𑁭. 𑀢𑀣𑀲𑀼𑀢𑁆𑀢𑀁

𑁧𑁦𑁯𑁭. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺; 𑀢𑀲𑁆𑀫𑀸 ‘𑀅𑀭𑀺𑀬𑀲𑀘𑁆𑀘𑀸𑀦𑀻’𑀢𑀺 𑀯𑀼𑀘𑁆𑀘𑀦𑁆𑀢𑀺.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺. 𑀲𑀢𑁆𑀢𑀫𑀁.