𑁪. 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄

𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑁄

𑁧𑁨𑁭. 𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀦𑀬𑀫𑁂𑀓𑀯𑀺𑀥𑀸𑀤𑀺𑀓𑀁;

𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁, 𑀩𑀼𑀤𑁆𑀥𑀺𑀬𑀸 𑀧𑀦 𑀯𑀼𑀤𑁆𑀥𑀺𑀬𑀸.

𑁧𑁨𑁮. 𑀲𑀩𑁆𑀩𑀫𑁂𑀓𑀯𑀺𑀥𑀁 𑀘𑀺𑀢𑁆𑀢𑀁, 𑀯𑀺𑀚𑀸𑀦𑀦𑀲𑀪𑀸𑀯𑀢𑁄;

𑀤𑀼𑀯𑀺𑀥𑀜𑁆𑀘 𑀪𑀯𑁂 𑀘𑀺𑀢𑁆𑀢𑀁, 𑀅𑀳𑁂𑀢𑀼𑀓𑀲𑀳𑁂𑀢𑀼𑀢𑁄.

𑁧𑁨𑁯. 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀺𑀧𑀸𑀓𑀸 𑀳𑀺, 𑀓𑀸𑀫𑁂 𑀤𑀲 𑀘 𑀧𑀜𑁆𑀘 𑀘;

𑀓𑁆𑀭𑀺𑀬𑀸 𑀢𑀺𑀲𑁆𑀲𑁄𑀢𑀺 𑀲𑀩𑁆𑀩𑁂𑀧𑀺, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸.

𑁧𑁩𑁦. 𑀏𑀓𑀲𑀢𑁆𑀢𑀢𑀺 𑀲𑁂𑀲𑀸𑀦𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑁂𑀲𑀺𑀦𑀸;

𑀲𑀳𑁂𑀢𑀼𑀓𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀸𑀤𑀺𑀦𑀸 𑀳𑁂𑀢𑀼𑀯𑀸𑀤𑀺𑀦𑀸.

𑁧𑁩𑁧. 𑀲𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀢𑁄, 𑀢𑀣𑁄𑀪𑀬𑀯𑀲𑁂𑀦 𑀘;

𑀲𑀩𑁆𑀩𑀁 𑀯𑀼𑀢𑁆𑀢𑀧𑀓𑀸𑀭𑀁 𑀢𑀼, 𑀢𑀺𑀯𑀺𑀥𑀁 𑀳𑁄𑀢𑀺 𑀫𑀸𑀦𑀲𑀁.

𑁧𑁩𑁨. 𑀲𑀩𑁆𑀩𑁄 𑀓𑀸𑀫𑀯𑀺𑀧𑀸𑀓𑁄 𑀘, 𑀭𑀽𑀧𑁂 𑀧𑀜𑁆𑀘𑀤𑀲𑀸𑀧𑀺 𑀘;

𑀆𑀤𑀺𑀫𑀕𑁆𑀕𑁄 𑀲𑀺𑀢𑀼𑀧𑁆𑀧𑀸𑀤𑁄, 𑀫𑀦𑁄𑀥𑀸𑀢𑀼 𑀓𑁆𑀭𑀺𑀬𑀸𑀧𑀺 𑀘.

𑁧𑁩𑁩. 𑀤𑁄𑀫𑀦𑀲𑁆𑀲𑀤𑁆𑀯𑀬𑀜𑁆𑀘𑀸𑀧𑀺, 𑀢𑁂𑀘𑀢𑁆𑀢𑀸𑀮𑀻𑀲 𑀫𑀸𑀦𑀲𑀸;

𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀦𑀸 𑀯𑀢𑁆𑀣𑀼𑀁, 𑀏𑀓𑀦𑁆𑀢𑁂𑀦 𑀲𑀯𑀢𑁆𑀣𑀼𑀓𑀸.

𑁧𑁩𑁪. 𑀅𑀭𑀽𑀧𑀸𑀯𑀘𑀭𑀧𑀸𑀓𑀸 𑀘, 𑀏𑀓𑀦𑁆𑀢𑁂𑀦 𑀅𑀯𑀢𑁆𑀣𑀼𑀓𑀸;

𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀲𑁂𑀲𑀸𑀦𑀺, 𑀘𑀺𑀢𑁆𑀢𑀸𑀦𑀼𑀪𑀬𑀣𑀸 𑀲𑀺𑀬𑀼𑀁.

𑁧𑁩𑁫. 𑀏𑀓𑁂𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀧𑀜𑁆𑀘𑀸𑀭𑀫𑁆𑀫𑀡𑀫𑁂𑀯 𑀘;

𑀙𑀴𑀸𑀭𑀫𑁆𑀫𑀡𑀓𑀜𑁆𑀘𑁂𑀢𑀺, 𑀏𑀯𑀫𑁆𑀧𑀺 𑀢𑀺𑀯𑀺𑀥𑀁 𑀲𑀺𑀬𑀸.

𑁧𑁩𑁬. 𑀯𑀺𑀜𑁆𑀜𑀸𑀡𑀸𑀦𑀺 𑀘 𑀤𑁆𑀯𑁂𑀧𑀜𑁆𑀘, 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘;

𑀲𑀩𑁆𑀩𑀁 𑀫𑀳𑀕𑁆𑀕𑀢𑀜𑁆𑀘𑁂𑀯, 𑀞𑀧𑁂𑀢𑁆𑀯𑀸𑀪𑀺𑀜𑁆𑀜𑀫𑀸𑀦𑀲𑀁.

𑁧𑁩𑁭. 𑀢𑁂𑀘𑀢𑁆𑀢𑀸𑀮𑀻𑀲 𑀯𑀺𑀜𑁆𑀜𑁂𑀬𑁆𑀬𑀸, 𑀏𑀓𑁂𑀓𑀸𑀭𑀫𑁆𑀫𑀡𑀸 𑀧𑀦;

𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀢𑀢𑁆𑀣, 𑀧𑀜𑁆𑀘𑀸𑀭𑀫𑁆𑀫𑀡𑀫𑀻𑀭𑀺𑀢𑀁.

𑁧𑁩𑁮. 𑀢𑁂𑀘𑀢𑁆𑀢𑀸𑀮𑀻𑀲 𑀲𑁂𑀲𑀸𑀦𑀺, 𑀙𑀴𑀸𑀭𑀫𑁆𑀫𑀡𑀺𑀓𑀸 𑀫𑀢𑀸;

𑀢𑀣𑀸 𑀘 𑀢𑀺𑀯𑀺𑀥𑀁 𑀘𑀺𑀢𑁆𑀢𑀁, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄.

𑁧𑁩𑁯. 𑀅𑀳𑁂𑀢𑀼𑀁 𑀏𑀓𑀳𑁂𑀢𑀼𑀜𑁆𑀘, 𑀤𑁆𑀯𑀺𑀳𑁂𑀢𑀼𑀜𑁆𑀘 𑀢𑀺𑀳𑁂𑀢𑀼𑀓𑀁;

𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸.

𑁧𑁪𑁦. 𑀳𑁂𑀝𑁆𑀞𑀸 𑀫𑀬𑀸𑀧𑀺 𑀦𑀺𑀤𑁆𑀤𑀺𑀝𑁆𑀞𑀸, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸;

𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀁𑀬𑀼𑀢𑁆𑀢𑀁, 𑀏𑀓𑀳𑁂𑀢𑀼𑀫𑀼𑀤𑀻𑀭𑀺𑀢𑀁.

𑁧𑁪𑁧. 𑀓𑀸𑀫𑁂 𑀤𑁆𑀯𑀸𑀤𑀲𑀥𑀸 𑀧𑀼𑀜𑁆𑀜-𑀯𑀺𑀧𑀸𑀓𑀓𑁆𑀭𑀺𑀬𑀢𑁄 𑀧𑀦;

𑀤𑀲𑀥𑀸𑀓𑀼𑀲𑀮𑀸 𑀘𑀸𑀢𑀺, 𑀩𑀸𑀯𑀻𑀲𑀢𑀺 𑀤𑀼𑀳𑁂𑀢𑀼𑀓𑀸.

𑁧𑁪𑁨. 𑀓𑀸𑀫𑁂 𑀤𑁆𑀯𑀸𑀤𑀲𑀥𑀸 𑀧𑀼𑀜𑁆𑀜-𑀯𑀺𑀧𑀸𑀓𑀓𑁆𑀭𑀺𑀬𑀢𑁄 𑀧𑀦;

𑀲𑀩𑁆𑀩𑀁 𑀫𑀳𑀕𑁆𑀕𑀢𑀜𑁆𑀘𑁂𑀯, 𑀅𑀧𑁆𑀧𑀫𑀸𑀡𑀁 𑀢𑀺𑀳𑁂𑀢𑀼𑀓𑀁.

𑁧𑁪𑁩. 𑀭𑀽𑀧𑀻𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺-𑀚𑀦𑀓𑀸𑀚𑀦𑀓𑀸𑀤𑀺𑀢𑁄;

𑀏𑀯𑀜𑁆𑀘𑀸𑀧𑀺 𑀳𑀺 𑀢𑀁 𑀘𑀺𑀢𑁆𑀢𑀁, 𑀳𑁄𑀢𑀺 𑀲𑀩𑁆𑀩𑀁 𑀘𑀢𑀼𑀩𑁆𑀩𑀺𑀥𑀁.

𑁧𑁪𑁪. 𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀢𑀢𑁆𑀣, 𑀓𑀼𑀲𑀮𑀸 𑀓𑀸𑀫𑀥𑀸𑀢𑀼𑀬𑀸;

𑀢𑀣𑀸 𑀤𑀲 𑀓𑁆𑀭𑀺𑀬𑀸 𑀓𑀸𑀫𑁂, 𑀅𑀪𑀺𑀜𑁆𑀜𑀸𑀫𑀸𑀦𑀲𑀁 𑀤𑁆𑀯𑀬𑀁.

𑁧𑁪𑁫. 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀭𑀽𑀧𑀸𑀦𑀺, 𑀓𑀧𑁆𑀧𑁂𑀦𑁆𑀢𑀺 𑀇𑀭𑀺𑀬𑀸𑀧𑀣𑀁;

𑀚𑀦𑀬𑀦𑁆𑀢𑀺 𑀘 𑀯𑀺𑀜𑁆𑀜𑀢𑁆𑀢𑀺𑀁, 𑀇𑀫𑁂 𑀤𑁆𑀯𑀢𑁆𑀢𑀺𑀁𑀲 𑀫𑀸𑀦𑀲𑀸.

𑁧𑁪𑁬. 𑀓𑀼𑀲𑀮𑀸 𑀘 𑀓𑁆𑀭𑀺𑀬𑀸 𑀘𑁂𑀯, 𑀢𑁂 𑀫𑀳𑀕𑁆𑀕𑀢𑀫𑀸𑀦𑀲𑀸;

𑀅𑀝𑁆𑀞𑀸𑀦𑀸𑀲𑀯𑀘𑀺𑀢𑁆𑀢𑀸𑀦𑀺, 𑀙𑀩𑁆𑀩𑀻𑀲𑀢𑀺 𑀘 𑀫𑀸𑀦𑀲𑀸.

𑁧𑁪𑁭. 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀭𑀽𑀧𑀸𑀦𑀺, 𑀓𑀧𑁆𑀧𑁂𑀦𑁆𑀢𑀺 𑀇𑀭𑀺𑀬𑀸𑀧𑀣𑀁;

𑀘𑁄𑀧𑀦𑀁 𑀦 𑀘 𑀧𑀸𑀧𑁂𑀦𑁆𑀢𑀺, 𑀤𑁆𑀯𑀺𑀓𑀺𑀘𑁆𑀘𑀸 𑀦𑀺𑀬𑀢𑀸 𑀇𑀫𑁂.

𑁧𑁪𑁮. 𑀞𑀧𑁂𑀢𑁆𑀯𑀸 𑀤𑀲 𑀯𑀺𑀜𑁆𑀜𑀸𑀡𑁂, 𑀯𑀺𑀧𑀸𑀓𑀸 𑀤𑁆𑀯𑀻𑀲𑀼 𑀪𑀽𑀫𑀺𑀲𑀼;

𑀓𑁆𑀭𑀺𑀬𑀸 𑀘𑁂𑀯 𑀫𑀦𑁄𑀥𑀸𑀢𑀼, 𑀇𑀫𑀸𑀦𑁂𑀓𑀽𑀦𑀯𑀻𑀲𑀢𑀺.

𑁧𑁪𑁯. 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑀭𑀽𑀧𑀸𑀦𑀺, 𑀦 𑀓𑀭𑁄𑀦𑁆𑀢𑀺𑀢𑀭𑀤𑁆𑀯𑀬𑀁;

𑀧𑀼𑀦 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸, 𑀯𑀺𑀧𑀸𑀓𑀸 𑀘 𑀅𑀭𑀽𑀧𑀺𑀲𑀼.

𑁧𑁫𑁦. 𑀲𑀩𑁆𑀩𑁂𑀲𑀁 𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘, 𑀘𑀼𑀢𑀺𑀘𑀺𑀢𑁆𑀢𑀜𑁆𑀘𑀸𑀭𑀳𑀢𑁄;

𑀦 𑀓𑀭𑁄𑀦𑁆𑀢𑀺 𑀢𑀺𑀓𑀺𑀘𑁆𑀘𑀸𑀦𑀺, 𑀇𑀫𑁂 𑀲𑁄𑀴𑀲 𑀫𑀸𑀦𑀲𑀸.

𑁧𑁫𑁧. 𑀏𑀓𑀤𑁆𑀯𑀺𑀢𑀺𑀘𑀢𑀼𑀝𑁆𑀞𑀸𑀦-𑀧𑀜𑁆𑀘𑀝𑁆𑀞𑀸𑀦𑀧𑀪𑁂𑀤𑀢𑁄;

𑀧𑀜𑁆𑀘𑀥𑀸 𑀘𑀺𑀢𑁆𑀢𑀫𑀓𑁆𑀔𑀸𑀲𑀺, 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄.

𑁧𑁫𑁨. 𑀓𑀼𑀲𑀮𑀸𑀓𑀼𑀲𑀮𑀸 𑀲𑀩𑁆𑀩𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀫𑀳𑀸𑀓𑁆𑀭𑀺𑀬𑀸;

𑀫𑀳𑀕𑁆𑀕𑀢𑀸 𑀓𑁆𑀭𑀺𑀬𑀸 𑀘𑁂𑀯, 𑀘𑀢𑁆𑀢𑀸𑀭𑁄 𑀨𑀮𑀫𑀸𑀦𑀲𑀸.

𑁧𑁫𑁩. 𑀲𑀩𑁆𑀩𑁂𑀯 𑀧𑀜𑁆𑀘𑀧𑀜𑁆𑀜𑀸𑀲, 𑀦𑀺𑀧𑁆𑀧𑀧𑀜𑁆𑀘𑁂𑀦 𑀲𑀢𑁆𑀣𑀼𑀦𑀸;

𑀚𑀯𑀦𑀝𑁆𑀞𑀸𑀦𑀢𑁄𑀬𑁂𑀯, 𑀏𑀓𑀝𑁆𑀞𑀸𑀦𑁂 𑀦𑀺𑀬𑀸𑀫𑀺𑀢𑀸.

𑁧𑁫𑁪. 𑀧𑀼𑀦 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸, 𑀤𑀲𑁆𑀲𑀦𑁂 𑀲𑀯𑀦𑁂 𑀢𑀣𑀸;

𑀖𑀸𑀬𑀦𑁂 𑀲𑀸𑀬𑀦𑁂 𑀞𑀸𑀦𑁂, 𑀨𑀼𑀲𑀦𑁂 𑀧𑀝𑀺𑀧𑀸𑀝𑀺𑀬𑀸.

𑁧𑁫𑁫. 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀞𑀸𑀦𑁂, 𑀆𑀯𑀚𑁆𑀚𑀦𑁂 𑀧𑀝𑀺𑀘𑁆𑀙𑀦𑁂;

𑀅𑀝𑁆𑀞𑀲𑀝𑁆𑀞𑀺 𑀪𑀯𑀦𑁆𑀢𑁂𑀢𑁂, 𑀏𑀓𑀝𑁆𑀞𑀸𑀦𑀺𑀓𑀢𑀁 𑀕𑀢𑀸.

𑁧𑁫𑁬. 𑀧𑀼𑀦 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀦𑀸𑀫, 𑀘𑀺𑀢𑁆𑀢𑀤𑁆𑀯𑀬𑀫𑀼𑀤𑀻𑀭𑀺𑀢𑀁;

𑀲𑁄𑀫𑀦𑀲𑁆𑀲𑀬𑀼𑀢𑀁 𑀧𑀜𑁆𑀘-𑀤𑁆𑀯𑀸𑀭𑁂 𑀲𑀦𑁆𑀢𑀻𑀭𑀡𑀁 𑀲𑀺𑀬𑀸.

𑁧𑁫𑁭. 𑀢𑀤𑀸𑀭𑀫𑁆𑀫𑀡𑀁 𑀙𑀤𑁆𑀯𑀸𑀭𑁂, 𑀩𑀮𑀯𑀸𑀭𑀫𑁆𑀫𑀡𑁂 𑀲𑀢𑀺;

𑀢𑀣𑀸 𑀯𑁄𑀝𑁆𑀞𑀩𑁆𑀩𑀦𑀁 𑀳𑁄𑀢𑀺, 𑀧𑀜𑁆𑀘𑀤𑁆𑀯𑀸𑀭𑁂𑀲𑀼 𑀯𑁄𑀝𑁆𑀞𑀩𑁄.

𑁧𑁫𑁮. 𑀫𑀦𑁄𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑁂𑀲𑀁, 𑀳𑁄𑀢𑀺 𑀆𑀯𑀚𑁆𑀚𑀦𑀁 𑀧𑀦;

𑀇𑀤𑀁 𑀤𑁆𑀯𑀺𑀝𑁆𑀞𑀸𑀦𑀺𑀓𑀁 𑀦𑀸𑀫, 𑀳𑁄𑀢𑀺 𑀘𑀺𑀢𑁆𑀢𑀤𑁆𑀯𑀬𑀁 𑀧𑀦.

𑁧𑁫𑁯. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀲𑁆𑀲, 𑀘𑀼𑀢𑀺𑀬𑀸 𑀞𑀸𑀦𑀢𑁄 𑀧𑀦;

𑀫𑀳𑀕𑁆𑀕𑀢𑀯𑀺𑀧𑀸𑀓𑀸 𑀢𑁂, 𑀦𑀯 𑀢𑀺𑀝𑁆𑀞𑀸𑀦𑀺𑀓𑀸 𑀫𑀢𑀸.

𑁧𑁬𑁦. 𑀅𑀝𑁆𑀞 𑀓𑀸𑀫𑀸 𑀫𑀳𑀸𑀧𑀸𑀓𑀸, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀢𑁄;

𑀢𑀤𑀸𑀭𑀫𑁆𑀫𑀡𑀢𑁄 𑀘𑁂𑀯, 𑀘𑀼𑀢𑀺𑀝𑁆𑀞𑀸𑀦𑀯𑀲𑁂𑀦 𑀘.

𑁧𑁬𑁧. 𑀘𑀢𑀼𑀝𑁆𑀞𑀸𑀦𑀺𑀓𑀘𑀺𑀢𑁆𑀢𑀸𑀦𑀺, 𑀅𑀝𑁆𑀞 𑀳𑁄𑀦𑁆𑀢𑀻𑀢𑀺 𑀦𑀺𑀤𑁆𑀤𑀺𑀲𑁂;

𑀓𑀼𑀲𑀮𑀸𑀓𑀼𑀲𑀮𑀧𑀸𑀓𑀁 𑀢𑀼-𑀧𑁂𑀓𑁆𑀔𑀸𑀲𑀳𑀕𑀢𑀤𑁆𑀯𑀬𑀁.

𑁧𑁬𑁨. 𑀲𑀦𑁆𑀢𑀻𑀭𑀡𑀁 𑀪𑀯𑁂 𑀧𑀜𑁆𑀘-𑀤𑁆𑀯𑀸𑀭𑁂 𑀙𑀤𑁆𑀯𑀸𑀭𑀺𑀓𑁂𑀲𑀼 𑀘;

𑀢𑀤𑀸𑀭𑀫𑁆𑀫𑀡𑀢𑀁 𑀬𑀸𑀢𑀺, 𑀩𑀮𑀯𑀸𑀭𑀫𑁆𑀫𑀡𑁂 𑀲𑀢𑀺.

𑁧𑁬𑁩. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁, 𑀘𑀼𑀢𑀺𑀝𑁆𑀞𑀸𑀦𑀯𑀲𑁂𑀦 𑀘;

𑀧𑀜𑁆𑀘𑀝𑁆𑀞𑀸𑀦𑀺𑀓𑀘𑀺𑀢𑁆𑀢𑀦𑁆𑀢𑀺, 𑀇𑀤𑀁 𑀤𑁆𑀯𑀬𑀫𑀼𑀤𑀻𑀭𑀺𑀢𑀁.

𑁧𑁬𑁪. 𑀧𑀜𑁆𑀘𑀓𑀺𑀘𑁆𑀘𑀁 𑀤𑁆𑀯𑀬𑀁 𑀘𑀺𑀢𑁆𑀢𑀁, 𑀘𑀢𑀼𑀓𑀺𑀘𑁆𑀘𑀁 𑀧𑀦𑀝𑁆𑀞𑀓𑀁;

𑀢𑀺𑀓𑀺𑀘𑁆𑀘𑀁 𑀦𑀯𑀓𑀁 𑀤𑁆𑀯𑁂 𑀢𑀼, 𑀤𑁆𑀯𑀺𑀓𑀺𑀘𑁆𑀘𑀸 𑀲𑁂𑀲𑀫𑁂𑀓𑀓𑀁.

𑁧𑁬𑁫. 𑀪𑀯𑀗𑁆𑀕𑀸𑀯𑀚𑁆𑀚𑀦𑀜𑁆𑀘𑁂𑀯, 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀲𑀦𑁆𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀦𑀁, 𑀚𑀯𑀦𑀁 𑀪𑀯𑀢𑀺 𑀲𑀢𑁆𑀢𑀫𑀁.

𑁧𑁬𑁬. 𑀙𑀩𑁆𑀩𑀺𑀥𑀁 𑀳𑁄𑀢𑀺 𑀢𑀁 𑀙𑀦𑁆𑀦𑀁, 𑀯𑀺𑀜𑁆𑀜𑀸𑀡𑀸𑀦𑀁 𑀧𑀪𑁂𑀤𑀢𑁄;

𑀲𑀢𑁆𑀢𑀥𑀸 𑀲𑀢𑁆𑀢𑀯𑀺𑀜𑁆𑀜𑀸𑀡-𑀥𑀸𑀢𑀽𑀦𑀁 𑀢𑀼 𑀧𑀪𑁂𑀤𑀢𑁄.

𑁧𑁬𑁭. 𑀏𑀓𑁂𑀓𑀸𑀭𑀫𑁆𑀫𑀡𑀁 𑀙𑀓𑁆𑀓𑀁, 𑀧𑀜𑁆𑀘𑀸𑀭𑀫𑁆𑀫𑀡𑀪𑁂𑀤𑀢𑁄;

𑀙𑀴𑀸𑀭𑀫𑁆𑀫𑀡𑀢𑁄 𑀘𑁂𑀯, 𑀳𑁄𑀢𑀺 𑀅𑀝𑁆𑀞𑀯𑀺𑀥𑀁 𑀫𑀦𑁄.

𑁧𑁬𑁮. 𑀢𑀢𑁆𑀣 𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸, 𑀳𑁄𑀦𑁆𑀢𑀺 𑀏𑀓𑁂𑀓𑀕𑁄𑀘𑀭𑀸;

𑀭𑀽𑀧𑀸𑀭𑀫𑁆𑀫𑀡𑀺𑀓𑀸 𑀤𑁆𑀯𑁂 𑀢𑀼, 𑀤𑁆𑀯𑁂 𑀤𑁆𑀯𑁂 𑀲𑀤𑁆𑀤𑀸𑀤𑀺𑀕𑁄𑀘𑀭𑀸.

𑁧𑁬𑁯. 𑀲𑀩𑁆𑀩𑀁 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁, 𑀧𑀜𑁆𑀘𑀸𑀪𑀺𑀜𑁆𑀜𑀸𑀯𑀺𑀯𑀚𑁆𑀚𑀺𑀢𑀁;

𑀲𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀜𑁆𑀘𑁂𑀢𑀺, 𑀏𑀓𑁂𑀓𑀸𑀭𑀫𑁆𑀫𑀡𑀁 𑀪𑀯𑁂.

𑁧𑁭𑁦. 𑀏𑀓𑁂𑀓𑀸𑀭𑀫𑁆𑀫𑀡𑀁 𑀙𑀓𑁆𑀓-𑀫𑀺𑀤𑀁 𑀜𑁂𑀬𑁆𑀬𑀁 𑀯𑀺𑀪𑀸𑀯𑀺𑀦𑀸;

𑀧𑀜𑁆𑀘𑀸𑀭𑀫𑁆𑀫𑀡𑀺𑀓𑀁 𑀦𑀸𑀫, 𑀫𑀦𑁄𑀥𑀸𑀢𑀼𑀢𑁆𑀢𑀬𑀁 𑀪𑀯𑁂.

𑁧𑁭𑁧. 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺, 𑀘𑀢𑁆𑀢𑀸𑀮𑀻𑀲𑀁 𑀢𑀣𑁂𑀓𑀓𑀁;

𑀅𑀪𑀺𑀜𑁆𑀜𑀸𑀦𑀺 𑀘 𑀲𑀩𑁆𑀩𑀸𑀦𑀺, 𑀙𑀴𑀸𑀭𑀫𑁆𑀫𑀡𑀺𑀓𑀸𑀦𑀺𑀢𑀺.

𑁧𑁭𑁨. 𑀘𑀺𑀢𑁆𑀢𑀁 𑀦𑀯𑀯𑀺𑀥𑀁 𑀳𑁄𑀢𑀺, 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀼;

𑀧𑀘𑁆𑀙𑀺𑀫𑀜𑁆𑀘 𑀢𑀺𑀥𑀸 𑀓𑀢𑁆𑀯𑀸, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄.

𑁧𑁭𑁩. 𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦𑁂𑀯, 𑀯𑀺𑀧𑀸𑀓𑀓𑁆𑀭𑀺𑀬𑀪𑁂𑀤𑀢𑁄;

𑀙𑀲𑀢𑁆𑀢𑀢𑀺𑀯𑀺𑀥𑁄 𑀪𑁂𑀤𑁄, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸.

𑁧𑁭𑁪. 𑀫𑀦𑁄𑀥𑀸𑀢𑀼𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸, 𑀯𑀺𑀧𑀸𑀓𑀓𑁆𑀭𑀺𑀬𑀪𑁂𑀤𑀢𑁄;

𑀦𑀯𑀥𑀸 𑀧𑀼𑀩𑁆𑀩𑀯𑀼𑀢𑁆𑀢𑁂𑀳𑀺, 𑀤𑀲𑀥𑀸 𑀳𑁄𑀢𑀺 𑀫𑀸𑀦𑀲𑀁.

𑁧𑁭𑁫. 𑀥𑀸𑀢𑀼𑀤𑁆𑀯𑀬𑀁 𑀢𑀺𑀥𑀸 𑀓𑀢𑁆𑀯𑀸, 𑀧𑀘𑁆𑀙𑀺𑀫𑀁 𑀧𑀼𑀦 𑀧𑀡𑁆𑀟𑀺𑀢𑁄;

𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑁧𑁭𑁬. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀫𑁆𑀧𑀺, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀢𑁄;

𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸𑀦, 𑀯𑀤𑁂 𑀤𑁆𑀯𑀸𑀤𑀲𑀥𑀸 𑀞𑀺𑀢𑀁.

𑁧𑁭𑁭. 𑀪𑀯𑁂 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀁, 𑀘𑀼𑀤𑁆𑀤𑀲𑀝𑁆𑀞𑀸𑀦𑀪𑁂𑀤𑀢𑁄;

𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀲𑁆𑀲, 𑀘𑀼𑀢𑀺𑀬𑀸𑀯𑀚𑁆𑀚𑀦𑀲𑁆𑀲 𑀘.

𑁧𑁭𑁮. 𑀧𑀜𑁆𑀘𑀦𑁆𑀦𑀁 𑀤𑀲𑁆𑀲𑀦𑀸𑀤𑀻𑀦𑀁, 𑀲𑀫𑁆𑀧𑀝𑀺𑀘𑁆𑀙𑀦𑀘𑁂𑀢𑀲𑁄;

𑀲𑀦𑁆𑀢𑀻𑀭𑀡𑀲𑁆𑀲 𑀯𑁄𑀝𑁆𑀞𑀩𑁆𑀩-𑀚𑀯𑀦𑀸𑀦𑀁 𑀯𑀲𑁂𑀦 𑀘.

𑁧𑁭𑁯. 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀲𑁆𑀲, 𑀢𑀣𑁂𑀯 𑀞𑀸𑀦𑀪𑁂𑀤𑀢𑁄;

𑀏𑀯𑀁 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀁, 𑀳𑁄𑀢𑀻𑀢𑀺 𑀧𑀭𑀺𑀤𑀻𑀧𑀬𑁂.

𑁧𑁮𑁦. 𑀪𑀽𑀫𑀺𑀧𑀼𑀕𑁆𑀕𑀮𑀦𑀸𑀦𑀸𑀢𑁆𑀢-𑀯𑀲𑁂𑀦 𑀘 𑀧𑀯𑀢𑁆𑀢𑀺𑀢𑁄;

𑀩𑀳𑀼𑀥𑀸 𑀧𑀦𑀺𑀤𑀁 𑀘𑀺𑀢𑁆𑀢𑀁, 𑀳𑁄𑀢𑀻𑀢𑀺 𑀘 𑀯𑀺𑀪𑀸𑀯𑀬𑁂.

𑁧𑁮𑁧. 𑀏𑀓𑀯𑀺𑀥𑀸𑀤𑀺𑀦𑀬𑁂 𑀧𑀦𑀺𑀫𑀲𑁆𑀫𑀺𑀁,

𑀬𑁄 𑀓𑀼𑀲𑀮𑁄 𑀫𑀢𑀺𑀫𑀸 𑀇𑀥 𑀪𑀺𑀓𑁆𑀔𑀼;

𑀢𑀲𑁆𑀲𑀪𑀺𑀥𑀫𑁆𑀫𑀕𑀢𑀸 𑀧𑀦 𑀅𑀢𑁆𑀣𑀸,

𑀳𑀢𑁆𑀣𑀕𑀢𑀸𑀫𑀮𑀓𑀸 𑀯𑀺𑀬 𑀳𑁄𑀦𑁆𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀏𑀓𑀯𑀺𑀥𑀸𑀤𑀺𑀦𑀺𑀤𑁆𑀤𑁂𑀲𑁄 𑀦𑀸𑀫

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.