𑁫. 𑀅𑀫𑀢𑀯𑀕𑁆𑀕𑁄

𑁧. 𑀅𑀫𑀢𑀲𑀼𑀢𑁆𑀢𑀁

𑁪𑁦𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑀽𑀲𑀼, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀯𑀺𑀳𑀭𑀣. 𑀫𑀸 𑀯𑁄 𑀅𑀫𑀢𑀁 𑀧𑀦𑀲𑁆𑀲. 𑀓𑀢𑀫𑁂𑀲𑀼 𑀘𑀢𑀽𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀇𑀫𑁂𑀲𑀼, 𑀪𑀺𑀓𑁆𑀔𑀯𑁂, 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀯𑀺𑀳𑀭𑀣. 𑀫𑀸 𑀯𑁄 𑀅𑀫𑀢𑀁 𑀧𑀦𑀲𑁆𑀲𑀸’’𑀢𑀺. 𑀧𑀞𑀫𑀁.

𑁨. 𑀲𑀫𑀼𑀤𑀬𑀲𑀼𑀢𑁆𑀢𑀁

𑁪𑁦𑁮. ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄? 𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄; 𑀆𑀳𑀸𑀭𑀦𑀺𑀭𑁄𑀥𑀸 𑀓𑀸𑀬𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀁 𑀅𑀢𑁆𑀣𑀗𑁆𑀕𑀫𑁄. 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀘𑀺𑀢𑁆𑀢𑀲𑁆𑀲 𑀲𑀫𑀼𑀤𑀬𑁄; 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀘𑀺𑀢𑁆𑀢𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑁄; 𑀫𑀦𑀲𑀺𑀓𑀸𑀭𑀦𑀺𑀭𑁄𑀥𑀸 𑀥𑀫𑁆𑀫𑀸𑀦𑀁 𑀅𑀢𑁆𑀣𑀗𑁆𑀕𑀫𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑀕𑁆𑀕𑀲𑀼𑀢𑁆𑀢𑀁

𑁪𑁦𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀸𑀫𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀏𑀓𑀸𑀬𑀦𑁄 𑀅𑀬𑀁 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑀤𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’’.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀸𑀬𑁂 𑀯𑀸 𑀪𑀺𑀓𑁆𑀔𑀼 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑁂𑀬𑁆𑀬 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼 𑀯𑀸 𑀪𑀺𑀓𑁆𑀔𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑁂𑀬𑁆𑀬…𑀧𑁂… 𑀘𑀺𑀢𑁆𑀢𑁂 𑀯𑀸 𑀪𑀺𑀓𑁆𑀔𑀼 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑁂𑀬𑁆𑀬…𑀧𑁂… 𑀥𑀫𑁆𑀫𑁂𑀲𑀼 𑀯𑀸 𑀪𑀺𑀓𑁆𑀔𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑁂𑀬𑁆𑀬 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀓𑀸𑀬𑀦𑁄 𑀅𑀬𑀁 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑀤𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀫𑀫 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢! 𑀏𑀓𑀸𑀬𑀦𑁄 𑀅𑀬𑀁, 𑀪𑀦𑁆𑀢𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑀤𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’’.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀸𑀬𑁂 𑀯𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑁂𑀬𑁆𑀬 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼 𑀯𑀸…𑀧𑁂… 𑀘𑀺𑀢𑁆𑀢𑁂 𑀯𑀸 …𑀧𑁂… 𑀥𑀫𑁆𑀫𑁂𑀲𑀼 𑀯𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑁂𑀬𑁆𑀬 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀓𑀸𑀬𑀦𑁄 𑀅𑀬𑀁, 𑀪𑀦𑁆𑀢𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑀤𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺.

‘‘𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺. 𑀇𑀤𑀁 𑀯𑀢𑁆𑀯𑀸 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’’𑀦𑁆𑀢𑀺. 𑀢𑀢𑀺𑀬𑀁;

𑁪. 𑀲𑀢𑀺𑀲𑀼𑀢𑁆𑀢𑀁

𑁪𑁧𑁦. ‘‘𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺. 𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀓𑀼𑀲𑀮𑀭𑀸𑀲𑀺𑀲𑀼𑀢𑁆𑀢𑀁

𑁪𑁧𑁧. ‘‘‘𑀓𑀼𑀲𑀮𑀭𑀸𑀲𑀻’𑀢𑀺, 𑀪𑀺𑀓𑁆𑀔𑀯𑁂, 𑀯𑀤𑀫𑀸𑀦𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀓𑁂𑀯𑀮𑁄 𑀳𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀭𑀸𑀲𑀺, 𑀬𑀤𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. ‘𑀓𑀼𑀲𑀮𑀭𑀸𑀲𑀻’𑀢𑀺, 𑀪𑀺𑀓𑁆𑀔𑀯𑁂, 𑀯𑀤𑀫𑀸𑀦𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀓𑁂𑀯𑀮𑁄 𑀳𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀭𑀸𑀲𑀺, 𑀬𑀤𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀼𑀢𑁆𑀢𑀁

𑁪𑁧𑁨. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀇𑀥 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀸𑀳𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀲𑁆𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀬𑀢𑁄 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀺𑀲𑁆𑀲𑀲𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀺𑀲𑁆𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼; 𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀬𑁆𑀬𑀸𑀲𑀺’’.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀬𑀢𑁄 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀲𑁆𑀲𑀲𑀺, 𑀢𑀢𑁄 𑀢𑀼𑀬𑁆𑀳𑀁, 𑀪𑀺𑀓𑁆𑀔𑀼, 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀫𑀺𑀲𑁆𑀲𑀢𑀺 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀙𑀝𑁆𑀞𑀁.

𑁭. 𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀁

𑁪𑁧𑁩. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀇𑀥 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀓𑀸𑀬𑀲𑀼𑀘𑀭𑀺𑀢𑀁 𑀪𑀸𑀯𑁂𑀲𑁆𑀲𑀲𑀺. 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀯𑀘𑀻𑀲𑀼𑀘𑀭𑀺𑀢𑀁 𑀪𑀸𑀯𑁂𑀲𑁆𑀲𑀲𑀺. 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀫𑀦𑁄𑀲𑀼𑀘𑀭𑀺𑀢𑀁 𑀪𑀸𑀯𑁂𑀲𑁆𑀲𑀲𑀺. 𑀬𑀢𑁄 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀓𑀸𑀬𑀲𑀼𑀘𑀭𑀺𑀢𑀁 𑀪𑀸𑀯𑁂𑀲𑁆𑀲𑀲𑀺, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀯𑀘𑀻𑀲𑀼𑀘𑀭𑀺𑀢𑀁 𑀪𑀸𑀯𑁂𑀲𑁆𑀲𑀲𑀺, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀫𑀦𑁄𑀲𑀼𑀘𑀭𑀺𑀢𑀁 𑀪𑀸𑀯𑁂𑀲𑁆𑀲𑀲𑀺, 𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀬𑁆𑀬𑀸𑀲𑀺’’.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀬𑀢𑁄 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀲𑁆𑀲𑀲𑀺, 𑀢𑀢𑁄 𑀢𑀼𑀬𑁆𑀳𑀁, 𑀪𑀺𑀓𑁆𑀔𑀼, 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀫𑀺𑀲𑁆𑀲𑀢𑀺 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀻’’𑀢𑀺…𑀧𑁂… 𑀅𑀜𑁆𑀜𑀢𑀭𑁄 𑀘 𑀧𑀦 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀲𑀢𑁆𑀢𑀫𑀁.

𑁮. 𑀫𑀺𑀢𑁆𑀢𑀲𑀼𑀢𑁆𑀢𑀁

𑁪𑁧𑁪. ‘‘𑀬𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀓𑀫𑁆𑀧𑁂𑀬𑁆𑀬𑀸𑀣, 𑀬𑁂 𑀘 𑀔𑁄 𑀲𑁄𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸, 𑀢𑁂 𑀯𑁄, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀬 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸.

‘‘𑀓𑀢𑀫𑁂𑀲𑀁, 𑀘𑀢𑀼𑀦𑁆𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀬𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀓𑀫𑁆𑀧𑁂𑀬𑁆𑀬𑀸𑀣, 𑀬𑁂 𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸, 𑀢𑁂 𑀯𑁄, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀬 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀯𑁂𑀤𑀦𑀸𑀲𑀼𑀢𑁆𑀢𑀁

𑁪𑁧𑁫. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀸𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑁂𑀢𑀩𑁆𑀩𑀸.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀸𑀬 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺. 𑀦𑀯𑀫𑀁.

𑁧𑁦. 𑀆𑀲𑀯𑀲𑀼𑀢𑁆𑀢𑀁

𑁪𑁧𑁬. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂 𑀆𑀲𑀯𑀸. 𑀓𑀢𑀫𑁂 𑀢𑀬𑁄? 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀆𑀲𑀯𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀆𑀲𑀯𑀸𑀦𑀁 𑀧𑀳𑀸𑀦𑀸𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑁂𑀢𑀩𑁆𑀩𑀸.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀆𑀲𑀯𑀸𑀦𑀁 𑀧𑀳𑀸𑀦𑀸𑀬 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺. 𑀤𑀲𑀫𑀁.

𑀅𑀫𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀫𑀢𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄, 𑀲𑀢𑀺 𑀓𑀼𑀲𑀮𑀭𑀸𑀲𑀺 𑀘;

𑀧𑀸𑀢𑀺𑀫𑁄𑀓𑁆𑀔𑀁 𑀤𑀼𑀘𑁆𑀘𑀭𑀺𑀢𑀁, 𑀫𑀺𑀢𑁆𑀢𑀯𑁂𑀤𑀦𑀸 𑀆𑀲𑀯𑁂𑀦 𑀘𑀸𑀢𑀺.