𑁭. 𑀧𑀞𑀫𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀅𑀜𑁆𑀜𑀢𑁆𑀭𑀲𑀼𑀢𑁆𑀢𑀁

𑁧𑁧𑁩𑁧. 𑀅𑀣 𑀔𑁄 𑀪𑀕𑀯𑀸 𑀧𑀭𑀺𑀢𑁆𑀢𑀁 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁 𑁋 𑀬𑁄 𑀯𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄, 𑀅𑀬𑀁 𑀯𑀸 𑀫𑀳𑀸𑀧𑀣𑀯𑀻’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀩𑀳𑀼𑀢𑀭𑀁, 𑀬𑀤𑀺𑀤𑀁 𑁋 𑀫𑀳𑀸𑀧𑀣𑀯𑀻; 𑀅𑀧𑁆𑀧𑀫𑀢𑁆𑀢𑀓𑀸𑀬𑀁 𑀪𑀕𑀯𑀢𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄. 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀺, 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺 𑀫𑀳𑀸𑀧𑀣𑀯𑀺𑀁 𑀉𑀧𑀦𑀺𑀥𑀸𑀬 𑀪𑀕𑀯𑀢𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀫𑀦𑀼𑀲𑁆𑀲𑁂𑀲𑀼 𑀧𑀘𑁆𑀘𑀸𑀚𑀸𑀬𑀦𑁆𑀢𑀺; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀅𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑁂𑀳𑀺 [𑀫𑀦𑀼𑀲𑁆𑀲𑁂𑀲𑀼 (𑀧𑀻. 𑀓.)] 𑀧𑀘𑁆𑀘𑀸𑀚𑀸𑀬𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀤𑀺𑀝𑁆𑀞𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀭𑀺𑀬𑀲𑀘𑁆𑀘𑀲𑁆𑀲’’.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺. 𑀧𑀞𑀫𑀁.

𑁨. 𑀧𑀘𑁆𑀘𑀦𑁆𑀢𑀲𑀼𑀢𑁆𑀢𑀁

𑁧𑁧𑁩𑁨. 𑀅𑀣 𑀔𑁄 𑀪𑀕𑀯𑀸 𑀧𑀭𑀺𑀢𑁆𑀢𑀁 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁 𑁋 𑀬𑁄 𑀯𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄, 𑀅𑀬𑀁 𑀯𑀸 𑀫𑀳𑀸𑀧𑀣𑀯𑀻’’𑀢𑀺? ‘‘𑀏𑀢𑀤𑁂𑀯, 𑀪𑀦𑁆𑀢𑁂, 𑀩𑀳𑀼𑀢𑀭𑀁, 𑀬𑀤𑀺𑀤𑀁 𑁋 𑀫𑀳𑀸𑀧𑀣𑀯𑀻; 𑀅𑀧𑁆𑀧𑀫𑀢𑁆𑀢𑀓𑀸𑀬𑀁 𑀪𑀕𑀯𑀢𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄. 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀺, 𑀉𑀧𑀦𑀺𑀥𑀫𑁆𑀧𑀺 𑀦 𑀉𑀧𑁂𑀢𑀺, 𑀓𑀮𑀪𑀸𑀕𑀫𑁆𑀧𑀺 𑀦 𑀉𑀧𑁂𑀢𑀺 𑀫𑀳𑀸𑀧𑀣𑀯𑀺𑀁 𑀉𑀧𑀦𑀺𑀥𑀸𑀬 𑀪𑀕𑀯𑀢𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀬𑀦𑁆𑀢𑀺; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀬𑀦𑁆𑀢𑀺 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼 𑀫𑀺𑀮𑀓𑁆𑀔𑁂𑀲𑀼 [𑀫𑀺𑀮𑀓𑁆𑀔𑀽𑀲𑀼 (𑀲𑁆𑀬𑀸. 𑀓𑀁. 𑀓.)] …𑀧𑁂…. 𑀤𑀼𑀢𑀺𑀬𑀁.

𑁩. 𑀧𑀜𑁆𑀜𑀸𑀲𑀼𑀢𑁆𑀢𑀁

𑁧𑁧𑁩𑁩. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀧𑀦 𑀅𑀭𑀺𑀬𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑀦𑁆𑀦𑀸𑀕𑀢𑀸; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀅𑀯𑀺𑀚𑁆𑀚𑀸𑀕𑀢𑀸 𑀲𑀫𑁆𑀫𑀼𑀴𑁆𑀳𑀸…𑀧𑁂…. 𑀢𑀢𑀺𑀬𑀁.

𑁪. 𑀲𑀼𑀭𑀸𑀫𑁂𑀭𑀬𑀲𑀼𑀢𑁆𑀢𑀁

𑁧𑁧𑁩𑁪. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀅𑀧𑀝𑀺𑀯𑀺𑀭𑀢𑀸…𑀧𑁂…. 𑀘𑀢𑀼𑀢𑁆𑀣𑀁.

𑁫. 𑀑𑀤𑀓𑀲𑀼𑀢𑁆𑀢𑀁

𑁧𑁧𑁩𑁫. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀣𑀮𑀚𑀸; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀉𑀤𑀓𑀚𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼…𑀧𑁂…. 𑀧𑀜𑁆𑀘𑀫𑀁.

𑁬. 𑀫𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁

𑁧𑁧𑁩𑁬. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀫𑀢𑁆𑀢𑁂𑀬𑁆𑀬𑀸; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀅𑀫𑀢𑁆𑀢𑁂𑀬𑁆𑀬𑀸…𑀧𑁂…. 𑀙𑀝𑁆𑀞𑀁.

𑁭. 𑀧𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁

𑁧𑁧𑁩𑁭. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀧𑁂𑀢𑁆𑀢𑁂𑀬𑁆𑀬𑀸; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀅𑀧𑁂𑀢𑁆𑀢𑁂𑀬𑁆𑀬𑀸…𑀧𑁂…. 𑀲𑀢𑁆𑀢𑀫𑀁.

𑁮. 𑀲𑀸𑀫𑀜𑁆𑀜𑀲𑀼𑀢𑁆𑀢𑀁

𑁧𑁧𑁩𑁮. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀲𑀸𑀫𑀜𑁆𑀜𑀸; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀅𑀲𑀸𑀫𑀜𑁆𑀜𑀸…𑀧𑁂…. 𑀅𑀝𑁆𑀞𑀫𑀁.

𑁯. 𑀩𑁆𑀭𑀳𑁆𑀫𑀜𑁆𑀜𑀲𑀼𑀢𑁆𑀢𑀁

𑁧𑁧𑁩𑁯. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀩𑁆𑀭𑀳𑁆𑀫𑀜𑁆𑀜𑀸; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀅𑀩𑁆𑀭𑀳𑁆𑀫𑀜𑁆𑀜𑀸…𑀧𑁂…. 𑀦𑀯𑀫𑀁.

𑁧𑁦. 𑀧𑀘𑀸𑀬𑀺𑀓𑀲𑀼𑀢𑁆𑀢𑀁

𑁧𑁧𑁪𑁦. … ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀓𑀼𑀮𑁂 𑀅𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄𑀢𑀺 [𑀅𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄𑀢𑀺 (𑀲𑁆𑀬𑀸. 𑀓𑀁.)] …𑀧𑁂…. 𑀤𑀲𑀫𑀁.

𑀧𑀞𑀫𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀜𑁆𑀜𑀢𑁆𑀭 𑀧𑀘𑁆𑀘𑀦𑁆𑀢𑀁 𑀧𑀜𑁆𑀜𑀸, 𑀲𑀼𑀭𑀸𑀫𑁂𑀭𑀬𑀑𑀤𑀓𑀸;

𑀫𑀢𑁆𑀢𑁂𑀬𑁆𑀬 𑀧𑁂𑀢𑁆𑀢𑁂𑀬𑁆𑀬𑀸 𑀘𑀸𑀧𑀺, 𑀲𑀸𑀫𑀜𑁆𑀜𑀁 𑀩𑁆𑀭𑀳𑁆𑀫𑀧𑀘𑀸𑀬𑀺𑀓𑀦𑁆𑀢𑀺.