𑁪. 𑀫𑀦𑀸𑀧𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑁂 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀫𑀦𑁄𑀫𑀬𑀦𑁆𑀢𑀺 𑀆𑀳 ‘‘𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀏𑀓𑀁 𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀁 𑀤𑁂𑀯𑀓𑀸𑀬’’𑀦𑁆𑀢𑀺. 𑀲𑀢𑀺𑀧𑀺 𑀳𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀫𑀦𑁄𑀫𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀭𑀽𑀧𑀸𑀯𑀘𑀭𑀲𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀸𑀫𑀪𑀯𑁂 𑀑𑀧𑀧𑀸𑀢𑀺𑀓𑀲𑀢𑁆𑀢𑀸𑀦𑀫𑁆𑀧𑀺 𑀫𑀦𑁄𑀫𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑀢𑁆𑀣 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀸𑀲𑀗𑁆𑀓𑀸𑀬 𑀏𑀯 𑀅𑀪𑀸𑀯𑀢𑁄 ‘‘𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀅𑀯𑀥𑀸𑀭𑀡𑀸𑀲𑀫𑁆𑀪𑀯𑀢𑁄. 𑀦𑀺𑀭𑀼𑀴𑁆𑀳𑁄 𑀯𑀸𑀬𑀁 𑀮𑁄𑀓𑁂 𑀫𑀦𑁄𑀫𑀬𑀯𑁄𑀳𑀸𑀭𑁄 𑀭𑀽𑀧𑀸𑀯𑀘𑀭𑀲𑀢𑁆𑀢𑁂𑀲𑀼. 𑀢𑀣𑀸 𑀳𑀺 ‘‘𑀅𑀦𑁆𑀦𑀫𑀬𑁄, 𑀧𑀸𑀡𑀫𑀬𑁄, 𑀫𑀦𑁄𑀫𑀬𑁄, 𑀆𑀦𑀦𑁆𑀤𑀫𑀬𑁄, 𑀯𑀺𑀜𑁆𑀜𑀸𑀡𑀫𑀬𑁄’’𑀢𑀺 𑀧𑀜𑁆𑀘𑀥𑀸 𑀅𑀢𑁆𑀢𑀸𑀦𑀁 𑀯𑁂𑀤𑀯𑀸𑀤𑀺𑀦𑁄𑀧𑀺 𑀯𑀤𑀦𑁆𑀢𑀺. 𑀉𑀘𑁆𑀙𑁂𑀤𑀯𑀸𑀤𑀺𑀦𑁄𑀧𑀺 𑀯𑀤𑀦𑁆𑀢𑀺 ‘‘𑀤𑀺𑀩𑁆𑀩𑁄 𑀭𑀽𑀧𑀻 𑀫𑀦𑁄𑀫𑀬𑁄’’𑀢𑀺 (𑀤𑀻. 𑀦𑀺. 𑁧.𑁮𑁭). 𑀢𑀻𑀲𑀼 𑀯𑀸 𑀓𑀼𑀮𑀲𑀫𑁆𑀧𑀢𑁆𑀢𑀻𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀔𑀢𑁆𑀢𑀺𑀬𑀯𑁂𑀲𑁆𑀲𑀲𑀗𑁆𑀔𑀸𑀢𑁂𑀲𑀼 𑀲𑀫𑁆𑀧𑀦𑁆𑀦𑀓𑀼𑀮𑁂𑀲𑀼. 𑀙𑀲𑀼 𑀯𑀸 𑀓𑀸𑀫𑀲𑀕𑁆𑀕𑁂𑀲𑀽𑀢𑀺 𑀙𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼.

𑀫𑀦𑀸𑀧𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.