𑁧𑁧. 𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀦𑀺𑀩𑁆𑀩𑀸𑀦𑀦𑀺𑀤𑁆𑀤𑁂𑀲𑁄

𑁭𑁬𑁮. 𑀭𑀽𑀧𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑀁, 𑀦𑀺𑀩𑁆𑀩𑀸𑀦𑀁 𑀬𑀁 𑀧𑀦𑀸𑀤𑀺𑀢𑁄;

𑀢𑀲𑁆𑀲𑀺𑀤𑀸𑀦𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀯𑀺𑀪𑀸𑀯𑀦𑀦𑀬𑀓𑁆𑀓𑀫𑁄.

𑁭𑁬𑁯. 𑀢𑀲𑁆𑀫𑀸𑀳𑀁 𑀢𑀲𑁆𑀲 𑀤𑀲𑁆𑀲𑁂𑀢𑀼𑀁, 𑀤𑀼𑀓𑁆𑀓𑀭𑀲𑁆𑀲 𑀬𑀣𑀸𑀩𑀮𑀁;

𑀤𑀼𑀩𑁆𑀩𑁄𑀥𑀲𑁆𑀲 𑀧𑀯𑀓𑁆𑀔𑀸𑀫𑀺, 𑀯𑀺𑀪𑀸𑀯𑀦𑀫𑀺𑀢𑁄 𑀧𑀭𑀁.

𑀢𑀢𑁆𑀣 𑀦𑀺𑀩𑁆𑀩𑀸𑀦𑀦𑁆𑀢𑀺 𑀪𑀯𑀸𑀪𑀯𑀁 𑀯𑀺𑀦𑀦𑀢𑁄 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘 𑀧𑀯𑀼𑀘𑁆𑀘𑀢𑀺 𑀅𑀫𑀢𑀁 𑀅𑀲𑀗𑁆𑀔𑀢𑀁 𑀧𑀭𑀫𑀁 𑀲𑀼𑀔𑀁. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺.

𑁭𑁭𑁦. 𑀬𑀲𑁆𑀲 𑀘𑀸𑀥𑀺𑀕𑀫𑀸 𑀲𑀩𑁆𑀩-𑀓𑀺𑀮𑁂𑀲𑀸𑀦𑀁 𑀔𑀬𑁄 𑀪𑀯𑁂;

𑀦𑀺𑀩𑁆𑀩𑀸𑀦𑀫𑀺𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀦𑀺𑀩𑁆𑀩𑀸𑀦𑀓𑀼𑀲𑀮𑁂𑀦 𑀢𑀁.

𑀏𑀢𑀁 𑀘 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀢𑀬𑀺𑀤𑀁 𑀲𑀦𑁆𑀢𑀺𑀮𑀓𑁆𑀔𑀡𑀁, 𑀅𑀘𑁆𑀘𑀼𑀢𑀺𑀭𑀲𑀁, 𑀅𑀲𑁆𑀲𑀸𑀲𑀓𑀭𑀡𑀭𑀲𑀁 𑀯𑀸, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀺𑀲𑁆𑀲𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 𑀦 𑀧𑀭𑀫𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀏𑀓𑁄 𑀲𑀪𑀸𑀯𑁄 𑀅𑀢𑁆𑀣𑀺, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸 𑀯𑀺𑀬, 𑀲𑀲𑀯𑀺𑀲𑀸𑀡𑀁 𑀯𑀺𑀬 𑀘 𑀅𑀦𑀼𑀧𑀮𑀩𑁆𑀪𑀦𑀻𑀬𑀢𑁄𑀢𑀺? 𑀦, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀸𑀦𑀁 𑀳𑀺𑀢𑀕𑀯𑁂𑀲𑀻𑀦𑀁 𑀬𑀣𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀮𑀩𑁆𑀪𑀦𑀻𑀬𑀢𑁄. 𑀬𑀁 𑀳𑀺 𑀧𑀼𑀣𑀼𑀚𑁆𑀚𑀦𑀸 𑀦𑁄𑀧𑀮𑀩𑁆𑀪𑀦𑁆𑀢𑀺, 𑀢𑀁 ‘‘𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣𑀸𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 ‘‘𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀼𑀝𑁆𑀞𑁂𑀦 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀭𑀸𑀕𑀸𑀤𑀻𑀦𑀁 𑀔𑀬𑁄𑀯 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀫𑁂𑀯 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑁂? 𑀢𑀁 𑀦. 𑀓𑀲𑁆𑀫𑀸? 𑀅𑀭𑀳𑀢𑁆𑀢𑀲𑁆𑀲𑀸𑀧𑀺 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀧𑀲𑀗𑁆𑀕𑀤𑁄𑀲𑀸𑀧𑀢𑁆𑀢𑀺𑀢𑁄. 𑀓𑀣𑀁? 𑀦𑀺𑀩𑁆𑀩𑀸𑀦𑀁 𑀧𑀼𑀘𑁆𑀙𑀸𑀦𑀦𑁆𑀢𑀭𑀫𑁂𑀯 ‘‘𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀅𑀭𑀳𑀢𑁆𑀢’’𑀦𑁆𑀢𑀺 𑀧𑀼𑀝𑁆𑀞𑁂𑀦 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀭𑀸𑀕𑀸𑀤𑀻𑀦𑀁 𑀔𑀬𑁄𑀯 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀯 𑀫𑀢𑁂𑀦 𑀅𑀭𑀳𑀢𑁆𑀢𑀨𑀮𑀲𑁆𑀲𑀸𑀧𑀺 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀢𑀸 𑀪𑀯𑁂𑀬𑁆𑀬, 𑀦 𑀘𑁂𑀢𑀁 𑀬𑀼𑀢𑁆𑀢𑀁 𑀅𑀦𑀼𑀢𑁆𑀢𑀭𑀲𑁆𑀲 𑀮𑁄𑀓𑀼𑀢𑁆𑀢𑀭𑀨𑀮𑀘𑀺𑀢𑁆𑀢𑀲𑁆𑀲 𑀭𑀸𑀕𑀸𑀦𑀁 𑀔𑀬𑀫𑀢𑁆𑀢𑀢𑀸𑀧𑀚𑁆𑀚𑀦𑀁, 𑀢𑀲𑁆𑀫𑀸 𑀫𑀸 𑀏𑀯𑀁 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀯𑀤𑁂𑀲𑀺, 𑀉𑀪𑀺𑀦𑁆𑀦𑀁 𑀧𑀦 𑀲𑀼𑀢𑁆𑀢𑀸𑀦𑀁 𑀅𑀢𑁆𑀣𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄.

𑀬𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲𑀸𑀥𑀺𑀕𑀫𑁂𑀦 𑀭𑀸𑀕𑀸𑀤𑀻𑀦𑀁 𑀔𑀬𑁄 𑀳𑁄𑀢𑀺, 𑀲𑁄 𑀥𑀫𑁆𑀫𑁄 𑀭𑀸𑀕𑀸𑀤𑀻𑀦𑀁 𑀔𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸 𑀅𑀓𑁆𑀔𑀬𑁄𑀧𑀺 𑀲𑀫𑀸𑀦𑁄 ‘‘𑀭𑀸𑀕𑀸𑀤𑀻𑀦𑀁 𑀔𑀬𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀔𑀬𑁄𑀧𑀘𑀸𑀭𑁂𑀦 𑀯𑀼𑀢𑁆𑀢𑁄, ‘‘𑀢𑀺𑀧𑀼𑀲𑀁 𑀚𑀭𑁄 𑀕𑀼𑀴𑁄 𑀲𑁂𑀫𑁆𑀳𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀭𑀳𑀢𑁆𑀢𑀁 𑀧𑀦 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 ‘‘𑀔𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀭𑀸𑀕𑀸𑀤𑀻𑀦𑀁 𑀔𑀬𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬, 𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀧𑀺 𑀲𑀫𑀥𑀺𑀕𑀢𑀦𑀺𑀩𑁆𑀩𑀸𑀦𑀸 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑀸 𑀪𑀯𑁂𑀬𑁆𑀬𑀼𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀢𑁆𑀢𑀸𑀤𑀺𑀤𑁄𑀲𑀸𑀧𑀢𑁆𑀢𑀺𑀢𑁄 𑀘. 𑀏𑀯𑀜𑁆𑀳𑀺 𑀲𑀢𑀺 𑀭𑀸𑀕𑀸𑀤𑀺𑀓𑁆𑀔𑀬𑀸𑀦𑀁 𑀩𑀳𑀼𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀲𑁆𑀲𑀸𑀧𑀺 𑀩𑀳𑀼𑀪𑀸𑀯𑁄 𑀪𑀯𑁂𑀬𑁆𑀬, 𑀲𑀗𑁆𑀔𑀢𑀮𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬, 𑀲𑀗𑁆𑀔𑀢𑀮𑀓𑁆𑀔𑀡𑀢𑁆𑀢𑀸 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀜𑁆𑀘, 𑀲𑀗𑁆𑀔𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬𑀸𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀬𑀤𑀺 𑀔𑀬𑁄 𑀦𑀺𑀩𑁆𑀩𑀸𑀦𑀁 𑀪𑀯𑁂𑀬𑁆𑀬, 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀫𑀕𑁆𑀕𑀨𑀮𑀘𑀺𑀢𑁆𑀢𑀸𑀦𑀁 𑀓𑀺𑀁 𑀦𑀼 𑀆𑀭𑀫𑁆𑀫𑀡𑀁 𑀯𑀤𑁂𑀲𑀺, 𑀯𑀤 𑀪𑀤𑁆𑀭𑀫𑀼𑀔𑀸𑀢𑀺? 𑀭𑀸𑀕𑀸𑀤𑀻𑀦𑀁 𑀔𑀬𑀫𑁂𑀯 𑀯𑀤𑀸𑀫𑀻𑀢𑀺. 𑀓𑀺𑀁 𑀧𑀦 𑀭𑀸𑀕𑀸𑀤𑀬𑁄 𑀕𑁄𑀢𑁆𑀭𑀪𑀼𑀆𑀤𑀻𑀦𑀁 𑀔𑀡𑁂 𑀔𑀻𑀬𑀦𑁆𑀢𑀺, 𑀉𑀤𑀸𑀳𑀼 𑀔𑀻𑀬𑀺𑀲𑁆𑀲𑀦𑁆𑀢𑀺, 𑀅𑀣 𑀔𑀻𑀡𑀸𑀢𑀺? 𑀓𑀺𑀁 𑀧𑀦𑁂𑀢𑁆𑀣 ‘‘𑀔𑀻𑀡𑁂𑀲𑁆𑀯𑁂𑀯 𑀔𑀬𑀁 𑀯𑀤𑀸𑀫𑀻’’𑀢𑀺. 𑀲𑀼𑀝𑁆𑀞𑀼 𑀉𑀧𑀥𑀸𑀭𑁂𑀢𑁆𑀯𑀸 𑀯𑀤 𑀪𑀤𑁆𑀭𑀫𑀼𑀔𑀸𑀢𑀺, 𑀬𑀤𑀺 𑀔𑀻𑀡𑁂𑀲𑁆𑀯𑁂𑀯 𑀔𑀬𑀁 𑀯𑀤𑁂𑀲𑀺, 𑀦 𑀕𑁄𑀢𑁆𑀭𑀪𑀼𑀘𑀺𑀢𑁆𑀢𑀸𑀤𑀻𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀲𑀺𑀚𑁆𑀛𑀢𑀻𑀢𑀺. 𑀓𑀺𑀁 𑀓𑀸𑀭𑀡𑀁? 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀭𑀸𑀕𑀸𑀤𑀬𑁄 𑀔𑀻𑀬𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀯𑁄𑀤𑀸𑀦𑀓𑁆𑀔𑀡𑁂, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀔𑀻𑀬𑀦𑁆𑀢𑀺, 𑀦 𑀔𑀻𑀡𑀸, 𑀨𑀮𑀓𑁆𑀔𑀡𑁂 𑀔𑀻𑀡𑀸. 𑀏𑀯𑀁 𑀲𑀦𑁆𑀢𑁂 𑀪𑀯𑀢𑁄 𑀫𑀢𑁂𑀦 𑀨𑀮𑀫𑁂𑀯 𑀔𑀬𑀸𑀭𑀫𑁆𑀫𑀡𑀁, 𑀦 𑀇𑀢𑀭𑁂, 𑀇𑀢𑀭𑁂𑀲𑀁 𑀧𑀦 𑀓𑀺𑀫𑀸𑀭𑀫𑁆𑀫𑀡𑀁 𑀯𑀤𑁂𑀲𑀻𑀢𑀺? 𑀅𑀤𑁆𑀥𑀸 𑀲𑁄 𑀆𑀭𑀫𑁆𑀫𑀡𑀁 𑀅𑀧𑀲𑁆𑀲𑀦𑁆𑀢𑁄 𑀦𑀺𑀭𑀼𑀢𑁆𑀢𑀭𑁄 𑀪𑀯𑀺𑀲𑁆𑀲𑀢𑀺. 𑀅𑀧𑀺𑀘 𑀓𑀺𑀮𑁂𑀲𑀓𑁆𑀔𑀬𑁄 𑀦𑀸𑀫 𑀲𑀧𑁆𑀧𑀼𑀭𑀺𑀲𑁂𑀳𑀺 𑀓𑀭𑀻𑀬𑀢𑀺, 𑀬𑀣𑀸𑀦𑀼𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑁆𑀧𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀦 𑀦 𑀓𑁂𑀦𑀘𑀺 𑀓𑀭𑀻𑀬𑀢𑀺 𑀦 𑀉𑀧𑁆𑀧𑀸𑀤𑀻𑀬𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀫𑀫𑀢𑀫𑀲𑀗𑁆𑀔𑀢𑀁. 𑀢𑀫𑀓𑀢𑀁 𑀚𑀸𑀦𑀸𑀢𑀻𑀢𑀺 𑀅𑀭𑀺𑀬𑀲𑀸𑀯𑀓𑁄 ‘‘𑀅𑀓𑀢𑀜𑁆𑀜𑀽’’𑀢𑀺 𑀧𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

𑁭𑁭𑁧. ‘‘𑀅𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘,

𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄;

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄,

𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺.

𑀅𑀧𑀺𑀘 ‘‘𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀘. ‘‘𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀣𑀸𑀳 ‘‘𑀢𑀬𑁄 𑀔𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸. 𑀓𑀢𑀫𑁂 𑀢𑀬𑁄 𑀥𑀫𑁆𑀫𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸? 𑀢𑀺𑀲𑁆𑀲𑁄 𑀦𑀺𑀲𑁆𑀲𑀭𑀡𑀥𑀸𑀢𑀼𑀬𑁄. 𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀁. 𑀭𑀽𑀧𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀅𑀭𑀽𑀧𑀁. 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀦𑀺𑀭𑁄𑀥𑁄 𑀢𑀲𑁆𑀲 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀅𑀪𑀸𑀯𑀧𑀢𑁆𑀢𑀺𑀤𑁄𑀲𑀢𑁄 𑀧𑀞𑀫𑀚𑁆𑀛𑀸𑀦𑀸𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀦𑀫𑁆𑀧𑀺 𑀅𑀪𑀸𑀯𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀬𑀼𑀢𑁆𑀢𑀁 𑀅𑀓𑁆𑀔𑀬𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀔𑀬𑀤𑁄𑀲𑀸𑀧𑀚𑁆𑀚𑀦𑀦𑁆𑀢𑀺, 𑀦 𑀢𑀼 𑀔𑀬𑁄 𑀦𑀺𑀩𑁆𑀩𑀸𑀦𑀁.

‘‘𑀅𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀧𑀜𑁆𑀜𑀸𑀬 𑀫𑁂 𑀲𑀼𑀨𑀼𑀲𑀺𑀢’’𑀦𑁆𑀢𑀺 𑀘 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀘 𑀥𑀫𑁆𑀫𑀲𑀸𑀫𑀺𑀦𑀸 𑀢𑀣𑀸𑀕𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀭𑀫𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀢𑁆𑀣𑀺 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀏𑀓𑁄 𑀥𑀫𑁆𑀫𑁄’’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀅𑀧𑀺𑀘 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸’’𑀢𑀺 𑀧𑀤𑀫𑀼𑀤𑁆𑀥𑀭𑀺𑀢𑁆𑀯𑀸 𑁋 ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘, 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀭𑀸𑀕𑀸𑀤𑀻𑀦𑀁 𑀔𑀬𑀲𑁆𑀲 𑀅𑀧𑁆𑀧𑀫𑀸𑀡𑀢𑁆𑀢𑀁 𑀓𑀣𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀬𑁂𑀯 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀏𑀓𑁄 𑀲𑀪𑀸𑀯𑁄𑀢𑀺. 𑀢𑀁 𑀧𑀦 𑀧𑀓𑀢𑀺𑀯𑀸𑀤𑀻𑀦𑀁 𑀧𑀓𑀢𑀺 𑀯𑀺𑀬, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀢𑁆𑀢𑀸 𑀯𑀺𑀬 𑀘 𑀲𑀲𑀯𑀺𑀲𑀸𑀡𑀁 𑀯𑀺𑀬 𑀘 𑀦𑀸𑀯𑀺𑀚𑁆𑀚𑀫𑀸𑀦𑀁.

𑀅𑀣 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑁂, 𑀢𑀫𑁆𑀧𑀺 𑀅𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸. 𑀓𑀣𑀁? 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀘 𑀧𑀦 ‘‘𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺 𑀧𑀤𑀫𑀼𑀤𑁆𑀥𑀭𑀺𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀦𑁂𑀢𑁂𑀲𑀁 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀁 𑀲𑀺𑀬𑀸, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀦 𑀬𑀼𑀚𑁆𑀚𑁂𑀬𑁆𑀬, 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀧𑀓𑁆𑀔𑀁 𑀪𑀚𑁂𑀬𑁆𑀬𑀼𑀁. ‘‘𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀧𑀦 𑀭𑀽𑀧𑀸𑀯𑀘𑀭𑀢𑁆𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸 𑀓𑀼𑀲𑀮𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀓𑀺𑀭𑀺𑀬𑀢𑁄 𑀘, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀯𑀺𑀧𑀸𑀓𑁄, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀓𑀼𑀲𑀮𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀓𑀺𑀭𑀺𑀬𑀢𑁄 𑀘, 𑀇𑀫𑁂 𑀥𑀫𑁆𑀫𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁. 𑀬𑀲𑁆𑀫𑀸 𑀘 𑀧𑀡𑁆𑀡𑀢𑁆𑀢𑀺𑀪𑀸𑀯𑁄 𑀦𑀺𑀩𑁆𑀩𑀸𑀦𑀲𑁆𑀲 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀕𑁆𑀕𑀨𑀮𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀉𑀧𑁆𑀧𑀸𑀤𑀸𑀤𑀻𑀦𑀫𑀪𑀸𑀯𑀢𑁄 𑀦𑀺𑀘𑁆𑀘𑀁, 𑀭𑀽𑀧𑀲𑀪𑀸𑀯𑀸𑀪𑀸𑀯𑀢𑁄 𑀅𑀭𑀽𑀧𑀁, 𑀧𑀧𑀜𑁆𑀘𑀸𑀪𑀸𑀯𑀢𑁄 𑀦𑀺𑀧𑁆𑀧𑀧𑀜𑁆𑀘𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀉𑀧𑀕𑀦𑁆𑀢𑀩𑁆𑀩𑀦𑁆𑀢𑀺.

𑁭𑁭𑁨. 𑀅𑀘𑁆𑀘𑀦𑁆𑀢𑀫𑀦𑀦𑁆𑀢𑀁 𑀲𑀦𑁆𑀢𑀁, 𑀅𑀫𑀢𑀁 𑀅𑀧𑀮𑁄𑀓𑀺𑀢𑀁;

𑀧𑀡𑀻𑀢𑀁 𑀲𑀭𑀡𑀁 𑀔𑁂𑀫𑀁, 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀁.

𑁭𑁭𑁩. 𑀲𑀺𑀯𑀜𑁆𑀘 𑀦𑀺𑀧𑀼𑀡𑀁 𑀲𑀘𑁆𑀘𑀁, 𑀤𑀼𑀓𑁆𑀔𑀓𑁆𑀔𑀬𑀫𑀦𑀸𑀲𑀯𑀁;

𑀲𑀼𑀤𑀼𑀤𑁆𑀤𑀲𑀁 𑀧𑀭𑀁 𑀧𑀸𑀭𑀁, 𑀦𑀺𑀩𑁆𑀩𑀸𑀦𑀫𑀦𑀺𑀤𑀲𑁆𑀲𑀦𑀁.

𑁭𑁭𑁪. 𑀢𑀡𑁆𑀳𑀸𑀓𑁆𑀔𑀬𑀁 𑀥𑀼𑀯𑀁 𑀤𑀻𑀧𑀁, 𑀅𑀩𑁆𑀬𑀸𑀧𑀚𑁆𑀛𑀫𑀦𑀻𑀢𑀺𑀓𑀁;

𑀅𑀦𑀸𑀮𑀬𑀫𑀭𑀽𑀧𑀜𑁆𑀘, 𑀧𑀤𑀫𑀘𑁆𑀘𑀼𑀢𑀫𑀓𑁆𑀔𑀭𑀁.

𑁭𑁭𑁫. 𑀯𑀺𑀭𑀸𑀕𑀜𑁆𑀘 𑀦𑀺𑀭𑁄𑀥𑀜𑁆𑀘, 𑀯𑀺𑀫𑀼𑀢𑁆𑀢𑀺 𑀫𑁄𑀓𑁆𑀔𑀫𑁂𑀯 𑀘;

𑀇𑀫𑁂𑀳𑀺 𑀧𑀦 𑀦𑀸𑀫𑁂𑀳𑀺, 𑀦𑀺𑀩𑁆𑀩𑀸𑀦𑀁 𑀢𑀼 𑀓𑀣𑀻𑀬𑀢𑀺.

𑁭𑁭𑁬. 𑀏𑀯𑀜𑁆𑀘 𑀧𑀦 𑀯𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀘 𑀅𑀘𑁆𑀘𑀼𑀢𑀁;

𑀢𑀲𑁆𑀲 𑀘𑀸𑀥𑀺𑀕𑀫𑀽𑀧𑀸𑀬𑁄, 𑀓𑀢𑁆𑀢𑀩𑁆𑀩𑁄 𑀯𑀺𑀜𑁆𑀜𑀼𑀦𑀸 𑀲𑀤𑀸.

𑁭𑁭𑁭. 𑀲𑀤𑁆𑀥𑀸𑀩𑀼𑀤𑁆𑀥𑀺𑀓𑀭𑀁 𑀢𑀣𑀸𑀕𑀢𑀫𑀢𑁂 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀁,

𑀧𑀜𑁆𑀜𑀸𑀲𑀫𑁆𑀪𑀯𑀲𑀫𑁆𑀧𑀲𑀸𑀤𑀦𑀓𑀭𑀁 𑀚𑀸𑀦𑀸𑀢𑀺 𑀬𑁄 𑀘𑁂 𑀇𑀫𑀁;

𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀸𑀮𑀺𑀦𑀁 𑀲𑀼𑀫𑀥𑀼𑀭𑀁 𑀲𑀸𑀭𑀜𑁆𑀜𑀼𑀯𑀺𑀫𑁆𑀳𑀸𑀧𑀦𑀁,

𑀕𑀫𑁆𑀪𑀻𑀭𑁂 𑀦𑀺𑀧𑀼𑀡𑀸𑀪𑀺𑀥𑀫𑁆𑀫𑀧𑀺𑀝𑀓𑁂 𑀲𑁄 𑀬𑀸𑀪𑀺𑀦𑀺𑀝𑁆𑀞𑀁 𑀧𑀤𑀁.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀦𑀺𑀩𑁆𑀩𑀸𑀦𑀦𑀺𑀤𑁆𑀤𑁂𑀲𑁄 𑀦𑀸𑀫

𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.