𑁬. 𑀲𑀽𑀓𑀭𑀔𑀢𑀯𑀕𑁆𑀕𑁄

𑁧. 𑀲𑀸𑀮𑀲𑀼𑀢𑁆𑀢𑀁

𑁫𑁨𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀲𑀸𑀮𑀸𑀬 𑀩𑁆𑀭𑀸𑀳𑁆𑀫𑀡𑀕𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀣𑀸𑀫𑁂𑀦 𑀚𑀯𑁂𑀦 𑀲𑀽𑀭𑁂𑀦 [𑀲𑀽𑀭𑀺𑀬𑁂𑀦 (𑀲𑀻. 𑀲𑁆𑀬𑀸. 𑀓𑀁.)]; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀩𑁄𑀥𑀸𑀬’’.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀩𑁄𑀥𑀺𑀧𑀓𑁆𑀔𑀺𑀬𑁄 𑀥𑀫𑁆𑀫𑁄, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀩𑁄𑀥𑀺𑀧𑀓𑁆𑀔𑀺𑀬𑁄 𑀥𑀫𑁆𑀫𑁄, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀲𑀢𑀺𑀦𑁆𑀤𑁆𑀭𑀺𑀬𑀁 𑀩𑁄𑀥𑀺𑀧𑀓𑁆𑀔𑀺𑀬𑁄 𑀥𑀫𑁆𑀫𑁄, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀩𑁄𑀥𑀺𑀧𑀓𑁆𑀔𑀺𑀬𑁄 𑀥𑀫𑁆𑀫𑁄, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀩𑁄𑀥𑀺𑀧𑀓𑁆𑀔𑀺𑀬𑁄 𑀥𑀫𑁆𑀫𑁄, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀣𑀸𑀫𑁂𑀦 𑀚𑀯𑁂𑀦 𑀲𑀽𑀭𑁂𑀦; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀩𑁄𑀥𑀸𑀬𑀸’’𑀢𑀺. 𑀧𑀞𑀫𑀁.

𑁨. 𑀫𑀮𑁆𑀮𑀺𑀓𑀲𑀼𑀢𑁆𑀢𑀁

𑁫𑁨𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀮𑁆𑀮𑁂𑀲𑀼 [𑀫𑀮𑁆𑀮𑀓𑁂𑀲𑀼 (𑀲𑀻. 𑀲𑁆𑀬𑀸. 𑀓𑀁.), 𑀫𑀮𑁆𑀮𑀺𑀓𑁂𑀲𑀼 (𑀓.)] 𑀯𑀺𑀳𑀭𑀢𑀺 𑀉𑀭𑀼𑀯𑁂𑀮𑀓𑀧𑁆𑀧𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀦𑀺𑀕𑀫𑁄. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀭𑀺𑀬𑀜𑀸𑀡𑀁 𑀦 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀦𑁂𑀯 𑀢𑀸𑀯 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀡𑁆𑀞𑀺𑀢𑀺 𑀳𑁄𑀢𑀺, 𑀦𑁂𑀯 𑀢𑀸𑀯 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀯𑀝𑁆𑀞𑀺𑀢𑀺 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀭𑀺𑀬𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀅𑀣 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀡𑁆𑀞𑀺𑀢𑀺 𑀳𑁄𑀢𑀺, 𑀅𑀣 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀯𑀝𑁆𑀞𑀺𑀢𑀺 𑀳𑁄𑀢𑀺’’.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀯𑀓𑀻𑀯𑀜𑁆𑀘 𑀓𑀽𑀝𑀸𑀕𑀸𑀭𑀲𑁆𑀲 𑀓𑀽𑀝𑀁 𑀦 𑀉𑀲𑁆𑀲𑀺𑀢𑀁 𑀳𑁄𑀢𑀺, 𑀦𑁂𑀯 𑀢𑀸𑀯 𑀕𑁄𑀧𑀸𑀦𑀲𑀻𑀦𑀁 𑀲𑀡𑁆𑀞𑀺𑀢𑀺 𑀳𑁄𑀢𑀺, 𑀦𑁂𑀯 𑀢𑀸𑀯 𑀕𑁄𑀧𑀸𑀦𑀲𑀻𑀦𑀁 𑀅𑀯𑀝𑁆𑀞𑀺𑀢𑀺 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀓𑀽𑀝𑀸𑀕𑀸𑀭𑀲𑁆𑀲 𑀓𑀽𑀝𑀁 𑀉𑀲𑁆𑀲𑀺𑀢𑀁 𑀳𑁄𑀢𑀺, 𑀅𑀣 𑀕𑁄𑀧𑀸𑀦𑀲𑀻𑀦𑀁 𑀲𑀡𑁆𑀞𑀺𑀢𑀺 𑀳𑁄𑀢𑀺, 𑀅𑀣 𑀕𑁄𑀧𑀸𑀦𑀲𑀻𑀦𑀁 𑀅𑀯𑀝𑁆𑀞𑀺𑀢𑀺 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀸𑀯𑀓𑀻𑀯𑀜𑁆𑀘 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀭𑀺𑀬𑀜𑀸𑀡𑀁 𑀦 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀦𑁂𑀯 𑀢𑀸𑀯 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀡𑁆𑀞𑀺𑀢𑀺 𑀳𑁄𑀢𑀺, 𑀦𑁂𑀯 𑀢𑀸𑀯 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀯𑀝𑁆𑀞𑀺𑀢𑀺 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀭𑀺𑀬𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀅𑀣 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁…𑀧𑁂… 𑀅𑀯𑀝𑁆𑀞𑀺𑀢𑀺 𑀳𑁄𑀢𑀺.

‘‘𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲, 𑀲𑀢𑀺𑀦𑁆𑀤𑁆𑀭𑀺𑀬𑀲𑁆𑀲, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲. 𑀧𑀜𑁆𑀜𑀯𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀢𑀤𑀦𑁆𑀯𑀬𑀸 𑀲𑀤𑁆𑀥𑀸 𑀲𑀡𑁆𑀞𑀸𑀢𑀺, 𑀢𑀤𑀦𑁆𑀯𑀬𑀁 𑀯𑀻𑀭𑀺𑀬𑀁 𑀲𑀡𑁆𑀞𑀸𑀢𑀺, 𑀢𑀤𑀦𑁆𑀯𑀬𑀸 𑀲𑀢𑀺 𑀲𑀡𑁆𑀞𑀸𑀢𑀺, 𑀢𑀤𑀦𑁆𑀯𑀬𑁄 𑀲𑀫𑀸𑀥𑀺 𑀲𑀡𑁆𑀞𑀸𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑁂𑀔𑀲𑀼𑀢𑁆𑀢𑀁

𑁫𑁨𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑁂𑀔𑁄 𑀪𑀺𑀓𑁆𑀔𑀼 𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑁂𑀬𑁆𑀬, 𑀅𑀲𑁂𑀔𑁄 𑀪𑀺𑀓𑁆𑀔𑀼 𑀅𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀅𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑁂𑀬𑁆𑀬𑀸’’𑀢𑀺?

𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸…𑀧𑁂… ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑁂𑀔𑁄 𑀪𑀺𑀓𑁆𑀔𑀼 𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑁂𑀬𑁆𑀬, 𑀅𑀲𑁂𑀔𑁄 𑀪𑀺𑀓𑁆𑀔𑀼 𑀅𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀅𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑁂𑀬𑁆𑀬’’.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑁂𑀔𑁄 𑀪𑀺𑀓𑁆𑀔𑀼 𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑁂𑀔𑁄 𑀪𑀺𑀓𑁆𑀔𑀼 𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑀸𑀢𑀺’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑁄 𑀏𑀯𑀁 𑀪𑀽𑀢𑀁 𑀢𑀘𑁆𑀙𑀁 𑀢𑀣𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀬𑀣𑀸 𑀪𑀕𑀯𑀸’𑀢𑀺? 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀦𑀢𑁆𑀣𑀺 𑀔𑁄 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑁄 𑀏𑀯𑀁 𑀪𑀽𑀢𑀁 𑀢𑀘𑁆𑀙𑀁 𑀢𑀣𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀬𑀣𑀸 𑀪𑀕𑀯𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑁂𑀔𑁄 𑀪𑀺𑀓𑁆𑀔𑀼 𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑀸𑀢𑀺’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑁂𑀔𑁄 𑀪𑀺𑀓𑁆𑀔𑀼 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀚𑀸𑀦𑀸𑀢𑀺 𑁋 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑁋 𑀬𑀁𑀕𑀢𑀺𑀓𑀸𑀦𑀺 𑀬𑀁𑀧𑀭𑀫𑀸𑀦𑀺 𑀬𑀁𑀨𑀮𑀸𑀦𑀺 𑀬𑀁𑀧𑀭𑀺𑀬𑁄𑀲𑀸𑀦𑀸𑀦𑀺. 𑀦 𑀳𑁂𑀯 𑀔𑁄 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑁂𑀔𑁄 𑀪𑀺𑀓𑁆𑀔𑀼 𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑀸𑀢𑀺’’.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀅𑀲𑁂𑀔𑁄 𑀪𑀺𑀓𑁆𑀔𑀼 𑀅𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀅𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑀸𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁂𑀔𑁄 𑀪𑀺𑀓𑁆𑀔𑀼 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀚𑀸𑀦𑀸𑀢𑀺 𑁋 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑁋 𑀬𑀁𑀕𑀢𑀺𑀓𑀸𑀦𑀺 𑀬𑀁𑀧𑀭𑀫𑀸𑀦𑀺 𑀬𑀁𑀨𑀮𑀸𑀦𑀺 𑀬𑀁𑀧𑀭𑀺𑀬𑁄𑀲𑀸𑀦𑀸𑀦𑀺. 𑀓𑀸𑀬𑁂𑀦 𑀘 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺; 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀅𑀲𑁂𑀔𑁄 𑀪𑀺𑀓𑁆𑀔𑀼 𑀅𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀅𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑀸𑀢𑀺’’.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑁂𑀔𑁄 𑀪𑀺𑀓𑁆𑀔𑀼 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀚𑀸𑀦𑀸𑀢𑀺. ‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀲𑁄𑀢𑀺𑀦𑁆𑀤𑁆𑀭𑀺𑀬𑀁, 𑀖𑀸𑀦𑀺𑀦𑁆𑀤𑁆𑀭𑀺𑀬𑀁, 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑀁 𑁋 𑀇𑀫𑀸𑀦𑀺 𑀔𑁄 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀸𑀦𑀺 𑀘 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦 𑀓𑀼𑀳𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’𑀢𑀺 𑀧𑀚𑀸𑀦𑀸𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀅𑀲𑁂𑀔𑁄 𑀪𑀺𑀓𑁆𑀔𑀼 𑀅𑀲𑁂𑀔𑀪𑀽𑀫𑀺𑀬𑀁 𑀞𑀺𑀢𑁄 ‘𑀅𑀲𑁂𑀔𑁄𑀲𑁆𑀫𑀻’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀧𑀤𑀲𑀼𑀢𑁆𑀢𑀁

𑁫𑁨𑁪. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀚𑀗𑁆𑀕𑀮𑀸𑀦𑀁 [𑀚𑀗𑁆𑀕𑀫𑀸𑀦𑀁 (𑀲𑀻. 𑀧𑀻.)] 𑀧𑀸𑀡𑀸𑀦𑀁 𑀧𑀤𑀚𑀸𑀢𑀸𑀦𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀳𑀢𑁆𑀣𑀺𑀧𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀳𑀢𑁆𑀣𑀺𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀫𑀳𑀦𑁆𑀢𑀢𑁆𑀢𑁂𑀦; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀧𑀤𑀸𑀦𑀺 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀩𑁄𑀥𑀸𑀬. 𑀓𑀢𑀫𑀸𑀦𑀺 𑀘, 𑀪𑀺𑀓𑁆𑀔𑀯𑁂, 𑀧𑀤𑀸𑀦𑀺 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀧𑀤𑀁, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀤𑀁, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀲𑀢𑀺𑀦𑁆𑀤𑁆𑀭𑀺𑀬𑀁 𑀧𑀤𑀁, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀤𑀁, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺; 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀤𑀁, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀚𑀗𑁆𑀕𑀮𑀸𑀦𑀁 𑀧𑀸𑀡𑀸𑀦𑀁 𑀧𑀤𑀚𑀸𑀢𑀸𑀦𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀳𑀢𑁆𑀣𑀺𑀧𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀳𑀢𑁆𑀣𑀺𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀫𑀳𑀦𑁆𑀢𑀢𑁆𑀢𑁂𑀦; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀧𑀤𑀸𑀦𑀺 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀤𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀩𑁄𑀥𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀸𑀭𑀲𑀼𑀢𑁆𑀢𑀁

𑁫𑁨𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀲𑀸𑀭𑀕𑀦𑁆𑀥𑀸, 𑀮𑁄𑀳𑀺𑀢𑀘𑀦𑁆𑀤𑀦𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺; 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀩𑁄𑀥𑀸𑀬. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀩𑁄𑀥𑀺𑀧𑀓𑁆𑀔𑀺𑀬𑁄 𑀥𑀫𑁆𑀫𑁄, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀁 …𑀧𑁂… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀩𑁄𑀥𑀺𑀧𑀓𑁆𑀔𑀺𑀬𑁄 𑀥𑀫𑁆𑀫𑁄, 𑀢𑀁 𑀩𑁄𑀥𑀸𑀬 𑀲𑀁𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀲𑀸𑀭𑀕𑀦𑁆𑀥𑀸, 𑀮𑁄𑀳𑀺𑀢𑀘𑀦𑁆𑀤𑀦𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑁋 𑀩𑁄𑀥𑀸𑀬𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀧𑀢𑀺𑀝𑁆𑀞𑀺𑀢𑀲𑀼𑀢𑁆𑀢𑀁

𑁫𑁨𑁬. ‘‘𑀏𑀓𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀺. 𑀓𑀢𑀫𑀲𑁆𑀫𑀺𑀁 𑀏𑀓𑀥𑀫𑁆𑀫𑁂? 𑀅𑀧𑁆𑀧𑀫𑀸𑀤𑁂. 𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀭𑀓𑁆𑀔𑀢𑀺 𑀆𑀲𑀯𑁂𑀲𑀼 𑀘 𑀲𑀸𑀲𑀯𑁂𑀲𑀼 𑀘 𑀥𑀫𑁆𑀫𑁂𑀲𑀼. 𑀢𑀲𑁆𑀲 𑀘𑀺𑀢𑁆𑀢𑀁 𑀭𑀓𑁆𑀔𑀢𑁄 𑀆𑀲𑀯𑁂𑀲𑀼 𑀘 𑀲𑀸𑀲𑀯𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀲𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀻’’𑀢𑀺. 𑀙𑀝𑁆𑀞𑀁.

𑁭. 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀲𑀼𑀢𑁆𑀢𑀁

𑁫𑁨𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀫𑀢𑁄𑀕𑀥𑀸𑀦𑀺 𑀳𑁄𑀦𑁆𑀢𑀺 𑀅𑀫𑀢𑀧𑀭𑀸𑀬𑀡𑀸𑀦𑀺 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀡𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀡𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀫𑀢𑁄𑀕𑀥𑀸𑀦𑀺 𑀳𑁄𑀦𑁆𑀢𑀺 𑀅𑀫𑀢𑀧𑀭𑀸𑀬𑀡𑀸𑀦𑀺 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀦𑀻’’𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢! 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀫𑀢𑁄𑀕𑀥𑀸𑀦𑀺 𑀳𑁄𑀦𑁆𑀢𑀺 𑀅𑀫𑀢𑀧𑀭𑀸𑀬𑀡𑀸𑀦𑀺 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀡𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀸𑀬𑀡𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀫𑀢𑁄𑀕𑀥𑀸𑀦𑀺 𑀳𑁄𑀦𑁆𑀢𑀺 𑀅𑀫𑀢𑀧𑀭𑀸𑀬𑀡𑀸𑀦𑀺 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀦𑀺’’.

‘‘𑀪𑀽𑀢𑀧𑀼𑀩𑁆𑀩𑀸𑀳𑀁, 𑀪𑀦𑁆𑀢𑁂, 𑀓𑀲𑁆𑀲𑀧𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀘𑀭𑀺𑀁. 𑀢𑀢𑁆𑀭𑀧𑀺 𑀫𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀲𑀳𑀓𑁄 𑀪𑀺𑀓𑁆𑀔𑀼, 𑀲𑀳𑀓𑁄 𑀪𑀺𑀓𑁆𑀔𑀽’𑀢𑀺. 𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀁𑀬𑁂𑀯 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀦𑁆𑀦𑁄. 𑀢𑀢𑁆𑀭𑀧𑀺 𑀫𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀻’’’𑀢𑀺. ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢! 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺, 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑀬𑀣𑀸 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀫𑀢𑁄𑀕𑀥𑀸𑀦𑀺 𑀳𑁄𑀦𑁆𑀢𑀺 𑀅𑀫𑀢𑀧𑀭𑀸𑀬𑀡𑀸𑀦𑀺 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀦𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀲𑀽𑀓𑀭𑀔𑀢𑀲𑀼𑀢𑁆𑀢𑀁

𑁫𑁨𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀲𑀽𑀓𑀭𑀔𑀢𑀸𑀬𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺 [𑀧𑀯𑀢𑁆𑀢𑁂𑀢𑀻𑀢𑀺 (𑀲𑀻.)]? ‘‘𑀅𑀦𑀼𑀢𑁆𑀢𑀭𑀜𑁆𑀳𑀺, 𑀪𑀦𑁆𑀢𑁂, 𑀬𑁄𑀕𑀓𑁆𑀔𑁂𑀫𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀅𑀦𑀼𑀢𑁆𑀢𑀭𑀜𑁆𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀬𑁄𑀕𑀓𑁆𑀔𑁂𑀫𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺.

‘‘𑀓𑀢𑀫𑁄 𑀘, 𑀲𑀸𑀭𑀺𑀧𑀼𑀢𑁆𑀢, 𑀅𑀦𑀼𑀢𑁆𑀢𑀭𑁄 𑀬𑁄𑀕𑀓𑁆𑀔𑁂𑀫𑁄 𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀉𑀧𑀲𑀫𑀕𑀸𑀫𑀺𑀁 𑀲𑀫𑁆𑀩𑁄𑀥𑀕𑀸𑀫𑀺𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀉𑀧𑀲𑀫𑀕𑀸𑀫𑀺𑀁 𑀲𑀫𑁆𑀩𑁄𑀥𑀕𑀸𑀫𑀺𑀁. 𑀅𑀬𑀁 𑀔𑁄, 𑀪𑀦𑁆𑀢𑁂, 𑀅𑀦𑀼𑀢𑁆𑀢𑀭𑁄 𑀬𑁄𑀕𑀓𑁆𑀔𑁂𑀫𑁄 𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀏𑀲𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀅𑀦𑀼𑀢𑁆𑀢𑀭𑁄 𑀬𑁄𑀕𑀓𑁆𑀔𑁂𑀫𑁄 𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺.

‘‘𑀓𑀢𑀫𑁄 𑀘, 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁄 𑀬𑀁 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀲𑀕𑀸𑀭𑀯𑁄 𑀯𑀺𑀳𑀭𑀢𑀺 𑀲𑀧𑁆𑀧𑀢𑀺𑀲𑁆𑀲𑁄 [𑀲𑀧𑁆𑀧𑀝𑀺𑀲𑁆𑀲𑁄 (𑀲𑁆𑀬𑀸. 𑀓𑀁. 𑀓.)], 𑀥𑀫𑁆𑀫𑁂 𑀲𑀕𑀸𑀭𑀯𑁄 𑀯𑀺𑀳𑀭𑀢𑀺 𑀲𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂 𑀲𑀕𑀸𑀭𑀯𑁄 𑀯𑀺𑀳𑀭𑀢𑀺 𑀲𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬 𑀲𑀕𑀸𑀭𑀯𑁄 𑀯𑀺𑀳𑀭𑀢𑀺 𑀲𑀧𑁆𑀧𑀢𑀺𑀲𑁆𑀲𑁄, 𑀲𑀫𑀸𑀥𑀺𑀲𑁆𑀫𑀺𑀁 𑀲𑀕𑀸𑀭𑀯𑁄 𑀯𑀺𑀳𑀭𑀢𑀺 𑀲𑀧𑁆𑀧𑀢𑀺𑀲𑁆𑀲𑁄. 𑀅𑀬𑀁 𑀔𑁄, 𑀪𑀦𑁆𑀢𑁂, 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁄 𑀬𑀁 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢! 𑀏𑀲𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑁄 𑀬𑀁 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀣𑀸𑀕𑀢𑁂 𑀯𑀸 𑀢𑀣𑀸𑀕𑀢𑀲𑀸𑀲𑀦𑁂 𑀯𑀸 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀉𑀧𑁆𑀧𑀸𑀤𑀲𑀼𑀢𑁆𑀢𑀁

𑁫𑁨𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀜𑁆𑀜𑀢𑁆𑀭 𑀢𑀣𑀸𑀕𑀢𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀜𑁆𑀜𑀢𑁆𑀭 𑀢𑀣𑀸𑀕𑀢𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀉𑀧𑁆𑀧𑀸𑀤𑀲𑀼𑀢𑁆𑀢𑀁

𑁫𑁩𑁦. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀜𑁆𑀜𑀢𑁆𑀭 𑀲𑀼𑀕𑀢𑀯𑀺𑀦𑀬𑀸. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀺𑀢𑀸𑀦𑀺 𑀩𑀳𑀼𑀮𑀻𑀓𑀢𑀸𑀦𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀜𑁆𑀜𑀢𑁆𑀭 𑀲𑀼𑀕𑀢𑀯𑀺𑀦𑀬𑀸’’𑀢𑀺. 𑀤𑀲𑀫𑀁.

𑀲𑀽𑀓𑀭𑀔𑀢𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀸𑀮𑀁 𑀫𑀮𑁆𑀮𑀺𑀓𑀁 𑀲𑁂𑀔𑁄 𑀘, 𑀧𑀤𑀁 𑀲𑀸𑀭𑀁 𑀧𑀢𑀺𑀝𑁆𑀞𑀺𑀢𑀁;

𑀩𑁆𑀭𑀳𑁆𑀫𑀲𑀽𑀓𑀭𑀔𑀢𑀸𑀬𑁄, 𑀉𑀧𑁆𑀧𑀸𑀤𑀸 𑀅𑀧𑀭𑁂 𑀤𑀼𑀯𑁂𑀢𑀺.