𑁭. 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑀁

𑁧. 𑀘𑀸𑀧𑀸𑀮𑀯𑀕𑁆𑀕𑁄

𑁧. 𑀅𑀧𑀸𑀭𑀲𑀼𑀢𑁆𑀢𑀁

𑁮𑁧𑁩. ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀧𑀞𑀫𑀁.

𑁨. 𑀯𑀺𑀭𑀤𑁆𑀥𑀲𑀼𑀢𑁆𑀢𑀁

𑁮𑁧𑁪. ‘‘𑀬𑁂𑀲𑀁 𑀓𑁂𑀲𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀯𑀺𑀭𑀤𑁆𑀥𑀸, 𑀯𑀺𑀭𑀤𑁆𑀥𑁄 𑀢𑁂𑀲𑀁 𑀅𑀭𑀺𑀬𑁄 𑀫𑀕𑁆𑀕𑁄 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀻. 𑀬𑁂𑀲𑀁 𑀓𑁂𑀲𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀆𑀭𑀤𑁆𑀥𑀸, 𑀆𑀭𑀤𑁆𑀥𑁄 𑀢𑁂𑀲𑀁 𑀅𑀭𑀺𑀬𑁄 𑀫𑀕𑁆𑀕𑁄 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀻. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀬𑁂𑀲𑀁 𑀓𑁂𑀲𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀯𑀺𑀭𑀤𑁆𑀥𑀸, 𑀯𑀺𑀭𑀤𑁆𑀥𑁄 𑀢𑁂𑀲𑀁 𑀅𑀭𑀺𑀬𑁄 𑀫𑀕𑁆𑀕𑁄 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀻. 𑀬𑁂𑀲𑀁 𑀓𑁂𑀲𑀜𑁆𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀆𑀭𑀤𑁆𑀥𑀸, 𑀆𑀭𑀤𑁆𑀥𑁄 𑀢𑁂𑀲𑀁 𑀅𑀭𑀺𑀬𑁄 𑀫𑀕𑁆𑀕𑁄 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀭𑀺𑀬𑀲𑀼𑀢𑁆𑀢𑀁

𑁮𑁧𑁫. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀢𑀢𑀺𑀬𑀁.

𑁪. 𑀦𑀺𑀩𑁆𑀩𑀺𑀤𑀸𑀲𑀼𑀢𑁆𑀢𑀁

𑁮𑁧𑁬. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀇𑀤𑁆𑀥𑀺𑀧𑀤𑁂𑀲𑀲𑀼𑀢𑁆𑀢𑀁

𑁮𑁧𑁭. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀤𑁆𑀥𑀺𑀧𑀤𑁂𑀲𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀼𑀁 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀤𑁆𑀥𑀺𑀧𑀤𑁂𑀲𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑁆𑀲𑀦𑁆𑀢𑀺 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀤𑁆𑀥𑀺𑀧𑀤𑁂𑀲𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀤𑁆𑀥𑀺𑀧𑀤𑁂𑀲𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀼𑀁, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀤𑁆𑀥𑀺𑀧𑀤𑁂𑀲𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀤𑁆𑀥𑀺𑀧𑀤𑁂𑀲𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀫𑀢𑁆𑀢𑀲𑀼𑀢𑁆𑀢𑀁

𑁮𑁧𑁮. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀢𑁆𑀢𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀼𑀁, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀢𑁆𑀢𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀢𑁆𑀢𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀢𑁆𑀢𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀼𑀁, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀢𑁆𑀢𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀢𑁆𑀢𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸’’𑀢𑀺. 𑀙𑀝𑁆𑀞𑀁.

𑁭. 𑀪𑀺𑀓𑁆𑀔𑀼𑀲𑀼𑀢𑁆𑀢𑀁

𑁮𑁧𑁯. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀪𑀺𑀓𑁆𑀔𑀽 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀁𑀲𑀼, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀪𑀺𑀓𑁆𑀔𑀽 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀪𑀺𑀓𑁆𑀔𑀽 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀁𑀲𑀼 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀪𑀺𑀓𑁆𑀔𑀽 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀩𑀼𑀤𑁆𑀥𑀲𑀼𑀢𑁆𑀢𑀁

𑁮𑁨𑁦. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺 …𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀢𑀣𑀸𑀕𑀢𑁄 ‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀜𑀸𑀡𑀲𑀼𑀢𑁆𑀢𑀁

𑁮𑁨𑁧. ‘‘‘𑀅𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’𑀢𑀺 𑀫𑁂 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. ‘𑀲𑁄 𑀔𑁄 𑀧𑀦𑀸𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘𑀪𑀸𑀯𑀺𑀢𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘‘𑀅𑀬𑀁 𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. ‘𑀲𑁄 𑀔𑁄 𑀧𑀦𑀸𑀬𑀁 𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘𑀪𑀸𑀯𑀺𑀢𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘‘𑀅𑀬𑀁 𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. ‘𑀲𑁄 𑀔𑁄 𑀧𑀦𑀸𑀬𑀁 𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘𑀪𑀸𑀯𑀺𑀢𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘‘𑀅𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. ‘𑀲𑁄 𑀔𑁄 𑀧𑀦𑀸𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄 𑀪𑀸𑀯𑁂𑀢𑀩𑁆𑀩𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂…𑀧𑁂… ‘𑀪𑀸𑀯𑀺𑀢𑁄’𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀻’’𑀢𑀺. 𑀦𑀯𑀫𑀁.

𑁧𑁦. 𑀘𑁂𑀢𑀺𑀬𑀲𑀼𑀢𑁆𑀢𑀁

𑁮𑁨𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀡𑁆𑀳𑀸𑀳𑀺, 𑀆𑀦𑀦𑁆𑀤, 𑀦𑀺𑀲𑀻𑀤𑀦𑀁. 𑀬𑁂𑀦 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁 [𑀧𑀸𑀯𑀸𑀮𑀘𑁂𑀢𑀺𑀬𑀁 (𑀲𑁆𑀬𑀸. 𑀓𑀁.)] 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀤𑀺𑀯𑀸𑀯𑀺𑀳𑀸𑀭𑀸𑀬𑀸’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀺𑀲𑀻𑀤𑀦𑀁 𑀆𑀤𑀸𑀬 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀁 𑀘𑁂𑀢𑀺𑀬𑀁 [𑀩𑀳𑀼𑀧𑀼𑀢𑁆𑀢𑀓𑀘𑁂𑀢𑀺𑀬𑀁 (𑀲𑁆𑀬𑀸. 𑀓𑀁. 𑀧𑀻. 𑀓.)], 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁 [𑀆𑀦𑀦𑁆𑀤𑀘𑁂𑀢𑀺𑀬𑀁 (𑀓.), 𑀲𑀸𑀦𑀦𑁆𑀤𑀭𑀁 (𑀓.)], 𑀭𑀫𑀡𑀻𑀬𑀁 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸. 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺.

𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁; 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺 𑁋 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 [𑀲𑀼𑀕𑀢𑁄 𑀓𑀧𑁆𑀧𑀸𑀯𑀲𑁂𑀲𑀁 (𑀧𑀻. 𑀓.) 𑀤𑀻. 𑀦𑀺. 𑁨.𑁧𑁬𑁭] 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸. 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺.

𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁; 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺 𑁋 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸, 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺 𑀲𑀼𑀕𑀢𑁄 [𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄 (𑀲𑀻. 𑀲𑁆𑀬𑀸. 𑀓𑀁.) 𑀏𑀯𑀫𑀼𑀧𑀭𑀺𑀧𑀺]! 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀪𑀺𑀓𑁆𑀔𑀽 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺 [𑀉𑀢𑁆𑀢𑀸𑀦𑀺𑀁 𑀓𑀭𑀺𑀲𑁆𑀲𑀦𑁆𑀢𑀺 (𑀓.), 𑀉𑀢𑁆𑀢𑀸𑀦𑀺𑀓𑀭𑀺𑀲𑁆𑀲𑀦𑁆𑀢𑀺 (𑀧𑀻.)], 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’’𑀢𑀺.

𑀲𑀦𑁆𑀢𑀺 𑀔𑁄 𑀧𑀦, 𑀪𑀦𑁆𑀢𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀸𑀯𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀲𑀼𑀕𑀢𑁄! 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’’𑀢𑀺.

‘‘𑀲𑀦𑁆𑀢𑀺 𑀔𑁄 𑀧𑀦, 𑀪𑀦𑁆𑀢𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀼𑀦𑀺𑀬𑁄 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀲𑀼𑀕𑀢𑁄! 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀉𑀧𑀸𑀲𑀓𑀸…𑀧𑁂… 𑀬𑀸𑀯 𑀫𑁂 𑀉𑀧𑀸𑀲𑀺𑀓𑀸 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’’𑀢𑀺.

‘‘𑀲𑀦𑁆𑀢𑀺 𑀔𑁄 𑀧𑀦, 𑀪𑀦𑁆𑀢𑁂, 𑀏𑀢𑀭𑀳𑀺 𑀉𑀧𑀸𑀲𑀓𑀸…𑀧𑁂… 𑀉𑀧𑀸𑀲𑀺𑀓𑀸 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀲𑀼𑀕𑀢𑁄! 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺 𑀬𑀸𑀯 𑀫𑁂 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀇𑀤𑁆𑀥𑀜𑁆𑀘𑁂𑀯 𑀪𑀯𑀺𑀲𑁆𑀲𑀢𑀺 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀢𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺. 𑀢𑀬𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀢𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺 𑀲𑀼𑀕𑀢𑁄. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀧𑀸𑀧𑀺𑀫, 𑀳𑁄𑀳𑀺. 𑀦 𑀘𑀺𑀭𑀁 [𑀦𑀘𑀺𑀭𑀲𑁆𑀲𑁂𑀯 (𑀓.)] 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺. 𑀑𑀲𑁆𑀲𑀝𑁆𑀞𑁂 𑀘 [𑀑𑀲𑀚𑁆𑀚𑁂 𑀧𑀦 (𑀓.)] 𑀪𑀕𑀯𑀢𑀸 𑀆𑀬𑀼𑀲𑀗𑁆𑀔𑀸𑀭𑁂 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺 𑀪𑀺𑀁𑀲𑀦𑀓𑁄 𑀮𑁄𑀫𑀳𑀁𑀲𑁄, 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 [𑀤𑁂𑀯𑀤𑀼𑀤𑁆𑀭𑀪𑀺𑀬𑁄 (𑀓.)] 𑀘 𑀨𑀮𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯𑀁, 𑀪𑀯𑀲𑀗𑁆𑀔𑀸𑀭𑀫𑀯𑀲𑁆𑀲𑀚𑀺 𑀫𑀼𑀦𑀺;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺. 𑀤𑀲𑀫𑀁;

𑀘𑀸𑀧𑀸𑀮𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀧𑀸𑀭𑀸𑀧𑀺 𑀯𑀺𑀭𑀤𑁆𑀥𑁄 𑀘, 𑀅𑀭𑀺𑀬𑀸 𑀦𑀺𑀩𑁆𑀩𑀺𑀤𑀸𑀧𑀺 𑀘;

𑀧𑀤𑁂𑀲𑀁 𑀲𑀫𑀢𑁆𑀢𑀁 𑀪𑀺𑀓𑁆𑀔𑀼, 𑀩𑀼𑀤𑁆𑀥𑀁 𑀜𑀸𑀡𑀜𑁆𑀘 𑀘𑁂𑀢𑀺𑀬𑀦𑁆𑀢𑀺.

𑁨. 𑀧𑀸𑀲𑀸𑀤𑀓𑀫𑁆𑀧𑀦𑀯𑀕𑁆𑀕𑁄

𑁧. 𑀧𑀼𑀩𑁆𑀩𑀲𑀼𑀢𑁆𑀢𑀁

𑁮𑁨𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀼𑀩𑁆𑀩𑁂𑀯 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬𑀸’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀢𑀺 𑀫𑁂 𑀙𑀦𑁆𑀤𑁄 𑀦 𑀘 𑀅𑀢𑀺𑀮𑀻𑀦𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺’’’.

‘‘𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀢𑀺 𑀫𑁂 𑀯𑀻𑀭𑀺𑀬𑀁 𑀦 𑀘 𑀅𑀢𑀺𑀮𑀻𑀦𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀢𑀺 𑀫𑁂 𑀘𑀺𑀢𑁆𑀢𑀁 𑀦 𑀘 𑀅𑀢𑀺𑀮𑀻𑀦𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀢𑀺 𑀫𑁂 𑀯𑀻𑀫𑀁𑀲𑀸 𑀦 𑀘 𑀅𑀢𑀺𑀮𑀻𑀦𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀼, 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 [𑀅𑀪𑀺𑀚𑁆𑀚𑀫𑀸𑀦𑁄 (𑀲𑀻. 𑀧𑀻. 𑀓.)] 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀢𑀺 [𑀧𑀭𑀸𑀫𑀲𑀢𑀺 (𑀲𑀻. 𑀲𑁆𑀬𑀸. 𑀓𑀁.)] 𑀧𑀭𑀺𑀫𑀚𑁆𑀚𑀢𑀺; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀼, 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑁋 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘, 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘𑀸𑀢𑀺.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀼, 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺. 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀲𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀲𑀁𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀲𑀉𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺; 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺’’.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀼, 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁 [𑀉𑀧𑁆𑀧𑀸𑀤𑀺𑀁 (𑀲𑀻.)]; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄 𑀪𑀺𑀓𑁆𑀔𑀼, 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢, 𑀪𑁄𑀦𑁆𑀢𑁄, 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦, 𑀪𑁄𑀦𑁆𑀢𑁄, 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀼, 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀧𑀞𑀫𑀁.

𑁨. 𑀫𑀳𑀧𑁆𑀨𑀮𑀲𑀼𑀢𑁆𑀢𑀁

𑁮𑁨𑁪. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 ‘𑀇𑀢𑀺 𑀫𑁂 𑀙𑀦𑁆𑀤𑁄 𑀦 𑀘 𑀅𑀢𑀺𑀮𑀻𑀦𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺’. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 ‘𑀇𑀢𑀺 𑀫𑁂 𑀯𑀻𑀫𑀁𑀲𑀸 𑀦 𑀘 𑀅𑀢𑀺𑀮𑀻𑀦𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺’. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺…𑀧𑁂….

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀙𑀦𑁆𑀤𑀲𑀫𑀸𑀥𑀺𑀲𑀼𑀢𑁆𑀢𑀁

𑁮𑁨𑁫. ‘‘𑀙𑀦𑁆𑀤𑀁 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀺. 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘𑀧𑀥𑀸𑀦𑀲𑀗𑁆𑀔𑀸𑀭𑀸’𑀢𑀺. 𑀇𑀢𑀺 𑀅𑀬𑀜𑁆𑀘 𑀙𑀦𑁆𑀤𑁄, 𑀅𑀬𑀜𑁆𑀘 𑀙𑀦𑁆𑀤𑀲𑀫𑀸𑀥𑀺, 𑀇𑀫𑁂 𑀘 𑀧𑀥𑀸𑀦𑀲𑀗𑁆𑀔𑀸𑀭𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’’’.

‘‘𑀯𑀻𑀭𑀺𑀬𑀁 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘𑀯𑀻𑀭𑀺𑀬𑀲𑀫𑀸𑀥𑀺’. 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁…𑀧𑁂… 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘𑀧𑀥𑀸𑀦𑀲𑀗𑁆𑀔𑀸𑀭𑀸’𑀢𑀺. 𑀇𑀢𑀺 𑀇𑀤𑀜𑁆𑀘 𑀯𑀻𑀭𑀺𑀬𑀁, 𑀅𑀬𑀜𑁆𑀘 𑀯𑀻𑀭𑀺𑀬𑀲𑀫𑀸𑀥𑀺, 𑀇𑀫𑁂 𑀘 𑀧𑀥𑀸𑀦𑀲𑀗𑁆𑀔𑀸𑀭𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’’’.

‘‘𑀘𑀺𑀢𑁆𑀢𑀁 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘𑀘𑀺𑀢𑁆𑀢𑀲𑀫𑀸𑀥𑀺’. 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁…𑀧𑁂… 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘𑀧𑀥𑀸𑀦𑀲𑀗𑁆𑀔𑀸𑀭𑀸’𑀢𑀺. 𑀇𑀢𑀺 𑀇𑀤𑀜𑁆𑀘 𑀘𑀺𑀢𑁆𑀢𑀁, 𑀅𑀬𑀜𑁆𑀘 𑀘𑀺𑀢𑁆𑀢𑀲𑀫𑀸𑀥𑀺, 𑀇𑀫𑁂 𑀘 𑀧𑀥𑀸𑀦𑀲𑀗𑁆𑀔𑀸𑀭𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’’’.

‘‘𑀯𑀻𑀫𑀁𑀲𑀁 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘𑀯𑀻𑀫𑀁𑀲𑀸𑀲𑀫𑀸𑀥𑀺’. 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺…𑀧𑁂… 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 ‘𑀧𑀥𑀸𑀦𑀲𑀗𑁆𑀔𑀸𑀭𑀸’𑀢𑀺. 𑀇𑀢𑀺 𑀅𑀬𑀜𑁆𑀘 𑀯𑀻𑀫𑀁𑀲𑀸, 𑀅𑀬𑀜𑁆𑀘 𑀯𑀻𑀫𑀁𑀲𑀸𑀲𑀫𑀸𑀥𑀺, 𑀇𑀫𑁂 𑀘 𑀧𑀥𑀸𑀦𑀲𑀗𑁆𑀔𑀸𑀭𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄’’’𑀢𑀺. 𑀢𑀢𑀺𑀬𑀁.

𑁪. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁

𑁮𑁨𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀳𑁂𑀝𑁆𑀞𑀸𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑀺 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀪𑀦𑁆𑀢𑀘𑀺𑀢𑁆𑀢𑀸 [𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 (𑀲𑀻. 𑀲𑁆𑀬𑀸. 𑀓𑀁.)] 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀢𑁂 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀳𑁂𑀝𑁆𑀞𑀸𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑀺 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀪𑀦𑁆𑀢𑀘𑀺𑀢𑁆𑀢𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸. 𑀕𑀘𑁆𑀙, 𑀫𑁄𑀕𑁆𑀕𑀮𑁆𑀮𑀸𑀦, 𑀢𑁂 𑀪𑀺𑀓𑁆𑀔𑀽 𑀲𑀁𑀯𑁂𑀚𑁂𑀳𑀻’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀭𑁂𑀲𑀺 [𑀅𑀪𑀺𑀲𑀗𑁆𑀔𑀭𑁂𑀲𑀺 (𑀲𑁆𑀬𑀸. 𑀧𑀻. 𑀓.)] 𑀬𑀣𑀸 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀁 𑀲𑀗𑁆𑀓𑀫𑁆𑀧𑁂𑀲𑀺 𑀲𑀫𑁆𑀧𑀓𑀫𑁆𑀧𑁂𑀲𑀺 𑀲𑀫𑁆𑀧𑀘𑀸𑀮𑁂𑀲𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀁𑀯𑀺𑀕𑁆𑀕𑀸 𑀮𑁄𑀫𑀳𑀝𑁆𑀞𑀚𑀸𑀢𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀦𑀺𑀯𑀸𑀢𑀜𑁆𑀘 𑀯𑀢 𑀅𑀬𑀜𑁆𑀘 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀕𑀫𑁆𑀪𑀻𑀭𑀦𑁂𑀫𑁄 𑀲𑀼𑀦𑀺𑀔𑀸𑀢𑁄 𑀅𑀘𑀮𑁄 𑀅𑀲𑀫𑁆𑀧𑀓𑀫𑁆𑀧𑀻, 𑀅𑀣 𑀘 𑀧𑀦 𑀲𑀗𑁆𑀓𑀫𑁆𑀧𑀺𑀢𑁄 𑀲𑀫𑁆𑀧𑀓𑀫𑁆𑀧𑀺𑀢𑁄 𑀲𑀫𑁆𑀧𑀘𑀸𑀮𑀺𑀢𑁄’’𑀢𑀺!

𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀁𑀯𑀺𑀕𑁆𑀕𑀸 𑀮𑁄𑀫𑀳𑀝𑁆𑀞𑀚𑀸𑀢𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸’’𑀢𑀺? ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂! 𑀦𑀺𑀯𑀸𑀢𑀜𑁆𑀘 𑀯𑀢 𑀅𑀬𑀜𑁆𑀘 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀕𑀫𑁆𑀪𑀻𑀭𑀦𑁂𑀫𑁄 𑀲𑀼𑀦𑀺𑀔𑀸𑀢𑁄 𑀅𑀘𑀮𑁄 𑀅𑀲𑀫𑁆𑀧𑀓𑀫𑁆𑀧𑀻, 𑀅𑀣 𑀘 𑀧𑀦 𑀲𑀗𑁆𑀓𑀫𑁆𑀧𑀺𑀢𑁄 𑀲𑀫𑁆𑀧𑀓𑀫𑁆𑀧𑀺𑀢𑁄 𑀲𑀫𑁆𑀧𑀘𑀸𑀮𑀺𑀢𑁄’’𑀢𑀺! ‘‘𑀢𑀼𑀫𑁆𑀳𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀲𑀁𑀯𑁂𑀚𑁂𑀢𑀼𑀓𑀸𑀫𑁂𑀦 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄, 𑀲𑀗𑁆𑀓𑀫𑁆𑀧𑀺𑀢𑁄 𑀲𑀫𑁆𑀧𑀓𑀫𑁆𑀧𑀺𑀢𑁄 𑀲𑀫𑁆𑀧𑀘𑀸𑀮𑀺𑀢𑁄. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀼 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’’𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸, 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣. 𑀘𑀢𑀼𑀦𑁆𑀦𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀼 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 ‘𑀇𑀢𑀺 𑀫𑁂 𑀯𑀻𑀫𑀁𑀲𑀸 𑀦 𑀘 𑀅𑀢𑀺𑀮𑀻𑀦𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀢𑀺; 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺’. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀼 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄. 𑀇𑀫𑁂𑀲𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺…𑀧𑁂… 𑀇𑀫𑁂𑀲𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀉𑀡𑁆𑀡𑀸𑀪𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁮𑁨𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀉𑀡𑁆𑀡𑀸𑀪𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀡𑁆𑀡𑀸𑀪𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀫𑀢𑁆𑀣𑀺𑀬𑀁 𑀦𑀼 𑀔𑁄, 𑀪𑁄 𑀆𑀦𑀦𑁆𑀤, 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀙𑀦𑁆𑀤𑀧𑁆𑀧𑀳𑀸𑀦𑀢𑁆𑀣𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺.

‘‘𑀅𑀢𑁆𑀣𑀺 𑀧𑀦, 𑀪𑁄 𑀆𑀦𑀦𑁆𑀤, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺? ‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺.

‘‘𑀓𑀢𑀫𑁄 𑀧𑀦, 𑀪𑁄 𑀆𑀦𑀦𑁆𑀤, 𑀫𑀕𑁆𑀕𑁄 𑀓𑀢𑀫𑀸 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺? ‘‘𑀇𑀥, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺.

‘‘𑀏𑀯𑀁 𑀲𑀦𑁆𑀢𑁂, 𑀪𑁄 𑀆𑀦𑀦𑁆𑀤, 𑀲𑀦𑁆𑀢𑀓𑀁 𑀳𑁄𑀢𑀺 𑀦𑁄 𑀅𑀲𑀦𑁆𑀢𑀓𑀁. 𑀙𑀦𑁆𑀤𑁂𑀦𑁂𑀯 𑀙𑀦𑁆𑀤𑀁 𑀧𑀚𑀳𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺’’. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀢𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀅𑀳𑁄𑀲𑀺 𑀢𑁂 𑀧𑀼𑀩𑁆𑀩𑁂 𑀙𑀦𑁆𑀤𑁄 ‘𑀆𑀭𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺? 𑀢𑀲𑁆𑀲 𑀢𑁂 𑀆𑀭𑀸𑀫𑀕𑀢𑀲𑁆𑀲 𑀬𑁄 𑀢𑀚𑁆𑀚𑁄 𑀙𑀦𑁆𑀤𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄’’𑀢𑀺? ‘‘𑀏𑀯𑀁, 𑀪𑁄’’. ‘‘𑀅𑀳𑁄𑀲𑀺 𑀢𑁂 𑀧𑀼𑀩𑁆𑀩𑁂 𑀯𑀻𑀭𑀺𑀬𑀁 ‘𑀆𑀭𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺? 𑀢𑀲𑁆𑀲 𑀢𑁂 𑀆𑀭𑀸𑀫𑀕𑀢𑀲𑁆𑀲 𑀬𑀁 𑀢𑀚𑁆𑀚𑀁 𑀯𑀻𑀭𑀺𑀬𑀁 𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥’’𑀦𑁆𑀢𑀺? ‘‘𑀏𑀯𑀁, 𑀪𑁄’’. ‘‘𑀅𑀳𑁄𑀲𑀺 𑀢𑁂 𑀧𑀼𑀩𑁆𑀩𑁂 𑀘𑀺𑀢𑁆𑀢𑀁 ‘𑀆𑀭𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺? 𑀢𑀲𑁆𑀲 𑀢𑁂 𑀆𑀭𑀸𑀫𑀕𑀢𑀲𑁆𑀲 𑀬𑀁 𑀢𑀚𑁆𑀚𑀁 𑀘𑀺𑀢𑁆𑀢𑀁 𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥’’𑀦𑁆𑀢𑀺? ‘‘𑀏𑀯𑀁, 𑀪𑁄’’. ‘‘𑀅𑀳𑁄𑀲𑀺 𑀢𑁂 𑀧𑀼𑀩𑁆𑀩𑁂 𑀯𑀻𑀫𑀁𑀲𑀸 ‘𑀆𑀭𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺? 𑀢𑀲𑁆𑀲 𑀢𑁂 𑀆𑀭𑀸𑀫𑀕𑀢𑀲𑁆𑀲 𑀬𑀸 𑀢𑀚𑁆𑀚𑀸 𑀯𑀻𑀫𑀁𑀲𑀸 𑀲𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸’’𑀢𑀺? ‘‘𑀏𑀯𑀁, 𑀪𑁄’’.

‘‘𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑁄 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀢𑀲𑁆𑀲 𑀬𑁄 𑀧𑀼𑀩𑁆𑀩𑁂 𑀙𑀦𑁆𑀤𑁄 𑀅𑀳𑁄𑀲𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 [𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 (𑀲𑀻. 𑀲𑁆𑀬𑀸. 𑀓𑀁.)] 𑀬𑁄 𑀢𑀚𑁆𑀚𑁄 𑀙𑀦𑁆𑀤𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄; 𑀬𑀁 𑀧𑀼𑀩𑁆𑀩𑁂 𑀯𑀻𑀭𑀺𑀬𑀁 𑀅𑀳𑁄𑀲𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 𑀬𑀁 𑀢𑀚𑁆𑀚𑀁 𑀯𑀻𑀭𑀺𑀬𑀁 𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁; 𑀬𑀁 𑀧𑀼𑀩𑁆𑀩𑁂 𑀘𑀺𑀢𑁆𑀢𑀁 𑀅𑀳𑁄𑀲𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 𑀬𑀁 𑀢𑀚𑁆𑀚𑀁 𑀘𑀺𑀢𑁆𑀢𑀁 𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁; 𑀬𑀸 𑀧𑀼𑀩𑁆𑀩𑁂 𑀯𑀻𑀫𑀁𑀲𑀸 𑀅𑀳𑁄𑀲𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 𑀬𑀸 𑀢𑀚𑁆𑀚𑀸 𑀯𑀻𑀫𑀁𑀲𑀸 𑀲𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀩𑁆𑀭𑀸𑀳𑁆𑀫𑀡, 𑀇𑀢𑀺 𑀏𑀯𑀁 𑀲𑀦𑁆𑀢𑁂, 𑀲𑀦𑁆𑀢𑀓𑀁 𑀯𑀸 𑀳𑁄𑀢𑀺 𑀦𑁄 𑀅𑀲𑀦𑁆𑀢𑀓𑀁 𑀯𑀸’’𑀢𑀺?

‘‘𑀅𑀤𑁆𑀥𑀸, 𑀪𑁄 𑀆𑀦𑀦𑁆𑀤, 𑀏𑀯𑀁 𑀲𑀦𑁆𑀢𑁂, 𑀲𑀦𑁆𑀢𑀓𑀁 𑀳𑁄𑀢𑀺 𑀦𑁄 𑀅𑀲𑀦𑁆𑀢𑀓𑀁. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀆𑀦𑀦𑁆𑀤, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀆𑀦𑀦𑁆𑀤! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀆𑀦𑀦𑁆𑀤, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀆𑀦𑀦𑁆𑀤𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑁄 𑀆𑀦𑀦𑁆𑀤, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀆𑀦𑀦𑁆𑀤𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀧𑀞𑀫𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁮𑁨𑁮. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀳𑀺𑀤𑁆𑀥𑀺𑀓𑀸 𑀅𑀳𑁂𑀲𑀼𑀁 𑀫𑀳𑀸𑀦𑀼𑀪𑀸𑀯𑀸, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀳𑀺𑀤𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀼𑀪𑀸𑀯𑀸, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀳𑀺𑀤𑁆𑀥𑀺𑀓𑀸 𑀅𑀳𑁂𑀲𑀼𑀁 𑀫𑀳𑀸𑀦𑀼𑀪𑀸𑀯𑀸, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀳𑀺𑀤𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀼𑀪𑀸𑀯𑀸, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸’’𑀢𑀺. 𑀙𑀝𑁆𑀞𑀁.

𑁭. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁮𑁨𑁯. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑀼𑀁 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀅𑀳𑁂𑀲𑀼𑀁, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀅𑀳𑁂𑀲𑀼𑀁; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑀸 𑀅𑀕𑀫𑀁𑀲𑀼, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀅𑀓𑀁𑀲𑀼, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 [𑀅𑀪𑀺𑀚𑁆𑀚𑀫𑀸𑀦𑀸 (𑀲𑀻. 𑀧𑀻. 𑀓.)] 𑀅𑀕𑀫𑀁𑀲𑀼, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀺𑀁𑀲𑀼, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀺𑀁𑀲𑀼 [𑀧𑀭𑀸𑀫𑀲𑀺𑀁𑀲𑀼 (𑀲𑁆𑀬𑀸. 𑀓𑀁. 𑀓.)] 𑀧𑀭𑀺𑀫𑀚𑁆𑀚𑀺𑀁𑀲𑀼; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀲𑀼𑀁, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀦𑁆𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀪𑀯𑀺𑀲𑁆𑀲𑀦𑁆𑀢𑀺; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀺𑀲𑁆𑀲𑀦𑁆𑀢𑀺 𑀧𑀭𑀺𑀫𑀚𑁆𑀚𑀺𑀲𑁆𑀲𑀦𑁆𑀢𑀺; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀺; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀦𑁆𑀢𑀺 [𑀧𑀭𑀸𑀫𑀲𑀦𑁆𑀢𑀺 (𑀲𑁆𑀬𑀸. 𑀓𑀁.)] 𑀧𑀭𑀺𑀫𑀚𑁆𑀚𑀦𑁆𑀢𑀺; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸𑀢𑀺.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑀼𑀁 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀅𑀳𑁂𑀲𑀼𑀁…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀲𑀼𑀁, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀦𑁆𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸.

‘‘𑀬𑁂 𑀳𑀺 𑀓𑁂𑀘𑀺 𑀪𑀺𑀓𑁆𑀔𑀯𑁂 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀪𑀺𑀓𑁆𑀔𑀼𑀲𑀼𑀢𑁆𑀢𑀁

𑁮𑁩𑁦. ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

𑁯. 𑀇𑀤𑁆𑀥𑀸𑀤𑀺𑀤𑁂𑀲𑀦𑀸𑀲𑀼𑀢𑁆𑀢𑀁

𑁮𑁩𑁧. ‘‘𑀇𑀤𑁆𑀥𑀺𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀇𑀤𑁆𑀥𑀺𑀧𑀸𑀤𑀜𑁆𑀘 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀜𑁆𑀘 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁. 𑀢𑀁 𑀲𑀼𑀡𑀸𑀣.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑁄? 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀬𑀸 𑀧𑀝𑀺𑀧𑀤𑀸 𑀇𑀤𑁆𑀥𑀺𑀮𑀸𑀪𑀸𑀬 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺 …𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺. 𑀦𑀯𑀫𑀁.

𑁧𑁦. 𑀯𑀺𑀪𑀗𑁆𑀕𑀲𑀼𑀢𑁆𑀢𑀁

𑁮𑁩𑁨. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸’’.

‘‘𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀓𑀣𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 ‘𑀇𑀢𑀺 𑀫𑁂 𑀙𑀦𑁆𑀤𑁄 𑀦 𑀘 𑀅𑀢𑀺𑀮𑀻𑀦𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺’. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 ‘𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸’. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 ‘𑀇𑀢𑀺 𑀫𑁂 𑀯𑀻𑀫𑀁𑀲𑀸 𑀦 𑀘 𑀅𑀢𑀺𑀮𑀻𑀦𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺’. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 ‘𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸’. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑁄 𑀙𑀦𑁆𑀤𑁄? 𑀬𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑁄 𑀓𑁄𑀲𑀚𑁆𑀚𑀲𑀳𑀕𑀢𑁄 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑁄 𑀙𑀦𑁆𑀤𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑁄 𑀙𑀦𑁆𑀤𑁄? 𑀬𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑁄 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑁄 𑀙𑀦𑁆𑀤𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑁄 𑀙𑀦𑁆𑀤𑁄? 𑀬𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑁄 𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑁄 𑀣𑀺𑀦𑀫𑀺𑀤𑁆𑀥𑀲𑀫𑁆𑀧𑀬𑀼𑀢𑁆𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑁄 𑀙𑀦𑁆𑀤𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑁄 𑀙𑀦𑁆𑀤𑁄? 𑀬𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑁄 𑀩𑀳𑀺𑀤𑁆𑀥𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀆𑀭𑀩𑁆𑀪 𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑁄 𑀅𑀦𑀼𑀯𑀺𑀲𑀝𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑁄 𑀙𑀦𑁆𑀤𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀸 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀲𑀼𑀫𑀦𑀲𑀺𑀓𑀢𑀸 𑀲𑀽𑀧𑀥𑀸𑀭𑀺𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀧𑀜𑁆𑀜𑀸𑀬. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄 𑀫𑀁𑀲𑀁 𑀦𑁆𑀳𑀸𑀭𑀼 𑀅𑀝𑁆𑀞𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀓𑁆𑀓𑀁 𑀳𑀤𑀬𑀁 𑀬𑀓𑀦𑀁 𑀓𑀺𑀮𑁄𑀫𑀓𑀁 𑀧𑀺𑀳𑀓𑀁 𑀧𑀧𑁆𑀨𑀸𑀲𑀁 𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 𑀉𑀤𑀭𑀺𑀬𑀁 𑀓𑀭𑀻𑀲𑀁 𑀧𑀺𑀢𑁆𑀢𑀁 𑀲𑁂𑀫𑁆𑀳𑀁 𑀧𑀼𑀩𑁆𑀩𑁄 𑀮𑁄𑀳𑀺𑀢𑀁 𑀲𑁂𑀤𑁄 𑀫𑁂𑀤𑁄 𑀅𑀲𑁆𑀲𑀼 𑀯𑀲𑀸 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀮𑀲𑀺𑀓𑀸 𑀫𑀼𑀢𑁆𑀢’𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄 𑀯𑀺𑀳𑀭𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀤𑀺𑀯𑀸 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀲𑁄 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀭𑀢𑁆𑀢𑀺𑀁 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺; 𑀬𑁂𑀳𑀺 𑀯𑀸 𑀧𑀦 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀭𑀢𑁆𑀢𑀺𑀁 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀲𑁄 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀤𑀺𑀯𑀸 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸 𑀯𑀺𑀳𑀭𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀮𑁄𑀓𑀲𑀜𑁆𑀜𑀸 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀤𑀺𑀯𑀸𑀲𑀜𑁆𑀜𑀸 𑀲𑁆𑀯𑀸𑀥𑀺𑀝𑁆𑀞𑀺𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑀁 𑀯𑀻𑀭𑀺𑀬𑀁? 𑀬𑀁, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑀲𑀳𑀕𑀢𑀁 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑀁 𑀯𑀻𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀁 𑀯𑀻𑀭𑀺𑀬𑀁? 𑀬𑀁, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀁 𑀯𑀻𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀯𑀻𑀭𑀺𑀬𑀁? 𑀬𑀁, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀁 𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑀁 𑀣𑀺𑀦𑀫𑀺𑀤𑁆𑀥𑀲𑀫𑁆𑀧𑀬𑀼𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀯𑀻𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀯𑀻𑀭𑀺𑀬𑀁? 𑀬𑀁, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀁 𑀩𑀳𑀺𑀤𑁆𑀥𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀆𑀭𑀩𑁆𑀪 𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑀁 𑀅𑀦𑀼𑀯𑀺𑀲𑀝𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀯𑀻𑀭𑀺𑀬𑀁…𑀧𑁂….

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑀁 𑀘𑀺𑀢𑁆𑀢𑀁? 𑀬𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀲𑀳𑀕𑀢𑀁 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑀁 𑀘𑀺𑀢𑁆𑀢𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁? 𑀬𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢𑀁? 𑀬𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑀁 𑀣𑀺𑀦𑀫𑀺𑀤𑁆𑀥𑀲𑀫𑁆𑀧𑀬𑀼𑀢𑁆𑀢𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁? 𑀬𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀩𑀳𑀺𑀤𑁆𑀥𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀆𑀭𑀩𑁆𑀪 𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑀁 𑀅𑀦𑀼𑀯𑀺𑀲𑀝𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑀸 𑀯𑀻𑀫𑀁𑀲𑀸? 𑀬𑀸, 𑀪𑀺𑀓𑁆𑀔𑀯𑁂, 𑀯𑀻𑀫𑀁𑀲𑀸 𑀓𑁄𑀲𑀚𑁆𑀚𑀲𑀳𑀕𑀢𑀸 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀮𑀻𑀦𑀸 𑀯𑀻𑀫𑀁𑀲𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀸 𑀯𑀻𑀫𑀁𑀲𑀸? 𑀬𑀸, 𑀪𑀺𑀓𑁆𑀔𑀯𑁂, 𑀯𑀻𑀫𑀁𑀲𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀸 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀸 𑀯𑀻𑀫𑀁𑀲𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀸 𑀯𑀻𑀫𑀁𑀲𑀸? 𑀬𑀸, 𑀪𑀺𑀓𑁆𑀔𑀯𑁂, 𑀯𑀻𑀫𑀁𑀲𑀸 𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑀸 𑀣𑀺𑀦𑀫𑀺𑀤𑁆𑀥𑀲𑀫𑁆𑀧𑀬𑀼𑀢𑁆𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀸 𑀯𑀻𑀫𑀁𑀲𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀸 𑀯𑀻𑀫𑀁𑀲𑀸? 𑀬𑀸, 𑀪𑀺𑀓𑁆𑀔𑀯𑁂, 𑀯𑀻𑀫𑀁𑀲𑀸 𑀩𑀳𑀺𑀤𑁆𑀥𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀆𑀭𑀩𑁆𑀪 𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑀸 𑀅𑀦𑀼𑀯𑀺𑀲𑀝𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀸 𑀯𑀻𑀫𑀁𑀲𑀸…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀏𑀯𑀁 𑀪𑀸𑀯𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀏𑀯𑀁 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀤𑀲𑀫𑀁.

𑀧𑀸𑀲𑀸𑀤𑀓𑀫𑁆𑀧𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀼𑀩𑁆𑀩𑀁 𑀫𑀳𑀧𑁆𑀨𑀮𑀁 𑀙𑀦𑁆𑀤𑀁, 𑀫𑁄𑀕𑁆𑀕𑀮𑁆𑀮𑀸𑀦𑀜𑁆𑀘 𑀉𑀡𑁆𑀡𑀸𑀪𑀁;

𑀤𑁆𑀯𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀪𑀺𑀓𑁆𑀔𑀼, 𑀤𑁂𑀲𑀦𑀸 𑀯𑀺𑀪𑀗𑁆𑀕𑁂𑀦 𑀘𑀸𑀢𑀺.

𑁩. 𑀅𑀬𑁄𑀕𑀼𑀴𑀯𑀕𑁆𑀕𑁄

𑁧. 𑀫𑀕𑁆𑀕𑀲𑀼𑀢𑁆𑀢𑀁

𑁮𑁩𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀼𑀩𑁆𑀩𑁂𑀯 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀫𑀕𑁆𑀕𑁄, 𑀓𑀸 𑀧𑀝𑀺𑀧𑀤𑀸 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀬𑀸’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀢𑀺 𑀫𑁂 𑀙𑀦𑁆𑀤𑁄 𑀦 𑀘 𑀅𑀢𑀺𑀮𑀻𑀦𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑁄 𑀪𑀯𑀺𑀲𑁆𑀲𑀢𑀺. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁, 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸. 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀢𑀺 𑀫𑁂 𑀯𑀻𑀫𑀁𑀲𑀸 𑀦 𑀘 𑀅𑀢𑀺𑀮𑀻𑀦𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀢𑀺𑀧𑁆𑀧𑀕𑁆𑀕𑀳𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺, 𑀦 𑀘 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀸 𑀪𑀯𑀺𑀲𑁆𑀲𑀢𑀺. 𑀧𑀘𑁆𑀙𑀸𑀧𑀼𑀭𑁂𑀲𑀜𑁆𑀜𑀻 𑀘 𑀯𑀺𑀳𑀭𑀢𑀺 𑁋 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂; 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁, 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄; 𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸’ 𑁋 𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺.

‘‘𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀏𑀯𑀁 𑀪𑀸𑀯𑀺𑀢𑁂𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀏𑀯𑀁 𑀩𑀳𑀼𑀮𑀻𑀓𑀢𑁂𑀲𑀼, 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀧𑀞𑀫𑀁.

(𑀙𑀧𑀺 𑀅𑀪𑀺𑀜𑁆𑀜𑀸𑀬𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸).

𑁨. 𑀅𑀬𑁄𑀕𑀼𑀴𑀲𑀼𑀢𑁆𑀢𑀁

𑁮𑁩𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀚𑀸𑀦𑀸𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀇𑀤𑁆𑀥𑀺𑀬𑀸 𑀫𑀦𑁄𑀫𑀬𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀲𑀗𑁆𑀓𑀫𑀺𑀢𑀸’’𑀢𑀺? ‘‘𑀅𑀪𑀺𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀆𑀦𑀦𑁆𑀤, 𑀇𑀤𑁆𑀥𑀺𑀬𑀸 𑀫𑀦𑁄𑀫𑀬𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀲𑀗𑁆𑀓𑀫𑀺𑀢𑀸’’𑀢𑀺. ‘‘𑀅𑀪𑀺𑀚𑀸𑀦𑀸𑀢𑀺 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀺𑀦𑀸 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂𑀦 𑀓𑀸𑀬𑁂𑀦 𑀇𑀤𑁆𑀥𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀲𑀗𑁆𑀓𑀫𑀺𑀢𑀸’’𑀢𑀺? ‘‘𑀅𑀪𑀺𑀚𑀸𑀦𑀸𑀫𑀺 𑀔𑁆𑀯𑀸𑀳𑀁, 𑀆𑀦𑀦𑁆𑀤, 𑀇𑀫𑀺𑀦𑀸 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂𑀦 [𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑁂𑀦 (𑀲𑀻. 𑀲𑁆𑀬𑀸. 𑀓𑀁.)] 𑀓𑀸𑀬𑁂𑀦 𑀇𑀤𑁆𑀥𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀲𑀗𑁆𑀓𑀫𑀺𑀢𑀸’’𑀢𑀺.

‘‘𑀬𑀜𑁆𑀘 𑀔𑁄, 𑀑𑀫𑀸𑀢𑀺, 𑀪𑀦𑁆𑀢𑁂, 𑀪𑀕𑀯𑀸 𑀇𑀤𑁆𑀥𑀺𑀬𑀸 𑀫𑀦𑁄𑀫𑀬𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀬𑀜𑁆𑀘 𑀔𑁄 𑀅𑀪𑀺𑀚𑀸𑀦𑀸𑀢𑀺, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀺𑀦𑀸 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂𑀦 𑀓𑀸𑀬𑁂𑀦 𑀇𑀤𑁆𑀥𑀺𑀬𑀸 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀲𑀗𑁆𑀓𑀫𑀺𑀢𑀸, 𑀢𑀬𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀘𑁆𑀙𑀭𑀺𑀬𑀜𑁆𑀘𑁂𑀯 𑀅𑀩𑁆𑀪𑀼𑀢𑀜𑁆𑀘𑀸’’𑀢𑀺. ‘‘𑀅𑀘𑁆𑀙𑀭𑀺𑀬𑀸 𑀘𑁂𑀯, 𑀆𑀦𑀦𑁆𑀤, 𑀢𑀣𑀸𑀕𑀢𑀸 𑀅𑀘𑁆𑀙𑀭𑀺𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀘, 𑀅𑀩𑁆𑀪𑀼𑀢𑀸 𑀘𑁂𑀯, 𑀆𑀦𑀦𑁆𑀤, 𑀢𑀣𑀸𑀕𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀘’’.

‘‘𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑁄 𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀺 [𑀲𑀫𑀸𑀤𑀳𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀘𑀺𑀢𑁆𑀢𑀫𑁆𑀧𑀺 𑀓𑀸𑀬𑁂 𑀲𑀫𑁄𑀤𑀳𑀢𑀺, 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀓𑀸𑀬𑁂 𑀑𑀓𑁆𑀓𑀫𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀢𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀮𑀳𑀼𑀢𑀭𑁄 𑀘𑁂𑀯 𑀳𑁄𑀢𑀺 𑀫𑀼𑀤𑀼𑀢𑀭𑁄 𑀘 𑀓𑀫𑁆𑀫𑀦𑀺𑀬𑀢𑀭𑁄 𑀘 𑀧𑀪𑀲𑁆𑀲𑀭𑀢𑀭𑁄 𑀘.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀅𑀬𑁄𑀕𑀼𑀴𑁄 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁄 𑀮𑀳𑀼𑀢𑀭𑁄 𑀘𑁂𑀯 𑀳𑁄𑀢𑀺 𑀫𑀼𑀤𑀼𑀢𑀭𑁄 𑀘 𑀓𑀫𑁆𑀫𑀦𑀺𑀬𑀢𑀭𑁄 𑀘 𑀧𑀪𑀲𑁆𑀲𑀭𑀢𑀭𑁄 𑀘; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀲𑀫𑀬𑁂 𑀢𑀣𑀸𑀕𑀢𑁄 𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀓𑀸𑀬𑁂 𑀲𑀫𑁄𑀤𑀳𑀢𑀺, 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀓𑀸𑀬𑁂 𑀑𑀓𑁆𑀓𑀫𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀢𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀮𑀳𑀼𑀢𑀭𑁄 𑀘𑁂𑀯 𑀳𑁄𑀢𑀺 𑀫𑀼𑀤𑀼𑀢𑀭𑁄 𑀘 𑀓𑀫𑁆𑀫𑀦𑀺𑀬𑀢𑀭𑁄 𑀘 𑀧𑀪𑀲𑁆𑀲𑀭𑀢𑀭𑁄 𑀘.

‘‘𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑁄 𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀓𑀸𑀬𑁂 𑀲𑀫𑁄𑀤𑀳𑀢𑀺, 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀓𑀸𑀬𑁂 𑀑𑀓𑁆𑀓𑀫𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀢𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀣𑀯𑀺𑀬𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀢𑀽𑀮𑀧𑀺𑀘𑀼 𑀯𑀸 𑀓𑀧𑁆𑀧𑀸𑀲𑀧𑀺𑀘𑀼 𑀯𑀸 𑀮𑀳𑀼𑀓𑁄 𑀯𑀸𑀢𑀽𑀧𑀸𑀤𑀸𑀦𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀣𑀯𑀺𑀬𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀲𑀫𑀬𑁂 𑀢𑀣𑀸𑀕𑀢𑁄 𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀓𑀸𑀬𑁂 𑀲𑀫𑁄𑀤𑀳𑀢𑀺, 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀓𑀸𑀬𑁂 𑀑𑀓𑁆𑀓𑀫𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀢𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀣𑀯𑀺𑀬𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀪𑀺𑀓𑁆𑀔𑀼𑀲𑀼𑀢𑁆𑀢𑀁

𑁮𑁩𑁫. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺 …𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀁

𑁮𑁩𑁬. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀨𑀮𑀲𑀼𑀢𑁆𑀢𑀁

𑁮𑁩𑁭. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺 …𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀸 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀨𑀮𑀲𑀼𑀢𑁆𑀢𑀁

𑁮𑁩𑁮. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀤𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀘𑀺𑀢𑁆𑀢𑀲𑀫𑀸𑀥𑀺 …𑀧𑁂… 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀲𑀢𑁆𑀢 𑀨𑀮𑀸 𑀲𑀢𑁆𑀢𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸.

‘‘𑀓𑀢𑀫𑁂 𑀲𑀢𑁆𑀢 𑀨𑀮𑀸 𑀲𑀢𑁆𑀢𑀸𑀦𑀺𑀲𑀁𑀲𑀸? 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘 [𑀧𑀝𑀺𑀕𑀘𑁆𑀘 (𑀲𑀻.), 𑀧𑀝𑀺𑀳𑀘𑁆𑀘 (𑀧𑀻.)] 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺 𑀦𑁄 𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺; 𑀅𑀣 𑀫𑀭𑀡𑀓𑀸𑀮𑁂 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺, 𑀦𑁄 𑀘𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺, 𑀦𑁄 𑀘𑁂 𑀫𑀭𑀡𑀓𑀸𑀮𑁂 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺; 𑀅𑀣 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺, 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀇𑀫𑁂 𑀲𑀢𑁆𑀢 𑀨𑀮𑀸 𑀲𑀢𑁆𑀢𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺. 𑀙𑀝𑁆𑀞𑀁.