𑁧. 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑁄

𑀪𑀽𑀫𑀺𑀪𑁂𑀤𑀘𑀺𑀢𑁆𑀢𑀁

𑁩. 𑀢𑀢𑁆𑀣 𑀘𑀺𑀢𑁆𑀢𑀁 𑀢𑀸𑀯 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀮𑁄𑀓𑀼𑀢𑁆𑀢𑀭𑀜𑁆𑀘𑁂𑀢𑀺.

𑀅𑀓𑀼𑀲𑀮𑀘𑀺𑀢𑁆𑀢𑀁

𑁪. 𑀢𑀢𑁆𑀣 𑀓𑀢𑀫𑀁 𑀓𑀸𑀫𑀸𑀯𑀘𑀭𑀁? 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞𑀧𑀺 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁫. 𑀤𑁄𑀫𑀦𑀲𑁆𑀲𑀲𑀳𑀕𑀢𑀁 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂𑀧𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁬. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀫𑁂𑀓𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂𑀧𑀺 𑀫𑁄𑀫𑀽𑀳𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁭. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺.

𑁮. 𑀅𑀝𑁆𑀞𑀥𑀸 𑀮𑁄𑀪𑀫𑀽𑀮𑀸𑀦𑀺, 𑀤𑁄𑀲𑀫𑀽𑀮𑀸𑀦𑀺 𑀘 𑀤𑁆𑀯𑀺𑀥𑀸.

𑀫𑁄𑀳𑀫𑀽𑀮𑀸𑀦𑀺 𑀘 𑀤𑁆𑀯𑁂𑀢𑀺, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀲𑀺𑀬𑀼𑀁.

𑀅𑀳𑁂𑀢𑀼𑀓𑀘𑀺𑀢𑁆𑀢𑀁

𑁯. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀦𑁆𑀢𑀻𑀭𑀡𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀲𑀢𑁆𑀢𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁧𑁦. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀓𑀼𑀲𑀮𑀯𑀺𑀧𑀸𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀣𑀸 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀲𑀼𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀲𑀦𑁆𑀢𑀻𑀭𑀡𑀘𑀺𑀢𑁆𑀢𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀦𑁆𑀢𑀻𑀭𑀡𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀅𑀝𑁆𑀞𑀧𑀺 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁧𑁧. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀁, 𑀢𑀣𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀘𑀺𑀢𑁆𑀢𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀢𑀻𑀡𑀺𑀧𑀺 𑀅𑀳𑁂𑀢𑀼𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁧𑁨. 𑀇𑀘𑁆𑀘𑁂𑀯 𑀲𑀩𑁆𑀩𑀣𑀸𑀧𑀺 𑀅𑀝𑁆𑀞𑀸𑀭𑀲𑀸𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺.

𑁧𑁩. 𑀲𑀢𑁆𑀢𑀸𑀓𑀼𑀲𑀮𑀧𑀸𑀓𑀸𑀦𑀺, 𑀧𑀼𑀜𑁆𑀜𑀧𑀸𑀓𑀸𑀦𑀺 𑀅𑀝𑁆𑀞𑀥𑀸.

𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀢𑀻𑀡𑀻𑀢𑀺, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸.

𑀲𑁄𑀪𑀦𑀘𑀺𑀢𑁆𑀢𑀁

𑁧𑁪. 𑀧𑀸𑀧𑀸𑀳𑁂𑀢𑀼𑀓𑀫𑀼𑀢𑁆𑀢𑀸𑀦𑀺, 𑀲𑁄𑀪𑀦𑀸𑀦𑀻𑀢𑀺 𑀯𑀼𑀘𑁆𑀘𑀭𑁂.

𑀏𑀓𑀽𑀦𑀲𑀝𑁆𑀞𑀺 𑀘𑀺𑀢𑁆𑀢𑀸𑀦𑀺, 𑀅𑀣𑁂𑀓𑀦𑀯𑀼𑀢𑀻𑀧𑀺 𑀯𑀸.

𑀓𑀸𑀫𑀸𑀯𑀘𑀭𑀲𑁄𑀪𑀦𑀘𑀺𑀢𑁆𑀢𑀁

𑁧𑁫. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁧𑁬. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞𑀧𑀺 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁧𑁭. 𑀲𑁄𑀫𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞𑀧𑀺 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁧𑁮. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀘𑀢𑀼𑀯𑀻𑀲𑀢𑀺 𑀲𑀳𑁂𑀢𑀼𑀓𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺.

𑁧𑁯. 𑀯𑁂𑀤𑀦𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁂𑀦 𑀘𑀢𑀼𑀯𑀻𑀲𑀢𑀺.

𑀲𑀳𑁂𑀢𑀼𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸 𑀫𑀢𑀸.

𑁨𑁦. 𑀓𑀸𑀫𑁂 𑀢𑁂𑀯𑀻𑀲 𑀧𑀸𑀓𑀸𑀦𑀺, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀯𑀻𑀲𑀢𑀺.

𑀏𑀓𑀸𑀤𑀲 𑀓𑁆𑀭𑀺𑀬𑀸 𑀘𑁂𑀢𑀺, 𑀘𑀢𑀼𑀧𑀜𑁆𑀜𑀸𑀲 𑀲𑀩𑁆𑀩𑀣𑀸.

𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀁

𑁨𑁧. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀞𑀫𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀢𑀢𑀺𑀬𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀁, 𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀧𑀜𑁆𑀘𑀧𑀺 𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁨𑁨. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀘𑀺𑀢𑁆𑀢𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀘𑀺𑀢𑁆𑀢𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀘𑀺𑀢𑁆𑀢𑀁, 𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑀘𑀺𑀢𑁆𑀢𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀯𑀺𑀧𑀸𑀓𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀧𑀜𑁆𑀘𑀧𑀺 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁨𑁩. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀞𑀫𑀚𑁆𑀛𑀸𑀦𑀓𑀺𑀭𑀺𑀬𑀘𑀺𑀢𑁆𑀢𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀓𑀺𑀭𑀺𑀬𑀘𑀺𑀢𑁆𑀢𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀢𑀢𑀺𑀬𑀚𑁆𑀛𑀸𑀦𑀓𑀺𑀭𑀺𑀬𑀘𑀺𑀢𑁆𑀢𑀁, 𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀺𑀭𑀺𑀬𑀘𑀺𑀢𑁆𑀢𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀓𑀺𑀭𑀺𑀬𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀧𑀜𑁆𑀘𑀧𑀺 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁨𑁪. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀧𑀦𑁆𑀦𑀭𑀲 𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺.

𑁨𑁫. 𑀧𑀜𑁆𑀘𑀥𑀸 𑀛𑀸𑀦𑀪𑁂𑀤𑁂𑀦, 𑀭𑀽𑀧𑀸𑀯𑀘𑀭𑀫𑀸𑀦𑀲𑀁.

𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀪𑁂𑀤𑀸, 𑀢𑀁 𑀧𑀜𑁆𑀘𑀤𑀲𑀥𑀸 𑀪𑀯𑁂.

𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀁

𑁨𑁬. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀼𑀲𑀮𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀼𑀲𑀮𑀘𑀺𑀢𑁆𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀼𑀲𑀮𑀘𑀺𑀢𑁆𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀼𑀲𑀮𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁨𑁭. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀧𑀸𑀓𑀘𑀺𑀢𑁆𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀘𑀺𑀢𑁆𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁨𑁮. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀓𑀺𑀭𑀺𑀬𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀓𑀺𑀭𑀺𑀬𑀘𑀺𑀢𑁆𑀢𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀺𑀭𑀺𑀬𑀘𑀺𑀢𑁆𑀢𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀺𑀭𑀺𑀬𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀅𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁨𑁯. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀤𑁆𑀯𑀸𑀤𑀲 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺.

𑁩𑁦. 𑀆𑀮𑀫𑁆𑀩𑀡𑀧𑁆𑀧𑀪𑁂𑀤𑁂𑀦, 𑀘𑀢𑀼𑀥𑀸𑀭𑀼𑀧𑁆𑀧𑀫𑀸𑀦𑀲𑀁.

𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀪𑁂𑀤𑀸, 𑀧𑀼𑀦 𑀤𑁆𑀯𑀸𑀤𑀲𑀥𑀸 𑀞𑀺𑀢𑀁.

𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁

𑁩𑁧. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀁, 𑀅𑀭𑀳𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁩𑁨. 𑀲𑁄𑀢𑀸𑀧𑀢𑁆𑀢𑀺𑀨𑀮𑀘𑀺𑀢𑁆𑀢𑀁, 𑀲𑀓𑀤𑀸𑀕𑀸𑀫𑀺𑀨𑀮𑀘𑀺𑀢𑁆𑀢𑀁, 𑀅𑀦𑀸𑀕𑀸𑀫𑀺𑀨𑀮𑀘𑀺𑀢𑁆𑀢𑀁, 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁩𑁩. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀅𑀝𑁆𑀞 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀲𑀫𑀢𑁆𑀢𑀸𑀦𑀺.

𑁩𑁪. 𑀘𑀢𑀼𑀫𑀕𑁆𑀕𑀧𑁆𑀧𑀪𑁂𑀤𑁂𑀦, 𑀘𑀢𑀼𑀥𑀸 𑀓𑀼𑀲𑀮𑀁 𑀢𑀣𑀸.

𑀧𑀸𑀓𑀁 𑀢𑀲𑁆𑀲 𑀨𑀮𑀢𑁆𑀢𑀸𑀢𑀺, 𑀅𑀝𑁆𑀞𑀥𑀸𑀦𑀼𑀢𑁆𑀢𑀭𑀁 𑀫𑀢𑀁.

𑀘𑀺𑀢𑁆𑀢𑀕𑀡𑀦𑀲𑀗𑁆𑀕𑀳𑁄

𑁩𑁫. 𑀤𑁆𑀯𑀸𑀤𑀲𑀸𑀓𑀼𑀲𑀮𑀸𑀦𑁂𑀯𑀁, 𑀓𑀼𑀲𑀮𑀸𑀦𑁂𑀓𑀯𑀻𑀲𑀢𑀺.

𑀙𑀢𑁆𑀢𑀺𑀁𑀲𑁂𑀯 𑀯𑀺𑀧𑀸𑀓𑀸𑀦𑀺, 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀺.

𑁩𑁬. 𑀘𑀢𑀼𑀧𑀜𑁆𑀜𑀸𑀲𑀥𑀸 𑀓𑀸𑀫𑁂, 𑀭𑀽𑀧𑁂 𑀧𑀦𑁆𑀦𑀭𑀲𑀻𑀭𑀬𑁂.

𑀘𑀺𑀢𑁆𑀢𑀸𑀦𑀺 𑀤𑁆𑀯𑀸𑀤𑀲𑀸𑀭𑀼𑀧𑁆𑀧𑁂, 𑀅𑀝𑁆𑀞𑀥𑀸𑀦𑀼𑀢𑁆𑀢𑀭𑁂 𑀢𑀣𑀸.

𑁩𑁭. 𑀇𑀢𑁆𑀣𑀫𑁂𑀓𑀽𑀦𑀦𑀯𑀼𑀢𑀺𑀧𑀪𑁂𑀤𑀁 𑀧𑀦 𑀫𑀸𑀦𑀲𑀁.

𑀏𑀓𑀯𑀻𑀲𑀲𑀢𑀁 𑀯𑀸𑀣, 𑀯𑀺𑀪𑀚𑀦𑁆𑀢𑀺 𑀯𑀺𑀘𑀓𑁆𑀔𑀡𑀸.

𑀯𑀺𑀢𑁆𑀣𑀸𑀭𑀕𑀡𑀦𑀸

𑁩𑁮. 𑀓𑀣𑀫𑁂𑀓𑀽𑀦𑀦𑀯𑀼𑀢𑀺𑀯𑀺𑀥𑀁 𑀘𑀺𑀢𑁆𑀢𑀁 𑀏𑀓𑀯𑀻𑀲𑀲𑀢𑀁 𑀳𑁄𑀢𑀺? 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀞𑀫𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀢𑀢𑀺𑀬𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑀸𑀦𑀺 𑀧𑀜𑁆𑀘𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀸𑀦𑀺 𑀦𑀸𑀫.

𑁩𑁯. 𑀢𑀣𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀅𑀦𑀸𑀕𑀸𑀫𑀺𑀫𑀕𑁆𑀕𑀅𑀭𑀳𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀜𑁆𑀘𑁂𑀢𑀺 𑀲𑀫𑀯𑀻𑀲𑀢𑀺 𑀫𑀕𑁆𑀕𑀘𑀺𑀢𑁆𑀢𑀸𑀦𑀺.

𑁪𑁦. 𑀢𑀣𑀸 𑀨𑀮𑀘𑀺𑀢𑁆𑀢𑀸𑀦𑀺 𑀘𑁂𑀢𑀺 𑀲𑀫𑀘𑀢𑁆𑀢𑀸𑀮𑀻𑀲 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀻𑀢𑀺.

𑁪𑁧. 𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦, 𑀓𑀢𑁆𑀯𑁂𑀓𑁂𑀓𑀦𑁆𑀢𑀼 𑀧𑀜𑁆𑀘𑀥𑀸.

𑀯𑀼𑀘𑁆𑀘𑀢𑀸𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀁, 𑀘𑀢𑁆𑀢𑀸𑀮𑀻𑀲𑀯𑀺𑀥𑀦𑁆𑀢𑀺 𑀘.

𑁪𑁨. 𑀬𑀣𑀸 𑀘 𑀭𑀽𑀧𑀸𑀯𑀘𑀭𑀁, 𑀕𑀬𑁆𑀳𑀢𑀸𑀦𑀼𑀢𑁆𑀢𑀭𑀁 𑀢𑀣𑀸.

𑀧𑀞𑀫𑀸𑀤𑀺𑀛𑀸𑀦𑀪𑁂𑀤𑁂, 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀧𑀜𑁆𑀘𑀫𑁂.

𑀏𑀓𑀸𑀤𑀲𑀯𑀺𑀥𑀁 𑀢𑀲𑁆𑀫𑀸, 𑀧𑀞𑀫𑀸𑀤𑀺𑀓𑀫𑀻𑀭𑀺𑀢𑀁;

𑀛𑀸𑀦𑀫𑁂𑀓𑁂𑀓𑀫𑀦𑁆𑀢𑁂 𑀢𑀼, 𑀢𑁂𑀯𑀻𑀲𑀢𑀺𑀯𑀺𑀥𑀁 𑀪𑀯𑁂.

𑁪𑁩. 𑀲𑀢𑁆𑀢𑀢𑀺𑀁𑀲𑀯𑀺𑀥𑀁 𑀧𑀼𑀜𑁆𑀜𑀁, 𑀤𑁆𑀯𑀺𑀧𑀜𑁆𑀜𑀸𑀲𑀯𑀺𑀥𑀁 𑀢𑀣𑀸.

𑀧𑀸𑀓𑀫𑀺𑀘𑁆𑀘𑀸𑀳𑀼 𑀘𑀺𑀢𑁆𑀢𑀸𑀦𑀺, 𑀏𑀓𑀯𑀻𑀲𑀲𑀢𑀁 𑀩𑀼𑀥𑀸.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀘𑀺𑀢𑁆𑀢𑀲𑀗𑁆𑀕𑀳𑀯𑀺𑀪𑀸𑀕𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.