𑁧𑁩. 𑀑𑀖𑀯𑀕𑁆𑀕𑁄

𑁧-𑁮. 𑀑𑀖𑀸𑀤𑀺𑀲𑀼𑀢𑁆𑀢𑀁

𑁩𑁦𑁨. ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂, 𑀑𑀖𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀸𑀫𑁄𑀖𑁄, 𑀪𑀯𑁄𑀖𑁄, 𑀤𑀺𑀝𑁆𑀞𑁄𑀖𑁄, 𑀅𑀯𑀺𑀚𑁆𑀚𑁄𑀖𑁄𑀢𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁧𑁦. 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀼𑀢𑁆𑀢𑀁

𑁩𑁧𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀭𑀽𑀧𑀭𑀸𑀕𑁄, 𑀅𑀭𑀽𑀧𑀭𑀸𑀕𑁄, 𑀫𑀸𑀦𑁄, 𑀉𑀤𑁆𑀥𑀘𑁆𑀘𑀁, 𑀅𑀯𑀺𑀚𑁆𑀚𑀸 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀢𑀫𑁂 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁… 𑀅𑀫𑀢𑁄𑀕𑀥𑀁 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁… 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀧𑁄𑀡𑀁 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀁. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺. 𑀤𑀲𑀫𑀁.

𑀑𑀖𑀯𑀕𑁆𑀕𑁄 𑀢𑁂𑀭𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀑𑀖𑁄 𑀬𑁄𑀕𑁄 𑀉𑀧𑀸𑀤𑀸𑀦𑀁, 𑀕𑀦𑁆𑀣𑀸 𑀅𑀦𑀼𑀲𑀬𑁂𑀦 𑀘;

𑀓𑀸𑀫𑀕𑀼𑀡𑀸 𑀦𑀻𑀯𑀭𑀡𑀸, 𑀔𑀦𑁆𑀥𑀸 𑀑𑀭𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀻𑀢𑀺.