳𑀕𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀺𑀚𑁆𑀚𑀸𑀪𑀸𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.