𑁪. 𑀧𑀞𑀫𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀁

𑁫𑁦𑁪. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸, 𑀦 𑀘 𑀧𑀦𑁂𑀢𑁂 𑀆𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀁 𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀫𑀡𑁂𑀲𑀼 𑀘𑁂𑀯 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀘 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸, 𑀢𑁂 𑀘 𑀧𑀦𑀸𑀬𑀲𑁆𑀫𑀦𑁆𑀢𑁄 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀘𑀢𑀼𑀢𑁆𑀣𑀁.