𑁧-𑁧𑁦. 𑀑𑀖𑀸𑀤𑀺𑀲𑀼𑀢𑁆𑀢𑀤𑀲𑀓𑀁

𑁬𑁪𑁧-𑁬𑁫𑁦. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀭𑀸𑀕𑁄, 𑀅𑀭𑀽𑀧𑀭𑀸𑀕𑁄, 𑀫𑀸𑀦𑁄, 𑀉𑀤𑁆𑀥𑀘𑁆𑀘𑀁, 𑀅𑀯𑀺𑀚𑁆𑀚𑀸 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 …𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀁… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 … 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀩𑁆𑀩𑀸𑀦𑀻’’𑀢𑀺.

𑀑𑀖𑀯𑀕𑁆𑀕𑁄 𑀲𑀢𑁆𑀢𑀭𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀑𑀖𑁄 𑀬𑁄𑀕𑁄 𑀉𑀧𑀸𑀤𑀸𑀦𑀁, 𑀕𑀦𑁆𑀣𑀸 𑀅𑀦𑀼𑀲𑀬𑁂𑀦 𑀘;

𑀓𑀸𑀫𑀕𑀼𑀡𑀸 𑀦𑀻𑀯𑀭𑀡𑀸, 𑀔𑀦𑁆𑀥𑀸 𑀑𑀭𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑀁 𑀘𑀢𑀼𑀢𑁆𑀣𑀁.