𑁭-𑁮. 𑀧𑀞𑀫𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁭-𑁭𑁮. 𑀲𑀢𑁆𑀢𑀫𑁂 𑀯𑀺𑀲𑁂𑀲𑀲𑁆𑀲 𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀲𑁆𑀲 𑀧𑀸𑀧𑀼𑀡𑀦𑀢𑁆𑀣𑀁. 𑀯𑀻𑀭𑀺𑀬𑀦𑁆𑀢𑀺 𑀧𑀥𑀸𑀦𑀯𑀻𑀭𑀺𑀬𑀁. 𑀢𑀁 𑀧𑀦 𑀘𑀗𑁆𑀓𑀫𑀦𑀯𑀲𑁂𑀦 𑀓𑀭𑀡𑁂 ‘‘𑀓𑀸𑀬𑀺𑀓’’𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀆𑀳 𑁋 ‘‘𑀤𑀼𑀯𑀺𑀥𑀫𑁆𑀧𑀻’’𑀢𑀺. 𑀲𑀢𑁆𑀣𑀓𑀯𑀸𑀢𑀸𑀢𑀺 𑀲𑀦𑁆𑀥𑀺𑀩𑀦𑁆𑀥𑀦𑀸𑀦𑀺 𑀓𑀢𑁆𑀢𑀭𑀺𑀬𑀸 𑀙𑀺𑀦𑁆𑀤𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀯𑀸𑀢𑀸. 𑀢𑁂𑀦𑀸𑀳 𑁋 ‘‘𑀲𑀢𑁆𑀣𑀁 𑀯𑀺𑀬𑀸’’𑀢𑀺𑀆𑀤𑀺. 𑀓𑀢𑀓𑀫𑁆𑀫𑁂𑀳𑀻𑀢𑀺 𑀓𑀢𑀘𑁄𑀭𑀓𑀫𑁆𑀫𑁂𑀳𑀺. 𑀢𑁂 𑀓𑀺𑀭 𑀓𑀢𑀓𑀫𑁆𑀫𑀸 𑀬𑀁 𑀦𑁂𑀲𑀁 𑀤𑁂𑀯𑀢𑀁 𑀆𑀬𑀸𑀘𑀺𑀢𑁆𑀯𑀸 𑀓𑀫𑁆𑀫𑀁 𑀦𑀺𑀧𑁆𑀨𑀦𑁆𑀦𑀁, 𑀢𑀲𑁆𑀲 𑀉𑀧𑀓𑀸𑀭𑀢𑁆𑀣𑀸𑀬 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀕𑀮𑀮𑁄𑀳𑀺𑀢𑀸𑀦𑀺 𑀕𑀡𑁆𑀳𑀦𑁆𑀢𑀺. 𑀢𑁂 ‘‘𑀅𑀜𑁆𑀜𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀫𑀸𑀭𑀺𑀬𑀫𑀸𑀦𑁂𑀲𑀼 𑀓𑁄𑀮𑀸𑀳𑀮𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀧𑀩𑁆𑀩𑀚𑀺𑀢𑀁 𑀧𑀭𑀺𑀬𑁂𑀲𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀓𑀢𑀓𑀫𑁆𑀫𑁂𑀳𑀻𑀢𑀺 𑀅𑀝𑀯𑀺𑀢𑁄 𑀕𑀸𑀫𑀁 𑀆𑀕𑀫𑀦𑀓𑀸𑀮𑁂 𑀓𑀫𑁆𑀫𑀦𑀺𑀧𑁆𑀨𑀢𑁆𑀢𑀢𑁆𑀣𑀁 𑀧𑀼𑀭𑁂𑀢𑀭𑀁 𑀩𑀮𑀺𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑁂𑀳𑀺. 𑀢𑁂𑀦𑁂𑀯𑀸𑀳 𑁋 ‘‘𑀘𑁄𑀭𑀺𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸 𑀓𑀢𑀓𑀫𑁆𑀫𑀸 𑀦𑀸𑀫𑀸’’𑀢𑀺𑀆𑀤𑀺. 𑀅𑀝𑁆𑀞𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀧𑀞𑀫𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.