𑁧𑁩. 𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀸𑀭𑀓𑀧𑀝𑀺𑀯𑁂𑀥𑀦𑀺𑀤𑁆𑀤𑁂𑀲𑁄

𑀏𑀢𑁆𑀣𑀸𑀳 𑁋 𑀦𑀺𑀤𑁆𑀤𑀺𑀝𑁆𑀞𑀸 𑀓𑀼𑀲𑀮𑀸𑀤𑀬𑁄 𑀦𑀸𑀫 𑀥𑀫𑁆𑀫𑀸, 𑀦 𑀧𑀦𑁂𑀢𑁂𑀲𑀁 𑀓𑀸𑀭𑀓𑁄 𑀅𑀢𑁆𑀢𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀢𑀲𑁆𑀲 𑀳𑀺 𑀓𑀸𑀭𑀓𑀲𑁆𑀲 𑀯𑁂𑀤𑀓𑀲𑁆𑀲 𑀅𑀢𑁆𑀢𑀦𑁄 𑀅𑀪𑀸𑀯𑁂 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀸𑀯𑁄 𑀲𑀺𑀬𑀸, 𑀢𑁂𑀲𑀫𑀪𑀸𑀯𑁂 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀻𑀦𑀁 𑀢𑁂𑀲𑀁 𑀯𑀺𑀧𑀸𑀓𑀸𑀦𑀫𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀤𑁂𑀲𑀦𑀸 𑀦𑀺𑀭𑀢𑁆𑀣𑀺𑀓𑀸𑀢𑀺? 𑀅𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀦𑀸𑀬𑀁 𑀦𑀺𑀭𑀢𑁆𑀣𑀺𑀓𑀸, 𑀲𑀸𑀢𑁆𑀣𑀺𑀓𑀸𑀯𑀸𑀬𑀁 𑀤𑁂𑀲𑀦𑀸. 𑀬𑀤𑀺 𑀓𑀸𑀭𑀓𑀲𑁆𑀲𑀸𑀪𑀸𑀯𑀸 𑀓𑀼𑀲𑀮𑀸𑀤𑀻𑀦𑀫𑀪𑀸𑀯𑁄 𑀲𑀺𑀬𑀸, 𑀢𑀲𑁆𑀲 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄𑀧𑀺 𑀅𑀪𑀸𑀯𑁄 𑀲𑀺𑀬𑀸. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀢𑀲𑁆𑀲 𑀅𑀢𑁆𑀢𑀦𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑀲𑁆𑀲𑀸𑀪𑀸𑀯𑀢𑁄. 𑀓𑀸𑀭𑀓𑀸𑀪𑀸𑀯𑁂𑀧𑀺 𑀓𑀢𑁆𑀢𑀸 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀘𑁂? 𑀢𑀣𑀸 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀅𑀲𑀢𑀺𑀧𑀺 𑀓𑀢𑁆𑀢𑀭𑀺 𑀅𑀢𑁆𑀣𑀺𑀢𑀸 𑀉𑀧𑀕𑀦𑁆𑀢𑀩𑁆𑀩𑀸, 𑀓𑀼𑀢𑁄𑀬𑀁 𑀢𑀯 𑀢𑀢𑁆𑀣𑀸𑀦𑀼𑀭𑁄𑀥𑁄, 𑀇𑀥 𑀯𑀺𑀭𑁄𑀥𑁄𑀢𑀺. 𑀅𑀣𑀸𑀧𑀺 𑀬𑀣𑀸 𑀧𑀦 𑀮𑁄𑀓𑁂 𑀓𑀸𑀭𑀓𑀸𑀪𑀸𑀯𑁂𑀧𑀺 𑀧𑀣𑀯𑀻𑀆𑀧𑀢𑁂𑀚𑀉𑀢𑀼𑀆𑀤𑀬𑁄 𑀧𑀝𑀺𑀘𑁆𑀘 𑀅𑀗𑁆𑀓𑀼𑀭𑀸𑀤𑀻𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀤𑀺𑀲𑁆𑀲𑀢𑀺, 𑀢𑀣𑀸 𑀏𑀢𑁂𑀲𑀫𑁆𑀧𑀺 𑀓𑀼𑀲𑀮𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣𑀸𑀧𑀺 𑀘𑁂𑀢𑁆𑀣 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀧𑀭𑀺𑀓𑀧𑁆𑀧𑀺𑀢𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀓𑀼𑀲𑀮𑀸𑀤𑀻𑀦𑀁 𑀓𑀢𑁆𑀢𑀸 𑀅𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀻𑀢𑀺 𑀘𑁂? 𑀢𑀫𑀼𑀧𑀧𑀭𑀺𑀓𑁆𑀔𑀺𑀲𑁆𑀲𑀸𑀫 𑀢𑀸𑀯, 𑀲𑁄 𑀧𑀦 𑀢𑀸𑀯 𑀅𑀢𑁆𑀢𑀸 𑀓𑀸𑀭𑀓𑁄 𑀯𑁂𑀤𑀓𑁄 𑀓𑀺𑀁 𑀲𑀘𑁂𑀢𑀦𑁄 𑀯𑀸, 𑀉𑀤𑀸𑀳𑀼 𑀅𑀘𑁂𑀢𑀦𑁄 𑀯𑀸𑀢𑀺? 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀅𑀘𑁂𑀢𑀦𑁄 𑀲𑀺𑀬𑀸, 𑀧𑀸𑀓𑀸𑀭𑀢𑀭𑀼𑀧𑀸𑀲𑀸𑀡𑀲𑀤𑀺𑀲𑁄 𑀲𑀺𑀬𑀸. 𑀢𑀲𑁆𑀲 𑀓𑀸𑀭𑀓𑀯𑁂𑀤𑀓𑀢𑁆𑀢𑀸𑀪𑀸𑀯𑁄 𑀲𑀺𑀬𑀸. 𑀬𑀤𑀺 𑀲𑀘𑁂𑀢𑀦𑁄, 𑀲𑁄 𑀘𑁂𑀢𑀦𑀸𑀬 𑀅𑀜𑁆𑀜𑁄 𑀯𑀸 𑀲𑀺𑀬𑀸, 𑀅𑀦𑀜𑁆𑀜𑁄 𑀯𑀸. 𑀅𑀣𑀸𑀦𑀜𑁆𑀜𑁄, 𑀘𑁂𑀢𑀦𑀸𑀬 𑀦𑀸𑀲𑁂 𑀅𑀢𑁆𑀢𑀦𑁄𑀧𑀺 𑀦𑀸𑀲𑁄 𑀲𑀺𑀬𑀸. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀘𑁂𑀢𑀦𑀸𑀬 𑀅𑀦𑀜𑁆𑀜𑀢𑁆𑀢𑀸.

𑀅𑀣𑀸𑀧𑀺 𑀪𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑀏𑀯𑀁 𑀲𑀺𑀬𑀸, 𑀅𑀢𑁆𑀢𑀦𑁄 𑀧𑀦 𑀦𑀸𑀲𑁄 𑀦 𑀪𑀯𑀢𑀺 𑀦𑀺𑀘𑁆𑀘𑀢𑁆𑀢𑀸, 𑀘𑁂𑀢𑀦𑀸𑀬𑀬𑁂𑀯 𑀦𑀸𑀲𑁄 𑀪𑀯𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀢𑁆𑀢𑀦𑁄 𑀅𑀦𑀸𑀲𑁂 𑀲𑀢𑀺 𑀘𑁂𑀢𑀦𑀸𑀬𑀧𑀺 𑀦𑀸𑀲𑁄 𑀦 𑀪𑀯𑀢𑀺. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀘𑁂𑀢𑀦𑀸𑀬 𑀅𑀦𑀜𑁆𑀜𑀢𑁆𑀢𑀸. 𑀘𑁂𑀢𑀦𑀢𑁆𑀢𑀸𑀦𑀁 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺 𑀘𑁂𑀢𑀦𑀸𑀬𑀬𑁂𑀯 𑀦𑀸𑀲𑁄 𑀪𑀯𑀢𑀺, 𑀦 𑀅𑀢𑁆𑀢𑀦𑁄𑀢𑀺 𑀅𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀘𑁂𑀢𑀦𑀸𑀬𑀬𑁂𑀯 𑀯𑀺𑀦𑀸𑀲𑁂 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺, 𑀅𑀢𑁆𑀢𑀸𑀯 𑀦𑀲𑁆𑀲𑀢𑀼, 𑀢𑀺𑀝𑁆𑀞𑀢𑀼 𑀘𑁂𑀢𑀦𑀸. 𑀅𑀣 𑀘𑁂𑀢𑀦𑀸𑀬 𑀦𑀸𑀲𑁂 𑀅𑀢𑁆𑀢𑀦𑁄 𑀦𑀸𑀲𑁄 𑀦 𑀪𑀯𑀢𑀻𑀢𑀺 𑀘𑁂? 𑀘𑁂𑀢𑀦𑀸𑀬 𑀅𑀢𑁆𑀢𑀸 𑀅𑀜𑁆𑀜𑁄 𑀲𑀺𑀬𑀸. 𑀅𑀣 𑀅𑀜𑁆𑀜𑀲𑁆𑀲 𑀅𑀢𑁆𑀢𑀲𑁆𑀲 𑀦𑀸𑀲𑁂 𑀲𑀢𑀺 𑀲𑀬𑀁 𑀦𑀸𑀲𑁄 𑀦 𑀪𑀯𑀢𑀺, 𑀏𑀯𑀜𑁆𑀘 𑀲𑀢𑀺 ‘‘𑀘𑁂𑀢𑀦𑀸𑀬 𑀅𑀦𑀜𑁆𑀜𑁄 𑀅𑀢𑁆𑀢𑀸’’𑀢𑀺 𑀢𑀯 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀅𑀣𑀸𑀧𑀺 𑀘𑁂𑀢𑀦𑀢𑁆𑀢𑀸𑀦𑀁 𑀅𑀦𑀜𑁆𑀜𑀢𑁆𑀢𑁂 𑀲𑀢𑀺 𑀅𑀢𑁆𑀢𑀦𑁄 𑀅𑀦𑀸𑀲𑁄 𑀘𑁂𑀢𑀦𑀸𑀬𑀧𑀺 𑀅𑀦𑀸𑀲𑁄 𑀪𑀯𑀢𑀼. 𑀅𑀣 𑀦 𑀪𑀯𑀢𑀺, 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀅𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀯𑀺𑀧𑀭𑀻𑀢𑀁 𑀯𑀸 𑀲𑀺𑀬𑀸, 𑀅𑀢𑁆𑀢𑀸 𑀦𑀲𑁆𑀲𑀢𑀼, 𑀘𑁂𑀢𑀦𑀸 𑀢𑀺𑀝𑁆𑀞𑀢𑀼. 𑀅𑀣 𑀧𑀦 𑀏𑀯𑀁 𑀦 𑀪𑀯𑀢𑀻𑀢𑀺 𑀘𑁂? 𑀅𑀦𑀜𑁆𑀜𑀢𑁆𑀢𑀧𑀓𑁆𑀔𑀁 𑀧𑀭𑀺𑀘𑁆𑀘𑀚. 𑀅𑀣 𑀧𑀦 𑀦 𑀧𑀭𑀺𑀘𑁆𑀘𑀚𑀲𑀺, 𑀧𑀝𑀺𑀜𑁆𑀜𑀸𑀳𑀻𑀦𑁄 𑀪𑀯𑀲𑀺.

𑀅𑀣𑀸𑀬𑀁 𑀪𑀯𑀢𑁄 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 ‘‘𑀦𑀸𑀬𑀁 𑀫𑀫 𑀅𑀢𑁆𑀢𑀸 𑀘𑁂𑀢𑀦𑀸𑀬 𑀅𑀦𑀜𑁆𑀜𑁄, 𑀅𑀜𑁆𑀜𑁄𑀬𑁂𑀯𑀸’’𑀢𑀺? 𑀢𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀇𑀥 𑀧𑀦 𑀅𑀜𑁆𑀜𑀢𑁆𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀜𑁆𑀘 𑀤𑁂𑀲𑀦𑁆𑀢𑀭𑀓𑀢𑀫𑀜𑁆𑀜𑀢𑁆𑀢𑀜𑁆𑀘𑀸𑀢𑀺. 𑀢𑀢𑁆𑀣 𑀓𑀺𑀁 𑀢𑁆𑀯𑀁 𑀘𑁂𑀢𑀦𑀢𑁆𑀢𑀸𑀦𑀁 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑁂𑀲𑀺, 𑀉𑀤𑀸𑀳𑀼 𑀤𑁂𑀲𑀦𑁆𑀢𑀭𑀓𑀢𑀫𑀜𑁆𑀜𑀢𑁆𑀢𑀦𑁆𑀢𑀺? 𑀅𑀳𑀁 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑀸𑀫𑀻𑀢𑀺. 𑀬𑀣𑀸 𑀳𑀺 𑀭𑀽𑀧𑀭𑀲𑀕𑀦𑁆𑀥𑀸𑀤𑀻𑀦𑀫𑁂𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀘𑁂𑀢𑀦𑀢𑁆𑀢𑀸𑀦𑀫𑁂𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀮𑀓𑁆𑀔𑀡𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑀸𑀫𑀻𑀢𑀺. 𑀢𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀬𑀣𑀸 𑀳𑀺 𑀚𑀸𑀢𑀯𑁂𑀤𑀲𑁆𑀲 𑀟𑀬𑁆𑀳𑀫𑀸𑀦𑁂 𑀆𑀫𑀓𑀲𑀗𑁆𑀖𑀝𑁂 𑀆𑀫𑀓𑀯𑀡𑁆𑀡𑀯𑀺𑀦𑀸𑀲𑁂 𑀭𑀲𑀸𑀤𑀻𑀦𑀁 𑀯𑀺𑀦𑀸𑀲𑁄 𑀪𑀯𑀢𑀺, 𑀢𑀣𑁂𑀯 𑀘𑁂𑀢𑀦𑀸𑀬 𑀯𑀺𑀦𑀸𑀲𑁂 𑀅𑀢𑁆𑀢𑀦𑁄𑀧𑀺 𑀯𑀺𑀦𑀸𑀲𑁄 𑀲𑀺𑀬𑀸. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀭𑀽𑀧𑀭𑀲𑀸𑀤𑀻𑀦𑀁 𑀯𑀺𑀬 𑀏𑀓𑀤𑁂𑀲𑀢𑁆𑀢𑀸𑀢𑀺.

𑀅𑀣𑁂𑀯𑀁 𑀪𑀯𑀢𑁄 𑀫𑀢𑀺 𑀲𑀺𑀬𑀸 ‘‘𑀏𑀓𑀤𑁂𑀲𑀢𑁆𑀢𑁂 𑀲𑀢𑀺𑀧𑀺 𑀅𑀢𑁆𑀢𑀦𑁄 𑀧𑀦 𑀦𑀸𑀲𑁄 𑀦 𑀪𑀯𑀢𑀺, 𑀘𑁂𑀢𑀦𑀸𑀬𑀬𑁂𑀯 𑀯𑀺𑀦𑀸𑀲𑁄 𑀪𑀯𑀢𑀻’’𑀢𑀺? 𑀅𑀢𑁆𑀭 𑀯𑀼𑀘𑁆𑀘𑀢𑁂 𑁋 𑀅𑀢𑁆𑀢𑀦𑁄 𑀅𑀦𑀸𑀲𑁂 𑀘𑁂𑀢𑀦𑀸𑀬𑀧𑀺 𑀅𑀦𑀸𑀲𑁄𑀯 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀘𑁂? 𑀭𑀽𑀧𑀭𑀲𑀸𑀤𑀻𑀦𑀁 𑀯𑀺𑀬 𑀅𑀯𑀺𑀦𑀺𑀩𑁆𑀪𑁄𑀕𑀢𑁄. 𑀅𑀣 𑀲𑀫𑀸𑀦𑁂 𑀏𑀓𑀤𑁂𑀲𑀢𑁆𑀢𑁂 𑀅𑀯𑀺𑀦𑀺𑀩𑁆𑀪𑁄𑀕𑀪𑀸𑀯𑁂𑀧𑀺 𑀓𑁂𑀦 𑀳𑁂𑀢𑀼𑀦𑀸 𑀘𑁂𑀢𑀦𑀸𑀬 𑀏𑀯 𑀦𑀸𑀲𑁄 𑀪𑀯𑀢𑀺, 𑀦 𑀧𑀦 𑀅𑀢𑁆𑀢𑀦𑁄. 𑀅𑀣 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺, 𑀢𑀯 𑀮𑀤𑁆𑀥𑀺𑀬𑀸 𑀅𑀢𑁆𑀢𑀸𑀯 𑀦𑀲𑁆𑀲𑀢𑀼, 𑀢𑀺𑀝𑁆𑀞𑀢𑀼 𑀘𑁂𑀢𑀦𑀸. 𑀅𑀣 𑀘𑁂𑀢𑀦𑀸𑀬 𑀦𑀸𑀲𑁂 𑀅𑀢𑁆𑀢𑀦𑁄 𑀦𑀸𑀲𑁄 𑀦 𑀪𑀯𑀢𑀺, 𑀉𑀪𑀺𑀦𑁆𑀦𑀁 𑀏𑀓𑀤𑁂𑀲𑀢𑀸 𑀦𑀢𑁆𑀣𑀺. 𑀏𑀯𑀜𑁆𑀘 𑀲𑀢𑀺 𑀓𑁄 𑀤𑁄𑀲𑁄𑀢𑀺 𑀘𑁂? 𑀬𑀁 𑀧𑀦 𑀢𑀬𑀸 𑀯𑀼𑀢𑁆𑀢𑀁, 𑀬𑀣𑀸 𑀭𑀽𑀧𑀭𑀲𑀕𑀦𑁆𑀥𑀸𑀤𑀻𑀦𑀁 𑀏𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀁, 𑀢𑀣𑀸 𑀘𑁂𑀢𑀦𑀢𑁆𑀢𑀸𑀦𑀫𑁂𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀦𑀫𑁆𑀧𑀺 𑀮𑀓𑁆𑀔𑀡𑀢𑁄 𑀅𑀜𑁆𑀜𑀢𑁆𑀢𑀦𑁆𑀢𑀺? 𑀢𑀫𑀬𑀼𑀢𑁆𑀢𑀦𑁆𑀢𑀺 𑀢𑀯 𑀧𑀝𑀺𑀜𑁆𑀜𑀸 𑀳𑀻𑀦𑀸. 𑀅𑀣 𑀭𑀽𑀧𑀭𑀲𑀸𑀤𑀻𑀦𑀁 𑀯𑀺𑀬 𑀲𑀫𑀸𑀦𑁂𑀧𑀺 𑀏𑀓𑀤𑁂𑀲𑀢𑁆𑀢𑁂 𑀬𑀤𑀺 𑀅𑀢𑁆𑀢𑀦𑁄 𑀅𑀦𑀸𑀲𑁂 𑀘𑁂𑀢𑀦𑀸𑀬𑀧𑀺 𑀅𑀦𑀸𑀲𑁄 𑀦 𑀪𑀯𑀢𑀺, 𑀧𑀝𑀺𑀜𑁆𑀜𑀸𑀳𑀻𑀦𑁄 𑀅𑀲𑀺. 𑀅𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀯𑀺𑀧𑀭𑀻𑀢𑀁 𑀯𑀸 𑀲𑀺𑀬𑀸, 𑀢𑀯 𑀅𑀢𑁆𑀢𑀸 𑀦𑀲𑁆𑀲𑀢𑀼, 𑀘𑁂𑀢𑀦𑀸 𑀢𑀺𑀝𑁆𑀞𑀢𑀼. 𑀅𑀣𑁂𑀯𑀁 𑀦 𑀪𑀯𑀢𑀻𑀢𑀺 𑀘𑁂? 𑀏𑀓𑀤𑁂𑀲𑀢𑀸𑀯 𑀦𑀢𑁆𑀣𑀻𑀢𑀺.

𑀅𑀣 𑀤𑁂𑀲𑀦𑁆𑀢𑀭𑀓𑀢𑀫𑀜𑁆𑀜𑀢𑁆𑀢𑀁 𑀯𑀤𑁂𑀲𑀺, 𑀘𑁂𑀢𑀦𑀢𑁆𑀢𑀸𑀦𑀁 𑀅𑀜𑁆𑀜𑀢𑁆𑀢𑁂 𑀲𑀢𑀺 𑀖𑀝𑀧𑀝𑀲𑀓𑀝𑀕𑁂𑀳𑀸𑀤𑀻𑀦𑀁 𑀯𑀺𑀬 𑀅𑀜𑁆𑀜𑀢𑁆𑀢𑀁 𑀲𑀺𑀬𑀸. 𑀘𑁂𑀢𑀦𑀸𑀬 𑀯𑀺𑀦𑀸 𑀅𑀦𑀜𑁆𑀜𑀢𑀸 𑀢𑁂 𑀅𑀢𑁆𑀢𑀸 𑀦 𑀖𑀝𑁂𑀦 𑀯𑀺𑀦𑀸 𑀧𑀝𑁄 𑀯𑀺𑀬 𑀅𑀜𑁆𑀜𑁄 𑀲𑀺𑀬𑀸. 𑀅𑀜𑁆𑀜𑁄 𑀘 𑀳𑀺 𑀖𑀝𑁄 𑀅𑀜𑁆𑀜𑁄 𑀘 𑀧𑀝𑁄𑀢𑀺? 𑀦, 𑀏𑀯𑀜𑁆𑀘 𑀲𑀢𑀺 𑀓𑁄 𑀤𑁄𑀲𑁄𑀢𑀺 𑀘𑁂? ‘‘𑀅𑀘𑁂𑀢𑀦𑁄 𑀅𑀢𑁆𑀢𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀤𑁄𑀲𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀻𑀢𑀺. 𑀢𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀦 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀯𑁂𑀤𑀓𑁄 𑀯𑀸 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺.

𑀬𑀤𑀺 𑀏𑀯𑀁 𑀅𑀣 𑀓𑀲𑁆𑀫𑀸 𑀪𑀕𑀯𑀢𑀸 𑁋

𑁭𑁭𑁯. ‘‘𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁,

𑀲𑁄 𑀘 𑀲𑀦𑁆𑀥𑀸𑀯𑀢𑀻 𑀦𑀭𑁄;

𑀲𑁄 𑀘 𑀓𑀭𑁄𑀢𑀺 𑀯𑁂𑀤𑁂𑀢𑀺,

𑀲𑀼𑀔𑀤𑀼𑀓𑁆𑀔𑀁 𑀲𑀬𑀁𑀓𑀢’’𑀦𑁆𑀢𑀺 𑀘.

𑁭𑁮𑁦. ‘‘𑀲𑀢𑁆𑀢𑁄 𑀲𑀁𑀲𑀸𑀭𑀫𑀸𑀧𑀦𑁆𑀦𑁄,

𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀁;

𑀅𑀢𑁆𑀣𑀺 𑀫𑀸𑀢𑀸 𑀅𑀢𑁆𑀣𑀺 𑀧𑀺𑀢𑀸,

𑀅𑀢𑁆𑀣𑀺 𑀲𑀢𑁆𑀢𑁄𑀧𑀧𑀸𑀢𑀺𑀓𑁄’’𑀢𑀺 𑀘.

𑁭𑁮𑁧. ‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸,

𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄;

𑀪𑀸𑀭𑀸𑀤𑀸𑀦𑀁 𑀤𑀼𑀓𑁆𑀔𑀁 𑀮𑁄𑀓𑁂,

𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀲𑀼𑀔’’𑀦𑁆𑀢𑀺 𑀘.

𑁭𑁮𑁨. ‘‘𑀬𑀜𑁆𑀳𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄,

𑀓𑀸𑀬𑁂𑀦 𑀯𑀸𑀘𑀸 𑀉𑀤 𑀘𑁂𑀢𑀲𑀸;

𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺,

𑀢𑀜𑁆𑀘 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺 𑀘.

𑁭𑁮𑁩. ‘‘𑀏𑀓𑀲𑁆𑀲𑁂𑀓𑁂𑀦 𑀓𑀧𑁆𑀧𑁂𑀦,

𑀧𑀼𑀕𑁆𑀕𑀮𑀲𑁆𑀲𑀝𑁆𑀞𑀺𑀲𑀜𑁆𑀘𑀬𑁄;

𑀲𑀺𑀬𑀸 𑀧𑀩𑁆𑀩𑀢𑀲𑀫𑁄 𑀭𑀸𑀲𑀺,

𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸’’𑀢𑀺 𑀘.

𑁭𑁮𑁪. ‘‘𑀅𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘,

𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄,

𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺 𑀘. 𑁋

𑀯𑀼𑀢𑁆𑀢𑀦𑁆𑀢𑀺. 𑀲𑀘𑁆𑀘𑀁 𑀏𑀯𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀢𑀜𑁆𑀘 𑀔𑁄 𑀲𑀫𑁆𑀫𑀼𑀢𑀺𑀯𑀲𑁂𑀦, 𑀦 𑀧𑀭𑀫𑀢𑁆𑀣𑀢𑁄. 𑀦𑀦𑀼 𑀪𑀕𑀯𑀢𑀸 𑀇𑀤𑀫𑁆𑀧𑀺 𑀯𑀼𑀢𑁆𑀢𑀁 𑁋

𑁭𑁮𑁫. ‘‘𑀓𑀺𑀁 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀻’’𑀢𑀺 𑀘.

𑁭𑁮𑁬. ‘‘𑀬𑀣𑀸𑀧𑀺 𑀅𑀗𑁆𑀕𑀲𑀫𑁆𑀪𑀸𑀭𑀸,

𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼,

𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀻’’𑀢𑀺 𑀘.

𑀢𑀲𑁆𑀫𑀸 𑀦 𑀯𑀘𑀦𑀫𑀢𑁆𑀢𑀫𑁂𑀯𑀸𑀯𑀮𑀫𑁆𑀩𑀺𑀢𑀩𑁆𑀩𑀁, 𑀦 𑀘 𑀤𑀴𑁆𑀳𑀫𑀽𑀴𑁆𑀳𑀕𑀸𑀳𑀺𑀦𑀸 𑀘 𑀪𑀯𑀺𑀢𑀩𑁆𑀩𑀁, 𑀕𑀭𑀼𑀓𑀼𑀮𑀫𑀼𑀧𑀲𑁂𑀯𑀺𑀢𑁆𑀯𑀸 𑀲𑀼𑀢𑁆𑀢𑀧𑀤𑀸𑀦𑀁 𑀅𑀥𑀺𑀧𑁆𑀧𑀸𑀬𑁄 𑀚𑀸𑀦𑀺𑀢𑀩𑁆𑀩𑁄, 𑀲𑀼𑀢𑁆𑀢𑀧𑀤𑁂𑀲𑀼 𑀅𑀪𑀺𑀬𑁄𑀕𑁄 𑀓𑀸𑀢𑀩𑁆𑀩𑁄. 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀪𑀕𑀯𑀢𑀸 𑀯𑀼𑀢𑁆𑀢𑀸𑀦𑀺 𑁋 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘𑀁, 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘𑀸’’𑀢𑀺. 𑀢𑀲𑁆𑀫𑀸 𑀤𑁆𑀯𑁂𑀧𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀅𑀲𑀗𑁆𑀓𑀭𑀢𑁄 𑀜𑀸𑀢𑀩𑁆𑀩𑀸𑀦𑀺. 𑀏𑀯𑀁 𑀅𑀲𑀗𑁆𑀓𑀭𑀢𑁄 𑀜𑀢𑁆𑀯𑀸 𑀓𑁄𑀘𑀺 𑀓𑀸𑀭𑀓𑁄 𑀯𑀸 𑀯𑁂𑀤𑀓𑁄 𑀯𑀸 𑀦𑀺𑀘𑁆𑀘𑁄 𑀥𑀼𑀯𑁄 𑀅𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀡𑁆𑀟𑀺𑀢𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀅𑀢𑁆𑀣𑀓𑀸𑀫𑁂𑀦 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺.

𑁭𑁮𑁭. 𑀬𑁄 𑀇𑀫𑀁 𑀕𑀦𑁆𑀣𑀁 𑀅𑀘𑁆𑀘𑀦𑁆𑀢𑀁, 𑀘𑀺𑀦𑁆𑀢𑁂𑀢𑀺 𑀲𑀢𑀢𑀫𑁆𑀧𑀺 𑀲𑁄;

𑀓𑀫𑁂𑀦 𑀧𑀭𑀫𑀸 𑀧𑀜𑁆𑀜𑀸, 𑀢𑀲𑁆𑀲 𑀕𑀘𑁆𑀙𑀢𑀺 𑀯𑁂𑀧𑀼𑀮𑀁.

𑁭𑁮𑁮. 𑀅𑀢𑀺𑀫𑀢𑀺𑀓𑀭𑀫𑀸𑀥𑀺𑀦𑀻𑀳𑀭𑀁,

𑀯𑀺𑀫𑀢𑀺𑀯𑀺𑀦𑀸𑀲𑀓𑀭𑀁 𑀧𑀺𑀬𑀓𑁆𑀓𑀭𑀁;

𑀧𑀞𑀢𑀺 𑀲𑀼𑀡𑀢𑀺 𑀬𑁄 𑀲𑀤𑀸 𑀇𑀫𑀁,

𑀯𑀺𑀓𑀲𑀢𑀺 𑀢𑀲𑁆𑀲 𑀫𑀢𑀻𑀥 𑀪𑀺𑀓𑁆𑀔𑀼𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀓𑀸𑀭𑀓𑀧𑀝𑀺𑀯𑁂𑀥𑀦𑀺𑀤𑁆𑀤𑁂𑀲𑁄 𑀦𑀸𑀫

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.