𑁭. 𑀧𑀞𑀫𑀙𑀺𑀕𑁆𑀕𑀴𑀬𑀼𑀕𑀲𑀼𑀢𑁆𑀢𑀁

𑁧𑁧𑁧𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀸𑀲𑀫𑀼𑀤𑁆𑀤𑁂 𑀏𑀓𑀘𑁆𑀙𑀺𑀕𑁆𑀕𑀴𑀁 𑀬𑀼𑀕𑀁 𑀧𑀓𑁆𑀔𑀺𑀧𑁂𑀬𑁆𑀬. 𑀢𑀢𑁆𑀭𑀸𑀧𑀺𑀲𑁆𑀲 𑀓𑀸𑀡𑁄 𑀓𑀘𑁆𑀙𑀧𑁄. 𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀲𑀓𑀺𑀁 𑀲𑀓𑀺𑀁 𑀉𑀫𑁆𑀫𑀼𑀚𑁆𑀚𑁂𑀬𑁆𑀬. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀔𑁄 𑀓𑀸𑀡𑁄 𑀓𑀘𑁆𑀙𑀧𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀲𑀓𑀺𑀁 𑀲𑀓𑀺𑀁 𑀉𑀫𑁆𑀫𑀼𑀚𑁆𑀚𑀦𑁆𑀢𑁄 𑀅𑀫𑀼𑀲𑁆𑀫𑀺𑀁 𑀏𑀓𑀘𑁆𑀙𑀺𑀕𑁆𑀕𑀴𑁂 𑀬𑀼𑀕𑁂 𑀕𑀻𑀯𑀁 𑀧𑀯𑁂𑀲𑁂𑀬𑁆𑀬𑀸’’𑀢𑀺? ‘‘𑀬𑀤𑀺 𑀦𑀽𑀦, 𑀪𑀦𑁆𑀢𑁂, 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦𑀸’’𑀢𑀺.

‘‘𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀓𑀸𑀡𑁄 𑀓𑀘𑁆𑀙𑀧𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀲𑀓𑀺𑀁 𑀲𑀓𑀺𑀁 𑀉𑀫𑁆𑀫𑀼𑀚𑁆𑀚𑀦𑁆𑀢𑁄 𑀅𑀫𑀼𑀲𑁆𑀫𑀺𑀁 𑀏𑀓𑀘𑁆𑀙𑀺𑀕𑁆𑀕𑀴𑁂 𑀬𑀼𑀕𑁂 𑀕𑀻𑀯𑀁 𑀧𑀯𑁂𑀲𑁂𑀬𑁆𑀬, 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀓𑀺𑀁 𑀯𑀺𑀦𑀺𑀧𑀸𑀢𑀕𑀢𑁂𑀦 𑀩𑀸𑀮𑁂𑀦 [𑀯𑀺𑀦𑀻𑀢𑀕𑀢𑁂𑀦 𑀩𑀳𑀼𑀮𑁂𑀦 (𑀓.)] 𑀫𑀦𑀼𑀲𑁆𑀲𑀢𑁆𑀢𑀁 𑀯𑀤𑀸𑀫𑀺’’.

𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦 𑀳𑁂𑀢𑁆𑀣, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀥𑀫𑁆𑀫𑀘𑀭𑀺𑀬𑀸, 𑀲𑀫𑀘𑀭𑀺𑀬𑀸, 𑀓𑀼𑀲𑀮𑀓𑀺𑀭𑀺𑀬𑀸, 𑀧𑀼𑀜𑁆𑀜𑀓𑀺𑀭𑀺𑀬𑀸. 𑀅𑀜𑁆𑀜𑀫𑀜𑁆𑀜𑀔𑀸𑀤𑀺𑀓𑀸 𑀏𑀢𑁆𑀣, 𑀪𑀺𑀓𑁆𑀔𑀯𑁂, 𑀯𑀢𑁆𑀢𑀢𑀺 𑀤𑀼𑀩𑁆𑀩𑀮𑀔𑀸𑀤𑀺𑀓𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀤𑀺𑀝𑁆𑀞𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀭𑀺𑀬𑀲𑀘𑁆𑀘𑀲𑁆𑀲.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺. 𑀲𑀢𑁆𑀢𑀫𑀁.