𑁬. 𑀲𑀸𑀓𑀘𑁆𑀙𑀯𑀕𑁆𑀕𑁄

𑁧. 𑀆𑀳𑀸𑀭𑀲𑀼𑀢𑁆𑀢𑀁

𑁨𑁩𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀦𑁆𑀦𑀜𑁆𑀘, 𑀪𑀺𑀓𑁆𑀔𑀯𑁂, 𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀦𑁆𑀦𑀜𑁆𑀘 𑀩𑁄𑀚𑁆𑀛𑀗𑁆𑀕𑀸𑀦𑀁 𑀆𑀳𑀸𑀭𑀜𑁆𑀘 𑀅𑀦𑀸𑀳𑀸𑀭𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀺; 𑀢𑀁 𑀲𑀼𑀡𑀸𑀣. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀖𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀭𑀢𑀺 𑀢𑀦𑁆𑀤𑀺 𑀯𑀺𑀚𑀫𑁆𑀪𑀺𑀢𑀸 𑀪𑀢𑁆𑀢𑀲𑀫𑁆𑀫𑀤𑁄 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀺𑀘𑀺𑀓𑀺𑀘𑁆𑀙𑀸𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸 𑀳𑀻𑀦𑀧𑀡𑀻𑀢𑀸 𑀥𑀫𑁆𑀫𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀯𑀽𑀧𑀲𑀫𑁄. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸 𑀳𑀻𑀦𑀧𑀡𑀻𑀢𑀸 𑀥𑀫𑁆𑀫𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀅𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸 𑀳𑀻𑀦𑀧𑀡𑀻𑀢𑀸 𑀥𑀫𑁆𑀫𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀅𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼. 𑀢𑀢𑁆𑀣 𑀅𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀅𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺. 𑀢𑀢𑁆𑀣 𑀅𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸.

‘‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸? 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀅𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑁋 𑀅𑀬𑀫𑀦𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸’’𑀢𑀺. 𑀧𑀞𑀫𑀁.

𑁨. 𑀧𑀭𑀺𑀬𑀸𑀬𑀲𑀼𑀢𑁆𑀢𑀁

𑁨𑁩𑁩. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀪𑀺𑀓𑁆𑀔𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀫𑀡𑁄, 𑀆𑀯𑀼𑀲𑁄, 𑀕𑁄𑀢𑀫𑁄 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀣𑀸’𑀢𑀺. 𑀫𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫 𑁋 ‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀣𑀸’𑀢𑀺. 𑀇𑀥 𑀦𑁄, 𑀆𑀯𑀼𑀲𑁄, 𑀓𑁄 𑀯𑀺𑀲𑁂𑀲𑁄, 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄, 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀅𑀫𑁆𑀳𑀸𑀓𑀁 𑀯𑀸, 𑀬𑀤𑀺𑀤𑀁 𑁋 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀁, 𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺?

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁𑀲𑀼 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁𑀲𑀼; 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼 𑁋 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀫𑁆𑀳. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁, 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀫𑁆𑀳. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀫𑁆𑀳. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀅𑀫𑁆𑀳𑁂, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀫𑀡𑁄, 𑀆𑀯𑀼𑀲𑁄, 𑀕𑁄𑀢𑀫𑁄 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 ‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀣𑀸’𑀢𑀺. 𑀫𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫 𑁋 ‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀣𑀸’𑀢𑀺. 𑀇𑀥 𑀦𑁄, 𑀆𑀯𑀼𑀲𑁄, 𑀓𑁄 𑀯𑀺𑀲𑁂𑀲𑁄, 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄, 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀅𑀫𑁆𑀳𑀸𑀓𑀁 𑀯𑀸, 𑀬𑀤𑀺𑀤𑀁 𑁋 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀁, 𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺?

‘‘𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀫𑁆𑀳 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀫𑁆𑀳, 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀫𑁆𑀳 𑁋 ‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀸’’’𑀢𑀺.

‘‘𑀏𑀯𑀁𑀯𑀸𑀤𑀺𑀦𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀅𑀢𑁆𑀣𑀺 𑀧𑀦𑀸𑀯𑀼𑀲𑁄, 𑀧𑀭𑀺𑀬𑀸𑀬𑁄, 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀧𑀜𑁆𑀘 𑀦𑀻𑀯𑀭𑀡𑀸 𑀤𑀲 𑀳𑁄𑀦𑁆𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀘𑀢𑀼𑀤𑁆𑀤𑀲𑀸’𑀢𑀺. 𑀏𑀯𑀁 𑀧𑀼𑀝𑁆𑀞𑀸, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀺, 𑀉𑀢𑁆𑀢𑀭𑀺𑀜𑁆𑀘 𑀯𑀺𑀖𑀸𑀢𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀁. ‘‘𑀦𑀸𑀳𑀁 𑀢𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬, 𑀬𑁄 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸’’.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄, 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀧𑀜𑁆𑀘 𑀦𑀻𑀯𑀭𑀡𑀸 𑀤𑀲 𑀳𑁄𑀦𑁆𑀢𑀺? 𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄 𑀢𑀤𑀧𑀺 𑀦𑀻𑀯𑀭𑀡𑀁, 𑀬𑀤𑀧𑀺 𑀩𑀳𑀺𑀤𑁆𑀥𑀸 𑀓𑀸𑀫𑀘𑁆𑀙𑀦𑁆𑀤𑁄 𑀢𑀤𑀧𑀺 𑀦𑀻𑀯𑀭𑀡𑀁. ‘𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡’𑀦𑁆𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺. 𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑁄 𑀢𑀤𑀧𑀺 𑀦𑀻𑀯𑀭𑀡𑀁, 𑀬𑀤𑀧𑀺 𑀩𑀳𑀺𑀤𑁆𑀥𑀸 𑀩𑁆𑀬𑀸𑀧𑀸𑀤𑁄 𑀢𑀤𑀧𑀺 𑀦𑀻𑀯𑀭𑀡𑀁. ‘𑀩𑁆𑀬𑀸𑀧𑀸𑀤𑀦𑀻𑀯𑀭𑀡’𑀦𑁆𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺. 𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀣𑀺𑀦𑀁 𑀢𑀤𑀧𑀺 𑀦𑀻𑀯𑀭𑀡𑀁, 𑀬𑀤𑀧𑀺 𑀫𑀺𑀤𑁆𑀥𑀁 𑀢𑀤𑀧𑀺 𑀦𑀻𑀯𑀭𑀡𑀁. ‘𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡’𑀦𑁆𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺. 𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀉𑀤𑁆𑀥𑀘𑁆𑀘𑀁 𑀢𑀤𑀧𑀺 𑀦𑀻𑀯𑀭𑀡𑀁, 𑀬𑀤𑀧𑀺 𑀓𑀼𑀓𑁆𑀓𑀼𑀘𑁆𑀘𑀁 𑀢𑀤𑀧𑀺 𑀦𑀻𑀯𑀭𑀡𑀁. ‘𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡’𑀦𑁆𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺. 𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸 𑀢𑀤𑀧𑀺 𑀦𑀻𑀯𑀭𑀡𑀁, 𑀬𑀤𑀧𑀺 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸 𑀢𑀤𑀧𑀺 𑀦𑀻𑀯𑀭𑀡𑀁. ‘𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡’𑀦𑁆𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄, 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀧𑀜𑁆𑀘 𑀦𑀻𑀯𑀭𑀡𑀸 𑀤𑀲 𑀳𑁄𑀦𑁆𑀢𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄, 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀘𑀢𑀼𑀤𑁆𑀤𑀲 𑀳𑁄𑀦𑁆𑀢𑀺? 𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀲𑀢𑀺 𑀢𑀤𑀧𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀲𑀢𑀺 𑀢𑀤𑀧𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. ‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀧𑀜𑁆𑀜𑀸𑀬 𑀧𑀯𑀺𑀘𑀺𑀦𑀢𑀺 [𑀧𑀯𑀺𑀘𑀺𑀦𑀸𑀢𑀺 (𑀓.)] 𑀧𑀯𑀺𑀘𑀭𑀢𑀺 𑀧𑀭𑀺𑀯𑀻𑀫𑀁𑀲𑀫𑀸𑀧𑀚𑁆𑀚𑀢𑀺 𑀢𑀤𑀧𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀧𑀜𑁆𑀜𑀸𑀬 𑀧𑀯𑀺𑀘𑀺𑀦𑀢𑀺 𑀧𑀯𑀺𑀘𑀭𑀢𑀺 𑀧𑀭𑀺𑀯𑀻𑀫𑀁𑀲𑀫𑀸𑀧𑀚𑁆𑀚𑀢𑀺 𑀢𑀤𑀧𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. ‘𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀺𑀓𑀁 𑀯𑀻𑀭𑀺𑀬𑀁 𑀢𑀤𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀁 𑀢𑀤𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. ‘𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀧𑀻𑀢𑀺 𑀢𑀤𑀧𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀻𑀢𑀺 𑀢𑀤𑀧𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. ‘𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺 𑀢𑀤𑀧𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺 𑀢𑀤𑀧𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. ‘𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺 𑀢𑀤𑀧𑀺 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀲𑀫𑀸𑀥𑀺 𑀢𑀤𑀧𑀺 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. ‘𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺.

‘‘𑀬𑀤𑀧𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀉𑀧𑁂𑀓𑁆𑀔𑀸 𑀢𑀤𑀧𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀬𑀤𑀧𑀺 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀉𑀧𑁂𑀓𑁆𑀔𑀸 𑀢𑀤𑀧𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. ‘𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀇𑀢𑀺 𑀳𑀺𑀤𑀁 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀺. 𑀢𑀤𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀤𑁆𑀯𑀬𑀁 𑀳𑁄𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑀸𑀬𑁄, 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀘𑀢𑀼𑀤𑁆𑀤𑀲𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀕𑁆𑀕𑀺𑀲𑀼𑀢𑁆𑀢𑀁

𑁨𑁩𑁪. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. (𑀧𑀭𑀺𑀬𑀸𑀬𑀲𑀼𑀢𑁆𑀢𑀲𑀤𑀺𑀲𑀁).

‘‘𑀏𑀯𑀁𑀯𑀸𑀤𑀺𑀦𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀬𑀲𑁆𑀫𑀺𑀁, 𑀆𑀯𑀼𑀲𑁄, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀢𑀫𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀓𑀸𑀮𑁄 𑀪𑀸𑀯𑀦𑀸𑀬, 𑀓𑀢𑀫𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀚𑁆𑀛𑀗𑁆𑀕𑀸𑀦𑀁 𑀓𑀸𑀮𑁄 𑀪𑀸𑀯𑀦𑀸𑀬? 𑀬𑀲𑁆𑀫𑀺𑀁 𑀧𑀦𑀸𑀯𑀼𑀲𑁄, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀢𑀫𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀓𑀸𑀮𑁄 𑀪𑀸𑀯𑀦𑀸𑀬, 𑀓𑀢𑀫𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀚𑁆𑀛𑀗𑁆𑀕𑀸𑀦𑀁 𑀓𑀸𑀮𑁄 𑀪𑀸𑀯𑀦𑀸𑀬𑀸’𑀢𑀺? 𑀏𑀯𑀁 𑀧𑀼𑀝𑁆𑀞𑀸, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀺, 𑀉𑀢𑁆𑀢𑀭𑀺𑀜𑁆𑀘 𑀯𑀺𑀖𑀸𑀢𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀁.

‘‘𑀦𑀸𑀳𑀁 𑀢𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑁄 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀲𑁆𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲. 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀉𑀤𑀓𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬; 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀺𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀲𑁆𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲. 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬; 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀺𑀢𑀼’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑁆𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀯𑀽𑀧𑀲𑀫𑀬𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲. 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬; 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀯𑀽𑀧𑀲𑀫𑀬𑀁 𑀳𑁄𑀢𑀺.

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀯𑀽𑀧𑀲𑀫𑀬𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲. 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀉𑀤𑀓𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬; 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺. 𑀢𑀢𑀺𑀬𑀁.

𑁪. 𑀫𑁂𑀢𑁆𑀢𑀸𑀲𑀳𑀕𑀢𑀲𑀼𑀢𑁆𑀢𑀁

𑁨𑁩𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀮𑀺𑀬𑁂𑀲𑀼 𑀯𑀺𑀳𑀭𑀢𑀺 𑀳𑀮𑀺𑀤𑁆𑀤𑀯𑀲𑀦𑀁 𑀦𑀸𑀫 𑀓𑁄𑀮𑀺𑀬𑀸𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀳𑀮𑀺𑀤𑁆𑀤𑀯𑀲𑀦𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀳𑀮𑀺𑀤𑁆𑀤𑀯𑀲𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀪𑀺𑀓𑁆𑀔𑀽 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀫𑀡𑁄, 𑀆𑀯𑀼𑀲𑁄, 𑀕𑁄𑀢𑀫𑁄 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣. 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣. 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣𑀸’’’𑀢𑀺.

‘‘𑀫𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫 𑁋 ‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣…𑀧𑁂… 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣𑀸’𑀢𑀺. 𑀇𑀥 𑀦𑁄, 𑀆𑀯𑀼𑀲𑁄, 𑀓𑁄 𑀯𑀺𑀲𑁂𑀲𑁄, 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄, 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀅𑀫𑁆𑀳𑀸𑀓𑀁 𑀯𑀸, 𑀬𑀤𑀺𑀤𑀁 𑁋 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀁, 𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺?

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁𑀲𑀼 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁𑀲𑀼. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼 𑁋 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀳𑀮𑀺𑀤𑁆𑀤𑀯𑀲𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀳𑀮𑀺𑀤𑁆𑀤𑀯𑀲𑀦𑁂 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀫𑁆𑀳. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀳𑀮𑀺𑀤𑁆𑀤𑀯𑀲𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀬𑀁𑀦𑀽𑀦 𑀫𑀬𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫𑀸’’’𑀢𑀺.

‘‘𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀫𑁆𑀳, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀫𑁆𑀳. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀫𑁆𑀳. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀅𑀫𑁆𑀳𑁂, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀢𑀤𑀯𑁄𑀘𑀼𑀁 𑁋

‘‘𑀲𑀫𑀡𑁄, 𑀆𑀯𑀼𑀲𑁄, 𑀕𑁄𑀢𑀫𑁄 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣…𑀧𑁂… 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 … 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣𑀸’’’𑀢𑀺.

‘‘𑀫𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫 𑁋 ‘𑀏𑀣 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣…𑀧𑁂… 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁; 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀣𑀸’𑀢𑀺. 𑀇𑀥 𑀦𑁄, 𑀆𑀯𑀼𑀲𑁄, 𑀓𑁄 𑀯𑀺𑀲𑁂𑀲𑁄, 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄, 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀅𑀫𑁆𑀳𑀸𑀓𑀁 𑀯𑀸, 𑀬𑀤𑀺𑀤𑀁, 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀁, 𑀅𑀦𑀼𑀲𑀸𑀲𑀦𑀺𑀬𑀸 𑀯𑀸 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺?

𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀫𑁆𑀳 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀫𑁆𑀳, 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀫𑁆𑀳 𑁋 ‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀸’𑀢𑀺.

‘‘𑀏𑀯𑀁𑀯𑀸𑀤𑀺𑀦𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀓𑀣𑀁 𑀪𑀸𑀯𑀺𑀢𑀸 𑀧𑀦𑀸𑀯𑀼𑀲𑁄, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸? 𑀓𑀣𑀁 𑀪𑀸𑀯𑀺𑀢𑀸 𑀧𑀦𑀸𑀯𑀼𑀲𑁄, 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸? 𑀓𑀣𑀁 𑀪𑀸𑀯𑀺𑀢𑀸 𑀧𑀦𑀸𑀯𑀼𑀲𑁄, 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸? 𑀓𑀣𑀁 𑀪𑀸𑀯𑀺𑀢𑀸 𑀧𑀦𑀸𑀯𑀼𑀲𑁄, 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸’’’𑀢𑀺? 𑀏𑀯𑀁 𑀧𑀼𑀝𑁆𑀞𑀸, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀺, 𑀉𑀢𑁆𑀢𑀭𑀺𑀜𑁆𑀘 𑀯𑀺𑀖𑀸𑀢𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀁. ‘‘𑀦𑀸𑀳𑀁 𑀢𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬, 𑀬𑁄 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦 𑀯𑀸 𑀢𑀣𑀸𑀕𑀢𑀲𑀸𑀯𑀓𑁂𑀦 𑀯𑀸 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸’’.

‘‘𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀫𑁂𑀢𑁆𑀢𑀸𑀲𑀳𑀕𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀘 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀲𑀼𑀪𑀁 𑀯𑀸 𑀔𑁄 𑀧𑀦 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀪𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀯𑀤𑀸𑀫𑀺, 𑀇𑀥𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀢𑁆𑀢𑀭𑀺𑀯𑀺𑀫𑀼𑀢𑁆𑀢𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀢𑁄.

‘‘𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀭𑀼𑀡𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀓𑀭𑀼𑀡𑀸𑀲𑀳𑀕𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺…𑀧𑁂… 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑀩𑁆𑀩𑀲𑁄 𑀯𑀸 𑀧𑀦 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀯𑀤𑀸𑀫𑀺, 𑀇𑀥𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀢𑁆𑀢𑀭𑀺𑀯𑀺𑀫𑀼𑀢𑁆𑀢𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀢𑁄.

‘‘𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀼𑀤𑀺𑀢𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺 …𑀧𑁂… 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑀩𑁆𑀩𑀲𑁄 𑀯𑀸 𑀧𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀼𑀤𑀺𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀯𑀤𑀸𑀫𑀺, 𑀇𑀥𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀢𑁆𑀢𑀭𑀺𑀯𑀺𑀫𑀼𑀢𑁆𑀢𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀢𑁄.

‘‘𑀓𑀣𑀁 𑀪𑀸𑀯𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀓𑀺𑀁𑀕𑀢𑀺𑀓𑀸 𑀳𑁄𑀢𑀺, 𑀓𑀺𑀁𑀧𑀭𑀫𑀸, 𑀓𑀺𑀁𑀨𑀮𑀸, 𑀓𑀺𑀁𑀧𑀭𑀺𑀬𑁄𑀲𑀸𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑀜𑁆𑀘 𑀧𑀝𑀺𑀓𑀽𑀮𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑀩𑁆𑀩𑀲𑁄 𑀯𑀸 𑀧𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀯𑀤𑀸𑀫𑀺, 𑀇𑀥𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀢𑁆𑀢𑀭𑀺𑀯𑀺𑀫𑀼𑀢𑁆𑀢𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀢𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀁

𑁨𑁩𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦𑁂𑀓𑀤𑀸 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸? 𑀓𑁄 𑀧𑀦, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦𑁂𑀓𑀤𑀸 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸’’𑀢𑀺?

‘‘𑀬𑀲𑁆𑀫𑀺𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀫𑀬𑁂 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀲𑀁𑀲𑀝𑁆𑀞𑁄 𑀮𑀸𑀔𑀸𑀬 𑀯𑀸 𑀳𑀮𑀺𑀤𑁆𑀤𑀺𑀬𑀸 𑀯𑀸 𑀦𑀻𑀮𑀺𑀬𑀸 𑀯𑀸 𑀫𑀜𑁆𑀚𑀺𑀝𑁆𑀞𑀸𑀬 𑀯𑀸. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦 𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀩𑁆𑀬𑀸𑀧𑀸𑀤𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀅𑀕𑁆𑀕𑀺𑀦𑀸 𑀲𑀦𑁆𑀢𑀢𑁆𑀢𑁄 𑀧𑀓𑁆𑀓𑀼𑀣𑀺𑀢𑁄 [𑀧𑀓𑁆𑀓𑀼𑀥𑀺𑀢𑁄 (𑀓.), 𑀉𑀓𑁆𑀓𑀝𑁆𑀞𑀺𑀢𑁄 (𑀲𑀻.), 𑀉𑀓𑁆𑀓𑀼𑀝𑁆𑀞𑀺𑀢𑁄 (𑀲𑁆𑀬𑀸.)] 𑀉𑀲𑁆𑀫𑀼𑀤𑀓𑀚𑀸𑀢𑁄 [𑀉𑀲𑁆𑀲𑀤𑀓𑀚𑀸𑀢𑁄 (𑀲𑀻.), 𑀉𑀲𑁆𑀫𑀸𑀤𑀓𑀚𑀸𑀢𑁄 (𑀲𑁆𑀬𑀸.)]. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦 𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀩𑁆𑀬𑀸𑀧𑀸𑀤𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀣𑀺𑀦𑀫𑀺𑀤𑁆𑀥𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀲𑁂𑀯𑀸𑀮𑀧𑀡𑀓𑀧𑀭𑀺𑀬𑁄𑀦𑀤𑁆𑀥𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦 𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀣𑀺𑀦𑀫𑀺𑀤𑁆𑀥𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀯𑀸𑀢𑁂𑀭𑀺𑀢𑁄 𑀘𑀮𑀺𑀢𑁄 𑀪𑀦𑁆𑀢𑁄 𑀊𑀫𑀺𑀚𑀸𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦 𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺… 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀆𑀯𑀺𑀮𑁄 𑀮𑀼𑀴𑀺𑀢𑁄 𑀓𑀮𑀮𑀻𑀪𑀽𑀢𑁄 𑀅𑀦𑁆𑀥𑀓𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀦 𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦𑁂𑀓𑀤𑀸 𑀤𑀻𑀖𑀭𑀢𑁆𑀢𑀁 𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀦𑀧𑁆𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀅𑀲𑀚𑁆𑀛𑀸𑀬𑀓𑀢𑀸.

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀫𑀬𑁂 𑀦 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀮𑀸𑀔𑀸𑀬 𑀯𑀸 𑀳𑀮𑀺𑀤𑁆𑀤𑀺𑀬𑀸 𑀯𑀸 𑀦𑀻𑀮𑀺𑀬𑀸 𑀯𑀸 𑀫𑀜𑁆𑀚𑀺𑀝𑁆𑀞𑀸𑀬 𑀯𑀸. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂….

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀩𑁆𑀬𑀸𑀧𑀸𑀤𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺… 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀦 𑀅𑀕𑁆𑀕𑀺𑀦𑀸 𑀲𑀦𑁆𑀢𑀢𑁆𑀢𑁄 𑀦 𑀧𑀓𑁆𑀓𑀼𑀣𑀺𑀢𑁄 𑀦 𑀉𑀲𑁆𑀫𑀼𑀤𑀓𑀚𑀸𑀢𑁄, 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀩𑁆𑀬𑀸𑀧𑀸𑀤𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺… 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀣𑀺𑀦𑀫𑀺𑀤𑁆𑀥𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺 … 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀦 𑀲𑁂𑀯𑀸𑀮𑀧𑀡𑀓𑀧𑀭𑀺𑀬𑁄𑀦𑀤𑁆𑀥𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀣𑀺𑀦𑀫𑀺𑀤𑁆𑀥𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺… 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺… 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀦 𑀯𑀸𑀢𑁂𑀭𑀺𑀢𑁄 𑀦 𑀘𑀮𑀺𑀢𑁄 𑀦 𑀪𑀦𑁆𑀢𑁄 𑀦 𑀊𑀫𑀺𑀚𑀸𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺…𑀧𑁂… 𑀉𑀪𑀬𑀢𑁆𑀣𑀫𑁆𑀧𑀺… 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 [𑀧𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 (𑀲𑁆𑀬𑀸.)], 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺; 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀉𑀤𑀧𑀢𑁆𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀆𑀮𑁄𑀓𑁂 𑀦𑀺𑀓𑁆𑀔𑀺𑀢𑁆𑀢𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀬𑀣𑀸𑀪𑀽𑀢𑀁 𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀺𑀁 𑀲𑀫𑀬𑁂 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀢𑁆𑀢𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀉𑀪𑀬𑀢𑁆𑀣𑀫𑁆𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺; 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦𑁂𑀓𑀤𑀸 𑀤𑀻𑀖𑀭𑀢𑁆𑀢𑀁 𑀅𑀲𑀚𑁆𑀛𑀸𑀬𑀓𑀢𑀸𑀧𑀺 𑀫𑀦𑁆𑀢𑀸 𑀧𑀝𑀺𑀪𑀦𑁆𑀢𑀺, 𑀧𑀕𑁂𑀯 𑀲𑀚𑁆𑀛𑀸𑀬𑀓𑀢𑀸.

‘‘𑀲𑀢𑁆𑀢𑀺𑀫𑁂, 𑀩𑁆𑀭𑀸𑀳𑁆𑀫𑀡, 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀦𑀸𑀯𑀭𑀡𑁄 𑀅𑀦𑀻𑀯𑀭𑀡𑁄 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀺. 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀗𑁆𑀕𑀸𑀭𑀯𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀅𑀪𑀬𑀲𑀼𑀢𑁆𑀢𑀁

𑁨𑁩𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀽𑀭𑀡𑁄, 𑀪𑀦𑁆𑀢𑁂, 𑀓𑀲𑁆𑀲𑀧𑁄 𑀏𑀯𑀫𑀸𑀳 𑁋 ‘𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀸𑀬 𑀅𑀤𑀲𑁆𑀲𑀦𑀸𑀬. 𑀅𑀳𑁂𑀢𑀼, 𑀅𑀧𑁆𑀧𑀘𑁆𑀘𑀬𑁄 [𑀅𑀧𑁆𑀧𑀘𑁆𑀘𑀬𑀸 (𑀲𑀻.), 𑀅𑀧𑁆𑀧𑀘𑁆𑀘𑀬𑀁 (?)] 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀳𑁄𑀢𑀺. 𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬. 𑀅𑀳𑁂𑀢𑀼, 𑀅𑀧𑁆𑀧𑀘𑁆𑀘𑀬𑁄 𑀜𑀸𑀡𑀁 𑀤𑀲𑁆𑀲𑀦𑀁 𑀳𑁄𑀢𑀻’𑀢𑀺. 𑀇𑀥 𑀪𑀕𑀯𑀸 𑀓𑀺𑀫𑀸𑀳𑀸’’𑀢𑀺? ‘‘𑀅𑀢𑁆𑀣𑀺, 𑀭𑀸𑀚𑀓𑀼𑀫𑀸𑀭, 𑀳𑁂𑀢𑀼, 𑀅𑀢𑁆𑀣𑀺 𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀸𑀬 𑀅𑀤𑀲𑁆𑀲𑀦𑀸𑀬. 𑀲𑀳𑁂𑀢𑀼, 𑀲𑀧𑁆𑀧𑀘𑁆𑀘𑀬𑁄 [𑀲𑀧𑁆𑀧𑀘𑁆𑀘𑀬𑀸 (𑀲𑀻.), 𑀲𑀧𑁆𑀧𑀘𑁆𑀘𑀬𑀁 (?)] 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀳𑁄𑀢𑀺. 𑀅𑀢𑁆𑀣𑀺, 𑀭𑀸𑀚𑀓𑀼𑀫𑀸𑀭, 𑀳𑁂𑀢𑀼, 𑀅𑀢𑁆𑀣𑀺 𑀧𑀘𑁆𑀘𑀬𑁄 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬. 𑀲𑀳𑁂𑀢𑀼, 𑀲𑀧𑁆𑀧𑀘𑁆𑀘𑀬𑁄 𑀜𑀸𑀡𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼, 𑀓𑀢𑀫𑁄 𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀸𑀬 𑀅𑀤𑀲𑁆𑀲𑀦𑀸𑀬? 𑀓𑀣𑀁 𑀲𑀳𑁂𑀢𑀼, 𑀲𑀧𑁆𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺? ‘‘𑀬𑀲𑁆𑀫𑀺𑀁 𑀔𑁄, 𑀭𑀸𑀚𑀓𑀼𑀫𑀸𑀭, 𑀲𑀫𑀬𑁂 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀓𑀸𑀫𑀭𑀸𑀕𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺 𑁋 𑀅𑀬𑀫𑁆𑀧𑀺 𑀔𑁄, 𑀭𑀸𑀚𑀓𑀼𑀫𑀸𑀭, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀸𑀬 𑀅𑀤𑀲𑁆𑀲𑀦𑀸𑀬. 𑀏𑀯𑀫𑁆𑀧𑀺 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀭𑀸𑀚𑀓𑀼𑀫𑀸𑀭, 𑀬𑀲𑁆𑀫𑀺𑀁 𑀲𑀫𑀬𑁂 𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀩𑁆𑀬𑀸𑀧𑀸𑀤𑀧𑀭𑁂𑀢𑁂𑀦…𑀧𑁂… 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁂𑀦… 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑀺𑀬𑀼𑀝𑁆𑀞𑀺𑀢𑁂𑀦… 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑁂𑀢𑁂𑀦, 𑀉𑀧𑁆𑀧𑀦𑁆𑀦𑀸𑀬 𑀘 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀲𑁆𑀲𑀭𑀡𑀁 𑀬𑀣𑀸𑀪𑀽𑀢𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺 𑁋 𑀅𑀬𑀫𑁆𑀧𑀺 𑀔𑁄, 𑀭𑀸𑀚𑀓𑀼𑀫𑀸𑀭, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀸𑀬 𑀅𑀤𑀲𑁆𑀲𑀦𑀸𑀬. 𑀏𑀯𑀫𑁆𑀧𑀺 𑀲𑀳𑁂𑀢𑀼 𑀲𑀧𑁆𑀧𑀘𑁆𑀘𑀬𑁄 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

‘‘𑀓𑁄 𑀦𑀸𑀫𑀸𑀬𑀁, 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺? ‘‘𑀦𑀻𑀯𑀭𑀡𑀸 𑀦𑀸𑀫𑁂𑀢𑁂, 𑀭𑀸𑀚𑀓𑀼𑀫𑀸𑀭𑀸’’𑀢𑀺. ‘‘𑀢𑀕𑁆𑀖, 𑀪𑀕𑀯𑀸, 𑀦𑀻𑀯𑀭𑀡𑀸; 𑀢𑀕𑁆𑀖, 𑀲𑀼𑀕𑀢, 𑀦𑀻𑀯𑀭𑀡𑀸! 𑀏𑀓𑀫𑁂𑀓𑁂𑀦𑀧𑀺 𑀔𑁄, 𑀪𑀦𑁆𑀢𑁂, 𑀦𑀻𑀯𑀭𑀡𑁂𑀦 𑀅𑀪𑀺𑀪𑀽𑀢𑁄 𑀬𑀣𑀸𑀪𑀽𑀢𑀁 𑀦 𑀚𑀸𑀦𑁂𑀬𑁆𑀬 𑀦 𑀧𑀲𑁆𑀲𑁂𑀬𑁆𑀬, 𑀓𑁄 𑀧𑀦 𑀯𑀸𑀤𑁄 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺?

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼, 𑀓𑀢𑀫𑁄 𑀧𑀘𑁆𑀘𑀬𑁄 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬? 𑀓𑀣𑀁 𑀲𑀳𑁂𑀢𑀼, 𑀲𑀧𑁆𑀧𑀘𑁆𑀘𑀬𑁄 𑀜𑀸𑀡𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺? ‘‘𑀇𑀥, 𑀭𑀸𑀚𑀓𑀼𑀫𑀸𑀭, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑀺𑀢𑁂𑀦 𑀘𑀺𑀢𑁆𑀢𑁂𑀦 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑁋 𑀅𑀬𑀫𑁆𑀧𑀺 𑀔𑁄, 𑀭𑀸𑀚𑀓𑀼𑀫𑀸𑀭, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬. 𑀏𑀯𑀫𑁆𑀧𑀺 𑀲𑀳𑁂𑀢𑀼, 𑀲𑀧𑁆𑀧𑀘𑁆𑀘𑀬𑁄 𑀜𑀸𑀡𑀁 𑀤𑀲𑁆𑀲𑀦𑀁 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀭𑀸𑀚𑀓𑀼𑀫𑀸𑀭, 𑀪𑀺𑀓𑁆𑀔𑀼…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑀺𑀢𑁂𑀦 𑀘𑀺𑀢𑁆𑀢𑁂𑀦 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑁋 𑀅𑀬𑀫𑁆𑀧𑀺 𑀔𑁄, 𑀭𑀸𑀚𑀓𑀼𑀫𑀸𑀭, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬. 𑀏𑀯𑀁 𑀲𑀳𑁂𑀢𑀼, 𑀲𑀧𑁆𑀧𑀘𑁆𑀘𑀬𑁄 𑀜𑀸𑀡𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

‘‘𑀓𑁄 𑀦𑀸𑀫𑀸𑀬𑀁, 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺? ‘‘𑀩𑁄𑀚𑁆𑀛𑀗𑁆𑀕𑀸 𑀦𑀸𑀫𑁂𑀢𑁂, 𑀭𑀸𑀚𑀓𑀼𑀫𑀸𑀭𑀸’’𑀢𑀺. ‘‘𑀢𑀕𑁆𑀖, 𑀪𑀕𑀯𑀸, 𑀩𑁄𑀚𑁆𑀛𑀗𑁆𑀕𑀸; 𑀢𑀕𑁆𑀖, 𑀲𑀼𑀕𑀢, 𑀩𑁄𑀚𑁆𑀛𑀗𑁆𑀕𑀸! 𑀏𑀓𑀫𑁂𑀓𑁂𑀦𑀧𑀺 𑀔𑁄, 𑀪𑀦𑁆𑀢𑁂, 𑀩𑁄𑀚𑁆𑀛𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑁂𑀬𑁆𑀬 𑀧𑀲𑁆𑀲𑁂𑀬𑁆𑀬, 𑀓𑁄 𑀧𑀦 𑀯𑀸𑀤𑁄 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺? 𑀬𑁄𑀧𑀺 𑀫𑁂, 𑀪𑀦𑁆𑀢𑁂, 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀆𑀭𑁄𑀳𑀦𑁆𑀢𑀲𑁆𑀲 𑀓𑀸𑀬𑀓𑀺𑀮𑀫𑀣𑁄 𑀘𑀺𑀢𑁆𑀢𑀓𑀺𑀮𑀫𑀣𑁄, 𑀲𑁄𑀧𑀺 𑀫𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀥𑀫𑁆𑀫𑁄 𑀘 𑀫𑁂 𑀅𑀪𑀺𑀲𑀫𑀺𑀢𑁄’’𑀢𑀺. 𑀙𑀝𑁆𑀞𑀁.

𑀲𑀸𑀓𑀘𑁆𑀙𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀳𑀸𑀭𑀸 𑀧𑀭𑀺𑀬𑀸𑀬𑀫𑀕𑁆𑀕𑀺, 𑀫𑁂𑀢𑁆𑀢𑀁 𑀲𑀗𑁆𑀕𑀸𑀭𑀯𑁂𑀦 𑀘;

𑀅𑀪𑀬𑁄 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀕𑀺𑀚𑁆𑀛𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂𑀢𑀺.